ᐅᓄᙱᓗᐊᖅᑐᑦ ᓂᕈᐊᕆᐊᖅᐸᒃᑐᑦ ‘ᐊᒃᓱᕈᕐᓇᐃᓐᓇᐅᔭᕐᒪᑦ,’ ᐅᖃᖅᑐᖅ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᖓᔪᖅᑳᖓ

ᐊᕐᕌᒎᕋᑖᖅᑐᒥᓐ ᐃᓄᐃᑦ ᑲᑐᔾᔨᖃᑎᒌᖏᑦ ᓂᕈᐊᕐᓇᐅᑎᑦᑎᑲᑕᒃᑎᓪᓗᒋ ᓂᕈᐊᕆᐊᖅᐸᒃᑐᑦ ᓇᓕᐊᓐᓄᑦ 20 ᐳᓴᓐᑎᐅᑉ ᐅᖓᑖᓅᓚᐅᙱᑦᑐᑦ ᓂᕈᐊᕆᐊᖅᐸᒃᑐᑦ

ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᖓᔪᖅᑳᖓ ᑯᓄ ᑕᑦᑐᐃᓂ ᐅᖃᓚᐅᕐᑐᖅ ᐅᖃᓪᓚᖃᑎᒌᖕᓂᕐᒥ ᐱᒋᐊᖅᑎᑦᑎᔪᒪᓂᕋᖅᖢᓂ ᐱᐅᓯᕚᓪᓕᖅᑎᑦᑎᔪᒪᓂᕐᒥᒃ ᓄᓇᕗᒥᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᓂᕈᐊᕐᓇᐅᑎᓪᓗᒍ ᐅᐸᖃᑦᑕᙱᓗᐊᕐᓂᖏᓐᓄᑦ. (ᐊᔾᔨᓕᐅᕆᔨ ᔨᒻ ᐱᐊᓪ)

By ᑕᐃᕕᑦ ᕕᐊᓐ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For an English version of this story, see Low voter turnout a ‘constant struggle,’ says Kivalliq Inuit Association president

ᐃᒪᐃᒃᑲᓗᐊᖅᑎᓪᓗᒍ “ᐊᒃᓱᕈᕐᓇᐃᓐᓇᐅᔭᖅᖢᓂ” ᐃᓄᖕᓂ ᓂᕈᐊᖅᑎᑦᑎᓂᕐᒥᒃ, ᐅᓇ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᖓᔪᖅᑳᖓ ᐅᖃᓚᐅᖅᑐᖅ ᑭᖑᓪᓕᕐᒥ ᓂᕈᐊᕐᓇᐅᓂᐊᖅᑐᒥᑦ ᐅᓄᕐᓂᕐᓴᓂᒃ ᓂᕈᐊᕆᐊᖅᑐᖃᕐᓂᐊᕐᓂᖓᓂᒃ ᐊᕐᕌᓂᓕ ᓂᕈᐊᕐᓂᐅᓚᐅᕐᑐᓂᒃ, ᑖᒃᑯᐊᓕ 20 ᐳᓴᓐᑎᐅᑉ ᑐᙶᓃᑲᑕᒃᖢᑎ ᓂᕈᐊᕈᓐᓇᖅᑐᑦ ᓂᕈᐊᕆᐊᖅᑐᖅᑎᓪᓗᒋᑦ.

ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᓂᕈᐊᕐᓂᕐᓴᖓᑦ ᐊᖓᔪᖅᑳᒧᑦ ᑐᒡᓕᒃᓴᒥ ᐋᖅᑭᒃᑕᐅᓯᒪᔪᖅ ᐄᐳᕈᓪ 12-ᒧᑦ ᐊᒻᒪᓗ 6-ᓂᒃ ᓂᕈᐊᒐᒃᓴᖅᑕᖃᖅᖢᓂ.

ᑯᓄ ᑕᑦᑐᐃᓂ, ᓂᕈᐊᕆᔭᐅᓚᐅᕐᓯᒪᔪᖅ ᐊᖓᔪᖅᑳᒧᑦ 31 ᐳᓴᓐᑎᓄᑦ ᓂᕈᐊᕆᐊᖅᑐᖅᑎᓪᓗᒋᑦ 2019-ᒥᑦ, ᐅᖃᓚᐅᕐᑐᖅ ᐅᓄᕐᓂᕐᓴᓂ ᓂᕈᐊᕆᐊᖅᑐᖃᓛᕐᓂᖓᓂᒃ ᑭᖑᓪᓕᐅᓂᐊᕐᑐᒥ ᐱᔾᔪᑎᖃᖅᖢᑎᒃ ᐅᓄᕐᓂᕐᓴᐃᑦ ᐱᓇᓱᖕᓂᖏᓐᓄᑦ ᓂᕈᐊᕈᒪᔪᓂ ᐱᓇᓱᒍᑎᐅᒃᑲᓐᓂᕐᓂᐊᕐᓂᖓᓂᒃ.

“ᐃᓱᒪᔪᖓᓕ ᑕᒪᑐᒪᓂᐅᓂᐊᕐᑐᖅ ᓂᕆᐅᒋᔭᖃᕐᓂᕐᓴᐅᓪᓗᑕ ᐋᓐᓂᐊᕕᒡᔪᐊᕐᓇᖅᑕᖃᕋᓗᐊᖅᑎᓪᓗᒍ,” ᑕᑦᑐᐃᓂ ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ, ᐅᖃᒃᑲᓐᓂᖅᖢᓂ ᐅᖃᐅᓯᖃᕐᓂᐊᕐᓂᕋᖅᖢᓂ ᓄᓇᕗᑦ ᑐᙵᕕᒃᑯᑦ ᑲᑎᒪᔨᖏᑦ ᑲᑎᒪᓕᖅᐸᑕ ᑕᒪᑐᒥᖓ ᓂᕈᐊᕐᓇᒥ ᐅᓄᕐᓯᕚᓪᓕᖅᑎᑦᑎᒋᐊᖃᕐᓂᕐᒥᒃ.

ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᓂᕈᐊᕆᐊᖅᑐᖅᐸᒃᑐᑦ ᐅᓄᙱᓐᓂᕆᕙᒃᑕᖏᑦ ᓄᑖᙳᙱᑦᑐᖅ.

ᐅᕙᓃᓪᖢᓂ 17.5 ᐳᓴᓐᑎᒥᓐ, ᓄᓇᕗᑦ ᑐᙵᕕᒃᑯᑦ ᕕᕝᕗᐊᕆᒥ ᐊᖓᔪᖅᑳᒧᑦ ᓂᕈᐊᕐᓇᐅᓚᐅᕐᑐᒥ ᐊᑦᑎᖕᓂᖅᐹᖑᓯᒪᕗᖅ ᑕᐃᒪᙵᑦ ᑲᑐᔾᔨᖃᑎᒌᑦ ᐱᒋᐊᓚᐅᕐᓯᒪᑎᓪᓗᒋᑦ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏ   2020-ᒥᑦ ᓂᕈᐊᕐᓇᖃᖅᑎᓪᓗᒋᑦ ᐊᖓᔪᖅᑳᑉ ᑐᒡᓕᒃᓴᖓᓄᑦ ᓂᕈᐊᕆᐊᖅᑐᖅᑐᑦ 14.27 ᐳᓴᓐᑎᐅᓚᐅᕐᓯᒪᔪᖅ, ᐊᒻᒪᓗ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ 2019-ᒥᑦ ᓂᕈᐊᕐᓇᐅᑎᓪᓗᒍ ᐊᖓᔪᖅᑳᑉ ᑐᒡᓕᖓᓄᑦ 14 ᐳᓴᓐᑎᖏᑦ ᓂᕈᐊᕈᓐᓇᖅᑐᓂᒃ ᓂᕈᐊᕆᐊᖅᑐᖅᖢᑎᒃ.

ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᖃᓚᐅᕐᑐᖅ “ᐃᓱᒫᓘᑎᖃᕐᓂᕋᖅᖢᓂ” ᑕᒪᑐᒧᖓ, ᑭᓯᐊᓂᓕ ᐅᒃᐱᕈᓱᒃᑐᖅ ᑕᒪᑐᒪᓂ ᐊᕐᕌᒍᒥ ᓂᕈᐊᕐᓇᐅᓚᐅᕐᑐᒥᓐ ᐊᒃᑐᐊᓂᖃᓗᐊᓚᐅᕐᓂᖓᓂᒃ ᐋᓐᓂᐊᕕᒡᔪᐊᕐᓇᖅᒧᑦ ᐊᒻᒪᓗ ᑭᖑᕙᕆᐊᖅᑕᐅᓯᒪᓂᖓᓄᑦ ᓂᕈᐊᕐᓇᖅ.

“ᖃᐅᔨᒪᔪᖓᓕ ᓇᓗᓇᖅᑐᖅᑕᖃᐅᖅᑎᓪᓗᒍ ᐊᒻᒪᓗ ᐃᓲᒫᓘᑎᖃᖅᑎᓪᓗᒋᑦ ᐋᓐᓂᐊᖃᖅᑕᐃᓕᓂᕐᒥᒃ ᐊᒻᒪ ᖃᓄᐃᑎᑦᑎᑦᑕᐃᓕᑎᑦᑎᓂᖅᒥᒃ, ᐅᓄᕐᑐᑦ ᐃᓄᐃᑦ ᓂᕈᐊᕆᐊᖅᑐᙱᔾᔪᑎᖃᓚᐅᕐᓂᖏᓐᓂᒃ ᐅᓗᕆᐊᓱᖕᓂᕐᒧᑦ,” ᐅᖃᖅᑐᖅ.

ᐋᓐᓂᐊᕕᒡᔪᐊᕐᓇᖅᑕᖃᙱᒃᑲᓗᐊᖅᑎᓪᓗᒍᓕ, ᓄᓇᕗᑦ ᑐᙵᕕᒃᑯᑦ ᓂᕈᐊᒐᒃᓴᖃᖅᑎᓪᓗᒋᑦ ᑕᐃᒪᙵᐅᓚᐅᕐᑐᖅ 2008-ᒥᑦ ᓂᕈᐊᕆᐊᖅᑐᖅᐸᒃᑐᑦ ᓱᓕ ᑎᑭᐅᑎᓚᐅᙱᑦᑐᑦ 35 ᐳᓴᓐᑎᖏᓐᓄᑦ ᓂᕈᐊᕈᓐᓇᕐᒥᒃ ᓂᕈᐊᖃᑦᑕᖅᑐᑦ.

ᐊᔮᔮ ᓂᐅᕐᕈᑎᒃᓴᓕᕆᔨᒃᑯᑦ ᐊᒻᒪ ᑐᓴᐅᒪᑎᑦᑎᓕᕆᔨᒃᑯᑦ ᓂᕈᐊᒐᒃᓴᓂ ᐊᐅᓚᑦᑎᕙᒃᑐᑦ ᑕᒪᐃᓐᓄᑦ ᐱᖓᓱᓂ ᐊᕕᒃᑐᖅᓯᒪᓂᒃᑯᑦ ᑲᑐᔾᔨᖃᑎᒌᓄᑦ ᐊᒻᒪᓗ ᓄᓇᕗᑦ ᑐᙵᕕᒃᑯᓐᓄᑦ. ᐅᓇ ᐱᓕᕆᐊᒃᑯᑦ ᐊᒃᑐᐊᔪᖅ ᓄᐊᑕᒃᔅᒧᑦ, ᑖᓐᓇᑦᑕᐅᖅ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᐱᓕᕆᔨᐅᓪᓗᓂ.

ᐊᐅᓚᑦᑎᒋᔭᐅᔪᖅ ᑐᑭᒧᐊᖅᑎᑦᑎᔨ ᓈᑎᐊ ᓯᑰᓂ ᐅᖃᓚᐅᖅᑐᖅ ᑲᑐᔾᔨᖃᑎᒌᖑᔪᑦ, ᐃᓚᒋᔭᐅᓪᓗᓂ ᐊᔮᔮ, ᒪᑐᐃᕐᓯᑲᑕᒃᓯᒪᖕᒪᑕ ᓂᕈᐊᕐᓇᒧᑦ ᐊᑐᖅᑕᐅᔪᓐᓇᕋᔭᖅᑐᓂᒃ ᒪᑯᑎᑐᓇᖅ ᑎᑎᖃᒃᑯᕕᒃᑯᑦ ᓂᕈᐊᕈᓐᓇᕐᓂᕐᒥᒃ ᐊᒻᒪᓗ ᐊᒡᔭᒃᓯᕕᐅᓂᒃᑯᑦ ᐊᐃᔭᐅᓂᐊᖅᑐᒥᑦ ᓂᕈᐊᕈᓐᓇᕐᓂᕐᒥᒃ, ᓲᕐᓗ ᓂᕈᐊᖅᑎᐅᔪᖅ ᑎᑎᕐᓯᐊᓪᓚᓚᐅᕐᓗᓂ ᐊᐃᔭᐅᓂᐊᓕᕐᓗᓂ ᐊᒡᔭᖅᓯᖅᑲᐅᔪᒧᑦ.

ᑖᓐᓇᓕ ᑭᖑᓪᓕᖅ ᐊᑐᖅᑕᐅᓂᕐᓴᐅᓚᐅᕐᑐᖅ ᐊᕐᕕᐊᓂᒃ ᓄᓇᕗᑦ ᑐᙵᕕᒃᑯᓐᓄᑦ ᓂᕈᐊᕐᓇᐅᑎᓪᓗᒍ ᐅᓗᕆᐊᓇᖅᑐᒦᖁᙱᖢᒍ ᓂᕈᐊᕐᓇᖅ, ᐅᖃᓚᐅᕐᑐᖅ ᓯᑰᓂ.

“ᐱᓇᓱᖕᒥᔪᒍᑦ ᓂᕈᐊᕐᓇᐅᑎᓪᓗᒍ ᓇᐅᒃᑯᑦ ᐱᔪᓐᓇᕐᓂᒃᑯᑦ ᓂᕈᐊᕈᓐᓇᖅᑎᑦᑎᓇᓱᒃᖢᑕ,” ᓯᑰᓂ ᐅᖃᖅᑐᖅ, ᐅᖃᒃᑲᓐᓂᖅᖢᓂ ᐊᑐᐃᓐᓇᐅᔪᓐᓇᖅᑐᑦ ᐅᓄᕐᓯᕙᓪᓕᐊᔪᑦ ᓂᕈᐊᕈᑎᐅᔪᓐᓇᖅᑐᓄᑦ ᐅᓄᕐᓂᕐᓴᓂ ᓂᕈᐊᕈᓐᓇᖅᑐᓂᒃ ᐊᑐᖅᑕᐅᔪᓐᓇᕐᓗᑎᒃ.

ᑕᒪᐃᓐᓂ ᕿᑭᖅᑕᓂ ᐊᒻᒪ ᑭᕙᓪᓕᖅᒥᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᓚᐅᑦᑐᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐱᓕᕆᐊᖃᙱᓐᓂᖏᓐᓂᒃ ᖃᓄᖅ ᓂᕈᐊᕈᓐᓇᖅᑐᓂᒃ ᐃᓚᐅᑎᑦᑎᒃᑲᓐᓂᕈᑎᐅᔪᓐᓇᖅᑐᓂᒃ ᐊᒻᒪᓗ ᐅᓄᕐᓯᕚᓪᓕᖅᑎᑦᑎᒍᑎᐅᔪᓐᓇᖅᑐᓂᒃ ᓂᕈᐊᕆᐊᖅᑐᖅᑐᓂᒃ. ᓄᓇᕗᑦ ᑐᙵᕕᒃᑯᑦ ᐅᖃᓚᐅᙱᑦᑐᑦ ᐱᖃᕆᐊᓴᖏᓐᓂᒃ ᐋᒃᑲᓘᓐᓃᑦ ᓂᕈᐊᕈᓐᓇᖅᑐᓕᕆᓂᕐᒧᑦ ᐱᓕᕆᐊᒃᓴᓂᒃ.

ᕗᕋᑦ ᐱᐊᑐᓴᓐ, ᑐᑭᒧᐊᖅᑎᑦᑎᔨ ᐸᕐᓇᐅᑎᓄᑦ ᐊᒻᒪ ᑐᓴᐅᒪᔾᔪᑎᓕᕆᓂᕐᒧᑦ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ, ᐅᖃᓚᐅᕐᑐᖅ ᑖᒃᑯᐊ ᑲᑐᔾᔨᖃᑎᒌᖑᔪᑦ ᐅᖃᓪᓚᖃᑦᑕᓚᐅᕐᓂᖏᓐᓂᒃ ᐃᓕᓐᓂᐊᕐᕕᖕᓂᒃ, ᑭᓯᐊᓂᓕ ᑕᒪᓐᓇ ᐊᔪᕐᓇᕐᓂᕐᓴᐅᓕᕐᒥᔪᖅ ᐊᖏᖅᑕᐅᓇᓱᒋᐊᖃᕐᓇᕐᓂᖓᓂᒃ ᓄᓇᕗᒥᑦ, ᐅᑯᓇᙵᐅᙱᑦᑐᑦ ᓄᓇᓕᖕᓂ ᐃᓕᓐᓂᐊᖅᑐᓕᕆᔨᓂᒃ.

“ᑐᓴᖃᑦᑕᕐᓯᒪᒐᑦᑕ ᐋᑐᕚᒧᑦ ᐃᓕᓐᓂᐊᕆᐊᖅᑐᓂᒃ [ᓄᓇᕗᑦ ᓯᕗᓂᒃᓴᕗᑦᒧᑦ] ᐃᒪᓐᓇ ᐊᐃᑦᑖᕈᓱᒃᑐᓂᒃ ᐃᓕᓐᓂᐊᖅᑎᑕᐅᓚᐅᙱᒻᒪᑕ ᓄᓇᕗᒧᑦ ᐊᖏᕈᑎᒥᑦ ᐃᓕᓐᓂᐊᕐᕕᐊᓗᖕᒥ ᓄᓇᖓᓂ,” ᑎᑎᕋᓚᐅᕐᑐᖅ ᐱᐊᑐᓴᓐ ᖃᕋᓴᐅᔭᒃᑯᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᑰᑦᑎᖅ ᐊᒻᒪ ᐱᐊᑐᓴᓐ ᐅᖃᓚᐅᕐᑑᒃ ᐅᑯᐊ ᐃᓄᐃᑦ ᑲᑐᔾᔨᖃᑎᒌᖏᑦ ᐱᓕᕆᐊᖃᕆᐊᖃᕐᓂᖏᓐᓂᒃ ᓂᕈᐊᕈᓐᓇᖅᑐᓂᒃ ᖃᐅᔨᒪᑎᑦᑎᓂᕐᒥᒃ.

“ᐃᓱᒪᔪᖓᓕ ᐱᓕᕆᐊᖃᒃᑲᓐᓂᕆᐊᖃᕐᓂᖏᓐᓂᒃ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐃᓄᖕᓂᒃ, ᑖᒃᑯᐊ ᐃᓄᐃᑦ ᖃᐅᔨᒪᓂᕐᓴᐅᓂᐊᕐᒪᑕ ᐱᒻᒪᕆᐊᓘᓂᖓᓂᒃ ᓂᕈᐊᕐᓂᖅ ᓯᕗᓕᐅᖅᑎᒃᓴᖓᓂᒃ,” ᑰᑦᑎᖅ ᐅᖃᖅᑐᖅ.

Share This Story

(0) Comments

Join the Conversation

Your email address will not be published. Required fields are marked *

*