ᐃᖃᓗᖕᓂ ᖃᒧᑕᐅᔭᖃᕐᕕᖓ ᒪᑐᕗᖅ

ᐊᕐᕌᒍᑲᓴᖕᓂ 26-ᓂ ᐱᓕᕆᐊᖑᐊᓪᓚᓚᐅᖅᖢᓂ ᓯᑭᑑ ᓂᐅᕕᐊᒃᓴᑦ ᐊᒻᒪ ᐱᔨᑦᑎᕋᐅᑎᑦ ᒪᑐᕗᖅ.

ᐅᓇ ᖃᐅᔨᒪᔭᐅᑦᑎᐊᓚᐅᕐᑐᖅ ᐃᖃᓗᖕᓂ ᐱᓕᕆᐊᕆᔭᐅᔪᓂ ᓂᐅᕕᐊᒃᓴᖃᖃᑦᑕᖅᖢᑎᒃ ᑎᓴᒪᓕᖕᓂᒃ (ATVs) ᐊᒻᒪ ᖃᒧᑕᐅᔭᓂᒃ, ᐊᒻᒪᓗ ᑖᒃᑯᓄᖓ ᐃᓚᒃᓴᐅᕙᒃᑐᓂᒃ ᐊᒻᒪᓗ ᓱᕋᒃᓯᒪᔪᓂᒃ ᓴᓇᕙᒃᖢᑎᒃ.

ᓯᑭᑑ ᐃᓚᒌᓴᒃᑯᓐᓄᑦ ᐃᓚᒋᔭᐅᓚᐅᕐᑐᖅ ᐊᒻᒪᓗ ᑯᐊᐸᒃᑯᓐᓄᑦ ᑲᑎᒪᔩᓖᑦ ᐃᓱᒪᓕᐅᕆᔨᐅᓚᐅᖅᖢᑎᒃ ᒪᑐᓂᖓᓂᒃ, ᐅᖃᓚᐅᕐᑐᖅ ᐃᒪᒌᓴᒃᑯᑦ ᐊᖓᔪᖅᑳᖓᑕ ᑐᒡᓕᖓ, ᑐᐄᓐ ᕗᐃᐊᓴᓐ.

“ᓇᓗᓇᙱᓚᖅ ᐃᓱᒪᓕᐅᕆᔾᔪᑎᐅᔪᑦ ᐊᕿᐊᕈᕐᒧᑦ ᓈᒻᒪᓗᐊᙱᓐᓂᖏᓐᓂᒃ,” ᐅᖃᖅᑐᖅ, ᐃᓱᒪᒋᓪᓗᒍ ᑕᒪᒃᑯᐊ ᓄᓇᐃᓐᓇᕐᒥ ᐊᑐᒐᒃᓴᐅᔪᑦ ᐃᖏᕐᕋᔾᔪᑏ ᐱᒻᒪᕆᐊᓘᖕᒪᑕ ᐅᑭᐅᕐᑕᖅᑐᕐᒥ ᐃᓕᖅᑯᓯᕐᒧᑦ.

ᓂᐅᕕᕐᕕᐅᑉ ᒪᑐᓂᖓ ᔭᓄᐊᕆ 5-ᒥ ᐊᔾᔨᒌᙱᑦᑑᑎᓄᑦ ᐱᔾᔪᑎᖃᓚᐅᕐᑐᖅ ᕗᐃᐊᓴᓐ ᐅᖃᖅᑐᖅ.

ᓄᕙᒡᔪᐊᕐᓇᖅ-19 ᑕᒪᑐᒥᖓ ᐊᒃᑐᐃᓯᒪᓚᐅᕆᕗᖅ. ᐊᐅᓪᓚᑲᑕᖕᓂᖅ ᐃᓱᒪᕐᓱᕐᓇᓗᐊᕈᓐᓃᖅᑎᓪᓗᒍ ᒪᑯᓂᖓ ᖃᒧᑕᐅᔭᓂᒃ ᐊᒻᒪ ᑎᓴᒪᓕᖕᓂᒃ ᐱᑖᑲᑕᖕᓂᕐᓴᐅᓕᕐᓂᖏᓐᓄᑦ ᐱᔪᒪᔪᓂᒃ ᐊᖑᒻᒪᑎᔪᓐᓇᐃᓪᓕᓚᐅᕐᒪᑕ ᓴᓇᔨᐅᕙᒃᑐᑦ, ᕗᐃᐊᓴᓐ ᐅᖃᖅᑐᖅ. ᑕᐃᒪᐃᓐᓂᖓᓄᑦ ᐊᔪᕐᓇᕐᓂᖅᓴᒻᒪᕆᐅᓕᕐᒪᑦ ᖃᒧᑕᐅᔭᓂᒃ ᑎᓴᒪᓕᖕᓂᓪᓗ ᐅᑭᐅᕐᑕᖅᑐᕐᒧᐊᖅᑎᑦᑎᔭᕆᐊᒃᓴᖅ, ᐅᖃᖅᑐᖅ.

ᐱᔾᔪᑎᒋᔭᐅᓚᐅᕐᒥᔪᖅ ᒪᑯᐊ ᐃᖏᕐᕋᔾᔪᑎᐅᔪᑦ ᓴᓇᔭᐅᓯᒪᓕᕐᓂᖏᑦ. ᑕᒪᒃᑯᐊ ᑎᓴᒪᓖᑦ ᐊᒻᒪ ᖃᒧᑕᐅᔭᐃᑦ ᖃᕋᓴᐅᔭᒃᑯ ᑲᒪᒋᔭᐅᓂᕐᓴᐅᔭᕆᐊᖃᓕᖅᖢᑎᒃ ᐅᑯᐊ ᓯᑭᑑ ᐃᖅᑲᓇᐃᔭᖅᑎᖃᕋᓱᖕᓂᖅ ᐱᓕᕆᔾᔪᑎᓕᕆᔪᓐᓇᖅᑐᓂᒃ ᐊᒻᒪ ᖃᕋᓴᐅᔭᓕᕆᔪᓐᓇᖅᑐᓂᒃ ᐊᔪᕐᓴᕈᑎᖃᓚᐅᕐᒥᖕᒪᑕ ᓱᕋᒃᓯᒪᔪᓕᕆᔨᒃᓴᓂᒃ.

“ᒫᓐᓇ ᐊᔪᙱᓐᓂᕆᔭᐅᔪᑦ ᐊᔾᔨᒋᙱᒻᒪᕆᓕᕐᒪᒋᑦ ᒪᑯᓇᖓᐅᓚᐅᖅᑐᖅ ᐊᕐᕌᒍᓂ ᖁᓕᓂᒃ ᐊᑐᖅᑕᐅᕙᓚᐅᕐᑐᓂᒃ ᐱᔨᑦᑎᕋᐅᑎᓕᕆᓂᒃᑯᑦ ᐊᒻᒪ ᑲᒪᒋᔭᖃᖃᑦᑕᕐᓂᒃᑯᑦ,” ᕗᐃᐊᓴᓐ ᐅᖃᖅᑐᖅ.

ᑕᒪᒃᑯᓄᖓᑦᑕᐅᖅ ᐃᓚᒃᓴᓂᒃ ᐃᑭᐊᕿᕕᒃᑯᑦ ᐊᔪᕐᓇᕈᓐᓃᕐᓂᖅᓴᐅᓂᖓ ᐊᒻᒪ ᐊᒃᓱᕈᕈᑎᐅᒃᑲᓐᓂᓚᐅᕆᕗᖅ ᓯᑭᑑᒧᑦ.

ᐃᑭᐊᕿᕕᒃᑯᑦ ᓂᐅᕕᑲᑕᓗᐊᖅᑎᓐᓇᒋ ᐅᑯᐊ ᓯᑭᑑ ᑐᙵᕕᒋᔭᐅᓚᐅᕐᓯᒪᖕᒪᑦ ᐃᓚᒃᓴᖅᑖᕋᓱᒡᕕᖕᓄᑦ ᕿᑭᖅᑖᓘᑉ ᒥᒃᓵᓄᑦ. ᒫᓐᓇᓕ ᐃᓚᒌᓴᒃᑯᑦ ᐊᒻᒪ ᐃᑭᐊᕿᕕᒃᑯᑦᑕᐅᖅ ᐱᓕᕆᐊᖃᖃᑦᑕᓕᕐᒥᖕᒪᑕ, ᐋᖅᑭᒃᓯᓚᐅᕐᓯᒪᓪᓗᑎᒃ ᐅᑭᐅᕐᑕᖅᑐᕐᒥ ᐃᓚᒃᓴᓄᑦ ᓇᒡᓯᐅᔾᔨᕕᒃᓴᓂᒃ ᐊᕐᕌᓂ ᐅᖓᓪᓕᕐᒥᒃ ᑖᒃᑯᐊᓗᑦ ᐅᑭᐅᕐᑕᖅᑐᕐᒥᐅᓄᑦ ᓇᒡᓯᐅᔨᕙᓕᖅᖢᑎᒃ, ᕗᐃᐊᓴᓐ ᐅᖃᖅᑐᖅ.

ᕗᐃᐊᓴᓐ ᐅᖃᓚᐅᕐᑐᖅ ᐃᖅᑲᓇᐃᔭᖅᑎᐅᔪᑦ ᓯᑭᑑᒧᑦ ᐃᖅᑲᓇᐃᔮᖏᓐᓂᒃ ᐊᓯᐅᔨᔾᔮᙱᓐᓂᕋᖅᖢᓂᒋᑦ. ᑭᓯᐊᓂᓕ ᐊᓯᖏᓐᓂᒃ ᐱᓕᕆᐊᖃᖅᑎᑕᐅᓂᐊᓕᖅᖢᑎᒃ ᐃᖃᓗᖕᓂ ᑯᐊᐸᐅᔪᓂᒃ.

ᐃᖃᓗᖕᓂ ᓄᓇᖃᕐᑐᖅ ᓵᒻ ᑕᓕ, 31, ᓯᑭᑑᒧᑦ ᓂᐅᕕᕆᐊᒡᒍᔪᖅ.

“ᖁᕕᐊᒋᓂᕐᐹᕆᓚᐅᕐᑕᕋ ᐱᑖᕐᕕᒋᔭᖅᑐᖅᖢᒍ ᐱᔭᕆᐊᖃᖅᑕᓐᓂ.” ᐅᖃᖅᑐᖅ.

ᑕᓕ ᐅᖃᓚᐅᕐᑐᖅ ᐃᖅᑲᐅᒪᓂᕋᖅᖢᓂ ᓯᑭᑐᒧᐊᖃᑦᑕᖅᑐᖅ ᓱᕈᓯᐅᓪᓗᓂᓘᓐᓃᑦ, ᕿᒥᕐᕈᐊᕆᐊᖅᑐᖅᐸᒃᖢᓂ ᖃᒧᑕᐅᔭᓂ ᓂᐅᕕᕐᕕᖕᒦᑦᑐᓂᒃ.

ᐅᖃᓚᐅᕐᑐᖅ ᑲᒪᓗᐊᙱᓐᓂᕋᖅᖢᓂ ᓯᑭᑑ ᒪᑐᓂᖓᓂᒃ, ᓲᖃᐃᒻᒪ ᒪᑐᐃᖓᓂᖓ ᐃᓱᓕᓴᕋᐃᓗᐊᓕᓚᐅᕐᑐᖅ ᓯᕗᓪᓕᕐᒥ ᒪᑐᓯᒪᖁᔭᐅᓚᐅᖅᑎᓪᓗᒋᑦ ᓱᕋᒃᓯᒪᔪᓂᒃ ᓴᓇᔨᖃᑦᑎᐊᙱᓗᐊᓕᕐᓂᕐᒧᑦ.

ᓯᑭᑑ ᐱᑕᖃᕈᓐᓃᖅᑎᓪᓗᒍ ᐃᖃᓗᖕᒥᐅᑕ ᓱᕋᒃᓯᒪᔪᓄᑦ ᐅᐸᒡᕕᖃᓗᐊᕈᓐᓃᖅᐹᓪᓕᖅᑐᑦ. ᑎᓕ ᐅᖃᓚᐅᕐᑐᖅ ᒪᕐᕉᖕᓂ ᓂᕈᐊᕐᓇᖅᑐᖃᕐᓂᕋᖅᖢᓂᐅᒃ — ᐅᑯᐊ Combustion Performance Inc. ᐊᒻᒪᓗ Northwest Motorsports — ᐊᒻᒪᓗ ᐅᖃᖅᖢᓂ ᓈᒻᒪᙱᓗᐊᕋᓱᒋᓪᓗᓂᒋᑦ 8,000-ᓂ ᐃᓄᖃᖅᑐᒧᑦ.

“ᐊᒃᓱᕈᕈᑎᖃᓕᕇᕋᑦᑕ ᒍᓛᔾᔪᓂ ᒪᑐᐃᖓᔪᓂᒃ ᓇᓂᓯᔭᕆᐊᒃᓴᖅ ᐊᐅᓚᐅᑎᓕᕆᔨᐅᔪᓂᒃ,” ᑕᓕ ᐅᖃᖅᑐᖅ.