ᐅᑭᐅᕐᑕᖅᑐᓕᕆᔨᒃᑯᑦ ᒥᓂᔅᑕᖓ ᓄᓘᔮᖕᓂᒃ ᐅᔭᕋᒃᓯᐅᖅᕕᖕᒥᓐ ᓈᒻᒪᒃᓴᕈᑎᖃᙱᑦᑐᓂᒃ ᑲᑎᖃᑎᖃᖅᐳᑦ

ᒐᕙᒪᑐᖃᒃᑯᑦ ᐅᑭᐅᕐᑕᖅᑐᓕᕆᔨᒃᑯᓐᓄᑦ ᒥᓂᔅᑕᖓ ᑖᓐ ᕚᓐᑐᓪ ᑲᑎᖃᑎᖃᓚᐅᕐᒪᑦ ᓈᒻᒪᒃᓴᙱᑦᑐᓂᒃ ᐅᔭᕋᒃᓯᐅᖅᕕᒃ ᐊᖏᒡᓕᒋᐊᕈᒪᓂᖓᓂᒃ ᑖᓐᓇᓗ ᑲᑎᒪᔾᔪᑎᐅᕙᓪᓕᐊᓪᓗᓂ ᐅᑯᓄᖓ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ.

ᐊᖑᓇᓱᒃᑎᐅᔪᑦ ᕿᑭᖅᑖᓘᑉ ᐅᐊᖕᓇᖓᓂ ᓄᓇᖃᖅᑐᑦ ᐃᖕᒥᖕᓂᒡᓗ ᐊᑎᖃᖅᑎᓪᖢᑎᒃ ‘ᓄᓘᔮᑦ ᓄᓇᖓᓂᒃ ᓇᐅᑦᑎᖅᓱᖅᑏᑦ’, ᒪᑐᓯᓚᐅᖅᓯᒪᖕᒪᑕ ᐅᓯᑲᖅᑕᖅᑐᓄᑦ ᐊᖅᑯᑎᒥᒃ ᐊᒻᒪᓗ ᒥᑦᑕᖅᕕᒃᒥᑦ ᓄᓘᔮᖕᓂᑦ ᓴᕕᕋᔭᒃᓴᒥᒃ ᐅᔭᕋᒃᓯᐅᖅᕕᒃᒥ ᑖᒃᑯᐊ ᑲᒻᐸᓂᐅᔪᑦ ᑭᒃᑯᓕᒫᓂᒃ ᑐᓴᖅᑎᑦᑎᓂᖅᒧᑦ ᑲᑎᒪᑎᑦᑎᓪᓗᒋᑦ ᕕᕝᕗᐊᕆᐅᓚᐅᖅᑐᒥᓐ.

ᐹᕙᓐᓛᓐᑯᑦ ᐅᔭᕋᒃᓯᐅᖅᕕᒃᒥᑦ ᐱᕙᓪᓕᐊᔭᖏᓐᓂᒃ ᐊᖏᒡᓕᒋᐊᖅᑎᑦᑎᔪᒪᖕᒪᑕ ᐊᒻᒪᓗ ᓴᓇᓗᑎᒃ ᓄᓇᓯᐅᑎᑯᑖᑉ ᐊᖅᑯᑎᒃᓴᖓᓂᒃ ᐊᒻᒪᓗ ᑐᓚᒃᑕᖅᕕᒃᓴᒥᒃ, ᑭᓯᐊᓂᓕ ᑕᒪᑐᒥᖓ ᓈᒻᒪᒃᓴᙱᑦᑐᑦ ᐅᒃᐱᕈᓱᖕᒪᑕ ᑕᒪᓐᓇ ᐊᕙᑎᒋᔭᒧᑦ ᓈᒻᒪᙱᓕᐅᕈᑎᐅᓂᐊᕐᓂᖓᓂᒃ ᐊᒻᒪᓗ ᑕᕆᐅᖅᒥᐅᑕᓂᒃ ᑖᔅᓱᒪ ᖃᓂᒋᔭᖏᓐᓃᑦᑐᓂᒃ.

ᑕᒪᕐᒥᒃ ᕚᓐᑐᓪ ᐊᒻᒪᓗ ᓈᒻᒪᒃᓴᖅᓯᒪᙱᑦᑐᑦ ᐅᔭᕋᒃᓯᐅᖅᕕᒃ ᐊᖏᒡᓕᒋᐊᕈᒪᓂᖓᓂᒃ ᐅᖃᓚᐅᖅᑐᑦ ᑲᑎᒪᖃᑎᒌᖕᓂᖓ ᐅᖄᓚᐅᑎᒃᑯᑦ ᒪᐃ 27-ᐅᑎᓪᓗᒍ ᐊᑑᑎᖃᓚᐅᕐᓂᖓᓂᒃ.

ᐅᖃᐅᓯᒃᓴᖅ ᓇᐅᑦᑎᖅᓱᖅᑎᐅᔪᑦ ᑐᓂᔭᖓ ᐅᖃᖅᓯᒪᓚᐅᖅᑐᖅ ᑕᒪᐃᓐᓂᒃ ᐊᖏᖃᑎᒌᓚᐅᕐᓂᖏᓐᓂᒃ ᐅᖃᐅᓯᖃᔾᔮᙱᓐᓂᕋᖅᖢᑎᒃ ᐹᕚᓐᓛᓐᑯᑦ ᐊᖏᒡᓕᒋᐊᕈᒪᓂᖓᓂᒃ.

“ᓇᐅᑦᑎᖅᓱᖅᑎᐅᔪᑦ ᐅᖃᐅᓯᖃᓚᐅᕐᒪᑕ ᓴᙱᓂᖏᓐᓂᒃ ᐊᒻᒪ ᐱᒻᒪᕆᐅᒋᔭᖏᓐᓂᒃ ᓄᓇᒋᔭᖏᑦᑕ ᐊᒻᒪᓗ ᓄᓇᒥ ᑐᙶᕕᖃᕐᓂᒃᑯᑦ ᐱᕙᓪᓕᐊᔪᓕᕆᓂᖅᒧᑦ ᐊᓯᐊᒌᕈᑎᒃᓴᓂᒃ ᒫᓐᓇᒧᑦ ᐊᒻᒪ ᑭᖑᕚᒃᓴᑦᑎᓐᓄ ᕿᑭᖅᑖᓘᑉ ᐅᐊᖕᓇᖓᓂ ᓄᓇᖃᖅᑐᓄᑦ,” ᑎᑎᕋᖅᓯᒪᔪᖅ ᔫᓂ 2-ᒥ ᐅᖃᐅᓯᐅᓂᑯᑦ ᑖᒃᑯᓇᙵᑦ. ᕚᓐᑐᒥᓐ ᑐᑭᓯᖁᔨᔪᑦ “ᓂᕈᐊᕈᑎᐅᔪᓐᓇᖅᑐᓂᒃ ᐊᒻᒪ ᐊᑐᖅᑕᐅᖔᕈᒪᔪᓂᒃ ᓄᓇᖃᖅᑐᓂᒃ ᐅᔭᕋᒃᓯᐅᖅᕕᓕᕆᓂᖅᒥᒃ ᐱᓕᕆᐊᖃᕈᒪᙱᑦᑐᓂᒃ,” ᐅᖃᖅᓯᒪᔪᑦ ᑎᑎᕋᖅᓯᒪᔪᓂᒃ.

ᕚᓐᑐᓪ ᑐᓴᒐᒃᓴᓕᐅᖅᑎᖓ, ᐋᓐᑐᐊᓐ ᑐᕌᒻᓕ, ᐅᖃᓚᐅᖅᑐᖅ ᐱᓕᕆᕝᕕᐅᔪᖅ ᑲᑎᒪᖃᑎᖃᖃᑦᑕᕐᓂᖏᓐᓂᒃ ᑲᑐᔾᔨᖃᑎᒌᓂᒃ ᐊᐅᓚᑦᑎᖃᑕᐅᔪᓂᒃ ᐅᑭᐅᕐᑕᖅᑐᕐᒥᒃ, “ᐃᓚᖃᖅᖢᑎᒃ ᐹᕙᓐᓛᓐᑯᑦ ᐱᓕᕆᐊᒧᑦ ᑐᒃᓯᕋᕈᑎᖓᓂᒃ ᑲᒪᒋᔭᖃᖅᑐᓂᒃ,” ᓲᕐᓗ ᐅᑯᑎᑐᓇᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᑕᕆᐅᕐᔪᐊᓕᕆᔨᒃᑯᓐᓂᒃ ᑲᓇᑕᒥ.

“ᑭᓯᐊᓂᓕ, ᒥᓂᔅᑕ ᑲᑎᒪᖃᑎᖃᖃᑦᑕᙱᑦᑐᖅ ᑕᒪᒃᑯᓄᖓ ᐱᓕᕆᐊᓄᑦ ᑲᑎᒪᔩᑦ ᑲᑎᒪᔾᔪᑎᒋᑲᑕᒃᑕᖏᓐᓂᒃ, ᑖᒃᑯᐊ ᑲᑎᒪᔨᒃᑯᑦ ᐱᓕᕆᕙᓪᓕᐊᓂᖓ ᐃᒻᒥᒃᑰᖓᑎᓐᓇᓱᒃᖢᒍ ᐊᒻᒪᓗ ᖃᓂᑦᑐᒦᑎᖢᒋᑦ,” ᑐᕌᒻᓖ ᑎᑎᕋᓚᐅᖅᑐᖅ ᖃᕋᓴᐅᔭᒃᑯᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᐄᐳᕈᒥ ᐅᖃᓪᓚᒃᑎᓪᓗᒍ ᑐᓴᒐᒃᓴᓕᕆᔨᓄᑦ ᕚᓐᑐᓪ ᐅᖃᓚᐅᖅᓯᒪᔪᖅ ᐹᕙᓐᓛᓐᑯᓐᓂᒃ ᑲᑎᖃᑎᖃᓚᐅᖅᓯᒪᓂᕋᖅᖢᓂ ᓯᕗᓂᐊᓂᒃ ᑲᑎᒪᔩᑦ ᔭᓄᐊᕆᒥ ᑲᑎᒪᙱᑎᓪᓗᒋ — ᑖᓐᓇᓗ ᐱᒋᐊᒃᑲᓐᓂᕈᑎᐅᓂᑰᓪᓗᓂ ᓄᕕᐱᕆ 2019-ᒥᑦ ᓄᖅᑲᖅᑎᑕᐅᓂᑯᕕᓂᕐᒥᒃ — ᐅᖃᐅᓯᕆᓪᓗᓂᐅᒃ “ᓈᒻᒪᑐᐃᓐᓇᑦᑎᐊᕐᓂᕋᖅᖢᓂᐅᒃ” ᓲᖃᐃᒻᒪ ᑲᑎᒪᓚᐅᖅᓯᒪᖕᒪᑕ ᑲᑎᒪᑎᑦᑎᔪᖃᖅᑎᓐᓇᒍ.

“ᐅᑯᐊ ᐹᕙᓐᓛᓐᑯ ᐅᑭᐅᕐᑕᖅᑐᓕᕆᓂᖅᒧᑦ ᒥᓂᔅᑕᒥ ᑲᑎᒪᖃᑎᖃᕈᒪᑎᓪᓗᒋᑦ ᐃᓱᒪᓚᐅᖅᓯᒪᒐᒪ ᓈᒻᒪᑐᐃᓐᓇᕋᓱᒋᓪᓗᒍ ᑲᑎᖃᑎᒌᒃᑯᑦᑕ ᐊᒻᒪ ᐅᖃᐅᓯᖃᑲᑕᒡᓗᑕ ᐃᓱᒫᓘᑎᓂᒃ,” ᐅᖃᖅᑐᖅ.

ᐅᑯᐊ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑲᑎᒪᑲᑕᒃᑎᓪᓗᒋᑦ ᓄᓗᔮᖕᓂ ᐅᔭᕋᒃᓯᐅᖅᕕᐅᑉ ᒥᒃᓵᓄᑦ, ᓱᓕ ᐊᖏᒡᓕᒋᐊᕈᒪᓂᖓᓄᑦ ᖃᐅᔨᓴᕈᑎᐅᔪᖅ ᑲᔪᓯᔪᖅ. ᓲᕐᓗ, ᓈᒻᒪᒃᓴᓚᐅᙱᑦᑐᑦ ᓄᓘᔮᖕᓂ ᐊᖏᒡᓕᒋᐊᖅᑎᑦᑎᔪᒪᓂᖅᒥᒃ ᑐᓂᓯᓚᐅᕐᒪᑕ ᑎᑎᖃᓂᒃ ᒪᐃ ᕿᑎᐸᓗᐊᓂᒃ ᐱᔾᔪᑎᖃᕐᑐᓂᒃ ᐹᕙᓐᓛᓐᑯᑦ ᑐᓂᔭᕕᓂᖏᓐᓂᒃ ᕿᓚᓗᒐᕐᓂᒃ ᑑᒑᓕᖕᓂᒃ ᖃᐅᔨᓴᕈᑎᖏᓐᓂᒃ, ᐅᑯᑎᒎᓇᕐᓕ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᒃ. ᐹᕙᓐᓛᓐᑯᑦ ᑭᐅᔭᕆᐊᖃᖅᖢᑎᒃ ᔫᓂ 4 ᑐᖔᒍᑦ.

ᑐᕌᒻᓕ ᓇᓗᓇᐃᓚᐅᙱᑦᑐᖅ ᐅᑭᐅᕐᑕᖅᑐᕐᒥᐅᑕᓕᕆᔨᒃᑯᑦ ᓄᓘᔮᖕᓂ ᐅᔭᕋᒃᓯᐅᖅᕕᐅᑉ ᐊᖏᒡᓕᒋᐊᖅᑕᐅᔪᒪᓂᖓᓄᑦ ᑲᑎᒪᓚᐅᕐᓂᖏᓐᓂᒃ ᐅᕝᕙᓘᓐᓃᑦ ᖃᓄᖅ ᓄᖅᑲᖅᑎᑦᑎᓂᖅᒥᒃ ᐊᔪᙱᑎᑦᑎᔭᕆᐊᒃᓴᖏᓐᓂᒃ.

ᐄᐳᕈᒥ, ᑲᓇᑕᒥ ᑲᑎᒪᕕᒡᔪᐊᖅᕕᒃᒥᑦ, ᓄᓇᕗᒧᑦ ᒪᓕᒐᓕᐅᖅᑎ ᒪᒥᓛᑦ ᖃᖅᑲᖅ ᐅᖃᓚᐅᕐᓯᒪᖕᒪᑦ ᓈᒻᒪᒐᔭᙱᓐᓂᖓᓂᒃ ᒥᓂᔅᑕᒧᑦ ᑲᑎᖃᑎᖃᕈᓂ ᐹᕙᓐᓛᓐᑯᑦ ᑭᒡᒐᖅᑐᐃᒡᖏᓐᓂᒃ, ᑭᓯᐊᓂᓕ ᐅᑯᓂᖓᐅᙱᑦᑐᖅ ᓄᓇᒥ ᖃᐅᔨᓴᖅᑎᐅᔪᓂᒃ “ᐅᓄᖅᓱᐃᖅᖢᑎᒃ ᑲᑎᒪᓯᒪᒐᓗᐊᖅᑎᓪᓗᒋᑦ.”

“ᐋᖅᑭᒋᐊᕋᓱᖕᓂᖅ ᑲᑎᖃᑎᒌᑲᑕᒋᐊᖃᕐᓇᖅᒪᑦ ᐃᓄᖕᓂᒃ. ᑭᓯᐊᓂᓕ, ᐅᑯᐊ ᓕᐳᕈᒃᑯᑦ ᓱᖁᑎᒃᓴᑲᑕᙱᒻᒪᑕ ᓴᖅᑭᔮᖅᑐᓂᒃ ᐱᓕᕆᖁᔭᐅᒐᓗᐊᖅᑎᓪᓗᒋ ᐊᒻᒪ ᐱᔭᒃᓴᖏᓐᓂᒃ ᐱᓕᕆᐊᖃᖅᑎᓪᓗᒋᑦ. ᑕᐃᒪᓕ ᒥᓂᔅᑕ ᐃᖅᑲᓇᐃᔭᖅᑎᖏᓪᓘᓐᓃᑦ ᑲᑎᖃᑎᖃᓚᐅᖅᐸᑦ ᐹᕙᓐᓛᓐ ᓴᕕᕋᔭᒃᓴᒥᒃ ᐅᔭᕋᒃᓯᐅᖅᕕᒃᒥ ᑕᖅᑭᑦ 6 ᐃᓗᐊᓃ?” ᖃᖅᑲᖅ ᐊᐱᕆᓚᐅᖅᓯᒪᔪᖅ ᐄᐳᕈᓪ 16-ᒥᑦ.

— ᐃᓚᖏ ᑰᕆ ᓚᐅᕌᒃ ᑎᑎᕋᖅᓯᒪᔭᖏᓐᓂᒃ