ᐅᑭᐅᕐᑕᖅᑐᕐᒥ ᐊᐅᓪᓚᕈᑎᓄᑦ ᑖᒃᓰᔭᕈᑎᓄᑦ ᐃᑲᔫᑎᒃᓴᑦ ᐋᖅᑭᒃᑕᐅᔪᖅ ᐅᓄᕐᓂᕐᓴᓄᑦ ᐊᑐᖅᑕᐅᔪᓐᓇᕐᓗᓂ
ᑭᓯᐊᓂᓕ ᐊᓯᔾᔨᕈᑎᐅᔪᑦ ᑖᒃᓰᔭᕈᑎᓄᑦ ᑎᑎᕋᖅᑎᐅᕙᒃᑐᑦ ᐱᓕᕆᐊᒃᓴᖃᕐᓂᕐᓇᐅᓕᕋᔭᕐᓂᖏᓐᓂᒃ ᐅᖃᖅᑐᑦ ᑮᓇᐅᔭᓕᕆᔨᒻᒪᕆᐅᕙᒃᑐᑦ
ᐅᓄᕐᓂᕐᓴᐃᑦ ᐅᑭᐅᕐᑕᖅᑐᕐᒥ ᓄᓇᖃᕐᑐᑦ ᐊᔪᕈᓐᓃᕐᓂᐊᓕᕐᑐᑦ ᑖᒃᓯᓄᑦ ᐊᑭᓕᐅᑎᐅᕙᒃᑐᓂᒃ ᐊᐅᓪᓚᕈᑎᐅᕙᓚᐅᕐᑐᓄᑦ ᐅᑎᖅᑎᑦᑎᔪᓐᓇᕐᓯᓗᑎᒃ 2021-ᒧᑦ. ᓯᕗᓂᐊᓂᓪᓕ ᐅᑭᐅᕐᑕᖅᑐᕐᒥ ᓄᓇᖃᖅᑐᑦ ᐊᐅᓪᓚᕈᑎᓄᑦ ᐃᑲᔫᑎᒃᓴᓄᑦ ᑖᒃᓰᔭᕈᑎᒃᓴᖅ ᐊᑐᐃᓐᓇᐅᑐᐃᓐᓇᓚᐅᕐᓯᒪᖕᒪᑦ ᐃᖅᑲᓇᐃᔭᖅᕕᐅᔪᑦ ᐊᑭᓖᖃᑦᑕᖅᐸᑕ ᐊᐅᓪᓚᕈᑎᒃᓴᓄᑦ ᐃᑲᔫᑎᒃᓴᓂᒃ. (ᐊᔾᔨᙳᐊᖁᑎᒋᔭᐅᔪᖅ)
For an English version of this story, see Northern travel tax benefit expanded to include more residents
ᐅᓄᕐᓂᕐᓴᐃᑦ ᐅᑭᐅᕐᑕᖅᑐᕐᒥ ᓄᓇᖃᕐᑐᑦ ᑖᒃᓯᓕᕆᓂᒃᑯᑦ ᐃᑲᔪᕐᑕᐅᔾᔪᑎᖃᕈᓐᓇᕐᓂᐊᕐᑐᑦ ᑕᒪᑐᒪᓂ ᐊᕐᕌᒍᒥ ᐱᔾᔪᑎᒋᓪᓗᒍ ᒐᕙᒪᑐᖃᒃᑯᑦ ᐊᓯᙳᖅᑎᑦᑎᓚᐅᕐᒪᑕ ᐅᑭᐅᕐᑕᖅᑐᒥᐅᑕᑦ ᐊᐅᓪᓚᑲᑕᖕᓂᕐᒧ ᐃᑲᔪᕈᑎᒃᓴᓂᒃ.
ᐅᓇ ᐊᖏᒡᓕᒋᐊᕐᓯᒪᓪᓗᓂ ᐃᑲᔪᕈᑎᒃᓴᖅ ᒪᓂᒻᒪᐃᓯᒪᖕᒪᑦ ᑎᑭᑦᑐᓂᒃ $1,200 ᑖᒃᓰᔭᕈᑎᓄᑦ ᐲᔭᖅᑕᐅᔾᔪᑎᓂᒃ ᐅᑭᐅᕐᑕᖅᑐᕐᒥᐅᓄᑦ ᐊᐅᓪᓚᖃᑦᑕᖅᑐᓄᑦ ᖃᓪᓗᓈᑦ ᓄᓇᖓᓄᑦ ᑲᓇᑕᒥ. ᓯᕗᓂᐊᓂᓪᓕ ᐃᑲᔪᕈᑎᒃᓴᖅ ᐊᑐᐃᓐᓇᐅᓚᐅᕐᓯᒪᔪᖅ ᐅᑭᐅᕐᑕᖅᑐᕐᒥᐅᓄ ᐃᖅᑲᓇᐃᔭᕐᕕᖏᓐᓂᒃ ᐊᐅᓪᓚᕈᑎᓄᑦ ᐃᑲᔫᑎᓂᒃ ᐊᑭᓕᖅᓱᖅᑕᐅᕙᒃᑐᓄᑦ. ᐅᓇᓕ ᑮᓇᐅᔭᓕᐅᙱᓐᓂᕐᓴᓄᑦ ᐊᑐᖅᑕᐅᔪᓐᓇᓚᐅᙱᖢᓂ.
ᐅᓇ ᓄᑖᙳᕆᐊᕐᓯᒪᔪᑦ ᐃᑲᔫᑎᒃᓴᖅ ᐊᔪᕈᓐᓃᕈᑎᐅᔪᖅ ᐅᑭᐅᕐᑕᖅᑐᕐᒥᐅᑕᑦ ᐋᓐᓂᐊᕐᕕᓕᐊᕐᓂᕐᒧᑦ ᐊᐅᓪᓚᕈᑎᖏᓐᓂ ᐅᑎᖅᑎᑦᑎᔪᓐᓇᕐᓯᓗᑎᒃ ᐊᒻᒪᓗ ᐋᓐᓂᐊᕕᓕᐊᙱᑦᑐᑦ ᒪᕐᕈᐃᓄᑦ ᐊᐅᓪᓚᕈᑎᕕᓂᕐᓂᒃ ᐱᔪᓐᓇᕐᓯᓗᑎᒃ.
ᐅᑭᐅᕐᑕᖅᑐᕐᒥ ᐃᓐᑲᒻ ᑖᒃᓯᓂ ᐊᑭᓕᕐᓱᐃᕙᒃᑐᑦ ᐊᑭᓕᐅᑎᒋᔭᖏᓐᓂᒃ ᐅᑎᖅᑎᑦᑎᓇᓱᒍᑎᖃᕈᓐᓇᖅᑐᖅ ᐃᓚᖏᓐᓄᑦ.
ᑭᓯᐊᓂᓕ ᐊᓯᙳᕈᑎᐅᔪᑦ ᓄᓇᕗᒻᒥᐅᓄᑦ ᐃᑲᔫᑎᐅᓗᐊᔾᔮᑰᔨᙱᑦᑐᑦ ᖄᖓᒍᑦ, ᐅᖃᖅᑐᖅ ᓵᓐ ᓚᔅᑐ, ᐊᐅᓚᑦᑎᓂᒃᑯᑦ ᐱᓕᕆᐊᖃᖃᑕᐅᔪᖅ ᑮᓇᐅᔭᓕᕆᔨᓂᒃ ᓚᔅᑐ ᓛᓐᑕᐅᒥ ᑖᒃᑯᐊᓗ ᐃᖃᓗᖕᓂ ᑎᑎᕋᕐᕕᖃᖅᖢᑎᒃ.
ᓚᔅᑐ ᐅᖃᓚᐅᕐᑐᖅ ᐊᓯᔾᔨᕈᑎᐅᔪᑦ ᐊᐅᓪᓚᕈᑎᓄᑦ ᐃᑲᔫᑎᓂᒃ ᓈᒻᒪᖃᑦᑕᓚᐅᙱᒻᒪ ᐃᓚᖏᓐᓄᑦ ᖃᖓᐅᓚᐅᕐᓯᒪᔪᖅ, ᐃᒡᓗᖃᖃᑕᐅᔪᑦ ᐊᐅᓪᓚᕈᑎᓄᑦ ᒪᕐᕉᒃ ᐅᖓᑖᓄᑦ ᐱᓇᓱᒍᓐᓇᓚᐅᕐᓯᒪᔪᑦ ᐅᑭᐅᕐᑕᖅᑐᕐᒥ ᐃᑲᔫᑎᓕᕆᓂᒃᑯᑦ ᑭᓯᐊᓂᓕ ᒫᓐᓇ ᒪᕐᕉᖕᓄ ᐋᖅᑭᒃᓯᒪᑐᐃᓐᓇᓕᖅᖢᓂ.
ᐅᓇ ᓄᑖᖅ ᐃᑲᔫᑎᒃᓴᖅ ᓄᓇᕗᒻᒥᐅᓂ ᐃᑲᔪᕈᓐᓇᖅᑐᖅ ᐃᓐᓇᐅᓂᕐᒧᑦ ᐃᖅᑲᓇᐃᔭᕈᓐᓃᕐᓯᒪᔪᓂᒃ ᐅᕝᕙᓘᓐᓃᑦ ᓇᖕᒥᓂᖅ ᐱᓕᕆᐊᖃᖅᑐᓂᒃ, ᓲᖃᐃᒻᒪ ᑖᒃᑯᐊ ᖃᖓᑦᑕᐅᑎᖃᕈᓐᓇᕐᓂᕐᓴᐅᖕᒪᑕ ᑭᓯᐊᓂ ᐊᓯᖏᓐᓂ ᐃᖅᑲᓇᐃᔭᕐᕕᖃᙱᓪᓗᑎᒃ, ᓚᔅᑐ ᐅᖃᖅᑐᖅ.
ᐅᖃᒃᑲᓐᓂᓚᐅᕐᑐᖅ ᐃᑲᔪᕈᓐᓇᔾᔮᕋᓱᒋᙱᖢᓂᐅᒃ ᐊᔪᕐᓴᓗᐊᖅᑐᓂᒃ ᐃᓄᖕᓂ ᑮᓇᐅᔭᓕᐅᕐᓂᑭᑦᑐᓂᒃ ᐊᒻᒪᓗ ᐃᓐᑲᒻ ᑖᒃᓯᓂᒃ ᐊᑭᓕᖅᓱᐃᙱᓗᑎᒃ.
ᑕᒪᒃᑯᐊ ᐅᑭᐅᕐᑕᖅᑐᕐᒥᐅᑕ ᓂᕈᐊᕈᓐᓇᕐᓂᐊᕐᓗᑎᒃ ᐊᑐᖅᑕᐅᓂᑯᒥᓪᓘᓐᓃᑦ ᐃᖅᑲᓇᐃᔭᖅᑎᓄᑦ ᐃᑲᔫᑎᑖᕈᑎᓂᒃ ᐊᑐᕈᓐᓇᕐᓂᕐᒥᒃ ᐅᕝᕙᓘᓐᓃᑦ ᐅᓇ ᓄᑖᒃ $1,200 ᐲᕐᓯᔾᔪᑎᐅᔪᖅ, ᐅᑎᖅᑐᒃᓴᓕᕆᓂᖅ ᐅᑭᐅᕐᑕᖅᑐᕐᒥ ᐊᐅᓪᓚᕈᑎᓄᑦ ᐃᑲᔫᑎᓂᒃ ᐱᑐᐃᓐᓇᐅᙱᓐᓂᕐᓴᐅᓂᐊᕐᒥᔪᖅ, ᓚᔅᑐ ᐅᖃᖅᑐᖅ.
“ᐅᓇ ᐊᐱᖅᑯᑎᖃᕈᑎᐅᒃᑲᓐᓂᕐᑐᖅ ᐅᑎᖅᑐᒃᓴᓕᕆᓂᒃᑯᑦ,” ᐅᖃᖅᑐᖅ.
ᐅᓇ ᐊᓯᔾᔨᕈᑎᐅᔪᖅ 2021-ᒥ ᐊᐅᓚᔾᔪᑎᒃᓴᓕᕆᑎᓪᓗᒋᑦ ᒐᕙᒪᑐᖃᒃᑯᑦ ᐅᖃᐅᓯᐅᓚᐅᕐᓯᒪᔪᖅ. ᒐᕙᒪᑐᖃᒃᑯᑦ ᓯᕗᓪᓕᕐᒥ ᐊᓯᙳᖅᑎᑦᑎᔪᒪᓚᐅᕐᓯᒪᔪᖅ 2019 ᐃᓱᓕᓕᖅᑎᓪᓗᒍ ᐅᓇ ᑲᓇᑕᒥ ᐊᖓᔪᖅᑳᖅ ᔭᔅᑎᓐ ᑐᕉᑑ ᐅᖃᖅᑎᓪᓗᒍ ᖃᓄᐃᓕᐅᕈᑎᖏᓐᓄᑦ ᑎᑎᕋᖅᑕᖏᓐᓂᒃ ᐅᑭᐅᕐᑕᖅᑐᓕᕆᓂᕐᒧᑦ ᒥᓂᔅᑕᒧᑦ ᑖᓂᐅᓪ ᕚᓐᑐᒧᑦ ᐅᓇ ᑖᒃᓯᓄᑦ ᐲᕐᓯᔾᔪᑎᐅᓇᔭᖅᑐ ᑎᑭᓪᓗᒍ $1,200 ᐊᑐᓕᖅᑎᑕᐅᔭᕆᐊᖃᕐᓂᕋᖅᖢᓂᐅᒃ ᐅᑭᐅᕐᑕᖅᑐᕐᒥᐅᓄᑦ ᐊᐅᓪᓚᖅᐸᒃᑐᓄᑦ.
(0) Comments