ᐃᖃᓗᖕᓂ ᐊᐅᐸᖅᑐᒥ ᐊᕐᓇᙴᔾᔪᑎᒥ ᐅᓪᓗᖓᓂ ᐱᓱᒃᑎᑦ ᐊᑭᕋᖅᑐᖅᐳᑦ ᐊᕐᓇᓂᒃ ᐋᓐᓂᖅᓯᕆᓂᐅᔪᒥ
‘ᖃᓄᐃᓕᐅᕐᓂᖃᕆᐊᖃᖅᐳᒍᑦ, ᐃᑲᔪᖅᓱᐃᓂᖃᕆᐊᖃᖅᐳᒍᑦ, ᐅᓇ ᐃᓱᓕᑦᑕᕆᐊᖃᖅᐳᖅ,’ ᐃᓄᒋᐊᒃᑐᓂ ᑐᓵᕗᑦ
80−ᐸᓗᖕᓂ ᐃᓄᖕᓂ ᑲᑎᓚᐅᖅᐳᖅ ᐱᓱᖕᓂᕐᒧᑦ ᐃᖃᓗᖕᓂ ᓇᓗᓇᐃᖅᓯᓂᕐᒥ ᐊᒻᒪ ᐅᔾᔨᕈᓱᖕᓂᐅᔪᒥ ᖃᐅᔨᑎᑦᑎᓂᕐᒧᑦ ᐊᐅᐸᖅᑐᒥ ᐊᕐᓇᙴᔾᔪᑎᒥ ᐅᓪᓗᖓᓂ ᒪᐃ 5−ᒥ. ᐅᓪᓗ ᐃᖅᑲᐅᒪᓂᖃᖅᐳᖅ ᐊᓯᐅᖅᑲᔪᓂ ᐊᒻᒪ ᐃᓄᐊᖅᑕᐅᔪᓂ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ, ᓂᕕᐊᖅᓵᓄᑦ ᐊᒻᒪ ᒪᕐᕉᖕᓂ−ᑕᕐᓂᓕᖕᓂ ᐃᓄᖕᓂᑦ. (ᑕᐃᕕᑦ ᓛᒃᕼᐄᑦ ᐊᔾᔨᖁᑎᖓ)
For the English version of this story, see Iqaluit Red Dress Day marchers oppose violence against women.
ᐅᖃᖅᑕᐅᖏᓐᓇᖅᑐᖅ, “ᓇᔭᑦᑎᓐᓂ ᑎᒡᓕᒃᑕᐅᔪᖃᕈᓐᓃᕐᓕ!” ᑐᓴᖅᑕᐅᔪᓐᓇᖅᐳᖅ ᐃᖃᓗᖕᓂ ᕿᑎᖅᐸᓯᐊᓂ ᐃᓂᐅᔪᒥ 80−ᐸᓗᖕᓂ ᐃᓄᖕᓂ ᐱᓱᒃᑎᓪᓗᒋᑦ ᒪᐃ 5−ᒥ ᓇᓗᓇᐃᖅᓯᓂᕐᒧᑦ ᐊᐅᐸᖅᑐᒥ ᐊᕐᓇᙴᔾᔪᑎᒥ ᐅᓪᓗᖓᓂ.
“ᖃᓄᐃᓕᐅᕐᓂᖃᕆᐊᖃᖅᐳᒍᑦ, ᐃᑲᔪᖅᓱᐃᓂᖃᕆᐊᖃᖅᐳᒍᑦ, ᐅᓇ ᐃᓱᓕᑦᑕᕆᐊᖃᖅᐳᖅ,” ᐅᖃᓚᐅᖅᐳᖅ ᖁᓪᓖᑦ ᓄᓇᕗᒻᒥ ᐊᕐᓇᓄᑦ ᑲᑎᒪᔩᑦ ᐊᖓᔪᖅᑳᖓ ᐋᒻᐳᕐ ᐊᒡᓘᒃᑲᖅ ᐅᖃᓪᓚᖕᓂᐅᔪᒥ ᓯᕗᓂᐊᓂ ᐱᓱᖕᓂᐅᔪᒥ.
ᐊᐅᐸᖅᑐᒥ ᐊᕐᓇᙴᔾᔪᑎᒥ ᐅᓪᓗᖓᓂ, ᖃᐅᔨᒪᔭᐅᓪᓚᕆᒃᑐᒥ ᑲᓇᑕᒥ ᐅᓪᓗᖓᓂ ᐅᔾᔨᕈᓱᖕᓂᐅᔪᒥ ᐊᓯᓯᐅᖅᑲᔪᓂ ᐊᒻᒪ ᐃᓄᐊᖅᑕᐅᔪᓂ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ, ᓂᕕᐊᖅᓵᓄᑦ ᐊᒻᒪ ᒪᕐᕉᖕᓂ−ᑕᕐᓂᓕᖕᓂ ᐃᓄᖕᓂ, ᐱᓕᕆᐊᖑᓲᖑᕗᖅ ᓴᖅᑭᑎᑦᑎᓂᕐᒥ ᐅᔾᔨᕈᓱᖕᓂᑐᐃᓐᓇᐅᙱᑦᑐᒥ ᐊᑲᐅᙱᓕᐅᕈᑕᐅᔪᒥ ᑭᓯᐊᓂ ᐃᖅᑲᐅᒪᓂᕐᒧᑦ ᐱᕋᔭᒃᑕᐅᓂᑯᓂ.
ᐊᐅᐸᖅᑐᒥ ᐊᕐᓇᙴᔾᔪᑎᒥ ᐱᖅᑯᓯᖓ ᐱᒋᐊᓚᐅᖅᐳᖅ 2010−ᒥ ᐊᓪᓚᖓᔪᒥ ᓴᓇᐅᒐᓕᕆᔨ ᔭᐃᒥ ᐸᓛᒃ ᓴᖅᑭᑎᑦᑎᓚᐅᖅᑎᓪᓗᒍ ᑎᑎᕋᐅᔭᒐᕐᒥ ᐃᓕᓯᓂᐅᔪᒥ ᓂᕕᙵᖅᓯᓪᓗᓂ ᐃᓄᖃᙱᑦᑐᒥ ᐊᐅᐸᖅᑐᒥ ᐊᕐᓇᙴᔾᔪᑎᓂ ᐃᖅᑲᐅᒪᓂᕐᒧᑦ ᐊᓯᐅᖅᑲᔪᓂ ᐊᒻᒪ ᐃᓄᐊᖅᑕᐅᔪᓂ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ.
ᓇᓗᓇᐃᒃᑯᑕᓂ ᐃᓄᒋᐊᖑᔪᓂ ᐃᓗᓕᖃᓚᐅᖅᐳᑦ ᐅᖃᐅᓯᒃᓴᓂ ᓲᕐᓗ “ᖃᔅᓯᓂ ᐊᓯᐅᔭᕆᐊᖃᖅᐸᑦ ᑭᓯᐊᓂ ᓈᓚᓕᕈᕕᑦ?” ᐊᒻᒪ “ᐅᓇ ᑕᐃᒪᐃᖏᓐᓇᕆᐊᖃᙱᓚᖅ.”
ᓄᓇᖃᖅᑳᖅᓯᒪᔪᓄᑦ ᐊᕐᓇᐃᑦ 12−ᖏᖅᓱᓪᓗᐊᖅᑐᒥ ᐅᓄᕐᓂᖅᓴᐅᔪᒥ ᐃᓄᐊᖅᑕᐅᑐᐃᓐᓇᕆᐊᖃᖅᐳᑦ ᑲᓇᑕᒥ ᓄᓇᖃᖅᑳᖅᓯᒪᙱᑦᑐᓄᑦ ᐊᕐᓇᓄᑦ, ᐅᖃᐅᓯᐅᓪᓗᓂ ᑭᖑᓪᓕᖅᐹᒥ ᐅᓂᒃᑳᓕᐊᒥ ᑲᑎᒪᔨᐅᔪᓄᑦ ᑐᕌᖅᑎᑦᑎᓚᐅᖅᑐᒥ ᑲᓇᑕᒥ ᑐᑭᓯᒋᐊᕐᓂᐅᔪᒥ ᐊᓯᐅᖅᑲᔪᓂ ᐊᒻᒪ ᐃᓄᐊᖅᑕᐅᔪᓂ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ ᐊᒻᒪ ᓂᕕᐊᖅᓵᓄᑦ ᐊᕐᕌᒍᑦ ᑎᓴᒪᓂ ᖄᖏᖅᓯᒪᓕᖅᑐᓂ.
ᐊᒡᓅᒃᑲᖅ ᐅᖃᓚᐅᖅᐳᖅ ᐃᓄᐃᑦ ᐊᕐᓇᐃᑦ 14−ᖏᖅᓱᓪᓗᐊᖅᑐᒥ ᐅᓄᕐᓂᖅᓴᐅᔪᒥ ᐃᓄᐊᖅᑕᐅᑐᐃᓐᓇᕆᐊᖃᖅᐳᑦ ᓄᓇᖃᖅᑳᖅᓯᒪᙱᑦᑐᓄᑦ ᐊᕐᓇᓄᑦ.
“ᑕᒪᓐᓇ ᐃᓱᒪᒋᒍᒃ,” ᐅᖃᐅᔾᔨᓚᐅᖅᐳᖅ ᐃᓄᒋᐊᖑᔪᓂ.
ᐱᓱᖕᓂᖅ ᐋᖅᑭᒃᓱᖅᑕᐅᓚᐅᖅᐳᖅ ᖁᓪᓖᑦᑯᓐᓂ ᐊᒻᒪ YWCA ᐊᒡᕕᒃ ᓄᓇᕗᒻᒥ.
ᓯᓚᒡᑕᓂ ᖁᓪᓖᑦ ᐃᒡᓗᖁᑎᖓᓐᓂ, ᖁᑦᑎᒃᑐᖅ ᒪᓕᒐᓕᐅᖅᑎ ᑕᐃᕕᑦ ᐊᕿᐊᕈᖅ ᐅᖃᓪᓚᓚᐅᖅᐳᖅ ᐊᒻᒪᓗᑦᑕᐅᖅ ᑭᒡᒐᖅᑐᐃᔨᐅᔪᖅ ᐸᐅᕐᑑᑎᑦ ᐃᓄᖕᓄᑦ ᐊᕐᓇᓄᑦ ᑲᓇᑕᒥ.
ᐃᖃᓗᐃᑦ-ᒪᓂᕋᔭᖕᒥ ᒪᓕᒐᓕᐅᖅᑎ ᐋᑕᒻ ᐋᕆᐊᖅ ᓚᐃᑦᔅᑑᓐ ᐱᓱᒃᑐᓃᖃᑕᐅᓚᓇᐅᕆᕗᖅ ᐊᒻᒪ ᐅᖃᓚᐅᖅᐳᖅ ᐅᓄᕐᓂᖅᓴᓂ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐱᔭᕆᐊᖃᖅᐳᑦ ᕿᒫᕝᕕᖕᓄᑦ ᐊᒻᒪ ᐃᒡᓗᒋᔭᐅᓚᐅᑲᖕᓂᐊᖅᑐᓄᑦ ᓴᐳᔾᔨᓯᒪᓂᕐᒧᑦ ᐊᕐᓇᓄᑦ ᐊᒻᒪ ᓂᕕᐊᖅᓵᓄᑦ.
“ᓱᓕᓂᓪᓚᕆᐅᔪᒥ ᑕᓪᓕᒪᑐᐃᓐᓇᓂ ᓄᓇᖃᖅᐳᒍᑦ ᑐᐊᕕᕐᓇᖅᑐᒥ ᕿᒫᕝᕕᒃᑕᖃᖅᐳᖅ ᐊᒻᒪ ᐃᓚᒌᓄᑦ ᕿᒫᕝᕕᓂᑦ,” ᓄᓇᕗᒻᒥ, ᐅᖃᓚᐅᖅᐳᖅ.
ᐱᓱᖕᓂᖅ ᐅᕙᙶᓚᐅᖅᐳᖅ ᖁᓪᓖᑦ ᐃᒡᓗᖁᑎᖓᓐᓂ ᓄᓇᓕᐸᐅᔭᐅᑉ ᐃᒡᓗᖁᑎᖓᓐᓂ ᑐᓄᐊᓂ, ᑕᐅᕗᖓ ᓄᓇᓕᖕᓄᑦ ᐅᖃᓕᒫᒐᖃᕐᕕᖕᒧᑦ.
ᑭᖑᓂᐊᒍᑦ, ᐸᐅᒃᑑᑎᑦ ᐃᓄᖕᓄᑦ ᐊᕐᓇᓄᑦ ᑲᓇᑕᒥ ᐱᓕᕆᐊᖃᓚᐅᖅᐳᑦ ᐊᐅᐸᖅᑐᒥ ᐊᕐᓇᙴᔾᔪᑎᒥ ᐅᓪᓗᖓᓂ ᖃᓄᐃᓐᓂᐅᔪᒥ ᐅᖃᓕᒫᒐᖃᕐᕕᐅᔪᒥ ᑕᑯᒃᓴᐅᑎᑦᑎᓂᕐᒧᑦ ᐊᐅᐸᖅᑐᒥ ᐊᒪᐅᑎᒥ ᐱᓕᕆᐊᖑᔪᒥ, ᐃᒃᐱᒍᓱᖕᓂᖃᖅᑐᒥ ᐊᓯᐅᖅᑲᔪᓂ ᐊᒻᒪ ᐃᓄᐊᖅᑕᐅᔪᓂ ᐃᓄᖕᓂ ᐊᕐᓇᓂ ᑕᑯᒃᓴᐅᑎᑦᑎᓪᓗᑎᒃ ᑕᓪᓕᒪᓂᒃ ᐊᐅᐸᖅᑐᓂ ᐊᒪᐅᑎᓂ ᓴᓇᔭᐅᓯᒪᔪᓂ ᒥᖅᓱᖅᑎᓂ ᐊᑐᓂ ᐊᕕᒃᑐᖅᓯᒪᓂᐅᔪᒥ ᐃᓄᐃᑦ ᓄᓇᖓᓐᓂ, ᐊᒻᒪᓗ ᐃᑦᑕᕐᓂᓴᐅᔪᒥ.
ᑕᒪᒃᑭᖅᑐᒥ ᑲᑎᙵᓂᐅᔪᒥ ᑕᑯᒃᓴᐅᑎᑕᐅᓂᐊᖅᐳᖅ ᐅᐱᕐᙶᒥ ᑲᑎᒪᓂᐅᔪᒥ ᒪᓕᒐᓕᐅᕐᕕᖕᒥ ᐱᒋᐊᕐᓗᓂ ᒪᐃ 24−ᒥ.
(0) Comments