ᐃᖃᓗᖕᓂ ᐃᙱᕐᑎ ᓵᓇ ᓰᑏᓇᒃ ᐸᕐᓇᓯᕗᖅ ᓂᐱᓕᐅᕆᔭᖓᓂᒃ ᓯᕗᓪᓕᕐᐹᒥᒃ ᓴᖅᑭᑎᑦᑎᓂᐊᕐᓂᖓᓂᒃ, ᑎᐅᕋᐱ ᓴᓴᓐᔅ, ᐅᑯᐊ ᓄᓇᕗᒥᑦ ᐊᑎᕆᔭᐅᔪᑦ ᐊᑐᖅᖢᓂᒋᑦ ᕼᑦᒪᐃᑯᔅ. (ᐊᔾᔨᙳᐊᖅ ᐅᑯᓇᙵᑦ ᕼᑦᒪᐃᑯᔅ)

ᐃᓄᒃᑎᑐᑦ Feb 19, 2021 – 2:30 pm EST

ᐃᙱᕐᑎ ᐅᕌᐳ ᐃᙱᑲᐃᓐᓇᕐᐳᖅ ᓇᒡᓕᒍᓱᖕᓂᕐᒥᒃ ᑭᖑᓪᓕᕐᒥ ᓂᐱᓕᐅᕆᓯᒪᔪᒦᓐᓂᐊᕐᑐᒥᒃ

“ᐅᓇ ᐅᕙᓐᓄᑦ ᐃᑲᔪᕈᑎᐅᖂᔨᖃᑦᑕᕐᒥᒃ ᑎᑎᕋᖅᖢᒋᑦ ᐃᙱᐅᑎᒃᓴᑦ,” ᓵᓇ ᓰᑏᓇ ᐅᖃᖅᑐᖅ

By ᓴᐃᕋ ᕌᔾᔪᔅ

For an English version of this story, see Nunavut rapper teases fans with a love song from upcoming album

ᓄᓇᕗᒥᑦ ᕼᐃᑉ-ᕼᐋᑉ ᑎᑕᒃᑎ ᓵᓇ ᓰᑏᓇᒃ ᑎᑎᕋᖃᑦᑕᕐᓯᒪᕗᖅ ᐊᒻᒪ ᐅᖃᓕᒫᖃᑦᑕᕐᓯᒪᓪᓗᓂ ᐅᖃᕐᓯᒪᔪᓂᒃ ᑐᓴᕐᓴᐅᓂᖏᑦᑎᒍᑦ ᐊᔾᔨᒌᐸᓗᒃᑑᑎᓂᒃ ᑕᐃᒪᙵᓂ ᖃᒪᓂᑦᑐᐊᕐᒥ ᖁᙱᐊᖅᑕᐅᓚᐅᕐᓯᒪᑎᓪᓗᒍ ᓱᕈᓯᐅᓪᓗᓂ ᐊᔪᙱᔾᔪᑎᖓᓂᒃ.

ᐃᒻᒥᓂᒃ ᓴᖅᑭᑎᑦᑎᓯᒪᓕᕐᑐᖅ ᓄᓇᕗᑦ ᑎᑕᖃᑦᑕᖅᑐᓂᒃ ᐊᕐᕌᒎᓕᕐᑐᓂᒃ ᖁᓕᑦ ᐅᖓᑖᓂᒃ, ᐃᙱᐅᓯᖏᓐᓂᒃ ᑐᓵᔭᐅᑎᑦᑎᕙᒃᖢᓂ ᑐᓴᐅᒪᔾᔪᑎᓕᕆᓂᒃᑯᑦ ᐊᒻᒪᓗ ᖁᙱᐊᖅᑕᐅᕙᒃᖢᓂ ᓄᓇᕗᒥᑦ ᓄᓇᓕᖕᓂᑦ.

ᒫᓐᓇᓕ 28-ᓂ ᐅᑭᐅᖃᓕᕐᖢᓂ, ᐃᖃᓗᖕᓂ ᑐᙵᕕᓕᒃ ᑎᑕᒃᑎ ᐸᕐᓇᓯᕗᖅ ᓂᐱᓕᐅᒐᖓᓂᒃ ᓯᕗᓪᓕᕐᐹᒥᒃ, ᑎᐅᕋᐱ ᓴᓴᓐᔅ, ᐅᑯᑎᒎᖓᓪᓗᓂ ᓄᓇᕗᒥᑦ ᐊᑎᕆᔭᐅᔪᒃᑯᑦ ᕼᐃᑦᒪᐃᑯᔅ.

“ᓴᖅᑭᑎᑦᑎᓯᒪᔪᓂ ᐅᓄᕈᓘᔭᕐᑐᓂᒃ ᐊᑕᐅᓯᐅᓕᖓᔪᓂᒃ ᐃᙱᐅᓯᕐᓂᒃ, ᑭᓯᐊᓂᓕ ᓇᖕᒥᓂᖅ ᑎᑎᕋᕐᓯᒪᔭᓐᓂᒃ ᐊᑐᓚᐅᕐᓯᒪᙱᑦᑐᖓ,” ᓰᑏᓇᒃ ᐅᖃᖅᑐᖅ. “ᖁᕕᐊᓱᒻᒪᕆᒃᑐᖓ ᑖᓐᓇ ᑐᓴᓚᐅᕐᓯᒪᙱᑦᑐᓄᑦ ᑐᓵᔭᐅᓂᐊᕐᓂᖓᓂᒃ.”

ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᐅᔪᖅ ᓱᒃᑲᐃᒍᑎᒋᓯᒪᖕᒪᑦ ᑖᓐᓇ ᓂᐱᒃᓴᖅ ᐋᖅᑭᒃᓱᖅᑕᐅᓂᖓᓄᑦ ᐊᒻᒪᓗ ᓰᑏᓇᒃ ᓱᓕ ᖃᑯᒍᒻᒪᕆᒃ ᓴᖅᑭᓐᓂᐊᕐᒪᖔᑦ ᐅᖃᓚᐅᙱᖢᓂ. ᑭᓯᐊᓂᓕ ᓴᖅᑭᑎᑦᑎᔪᓐᓇᕐᓯᔪᖅ ᑐᓵᕙᒃᑐᓄᑦ ᐆᒥᖓ ᓄᑖᒥᑦ ᐃᙱᐅᓯᖓᓂᒃ ‘Better With You’ (ᐱᐅᓂᕐᓴᖅ ᐃᓕᖕᓂ ᐱᖃᑎᖃᖅᖢᖓ), ᓂᐱᓕᐅᒐᖅ ᓄᓇᕗᒻᒥᐅᑕᐅᖃᑎᒥᖕᓂ ᐱᖃᑎᖃᖅᖢᓂ ᐃᙱᕐᑎᒥᑦ ᐋᓯᕙ.

Inuit Child First, Indigenous Services Canada

ᐅᓇ Better With You ᓇᒡᓕᒍᓱᖕᓂᕐᒥᒃ ᐃᙱᐅᑎ ᓴᖅᑭᑕᐅᓚᐅᕐᑐᖅ ᕚᓚᓐᑕᐃᓐ ᐅᓪᓗᖓᓂᒃ, ᕕᕝᕗᐊᕆ 14-ᒥ. ᓂᐱᓕᐅᒐᖅ ᐃᓗᓕᖃᕐᑐᖅ ᐅᓐᓄᐊᒃᑯ ᓲᕐᓗ ᑎᑕᑲᑕᐅᓯᕐᓂᒃ, ᑭᓯᐊᓂᓕ ᐃᙱᕐᑕᖓ ᐱᔾᔪᑎᖃᖅᖢᓂ ᓰᑏᓇᐅᑉ ᐱᖃᑎᖓᓂᒃ.

“ᑲᑎᕐᖓᓕᕋᓐᓄᒃ ᒫᓂ ᐊᕐᕌᒍᓂᒃ 7-ᐅᓕᕐᑐᓂᒃ,” ᓰᑏᓇᒃ ᐅᖃᖅᑐᖅ. “ᐅᓇ ᑎᑎᕋᓚᐅᕐᓯᒪᔭᕋ ᐱᖃᑎᒋᙱᓚᐅᑲᒃᖢᒍ, ᐃᓕᓐᓂᐊᕆᐊᕐᓯᒪᑎᓪᓗᒍ; ᓲᕐᓗ ᐃᑲᔪᖅᑎᒋᔭᕆᐊᖃᒻᒪᕆᒃᑎᓪᓗᒍ.

“ᐅᓇ ᕚᓚᓐᑕᐃᓐ ᐅᓪᓗᖓᓄᑦ ᑐᓐᓂᖅᑯᓯᐊᕋ ᑖᔅᓱᒧᖓ,” ᐅᖃᒃᑲᓐᓂᕐᑐᖅ. “ᐃᒃᐱᒋᖁᒐᒃᑯ ᐱᒻᒪᕆᐊᓘᓂᖓᓂᒃ, ᑕᐃᒪᓐᓇᑦᑕᐃᓐᓇᖅ ᐅᕙᓐᓂ ᐱᒻᒪᕆᐅᑎᑦᑎᕙᒃᑎᓪᓗᒍ.”

ᐅᑎᕐᑕᒐᖓ, ᐋᓯᕙᐅᑉ ᐃᓚᒋᐊᕐᓯᒪᔭᖓ ᐃᙱᐅᑎᒧᑦ, ᑭᖑᓂᐊᒍᑦ ᐃᓚᔭᐅᓚᐅᕐᓯᒪᔪᖅ. “ᖁᕕᐊᓱᒻᒪᕆᒃᑐᖓ ᓂᐱᓕᐅᒐᕐᓃᓐᓂᖓᓂᒃ,” ᓰᑏᓇᒃ ᐅᖃᖅᑐᖅ. “ᐃᙱᕐᑎᑦᑎᐊᕚᓘᖕᒪᑦ.”

ᓰᑏᓇ ᐅᖃᓚᐅᕐᑐᖅ ᐊᔪᙱᑕᒥᒃ ᑕᐅᑐᒃᑕᐅᑎᑦᑎᓇᐅᓚᐅᕐᓯᒪᔪᒥᒃ ᐊᕐᕌᒎᓕᕐᑐᑦ ᖁᓕᑦ ᐊᓂᒍᕐᓯᒪᓕᕐᑎᓪᓗᒋᑦ ᖃᐅᔨᒍᑎᒋᓚᐅᕐᓯᒪᓂᕋᖅᖢᓂᐅᒃ ᖁᙱᐊᖅᑕᐅᓪᓗᓂ ᐃᑲᔪᕐᑐᐃᔪᓂᒃ ᐊᓕᐊᓇᐃᓐᓂᖓᓂᒃ. ᑕᐃᒪᓕ ᑖᓐᓇ ᐃᓅᓱᒃᑑᓪᓗᓂ ᓰᑏᓇ ᑎᑎᕋᖃᑦᑕᓕᓚᐅᕐᓯᒪᔪᖅ ᐃᓱᒪᒋᔭᖏᓐᓂᒃ, ᐃᙱᖅᐸᒃᖢᓂ ᐊᒻᒪ ᐅᕌᑉᒥ ᓇᖕᒥᓂᕐᒥᓂᒃ.

ᐃᓚᖏᑦ ᓯᕗᓪᓕᕐᐹᑦ ᓯᑏᓇᐅᑉ ᑐᓵᕙᓚᐅᕐᑕᖏᑦ ᕼᐃᑉ-ᕼᐋᑉᒥ ᐅᑯᓂᖓ Salt-N-Pepa, ᐱᖓᓱᑦ ᐊᕐᓇᐃᑦ ᐅᕌᑉᒥ ᓂᓪᓕᐊᔨᐅᕙᒃᑐᑦ ᐊᒻᒪᓗ ᑎᑕᒃᑐᒃᓴᓂᒃ ᐋᖅᑭᒃᓱᐃᔨᒥᒃ ᐱᙳᐊᖅᑎᑦᑎᕙᓚᐅᕐᓯᒪᔪᒥᒃ 1980-ᖏᓐᓂᒃ ᐊᒻᒪ 1990-ᖏᓐᓂᒃ.

“ᑕᐃᔅᓱᒪᓂᓕ ᖃᐅᔨᓕᓚᐅᕐᓯᒪᔪᖓ ᑐᓴᕐᓂᕆᔭᒃᑲᑦ ᐅᑯᐊ ᕼᐃᑉ-ᕼᐋᑉ ᐊᒻᒪ ᐅᕌᑉ,” ᐅᖃᖅᑐᖅ. “ᑖᒃᑯᐊ ᐅᕙᓐᓂ ᐃᑲᔪᕈᑎᖃᓚᐅᕐᓯᒪᖕᒪᑕ.

ᑎᑎᕋᖃᑦᑕᓕᕐᖢᓂ ᐃᓕᓐᓂᐊᕐᕕᐊᓗᖕᒥ ᐃᓱᒪᒋᔭᓐᓂᒃ. ᖃᐅᔨᓇᓱᓚᐅᕋᒪ ᐃᓱᒪᒋᔭᒃᑲ ᓴᖅᑭᑎᑦᑐᒪᓪᓗᒋᑦ ᒪᐅᓇ ᑎᑕᐅᑎᑎᒍᑦ ᐊᒻᒪ ᕼᐃᑉ-ᕼᐋᑉᑯᑦ — ᖁᕕᐅᓇᙱᑦᑑᒐᓗᐊᕐᐸᑕ ᐃᓱᒪᒋᔭᒃᑲ.”

ᓰᑏᓇᒃ ᑕᒪᑐᒧᖓ ᐱᒋᐊᒻᒪᕆᒍᓐᓇᕐᓯᓚᐅᕐᓯᒪᕗᖅ 2009-ᒥᑦ, ᑐᙵᓵᖅᑕᐅᑎᓪᓗᒍ ᐃᖃᓗᖕᓄᑦ ᐅᕙᓂ ᐊᓕᐊᓇᐃᑦ ᖁᕕᐊᓱᖕᓇᒥ ᐃᙱᖁᔭᐅᑎᓪᓗᒍ, ᑕᒪᓐᓇᓗ ᐅᖃᐅᓯᕆᓪᓗᓂᐅᒃ ᐱᒋᐊᕈᑎᒋᓚᐅᕐᓯᒪᓂᖓᓄᑦ ᐃᙱᐅᑎᓂᒃ ᑎᑎᕋᖃᑦᑕᕈᑎᖏᓐᓂᒃ ᐊᒻᒪ ᓂᐱᓕᐅᖃᑦᑕᕐᓂᖓᓂᒃ.

ᓂᐱᓕᐅᒐᖓ ᐊᑎᖃᕐᑐᖅ, Therapy Sessions, ᓇᓗᓇᐃᕐᓯᓯᒪᔪᖅ ᑎᑕᐅᑎᓕᕆᓂᖓ ᖃᓄᖅ ᑖᔅᓱᒧᖓ ᑐᑭᖃᓪᓚᕆᖕᓂᖓᓂᒃ.

“ᐅᖃᙳᐊᖃᑦᑕᓚᐅᕐᓯᒪᔪᖓ ᐅᖃᓪᓚᖕᓂᐊᕐᓂᕋᖅᖢᖓ ᓂᐱᖃᐅᑎᒧᑦ, ᓲᖃᐃᒻᒪ ᑖᓐᓇᑐᐊᖅ ᐅᕙᓐᓂ ᑐᓵᖃᑦᑕᕐᒪᑦ,” ᓰᑏᓇ ᐅᖃᖅᑐᖅ. “ᐅᓇ ᓲᕐᓗ ᐅᕙᓐᓄᑦ ᐃᑲᔫᑎᒻᒪᕆᒃ ᑎᑎᕋᐅᓯᖃᖅᐸᒃᖢᓂ ᐃᙱᐅᑎᒃᓴᓂᒃ.

“ᐅᓇ ᓂᐱ ᓴᖅᑭᑎᑦᑎᓯᒪᔪᖅ ᖃᓄᑎᒋ ᓴᙱᑎᒋᓂᖓᓂᒃ ᐊᒻᒪ ᒪᓂᑐᐃᓐᓇᐅᙱᑐᕐᓇᕐᓂᖓᓂ ᐃᓄᒃ,” ᐅᖃᖅᑐᖅ. “ᖃᓄᐃᙱᓂᖓᓂᓗ ᐅᖃᓪᓚᒍᓐᓇᕐᓂᕐᒥᒃ ᐃᓱᒪᒋᔭᑦᑎᓐᓂᒃ ᐊᒻᒪ ᐊᒃᓱᕉᑎᒋᔭᑦᑎᓐᓂᒃ, ᐊᒻᒪᓗ ᑕᒪᑐᒃᑯᓂᖓ ᐊᓂᒍᐃᓂᐊᑐᐃᓐᓇᕐᓂᕐᒥᒃ.”