ᐃᖃᓗᖕᓂ ᓄᓇᖃᕐᑐᖅ ᐃᓅᓱᒃᑐᖅ ᓯᕗᓪᓕᖅᐹᓃᖃᑕᐅᔪᖅ ᓄᓇᕐᔪᐊᓕᒫᒥ ᖃᐅᔨᓴᖅᑐᓕᕆᓂᕐᒧᑦ ᐱᒡᒍᓴᐅᑎᓂᕐᒥᒃ

For English version, see Iqaluit teen a finalist in worldwide science contest

ᐃᖃᓗᖕᓂ ᓄᓇᖃᕐᑐᖅ ᑮᑎ ᔫ ᐃᓚᒋᔭᐅᔪᖅ 30ᓂ ᓄᓇᕐᔪᐊᒥ ᖃᐅᔨᓴᖅᑐᓕᕆᓂᕐᒧᑦ ᐱᒡᒍᓴᐅᑎᔪᓂᒃ ᑖᓐᓇᓗ ᒫᓂ 2,400ᓂ ᐱᓇᓱᒡᕕᐅᓇᓱᒃᐸᒃᖢᓂ ᓄᓇᕐᔪᐊᓕᒫᒥᓐ.

ᔫ, 16, ᐃᓚᐅᓚᐅᕐᒪᑦ ᓄᑲᖅᖡᑦ ᖃᓄᐃᓕᐅᕈᑎᒃᓴᓂᒃ (Breakthrough Junior Challenge), ᑖᓐᓇᓕ ᖃᐅᔨᓴᖅᑐᓕᕆᓂᕐᒥᒃ ᑕᕐᕆᔭᒐᓕᐅᕐᓂᕐᒧᑦ ᐱᒡᒍᓴᐅᑎᓂᖅ ᐊᕐᕌᒍᓕᖕᓂ 13ᓂ 18ᒧ. ᓵᓚᒃᓴᕋᓱᒃᑐᐃᑦ ᐱᓕᕆᐊᖃᖅᑎᑕᐅᕙᒃᑐᑦ ᐋᖅᑭᒃᓱᐃᖁᔭᐅᓪᓗᑎᒃ 90 ᓴᑲᓐᔅ ᑕᑭᓂᓕᖕᒥ ᖃᐅᔨᓴᖅᑐᓕᕆᓂᕐᒥᒃ ᑐᑭᓯᑎᑦᑎᔾᔪᑎᓂᒃ ᐅᕝᕙᓘᓐᓃᑦ ᖃᓄᐃᓕᐅᕈᑎᐅᓇᓱᒋᔭᐅᔪᓂᒃ.

“ᐅᐊᑲᓪᓚᕈᓗᖔᑦ ᑖᒃᑯᓇᓂ ᐃᓚᐅᓪᓗᖓ,” ᐅᖃᓚᐅᕐᑐᑦ ᖃᓄᐃᓕᐅᕈᑎᖓᓂ.

ᓵᓚᒃᓴᕋᓱᖕᓂᖅ ᓵᓚᒃᓴᕈᑎᐅᔪᓐᓇᖅᑐᑦ $525,000ᓂ ᐊᑭᓕᖕᓂ ᓵᓚᒃᓴᐅᓯᐊᖅᑖᕐᓗᓂ, ᐃᓚᖃᖅᖢᓂ ᓯᓚᑦᑐᖅᓴᕐᕕᒡᔪᐊᒥ ᐃᓕᓐᓂᐊᕈᓐᓇᐅᑎᒃᓴᓂᒃ ᐊᒻᒪᓗ ᖃᐅᔨᓴᖅᑎᓂ ᓴᓇᕝᕕᖃᖅᑎᑕᐅᓗᓂ ᐃᓕᓐᓂᐊᕆᐊᕐᕕᖓᓂᒃ. ᔫ ᐊᐃᑉᐸᕆᔭᐅᔪᖅ ᑲᓇᑕᒥᐅᑕᓂ ᓵᓚᒃᓴᕋᓱᖃᑕᐅᔪᓂ ᐊᒥᐊᒃᑯᓂ.

ᑕᕐᕆᔭᒐᓕᐊᖓᓂ ᔫ ᐅᖃᐅᓯᖃᕐᑐᖅ ᐊᒃᑐᐃᔾᔪᑎᓂᒃ ᓯᓚᐃᓐᓇᕐᒥ ᐊᓂᕐᓂᖃᕐᓇᙱᑦᑐᒥ ᐃᓅ ᑎᒥᖓᓂ.

ᐅᖃᐅᓯᖃᓚᐅᕐᒥᔪᖅ ᖃᓄᐃᒻᒪ ᓄᓇᒥ ᑐᙵᔪᓐᓇᕈᑎ ᐱᒻᒪᕆᐅᔭᕆᐊᒃᓴᖓᓂ ᐃᓅ ᖃᓄᐃᑉᐸᓪᓕᐊᔾᔪᑎᖏᓐᓄᑦ. ᓄᑮᑦ ᓴᙱᒃᑎᑉᐹᓪᓕᖃᑦᑕᖅᑐᑦ ᑐᙵᔾᔪᑎᒥ ᓵᓚᖃᕋᓱᖕᓂᒃᑯᑦ ᐃᒪᖄᓪᓘᓐᓃᑦ ᐆᒪᒥ — ᑖᓐᓇᑦᑕᐅᖅ ᓄᑭᐅᖕᒪᓐ — ᒥᒃᖠᕚᓪᓕᔭᖢᓂ ᓯᓚᐃᓐᓇᕐᒥ ᓄᓇᒥ ᑐᙵᔾᔪᑎᑕᖃᙱᓐᓂᖓᓄᑦ, ᐊᒻᒪᓗ ᐊᐅᖕᒥ ᐃᖏᕐᕋᑎᑦᑎᓇᓱᖕᓂᕐᒥ ᐊᒃᓱᕈᕐᓇᙱᓐᓂᕐᓴᐅᓪᓗᓂ.

ᔫ, ᒍᕇᑦ 11ᒥ ᐃᓕᓐᓂᐊᕐᑐᖅ, ᐅᖃᐅᓯᖃᓚᐅᕐᒥᔪᖅ ᓯᓚᐃᓐᓇᕐᒥ ᒪᑯᐊ ᑎᒥᒃᑰᔭᑦᑐᑦ ᓴᙱᒃᑎᑦᑎᔾᔪᑎᑦ ᓯᕿᓂᕐᒥᙶᖅᑐᓂ ᓱᕋᒃᑎᕆᔪᓐᓇᖅᑐᖅ ᑎᒥᐅᑉ ᓇᓗᓇᐃᒃᑯᑎᖏᓐᓂᒃ DNA ᐊᒻᒪᓗ ᓄᑭᕈᔪᖕᓂ ᓱᕋᒃᑎᕆᔪᓐᓇᕆᓪᓗᓂ.

ᑕᐅᑐᒃᑕᐅᓂᐊᖅᑐᒥ ᐱᓕᕆᐊᖃᖅᖢᓂ ᐋᖅᑭᒃᓱᐃᕈᓘᔭᓚᐅᕐᑐᖅ ᑕᒪᒃᑯᓄᙶᖓᔪᓂᒃ ᐃᓱᒪᒋᔭᖏᓐᓂᒃ. ᓴᖅᑭᑎᑦᑎᓇᓱᒃᖢᓂ ᖃᓄᖅ ᓄᑭ ᓴᙱᑎᑦᑐᓐᓇᕐᒪᖔᑦ ᓯᓚᐃᓐᓇᕐᒥ ᓴᖅᑭᑎᑦᑎᓚᐅᕐᑐᖅ ᐃᖃᐃᓕᓴᕈᑎᐅᔪᓐᓇᖅᑐᓂᒃ. ᐋᖅᑭᒃᓯᓚᐅᕐᒥᔪᖅ ᕿᑯᖅᓴᔭᖕᒥᙶᖅᑐᒥ DNAᒥ ᐱᓪᓗᓂ ᖃᓄᐃᓕᐅᓇᔭᕐᓂᖓ ᓴᖅᑭᔮᖅᑎᖢᓂᐅ ᑎᒥᒃᑰᕈᑎᐅᔭᑦᑐᒥ

ᔫ ᐅᖃᓚᐅᕐᒥᔪᖅ ᖁᕕᐊᒋᒻᒪᕆᓚᐅᕐᓂᕋᖅᖢᓂᐅᒃ ᓴᓇᐅᒐᓕᐅᖅᑕᖏᓐᓂᒃ ᓴᖅᑭᔮᖅᑎᑦᑎᔾᔪᑎᖃᖅᖢᓂ.

“ᐅᓇ ᖁᕕᐊᓇᖅᑐᓂᒃ ᐱᓕᕆᐊᖃᕋᓱᖕᓂᑐᐃᓐᓇᐅᓚᐅᕐᑐᖅ ᑕᑯᔭᐅᑎᑦᑎᓇᓱᒃᖢᓂ,” ᐅᖃᕐᑐᖅ.

ᑐᓂᓯᓚᐅᕐᒪᓐ ᑕᑭᓂᕐᓴᒥ ᑕᕐᕆᔭᒐᒃᓴᒥ ᐊᕐᕌᓂ ᓵᓚᒃᓴᕋᓱᒃᑎᓪᓗᒋᑦ ᓴᓇᔭᕕᓂᖏᓐᓂᒃ ᑭᓯᐊᓂᓕ ᑕᐃᔅᓱᒪᓂ 3 ᒥᓂᑦᔅ ᑭᓯᐊᓂ ᓴᖅᑭᔮᖅᑎᑦᑎᔪᓐᓇᓚᐅᕐᒪᑕ, ᑕᐃᒪᓕ ᓇᐃᒡᓕᒋᐊᑎᑦᑎᓇᓱᒃᖢᓂ ᖃᓄᐃᓕᐅᕈᓘᔭᕆᐊᖃᓚᐅᕐᒥᔪᖅ.

“ᑭᓱᓕᒫᓂ ᑲᑎᕐᓱᐃᓇᓱᖕᓂ ᐊᒻᒪᓗ ᐃᖏᕐᕋᕙᓪᓕᐊᓂᖓ ᓈᒻᒪᒃᑎᓐᓇᓱᒃᖢᒍ,” ᔫ ᐅᖃᕐᑐᖅ ᐋᖅᑭᒃᓱᐃᓂᐅᑉ ᒥᒃᓵᓂ.

ᐱᓕᕆᒃᑲᓐᓂᕆᐊᖃᓚᐅᕐᑐᖅ ᑕᐅᑦᑐᖓ ᖃᓄᐃᓕᖓᔭᕆᐊᒃᓴᖓᓂᒃ ᖃᐅᔨᓴᖅᑐᓕᕆᓂᒃᑯᑦ. ᒪᑯᓂᖓ ᑕᕐᕆᔭᕈᓐᓇᐅᑎᓄ ᐃᒪᒋᔭᐅᕙᒃᑐᓂᒃ ᐱᖃᙱᖢᓂ, ᓇᖕᒥᓂᖅ ᐃᓱᒪᒋᔭᖓᒍᑦ ᐋᖅᑭᒃᓱᐃᔭᕆᐊᖃᓚᐅᕐᑐᖅ ᐊᑐᕈᓐᓇᖅᑕᖏᓐᓂᒡᓗ ᐊᑐᑲᑕᒃᖢᓂ ᐋᖅᑭᒃᓱᐃᕙᓪᓕᐊᑎᓪᓗᒍ ᐅᕘᓇ iMovie ᑕᕐᕆᔭᕈᓐᓇᐅᑎᓕᓂᕆᒃᑯᑦ.

ᐅᓇ ᔫᒧ ᓯᕗᓪᓕᖅᐹᖑᙱᑦᑐᖅ ᓵᓚᒃᓴᐅᓯᐊᕈᔪᖕᓂᒃ. ᓵᓚᒃᓴᖃᑕᐅᓚᐅᕐᓯᒪᔪᖅ ᑎᑎᕋᕐᓂᒃᑯᑦ ᓵᓚᒃᓴᕋᓱᒃᑐᓂᒃ ᑖᓐᓇᓗ ᔫᓂᐅᑎᓪᓗᒍ ᑎᑎᕋᖅᑕᕕᓂᖓ ᓴᖅᑭᑎᑕᐅᓪᓗᓂ ᑐᓴᒐᓂᒃ ᐅᑯᓇᙵᑦ ᓂᐅ ᔪᐊᒃ ᑕᐃᒻᔅ.

ᓵᓚᒃᓴᖅᑐᖅ ᐆᒧᖓ Breakthrough Junior Challenge ᓇᓗᓇᐃᖅᑕᐅᓛᕐᑐᖅ ᓄᕕᐱᕆᒥ, ᐅᑯᐊ ᓵᓚᒃᓴᕋᓱᒃᑐᓄᑦ ᓴᖅᑭᔮᒐᕆᔭᐅᔪᖅ ᐅᖃᕐᓯᒪᔪᖅ.