ᐃᖃᓗᖕᓂ ᓄᓇᖃᖅᑐᑦ ᖃᐅᔨᓇᓱᖁᔨᔪᑦ ᑭᒃᑯᑦ ᑕᒪᑐᒥᖓ ᑲᒪᒋᔭᖃᒻᒪᕆᖕᒪᖔᑕ

ᐃᓚᖏ ᐃᖃᓗᖕᓂ ᓄᓇᖃᖅᑐᑦ ᑭᒃᑯᓕᒫᓂᒃ ᖃᐅᔨᒪᑎᑦᑎᓂᕐᒥᒃ ᐱᓕᕆᐊᖃᖁᔨᔪᖅ ᖃᓄᖅ ᐅᑯᐊ ᒐᕙᒪᒃᑯᑦ ᐊᖓᔪᖅᑳᒐᓚᖏᑦ ᐱᓕᕆᐊᖃᕐᓯᒪᓂᖏᓐᓂᒃ ᓄᓇᓕᐸᐅᔭᐃ ᐃᒪᖓᓄᑦ ᑐᐊᕕᕐᓇᖅᑐᓕᕆᓂᕕᓂᖅ, ᑕᒪᒃᑯᐊ ᑕᐃᒪᐃᓕᐅᕈᓐᓇᖅᑎᑦᑎᔨᐅᔪᑦᑕᒪᑐᒥᖓ ᓱᓕ ᐱᓂᐊᕐᓂᕋᖅᓯᒪᙱᓚᑦ.

ᓄᓇᓕᐸᐅᔭᐃᑦ ᐱᓇᓱᐊᕈᓯᓕᒫᖅ ᐃᒪᖓᓂᒃ ᖃᓛᖅᑎᑦᑎᑲᑕᖁᔨᓚᐅᕐᑐᑦ ᔭᓄᐊᕆ ᕿᑎᖅᐸᒃᑎᓪᓗᒍ ᑖᒃᑯᐊ ᐱᓕᕆᔨᒻᒪᕆᐅᔪᑦ ᖃᐅᔨᓇᓱᒃᑎᓪᓗᒋᑦ ᖃᓄᐊᓗᒃ ᐅᖅᓱᐊᓗᖕᒥ ᐃᒪᖓᓄᙵᖅᑐᖃᑲᑕᒋᐊᒃᓴᖓᓂᒃ.

ᐃᖃᓗᖕᒥᐅᑕ ᐅᖃᑲᑕᒋᐊᓕᓚᐅᕐᓯᒪᔪᖅ ᐅᖅᓱᐊᓗᒃᓱᖕᓂᕐᓂᕋᐃᓪᓗᑎᒃ ᐃᒪᖓᓂ ᐱᒋᐊᖅᖢᑎᒃ ᐅᒃᑑᐱᕆ 2-ᒥ. ᐅᓪᓗᐃᑦ ᖁᓕᑦ (10) ᐊᓂᒍᖅᑎᓪᓗᒍ ᓄᓇᕗᒥᑦ ᒐᕙᒪᒃᑯ ᐃᒪᕐᒥᒃ ᐊᑐᖁᔨᔪᓐᓃᓕᓚᐅᕐᓯᒪᔪᑦ. ᑖᒃᓇ ᐊᑐᖁᔨᙱᔾᔪᑎ ᐃᓱᓕᓚᐅᕐᓯᒪᓪᓗᓂ ᑎᓯᐱᕆ 10-ᒥ.

ᐅᓪᓗᐃᑦ 6 ᐊᓂᒍᖅᑎᓪᓗᒍ, ᐃᖅᑲᓇᐃᔭᖅᑎᑦ ᐃᒥᑕᖅᕕᓕᕆᕝᕕᒃᒥ ᖃᐅᔨᓕᓚᐅᕐᓯᒪᔪᑦ ᐃᓚᖓᓂ ᐃᒪᖃᐅᑎᖃᕐᕕᖕᒥ ᐅᕐᓱᐊᓗᕈᔪᖕᒥᒃ. ᑖᓐᓇ, ᐱᒃᑲᖅᑎᑦᑎᔾᔪᑎᐅᓂᕋᖅᑕᐅᓪᓗᓂ ᐃᖅᑲᓇᐃᔭᖅᑎᓄᑦ ᐃᒪᖃᐅᑎᖃᕐᕕᒃᒥ, ᐅᖃᐅᓯᐅᓕᓚᐅᕐᓯᒪᔪᖅ ᐃᓄᖕᓄᑦ ᔭᓄᐊᕆ 6-ᒥ. ᐊᒻᒪᓗ ᔭᓄᐊᕆ 13-ᒥ ᐅᖃᐅᓯᐅᑲᑕᓕᓚᐅᕐᓯᒪᓪᓗᓂ ᑕᒪᓐᓇ ᐃᖃᓗᐃᑦ ᐃᒪᖓᑦ ᐅᕐᓱᐊᓗᒃᓱᓐᓂᕐᓂᕋᖅᑕᐅᓪᓗᓂ.

ᑕᕝᕙᓂ ᐃᒪᖃᐅᑎᖃᕐᕕᒃᒥᑦ ᐅᓇ ᕼᐊᐃᑐᕈᑳᐸᓐᒧᑦ ᖃᐅᔨᓴᕈᑎ ᖃᐅᔨᔾᔪᑎᐅᓕᓚᐅᕐᓯᒪᔪᖅ ᐱᖓᓱᒃᑲᓐᓂᕐᓂᒃ ᓈᒻᒪᙱᓕᐅᕈᑎᓂᒃ ᐱᓇᓱᐊᕈᓯᐅᑉ ᐃᓗᐊᓂ, ᐊᒻᒪᓗ ᓄᓇᓕᐸᐅᔭᐃᑦ ᐊᑐᖅᑎᑦᑎᓕᓚᐅᕐᓯᒪᓪᓗᑎᒃ ᐋᖅᑭᒃᑕᐅᓵᖅᓯᒪᔪᒥᒃ ᐊᓯᐊᒎᕈᑎᒃᓴᒥᒃ ᔭᓄᐊᕆ 19-ᖑᑎᓪᓗᒍ. ᐊᑐᓂ ᓈᒻᒪᙱᓕᐅᕈᑎᐅᔪᑦ ᑎᓯᐱᕆᒥ ᐊᒻᒪ ᐅᒃᑑᐱᕆᒥ ᑲᓇᑕᒥ ᐃᒥᖅᑕᐅᔪᓐᓇᖅᑐᓄᑦ ᖃᓄᐃᙱᓂᕋᕈᑎᐅᔪᑦ ᐊᑎᑦᑎᐊᖓᓃᓐᓂᕋᖅᑕᐅᓚᐅᕐᓯᓚᒧᑦ, ᓄᓇᓕᐸᐅᔭᓄᑦ ᐱᓕᕆᔨᒻᒪᕇᑦ ᐅᖃᓚᐅᕐᑐᑦ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓇᓗᓇᐃᕐᓯᓚᐅᕐᑐᑦ ᓄᓇᕗᒥᑦ ᒐᕙᒪᒃᑯ ᐱᓕᕆᐊᖃᕐᓂᐊᕐᓂᖏᓐᓂᒃ ᐱᖓᔪᒋᔭᐅᔪᒥᒃ ᐱᓕᕆᑎᑦᑎᓗᑎᒃ ᕿᒥᕐᕈᐊᕐᓂᐊᕐᓗᓂ ᒐᕙᒪᒃᑯᑦ ᑕᒪᑐᒧᖓ ᐱᓕᕆᔾᔪᓯᕆᓚᐅᕐᑕᖓᓂᒃ. ᐋᓐᓂᐊᖃᓇᙱᑦᑐᓕᕆᔨᒃᑯᑦ ᓱᓕ ᖃᐅᔨᑎᑦᑎᓚᐅᙱᑦᑐᑦ ᖃᖁᒍ ᑕᒪᑐᒥᖓ ᕿᒥᕐᕈᐊᖅᑐᖃᕐᓂᐊᕐᒪᖓ ᐊᒻᒪ ᑭᒃᑯᓐᓄᑦ ᐱᓕᕆᐊᖑᓂᐊᕐᒪᖔᑦ.

ᐃᖃᓗᐃᑦ ᓄᓇᓕᐸᐅᔭᖓ, ᐋᓐᓂᐊᖃᕐᓇᙱᑦᑐᓕᕆᔨᒃᑯᓪᓗ ᐊᒻᒪᓗ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎ ᑕᒪᑐᒥᖓ ᐃᓚᐅᓂᐊᖅᑐᑦ.

ᑭᓯᐊᓂᓕ ᐃᓚᖏ ᐃᓄᐃᑦ ᐃᓱᒪᖕᒪᑕ ᐱᖓᔪᒋᔭᐅᔪᒥᒃ ᖃᐅᔨᓴᖅᑕᐅᓂᐊᕐᓂᖓ ᓈᒻᒪᙱᓗᐊᕐᓂᖓᓂᒃ.

ᐃᖃᓗᖕᓂ ᓄᓇᓕᒃ ᔫᓴᕝ ᒧᑕᒃ-ᕙᓚᐅᕙᔅ ᑎᑎᕋᓚᐅᕐᓯᒪᔪᖅ ᔭᓄᐊᕆ 20-ᒥ ᓄᓇᕗᒧᑦ ᓯᕗᓕᐅᕐᑎᒧᑦ ᐸᐅᓗᓯ ᐊᕿᐊᕈᕐᒧᑦ, ᒪᓕᒐᓕᕆᔨᒃᑯᓐᓄᑦ ᒥᓂᔅᑕᒧᑦ ᑕᐃᕕᑦ ᐊᕿᐊᕈᖅ, ᓄᓇᕗᒧᑦ ᒪᓕᒐᓕᐅᕐᑎ ᓘᕆ ᐃᓪᓚᐅᖅ ᐊᒻᒪᓗ ᐊᓯᖏᓐᓂᒃ ᒪᓕᒐᓕᕆᔨᐅᕙᒃᑐᓂᒃ ᐱᔪᒪᓯᒪᔪᓂᒃ ᑭᒃᑯᓕᒫᓂᒃ ᑐᓴᐅᒪᑎᑦᑎᓂᕐᒧᑦ ᖃᐅᔨᓇᓱᖕᓂᕐᒥᒃ.

ᐱᖓᔪᒋᔭᐅᔪᓄᑦ ᐱᓕᕆᔨᓄᑦ ᕿᒥᕐᕈᐊᕈᑎᒋᔭᐅᔪᑦ ᐱᔪᓐᓇᐅᑎᖃᙱᑦᑐᑦ ᓴᖅᑭᔮᖅᑎᑦᑎᓂᐅᙱᖢᓂᓗ ᑭᒃᑯᓕᒫᓂᒃ ᖃᐅᔨᓇᓱᒍᑎᓂᒃ, ᑭᓯᐊᓂᓕ ᑭᒥᓯᓇ ᑎᑎᖃᖁᑎᒋᔭᐅᔪᓂᒃ ᐱᔪᒪᔪᓐᓇᕐᒪᑦ, ᐅᖃᖅᑐᖅ ᒧᑕᒃ-ᕙᓚᐅᕙᔅ.

“ᐱᖓᔪᒋᔭᐅᔪᓄᑦ ᕿᒥᕐᕈᐊᕈᑎᒋᔭᐅᔪᖅ ᑭᒃᑯᓕᒫᓄᑦ ᑭᐅᔨᐅᔪᓐᓇᙱᒻᒪᑕ, ᓴᖅᑭᔮᖅᑎᑦᑎᓇᔮᙱᖢᑎᒃ ᐊᒻᒪᓗ ᐱᓕᕆᐊᖃᕈᓐᓇᕋᔭᓗᐊᙱᖢᑎᒃ ᓂᕆᐅᒋᔭᑦᑎᒍᑦ ᐊᒻᒪ ᐱᔭᕆᐊᖃᒻᒪᕆᒃᑕᑦᑎᒍᑦ,” ᒧᑕᒃ-ᕙᓚᐅᕙᔅ ᑎᑎᕋᕐᓯᒪᔪᖅ.

ᒪᓕᒐᓕᕆᔨᒃᑯᓐᓄᑦ ᒥᓂᔅᑕ ᑕᐃᕕᑦ ᐊᕿᐊᕈᖅ, ᑖᓐᓇᓗ ᐱᔪᓐᓇᕐᓂᖃᑦᑎᐊᖅᖢᓂ ᑭᒃᑯᓕᒫᓄᑦ ᑐᓴᐅᒪᑎᑦᑎᓂᕐᒧᑦ ᖃᐅᔨᓇᓱᖕᓂᕐᒥᒃ, ᐊᑐᐃᓐᓇᐅᓚᐅᙱᒻᒪᑦ ᐊᐱᖅᓱᖅᑕᐅᔪᒪᑎᓪᓗᒍ. ᐅᖃᓚᐅᕐᑑᒐᓗᐊᖅ ᐱᖓᔪᒋᔭᐅᔪᑦ ᕿᒥᕐᕈᐊᕈᑎᖏᑦ ᐃᑲᔪᕈᓐᓇᕋᔭᕐᓂᖏᓐᓂᒃ ᒐᕙᒪᒃᑯᓐᓂᒃ ᐃᓱᒪᓕᐅᕆᓇᓱᒃᓂᒃᑯᑦ ᖃᓄᐃᓕᐅᒃᑲᓐᓂᕈᑎᒃᓴᓄᑦ.

ᒪᓕᒐᓕᕆᔨᒃᑯᑦ ᒥᓂᔅᑕᖓ ᑭᒃᑯᓕᒫᓂ ᑐᓴᐅᒪᑎᑦᑎᓂᕐᒧᑦ ᖃᐅᔨᓇᓱᒃᑎᑦᑎᙱᑉᐸᑦ, ᒪᓕᒐᓕᕆᔨᑐᐃᓐᓇᐃᑦ ᐱᔪᓐᓇᖅᑐᑦ ᑕᒪᑐᒧᖓ ᑐᓴᒐᒃᓴᓂᒃ ᑲᑎᒪᔨᕋᓛᕆᔭᐅᔪᓂᒃ, ᑲᑎᒪᔨᓂᒡᓗ ᑕᒪᒃᑭᖅᑎᓪᓗᒋᑦ ᐊᐱᖅᓱᑲᑕᖕᓇᒥᒃ ᐅᕝᕙᓘᓐᓃᑦ ᑲᑎᒪᔨᕋᓛᓂ ᕿᒥᕐᕈᐊᖅᑕᐅᔭᕆᐊᓕᖕᓄᑦ, ᐅᖃᓚᐅᕐᑐᖅ ᐃᖃᓗᐃᑦ-ᑕᓯᕐᓗᒃᒧᑦ ᒪᓕᒐᓕᐅᖅᑎ ᔪᐊᔾ ᕼᐃᒃᔅ.

“ᒫᓐᓇ ᑕᒪᑐᒧᖓ ᓈᒻᒪᙱᓕᐅᕈᑎᖃᑲᑕᖕᒪᑕ,” ᐅᖃᖅᑐᖅ.

“ᑕᒪᓐᓇᓘᓐᓃᑦ ᐅᖓᑖᓅᖓᓕᕋᓱᒋᔭᕋ. ᐃᓚᖏᑦ ᐃᓄᐃᑦ ᓇᓗᓕᕈᔪᖕᒪᑕ ᖃᓄᐃᑦᑐᓂᒃ ᑐᓴᒐᒃᓴᓂᒃ ᑭᒃᑯᓕᒫᓂᒃ ᑐᓴᐅᒪᑎᑦᑎᔾᔪᑎᖃᕐᓂᐊᕆᐊᒃᓴᖏᓐᓂᒃ.”

ᕼᐃᒃᔅ ᑭᒃᑯᓕᒫᓄᑦ ᑐᓴᐅᒪᑎᑦᑎᓂᕐᒧᑦ ᖃᐅᔨᓇᓱᖕᓂᕐᒥ “ᐱᓕᕆᕈᓘᔭᕐᓇᕐᓂᖓᓂ” ᐊᒻᒪᓗ ᐅᖃᓚᐅᙱᖢᓂ ᑖ”ᓱᒥᖓ ᐃᑲᔪᖅᑐᐃᔭᕆᐊᒃᓴᖓᓂᒃ.

ᒧᑕᒃ-ᕙᓚᐅᕙᔅ ᐃᓱᒫᓘᑎᒋᖕᒥᔭᖓ ᐅᓇ ᐱᖓᔪᒋᔭᐅᔪᖅ ᖃᐅᔨᓴᕐᓂᐊᖅᑐᖅ ᖃᐅᔨᒪᔭᐅᑎᑕᐅᓇᔭᙱᒻᒪ ᑭᒃᑯᑐᐃᓐᓇᕐᓄᑦ, ᑭᓯᐊᓂᓕ ᕼᐃᒃᔅ ᐅᖃᓚᐅᕐᑐᖅ ᕿᒥᕐᕈᐊᖅᑎᑕᐅᔪᖅ ᐅᖃᐅᓯᐅᔭᕆᐊᖃᓛᕐᓂᖓᓂᒃ ᒪᓕᒐᓕᕆᕕᒡᔪᐊᒥᒃ, ᑕᐃᒪᓐᓇᓗ ᐊᑐᐃᓐᓇᐅᓇᔭᖅᖢᓂ ᑭᒃᑯᓕᒫᓄᑦ.

ᒪᓕᒐᓕᐅᕐᑎᑦ ᐅᓄᕐᓂᖅᓴᐃᑦ ᓂᕈᐊᖅᐸᑕ ᐅᓂᒃᑳᓕᐊᕆᔭᐅᓯᒪᔪᑦ ᑲᑎᒪᔨᕋᓛᕐᓅᖅᑕᐅᖔᕐᓗᑎ ᐊᒻᒪᓗ ᑖᒃᑯᐊ ᑲᑎᒪᔨᕋᓛᑦ ᑕᐅᑐᖕᓂᑯᓂᒃ ᐅᖃᓪᓚᒃᑎᑦᑎᑲᑕᒍᓐᓇᕋᔭᖅᑐᑦ ᐊᒻᒪᓗ ᕿᒥᕐᕈᐊᕈᑎᐅᒃᑲᓐᓂᕐᓗᓂ ᐅᓂᒃᑳᖅ, ᕼᐃᒃᔅ ᐅᖃᖅᑐᖅ.

ᓯᕗᓕᐅᕐᑎ ᐸᐅᓗᓯ ᐊᕿᐊᕉᑉ ᑐᓴᒐᒃᓴᓕᕆᓂᕐᒧᑦ ᑎᑎᕋᖅᑎᖓ, ᓯᒪ ᓴᕼᐊ ᔨᕆᕼᐃ, ᐅᖃᓚᐅᕐᑐᖅ ᒪᓕᒋᐊᖃᖅᑐᑦ ᓯᕗᓕᐅᖅᑎᒥ ᑭᐅᓯᑲᑕᒋᐊᖃᙱᑎᑦᑎᓂᕐᒧᑦ ᐃᖃᓗᐃᑦ-ᓂᐊᖁᙴ ᒪᓕᒐᓕᕆᔨᐅᕝᕕᒋᔭᖓᓄᑦ, ᑭᓯᐊᓂᓕ ᐅᖃᓚᐅᕐᑐᖅ ᑐᒃᓯᕋᐅᑎᒋᔭᐅᔪᓂᒃ ᑐᓂᔭᐅᓚᐅᕐᓂᖓᓂᒃ ᐊᒻᒪᓗ ᑭᖑᓪᓕᕐᒥ ᖃᓄᐃᓕᐅᕐᓂᐊᕐᒪᖔᑦ ᒐᕙᒪᒃᑯᑦ ᖃᐅᔨᓇᓱᖕᓂᕋᖅᖢᓂᒋᑦ.

ᐅᑯᓇ ᓇᓕᐊᒃ ᐃᖃᓗᐃᑦ-ᒪᓂᕋᔭᒃᒧᑦ ᒪᓕᒐᓕᐅᕐᑎ ᐋᑕᒻ ᓚᐃᑦᓯᑑᓐ ᐅᕝᕙᓘᓐᓃᑦ ᐃᖃᓗᐃᑦ-ᓯᓈᒧᑦ ᒪᓕᒐᓕᐅᖅᑎ ᔮᓇᑦ ᐱᑦᓯᐅᓛᖅ ᐳᕉᔅᑐ ᑭᐅᓚᐅᙱᑦᑑᒃ ᑕᒪᑐᒧᖓ.

ᓄᓇᕗᒧᑦ ᒪᓕᒐᓕᐅᕐᑎ ᓘᕆ ᐃᓪᓚᐅᖅ ᐊᐱᖅᓱᖅᑕᐅᓚᐅᕐᓯᒪᖕᒪᑦ ᓰᐲᓰᒃᑯᓐᓄᑦ ᐅᕘᓇ ‘As It Happens’ ᔭᓄᐊᕆ 20-ᐅᑎᓪᓗᒍ ᑕᕝᕙᓂ ᐅᖃᓚᐅᕐᓯᒪᓪᓗᓂ ᐃᑲᔪᖅᑐᐃᓂᕋᖅᖢᓂ ᑭᒃᑯᓕᒫᓂ ᑐᓴᐅᒪᑎᑦᑎᓂᕐᒧᑦ ᖃᐅᔨᓇᓱᖕᓂᕐᒥᒃ.

“ᐃᓱᒪᔪᖓᓕ ᒫᓐᓇ ᖃᓛᖅᑎᑦᑎᖃᑦᑕᕆᐊᖃᕐᓂᖅ … ᑕᒪᓐᓇ ᐱᓕᕆᐊᖑᔭᕆᐊᖃᓕᕐᒪᑦ,” ᐅᖃᖅᑐᖅ.