ᓂᑰᓪ ᔭᐃᐅᔅ, ᐃᖃᓗᖕᓂ ᓄᓇᖃᕐᑐᖅ, ᓵᓚᒃᓴᓚᐅᕐᑐᖅ ᑕᓚᕖᓴᓐᑯᑦ ᓴᖅᑭᔮᖅᐸᒃᑐᒥᒃ Food Network ᑲᓇᑕᒥ ᓯᕗᓪᓕᖅᐹᖅ Wall of Bakers ᑕᕐᕆᔭᒐᕐᒥ, ᓴᖅᑭᔮᒐᖅ ᑕᒧᓗᒐᒃᓴᓂᒃ ᓂᕿᓕᐅᕐᑎᓂ ᑲᓇᑕᒥᐅᑕᓂᒃ ᐱᒡᒍᓴᐅᑎᖃᑎᒌᒍᑎ. (ᐊᔾᔨᙳᐊᖅ ᐅᕙᙵᑦ ᓂᑰᓪ ᔭᐃᐅᔅ)

ᐃᖃᓗᖕᓂ ᓄᓇᖃᕐᑐᖅ ᐊᕐᓇᖅ ᓵᓚᒃᓴᖅᑐᖅ ᑕᓚᕕᓴᓐᑯᑦ ᐆᑦᑎᔪᓂᒃ ᐱᒡᒍᓴᐅᑎᔪᓂ

ᓂᑰᓪ ᔭᐃᐅᔅ ᐅᖃᓚᐅᕐᑐᖅ ᓵᓚᒃᓴᕐᓂᖓ ᓵᓚᒃᓴᕈᑎᐅᓂᕋᕆᓪᓗᓂᐅᒃ ᓄᓇᕗᒧᑦ

By ᑕᐃᕕᑦ ᓛᕼᐃᑦ

For an English version of this story, please see Iqaluit woman whips up a win on TV baking show

ᓂᑰᓪ ᔭᐃᐅᔅ ᑭᖑᓪᓕᖅᐹᑦ ᖃᓄᐃᓕᐅᕈᑎᐅᓂᑯᑦ ᑐᓴᖅᑕᐅᑎᑦᑕᐃᓕᒪᓚᐅᕐᓯᒪᔭᖓ ᑖᓐᓇ ᐊᒻᒪ ᐱᖃᓐᓇᖏᑦ ᑲᑎᑎᓪᓗᒋ ᐊᖏᕐᕋᖓᓂ ᐃᖃᓗᖕᓂ ᐱᓇᓱᐊᕈᓯᐅᓚᐅᕐᑐᒥ ᑕᐅᑐᒋᐊᖅᑎᓪᓗᒋ ᑕᓚᕖᓴᓐᑯᑦ ᐆᑦᑎᔪᑦ ᐱᒡᒍᓴᐅᑎᑎᓪᓗᒋᑦ.

ᐱᒡᒍᓴᐅᑎᖃᑕᐅᓚᐅᕐᓯᒪᖕᒪᑦ ᑕᓚᕖᓴᒃᑯᑦ ᐅᕘᓇ Food Network ᑲᓇᑕᒥ Wall of Bakers ᓴᖅᑭᔮᒐᕐᒥ ᔪᓚᐃᖑᓚᐅᕐᓯᒪᔪᒥᒃ ᐊᒻᒪᓗ ᑕᐃᒪᙵ ᖃᓄᐃᓕᔾᔪᑎᐅᓚᐅᕐᓯᒪᔪᖅ ᐅᖃᐅᓯᕆᔭᕆᐊᖃᙱᖢᓂᐅᒃ.

ᑭᓯᐊᓂᓕ ᐄᐳᕈᓪ 13-ᒥ, ᐅᓇ Wall of Bakers ᓴᖅᑭᔮᓚᐅᕐᓯᒪᖕᒪᑦ. ᑖᔅᓱᒧᖓ ᓵᓚᒃᓴᖅᑐᖅ ᐅᖃᐅᓯᐅᓂᐊᓵᖅᑎᓪᓗᒍ ᑖᔅᓱᒪ ᐱᖃᓐᓇᕆᔭᖏᑦ ᓂᓪᓕᐊᕈᓘᔭᓕᓚᐅᕐᓯᒪᔪᑦ ᐊᒻᒪᓗ ᔭᐃᐅᔅ ᑖᒃᑯᓇᓂ ᐃᓚᐅᓕᖅᖢᓂ.

“ᕿᒡᒋᖅᑕᑲᑕᒻᒪᕆᓚᐅᕐᑐᖓ,” ᐅᖃᕐᑐᖅ. “ᕿᐊᓯᓪᓗᖓᐊ, ᐊᓈᓇᒐ ᕿᐊᓯᓪᓗᓂ … ᓚᑭᐊᓘᔪᖓ.”

ᔭᐃᐅᔅ ᓵᓚᒃᓴᓚᐅᕐᑐᖅ Food Network ᑲᓇᑕᒥ ᓯᕗᓪᓕᖅᐹᖅ ᐱᒡᒍᓴᐅᑎᓂᖅ ᐆᒥᖓ Wall of Bakers.

ᑕᓚᕕᓴᓐᑯᑦ ᓴᖅᑭᔮᒐᖅ ᐆᑦᑎᔪᓂ ᐱᒋᐊᕐᓯᒪᔪᖅ ᐊᓯᖔᖓᓂᒃ ᓴᖅᑭᔮᖃᑦᑕᕐᑐᒥᒃ ᑕᐃᔭᐅᔪᕐᓕ Wall of Chefs.

40 ᐅᑦᑎᕙᒃᑐᑦ ᐱᓇᓱᓚᐅᕐᓯᒪᔪᑦ ᐊᒻᒪᓗ ᔭᐃᐅᔅ ᐃᓚᒋᔭᐅᓚᐅᕐᓯᒪᓪᓗᓂ ᑎᓴᒪᓂ ᓂᕈᐊᖅᑕᐅᔪᓂᒃ $10,000-ᓂ ᐱᓇᓱᒃᑐᓂᒃ.

ᔭᐃᐅᔅ ᐱᖃᓐᓇᕆᔭᖓᑦᑕ ᐃᓚᖓᓂ ᐅᖃᐅᔾᔭᐅᓚᐅᕐᓯᒪᔪᖅ ᓯᕗᓪᓕᖅᐹᖑᔪᒃᓴᐅᔪᖅ ᓄᓇᕗᒻᒥᐅᓂᒃ ᓴᖅᑭᔮᒐᒃᑰᖅᑐᓂ ᐊᒻᒪ ᓵᓚᒃᓴᖅᑐᓂ.

ᔭᐃᐅᔅᒧᓪᓕ ᐅᓇ ᐱᓕᕆᐊᖃᓕᕐᓂᖅ ᐱᒋᐊᓚᐅᕐᓯᒪᔭᖓ ᑎᓯᐱᕆ 2020-ᒥ ᓯᕗᓪᓕᖅᐹᒥ ᐱᓇᓱᓕᕐᑎᓪᓗᒍ ᐆᒧᖓ Wall of Chefs. ᓂᕿᓕᐅᖅᖢᓂ ᖁᕕᐊᒌᓴᐅᔭᕐᒪᑕ ᐊᒻᒪᓗ ᐆᑎᑲᑕᓕᓚᐅᕐᓯᒪᓪᓗᓂ ᓈᒻᒪᓈᕐᓯᒪᓪᓗᓂ ᑕᕐᕆᔭᒐᓕᐅᕐᓂᕐᒧᑦ.

ᐅᖃᐅᓯᖃᓚᐅᕐᖢᓂ ᐊᐱᕐᓱᖅᑕᐅᑎᓪᓗᒍ ᐅᖃᓕᒫᒐᕐᒥ ᐅᑦᑎᖃᑦᑕᕐᓂᕐᒥ ᐆᒧᖓ ᑕᓚᕕᓴᓐᑯᑦ ᓂᕿᓕᐅᕐᑎᒧᑦ ᐋᓇ ᐆᓴᓐᒧᑦ ᑎᑎᕋᖅᑕᐅᔪᕕᓂᕐᒥᒃ, ᔭᐃᐅᔅ ᐱᓇᓱᖁᔭᐅᓕᓚᐅᕐᓯᒪᔪᖅ.

ᐊᓂᒍᐃᑦᑎᐊᓚᐅᕐᓯᒪᔪᖅ ᐊᒻᒪᓗ ᑐᕌᓐᑐᓕᐊᓕᖅᖢᓂ ᑕᓚᕕᓴᓐᑯᑦ ᓴᖅᑭᔮᓛᖅᑐᒧᑦ ᔪᓚᐃᖑᓚᐅᕐᓯᒪᔪᒥᒃ.

ᐱᒡᒍᓴᐅᑎᓂᖅ ᐱᐊᓂᒃᑕᐅᓚᐅᕐᑐᖅ ᐅᓪᓗᕐᒥ, ᐅᖃᕐᑐᖅ, ᒪᕐᕈᐃᖅᖢᑎᒃ ᐊᔪᕈᓐᓃᕐᓴᑲᑕᓚᐅᖅᖢᑎᒃ ᐅᓪᓛᖓᓂᒃ ᐊᒻᒪᓗ ᐱᖓᓱᐃᖅᖢᑎᒃ ᐆᑦᑎᓪᓗᑎᒃ ᐊᒻᒪᓗ ᐆᑦᑎᖃᑕᐅᔪᓂᒃ ᐃᓚᐅᔪᓐᓃᖅᑎᑦᑎᕙᒃᖢᑎᒃ.

ᑭᓯᐊᓂᓕ ᐅᓪᓗᖅ ᐱᒋᐊᖅᑎᓪᓗᒍ ᖁᕕᐊᓇᓗᐊᓚᐅᕐᓯᒪᙱᑦᑐᖅ ᔭᐃᐅᔅᒧᑦ, ᐅᖃᖅᖢᓂ ᐱᓕᕆᑦᑎᐊᓚᐅᕐᓯᒪᙱᓐᓂᖓᓂ ᐊᔪᕈᓐᓃᖅᓴᓕᓵᖅᑎᓪᓗᒋᑦ ᓯᕗᓪᓕᕐᒥᒃ.

“ᑐᓂᓯᓚᐅᕋᒪ ᐊᕐᓇᓂ ᐆᓯᒪᙱᑦᑐᒥ ᓂᕿᒥ,” ᐅᖃᕐᑐᖅ.

ᑭᓯᐊᓂᓕ ᐊᐃᑉᐸᖓᓂ ᐊᔪᕈᓐᓃᕐᓴᕐᓇᒥ ᐱᓕᕆᔪᓐᓇᑦᑎᐊᕐᔫᒥᓕᓚᐅᕐᑐᖅ ᐊᒻᒪᓗ ᐆᑦᑎᔭᕆᐊᒃᓴᖅ ᐊᔪᕐᓇᙱᓐᓂᕐᓴᐅᓪᓗᓂ.

ᓯᕗᓪᓕᕐᒥ ᐱᒡᒍᓴᐅᑎᓕᕐᑎᓪᓗᒋ ᑖᒃᑯᐊ ᐱᒡᒍᓴᐅᑎᔪᑦ ᖃᐅᔨᒪᓚᐅᕐᑐᑦ ᑭᓱᒥ ᓴᓇᓂᐊᕐᓂᖏᓐᓂᒃ. ᔭᐃᐅᔅ ᓴᓇᓚᐅᕐᑐᖅ ᖁᕕᐊᓱᒡᕕᖕᒥ ᓴᓇᕙᒃᑕᖓᓂᒃ, ᒪᒪᕐᑐᐊᓗᖕᒥ ᓵᓯᔾ ᐊᒻᒪᓗ ᓴᑐ ᓂᐊᖂᔭᖅ ᐳᑎᖕᒥ.

ᐱᖓᔪᒋᔭᐅᓚᐅᕐᓯᒪᔪᖅ ᑎᓴᒪᓂᒃ ᑕᕝᕙᓂ ᐊᒻᒪᓗ ᐃᓚᐅᒃᑲᓐᓂᕐᓂᐊᓕᖅᖢᓂ.

ᐊᐃᑉᐸᖓᓂ ᐆᑦᑎᓕᕐᑎᓪᓗᒋ, ᐆᑦᑎᔪᑦ ᑐᓂᔭᐅᓚᐅᕐᑐᑦ ᒪᕐᕉᖕᓂ ᓇᓕᓇᕐᑐᓂᒃ ᓴᓇᔭᕆᐊᓕᖕᓂ — ᓴᖅᑭᑕᐅᒐᒥᒃ ᒪᐃᐳᓪ ᓱᑲᕐ ᐊᒻᒪ ᐸᓂᕐᑐᑦ ᑯᕌᓐᐱᐅᕆᔅ — ᐊᒻᒪᓗ 5 ᒥᓂᑦᔅᓂ ᐃᓱᒪᒃᓴᖅᓯᐅᖅᑎᑕᐅᓪᓗᑎᒃ ᑭᓱᓕᐅᕈᑎᐅᓂᐊᕆᐊᒃᓴᖏᓐᓂᒃ.

ᓴᓇᓕᓚᐅᕐᓯᒪᔪᖅ Dutch baby pancake (ᐹᓐᑲᐃᒃ) ᐃᓚᖃᖅᖢᓂ apple cranberry sauce ᐊᒻᒪᓗ ᒪᐃᐳᓪ ᕗᐃᑉ ᑯᕇᒻᒥ, ᑖᓐᓇᓗ ᓵᓚᒃᓴᕈᑎᒋᓪᓗᓂᐅᒃ.

ᑭᖑᓪᓕᖅᐹᖓᓂᓪᓕ ᒪᕐᕉᒃ ᐊᒥᐊᒃᑯᒋᔭᐅᔫᒃ ᐆᑦᑎᔭᕆᐊᖃᓚᐅᕐᓯᒪᔫᑦ ᖁᓕᕇᓕᖓᓂᓕᖕᓂᒃ.

ᔭᐃᐅᔅ ᐆᑦᑎᔪᒪᓚᐅᕐᓯᒪᙱᒻᒪ ᑲᐃᒃᒥ, ᖁᓕᕇᓕᖓᔪᖅ ᓴᓇᔭᐅᕙᒃᑐᖅ. ᑭᓯᐊᓂᓕ ᓂᕈᐊᒪᐅᕐᑐᖅ ᓯᑐᕌᐱᐅᕆ ᓯᕙ ᖁᓕᕇᓕᖓᓗᓂᒃ ᓯᑐᕌᐱᐅᕆ ᓵᔅᒥ ᐊᒻᒪᓗ ᓚᒪᓐ ᑰᑦ ᖁᓛᓂ.

ᑖᓐᓇᓗ ᓵᓚᒃᓴᕈᑎᒋᓚᐅᕐᓯᒪᓪᓗᓂᐅᒃ.

“ᖁᕕᐊᓱᑦᑎᐊᓚᐅᕐᑐᖓ,” ᐅᖃᕐᑐᖅ. “ᐅᓪᓗᒐᓴᖕᓂ ᓯᓂᒍᓐᓇᙱᑉᐸᓵᖅᖢᓂ ᐱᓗᐊᕐᑐᒥ ᐅᓐᓄᖓᓂ ᓵᓚᒃᓴᖅᑎᓪᓗᖓ.”

ᓵᓚᒃᓴᖅᖢᓂ ᖁᕕᐊᓇᕋᓗᐊᖅᖢᓂ ᐅᓇ ᐊᕐᓇᐅᓪᓗᓂ ᓄᓇᕗᒥᐅᑕᐅᓪᓗᓂ ᓵᓚᒃᓴᕐᓂᖓ ᐱᒻᒪᕆᐅᒋᓚᐅᕐᑕᖓ.

ᓴᐃᓐ ᔮᓐᔅ ᓂᐅᕙᐅᓐᓛᓐᒥᐅᑕᕕᓂᐅᓪᓗᓂ ᓄᓇᕗᒥᐅᑕᐅᓕᕐᑐᖅ ᐊᕐᕌᒍᑦ 15 ᐅᖓᑖᓂ ᓄᓇᖓᓂ ᐱᐅᒃᓴᓗᐊᒧᑦ ᐃᓄᖏᓐᓂᒡᓗ.

ᐅᖃᓚᐅᕐᑐᖅ ᖁᕕᐊᒋᓂᕋᖅᖢᓂᐅᒃ ᓂᕿᓕᐅᖅᖢᓂ ᓄᓇᕗᒥᑦ ᓄᓇᒥᙶᖅᑐᓂᒃ ᐊᑐᖃᑦᑕᖅᖢᓂ.

“ᓵᓚᒃᓴᖅᑎᓪᓗᖓ ᑭᒃᑯᓕᒫ ᓵᓚᒃᓴᓚᐅᕐᒥᔪᑦ ᐅᕙᒃᑯᓪᓕ,” ᔭᐃᐅᔅ ᐅᖃᕐᑐᖅ.

“ᓵᓚᒃᓴᕈᑎᒐ ᓵᓚᒃᓴᕐᓂᐅᕗᖅ ᓄᓇᕗᒧᑦ.”

Share This Story

(0) Comments