ᐅᑭᐅᕐᑕᖅᑐᕐᒥ ᐳᓚᕋᖅᑐᓕᕆᓂᖅ ᐊᒃᑐᖅᑕᐅᕐᔪᐊᖅᐳᖅ ᐋᓐᓂᐊᕕᒡᔪᐊᕐᓇᒧ
“ᒫᓐᓇᐅᔪᕐᓕ, ᓯᕗᓂᒃᓴᕗᑦ ᓈᓚᐅᑦᑖᒐᑐᐃᓐᓇᖅ”
ᑎᑎᕋᐅᓯᐅᕙᓪᓕᐊᕙᒃᑐᑎᒍᑦ ᐅᑯᓇᙵᑦ ᐊᐅᓪᓚᕐᕕᒋᒍᒃ ᓄᓇᕗᑦᑯᓐᓂᑦ (Travel Nunavut), ᔭᓄᐊᕆᒥ ᒫᑦᓯᒧᑦ ᐃᓚᖏᑦ ᓄᓇᕗᒥᑦ ᐳᓚᕋᖅᑐᓕᕆᓂᕐᒧᑦ ᐱᓕᕆᐊᖃᖅᑐᑦ ᒥᒃᖠᕚᓪᓕᕈᔾᔨᓚᐅᕐᑐᑦ ᓇᑉᐸᖓᑕ ᐅᖓᑎᑦᑎᐊᖓᓂ ᓂᐅᕐᕈᑎᖃᕐᓂᒃᑯᑦ ᑮᓇᐅᔭᓕᐊᕆᕙᒃᑕᖏᓐᓂᒃ. ᐅᕙᓂᓕ, ᐃᓚᐅᔪᑦ ᐅᕙᓂ ᐊᑕᐅᓯᖅ ᐃᒪᕐᔪᐊᖅ ᖃᐅᔨᓴᕐᓂᕐᒧᑦ ᐅᒥᐊᖓᓂ ᕿᓂᖅᑐᑦ ᐃᕙᕝᕕᓕᖕᓂᒃ ᑎᖕᒥᐊᓂ ᐊᒃᐸᑐᒃ ᕿᑭᖅᑕᐅᑉ ᖃᓂᒋᔭᖓᓂ ᐊᒻᒪᓗ ᒫᓂ ᓘᕙ ᓵᕕᔾ ᕿᑭᖅᑕᓂ ᑯᐸᐃᒃ ᐅᐊᖕᓇᖓᑕ ᓯᒡᔭᖏᓐᓂᒃ ᐋᒐᓯ 2019-ᖑᑎᓪᓗᒍ. (ᐊᔾᔨᓕᐅᕆᔨ ᐃᐊᒪ ᑐᕌᓐᑐ)
For an English version of this story, see Nunavut and Nunavik tourism industries hit hard by pandemic
ᓄᓇᕗᓪᓗ ᓄᓇᕕᒃᓗ ᐃᓯᕆᐊᕐᕕᖏᑦ ᒪᑐᔭᐅᓯᒪᑎᓪᓗᒋ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᒧᑦ, ᐅᑭᐅᕐᑕᖅᑑᑉ ᑲᓇᖕᓇᖓᓂᒃ ᐳᓚᕋᖅᑐᓕᕆᓂᖅ ᐊᒃᑐᖅᑕᐅᒻᒪᕆᒃᓯᒪᕗᖅ.
ᐅᑯᑎᒎᓇᕐᓕ ᐊᐅᓪᓚᕐᕕᒋᒍᒃ ᓄᓇᕗᑦ, ᐳᓚᕋᖅᑐᓕᕆᓂᖅ ᐃᖅᑲᓇᐃᔭᕈᑎᐅᕙᒃᑐᖅ 3,000 ᐃᓄᖕᓄᑦ ᐊᒻᒪᓗ ᐃᑲᔪᕈᑎᐅᓪᓗᓂ $300 ᒥᓕᐊᓐ ᑖᓚᓂᒃ ᓄᓇᕗᒥᑦ ᑮᓇᐅᔭᓕᐅᕈᑎᓄᑦ.
ᔭᓄᐊᕆᐅᓪᓗ ᒫᑦᓯᐅᓪᓗ ᐊᑯᓐᓂᖓᓂ ᒫᓂᐸᓗᒃ ᓇᑉᐸᖓᑕ ᓇᑉᐸᓪᓗᐊᖏᑦ ᓄᓇᕗᒥᑦ ᐳᓚᕋᖅᑐᓕᕆᓂᕐᒧᑦ ᐱᓕᕆᐊᖃᖅᑐᑦ ᑮᓇᐅᔭᓕᐅᕈᑎᒋᓇᔭᖅᑕᖏᓐᓂᒃ ᑲᑕᒍᔾᔨᓯᒪᓚᐅᕐᑐᑦ ᑮᓇᐅᔭᓕᐊᕆᓇᔭᖅᑕᖓᑦᑕ ᓇᑉᐸᖓᑕ ᐅᖓᑎᑦᑎᐊᖓᓂᒃ.
“ᓇᒧᙵᐅᖃᑦᑕᖅᑎᑦᑎᓂᕐᒧᑦ ᓯᕗᓪᓕᖅᐹᖑᖃᑕᐅᖕᒪᑕ ᐊᒃᑐᖅᑕᐅᒻᒪᕆᒃᑐᓂᒃ ᓄᕙᒡᔪᐊᕐᓇᖅ-19-ᒧᑦ,” ᐅᖃᖅᑐᖅ ᑭᐊᕕ ᑲᓕ, ᐊᖓᔪᖅᑳᖅ ᐊᐅᓚᑦᑎᔨ ᐅᑯᓄᖓ ᐊᐅᓪᓚᕐᕕᒋᒍᒃ ᓄᓇᕗᑦ.
“ᐃᓱᒪᒋᔭᕗᓪᓕ ᒫᓐᓇ, ᑕᒪᐅᓇ ᑕᑯᔾᔮᕋᓱᒋᙱᖢᑕ ᖃᓱᔾᔫᒥᒍᑎᒃᓴᓂᒃ ᐱᓇᓱᐊᕈᓯᕐᓂ ᐅᓄᕐᑐᓂ ᐊᒡᒋᖅᑐᓂᒃ ᐃᒻᒪᖄᓪᓘᓐᓃᑦ ᑕᕿᒐᓴᖕᓂ.”
ᑕᒪᐅᓇᓕ ᑲᑎᕐᓱᒐᓕᕆᓂᒃᑯᑦ ᓄᓇᕕᒃᒥ ᐊᑐᐃᓐᓇᖅᑕᖃᙱᒃᑲᓗᐊᖅᖢᓂ ᐊᒃᑐᖅᑕᐅᓂᖏ ᐊᔾᔨᐸᓗᒋᕙᒋᑦ.
“ᓄᓇᕗᑦ ᒪᑐᓯᒪᑦᑎᐊᒻᒪᕆᖕᒪᑦ,” ᐅᖃᖅᑐᖅ ᐃᓴᐱᐅᓪ ᑎᐳᐊ, ᓂᐅᕐᕈᑎᖃᕋᓱᖕᓂᕐᒧᑦ ᑐᑭᒧᐊᖅᑎᑦᑎᔨ ᓄᓇᕕᒃ ᐳᓚᕋᖅᑐᓕᕆᓂᕐᒧᑦ.
“ᐅᑭᐅᖃᕋᑦᑕᓕ ᐅᑯᓇᓂᓪᓗᐊᑕᖅ ᒫᑦᓯᒥ ᐊᒻᒪ ᐄᐳᕈᒥ, ᑕᐃᒪᓕ ᖃᐅᔨᒪᔪᖓ ᐊᑐᖅᑕᐅᔪᒃᓴᕕᓃᑦ ᐄᐳᕈᒥ ᒥᕐᖑᐃᕐᓯᕕᖕᓂ ᓄᖅᑲᖅᑎᑕᐅᓚᐅᕐᓂᖏᓐᓂᒃ.”
ᓄᓇᕗᒥᓪᓕ, 75 ᐳᓴᓐᑎᓪᓗᐊᖏᑦ ᐳᓚᕋᖅᑐᓕᕆᓂᕐᒧᑦ ᐱᓕᕆᐊᖃᖅᑐᑦ ᐃᓱᒪᔪᑦ ᒪᑐᓯᒪᓚᐅᑲᖕᓂᐊᕆᐊᒃᓴᖏᓐᓂᒃ ᐄᐳᕉᓪᓗ ᔫᓂᐅᓪᓗ ᐊᑯᓐᓂᖓᓂᒃ, ᐅᑯᐊ ᓇᐃᓴᐃᔨᑎᑎᒎᖓᔪᑦ ᐅᑯᓇᙶᖅᑐᑦ ᐊᐅᓪᓚᕐᕕᒋᒍᒃ ᓄᓇᕗᑦᑯᓐᓂᑦ.
13 ᐳᓴᓐᑎᐅᔪᑦ ᐳᓚᕋᖅᑐᓕᕆᓂᕐᒧᑦ ᐱᓕᕆᐊᖃᖅᑐᐃ ᐅᖃᕐᓯᒪᔪᑦ ᒪᑐᓪᓚᕆᓛᕆᐊᒃᓴᖏᓐᓂᒃ.
“ᒫᓐᓇᐅᔪᕐᓕ, ᓯᕗᓂᒃᓴᕗᑦ ᓈᓚᐅᑦᑖᒐᑐᐃᓐᓇᖅ,” ᐅᖃᖅᑐᖅ ᑲᓕ.
“ᒫᓐᓇ ᐃᑲᔪᕋᓱᒃᑐᒍᑦ ᐳᓚᕋᖅᑐᓕᕆᔨᓂᒃ ᖃᓄᑐᐃᓐᓇᖅ ᐊᔪᙱᑕᑎᒍᑦ ᑐᓴᐅᒪᑎᑦᑎᓇᓱᒃᖢᑕ ᑭᖑᓪᓕᖅᐹᓂᒃ ᑐᓴᒐᒃᓴᓂᒃ ᐱᓕᕆᐊᒃᓴᓕᕆᓂᒃᑯᑦ ᐊᒻᒪ ᐱᔨᑦᑎᕋᐅᑎᓂ ᐊᑐᐃᓐᓇᐅᔪᓂᒃ ᑖᒃᑯᓄᖓ.”
ᑭᓯᐊᓂᓕ ᑭᐊᓕ ᓂᕆᐅᑦᑎᐊᕋᓱᒃᑐᖅ. ᓄᓇᕗᒥᑦ ᐳᓚᕋᖅᑐᓕᕆᓂᖅ ᒪᑯᓇᙶᖃᑦᑕᕐᒪᑦ ᐊᐅᓪᓚᑲᑕᒃᐸᒃᑐᓂ ᑐᔪᕐᒥᔪᓂᒃ ᑐᔪᕐᒥᕕᖕᓂᒃ, ᓴᓇᐅᒐᓂᒃ ᓂᐅᕕᑲᑕᒃᐸᒃᖢᑎᒃ ᐊᒻᒪᓗ ᕿᒥᕐᕈᐊᖅᑎᑕᐅᕙᒃᖢᑎᒃ ᐊᐃᓪᓚᖅᑎᑦᑎᔨᓄᑦ.
ᐅᑯᖓ ᐊᐅᓪᓚᕐᕕᒋᒍᒃ ᓄᓇᕗᑦ ᐃᑲᔪᕋᓱᖕᒥᔪᑦ ᑕᒪᒃᑯᐊ ᐳᓚᕋᖅᑐᓕᕆᔨᐅᕙᒃᑐᑦ ᐸᕐᓇᒃᓯᒪᑎᓐᓇᓱᒃᖢᒋᑦ, ᒪᑯᓇᙵᑦ ᓂᐅᕐᕈᑎᒃᓴᓕᕆᓂᕐᒥᓐ ᒪᐅᖓ ᖃᕋᓴᐅᔭᒃᑯ ᓴᖅᑭᔮᒐᓂᒃ ᑭᖑᕙᓯᒃᑎᑦᑎᑦᑕᐃᓕᓂᕐᒥᓐ.
“ᑕᐃᒪᓐᓇ ᐱᓕᕆᖃᑎᖃᕈᑦᑕ ᑕᑯᔪᓐᓇᕐᓂᐊᕐᑐᒍᑦ ᐅᑎᕐᐸᓪᓕᐊᔪᓂ ᐃᓚᖏᓐᓂᒃ,” ᐅᖃᖅᑐᖅ ᑲᓕ.
“ᖁᐊᕐᓵᕐᓇᖅᑐᖃᕐᒥᖕᒪᑦ … ᓯᕗᒧᑦ ᐱᓇᓱᖕᓂᐊᕐᓗᓂ, ᑭᓯᐊᓂᓕ ᐅᒃᐱᕈᓱᒃᑲᑦᑕ ᐱᓕᕆᐊᒃᓴᓄᑦ ᐊᐅᓪᓚᖃᑦᑕᕆᐊᖃᓕᕐᓂᐊᕐᒥᖕᒪᑕ ᑕᐃᒪᓕ ᑕᒪᓐᓇ ᐱᕕᖃᕈᑎᒋᔪᓐᓇᖅᑕᕗᑦ.”
ᐊᒃᑐᖅᑕᐅᕐᔪᐊᕐᓂᐅᖕᒥᔪᖅᑕᐅᖅ ᓄᓇᕗᒥᑦ ᐳᓚᕋᖅᑐᓕᕆᔨᒃᑯᑦ ᓄᖅᑲᖅᑎᑕᐅᓂᖏᑦ ᐅᑭᐅᕐᑕᖅᑐᕐᒥ ᐅᒥᐊᕐᔪᐊᑦ ᐃᓄᖕᓂ ᐅᓯᕙᒃᑐᑦ ᑕᒪᑐᒪᓂ ᐅᒥᐊᕐᑐᕐᓇᕐᓂᐊᖅᑐᒥᓐ, ᑕᒪᓐᓇᓗ ᐊᒃᑐᐃᓯᒪᓂᐊᕐᑐᖅ ᓴᓇᐅᒐᓕᐅᖅᑎᓂᒃ ᐊᒻᒪ ᐊᓯᖏᓐᓂᒃ ᐳᓚᕋᖅᑐᓕᕆᓂᕐᒧᑦ ᐱᓕᕆᐊᖑᔪᓂᒃ, ᒪᑯᑎᑐᓇᖅ ᓄᓇᓕᖕᓂ ᕿᒥᕐᕈᐊᖅᑎᑦᑎᕙᒃᑐᓂᒃ ᐊᒻᒪᓗ ᑖᒃᑯᐊ ᓴᓇᑎᑕᐅᖃᑦᑕᕐᒪᑕ ᕼᐋᒻᒪᓚᓄᑦ ᐅᕝᕙᓘᓐᓃᑦ ᐅᒥᐊᕐᔪᐊᓕᖕᓄᑦ ᐃᓄᖕᓂ ᐅᓯᕙᒃᑐᓂᒃ.
“ᐱᓕᕆᓂᖅᑕᖃᕈᓘᔭᕐᓯᒪᖕᒪᑦ ᐱᒋᐊᖅᑎᑦᑎᓂᒃᑯᑦ ᓄᑖᓂᒃ ᐊᐅᓚᑦᑎᔨᒃᓴᓂᒃ ᐅᒥᐊᕐᔪᐊᖃᕐᓇᕐᓯᔭᕌᖓᑦ,” ᑲᓕ ᐅᖃᖅᑐᖅ.
“ᐊᐃᑦᑖᖑᒐᓗᐊᖅ ᐃᓚᖏᑦ ᐱᓕᕆᐊᖏᓐᓂ ᐱᕈᖅᑎᑦᑎᔪᓐᓇᔾᔮᙱᒻᒪᑕ.”
ᑲᓕᒧᓪᓕ, ᐊᐅᓪᓚᕐᕕᒋᒍᒃ ᓄᓇᕗᑦ ᑖᒃᑯᓂᖓ ᐱᓕᕆᖃᑎᖃᖅᑐᑦ ᐊᓯᐅᔨᔾᔪᑎᒋᔭᖏ ᐅᒥᐊᕐᔪᐊᒃᑰᖅᑐᓂᙶᕋᔭᖅᑐᓂᒃ ᒪᑯᓂᖓᖔᖅ ᐱᓕᕆᐊᖃᖅᑎᑕᐅᖔᕋᓱᒃᖢᑎᒃ ᓲᕐᓗ ᐱᓕᕆᐊᒧᑦ ᑎᑭᑉᐸᒃᑐᓂᒃ.
ᑭᓯᐊᓂᓕ ᐳᓛᕐᐸᒃᑐᑦ ᕿᒥᕐᕈᐊᕆᐊᖅᖢᑎᒃ ᓄᓇᕗᒧᑦ ᐱᓕᕆᐊᖃᕐᓂᕐᒨᖓᑐᐃᓐᓇᙱᒻᒪᑕ ᐅᕝᕙᓘᓐᓃᑦ ᐅᒥᐊᕐᔪᐊᒃᑰᑐᐃᓐᓇᙱᒻᒪᑕ, ᐅᖃᖅᑐᖅ ᑲᓕ. ᐃᓚᖏᑦ ᑕᒪᐅᖓ ᓴᐃᓕᓗᑎᒃ ᑕᑯᓐᓇᕆᐊᖃᑦᑕᕐᒪᑕ.
“ᑕᒪᒃᑯᐊ ᑕᒪᐅᙵᕈᒪᔪᐃᑦ ᐅᓄᕐᓂᕐᓴᐃᑦ ᐃᓂᓕᐅᓕᕌᖓᒥ ᐊᒻᒪ ᐅᑭᐅᕐᑕᖅᑐᕐᒧᐊᕐᓂᐊᕐᓗᑎ ᐃᓂᒃᓴᓕᐅᖃᑦᑕᕐᒪᑕ ᐊᕐᕌᒎᓂᐊᖅᑐᒨᐊᔪᓂᑦ,” ᐅᖃᖅᑐᖅ ᑲᓕ.
“ᑭᓯᐊᓂᓕ ᑕᒪᐅᓇ ᓈᒻᒪᙱᓐᓂᐅᓂᐊᕐᑐᖅ ᑕᒪᒃᑯᐊ ᐅᐱᕐᖔᒃᑯ ᐊᒻᒪ ᐊᐅᔭᒃᑯ ᑕᒪᐅᙵᖃᑦᑕᖅᑐᑦ ᐊᒃᑐᖅᑕᐅᓪᓚᕆᖕᓂᐊᕐᒪᑕ.”
ᑕᐃᒪᓐᓇᑦᑕᐃᓐᓇᐅᖕᒥᔪᖅ ᓄᓇᕕᒃᒥᑦ, ᑕᕝᕙᓂᓕ ᐊᐅᔭᒃᑯ ᐳᓚᕋᖅᑐᓂ ᐱᓕᕆᐊᖃᓕᖅᐸᒃᖢᑎᒃ ᔪᓚᐃᒥ ᐋᒐᓯᒧᑦ.
“ᒫᓐᓇᓕ, ᐊᐱᖅᑯᑎᑕᖃᕈᓘᔭᕐᒪᑦ ᒪᑯᓄᖓ, ᐃᖃᓗᒐᓱᖕᓇᓛᕐᐹ? ᑐᙵᓱᒃᑎᑦᑎᔪᓐᓇᕐᓂᐊᕐᐱᑕ ᐳᓛᖅᑐᓂᒃ ᐊᐅᓪᓚᖅᑎᑦᑎᒍᑎᑦᑎᓐᓄ? ᓱᓕ ᒫᓐᓇ ᖃᐅᔨᒪᙱᑦᑐᒍᑦ,” ᐅᖃᖅᑐᖅ ᑎᐳᐊ, ᑖᓐᓇᑦᑕᐅ ᖃᓄᐃᓐᓇᕋᓗᐊᕐᑎᓪᓗᒍ ᐃᖏᕐᕋᑲᑕᒍᓐᓇᕐᓯᓂ ᐃᓱᓕᑕᐅᓯᒪᓕᕋᔭᕆᐊᒃᓴᖓᓂᒃ ᑎᑭᑉᐸᑦ, ᐳᓚᕋᖅᐸᒃᑐᑦ ᑯᐸᐃᒃᒥᐅᑕ ᐋᓐᑎᐅᕆᐅᒥᓪᓘᓐᓃᑦ ᐅᑭᐅᕐᑕᖅᑐᓕᐅᑐᐃᓐᓇᕆᐊᖃᕐᒪᑕ.
ᑕᒪᐅᓇ ᖃᓂᒃᑐᑰᒐᔭᖅᑐᑦ ᖃᓄᐃᓕᐅᕈᑎᒃᓴᑦ ᐊᐅᓚᑎᒐᒃᓴᐅᙱᒃᑲᓗᐊᕐᑎᓪᓗᒋ ᐅᑯᐊ ᑲᓕ, ᑎᐳᐊ ᐊᒻᒪ ᐳᓚᕋᖅᑐᓕᕆᓂᕐᒧᑦ ᐊᐅᓚᑦᑎᔨᐅᔪᓄᑦ, ᓯᕗᓂᒃᓴᒧᑦ ᑐᕌᒐᕆᔭᐅᔪᑦ ᓱᓕ ᑕᕝᕙᐅᔪᑦ.
“ᒫᓐᓇᓕ ᓈᒻᒪᓛᖑᓕᕐᐳᖅ ᑕᒪᒃᑯᐊ ᐊᐅᓚᑦᑎᔨᐅᔪᑦ ᐸᕐᓇᐅᓯᐅᑲᑕᒃᐸᓪᓕᐊᓕᕈᑎ ᖃᓄᖅ ᐊᓂᒍᐃᑦᑎᐊᕈᓐᓇᕋᔭᕐᓂᕐᒧᑦ ᐅᓇ ᓄᕙᒡᔪᐊᕐᓇᖅ-19 ᐱᐊᓂᒃᐸᑦ,” ᐅᖃᖅᑐᖅ ᑲᓕ, ᑖᓐᓇᓗ ᑐᓴᒐᒃᓴᖃᖅᖢᓂ ᐊᑕᐅᓯᕐᒥᑦ ᓄᓇᕗᒧᙵᐅᓇᔭᖅᑐᓄᑦ: “ᑕᒫᓃᓐᓂᐊᖅᑐᒍ ᐃᖏᕐᕋᑲᑕᒃᑕᐃᓕᓂᖅ ᐃᓱᓕᑉᐸᑦ.”
(0) Comments