ᐃᖃᓗᖕᓂ ᓄᓇᓕᐅᔪᖅ ᐃᑲᔪᖅᐳᑦ 6−ᓂ ᐃᓚᒌᖑᔪᓂ ᐃᓂᖃᕈᓐᓃᖅᑐᓂ ᐃᑭᑦᑐᒧᑦ

For an English version of this story, please see Iqaluit community steps up to help 6 families displaced by fire.

ᐃᓚᒌᑦ ᐊᓯᐅᔨᓚᐅᖅᑐᓂ ᐃᑭᓚᐅᖅᑐᒥ ᐱᓇᓱᐊᕈᓯᐅᓚᐅᖅᑐᒥ ᖃᔅᓯᒐᓚᖕᓂ−ᐃᒡᓗᖃᖅᑐᓂ ᐊᖏᕐᕋᕆᔭᐅᓪᓗᑎᒃ ᐃᒡᓗᕐᔪᐊᒥ ᐃᖃᓗᐃᑦ ᐊᑦᑎᖕᓂᖅᓴᒥ ᖁᑦᑎᖕᓂᖅᓴᐅᔪᒥ ᐃᓂᐅᔪᒥ ᓅᑕᐅᓯᒪᕗᑦ ᑐᔪᕐᒥᕕᒋᓚᐅᑲᖕᓂᐊᖅᑕᖓᓐᓄᑦ.

ᑕᓪᓕᒪᓂ 6−ᖑᔪᓂ ᐃᒡᓗᒋᔭᐅᔪᑦ ᐃᖅᑲᓇᐃᔭᖅᑎᓄᑦ ᐃᒡᓗᖁᑎᒋᔭᐅᕗᑦ ᓄᓇᕗᒻᒥ ᐸᕐᓇᐃᔩᒃᑯᓐᓄᑦ, ᐃᓱᒻᒥᖅᑐᐃᔨ ᓯᐊᕆᓐ ᐃᕼᐊᓗᐊᒃ ᓇᓗᓇᐃᖅᓯᓚᐅᖅᐳᖅ. ᑕᒪᒃᑭᑦ ᐃᒡᓗᒋᔭᐅᔪᑦ ᐃᓄᖃᓚᐅᖅᐳᑦ.

“ᑎᓴᒪᓂ ᑕᓪᓕᒪᓂ ᐃᓚᒌᖑᔪᓂ ᑐᑭᓯᐅᒪᓂᓐᓂ ᑭᓱᓕᒫᓂᒃ ᐊᓯᐅᔨᓯᓯᒪᕗᑦ,” ᐅᖃᓚᐅᖅᐳᖅ.

ᐃᑭᒋᐊᓚᐅᖅᐳᖅ 1 ᐅᓐᓄᓴᐸᓗᒃᑯᑦ ᓯᑎᐱᕆ 28−ᒥ ᐃᒡᓗᕐᔪᐊᖅ 5316−ᒥ. 22−ᓂ ᐃᖃᓗᖕᓂ ᖃᑦᑎᕆᔨᐅᔪᑦ ᑭᐅᓚᐅᖅᐳᑦ ᐃᓚᖃᖅᑐᒥ ᖃᑦᑎᕈᑎᓂ ᓄᓇᓯᐅᑎᓂ ᐊᒻᒪ ᑐᐊᕕᕐᓇᖅᑐᖅᓯᐅᑎᓂᑦ, ᓄᓇᓕᐸᐅᔭᒥ ᐅᖃᖅᑎᐅᔪᖅ ᑭᐊᓐᑦ ᑐᕆᔅᑯᓪ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.

ᐃᑲᕐᕋᐸᓗᖕᓂ 11−ᓂ ᐊᓂᒍᖅᑎᓪᓗᒍ, ᐅᓐᓄᐊᒃᑯᑦ ᖁᓛᓂ ᖄᖏᖅᑎᓪᓗᒍ, ᐃᓂᐅᔪᖅ ᐅᖃᐅᓯᐅᓚᐅᖅᐳᖅ ᒪᑐᔭᐅᓂᖓᓂ, ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐃᒡᓗᖃᖅᑎᐅᔪᓂ ᐅᕝᕙᓘᓐᓃᑦ ᖃᑦᑎᕆᔨᓂ ᐋᓐᓂᖅᑐᖃᓚᐅᙱᓐᓂᖓᓂ.

ᐃᑭᑦᑐᒥ ᐱᔾᔪᑎᖓ ᓱᓕ ᖃᐅᔨᓴᖅᑕᐅᕗᖅ, ᑐᕆᔅᑯᓪ ᐅᖃᓚᐅᖅᐳᖅ.

ᐃᕼᐊᓗᐊᒃ ᑕᐃᓚᐅᖅᐸᖓ “ᐊᓯᐅᔨᓂᕐᔪᐊᖑᓂᖓᓂ ᐊᑐᓂ ᐃᖅᑲᓇᐃᔭᖅᑎᑦᑎᓐᓄᑦ, ᐃᓚᖏᓐᓄᑦ ᐊᒻᒪᓗ ᐸᕐᓇᐃᔨᓄᑦ ᐅᓇ ᑕᒪᕐᒥᒐᓚᐅᖕᒪᑦ ᐃᖅᑲᓇᐃᔭᖅᑎᓄᑦ ᐃᒡᓗᒋᔭᐅᖕᒪᑕ.”

ᓯᑎᐱᕆ 29−ᒥ, ᑎᓴᒪᓪᓗᐊᓂ ᐃᒡᓗᒋᔭᐅᔪᓂ ᑕᑯᒃᓴᐅᓂᖃᓚᐅᖅᐳᖅ ᐅᔾᔨᕐᓇᖅᑐᒥ ᓯᓚᑖᓂ ᓱᔪᐃᓂᐅᔪᒥ ᓯᕗᓂᐊᓂ ᑕᓕᖅᐱᖓᓂ ᐃᒡᓗᕐᔪᐊᒥ ᐃᑭᖦᖢᓂ ᐊᒻᒪ ᕿᕐᓂᖅᓯᓯᒪᓪᓗᓂ.

“ᓇᓚᐅᑦᑖᕈᒪᙱᓚᒍᑦ, ᐊᒻᒪ ᐅᖃᓪᓚᕆᒍᓐᓇᙱᑉᐳᒍᑦ, ᑭᓯᐊᓂ ᐊᑐᕐᓂᑯᓕᒫᑦᑎᓐᓂ ᐅᕙᑦᑎᓐᓂ ᐅᖃᐅᔾᔨᕗᖅ ᐃᒡᓗᕐᔪᐊᖅ ᐃᒍᑦᑎᖅᑕᐅᔭᕆᐊᖃᕐᓂᐊᕐᓂᖓᓂ,” ᑐᕆᔅᑯᓪ ᐅᖃᓚᐅᖅᐳᖅ.

ᓄᓇᕗᒻᒥ ᐸᕐᓇᐃᔩᑦ ᓇᓂᓯᓯᒪᕗᑦ ᕿᓚᒻᒥᐅᔪᒥ ᑐᔪᕐᒥᕕᒃᓴᐅᔪᓂ ᐃᓂᖃᕈᓐᓃᖅᑐᓄᑦ ᐃᓚᒌᖑᔪᓄᑦ, ᐃᑲᔪᖅᑕᐅᓪᓗᑎᒃ ᓄᓇᕗᒻᒥ ᒐᕙᒪᒃᑯᓐᓂ, ᒐᕙᒪᑐᖃᒃᑯᓐᓂ ᐊᒻᒪ TBG ᓇᑉᐸᖅᑎᕆᔨᐅᔪᓄᑦ.

“ᐸᕐᓇᐃᔩᑦ ᐊᒃᓱᕈᖅᖢᑎᒃ ᐱᓇᓱᐊᖅᐳᑦ ᐊᑯᓂᐅᓂᖅᓴᐅᔪᒥ ᐃᓘᒃᓴᓂ ᑲᑎᙵᓂᐅᔪᓂ ᐃᖅᑲᓇᐃᔭᖅᑎᑦᑎᓐᓄᑦ ᑭᓯᐊᓂ ᐃᓇᖏᖅᓯᒪᓂᐅᔪᒥ ᐋᖅᑭᒃᑕᐅᓯᒪᓂᖓᓂ ᓴᓇᔭᐅᒍᓂ,” ᐃᕼᐊᓗᐊᒃ ᐅᖃᓚᐅᖅᐳᖅ.

ᑭᖑᓂᐊᒍᑦ ᐃᑭᓚᐅᖅᑐᒥ, ᑐᓐᓂᖅᑯᓯᐊᒃᓴᓂ ᐱᓇᓱᐊᕐᓂᐅᔪᒥ ᐱᒋᐊᖅᑎᑕᐅᔪᖃᓚᐅᖅᐳᖅ ᐃᓄᖕᓄᑦ ᑐᓂᓯᓂᕐᒥ ᐱᔭᕆᐊᖃᓪᓚᕆᒃᑐᓂ ᐊᑐᕆᐊᖃᓪᓚᕆᒃᑐᓂ ᐃᓚᒌᖑᔪᓄᑦ, ᓲᕐᓗ ᐅᑭᐅᖅᓯᐅᑎᓂ ᐊᓐᓄᕌᓂ. ᐊᔾᔨᒌᙱᕈᓘᔭᖅᑐᓂ ᐊᓐᓄᕌᓂ ᐱᔭᕆᐊᖃᖅᐳᑦ ᐃᓚᒌᖑᔪᓄᑦ ᕿᑐᕐᙵᖃᕐᒪᑕ ᐅᕙᙵᑦ ᐱᖓᓱᓂ ᐅᑭᐅᓕᖕᓂ ᐃᓅᓱᒃᑐᓄᑦ, ᐃᕼᐊᓗᐊᒃ ᐅᖃᓚᐅᖅᐳᖅ.

ᐅᖃᓚᐅᖅᐳᖅ ᓄᓇᕗᒻᒥ ᐸᕐᓇᐃᔩᑦ ᐃᖅᑲᓇᐃᔭᖅᑎᖏᑦ ᕿᒥᕐᕈᓇᓚᐅᖅᐳᑦ ᑐᓂᔭᐅᔪᓂ ᐱᖁᑎᓂ ᓯᑎᐱᕆ 29−ᒥ ᖃᐅᔨᓇᓱᖕᓂᕐᒥ ᑭᓱᓂ ᓱᓕ ᐱᔭᕆᐊᖃᕐᓂᖏᓐᓂ.

ᐊᒻᒪᓗᑦᑕᐅᖅ, ᖃᕋᓴᐅᔭᑎᒍᑦ GoFundMe ᑮᓇᐅᔭᔨᐅᕋᓱᐊᕐᓂᐅᔪᒥ ᐱᓕᕆᐊᖑᔪᒥ ᐋᖅᑭᒃᑕᐅᔪᖃᓚᐅᖅᐳᖅ ᐊᒃᑐᖅᑕᐅᓯᒪᔪᓄᑦ ᐃᓚᒌᖑᔪᓄᑦ. ᓯᑎᐱᕆ 29−ᒥ, ᐅᓄᕐᓂᖅᓴᐅᔪᒥ $1,600−ᒥ ᑐᓂᓯᓂᐊᕐᓂᕋᐃᓚᐅᖅᐳᑦ, ᖄᖏᐅᑎᓪᓗᑎᒃ ᑐᕌᒐᕆᔭᐅᔪᒥ ᑐᕌᒐᒃᓴᐅᔪᒥ $1,000−ᒥ.

ᐊᑕᐅᓯᐅᔪᒥ 6−ᖑᔪᓂ ᐃᓚᒌᖑᔪᓂ ᓇᓗᓇᐃᖅᓯᓯᒪᕗᖅ ᐱᔭᕆᐊᖃᕈᓐᓃᕐᓂᖓᓂ ᑐᓂᔭᐅᓂᐅᔪᓂ, GoFundMe ᒪᒃᐱᒐᖓ ᐅᖃᓚᐅᖅᐳᖅ.

ᐃᕼᐊᓗᐊᒃ ᐅᖃᓚᐅᖅᐳᖅ ᐃᖅᑲᓇᐃᔭᖅᑎᑦ ᓄᓇᕗᒻᒥ ᐃᒪᕐᒥᐅᑕᓕᕆᔨᒃᑯᓐᓂ ᑐᓂᓯᓚᐅᖅᐳᑦ $1,600−ᒥ ᐃᑲᔪᕐᓂᕐᒧᑦ ᓄᓇᕗᒻᒥ ᐸᕐᓇᐃᔨᓂᑦ ᐃᖅᑲᓇᐃᔭᖅᑎᖏᓐᓂ ᐊᒃᑐᖅᑕᐅᓯᒪᔪᓂ ᐃᑭᑦᑐᒧᑦ.

“ᐊᒥᓱᓂ ᐃᓄᖕᓂ ᐃᓴᒃᓯᒪᕗᑦ ᑕᐃᒪᙵᓂ ᐃᑉᐸᒃᓴᕐᓂ ᐊᒻᒪ ᖁᔭᒋᔭᐅᕐᔪᐊᖅᐳᖅ,” ᐅᖃᓚᐅᖅᐳᖅ.

ᐃᓅᓯᔨᕆᓂᐅᔪᒥ ᐱᔨᑦᑎᕋᕐᓂᕐᒥ ᑐᓂᔭᐅᓯᒪᕗᖅ ᐃᖅᑲᓇᐃᔭᖅᑎᓄᑦ ᐊᒻᒪ ᐃᓚᖏᓐᓄᑦ, ᐃᓚᒋᐊᖅᓯᓚᐅᖅᐳᖅ.

“ᑕᒪᓐᓇ ᐊᐃᑦᑖᖑᕐᔪᐊᖅᖢᓂ ᖃᓄᐃᓐᓂᐅᕗᖅ ᐊᒻᒪ ᑐᑭᓯᓇᑦᑎᐊᖅᐳᖅ ᓄᓇᓕᑐᐃᓐᓇᕆᙱᑕᑦᑎᓐᓂ ᑭᓯᐊᓂ ᐊᓯᖏᓐᓂ ᓄᓇᓕᐅᔪᓂᑦᑕᐅᖅ,” ᐃᕼᐊᓗᐊᒃ ᐅᖃᓚᐅᖅᐳᖅ. “ᐊᒥᒐᕐᓂᐅᔪᒥ ᐃᒡᓗᒃᓴᓂ ᐊᒻᒪ ᐊᓯᐅᔨᓂᐅᔪᒥ ᐆᒪᓐᓇᑎᑐᑦ ᐊᖏᓂᐅᔪᒥ ᐊᒃᑐᐃᓂᖃᖅᐳᖅ ᐊᒥᓱᓂ ᐃᓄᖕᓂ.”