ᐅᑭᐅᒃᑯᑦ ᑲᑎᒪᓂᖅ ᓄᑖᒥ ᐅᖃᓪᓚᒃᑎᖃᓕᖅᖢᑎᒃ, ᑮᓇᐅᔭᓕᐅᕈᑎᓂ ᒥᑭᓛᖅ ᐊᑭᓕᐅᑎᐅᕙᒃᑐᖅ ᐅᓄᕐᓯᒋᐊᖅᑕᐅᕗᖅ ᓄᓇᕗᒧᑦ

For an English version of this story, see Winter sitting sees new Speaker, minimum wage increase for Nunavut

ᐅᑭᐅᖅ ᓄᓇᕗᒥᑦ ᑲᑎᒪᕕᒡᔪᐊᕐᓇᖅ ᓄᖅᑲᓚᐅᕐᑐᖅ ᑎᒃᑯᐊᕐᓯᓚᐅᕐᑎᓪᓗᒋᑦ ᓄᑖᒥᑦ ᐅᖃᓪᓚᒃᑎᖃᓕᖅᖢᑎᒃ, ᑮᓇᐅᔭᓕᐅᕈᑎᓂᒃ ᒥᑭᓛᖅ ᐅᓄᕐᓯᒋᐊᖅᑕᐅᓂᖓ ᑲᓇᑕᒥᓐ ᐊᒻᒪᓗ ᓄᓇᓖᖕᓂ ᒪᕐᕉᖕᓂ ᐃᓄᒃᑐᑦ ᐊᑎᖏᓐᓂᒃ ᐊᑎᖃᓪᓚᕆᓕᖅᑎᑦᑎᓪᓗᑎᒃ.

ᑲᑎᒪᓂᖅ, ᐱᒋᐊᓚᐅᕐᓯᒪᔪᖅ ᕕᕗᐊᕆ 19-ᒥᑦ ᐊᒻᒪ ᐱᐊᓂᒃᖢᓂ ᒫᑦᓯ 12-ᒥᑦ, ᐱᒋᐊᕈᑎᖃᓚᐅᕐᑐᖅ ᓄᓇᕗᑦ 2020/21 ᐊᕐᕌᒍᒧᑦ ᐊᐅᓚᒍᑎᒃᓴᓂᒃ, ᑖᓐᓇᑦᑕᐅᖅ ᖃᐅᔨᒪᔭᐅᖕᒥᔪᖅ ᒪᓕᒐᖅ 29-ᒥᑦ.

ᑮᓇᐅᔭᓕᕆᔨᒃᑯᑦ ᒥᓂᔅᑕᖓᑦ ᔪᐊᔾ ᕼᐃᒃᔅ ᓴᖅᑭᑎᑦᑎᓚᐅᕐᑐᖅ $2.2 ᐱᓕᐊᓐ ᑖᓚᓂᒃ ᐊᐅᓚᑦᑎᔾᔪᑎᐅᓂᐊᖅᑐᓂᒃ ᐊᕐᕌᒍᒧᑦ ᕕᕗᐊᕆ 19-ᖑᑎᓪᓗᒍ. ᐅᓄᓛᖑᓚᐅᕐᑐᖅ ᐅᓇ ᐊᐅᓚᑦᑎᔾᔪᑎᒃᓴᓂᒃ ᐋᓐᓂᐊᕐᕕᓕᕆᓂᕐᒧᑦ ᐊᐅᓪᓚᕈᑎᒃᓴᓄᑦ ᐊᕐᕌᒎᓂᐊᖅᑐᒥ. ᐊᒻᒪᓗ $1.5 ᒥᓕᐊᓐ ᑖᓚᐃᑦ 6-ᓄᑦ ᓄᑖᓄ ᐸᓖᓯᒃᓴᓄᑦ ᓄᓇᕗᒥᑦ ᑕᒪᑐᒪᓂ ᐊᕐᕌᒍᒧᑦ ᐊᒻᒪ 6-ᑲᓐᓂᕐᓄᑦ ᐊᕐᕌᒎᓂᐊᖅᑐᒧᑦ.

ᐅᖃᓪᓚᖃᑎᒌᑲᑕᓚᐅᕐᓯᒪᑎᓪᓗᒋᑦ ᒪᓕᒐᓕᕆᔨᑐᐃᓐᓇᐃᑦ ᐅᑭᐊᕐᓵᖑᓚᐅᕐᑐᖅ, ᔩᓂ ᐃᕼᐊᓗᐊᒃ ᑐᓴᖅᑎᑦᑎᓚᐅᕐᑐᖅ ᒫᑦᓯ 16-ᒥᑦ ᐅᓇ ᓄᓇᕗᒥᑦ ᑮᓇᐅᔭᓕᐊᕆᔭᐅᔪᓐᓇᖅᑐᖅ ᒥᑭᓛᒃᑯᑦ $13 ᐃᑲᕐᕋᒧᑦ ᐅᓄᕐᓯᒋᐊᖅᑕᐅᓚᐅᕐᑐᖅ $16-ᒧᑦ ᐃᑲᕐᕋᒥ ᐱᒋᐊᕐᓗᓂ ᐄᐳᕈᓪ 1-ᒥᑦ, ᑖᓐᓇᓗ ᖁᑦᑎᖕᓂᖅᐹᖑᓕᖅᖢᓂ ᑲᓇᑕᒥ.

ᑲᑎᒪᑎᓪᓗᒋᑦ ᕕᕗᐊᕆ 24-ᒥᑦ, ᒪᓕᒐᓕᐅᕐᑎᐅᔪᑦ ᖃᐅᔨᓕᓚᐅᕐᐳᑦ ᓯᒥᐅᓐ ᒥᑭᙳᐊᖅ, ᐅᖃᓪᓚᒃᑎ ᒪᓕᒐᓕᕆᕕᒡᔪᐊᒥᑦ ᐊᒻᒪ ᒪᓕᒐᓕᐅᕐᑎ ᖃᒪᓂᑦᑐᐊᕐᒧᑦ, ᓄᖅᑲᕐᓂᐊᓕᕐᓂᖓᓂᒃ ᐃᒻᒥᓅᖓᔪᓄᑦ.

ᑖᔅᓱᒧᖓᓕ ᓂᕈᐊᕆᐊᖃᓕᓚᐅᕐᑐᑦ ᓄᑖᒥ ᐅᖃᓪᓚᒃᑎᒃᓴᒥᑦ, ᑕᐃᒪᓕ ᐅᓇ ᐹᓪ ᖁᐊᓴ, ᓄᓇᕗᒧᑦ ᓯᕗᓕᐅᕐᑎᐅᓂᑯ ᐊᒻᒪ ᒫᓐᓇ ᒪᓕᒐᓕᐅᕐᑎᐅᓪᓗᓂ ᐊᒡᒍᒧᑦ, ᓂᕈᐊᕆᔭᐅᓚᐅᕐᑐᖅ ᐅᖃᓪᓚᒃᑎᐅᓂᐊᓕᖅᖢᓂ ᐸᐃᑉᐹᑎᒍᑦ ᓂᕈᐊᖅᑎᓪᓗᒋ ᕕᕗᐊᕆ 26-ᒥᑦ.

ᕕᕗᐊᕆ 18-ᒥᑦ, ᕼᐃᒃᔅ ᐅᖃᓚᐅᕐᑐᖅ ᒪᓕᒐᓕᕆᔨᕐᔪᐊᓄᑦ ᐅᓇ ᑲᖏᖅᖠᓂᖅ ᑭᖑᓪᓕᐅᓗᓂ ᐱᐊᓂᒃ ᐊᒻᒪ ᕗᐊᐃᓂᓂᒃ ᓂᐅᕕᕐᕕᖃᓕᕐᓂᐊᕐᓂᖓᓂᒃ. ᐅᖃᓚᐅᕐᑐᖅ ᑖᓐᓇ ᓂᐅᕕᕐᕕᒃᓴᖅ ᒪᑐᐃᓛᕐᓂᕋᖅᖢᓂᐅᒃ ᐊᕐᕌᒎ ᐃᓗᐊᒍᑦ.

ᕕᕗᐊᕆ 20-ᒥᑦ, ᒪᓕᒐᓕᐅᕐᑎᑦ ᐃᓱᒫᓘᑎᖃᓚᐅᕐᒥᔪᑦ ᓄᓇᕗᑦ ᐱᖁᔭᖏᓐᓂᒃ ᒪᑯᓂᖓ ᓚᐃᓴᓐᓯᖃᙱᑦᑐᓂᒃ ᓇᓚᐅᑦᑖᕈᑎᐅᕙᒃᑐᓂᒃ (lotteries) ᐅᑯᐊ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᑭᒃᑯᓕᒫᓄᑦ ᑐᓴᒐᒃᓴᓕᐅᓚᐅᕐᑎᓪᓗᒋᑦ ᓄᓇᖃᖅᑐᑦ ᓇᓚᐅᑦᑖᕈᑎᓂᒃ ᓂᐅᕕᐊᒃᓴᖃᕐᓂᖅ ᒪᓕᒐᕐᓂᒃ ᓱᕋᐃᓯᒪᓂᖓᓂᒃ ᓄᓇᕗᒥᑦ.

ᑕᐃᒪᐃᓐᓂᖓᓄᑦ, ᐹᑦ ᐊᕐᓇᑲᒃ, ᒪᓕᒐᓕᐅᕐᑎ ᐃᖃᓗᐃᑦ-ᓂᐊᖁᙴᒧᑦ, ᒪᓕᒐᓕᕆᔨᓄᑦ ᐅᖃᓚᐅᕐᑐᖅ ᐃᓱᒪᓂᕋᖅᖢᓂ ᓄᓇᕗᑦ ᓇᓚᐅᑦᑖᕈᑎᓄᑦ ᒪᓕᒐᖓ ᓄᑕᐅᙱᓗᐊᓕᕋᓱᒋᓪᓗᓂᐅᒃ ᐊᒻᒪ ᕿᒥᕐᕈᐊᖅᑕᐅᖁᓪᓗᓂᐅᒃ.

ᒫᑦᓯ 2-ᒥᑦ, ᐃᓄᓕᕆᔨᒃᑯᑦ ᒥᓂᔅᑕᖓᑦ ᐃᓕᓴᐱ ᓯᐅᑎᐊᐱᒃ ᐅᖃᓚᐅᕐᑐᖅ ᑲᑎᒪᔨᕐᔪᐊᓄᑦ ᐱᓕᕆᕝᕕᖓ ᕿᒥᕐᕈᐊᕐᓂᖏᓐᓂᒃ ᐱᖁᔭᓂᒃ ᒪᑯᐊ ᓂᖃᐃᓱᖅᐸᒃᑐᑦ ᑮᓇᐅᔭᖅᑖᕆᔭᕕᓂᖏᓐᓂᒃ ᐱᓐᒎᓂᕐᒧᑦ ᐅᕝᕙᓘᓐᓃᑦ ᓇᓚᐅᑦᑖᕈᑎᓄᑦ ᓵᓚᒃᓴᐅᓯᐊᖏᓐᓄᑦ ᓂᖃᐃᓲᑎᒃᓴᖏᓐᓂᒃ ᐲᕐᓯᕕᐅᖃᑦᑕᕐᓂᖏᓐᓂᒃ.

ᕕᕗᐊᕆ 24-ᒥᓪᓕ, ᒪᓕᒐᓕᕆᔨᒃᑯᑦ ᒥᓂᔅᑕᖓ ᔩᓂ ᐃᕼᐊᓗᐊᒃ ᑐᓴᖅᑎᑦᑎᓚᐅᕐᑐᖅ ᓄᑖᓂᒃ ᖃᓄᐃᓕᐅᕈᑎᒃᓴᓂᒃ ᐅᑯᑎᒎᓇᖅ ᓄᓇᕗᑦ ᐊᒻᒪ ᐋᒑᓐᑯᐃᓐ ᓯᓚᑦᑐᖅᓴᕐᕕᒃ ᐋᑐᕚᒥᑦ ᐊᔪᕈᓐᓃᖅᓴᖅᑎᑦᑎᓂᕐᒥᒃ ᑎᒍᔭᐅᓯᒪᓂᑯᓂᒃ ᐱᓕᕆᐊᖃᕈᓐᓇᕐᓂᕐᒧᑦ.

“ᐃᒪᐃᑎᑦᑎᔪᒪᒐᑦᑕ ᒪᑯᐊ ᓯᕗᓂᒃᓴᖏᑦ ᐱᓕᕆᔾᔪᓯᑦᑕ ᐃᓚᖃᓕᕐᓗᑎᒃ ᒪᑯᓂᖓ ᐃᓄᐃᑦ ᐃᓕᖁᓯᖏᓐᓂᒃ ᑐᙵᕕᖃᕈᓐᓇᕐᓗᑎᒃ ᒪᑯᑎᒎᓇᖅ ᒪᓕᒐᓕᕆᓂᒃᑯᑦ,” ᐃᕼᐊᓗᐊᒃ ᐅᖃᓚᐅᑦᑐᖅ ᑲᑎᒪᔨᕐᔪᐊᓄᑦ.

ᕕᕗᐊᕆ 27-ᒥᑦ, ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᑦ ᒥᓂᔅᑕᖓᑦ ᖁᐊᓴ ᑯᓱᒐᖅ ᐅᖃᓚᐅᕐᑐᖅ ᑲᑎᒪᔨᕐᔪᐊᓄᑦ ᐊᑎᓕᐅᓚᐅᕐᓂᖓᓂᒃ ᐊᑎᖏᓐᓂᒃ ᐊᓯᙳᖅᑎᑦᑎᔪᒪᔪᓂᒃ ᒪᕐᕉᖕᓂᒃ ᓄᓇᕗᒥᑦ ᓄᓇᓖᖕᓂᒃ. ᕼᐋ ᐲᑦᔅ ᐊᑎᑐᖃᖓᓂᒃ ᐃᓄᒃᑐᑦ ᐊᑎᖃᓕᖅᖢᓂ ᐃᒪᓐᓇ ᓴᓂᕋᔭᒃ, ᐊᒻᒪ ᑲᐃᑉ ᑐᐊᓵᑦ ᐃᓄᒃᑐᑦ ᐊᑎᑐᖃᕐᒥᓂᒃ ᐊᑎᖃᓪᓚᕆᓕᕆᓪᓗᓂ ᐆᒥᖓ ᑭᙵᐃᑦ.

ᒫᑦᓯ 3-ᒥᑦ, ᖁᐊᓴ ᑯᓱᒐᖅ ᐃᖅᑲᓇᐃᔮᒃᓴᓕᕆᓂᕐᒧᑦ ᒥᓂᔅᑕᐅᓂᖓᓄᑦ, ᓴᖅᑭᑎᑦᑎᓚᐅᕐᑐᖅ ᐆᒥᖓ ᓄᓇᕗᑦ ᒐᕙᒪᒃᑯᑦ ᓇᓗᓇᐃᔭᕐᓯᒪᔪᓂᒃ ᐸᕐᓇᐅᑎᖏᓐᓂᒃ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᑦ ᒐᕙᒪᒃᑯᑦ ᓴᓇᕝᕕᖏᓐᓂᒃ ᐊᒻᒪ ᐱᓕᕆᕝᕕᖏᓐᓂᒃ ᐅᓄᕐᓯᕚᓪᓕᖅᑎᑕᐅᓂᐊᕐᓂᖏᓐᓂᒃ.

ᑎᑎᖃᑦ ᐃᓚᖃᕐᒥᔪᑦ ᐃᓄᐃᑦ ᐃᖅᑲᓇᐃᔭᓕᖅᑎᑕᐅᓂᖏᓐᓄᑦ ᐸᕐᓇᐅᑎᓂᒃ ᑕᒪᐃᓐᓂ ᓄᓇᕗᑦ ᒐᕙᒪᒃᑯᖏᓐᓂ, ᐃᓚᖃᖅᖢᓂ ᐃᓛᒃᑰᖓᔫᑎᓂᒃ ᐃᓄᖕᓄᑦ ᐃᖅᑲᓇᐃᔭᓕᖅᑎᑦᑎᒍᑎᒃᓴᓄᑦ ᐸᕐᓇᐅᑎᒃᓴᓂᒃ ᐱᓕᕆᕝᕕᓕᒫᓄᑦ ᐊᒻᒪᓗ ᓄᓇᕗᑦ ᓯᓚᑦᑐᖅᓴᕐᕕᒃᒧᑦ, ᓄᓇᕗᑦᒥ ᐃᒡᓗᓕᕆᔨᕐᔪᐊᓄᑦ ᐊᒻᒪ ᖁᓪᓕᖅ ᐆᒻᒪᖁᑎᓕᕆᔨᒃᑯᓐᓄᑦ.

ᑲᑎᒪᓂᕐᒥ ᐊᒃᓱᕈᕐᓇᕐᑐᕐᓯᐅᓚᐅᕆᕗᑦ ᒫᑦᓯ 5-ᖑᑎᓪᓗᒍ ᐅᑯᐊ ᒪᓕᒐᓕᐅᕐᑎᑦ ᐊᑐᓂᑦ ᐅᖃᓪᓚᑲᑕᒃᑎᓪᓗᒋᑦ ᒪᓕᒐᓕᕆᕝᕕᒃᒥᑦ ᖃᓄᖅ ᓄᖅᑲᖅᑎᑦᑎᔪᓐᓇᕐᒪᖔᑦ ᐋᓐᓂᕐᓱᐃᕙᖕᓂᐊᓗᖕᒥᑦ ᓄᓇᕗᒥᑦ, ᑖᓐᓇᓗ ᐊᓂᒍᖅᑎᑕᐅᓚᐅᕐᑐᖅ ᑕᒪᐃᓐᓄᑦ.

ᐃᓕᓴᐱ ᓯᐅᑎᐊᐱᒃ, ᒥᓂᔅᑕ ᐃᓄᓕᕆᔨᒃᑯᓐᓄᑦ ᐊᒻᒪ ᐊᕐᓇᓄᑦ ᑲᑎᒪᔨᓄᑦ, ᐱᒋᐊᕈᑎᓕᐅᓚᐅᕐᓯᒪᖕᒪᑦ ᐆᒧᖓ “ᐋᓐᓂᕐᓯᕆᓂᐊᓗᖃᕈᓐᓃᕐᓗᓂ ᓄᓇᕗᒥᑦ.”

“ᑲᑎᖃᑎᒌᒋᖕᓂᖃᕆᐊᖃᕋᑦᑕ ᐊᑕᐅᑦᑎᒃᑯ ᑕᐃᒪᓐᓇᓗ ᓂᕆᐅᖕᓂᖃᖅᑎᑦᑎᔪᓐᓇᖅᖢᑕ. ᑕᐃᒪᓐᓇ ᑐᓴᖅᑎᑦᑎᕙᖕᓂ ᓂᕆᐅᒍᑎᐅᓕᖃᑦᑕᕐᒪᑦ ᐃᓱᒪᓪᓗᑎᒃ ᐃᓱᒪᒋᔭᖃᑦᑎᐊᕐᓂᑦᑎᓐᓂᒃ ᐊᖓᔪᖅᑳᖑᓂᒃᑯᑦ,” ᓯᐅᑎᐊᐱᒃ ᐅᖃᓚᐅᕐᑐᖅ ᒪᓕᒐᓕᕆᕕᒃᒥᑦ ᒫᑦᓯ 5-ᒥᑦ.

ᒐᕙᒪᒃᑯᑦ ᑐᓴᖅᑎᑦᑎᓚᐅᕐᒥᔪᑦ ᑎᓴᒪᓂᒃ ᐊᕐᓇᓄᑦ ᕿᒫᕝᕕᓕᐅᕐᓂᐊᕐᓂᖏᓐᓂᒃ ᐋᓐᓂᕐᓱᖅᑕᐅᕙᖕᓂᕐᒥ ᓄᓇᕗᒥᑦ. ᐅᖅᓱᖅᑑᖅ, ᒥᑦᑎᒪᑕᓕᒃ, ᖃᒪᓂᑦᑐᐊᖅ ᐊᒻᒪ ᐸᖕᓂᕐᑑᖅ ᑖᒃᑯᓄᖓ ᐃᒡᓗᑖᓛᖅᑐᑦ ᓴᓇᔭᐅᓗᑎᒃ 2022/23-ᒥᑦ.

ᐃᓚᒋᓪᓗᒍ ᒥᓂᔅᑕᐃᑦ ᐅᖃᓪᓚᑲᑕᖕᓂᖏᓐᓄᑦ ᐊᒻᒪ ᐊᐱᖅᑯᑎᒋᔭᐅᔪᑦ ᒪᓕᒐᓕᐊᕐᑎᓂᒃ, ᑲᑎᒪᖃᑦᑕᓚᐅᕐᑐᑦ ᐊᑯᓂᕈᓗᒃ ᐅᑯᐊ ᒪᓕᒐᓕᐅᕐᑏᑦ ᐊᑐᓂ ᓴᓇᕝᕕᐅᔪᑦ ᐊᐅᓚᔾᔪᑎᒃᓴᖏᓐᓂᒃ ᐱᓕᕆᐊᖃᖅᖢᑎᒃ 2020/21-ᒥᑦ ᐊᐅᓚᔾᔪᑎᒃᓴᓕᕆᓂᕐᒥᓐ.

ᐅᑯᖓ ᒪᓕᒐᐃᑦ ᐊᓂᒍᖅᑎᑕᐅᓯᒪᓚᐅᕐᑐᑦ:

• ᒪᓕᒐᖅ 43, ᒪᓕᒐᖅ ᐋᖅᑭᒋᐊᕐᓯᒍᑎ ᓱᐴᖅᑐᒐᕐᓄᑦ ᒪᓕᒐᕐᒥ ᐅᖃᓪᓚᖃᑎᖃᑲᑕᓚᐅᕐᑎᓪᓗᒋᑦ
• ᒪᓕᒐᖅ 42, ᒪᓕᒐᖅ ᐋᖅᑭᒋᐊᕐᓯᒍᑎ ᓱᐴᖅᑐᒐᕐᓄᑦ ᒪᓕᒐᕐᒥ
• ᒪᓕᒐᖅ 41, ᒪᓕᒐᖅ ᐋᖅᑭᒋᐊᕐᓯᒍᑎ ᐸᖅᑭᔨᐅᓂᕐᒧᑦ ᐊᒻᒪ ᐸᐸᑦᑎᔨᐅᓂᕐᒧᑦ ᒪᓕᒐᕐᒥ
• ᒪᓕᒐᖅ 40, ᑮᓇᐅᔭᖅᑖᕆᔭᐅᕙᒃᑐᓂ ᖃᐅᔨᓴᒃᑲᓐᓂᕐᓂᖅ (ᐊᐅᓚᑦᑎᓂᕐᒧᑦ ᐊᒻᒪ ᓱᕋᒃᓯᒪᔪᓕᕆᓂᕐᒧᑦ) ᒪᓕᒐᕐᒥ, 2020–2021
• ᒪᓕᒐᖅ 39, ᖃᐅᔨᓴᕐᓂᕐᒧᑦ (ᐊᐅᓚᑦᑎᓂᕐᒧᑦ ᐊᒻᒪ ᓱᕋᒃᓯᒪᔪᓕᕆᓂᕐᒧᑦ) ᒪᓕᒐᕐᒥ, 2020–2021

ᐅᓇ ᒪᓕᒐᖅ 25, ᒪᓕᒐᖅ ᐋᖅᑭᒋᐊᕐᓯᒍᑎᒃᓴᖅ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᕐᒥ ᐊᒻᒪ ᐃᓄᐃᑦ ᐅᖃᐅᓯᖏᓐᓂᒃ ᓴᐳᔾᔨᓯᒪᓂᕐᒧᑦ ᒪᓕᒐᕐᒥ, ᓂᕆᐅᒋᔭᐅᓚᐅᕋᓗᐊᕐᑎᓪᓗᒍ ᐅᖃᐅᓯᐅᓂᐊᕐᓗᓂ ᑕᒪᑐᒪᓂ ᑲᑎᒪᓂᕐᒥ, ᐅᓇ ᔮᓐ ᒪᐃᓐ, ᒪᓕᒐᓕᐅᕐᑎ ᐊᕐᕕᐊᑦ ᐅᐊᖕᓇᖓᓄᑦ-ᑎᑭᕋᕐᔪᐊᕐᒧᑦ, ᐱᖁᔨᕗᖔᕈᑎᓕᐅᓚᐅᕐᒪᑦ ᐱᕕᖃᕐᓂᕐᓴᐅᖁᔨᓪᓗᓂ ᑲᑎᒪᔨᕋᓛᓂᒃ ᐱᓕᕆᐊᖃᖅᑐᓂᒃ ᑖᔅᓱᒥᖓ ᐱᐊᓂᒍᓐᓇᕐᓂᐊᕐᒪᑕ ᒪᓕᒐᕐᒥᑦ.

ᒪᓕᒐᓕᐅᕐᑎᐅᔪᑦ ᑕᒪᕐᒥᒃ ᐊᖏᖅᑐᐃᓐᓇᐅᓚᐅᕐᑐᑦ ᐅᓪᓗᓂ 120 ᐱᕕᖃᒃᑲᓐᓂᖁᔨᓪᓗᑎᒃ.

ᑭᖑᓪᓕᕐᒥ ᒪᓕᒐᓕᕆᔨᕐᔪᐊᑦ ᑲᑎᒪᓕᕆᐊᕐᓂᐊᖅᑐᑦ ᒪᐃ 26-ᒥᑦ. ᑕᒪᑐᒧᖓ ᖃᐅᔨᒋᐊᕈᒪᒍᔅᓯ ᐊᓯᖏᓐᓂᒡᓘᓐᓃᑦ ᐅᓂᒃᑳᓕᐊᖑᔪᓂᒃ, ᐅᓇ ᑕᑯᒋᐊᕐᓗᒍ www.nunatsiaq.com