‘ᐅᓇᑕᕈᓐᓃᓚᐅᕐᓂ ᒫᓐᓇ,’ ᑲᑎᕐᖓᔪᑦ ᐅᖃᖃᑕᒃᑐᑦ ᐊᐃᑉᐸᖓᓂ ᑲᑎᖃᑎᒌᒃᖢᑎᒃ ᒑᔭᒧᑦ

For English version, see ‘We are all Palestinian’: 2nd Iqaluit rally calls for Gaza ceasefire

ᐃᖃᓗᖕᓂ ᐃᓄᐃᑦ ᐊᐃᑉᐸᖓᓂ ᑲᑎᖃᑎᒌᓚᐅᕐᑐᑦ ᔭᓄᐊᕆ 6-ᖑᑎᓪᓗᒍ ᐅᓇᑕᖅᑐᓂᒃ ᓄᖅᑲᖁᔨᓪᓗᑎ ᒑᔭᒥ ᐅᑯᓂᖓ ᐃᔅᕋᐃᓕ ᐊᒻᒪ ᕼᐊᒫᔅᑯᓐᓂᒃ ᑖᒃᑯᐊ ᐱᖓᓱᓂ ᑕᖅᑭᕐᓂ ᐅᓇᑕᓕᖅᑎᓪᓗᒋ.

ᑲᑎᑦᑐᑦ 17-ᖑᓚᐅᕐᑐᑦ ᐅᕙᓂ ᑎᓴᒪᓂ ᑎᕆᖁᓕᒃᒥ, ᐱᓱᓚᐅᕐᑐᑦ ᒪᓕᒐᓕᕆᕕᒡᔪᐊᖅᒧᑦ, ᐊᒻᒪ ᐅᑎᖅᖢᑎᒃ ᑕᒪᐅᖓ ᓄᓇᓯᐅᑎᓂᓪᓗ ᓄᖃᖓᑎᑦᑎᓚᐅᑲᒃᖢᑎᒃ 1 ᒥᓂᑦᓗᐊᕐᒥ.

ᐅᖃᑲᑕᓚᐅᕐᑐᑦ ᒪᑯᓂᖓ ᐃᓚᖃᖅᖢᑎᒃ “ᐅᓇᑕᕈᓐᓃᓚᐅᕐᓕ ᒫᓐᓇ” ᐊᒻᒪᓗ “ᑕᒪᑦᑕᑦᑎᐊᖅ ᐹᓕᔅᑏᓂᐊᓐᖑᔪᒍᑦ.”

“ᐅᓪᓗᒥ ᐅᕙᓃᓐᓇᑦᑕ ᐅᔾᔨᕈᓱᓕᖅᑎᑦᑎᓇᓱᒃᖢᑎ ᓄᓇᕗᒥ, ᐃᖃᓗᓂᓪᓗ, ᑭᓯᐊᓂᓕᑦᑕᐅᖅ ᐃᑲᔪᖅᑐᐃᓇᓱᒃᖢᑕ ᐹᓕᔅᑏᓂᐊᓐᓂ, ᐊᒻᒪᓗ ᑕᐃᒪᐃᓕᐅᕐᓂᐊᖅᖢᑕ ᑭᓯᐊᓂ ᐅᓇᑕᕈᓐᓃᖅᐸᑕ,” ᐅᖃᕐᑐᖅ ᔭᓂᕗ ᓖᓐ, ᐃᓚᒋᔭᐅᔪᖅ ᑲᑎᖃᑎᒌᒃᑐᓂᒃ.

ᒫᓐᓇ ᐅᓇᑕᖅᑐᐊᓗᐃᑦ ᒑᔭᒥ ᐱᒋᐊᓚᐅᕐᓯᒪᖕᒪᑦ ᐅᒃᑑᐱᕆ 7-ᐅᑎᓪᓗᒍ ᐅᑯᐊ ᕼᐋᒪᔅ — ᒑᔭᒦᑦᑐᑦ ᐅᓇᑕᖅᑐᒃᓴᑦ ᑲᓇᑕᐅᑉ ᒐᕙᒪᖓᑕ ᐅᖃᐅᓯᕆᓯᒪᔭᖓ ᑲᑉᐱᐊᓵᕆᔨᐅᓂᕋᖅᑕᐅᓪᓗᑎᒃ — ᐅᓇᑕᓯᓚᐅᕐᓯᒪᖕᒪᑕ ᐃᔅᕋᐃᓕᐅᑉ ᓂᒋᐊᑕ ᐱᖓᖕᓇᖅᐸᓯᐊᓃᑦᑐᓂᒃ.

ᒫᓂ 1,200 ᐃᓄᐃᑦ ᑐᖁᑕᐅᓚᐅᕐᓯᒪᔪᑦ ᐱᒋᐊᓕᓵᖅᑎᓪᓗᒋ ᐊᒻᒪᓗ 250-ᖏᓐᓂ ᑎᒍᓯᑐᐃᓐᓇᖅᖢᑎᒃ ᐃᓄᖕᓂ.

ᐊᑭᒋᐊᓕᓚᐅᕐᓯᒪᓂᖏᓐᓄᑦ ᐃᔅᕋᐃᓕ ᐅᓇᑕᓕᓚᐅᕐᓯᒪᔪᑦ ᕼᐋᒪᔅᒥ.

ᑭᓯᐊᓂᓕ ᐅᑯᐊ ᐃᔅᕋᐃᓕᒃᑯᑦ ᐅᓇᑕᖅᑐᒃᓴᖏ ᑐᖂᑦᑎᓇᓱᒋᔭᐅᓚᐅᕐᑐᑦ 22,600 ᔭᓄᐊᕆ 5 ᑎᑭᑎᓪᓗᒍ, ᑖᓐᓇᓗ ᐅᖃᐅᓯᐅᓚᐅᖅᖢᓂ ᔫᓇᐃᑕᑦ ᓇᐃᓴᓐᔅᑯᓐᓂ ᐊᒻᒪ ᐃᓂᖃᕈᓐᓃᖅᑎᑦᑎᔾᔪᑎᐅᓪᓗᓂ 1.9 ᒥᓕᐊᓐᓂ ᐃᓄᖕᓂ ᑖᒃᑯᐊᓕ 85 ᐳᓴᓐᑎᖏᓐᓃᖢᑎᒃ ᒑᔭᐅ ᐃᓄᖏᓐᓂᒃ

ᒫᑎᓐ ᒍᕆᕕᑦᔅ, ᔫᓇᐃᑕᑦ ᓇᐃᓴᓐᔅᑯᓐᓄ ᑐᐊᕕᕐᓇᖅᑐᓕᕆᓂᕐᒧᑦ ᑐᑭᒧᐊᖅᑎᑦᑎᔨᒋᔭᐅᔪᖅ, ᐅᖃᓚᐅᕐᑐ ᔭᓄᐊᕆ 5 “ᒑᔭ ᑐᖁᖓᔪᓄᑦ ᐊᒻᒪ ᖁᕕᐊᓇᙱᓐᓂᕐᒧᑦ ᐃᓂᒋᔭᐅᓕᕐᑐᖅ” ᑳᖕᓂᐊᓗᖃᓕᖅᑎᓪᓗᒋ ᐊᒻᒪ ᐋᓐᓂᐊᖅᑖᖅᐸᓪᓕᐊᑎᓪᓗᒋᑦ ᐃᑲᔪᖅᑕᐅᙱᓗᐊᕐᓂᖏᓐᓄᑦ.

ᑎᓯᐱᕆᒥ ᑲᓇᑕ 153-ᓂ ᓄᓇᓕᕐᔪᐊᕐᓂ ᐃᓚᒋᔭᐅᓚᐅᕐᑐᖅ ᓂᕈᐊᖅᑐᓂ ᐅᑯᐊ ᔫᓇᐃᑕᑦ ᓇᐃᓴᓐᑯ “ᐅᓇᑕᕈᓐᓃᖅᑎᑦᑎᖁᔨᔪᑦ ᐃᓄᖏᑦ ᐃᓱᒪᒋᓗᒋ”.

ᐃᖃᓗᖕᓂ ᐃᓄᐃᑦ ᓈᒻᒪᒃᓴᖅᓯᒪᙱᑦᑐᑦ ᑲᑎᓚᐅᕐᑐᖅ ᑎᓴᒪᓂ ᑎᕆᖁᓕᒃᒥ ᔭᓄᐊᕆ 6-ᖑᑎᓪᓗᒍ ᐅᓇᑕᖅᑐᐊᓗᖕᓂ ᒑᔭᒥ ᓄᖃᖁᔨᓪᓗᑎᒃ. ᐊᔾᔨᓕᐅᕆᔨ ᔨᐊᕝ ᐱᐊᑦᓯᐄ)

ᑲᑎᑲᑕᒃᑐᑦ ᓄᓇᓕᖕᔪᐊᕐᓂ ᓄᓇᕐᔪᐊᓕᒫᒥ ᓄᖅᑲᖁᔨᔪᓂ ᐅᓇᑕᖅᑐᓂᒃ ᐊᒻᒪᓗ ᐃᔅᕋᐃᓕ ᐅᐸᒃᓯᒪᓇᓱᒃᑕᖓᓂ ᕿᒪᐃᖁᔨᓪᓗᑎᒃ ᐅᕙᓂ ᒑᔭ ᓯᑐᕆᑉᖑᓂᕋᖅᑕᒥ, ᐅᑯᓄᖓ ᔫᓇᐃᑕᑦ ᓇᐃᓴᓐᔅᑯᓐᓄᑦ ᐅᖃᐅᓯᐅᓯᒪᔪᖅ “ᓴᖅᑭᔮᖅᑐᒥ ᑎᒍᓯᓯᒪᕝᕕ” 2022-ᖑᑎᓪᓗᒍ.

ᐃᖃᓗᖕᓂ ᑲᑎᓯᒪᔪᖅ ᐅᓄᙱᒃᑲᓗᐊᖅᖢᑎᒃ ᓖᓐ ᐅᖃᓚᐅᕐᑐᖅ ᖃᓄᐃᓕᐅᖃᑎᒌᖕᓂ ᐅᓇᑕᖁᔨᙱᓐᓂᕐᒧᑦ ᐱᒻᒪᕆᐅᓂᕋᖅᖢᓂᐅᒃ.

ᐅᖃᓚᐅᕐᑐᖅ ᖃᐅᔨᒪᔭᖃᕐᓂᕋᖅᖢᓂ ᒑᔭᒥᐅᑕᓂ ᐊᒃᑐᖅᑕᐅᓯᒪᔪᓂ ᐅᓇᑕᖅᑐᓄᑦ ᐊᒻᒪᓗ ᐊᕐᕌᒍᒐᓴᐅᓕᖅᑐᓂᒃ ᐅᑯᐊ ᐃᔅᕋᐃᓕᒃᑯᑦ-ᐸᓕᔅᑏᓂᐊᓐᓗ ᐅᓇᑕᖃᑎᒌᖕᓂᖓᓄᑦ, ᐊᒻᒪᓗ ᐱᒻᒪᕆᐊᓘᓪᓗᓂ ᐃᓄᐃᑦ ᐃᓱᒪᒋᔭᖃᕐᓂᖏᓐᓂᒃ ᖃᓄᐃᓕᐅᖅᑐᓂᒃ ᐊᑭᐊᓂᕐᒥᐅᓂᒃ.

“ᐃᓱᒪᔪᖓ ᓄᓇᖃᖅᑐᑦ ᑲᑎᑎᑕᐅᓗᑎ ᐅᕙᓂ ᐊᑕᐅᓯᕐᒥ ᓴᖅᑭᑎᑦᑎᔪᓐᓇᕐᒪᑕ ᐱᓇᓱᒍᓐᓇᐃᓐᓇᕐᓂᕐᒥᒃ ᐊᒻᒪ ᑲᒪᒋᔭᖃᑦᑎᐊᕐᓂᕐᒥᒃ ᐊᒻᒪᓗ ᓱᖁᓯᙱᑦᑐᓐᓇᕐᓂᕐᒥᒃ ᓄᓇᕐᔪᐊᓕᒫᒧᑦ ᒪᑯᐊ ᐃᓄᐃᑦ ᐱᔪᓐᓇᐅᑎᖃᖕᓂᖏᑦ ᐱᒻᒪᕆᐅᓂᖏᓐᓂᒃ.” ᐅᖃᕐᑐᖅ.

“ᐃᓱᒪᔪᖓ ᐸᓕᔅᑏᓂᐊᓐ ᐱᔪᓐᓇᐅᑎᖏᑦ ᓄᓇᖃᖅᑳᕐᓂᕐᒧᑦ ᐱᔪᓐᓇᐅᑎᐅᓇᓱᒋᓪᓗᒋ ᓄᓇᖓᓄᑦ ᐊᒻᒪᓗ ᓄᓇᖃᖅᑳᖅᑐᑦᑕᐅᖅ ᓄᓇᖓᓃᒻᒥᒐᑦᑕ, ᑕᐃᒪᓕ ᐱᔪᓐᓇᐅᑎᒋᔭᐅᔪᓂ ᓄᓇᖃᖅᑳᖅᑐᓄᑦ ᖃᐅᔨᒪᑎᑦᑎᓇᓱᒃᖢᑕ ᑲᓇᑕᒥ, ᓄᓇᕗᒥᑦ, ᑕᐃᒪᓕ ᑕᐃᒪᐃᓕᐅᓪᓗᐊᖅᑐᒍᑦ ᓄᓇᕐᔪᐊᓕᒫᒧᑦ.”

ᑲᑎᖃᑎᒌᓚᐅᖅᖢᑎᒃ ᐅᐸᒍᑎᔪᕕᓃᑦ ᐃᖃᓗᖕᓂ ᑐᒃᓯᐊᕐᕕᒃᒧᑦ ᒫᔅᒃᒧᑦ ᓂᕆᔭᖅᑐᓚᐅᕐᑐᑦ ᐊᒻᒪ ᑳᕕᑐᕆᐊᖅᖢᑎᒃ.