ᐃᖅᑲᓗᐃᑦ ᐊᓂᒍᐃᑎᑦᑎᕗᑦ ᐱᒋᐊᕈᑎᒥᒃ ᐋᕿᒃᓱᐃᓂᐊᕐᓂᕐᒥᒃ ᐊᑐᕈᓐᓃᖅᑎᑦᑎᓂᕐᒥᒃ ᐊᐅᔭᑦᑐᓂᒃ ᐴᒃᓴᐅᕙᒃᑐᓂᒃ

“ᐅᓇ ᐃᓱᒫᓘᑎᒋᔭᐅᕙᐃᓐᓇᖅᑐᖅ ᐃᓄᖕᓄᑦ”

ᐃᖃᓗᐃᑦ ᓄᓇᓕᐸᐅᔭᓄᑦ ᑲᑎᒪᔩ ᐱᒋᐊᕈᑎᒥᑦ ᐊᓂᒍᐃᑎᑦᑎᓚᐅᕐᑐᑦ ᐊᐃᑉᐹᓂᑦ, ᔫᓂ 25, ᐋᕿᒃᓯᓂᐊᕐᓗᑎᒃ ᐊᐅᒃᑕᔫᑦ ᐊᑕᐅᓰᑐᐃᓐᓇᕐᓗᑎᒃ ᐊᑐᖅᑕᐅᕙᒃᑐᑦ ᐊᑐᕈᓐᓃᕐᑎᑕᐅᓂᐊᕐᓗᑎᒃ ᓄᓇᓕᐸᐅᔭᓂᒃ. ᑲᐃᐅᓪ ᓴᐳᑦ, ᑖᔅᓱᒥᖓ ᐱᒋᐊᖅᑎᑦᑎᔨᐅᔪᖅ, ᐅᖃᓚᐅᕐᑐᖅ ᓂᕆᐅᖕᓂᕋᖅᖢᓂ ᒪᓕᒐᓕᕆᔨᕋᓛᑦ ᑕᒪᑐᒥᖓ ᐊᑐᓕᖅᑎᑦᑎᓂᐊᕐᓗᑎᒃ ᔭᓄᐊᕆ 2020-ᒥᑦ. (ᐊᔾᔨᓕᐅᕆᔨ ᐃᐊᒪ ᑐᕌᓐᑐ)

By ᐃᐊᒪ ᑐᕌᓐᑐ

For an English version of this story, see Iqaluit passes motion to develop ban on plastic bags

ᐊᐅᔭᑦᑐᑦ ᐴᒃᓴᐅᕙᒃᑐᑦ ᓄᓇᕗᑦ ᐊᖓᔪᖅᑳᖃᕐᕕᖓᓂᒃ ᐊᑐᕐᓂᑯᑐᐃᓐᓇᐅᓂᐊᓕᕐᑐᑦ.

ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏ ᐊᓂᒍᐃᑎᑦᑎᓚᐅᕐᑐᑦ ᐊᐃᑉᐹ ᐅᓐᓄᖓᓂ ᑎᑎᕋᕐᓂᐊᕐᓗᑎᒃ ᒪᓕᒐᕋᓛᒥᒃ ᐊᐅᔭᑦᑐᑦ ᐴᒃᓴᐃᑦ ᐊᑐᖅᑕᐅᖃᑦᑕᕈᓐᓃᖁᓗᒋᑦ ᓄᓇᓕᐸᐅᔭᓂ ᓂᐅᕕᕐᕕᒃᓂᑦ.

ᑲᑎᒪᔨ ᑲᐃᐅᓪ ᓴᐳᑦ ᐱᒋᐊᖅᑎᑦᑎᓚᐅᕐᑐᖅ ᐱᖁᔭᕐᒥᒃ, ᑖᓐᓇᓗ ᑕᒪᐃᓐᓄᑦ ᐃᑲᔪᖅᑕᐅᓂᕐᒧᑦ ᐊᓂᒍᖅᑎᑕᐅᓪᓗᓂ ᑲᑎᒪᔨᓄᑦ.

ᓴᐳᑦ ᐅᖃᓚᐅᕐᑐᖅ ᐱᖁᔨᕗᖔᕈᑎ ᐃᖃᓗᖕᒥᐅᓄᑦ ᑕᐃᒪᐃᖁᔭᐅᓯᒪᓂᖓᓄᑦ ᐊᑯᓂᕈᓗᒃ, ᑭᓯᐊᓂᓕ ᖃᖓᑦᑎᐊᓵᖅ ᓄᓇᓕᖕᓂᒃ ᓴᓗᒻᒪᕐᓴᕐᓇᐅᑎᓪᓗᒍ ᑕᒪᓐᓇ ᑲᑎᒪᔨᓄᑦ ᓴᖅᑭᑕᐅᒃᑲᓐᓂᕈᒪᓕᓚᐅᕐᑕᖓ.

“ᑭᓇᑐᐃᓐᓇ ᓄᓇᓕᖕᓂ ᓴᓗᒻᒪᕐᓴᐃᓂᕐᒥ ᐃᓚᐅᓚᐅᕐᑐᖅ ᐅᖃᕈᓐᓇᖅᑐᑦ ᖃᔅᓯᒐᔭᖕᓂᒃ ᓇᓂᓯᓯᒪᓂᖏᓐᓂᒃ ᐊᐅᔭᑦᑐᓂᒃ ᐴᒃᓴᓂᒃ ᓄᓇᓖᑦ ᐃᓗᐊᓂᒃ, ᑯᒐᓛᖕᓂᑦ ᐃᑲᕐᕆᓯᒪᔪᑦ. ᑕᒪᓐᓇ ᐃᓱᒫᓘᑎᐅᖏᓐᓇᐅᔭᕐᒪᑦ ᐃᓄᖕᓄᑦ,” ᐅᖃᖅᑐᖅ.

ᐅᓇ ᓯᕗᓪᓕᕐᐹᙳᙱᑦᑐᖅ ᑕᐃᒪᐃᑦᑐᖅ ᒪᓕᒐᕋᓛᖅ ᐋᕿᒃᑕᐅᖁᔭᐅᓯᒪᓂᖓᓂᒃ ᓄᓇᓕᐸᐅᔭᓂᒃ.

2008-ᒥᑦ, ᐃᖃᓗᐃᑦ ᓄᓇᓕᐸᖑᔭᓄᑦ ᑲᑎᒪᔨᕋᓛᑦ ᑎᑎᕋᖅᐸᓪᓕᐊᓕᓚᐅᕐᓯᒪᖕᒪᑕ ᐊᔾᔨᐸᓗᐊᓂᒃ ᒪᓕᒐᕋᓛᒥᒃ ᐱᑕᖃᕈᓐᓃᖅᑎᑦᑎᓇᓱᖕᓂᕐᒥᒃ ᐊᑕᐅᓰᕐᓗᑎ ᐊᑐᒐᒃᓴᓂᒃ ᐊᐅᔭᑦᑐᓂᒃ ᐴᒃᓴᓂᒃ.

ᒪᓕᒐᕋᓛᑎᒍᓪᓕ, ᓂᐅᕕᕐᕕᐅᔪᑦ ᐊᐅᔭᑦᑐᓂᒃ ᐴᒃᓴᓂᒃ ᑐᓂᓯᖃᑦᑕᕈᓐᓃᖁᔭᐅᓂᐊᓚᐅᕐᓯᒪᔪᑦ, ᑭᓯᐊᓂᓕ ᐸᐃᑉᐹᓂᒃ ᐴᒃᓴᓂᒃ ᐅᕝᕙᓘᓐᓃᑦ ᐊᑐᒃᑲᓐᓂᕈᓐᓇᖅᑐᓂᒃ ᐴᒃᓴᓂᒃ ᐊᑭᓖᕌᕐᔪᒃᓗᑎᒃ. ᐊᐅᔭᑦᑐᑦ ᐴᒃᓴᐃᑦ ᐊᑐᖅᑕᐅᔪᓐᓇᖅᑐᑦ ᓱᓕ ᓂᕿᓄᑦ, ᐃᖃᓗᖕᓄᑦ ᐊᒻᒪ ᐱᕈᒻᑐᕕᓂᕐᓄᑦ. ᓂᐅᕕᕐᕕᐅᔪᑦ ᑕᒪᑐᒥᖓ ᒪᓕᙱᒃᑯᑎᒃ ᐊᑭᓖᑎᑕᐅᓇᔭᖅᖢᑎᒃ $100-ᓂᒃ.

ᐅᓇ 2008-ᒥᑦ ᒪᓕᒐᕋᖅ ᐃᑲᔪᖅᑕᐅᓯᒪᒐᓗᐊᖅᑎᓪᓗᒍ ᓄᓇᓕᐸᐅᔭᐃᑦ ᑲᑎᒪᔨᖏᓐᓄ ᑕᐃᔅᓱᒪᓂ, ᓄᖃᖓᑎᑕᐅᓕᓚᐅᕐᑐᖅ ᐱᖓᔪᖓᓂᒃ ᐅᖃᓕᒫᖅᑕᐅᑎᓪᓗᒍ ᐊᒻᒪᓗ ᐊᑐᓕᖅᑎᑕᐅᓚᐅᕐᓯᒪᓇᓂ.

“ᐋᕿᒋᐊᒃᑲᓐᓂᕋᓱᒃᑲᑦᑎᒍᑦ ᐊᒻᒪ ᐱᒋᐊᖅᑎᒃᑲᓐᓂᕐᓗᒍ ᐊᕐᕌᒍᓂ 11-ᓂ ᐱᒋᐊᖅᑕᐅᓚᐅᕐᓯᒪᓂᑯ,” ᓴᐳᑦ ᐅᖃᖅᑐᖅ.

ᑕᒪᒃᑯᐊ ᓄᓇᓕᐸᐅᔭᐃᑦ ᐊᖅᑯᑎᖏᓐᓂᒃ ᐊᐅᔭᑦᑑᒐᓗᐊᖅᑎᓪᓗᒋᑦ, ᓴᐳᑦ ᐊᖑᓇᓱᒃᐸᒃᑐᓂᒃ ᐅᖃᐅᔾᔭᐅᓯᒪᔪᖅ ᐊᐅᔭᑦᑐᓂᒃ ᐊᕿᐊᕈᕐᒥᐅᑕᕆᔭᐅᔪᓂᒃ ᐱᑕᖃᖃᑦᑕᕐᓂᖓᓂᒃ ᐊᖑᓇᓱᒃᑕᐅᕙᒃᑐᓂᒃ ᑕᒫᓂ.

“ᖃᖓᑐᐃᓐᓇᖅ ᐅᒥᐊᖅᑐᕐᖢᓂ ᑕᑯᔪᓐᓇᖃᑦᑕᖅᑐᒍᑦ ᐊᐅᔭᑦᑐᓂᒃ ᐴᒃᓴᓂᒃ ᐃᒪᐅᐊ ᐃᓗᐊᒎᖅᑐᓂᒃ. ᐃᓱᒪᔪᖓ ᒫᓐᓇ ᐊᑐᖅᑕᐅᔪᓐᓃᖅᑎᑕᐅᒍᑎᒃ ᐱᐅᓇᔭᖅᑐᖅ ᑕᒪᒃᑯᐊ ᐊᒃᑕᑯᐃ ᓯᕗᒧᒃᐸᓪᓕᐊᖁᓇᒋᑦ.”

ᓴᐳᑦ ᐅᖃᓚᐅᕐᑐᖅ ᐅᔾᔨᕆᔫᒐᓗᐊᖅ ᐊᑐᖅᑕᐅᔪᓐᓃᖅᑎᑕᐅᒍᑎᒃ ᐊᐅᔭᑦᑐᑦ ᐴᒃᓴᐃᑦ ᓱᓕ ᐅᓇ ᐊᐱᖅᑯᑎᐅᓇᔭᖅᑐᖅ: ᖃᓄᐃᒻᒪᓪᓕ ᑕᒪᐃᓐᓂᓕᒫᖅ ᐊᐅᔭᑦᑐᑦ ᐊᑐᖅᑕᐅᔪᓐᓃᖅᑎᓪᓗᒋᑦ ᐃᖃᓗᖕᓂ?

“ᐊᖏᓂᕐᓴᒃᑯᑦ ᑕᐅᑐᒃᖢᓂ, ᑕᒪᐃᓐᓂ ᐊᐅᔭᑦᑐᑦ ᐃᓱᒫᓘᑎᐅᓐᓇᖅᑐᑦ. ᑭᓯᐊᓂᓕ ᐅᕙᓂ ᓄᓇᑦᑎᓐᓂᑦ ᓱᓪᓗᓕᑯᓗᖕᓂ ᐃᒥᕈᑎᓂᒃ ᓈᒻᒪᙱᓕᐅᕈᑎᖃᙱᓐᓇᑦᑕ. ᓈᒻᒪᙱᓕᐅᕈᑎᖃᕋᑦᑕᓕ ᐊᐅᔭᑦᑐᓂᒃ ᐴᒃᓴᓂᒃ.”

ᐊᓯᖏᑦᑎᒍᑦᑕᐅᖅ ᐃᖃᓗᖕᓂ ᐊᐅᔭᑦᑐᓂᒃ ᐴᒃᓴᓂ ᐊᑐᖅᑎᑦᑎᑦᑕᐃᓕᓯᒪᔪᑦ. 2011-ᒥᑦ, ᓄᐊᑦᒫᑦ ᐊᑭᓖᑎᑦᑎᖃᑦᑕᓕᓚᐅᕐᑐᑦ 25 ᓴᓐᔅᓂᒃ ᐊᑕᐅᓯᕐᒧᑦ ᐊᐅᔭᑦᑐᒥᒃ ᐹᒃᓴᒧᑦ, ᑖᓐᓇ ᓱᓕ ᐊᑐᖅᑕᐅᔪᖅ ᐅᓪᓗᒥ.

ᓄᐊᑦᒫᑦ 60 ᐳᓴᓐᑎᒥ ᐊᑦᑎᒃᓯᕚᓪᓕᕈᑎᖃᓚᐅᕐᑐᑦ ᐊᐅᔭᑦᑐᑦ ᐴᒃᓴᐃᑦ ᑐᓂᐅᖅᑲᖅᑕᐅᕙᖕᑉᓂᖏᓐᓂᒃ ᓄᓇᕗᒥᑦ ᐊᒻᒪ ᓄᓇᕕᒃᒥᑦ ᓂᐅᕕᕐᕕᒃᓂᑦ ᐊᑭᓖᒍᑎᒃᓴᖅ ᐱᒋᐊᖅᑕᐅᓚᐅᕐᓯᒪᑎᓪᓗᒍ. ᓄᐊᑦᕕᐊᔅᑦ ᑲᒻᐸᓂᒃᑯᑦ, ᓇᖕᒥᓂᖃᖅᑐᑦ ᓄᐊᑦᒫᑦᒥᑦ, ᑮᓇᐅᔭᐃᑦ ᐊᑭᓕᐅᑎᒍᑎᐅᕙᒃᑐᑦ ᐊᐅᔭᑦᑐᓂᒃ ᐴᒃᓴᓄᑦ ᑐᓐᓂᖁᑎᒋᓚᐅᕐᓯᒪᔭᖓᑦ ᐃᓕᓐᓂᐊᕐᕕᒃᒥᑦ ᐅᓪᓛᕈᒻᒥᑕᖃᑦᑕᕐᓂᕐᒧᑦ, ᓄᓇᓕᖕᓂᑦ ᓴᓗᒻᒪᕐᓴᐃᓂᕐᒧᑦ ᐊᒻᒪ ᐃᓕᓐᓂᐊᒃᑲᓐᓂᕈᑎᒃᓴᓄᑦ.

ᐋᑎᒃ ᕙᓐᓱᔅ, ᐃᖃᓗᖕᓂ ᐊᖏᔪᕈᓘᖕᒥᔪᖅ ᓂᐅᕕᕐᕕᒃ, ᐱᒋᐊᖅᑎᑦᑎᓕᓚᐅᕐᓯᒪᔪᑦ 10 ᓯᐊᓐᔅᓂᒃ ᐊᑭᓖᑎᑦᑎᕙᒃᖢᑎᒃ ᐊᑕᐅᓯᕐᒧᑦ ᐴᒃᓴᒧᑦ 2008-ᒥᑦ ᐊᒻᒪᓗ ᖃᐅᔨᑲᐅᑎᒋᓚᐅᕐᒥᔪᑦ 30 ᐳᓴᓐᑎᒥᑦ 40 ᐳᓴᓐᑎᒧᑦ ᐅᓄᕈᓐᓃᖅᐹᓪᓕᖅᑐᓂᒃ ᐴᒃᓴᓂᒃ ᑐᓂᓯᖃᑦᑕᕐᓂᖏᓐᓂᒃ ᓂᐅᕕᖅᑐᓄᑦ.

ᑕᒪᐃᓂᒃ ᓄᐊᑦᒫᑦ ᐊᒻᒪ ᕙᓐᓱᔅ ᑐᓂᓯᖃᑦᑕᓚᐅᕐᑐᑦ ᐊᑭᖃᙱᑦᑐᓂᒃ ᐴᒃᓴᓂᒃ ᐊᑐᒃᑲᓐᓂᕈᓐᓇᖅᑐᓂᒃ ᓂᐅᕕᕆᐊᖅᐸᒃᑐᓄᑦ ᐊᑭᓖᑎᑦᑎᑲᑕᙱᑎᓪᓗᒋᑦ ᐊᑐᒐᒃᓴᓂᒃ ᐊᑕᐅᓰᕐᓗᑎᒃ ᐊᐅᔭᑦᑐᓂᒃ ᐴᒃᓴᓂᒃ, ᑕᒪᒃᑯᐊ ᐃᓄᐃᑦ ᐊᐅᔭᑦᑐᓂᒃ ᐴᒃᓴᓂᒃ ᐊᑐᖅᑎᑦᑕᐃᓕᒪᓪᓗᒋᑦ.

ᕚᕕᓐ ᑳᓄᔅ (Baffin Canners) ᐊᒻᒪᓗ ᐹᕕᓐ ᐅᕐᓱᐊᓗᒃᑖᕐᕕᒃ ᐊᑐᖃᑦᑕᖅᑐᑦ ᑯᐊᓐᒥᙶᖅᑐᒥᒃ ᓄᖑᔭᑦᑐᒥ ᐴᒃᓴᓂᒃ.

ᒐᕙᒪᑐᖃᒃᑯᑦ ᑐᓴᖅᑎᑦᑎᓚᐅᕐᓯᒪᖕᒥᔪᑦ ᐸᕐᓇᐅᑎᖏᓐᓂᒃ ᑕᒪᓐᓇ ᐊᕐᕌᒍ ᐱᒋᐊᓕᕐᑎᓪᓗᒍ ᐊᑐᖃᑦᑕᖁᔨᔪᓐᓃᕐᖢᑎᒃ ᐊᑕᐅᓰᑐᐃᓐᓇᕐᓗᑎᒃ ᐊᐅᔭᑦᑐᓂᒃ ᐴᕆᔭᐅᕙᒃᑐᓂᒃ, ᐱᓚᒋᓪᓗᒋᑦ ᐴᒃᓴᐅᕙᒃᑐᑦ 2021 ᑎᑭᑉᐸᑦ.

ᓴᐳᑦ ᓂᕆᐅᒃᑐᖅ ᒪᓕᒐᕋᓛᒃᓴᖅ ᐊᓂᒍᖅᑎᑕᐅᖁᓪᓗᓂᐅᒃ ᑕᒪᐅᓇ ᐱᓕᕆᐊᕆᔭᐅᓂᖓᒍᑦ.

“ᓂᕆᐅᑦᑎᐊᒻᒪᕆᒃᑐᖓ. ᖃᐅᔨᒪᒐᒪ ᑐᓴᕐᓯᒪᓂᓐᓂ ᓄᓇᖃᖅᑐᓂᒃ ᓯᕗᓂᐊᓂᒃ ᐊᒻᒪ ᐱᒋᐊᕈᑎᐅᓚᐅᖅᑎᓪᓗᒍ ᐱᖁᔨᕗᙶᕈᑎ. ᐃᑲᔪᖅᑐᖅᑕᐅᓯᒪᑐᐃᓐᓇᖅᑐᖅ ᒫᓐᓇᒧᑦ.”

ᓄᓇᓕᐸᐅᔭᓄᑦ ᐊᐅᓚᑦᑎᔨᐅᔪᑦ ᑎᑎᕋᕐᓂᐊᕐᑐᑦ ᒪᓕᒐᕋᓛᓂᒃ ᐅᖃᓪᓚᖃᑎᖃᕐᓂᒃᑯᑦ ᑲᑎᒪᔨᓂᒃ ᐊᒻᒪᓗ ᐅᖃᓕᒫᖅᑕᐅᔪᓐᓇᕐᓂᐊᕐᓗᓂ ᓯᕗᓕᖅᐹᒥᑦ ᑕᖅᑮᒃ ᒪᕐᕉᒃ ᐊᓂᒍᕐᓯᒪᓕᕈᑎᒃ, ᓴᐳᑦ ᐅᖃᖅᑐᖅ.

ᓴᐳᑦ ᐅᖃᓚᐅᕐᑐᖅ ᓂᕆᐅᖕᓂᕋᖅᖢᓂ ᒪᓕᒐᕋᓛᖅ, ᐊᓂᒍᖅᑎᑕᐅᒃᐸᒃ, ᐊᑐᓕᕐᓂᐊᖁᓪᓗᓂᐅᒃ ᔭᓄᐊᕆ 2020-ᒥᑦ.

ᒪᓕᒐᕋᓛᒧᑦ ᐅᖃᐅᓯᖃᖃᑕᓕᖃᑦᑕᖅᑐᑦ ᐊᐃᑉᐸᖓᓂᒃ ᐅᖃᓕᒫᖅᑕᐅᓚᐅᕐᑎᓪᓗᒍ, ᑲᑎᒪᔩᑦ ᐊᓯᙳᖅᑎᑦᑎᔪᓐᓇᕐᓗᑎᒃ ᐅᕝᕙᓘᓐᓃᑦ ᐃᓱᒪᓕᐅᕆᔪᓐᓇᕐᓗᑎᒃ, ᓴᐳᑦ. ᐅᖃᖅᑐᖅ.

Share This Story

(0) Comments

Join the Conversation

Your email address will not be published. Required fields are marked *

*