ᐅᑭᐅᕐᑕᖅᑐᕐᒥᒃ ᖃᐅᔨᓴᖅᑎᐅᔪᖅ ᐊᑐᕈᒪᔪᖅ ᓵᓚᒃᓴᐅᓯᐊᕐᒥᓂᒃ ᐆᒧᖓ ᓄᑖᒥ ᓴᐳᔾᔭᐅᓯᒪᓂᐊᖅᑐᒥ ᐃᓂᒋᔭᐅᔪᒥᒃ

ᕗᐄᓐ ᐳᓚᑦ ᖃᐅᔨᓴᖃᑦᑕᕐᓯᒪᔪᖅ Axel Heiberg Island-ᒥᑦ 1980-ᖏᓐᓂᒃ. ᒫᓐᓇᓕ ᓴᐳᔾᔭᐅᓯᒪᖁᓕᕐᑕᖓ.

ᕗᐄᓐ ᐳᓚᑦ ᑐᓂᔭᐅᓚᐅᕐᑐᖅ ᕗᐃᐊᔅᑕᓐ ᐃᓚᒌᑦ ᓵᓚᒃᓴᐅᓯᐊᖓᓂ ᐆᒧᖓ ᐃᓅᓯᓕᒫᒥ ᐱᓇᓱᐊᖃᕐᓂᖓᓂ ᐅᑭᐅᕐᑕᖅᑐᕐᒥᑦ ᖃᐅᔨᓴᕐᓂᕐᒥᒃ ᑎᓯᐱᕆ 5-ᖑᑎᓪᓗᒍ.

By ᐃᓚᐃᓐ ᐋᓐᓱᒥ

For an English version of this story, see Arctic scientist wants to use award money for new protected area

ᕗᐄᓐ ᐳᓚᑦ ᐅᖃᓕᒫᕐᓯᒪᓕᕐᑐᖅ ᐅᑭᐅᕐᑕᖅᑑ ᓄᓇᖏᑦᑕ ᖃᓄᐃᓕᖓᓂᖏᓐᓂᒃ ᐊᕐᕌᒍᑦ 40 ᐅᖓᑖᓂᑦ.

ᐃᓗᑐᓂᐅᔪᑦ ᐊᒻᒪ ᖃᑦᑎᖕᓂᐅᔪᑦ ᐊᒻᒪᓗ ᐅᔾᔨᕐᓇᕋᑎᒃ ᓅᓯᒪᓂᐅᔪᑦ ᓇᓗᓇᐃᒃᑯᑎᐅᕗᖅ ᖃᓄᐃᑉᐸᓪᓕᐊᓂᐅᔪᓂᒃ ᓄᓇᒥᑦ ᓴᖅᑭᐸᓪᓕᐊᓕᓵᕐᓂᑯᒥᑦ ᑭᖏᓪᓕᖅᐹᒥᑦ ᓯᑯᖃᕕᒡᔪᐊᖅᑎᓪᓗᒍ, ᑭᓯᐊᓂᓕ ᒫᓐᓇ ᐊᓯᙳᐊᖅᐸᓪᓕᐊᓕᕐᑐᑦ ᓱᒃᑲᔪᒥᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ.

ᒪᒋᐅᓪ ᔫᓂᕘᓯᑎᒥᑦ ᓄᓇᐅᑉ ᖄᖓᓂ ᖃᓄᐃᓕᖓᓄᑦ ᖃᐅᔨᓴᖅᑎᐅᔪᖅ ᖃᐅᔨᓴᕐᓯᒪᖕᒪᑦ ᐅᐱᕐᖔᒃᑯᑦ ᑰᒐᓚᐅᓕᖃᑦᑕᖅᑐᓂᒃ ᓯᑯᑐᖃᐅᑉ ᖄᖓᒍᑦ ᑰᒐᓛᖑᕙᒃᑐᓂᒃ, ᑖᒃᑯᐊᓗ ᓄᓇᒥ ᐊᓯᙳᖅᑎᑦᑎᕙᓪᓕᐊᕙᒃᖢᑎᒃ.

ᐃᓚᒋᔭᐅᓕᓚᐅᕐᓯᒪᖕᒥᔪᖅ ᑲᓇᑕᒥ ᓯᓚᓪᔪᐊᓕᕆᔨᒃᑯᓐᓂᒃ ᐋᖅᑭᒃᓱᐃᓂᐊᕐᓗᓂ ᓄᓇᒥᙶᕐᓯᒪᔪᒥᒃ ᐅᕇᑖᒥᑦ (ᓲᕐᓗ ᓯᓚᐃᓐᓇᒃᑯᑦ ᐊᒃᑐᖃᑦᑕᐅᑎᒍᑎ) ᑲᓇᑕᒥᐅᑕᑦ ᑕᕿᕐᒧᙵᐅᓇᓱᒃᑎᓪᓗᒋᑦ.

ᐊᒻᒪᓗ ᐅᕘᓇ ᒪᒋᐅᓪ ᐊᒻᒪ ᓄᓇᕗᑦ ᓯᓚᑦᑐᖅᓴᕐᕕᒃᑯᑦ, ᐳᓚᑦ ᖃᐅᔨᓴᖅᑐᓕᕆᓂᕐᒧᑦ ᐊᒻᒪ ᓄᓇᐅᑉ ᖄᖓᓄᒃ ᐃᓕᓐᓂᐊᕈᑎᒃᓴᓂᒃ ᐱᓕᕆᐊᖃᖃᑎᖃᕐᓯᒪᔪᖅ ᐃᓄᖕᓂᒃ ᐃᓕᓴᐃᔨᓂᒃ, ᐊᒻᒪᓗ ᖃᐅᔨᓴᖅᑐᓕᕆᓂᕐᒥᒃ ᐃᓕᓐᓂᐊᓚᐅᑲᒍᑎᒃᓴᓂᒃ ᐅᑭᐅᕐᑕᖅᑐᕐᒥᑦ ᐃᓕᓐᓂᐊᕐᑎᓄᑦ.

ᑖᔅᓱᒥᖓ ᐊᒻᒪ ᐊᓯᐊᓂᒃ ᐱᓕᕆᐊᖃᕐᓂᒧᑦ, ᐳᓚᑦ ᐃᓕᓴᕆᔭᐅᔾᔪᑎᑖᓕᓚᐅᕐᓯᒪᔪᖅ ᕗᐃᔅᑕᓐ ᐃᓚᒌᑦ ᓵᓚᒃᓴᐅᓯᐊᖏᓂᒃ ᐅᑭᐅᕐᑕᖅᑐᕐᒥᑦ ᖃᐅᔨᓴᖃᑦᑕᕐᓯᒪᓂᕐᒧᑦ. ᐅᓇ ᐃᓕᓴᕆᔭᐅᔾᔪᑎ ᐊᑭᖃᖅᑐᑦ $100,000 ᑲᑎᖢᑎᒃ, ᐃᓚᖃᖅᖢᓂ $50,000 ᖃᐅᔨᓴᕐᓂᖓᓄᑦ ᐃᑲᔪᖅᑎᒃᓴᖓᓅᖓᔪᒥᒃ.

ᒫᓐᓇᓕ ᖃᐅᔨᓴᕐᓂᕆᔭᖓ ᐊᓯᐊᓄᖔᖅ ᖃᐅᔨᓴᕈᑎᖃᕐᓂᕐᒨᖓᓂᐊᓕᕐᑐᖅ ᒪᐅᖓ ᒪᓕᒐᓕᕆᓂᒃᑰᖓᓂᕐᓴᐅᓗᓂ, ᐳᓚᑦ ᐅᖃᖅᑐᖅ. ᒪᓕᒐᓕᕆᔨᐅᓗᐊᙱᓐᓂᕋᖅᖢᓂᓗ.

“ᐃᓕᓴᕆᔭᐅᔾᔪᑎᒐᓕ ᐅᑯᓇᙵᒃ W. Garfield Weston Foundation-ᑯᓐᓂᒃ ᐱᒋᐊᕈᑎᒋᔪᒪᓪᓗᒍ ᓄᓇᐅᑉ ᐃᓚᖓᓂᒃ ᓴᓂᕐᕙᐃᑎᑦᑎᓗᖓ ᐅᑭᐅᕐᑕᖅᑐᕐᒥᑦ, ᐱᓗᐊᖅᑐᒧᑦ ᐆᒪᔪᖃᕐᕕᐅᓂᐊᕐᓗᓂ,” ᐳᓚᑦ ᐅᖃᓚᐅᕐᑐᖅ ᑎᓯᐱᕆ 5-ᖑᑎᓪᓗᒍ, ᐃᓕᓴᕆᔭᐅᔾᔪᑎᑖᕋᑖᖅᑎᓪᓗᒍ ᐅᕙᓂ ᐋᑎᒃᓂᐊᑦ ᐊᕐᕌᒍᑕᒫᑦ ᖃᐅᔨᓴᖅᑐᓕᕆᓂᕐᒧᑦ ᑲᑎᒪᓂᕐᒥᒃ ᕼᐋᓕᕚᒃᔅᒥᑦ.

ᐳᓚᑦᓕ ᐃᒪᓐᓇ ᑕᐅᑐᙳᐊᙱᓐᓂᕋᖅᑐ ᑖᓐᓇ ᓄᓇ ᐊᑐᐃᓐᓇᐅᓗᓂ ᐳᓚᕋᖅᑐᓕᕆᓂᕐᒧᑦ, ᑭᓯᐊᓂᓕ ᐃᓂᒃᓴᐅᓗᓂ ᐊᔾᔨᐸᓗᐊᓂ ᑲᓇᑕᒥ ᑕᕆᐅᕐᒥᐅᑕᓂᒃ ᓴᐳᔾᔨᓯᒪᕕᙳᓵᓚᐅᕐᑐᒥᑦ ᐅᕙᓂ ᑕᓪᓗᕈᑎᐅᑉ ᐃᒪᖓᓂᒃ.

“ᐊᒻᒪᓗ ᐃᓱᒪᒋᔭᖃᖅᖢᖓ ᐊᑐᕐᕕᒋᔪᓐᓇᖅᑕᖓᓂᒃ,” ᐅᖃᖅᑐᖅ. “ᐅᕙᓂ Axel Heiberg Island.”

ᑖᓐᓇᓕ ᕿᑭᖅᑕᖅ, ᐅᒥᖕᒪᒃᑕᓕᐅᑉ ᐱᖓᖕᓇᕐᐸᓯᐊᓃᑦᑐᖅ, ᓂᒋᑦᑎᐊᖓᓃᑦᑐᖅ ᑕᕆᐅᒥᐅᑕᓂᒃ ᓴᐳᔾᔨᓯᒪᕝᕕᐅᓕᕐᑐᒥᒃ, ᑐᕙᐃᔪᐃᑦᑐᖅ.

Axel Heiberg, ᐳᓚᑦ ᐅᖃᖅᑐᖅ, ᐋᖅᑭᒃᓯᒪᓂᖃᐅᕐᒪᑦ ᖃᐅᔨᓴᖅᑕᐅᔪᓐᓇᕋᔭᖅᑐᓂᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ ᖃᐅᔨᓴᖅᐸᓪᓕᐊᓂᒃᑯᑦ.

“ᖁᑦᑎᖕᓂᖏᑦ ᐊᐳᑎᖃᕐᒪᑕ, ᓯᑯᑐᖄᓗᐃᑦ, ᑲᖏᖅᖢᐃᑦ, ᐊᒻᒪᓗ ᓄᓇᐅᑉ ᐊᑖᒍᑦ ᐊᐅᔪᐃᑦᑐᖃᖅᖢᓂ, ᐊᒻᒪ ᐆᒪᔪᖃᖅᖢᓂ ᐅᒥᖕᒪᒃᓂᒃ ᐊᒻᒪ ᑐᒃᑐᓂᒃ. ᐅᑯᐊ ᑐᒃᑐᖏᑦ ᐱᐅᕆ ᑐᒃᑐᐃᑦ ᒫᓐᓇ ᐊᒃᓱᕈᕐᓇᖅᑐᒦᒻᒪᑕ,” ᐅᖃᖅᑐᖅ.

“ᑕᒫᓂ ᐊᔾᔨᒌᙱᑦᑐᒻᒪᕆᐅᖕᒪᑦ ᐊᒻᒪ ᖃᓄᐃᓕᖓᓂᖏ ᐊᔾᔨᐅᙱᑦᑑᑎᐅᓪᓗᑎᒃ, ᐅᑯᑎᑐᓇᖅ ᐅᔭᕋᖏᑦ ᑐᒥᖃᖅᕕᕕᓂᑐᖄᓗᖕᓂᒃ ᐱᑕᖃᖅᖢᓂ. ᑕᐃᒪᓕ ᐃᓱᒪᔪᖓ ᑖᓐᓇ ᐃᓂᑦᑎᐊᕙᐅᓇᔭᕐᓂᖓᓂᒃ.”

ᐊᑭᑦᑎᐊᖓᓃᒻᒥᔪᖅ 3 ᑭᓛᒥᑕ ᓱᕐᓗᒥᑦ ᐃᐅᕆᑲᒥᙶᖅᑐᒥᑦ, ᐅᖃᖅᑐᖅ ᐳᓚᑦ, ᑖᓐᓇᓗ ᐃᓯᕆᐊᕐᕕᐅᕙᒃᖢᓂ ᓄᓇᖃᖅᑐᓄᑦ, ᐊᒻᒪᓗ ᖃᓪᓗᓈᓂᙶᖅᑐᓂᒃ ᐊᒻᒪ ᐅᑭᐅᕐᑕᖅᑐᕐᒥᑦ ᖃᐅᔨᓴᖅᑎᓄᑦ.

ᓯᕗᓪᓕᖅᐹᒥᓪᓕ ᐅᖃᓪᓚᖃᑎᖃᕆᐊᖃᕐᓂᐊᖅᑐᖅ ᓄᓇᕗᑦ ᒐᕙᒪᒃᑯᓐᓂᒃ, ᖃᐅᔨᓇᓱᒡᓗᓂ ᐃᓱᒪᒋᔭᖓᓂᒃ ᖃᓄᐃᓐᓇᔭᕆᐊᒃᓴᖏᓐᓂᒃ.

ᑕᒪᑐᒥᖓᓕ ᐃᓱᒪᒋᔭᖃᕈᑎᒃ, ᑭᖑᓪᓕᕐᒥᒃ ᐃᖅᑲᓇᐃᔭᖅᑎᑖᕋᔭᕐᑐᖅ ᐅᑭᐅᕐᑕᖅᑐᕐᒥᒃ ᑕᒪᓐᓇ ᐱᓕᕆᐊᕆᔭᐅᓕᕆᐊᕐᓂᖓᓄᑦ.

ᒪᒋᐅᓪ ᔫᓂᕘᓯᑎ ᐊᑯᓂᐊᓗᒃ Axel Heiberg ᐱᓕᕆᕝᕕᖃᕐᓯᒪᖕᒪᑕ, ᐊᐅᓚᑦᑎᓪᓗᑎᒃ ᖃᐅᔨᓴᕐᕕᑐᐊᕐᒥᑦ ᑕᕝᕙᓂ ᕿᑭᖅᑕᒥ ᑕᐃᒪᙵᓂᑦ 1959-ᒥᑦ.

ᐳᓚᑦ ᑐᑭᒧᐊᖅᑎᑦᑎᔨᙳᓚᐅᕐᓯᒪᔪᖅ ᖃᐅᔨᓴᕐᕕᒃᒥᑦ ᐱᒋᐊᖅᑎᓪᓗᒍ ᔫᓂᕘᓯᑎᒥᑦ 1988-ᒥᑦ.

ᐱᓕᕆᐊᖓᑕ ᒥᓵᕐᓄᑦ ᐃᓛᓐᓂ ᓈᒻᒪᙱᓕᐅᕈᑎᖃᓚᐅᕐᐸᒃᑐᖅ, ᒪᑯᓂᖓ ᐊᓯᙳᖅᐸᓪᓕᐊᔪᓂᒃ ᐊᕙᑎᒋᔭᐅᔪᓂᒃ ᑕᒪᓐᓇᓗ ᓄᓇᐅᑉ ᖃᓄᐃᑉᐸᓪᓕᐊᓂᖓᓅᖓᓪᓗᓂ, ᓯᑯᓯᒪᔪᑐᖄᓘᖕᒦᓚᐅᕐᖢᓂ.

ᑭᓯᐊᓂᓕ ᐅᓇ ᐃᓱᒪᒋᔭᐅᔭᕆᐊᖃᕐᓂᕋᖅᑕᖓ ᒫᓐᓇ ᐊᒻᒪ ᓯᕗᓂᒃᓴᒥ ᖃᐅᔨᓴᖅᑎᐅᓂᐊᕐᑐᓄ ᐅᓇ “ᓇᓂᑐᐃᓐᓇᐅᒐᓗᐊᕈᑦᑕ ᑲᓇᑕᒥᑦ, ᐊᕐᕌᒍᓚᐅᕐᓯᒪᔪᑦ 20,000 ᐊᓂᒍᖅᑐᓂ ᓂᓚᐅᑉ ᐊᑖᓃᓚᐅᕐᓯᒪᔪᒍ 4 ᑭᓛᒥᑕᔅ ᐅᕙᑦᑎᓐᓂ ᖁᑦᑎᖕᓂᕐᓴᒦᖢᓂ ᓯᑯᐃᓐᓇᐅᓪᓗᓂ.”

ᑕᐃᒪᓕ ᐱᒻᒪᕆᐊᓘᕗᖅ ᐊᓯᙳᖅᐸᓪᓕᐊᓂᐅᑉ ᐃᒡᓗᐊᒍᖔᖅ ᑐᑭᓯᐅᒪᓗᒍ, ᓴᖅᑕᐅᓯᒪᓂᐅᔪᓄᑦ.

ᐊᑯᓂᕈᓗᒃ ᐱᓕᕆᓂᐅᓯᒪᖕᒥᔪᖅ ᐅᓇ ᐊᕐᕌᒍᓂᒃ ᐊᕙᑎᓂᒃ (20) ᖁᓕᒥᒎᓕᒃᑯᑦ ᖃᐅᔨᓴᖃᑦᑕᕐᓂᖅ ᓄᓇᓂᒃ ᓱᕋᒃᐸᓪᓕᐊᓯᒪᔪᓂᒃ. ᐊᕐᕌᒍᑕᒫᓐ ᑕᒪᐅᓈᙱᓐᓇᐅᔭᖅᑐᖅ.

“ᐊᑐᖃᑦᑕᕋᑦᑕ ᑕᐅᑐᖕᓂᒃᑯᑦ ᐱᓕᕆᓂᐅᔪᒥᒃ ᖃᐅᔨᓚᐅᕐᓯᒪᔭᓐᓂᑦ ᑐᒃᑐᓂᒃ ᖃᐅᔨᓴᕐᓂᒃᑯᑦ, ᓇᐃᓴᐃᕙᓪᓕᐊᓂᖅ ᐋᖅᑭᒃᓯᒪᓂᐅᔪᓂᒃ ᑕᑯᔪᓐᓇᖅᑕᑦᑎᓐᓃᑦᑐᓂᒃ,” ᐅᖃᖅᑐᖅ ᐳᓚᑦ.

“ᐃᒪᐃᓗᖓᓗᐊᕐᒪᑦ ᖃᓄᐃᑦᑑᓂᖏᑦ ᐊᔾᔨᒌᙱᑦᑑᓂᐅᖏᑦ ᐊᐅᑉᐸᓪᓕᐊᒍᑎᒋᔭᖏᑦ ᐊᒻᒪ ᖃᓄᐃᑉᐸᓪᓕᐊᒍᑎᐅᓂᖏᑦ.”

ᑕᒪᒃᑯᐊ ᑐᓴᒐᒃᓴᐃᑦ ᐊᑐᕐᓗᒋ, ᐃᓚᖃᕐᓗᑎᒃ ᓯᓚᐅᒧᑦ ᓄᐊᑕᐅᕙᓪᓕᐊᓯᒪᔪᑦ, ᐱᓕᕆᖃᑎᒋᔭᖏᑦ ᑕᑯᓇᓱᖃᑦᑕᖅᑐᑦ ᓄᓇᐅᑉ ᖃᓄᐃᓕᖓᓂᖓ ᐊᓯᔾᔨᕐᓂᑰᒋᐊᒃᓴᖏᓐᓂᒃ ᓯᓚᐅᑉ ᐅᖅᑰᓂᖓ ᐊᓯᙳᕈᓘᔭᖅᐸᖕᓂᖓᓄᑦ ᐊᕐᕌᒎᓕᕐᑐᓂᒃ ᐊᑐᕋᑖᕐᓂᑯᓂ, ᐃᓚᒋᓪᓗᒍ ᐊᕐᕋᒍᓂ ᐱᖓᓱᓂ ᐊᐅᔭᒃᑯᑦ ᐅᖅᑰᓂᖅᐹᖑᑲᑕᖕᓂᖓ ᐊᒻᒪᓗ ᒪᕐᕈᐃᖅᖢᑎᒃ ᐊᐅᔭᒃᑯᑦ ᓂᒡᓚᓱᓗᐊᕐᓂᐊᓘᓂᑯᓂᒃ ᑎᑎᕋᖅᑕᐅᓯᒪᔪᓂᒃ.

“ᑕᑯᓯᒪᓕᕋᑦᑕ ᐊᔾᔨᒌᙱᔾᔪᑎᒻᒪᕆᐊᓘᔪᓂᒃ ᐊᒻᒪᓗ ᓯᓚᐅᑉ ᐊᓯᙳᖅᐸᓪᓕᐊᕆᕙᒃᑕᖓ ᓄᓇᐅᑉ ᐊᑖᓃᑦᑐᒥ ᓯᑯᒥ ᓇᓗᓈᕿᔾᔪᑎᐅᓪᓗᓂ,” ᐅᖃᖅᑐᖅ.

ᐊᑕᐅᓯᕐᒥᒡᓕ ᖃᐅᔨᓴᕐᕕᐅᕙᒃᑐᒥ Axel Heiberg-ᒥ ᓴᖅᑭᔮᖅᑐᖃᓚᐅᙱᑦᑐᖅ ᓄᓇ ᐊᓯᙳᖅᐸᓪᓕᐊᒋᐊᒃᓴᖏᓐᓂᒃ ᐊᕐᕌᒎᓚᐅᕐᓯᒪᔪᒻ 7-ᓘᓐᓃᑦ 8-ᓘᓐᓃᑦ ᐊᓂᒍᕐᓯᒪᓕᕐᑐᓂᒃ. ᐊᕐᕌᒎᓚᐅᕐᓯᒪᔪᖅ ᑕᓪᓕᒪᑦ ᐊᓂᒍᖅᑐᓂ, 87-ᓂ ᐊᖏᔪᐊᓗᖕᓂ ᓄᓇᒥ ᐱᐅᔪᓐᓃᖅᑐᓂᒃ ᓇᓗᓇᐃᕐᓯᓚᐅᕐᓯᒪᔪᑦ ᑕᐃᒪᓂ, ᐅᖃᖅᑐᖅ.

ᐊᓯᖏᓐᓂᒃ ᐊᓯᙳᖅᑐᕕᓂᕐᓂᒃ ᐅᖃᐅᓯᖃᕐᓯᒪᖕᒥᔪᑦ ᐆᒪᔪᓂᒡᓕ ᑕᑯᖃᑦᑕᕐᓂᒃᑯᑦ, ᑕᒪᒃᑯᐊᓕ ᑕᐃᑯᙵᖅᑐᕕᓂᕐᓂᒃ ᐅᖃᐅᓯᐅᖃᑦᑕᕐᓯᒪᔪᑦ ᖃᐅᔨᓴᕐᕕᒃᒧᑦ.

“ᓴᓇᓯᒋᐊᓕᓵᖅᖢᑕ ᑕᐃᑲᓂ, ᑲᒪᓇᓚᐅᕐᓯᒪᙱᑦᑐᖅ ᒫᓂ 15-ᓂᒃ 20-ᓄᑦ ᑐᒃᑐᓂ ᑕᒪᐅᓈᖅᑐᖃᖅᐸᒃᖢᓂ. ᒫᓐᓇᓗ, ᖁᕕᐊᓇᑐᐃᓐᓇᖅᑐᖅ ᐊᑕᐅᓯᕐᒥᒡᓘᓐᓃᑦ ᒪᕐᕉᖕᓂᓪᓘᓐᓃᑦ ᑕᑯᓪᓗᓂ,” ᐅᖃᖅᑐᖅ. “ᑭᓯᐊᓂᓕ ᐅᒥᖕᒪᐃᑦ ᐱᑕᖃᕈᓘᔭᕐᑐᑦ ᓇᓂᑐᐃᓐᓇᖅ.”

ᓴᐳᔾᔨᓯᒪᕝᕕᖃᕐᓂᕐᒧᓪᓕ, ᐳᓚᑦ ᐅᖃᖅᑐᖅ ᐱᓕᕆᖃᑦᑕᕐᓯᒪᓂᖅ ᐊᕐᕌᒍᑦ 40 ᐅᖓᑖᓄ ᑕᒪᓐᓇ ᐱᔾᔪᑎᐅᓗᐊᕐᑐᖅ ᐅᑭᐅᕐᑕᖅᑐᕐᒥᑦ ᐊᒻᒪᓗ ᐃᓕᓴᕐᓯᓯᒪᓂᕐᒥᒃ ᐱᑕᖃᕆᐊᖃᕐᓂᖓᓂᒃ ᓱᖁᓯᖅᑕᐅᓯᒪᙱᑦᑎᐊᖅᑐᒥᒃ ᖃᐅᔨᓴᕐᕕᖃᕐᓂᕐᒥᒃ ᒪᑯᓄᖓ ᓄᓇᒥᙶᖅᑐᓄᑦ ᐅᕝᕙᓘᓐᓃᑦ ᐃᓄᖕᓄᑦ ᑕᐃᒪᐃᑎᑕᐅᓂᕐᒧᑦ ᐊᓯᙳᖅᑐᓂᒃ ᖃᐅᔨᓴᕈᓐᓇᑦᑎᐊᕐᓗᑎᒃ.

ᑕᒪᓐᓇᓕ ᐱᓕᕆᐊᕕᓂᖓᓂᙶᕐᓯᒪᔪᖅ ᐅᑯᓇᓂ ᓄᓇᕐᔪᐊᕐᒥ ᓯᓚᕐᔪᐊᓕᕆᔨᒃᑯᓐᓂᑦ NASA, ᐅᕙᓂ ᐊᓐᑖᑎᑲᒥᑦ (ᓄᓇᕐᒧᐊᑉ ᐊᑖᓂᑦ).

ᐱᓕᕆᐊᕆᕙᒃᑕᖓ ᐅᐱᕐᖔᒃᑯᑦ ᐃᒪᐅᓕᖃᑦᑕᖅᑐᑦ ᐅᑭᐅᕐᑕᖅᑐᕐᒥᑦ ᓯᓚᕐᔪᐊᓕᕆᔨᒃᑯᓐᓂᒃ ᐅᔾᔨᕆᔭᐅᓕᓚᐅᕐᓯᒪᖕᒪᑦ.

“ᐅᓇ ᐃᒪᖃᕐᓂᖓ ᓂᒡᓚᓱᒃᑐᒻᒪᕆᐊᓗᖕᓂ ᓯᑯᐃᓐᓇᕐᒥᑦ ᑲᒪᒋᔭᐅᓗᐊᓚᐅᕐᓯᒪᖕᒪᑦ ᓯᓚᓕᕆᔨᒃᑯᓐᓂᒃ,” ᐅᖃᖅᑐᖅ ᐳᓚᑦ.

“ᐃᒪᖅ ᐃᓅᓯᕐᒧᑦ ᐊᑐᙱᒃᑲᓗᐊᕐᑎᓪᓗᒍ, ᐃᓚᒋᔭᐅᒻᒪᕆᒃᑐᑦ ᐃᓅᓯᐅᑉ ᐱᒋᐊᕐᓂᖓᓂᒃ.”

ᐳᓚᑦ ᐱᓕᕆᓕᒪᓂᖓ ᓂᓚᐃᓐᓇᒥᑦ ᐱᓕᕆᖃᑎᖃᓕᕈᑎᒋᓚᐅᕐᓯᒪᔭᖓᑦ ᓯᓚᕐᔪᐊᓕᕆᔨᒃᑯᓐᓂᒃ ᓄᓇᕐᔪᐊᕐ ᓂᒋᐊᓂᒃ ᓯᑯᐃᓐᓇᒥᑦ, ᐋᓐᑖᑎᒃᒥᑦ.

ᐅᓇ ᓄᓇ ᑭᓇᒧᑦ ᓄᓇᒋᓂᕋᖅᑕᐅᓯᒪᙱᑦᑐᖅ, ᐊᒻᒪᓗ ᐃᓂᒋᔭᐅᑎᑕᐅᓪᓗᓂ ᖃᐅᔨᓴᖅᑐᓕᕆᓂᕐᒧᑦ ᐊᒻᒪ ᓴᐃᓕᑦᑎᐊᕐᓂᕐᒧᑦ.

“ᓄᓇᕐᔪᐊᕐᒥᐅᑕᑎᒍᑦ ᓴᓂᕐᕙᐃᓯᒪᔪᓐᓇᕈᑦᑕ ᓄᓈᓗᖕᒥᒃ, ᑕᐃᒪᓕ ᖃᓄᐃᒻᒪ ᑲᓇᑕᒥᐅᑕᑎᒍᑦ ᓴᓂᕐᕙᐅᔪᓐᓇᙱᓚᒍᑦ ᕿᑭᖅᑕᒥ?” ᐳᓚᑦ ᐅᖃᖅᑐᖅ.

Axel Heiberg Island ᐅᕘᓈᖓᔪᖅ ᓄᓇᕗᑦᒥ ᓄᓇᑖᕐᓂᕐᒧᑦ ᐊᖏᕈᑎᓂᒃ ᐊᒻᒪᓗ ᐃᓚᒋᔭᐅᓪᓗᓂ ᕿᑭᖅᑕᓂ ᓄᓇᕗᒥᑦ.

ᐅᓇ ᐱᒻᒪᕆᐊᓘᖕᒪᑦ ᓯᕗᓂᒃᓴᖓᓄᑦ ᓴᐳᔾᔭᐅᓯᒪᓂᖓ.

ᐃᑲᔪᖅᑕᐅᓯᒪᓪᓗᓂ ᖃᐅᔨᓴᕐᓂᕐᒧᑦ ᐱᓕᕆᖃᑎᖏᓐᓂᒃ ᐅᑭᐅᕐᑕᖅᑐᕐᒥᓐ, ᐳᓚᑦ ᓂᕆᐅᒃᑐᖅ ᐱᒋᐊᖅᑎᑦᑎᓂᐊᕈᒪᓪᓗᓂ ᓴᐳᔾᔨᓯᒪᓂᕐᒥᒃ ᑕᒪᑐᒥᖓ ᐅᑯᑎᒎᓇᖅ ᓄᓇᕗᑦ ᒐᕙᒪᑯᓐᓂᒃ ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ.

ᐊᑕᐅᑎᒃᑯᑦ, ᑕᐅᑐᙳᐊᖅᑕᖏᑦ ᖃᓄᐃᓕᐅᖅᐸᓪᓕᐊᒍᑎᒃᓴᓂᒃ ᐋᖅᑭᒃᓱᐃᓂᖏᑦ ᐅᓇ Axel Heiberg ᓴᐳᔾᔭᐅᓯᒪᓂᖓᓄᑦ.

“ᑕᐃᒪᓐᓇ ᐱᓕᕆᐊᖃᕋᔭᖅᑐᒍᑦ ᐊᕐᕌᒍᒥ ᒪᕐᕉᖕᓂᓪᓘᓐᓃᑦ,” ᐅᖃᖅᑐᖅ ᐳᓚᑦ. “ᐃᓱᒪᔪᖏ ᐃᓄᐃᑦ ᑖᔅᓱᒥᖓ ᑕᐃᒪᓐᓇ ᐱᔭᐅᔪᒥᒋᓕᖅᑎᒃᑯᑦᑎᒍᑦ ᑕᒪᓐᓇ ᐱᒋᐊᖅᑕᐅᓕᕈᓐᓇᖅᑐᖅ.”

Share This Story

(0) Comments