ᐅᓄᖅᑐᒻᒪᕆᐊᓗᐃᑦ ᐃᓄᐃᑦ ᐃᓚᒋᔭᐅᔪᓐᓇᖅᑐᑦ ᐃᓄᒋᐊᓂᒃ ᐃᖃᖅᑐᐃᕕᒃᑰᖅᑎᑦᑎᔪᓐᓇᖅᑐᓂᒃ ᐸᓖᓯᒃᑯᓐᓂᒃ ᐱᑦᑎᐊᙱᓗᐊᖅᓯᒪᓂᖏᓐᓄᑦ, ᓗᐊᐃᔭ ᐅᖃᖅᑐᖅ
‘ᐃᓱᒪᒐᒪ ᐅᖃᓪᓚᖃᑎᖃᖃᑦᑕᖅᓯᒪᓂᓐᓂᒃ ᐸᓖᓯᒃᑯᓐᓂᒃ, ᐊᔾᔨᐅᙱᑎᑕᐅᓂᓐᓂ ᓄᓇᖃᖅᑳᖅᑑᓂᓐᓄᑦ,” ᐸᓯᔭᒃᓴᙳᖅᑎᑦᑎᓯᒪᔪᖅ ᐅᖃᖅᓯᒪᔪᖅ
ᓄᓇᕗᒥᑦ ᐸᓖᓯᒃᑯᑦ ᑎᑎᕋᖅᕕᖓ ᐃᖃᓗᖕᓂ ᓴᖅᑭᔮᖅᑐᖅ ᐅᕙᓂ ᐊᔾᔨᒥ. ᐸᓖᓯᒃᑯᑦ ᐃᓄᖕᓂᒃ ᐱᑦᑎᐊᖅᓯᒪᙱᓐᓂᖏᓐᓄᑦ ᐃᓄᒋᐊᓄᑦ ᐃᖃᖅᑐᐃᕕᒃᑰᖅᑎᑦᑎᔾᔪᑎᐅᑐᐃᓐᓇᕆᐊᓕᒃ, ᒐᕙᒪᑐᖃᒃᑯᓐᓄᑦ ᐃᖃᖅᑐᐃᔨ ᐅᖃᓚᐅᖅᑐᖅ ᔫᓂ 23-ᖑᑎᓪᓗᒍ. (ᐊᔾᔨᙳᐊᖁᑎᒋᔭᐅᔪᖅ)
For an English version of this article, see Hundreds of Inuit could join class action suit against RCMP abuse, lawyer says
ᓗᐊᐃᔭ ᑭᒡᒐᖅᑐᐃᔪᖅ ᐃᓄᒋᐊᓂ ᐸᓯᔭᒃᓴᙳᖅᑎᑦᑎᓯᒪᔪᓂᒃ ᐸᓖᓯᒃᑯᓐᓂᒃ ᐊᒃᓱᓗᐊᕌᓗᒃ ᐱᓕᕆᐊᖃᖃᑦᑕᕐᓂᖏᓐᓄᑦ ᐃᓱᒪᔪᖅ ᐅᓄᒃᑲᓐᓂᖅᑐᓂᒃ ᐃᓄᖕᓂ ᐃᓚᐅᔪᖃᓕᕐᓂᐊᕆᐊᒃᓴᖓᓂᒃ ᑖᓐᓇ ᐃᖃᖅᑐᐃᕕᒃᑎᒍᑦ ᓇᓗᓇᐃᖅᑕᐅᓪᓚᕆᓚᐅᖅᑎᓪᓗᒍ.
ᔫᓂ 23-ᖑᑎᓪᓗᒍ, ᒐᕙᒪᑐᖃᒃᑯᓐᓄᑦ ᐃᖃᖅᑐᐃᔨ ᒋᓕᓂᔅ ᒪᒃᕖ ᐅᖃᓚᐅᖅᓯᒪᔪᖅ ᐊᖏᖃᑎᖃᙱᓐᓂᕋᖅᖢᓂ ᒐᕙᒪᒃᑯᓐᓂᒃ ᐅᓇ ᐸᓯᔭᒃᓴᐅᑎᑦᑎᔪᖅ ᐊᑕᐅᓯᑐᐃᓐᓇᖅᒨᖓᓂᕋᐃᑎᓪᓗᒋᑦ.
“ᐅᓇ ᐸᓯᔭᒃᓴᐅᑎᑦᑎᓯᒪᔾᔪᑎ ᐅᖃᖅᓯᒪᙱᒻᒪᑦ ᐊᐱᕆᓯᒪᔭᕆᐊᒃᓴᖓᓂᒃ ᐸᓖᓯ ᐋᓐᓂᖅᓯᓯᒪᔭᕆᐊᒃᓴᖓᓂᒃ ᐸᓯᔭᒃᓴᐅᑎᑦᑎᖃᑕᐅᔪᒥᒃ, ᑭᓯᐊᓂᓕ ᐃᒪᓐᓇ ᐸᓖᓯᒃᑯᑦ ᐊᐅᓚᔾᔪᑎᒋᕙᒃᑕᖏᑦ ᐋᖅᑭᒃᓯᓯᒪᔾᔪᑎᐅᔭᕆᐊᒃᓴᖓᓂᒃ ᖃᓄᐃᓕᐅᕈᓯᒃᑯᑦ ᐋᓐᓂᖅᓱᐃᕆᓂᖅᑕᖃᖃᑦᑕᕆᐊᒃᓴᖓᓂᒃ,” ᒪᒃᕖ ᑎᑎᕋᖅᓯᒪᔪᖅ.
“ᐅᓇ ᐋᖅᑭᒃᑕᐅᓚᐅᖅᑎᓪᓗᒍ, ᖃᐅᔨᔪᓐᓇᖅᓯᑕᐃᓐᓇᕋᔭᕐᒪᑕ ᐸᓯᔭᒃᓴᐅᑎᑦᑎᔪᓂᒃ ᐃᓚᒋᔭᐅᔪᖅ ᐱᓕᕆᔾᔪᓯᕐᒧᑦ ᑕᐃᒪᐃᑕᐅᓯᒪᔭᕆᐊᒃᓴᖓᓂᒃ.”
ᐃᖃᖅᑐᐃᕕᒃᑰᖅᑎᑦᑎᔾᔪᑎ ᐅᖃᖅᓯᒪᖕᒪᑦ ᓄᓇᖃᖅᑳᖅᑐᑦ ᑎᒍᔭᐅᓕᒪᓂᖏᓐᓂᒃ, ᑎᒍᒥᐊᖅᑕᐅᓕᖅᖢᑎᒃ ᐊᒻᒪᓗ ᐱᑦᑎᐊᖅᑕᐅᔪᓐᓃᖅᐸᒃᖢᑎᒃ ᐸᓖᓯᓄᑦ ᓄᓇᑦᓯᐊᕐᒥ, ᓄᓇᕗᑦ ᐊᒻᒪ ᔫᑳᓐᒥ ᒪᓕᒃᖢᑎᒃ ᖃᓄᐃᑦᑑᓂᖏᓐᓂᒃ.
ᐅᖃᖅᓯᒪᖕᒥᖕᒪᑦ ᒐᕙᒪᑐᖃᒃᑯᑦ “ᐃᒃᓯᖕᓇᖅᓯᓯᒪᖃᑦᑕᐃᓐᓇᕐᓂᖏᓐᓂᒃ” ᐃᑲᔫᑎᒃᓴᑎᒍᑦ, ᐸᓖᓯᒃᑯᑦ ᐊᐅᓚᖃᑦᑕᖅᑕᖏᑦᑎᒍᑦ ᐊᒻᒪᓗ ᐸᓖᓯᓂ ᑖᒃᑯᐊᓗ ᐋᓐᓂᖅᓯᕆᓗᐊᓕᔭᖢᑎᒃ ᓄᓇᖃᖅᑳᖅᑐᓂᒃ ᑖᒃᑯᓇᓂ ᐱᖓᓱᓂᒃ ᑎᐅᕆᑑᕆᓂᒃ.
ᓯᑏᕙᓐ ᑰᐳ, ᓗᐊᐃᔭᒋᔭᐅᔪᖅ ᐸᓯᔭᒃᓴᙳᖅᑎᑦᑎᖃᑕᐅᔪᓄᑦ ᐅᖃᓚᐅᖅᑐᖅ ᓱᓕ ᓇᓗᓇᕐᓂᕋᖅᖢᓂᐅᒃ ᖃᔅᓯᒻᒪᕆᖕᓂᒃ ᐃᖃᖅᑐᐃᕕᒃᑰᖅᑎᑦᑎᔪᒪᔪᖃᕆᐊᒃᓴᖓᓂᒃ ᑭᓯᐊᓂᓕ ᐅᓄᖅᓯᕙᓪᓕᐊᓂᐊᕋᓱᒋᔭᖏᑦ ᑕᕿᓂᒃ ᐊᒡᒋᖅᑐᓂᒃ.
“ᐃᓄᐃᑦ ᐅᖃᐅᓯᖃᓗᐊᕈᒪᕙᙱᒻᒪᑕ ᑭᓯᐊᓂ ᐱᑖᕋᓲᑎᐅᔪᖅ ᓇᓗᓇᐃᖅᑕᐅᑦᑎᐊᒻᒪᕆᓚᐅᖅᑎᓪᓗᒍ ᐅᕝᕙᓘᓐᓃᑦ ᑮᓇᐅᔭᖅᑖᕋᓲᑎᒃ ᐋᖅᑭᒃᑕᐅᓚᐅᖅᑎᓪᓗᒍ ᐊᒻᒪᓗ ᐱᑕᖃᓕᕈᓂ ᐱᓇᓱᒍᑎᐅᔪᓐᓇᖅᑐᒥᒃ,” ᑰᐳ ᐅᖃᖅᑐᖅ.
“ᑕᑯᓯᒪᔪᐃᓐᓇᐅᒐᑦᑕ ᐊᔾᔨᓕᐅᖅᑕᐅᓯᒪᓂᑯᓂᒃ ᖃᓄᐃᓕᐅᕈᑎᕕᓂᕐᓂᒃ ᐅᕙᓂ ᐃᖃᓗᖕᓂ ᐊᒻᒪ ᑭᖓᓂ,” ᐅᖃᖅᑐᖅ. “ᑕᐃᒪᓕ ᐃᒪᓐᓇ ᐅᖃᕈᓐᓇᑐᐃᓐᓇᖅᑐᖓ ᐅᑯᐊ ᐃᓚᐃᓐᓇᓪᓚᑯᓗᑐᐃᓐᓇᖏᑦ.”
“ᑐᓴᖃᑦᑕᖅᓯᒪᒐᒪ ᐊᒻᒪ ᐱᓕᕆᖃᑎᒋᕙᒃᑕᒃᑲ ᑕᒪᒃᑯᓂᖓ ᖃᓄᐃᓕᐅᕈᓘᔭᕈᑎᐅᕙᒃᑐᓂᒃ ᐊᕐᕌᒍᒐᓴᒻᒪᕆᐅᓕᖅᑐᓂᒃ ᐊᒻᒪᓗ ᐃᓱᒪᓪᓗᖓ ᐱᓕᕆᐊᖃᕐᓂᐊᕆᐊᒃᓴᑦᑎᓐᓂᒃ ᐅᓄᖅᑐᒻᒪᕆᐊᓗᖕᓂᒃ ᐃᖃᖅᑐᐃᕕᒃᑰᖅᑎᑦᑎᔪᒪᔪᓂ ᓄᓇᕗᑐᐊᒥᓐ.”
ᐸᓯᔭᒃᓴᙳᖅᑎᑦᑎᓂᑯ ᓯᕗᓪᓕᖅ, ᔫ ᑕᐃᕕᑦ ᓇᓱᒐᓗᐊᒃ, ᐅᕙᓂ ᓄᓇᖃᖅᑐᖅ ᑐᒃᑐᔭᖅᑐᕐᒥᐅᑕᖅ, ᓄᓇᑦᓯᐊᖅᒥ. ᐅᖃᓚᐅᕐᓯᒪᖕᒪᓐ 15-ᓂ ᐊᕐᕌᒍᖃᖅᑎᓪᓗᒍ ᑎᒍᔭᐅᓚᐅᖅᓯᒪᓂᕋᖅᖢᓂ ᐊᒻᒪᓗ ᑖᒃᑯᓄᖓ ᐸᓖᓯᓄᑦ ᐋᓐᓂᖅᓱᖅᑕᐅᓐᓂᖅᖢᓂ ᑎᒍᓯᓇᓱᒃᑎᓪᓗᒋᑦ ᐊᒻᒪᓗ ᑎᒍᔭᐅᓯᒪᓕᖅᖢᓂ.
ᓇᓱᒐᓗᐊᒃ ᓈᒻᒪᙱᓕᐅᕈᑎᖃᖅᑎᑕᐅᓂᕐᒧᑦ $600,000-ᓂ ᑮᓇᐅᔭᖅᑖᕋᓱᒃᑐᖅ
ᐃᓚᒋᔭᐅᔪᖅ ᐸᓯᔭᒃᓴᙳᖅᑎᑦᑎᔪᓂᒃ, ᕗᐃᓕ ᐊᒡᓘᑲᖅ, ᐊᓪᓚᐅᓪᓗᓂ ᑕᓃ ᐱᕈᕐᓂᑯ ᑎᒍᐊᕆᔭᐅᓪᓗᓂ ᐅᖅᓱᖅᑑᖅᒥ. 2019-ᒥᑦ ᐸᓯᔭᒃᓴᐅᔾᔪᑎᒃᓴᓕᕆᑎᓪᓗᒍ, ᐊᒡᓘᒃᑲᖅ ᐃᖅᑲᐅᒪᔪᖅ ᖃᔅᓰᕈᓘᔭᒻᒪᕆᒃᖢᓂ ᓄᓇᕗᒥᑦ ᐸᓖᓯᒃᑯᓐᓄᑦ ᐱᑦᑎᐊᖅᑕᐅᙱᔾᔪᐊᖅᓯᒪᓂᖓᓂᒃ.
“ᐸᓖᓯᓄᑦ ᐋᓐᓂᕐᓱᖅᑕᐅᖃᑦᑕᖅᓯᒪᒐᒪ ᓲᕐᓗ ᐅᓄᖅᑐᐃᖅᓱᓗᐊᒧᑦ ᓇᓗᓇᖅᓯᔪᑦ,” ᐊᒡᓘᒃᑲᖅ ᑎᑎᕋᖅᑐᖅ, ᐅᖃᖅᖢᓂ ᓯᕗᓪᓕᖅᐹᒥ ᐋᓐᓂᖅᑕᐅᓚᐅᖅᓯᒪᓂᕋᖅᑐᖅ 11-ᓂ ᐊᕐᕌᒍᖃᖅᑎᓪᓗᒍ.
ᐊᒡᓘᒃᑲᖅ ᐃᖅᑲᐅᒪᖕᒥᔪᖅ 1990-ᒥᑦ ᐅᖅᓱᖅᑑᒥ ᕼᐋᑭᖅᑐᓂ ᐱᖃᓐᓇᕆᔭᖓᓗ ᐅᐸᒃᓯᒪᑎᓪᓗᒋᑦ ᐸᓖᓯᓄᑦ ᑖᒃᑯᐊᒃ ᑎᒍᔭᐅᓪᓗᑎᒃ.
“ᓈᒻᒪᙱᑦᑐᒥ ᐱᓕᕆᓚᐅᖅᓯᒪᙱᑦᑐᖓ ᐊᒻᒪᓗ ᐅᖃᐅᑎᙱᖢᓂᖓ ᖃᓄᐃᒻᒪ ᑎᒍᔭᐅᔭᕆᐊᒃᓴᕐᓂᓐ,” ᐊᒡᓘᒃᑲᖅ ᐅᖃᖅᑐᖅ. “ᑎᒍᒐᒥᖓ ᑖᒃᑯᐊ ᐊᒃᑐᐊᓗᐊᒧᑦ ᐊᒡᒐᐅᑎᒃᑲ ᓱᙴᔭᓕᖅᐸᓵᖅᖢᑎᒃ.”
ᐊᒡᓘᒃᑲᖅ ᐅᖃᓚᐅᖅᑐᖅ ᐸᓖᓯᓄᑦ ᑎᒍᔭᐅᓯᒪᓂᕋᖅᖢᓂ ᐅᓐᓄᐊᓕᒫᖅ, ᑕᕝᕙᓂᓗ ᐸᓖᓯᓄᑦ ᐋᓐᓂᖅᓱᖅᑕᐅᖏᓐᓈᓗᒃᖢᓂ ᐊᒻᒪ ᖁᖓᓯᐊᒍᑦ ᑖᖅᑎᑲᓴᒃᐸᓵᖅᖢᓂ.
“ᐊᒃᓱᐊᓗᒃ ᑲᑉᐱᐊᓇᓚᐅᖅᓯᒪᔪᖅ ᐊᒻᒪᓗ ᓈᒻᒪᙱᓪᓛᓗᒃᖢᓂ ᐅᕙᓐᓄ,” ᑎᑎᕋᖅᑐᖅ. “ᐅᒃᐱᕈᓱᒃᑲᒪᓕ ᐸᓖᓯᒃᑯᓐᓂ ᑕᐃᒪᐃᑕᐅᓯᒪᓗᐊᕆᐊᒃᓴᓐᓂᒃ ᓄᓇᖃᖅᑳᖅᓯᒪᓂᓐᓄᑦ.”
ᒪᒃᕖ ᓇᓗᓇᐃᖅᓯᓚᐅᖅᑐᖅ ᑖᒃᑯᐊ ᐸᓖᓯᒃᑯᓐᓂᒃ ᐃᖃᖅᑐᐃᕕᒃᑰᖅᑎᑦᑎᔪᑦ ᓄᓇᖃᖅᑳᖅᓯᒪᔪᑦ ᐊᒻᒪ ᐃᓅᓂᑰᓪᓗᑎᒃ ᑎᓯᐱᕆ 18, 2016 ᑐᖔᓂᒃ, ᐊᒻᒪᓗ ᐸᓖᓯᒃᑯᓐᓄᑦ ᖃᓄᐃᓕᐅᖅᑕᐅᕈᓘᔭᖅᓯᒪᓂᕋᖅᖢᑎᒃ ᑎᒍᔭᐅᓯᒪᓂᖏᓐᓂᒃ ᐅᕝᕙᓘᓐᓃᑦ ᑎᒍᔭᐅᓯᒪᑎᓪᓗᒋᑦ ᑎᐅᕆᑑᕆᓂᒃ.
ᓇᓱᒐᓗᐊᒃ ᓄᑕᕋᐅᓗᐊᓚᐅᖅᓯᒪᔪᖅ ᓯᕗᓪᓕᖅᐹᒥ ᐸᓖᓯᒃᑯᓐᓂ ᐃᖃᖅᑐᐃᕕᒃᑰᖅᑎᑦᑎᓇᓱᒃᑎᓪᓗᒍ 2018-ᒥᑦ, ᑕᐃᒪᐃᓐᓂᖓᓄᓪᓗ ᐊᓈᓇᖓ ᐸᖅᑭᔨᐅᓂᕐᒧᑦ ᐱᓕᕆᐊᖃᓕᖅᖢᓂ. ᒫᓐᓇᓕ ᐊᕐᕌᒍᖏᑦᑎᒍᑦ ᐃᓐᓇᐅᓕᕐᓂᖓᓄᑦ, ᓇᓱᒐᓗᐊᒃ ᐃᖃᖅᑐᐃᕕᒃᑯᓐᓄᑦ ᐊᖏᖅᑕᐅᔭᕆᐊᖃᓕᖅᑐᖅ ᐊᑎᖃᖃᑕᐅᔪᒪᒍᓂ ᐃᖃᖅᑐᐃᕕᒃᑰᖅᑎᑦᑎᔪᓂᒃ.
(0) Comments