ᐃᖃᓗᖕᓂ ᓄᑖᖅ ᑎᒍᔭᐅᓯᒪᕝᕕᒃ ᒪᑐᐃᕐᓂᐊᓕᕐᑐᖅ

$90 ᒥᓕᐊᓐ ᑖᓚᑐᕐᑐᖅ ᐃᒡᓗᒃᓴᖅ ᐋᖅᑭᒃᓯᒪᓪᓗᓂ ᐅᓗᕆᐊᓇᙱᓐᓂᕐᓴᐅᓗᓂ ᐊᒻᒪᓗ ᐃᓕᖅᑯᓯᕐᒨᖓᓂᕐᓴᐅᓗᓂ ᐆᒪᙵᓪᓕ ᕿᑭᖅᑖᓗᖕᒥ ᐃᑲᔪᖅᑕᐅᕝᕕᖕᒥᑦ

ᐅᓇ ᓄᑖᖅ ᐋᖅᑭᒋᐊᕐᕕᒃ ᓴᐳᒻᒥᔭᐅᓂᕐᓴᐅᔪᖅ, ᖁᐊᕐᓵᕐᓇᙱᖢᓂ ᐊᒻᒪᓗ ᐃᓕᖅᑯᓯᕐᒧᑦ ᓈᒻᒪᖕᓂᕐᓴᐅᓪᓗᓂ ᐆᒪᙵᓪᓕ ᕿᑭᖅᑖᓗᒃᒥ ᐃᑲᔪᖅᑕᐅᕝᕕᒃᒥᑦ ᑖᓐᓇᓕ ᓄᑖᒧ ᐃᓇᖏᖅᑕᐅᓂᐊᖅᖢᓂ, ᐅᖃᓚᐅᕐᑐᖅ ᓄᓇᕗᒥᑦ ᐃᑲᔪᖅᑕᐅᕝᕕᒃᒥᑦ ᑐᑭᒧᐊᖅᑎᑦᑎᔨᐅᑲᐃᓐᓇᖅᑐᖅ ᒥᑭ ᒪᑲᓚᐅᑦ. (ᐊᔾᔨᓕᐅᕆᔨ ᒥᓚᓂ ᐅᕆᑦᓵᑦ)

By ᑕᐃᕕᑦ ᕕᐊᓐ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For an English version of this story, see Iqaluit’s new jail set to open

ᐃᖃᓗᖕᓂ ᓄᑖᖅ ᑎᒍᔭᐅᓯᒪᕝᕕᒃᓴᖅ ᒪᑐᐃᕐᓂᐊᕐᓂᖓ ᖃᒡᓕᕙᓪᓕᐊᑎᓪᓗᒍ, ᑐᑭᒧᐊᖅᑎᑦᑎᔨᐅᑲᐃᓐᓇᖅᑐᖅ ᐃᑲᔪᖅᑕᐅᕝᕕᓕᕆᓂᕐᒧ ᓄᓇᕗᒥᑦ ᐅᖃᓚᐅᕐᑐᖅ ᐅᓇ ᑎᒍᔭᐅᓯᒪᕝᕕᒃ ᑎᒍᔭᐅᓯᒪᔪᓂᒃ ᐅᓗᕆᐊᓇᙱᓐᓂᕐᓴᒦᑎᑦᑎᓂᐊᕐᑐᖅ, ᐃᓕᖅᑯᓯᕐᒧᓪᓗ ᐋᖅᑭᒃᓯᒪᓂᕐᓴᐅᓗᓂ ᑖᒃᑯᓄᖓ ᑎᒍᔭᐅᓯᒪᔪᓄᑦ.

ᐅᓇ ᓄᑖᖅ $90 ᒥᓕᐊᓐ ᑖᓚᑐᕐᑐᖅ, 96-ᓂ ᐃᒡᓕᖃᖅᖢᓂ ‘ᐋᖅᑭᒋᐊᕐᕕᒃ’ ᐃᑲᔪᖅᑕᐅᕝᕕᒃᓴᖅ ᒪᑐᐃᖅᑕᐅᓪᓚᕆᓛᖅᑐᖅ ᓯᑎᐱᕆ ᐱᒋᐊᓕᓵᖅᓯᒪᓂᖓᓂᒃ, ᐅᖃᖅᑐᖅ ᒥᑭ ᒪᑲᓚᐅᑦ, ᑐᓴᒐᒃᓴᓕᐅᖅᑎᓂᒃ ᕿᒥᕐᕈᐊᖅᑎᑦᑎᑎᓪᓗᒍ ᐃᑲᔪᖅᑕᐅᕝᕕᐅᓂᐊᖅᑐᒥᑦ ᑎᓴᒻᒥᕐᒥ.

“ᐅᓇ ᕿᑭᖅᑖᓗᒃᒥ ᐃᑲᔪᖅᑕᐅᕝᕕᒃ ᓈᒻᒪᙱᓗᐊᖅᑐᐊᓘᖕᒪᑦ ᖃᓄᐃᑦᑕᐃᓕᓂᕐᒧᑦ…ᑖᔅᓱᒪ ᖁᓕᖏᑦ ᐊᑦᑎᓗᐊᖅᖢᑎᒃ, ᑖᕈᔪᒃᑐᐊᓘᓪᓗᓂ, ᓲᖃᐃᒻᒪ ᐃᒐᓛᖃᙱᓗᐊᒧᑦ — ᑕᐃᒪᓐᓇᓗ ᑖᓐᓇ ᐱᓕᕆᕝᕕᒋᑦᑎᐊᕆᐊᒃᓴᖅ ᐊᔪᕐᓇᖅᖢᓂ ᐱᔨᑦᑎᕋᖅᑕᑦᑎᓐᓂ ᐃᑲᔪᕋᓱᒃᑎᓪᓗᑕ,” ᐅᖃᖅᑐᖅ.

“ᖃᐅᔨᒪᒐᓗᐊᖅᖢᑎᒃ ᓴᐳᔾᔭᐅᓯᒪᓐᓇᕐᓂᕐᓴᐅᓂᖓᓂᒃ ᖁᕕᐊᓱᑐᐃᓐᓇᖅᑐᑦ ᑕᕝᕗᙵᕐᓂᐊᕐᓂᖏᓐᓂᒃ.”

2015-ᒥ ᐊᑐᖅᑕᐅᕙᓪᓕᐊᔪᓄᑦ ᐅᓂᒃᑳᓕᐊᕕᓂᕐᓂᒃ ᖃᐅᔨᓴᖅᑎᓄᑦ ᒪᓕᒃᖢᑎᒃ ᑖᒃᑯᐊ ᐱᓕᕆᕝᕕᐅᔪᑦ ᐸᕐᓇᐅᓯᐅᖅᐸᓪᓕᐊᓕᓚᐅᕐᓯᒪᖕᒪᑕ ᓄᑖᒥ ᑎᒍᔭᐅᓯᒪᕝᕕᒃᓴᒥᒃ, ᑖᓐᓇᓗ ᕿᑭᖅᑖᓗᒃᒥ ᐃᑲᔪᖅᑕᐅᕝᕕᐅᑉ ᐅᖓᑎᖓᓃᖢᓂ.

ᐊᑐᖅᑕᐅᕙᓪᓕᐊᔪᓄᑦ ᖃᐅᔨᓴᖅᑎ ᖃᐅᔨᓕᓚᐅᕐᓯᒪᖕᒪᑦ ᑖᓐᓇ ᓄᓇᐅᙱᑦᑐᖅ ᑎᒍᔭᐅᓯᒪᕝᕕᒃ ᖁᐊᕐᓵᕐᓇᕐᓂᖓᓂᒃ, ᐊᑐᖁᔭᐅᙱᑦᑐᓂᒃ ᐱᑕᖃᕕᒡᔪᐊᖅᖢᓂ, ᐊᒻᒪᓗ ᑖᒃᑯᐊ ᑎᒍᔭᐅᓯᒪᔪᑦ ᓱᕈᐊᓗᖕᒦᑎᑕᐅᓪᓗᑎᒃ, ᐃᓕᖅᑯᓯᕐᒨᖓᔪᓂᒡᓗ ᐱᓕᕆᐊᖃᙱᓗᐊᖅᖢᑎᒃ ᐊᒻᒪᓗ ᐱᔪᓐᓇᐅᑎᖏᑦ ᓱᕋᒃᑕᐅᓯᒪᐃᓐᓇᖅᖢᑎᒃ.

ᑖᓐᓇ ᓄᑖᖅ ᐃᒡᓗᒃᓴᖅ ᑕᒪᒃᑯᓂᖓ ᓈᒻᒪᙱᓕᐅᕈᑎᓂᒃ ᐋᖅᑭᓯᓯᒪᓇᓱᒃᓯᒪᔪᖅ, ᒪᑲᓚᐅᑦ ᐅᖃᖅᑐᖅ.

“ᓴᓇᓚᐅᕐᑕᕗᑦ ᒪᒥᓴᕐᓂᕐᒥᒃ ᑕᐅᑐᒃᓯᒪᓪᓗᑕ. ᑎᒍᔭᐅᓯᒪᕝᕕᒃᑎᑐᑦ ᐃᓱᒪᒋᔭᐅᖁᓚᐅᙱᓐᓇᑦᑎᒍᑦ ᓇᐅᒃᑯᑐᐃᓐᓇᖅ ᑖᓐᓇ ᐃᒡᓗ.” ᐅᖃᖅᑐᖅ. “ᓯᓚᑦᑐᖅᓴᕐᕕᒃᑎᑐᑦ ᐃᒃᐱᖕᓇᕐᓂᖅᓴᐅᖅᑰᔨᖕᒪ ᐃᓚᖓᒍᑦ, ᑕᐃᒪᓐᓇᓗ ᐃᒃᐱᖕᓇᖅᑎᓐᓇᓱᒃᖢᑎᒍᑦ.”

ᒪᓕᒐᓕᕆᔨᒃᑯᑦ ᐱᓕᕆᖃᑎᖃᓚᐅᕐᑐᑦ ᐃᓐᓇᑐᖃᕐᓂᒃ ᖃᐅᔨᒪᓂᕐᒧᑦ ᑲᑎᒪᔨᕋᓛᓂᒃ ᐃᓕᖅᑯᓯᓕᕆᓂᕐᒥᒃ ᐱᓕᕆᐊᖃᖅᖢᑎᒃ ᐱᓕᕆᕝᕕᐅᓂᐊᖅᑐᒥᑦ.

ᑕᐃᒪᐃᓐᓂᖓᓄᑦ ᐅᓇ ᑎᒍᔭᐅᓯᒪᕝᕕᒃ ᐃᓄᒃᑐᑦ ᑎᑎᕋᖅᓯᒪᔪᓂᒃ ᓇᓗᓇᐃᒃᑯᑎᖃᐅᕐᑐᑦ ᐃᒡᓗᕈᓯᖏᑦ ᐊᒻᒪ ᐅᐸᒡᕕᐅᔪᑦ, ᒪᑲᓚᐅᑦ ᐅᖃᖅᑐᖅ.

ᓲᕐᓗ ᐅᕙᓂ ᑎᒍᔭᐅᓯᒪᔪᓄᑦ ᐃᓱᒪᕐᓱᕐᓇᕐᓂᖅᓴᒥᒃ, ᑕᐃᔭᐅᓪᓗᓂ ‘ᒪᑭᒋᐊᕐᕕᒃ’, ᑐᑭᖃᖅᖢᓂ ᓯᕗᒧᒃᐸᓪᓕᐊᓂᕐᒥᒃ. ᐅᖃᓕᒫᒐᖃᕐᕕᒃ ᐅᖃᓕᒫᒐᖃᖅᕕᐅᓪᓗᓂ, ᓂᕿᓕᐅᕐᕕᒃ ᑰᖃᕐᕕᐅᓪᓗᓂ ᐊᒻᒪᓗ ᓴᐃᒪᕐᓴᕐᕕᖃᖅᖢᓂ ‘ᓴᐃᒪᓴᕐᕕᒃ’ᒥᑦ.

ᐃᒡᓘᑉ ᐊᑎᖓ ‘ᐋᖅᑭᒋᐊᕐᕕᒃ’, ᑐᑭᖃᖅᑐᖅ “ᐃᓅᓯᒃᑯᑦ ᐱᕙᓪᓕᐊᓂᕐᒥᒃ ᐃᑲᔪᖅᑕᐅᕕᒃ.”

“ᐊᔪᕈᓐᓃᕐᓴᓚᐅᕐᒥᔪᒍᑦ ᖃᕋᓴᐅᔭᒃᑯᑦ ᑎᑎᕋᖅᓯᒪᔪᓂᒃ ᐃᖅᑲᓇᐃᔭᖅᑎᓪᓗ ᓲᖃᐃᒻᒪ ᖃᓪᓗᓈᑐᑦ ᐊᑐᖅᑎᔾᔮᙱᓐᓇᒃᑭᑦ ᓇᓗᓇᐃᖅᓯᓇᓱᒃᑎᓪᓗᒋᑦ ᓇᓃᓐᓂᖏᓐᓂᒃ,” ᒪᑲᓚᐅᑦ ᐅᖃᖅᑐᖅ.

ᑕᒪᒃᑯᐊᓕ ᐊᑐᖁᔭᐅᙱᑦᑐᑦ ᑕᕝᕗᙵᖅᑎᑕᐅᑦᑕᐃᓕᓇᓱᒃᖢᑎᒃ ᐃᒡᓗᒧᑦ, ᐳᓛᖅᑏᑦ ᑎᒍᔭᐅᓯᒪᕝᕕᐅᑉ ᓯᓚᑖᓃᑎᑕᐅᕙᒃᑐᑦ, ᑖᒃᑯᐊ ᐃᒐᓚᐅᔭᕐᒥ ᐊᑯᓐᓂᖃᖅᑎᑕᐅᓪᓗᑎᒃ ᐳᓛᖅᑐᑦ ᐊᒻᒪ ᐳᓛᖅᑕᐅᔪᑦ. ᑎᒥᒧᑦ ᖃᐅᔨᓴᕈᑎᒥ ᐊᑐᖃᑦᑕᕐᓂᐊᕐᒥᔪᑦ ᑲᓴᓗᒃᓯᑲᑕᒋᐊᖃᖃᑦᑕᔾᔮᙱᒻᒪᑕ ᑕᒪᓐᓇ ᐃᖢᐊᙱᓗᐊᖃᑦᑕᕐᓂᖓᓄᑦ ᑎᒍᔭᐅᓯᒪᔪᓄᑦ ᐊᒻᒪ ᐃᖅᑲᓇᐃᔭᖅᑎᓄᑦ, ᒪᑲᓚᐅᑦ ᐅᖃᖅᑐᖅ.

“ᑕᐃᒪᓕ ᐃᓯᖅᑎᑦᑎᔭᕐᓂᙱᓐᓂᕐᓴᐅᓕᕐᑐᖅ ᐊᑐᖁᔭᐅᕙᙱᑦᑐᓂᒃ ᓇᒡᔭᖅᑕᐅᔪᓐᓇᖅᑐᓂᒃ ᑎᒍᔭᐅᓯᒪᕝᕕᒃᒧᑦ,” ᐅᖃᖅᑐᖅ.

ᑖᓐᓇ ᓄᑖᖅ ᑎᒍᔭᐅᓯᒪᕝᕕᒃ ᒍᓛᔾᔪᖃᕐᒥᔪᖅ ᐋᓐᓂᖅᑐᓂᒃ ᑐᐊᕕᕐᓇᖅᑐᓕᕆᔨᓄᑦ ᐊᒻᒪᓗ ᐸᓖᓯᒃᑯᑦ ᓄᓇᓯᐅᑎᖏᓐᓄᑦ ᐊᒡᔭᖅᓯᔾᔪᑎᒃᓴᓂᒃ ᑎᒍᔭᐅᓯᒪᔪᓂᒃ.

ᐅᕙᓂᓕ ᓄᑕᐅᙱᑦᑐᒥ ᑎᒍᔭᐅᓯᒪᕝᕕᒃᒥᑦ, ᑎᒍᔭᐅᔪᑦ ᐊᒡᔭᖅᑕᐅᔪᑦ ᓂᐅᑎᑕᐅᕙᓚᐅᕐᓯᒪᖕᒪᑕ ᐃᒡᓘᑉ ᓯᓚᑖᓂᒃ, ᑕᐃᒪᓐᓇᓗ ᐅᓗᕆᐊᓇᖅᐸᒃᖢᓂᒃ ᖁᐊᐃᕌᓪᓚᒃᑯᑎᒃ ᐋᓐᓂᕋᔭᕆᐊᒃᓴᖏᓐᓂᒃ ᐅᕝᕙᓘᓐᓃᑦ ᕿᒫᓇᓱᒐᔭᕆᐊᒃᓴᖏᓐᓂᒃ, ᒪᑲᓚᐅᑦ ᐅᖃᖅᑐᖅ.

ᐊᑐᓂ ᓇᐅᑦᑎᖅᓱᖅᕕᐅᔪᑦ ᐊᕕᒃᓯᒪᖕᒪᑕ ᐊᓯᖏᓐᓄᑦ, ᒪᑲᓚᐅᑦ ᐅᖃᓚᐅᕐᑐᖅ ᑕᐃᒪᓐᓇᓗ ᐅᓗᕆᐊᓇᙱᓐᓂᕐᓴᐅᓪᓗᓂ ᐊᓯᐊᓄᑦ ᓅᑎᑦᑎᓇᓱᒃᖢᑎᒃ ᑎᒍᔭᐅᓯᒪᔪᓂᒃ ᒪᑯᓄᖓ ᓂᕆᔭᒃᓴᓄᑦ, ᐄᔭᒐᖃᕆᐊᖃᕐᓂᕐᒧᑦ ᐅᕝᕙᓘᓐᓃᑦ ᖃᓄᐃᓕᐅᕈᑎᓄᑦ.

ᐅᓇ ᐅᑕᖅᑭᕕᒋᔭᐅᔪᖅ ᐋᓐᓂᐊᖅᑐᓄᑦ ᐊᖏᓂᕐᓴᐅᔪᖅ ᐋᓐᓂᐊᖅᑐᓄᑦ ᐱᓕᕆᕝᕕᒋᔭᐅᔪᒥᒃ ᕿᑭᖅᑖᓗᒃ ᐃᑲᔪᖅᑕᐅᕝᕕᒃᒥᑦ, ᐊᒻᒪᓗ ᒪᕐᕉᖕᓂ ᐱᓕᕆᐊᖃᕐᕕᖃᖅᖢᓂ ᐋᓐᓂᐊᖃᖅᑐᓄᑦ ᒪᑯᓂᖓ ᐳᕙᒡᓗᖕᓂᕐᒧᑦ, ᐅᕝᕙᓘᓐᓃᑦ ᓄᕙᒡᔪᐊᕐᓇᖅ-19-ᒥᑦ, ᐅᖃᖅᑐᖅ.

ᕿᔪᖕᓂ ᐹᖃᐅᕐᑐᑦ ᐅᓗᕆᐊᓇᙱᓐᓂᕐᓴᓄᑦ ᐃᓂᒋᔭᐅᔪᓂᒃ, ᐊᒻᒪᓗ ᖁᓛᒍᑦ ᐃᒐᓛᖃᐅᖅᖢᓂ ᐊᒻᒪᓗ ᐃᓄᖃᕐᕕᒋᔭᐅᔪᑦ ᑕᕐᕆᔭᕈᓐᓇᐅᑎᑎᒍᑦ ᐅᖃᓗᖃᑦᑕᐅᑎᕝᕕᖃᖅᖢᑎᒃ ᐃᓚᖏᓐᓄᑦ.

“ᓴᐳᔾᔭᐅᓯᒪᑦᑎᐊᕐᓇᖁᔭᕗᑦ ᐃᑲᔪᖅᑕᐅᕝᕕᒃᑎᑐᑦ, ᓱᕋᐃᑲᑕᒍᓐᓇᙱᓐᓂᕐᓴᐅᓗᑎᒃ ᐊᒻᒪᓗ ᓈᒻᒪᙱᓕᐅᕈᑎᑕᖃᖅᐸᑦ ᖃᓄᐃᓕᐅᕈᓐᓇᙱᓐᓂᕐᓴᐅᓗᑎᒃ, ᑭᓯᐊᓂᓕ ᐋᖅᑭᒃᓯᓯᒪᓇᓱᒃᑲᑦᑕ ᐃᑲᔪᕈᑎᖃᕈᓐᓇᖅᑐᒥᑦ ᑖᒃᑯᓄᖓ,” ᒪᑲᓚᐅᑦ ᐅᖃᖅᑐᖅ.

 

Share This Story

(0) Comments

Join the Conversation

Your email address will not be published. Required fields are marked *

*