ᐅᓯᑲᑦᑕᕐᓂᕐᒥ ᐊᖏᒡᓕᒋᐊᖅᑕᐅᓂᖓ ᐊᖏᖅᑕᐅᕗᖅ; ᐹᕙᓐᓛᓐ ᐃᓱᓕᑦᑎᔾᔮᙱᓚᑦ ᐃᖅᑲᓇᐃᔭᖅᑎᓂ

ᐅᑭᐅᖅᑕᖅᑐᒥ ᐱᓕᕆᓂᕐᒧᑦ ᒥᓂᔅᑕ ᐊᖏᖅᓯᓚᐅᖅᐳᖅ ᑲᒻᐸᓂᐅᔫᑉ ᐅᓯᑲᑦᑕᕐᓂᕐᒥ ᐊᖏᓖᒋᐊᖅᑕᐅᓂᖓᓂ ᐊᐃᑉᐹᓂ ᐅᓐᓄᓴᖓᓂ

ᐅᑭᐅᖅᑕᖅᑐᒥ ᐱᓕᕆᓂᕐᒧᑦ ᒥᓂᔅᑕ ᑖᓂᐅᓪ ᕚᓐᑎᐅᓪ ᐅᖃᓪᓚᒃᐳᖅ ᑐᓴᒐᒃᓴᓕᕆᓂᐅᔪᒥ ᑲᓇᑕᒥ ᑕᑯᓐᓇᒐᖃᕐᕕᖕᒥ ᐊᑐᖅᑕᐅᕙᓚᐅᖅᑐᓂ ᒑᑎᓅ, ᑯᐸᐃᖕᒥ, ᔫᓂ 2022−ᒥ. ᑎᑎᖅᑲᒥ ᐊᐃᑉᐹᓂ, ᕚᓐᑎᐅᓪ ᐊᖏᓚᐅᖅᐳᑦ ᐹᕙᓐᓛᓐ ᓴᕕᕋᔭᒃᓴᒥ ᐅᔭᕋᖕᓂᐊᕐᕕᐅᑉ ᑐᒃᓯᕋᐅᑎᖓᓐᓂ ᐊᖏᒡᓕᒋᐊᖅᓯᓂᕐᒥ ᐅᓯᑲᑦᑕᕐᓂᕐᒥ ᑭᒡᓕᖓᓂ 6 ᒥᓕᐊᓐ ᑕᓐᓄᑦ 2022−ᒥ. (ᐊᔾᔨᓕᐅᖅᑕᐅᔪᖅ ᔨᐊᕝ ᐱᓚᑦᑎᐊᐃᒧᑦ)

By ᑕᐃᕕᑦ ᕕᐊᓐᒧᑦ
ᓄᓇᓕᖕᓂ ᑐᓴᒐᒃᓴᓕᕆᓂᕐᒧᑦ ᐱᒋᐊᕈᑕᐅᔪᖅ ᑐᓴᒐᒃᓴᓕᕆᔨ

For English version, see Shipping increase approved; Baffinland won’t terminate employees

ᐹᕙᓐᓛᓐ ᓴᕕᕋᔭᒃᓴᒥ ᐅᔭᕋᖕᓂᐊᕐᕕᖓ “ᐃᕐᙲᓐᓇᑲᐅᑎᒋ … ᓄᖅᑲᖅᑎᑦᑎᓂᐊᖅᐳᖅ ᑕᒪᒃᑭᓂ ᐃᑕᓕᑦᑎᓂᖏᓐᓂ ᐅᖃᐅᔾᔨᓂᐅᔪᓂ” ᑐᓂᔭᐅᔪᖅ 1,100−ᖑᔪᓄᑦ ᐃᖅᑲᓇᐃᔭᖅᑎᓄᑦ ᒐᕙᒪᑐᖃᒃᑯᑦ ᐅᑭᐅᖅᑕᖅᑐᒥ ᐱᓕᕆᓂᕐᒧᑦ ᒥᓂᔅᑕ ᑖᓂᐅᓪ ᕚᓐᑎᐅᓪ ᐊᖏᓚᐅᖅᑎᓪᓗᒍ ᑲᒻᐸᓂᐅᑉ ᑐᒃᓯᕋᕐᓂᖓᓂ ᐊᖏᒡᓕᒋᐊᖅᓯᓂᕐᒥ ᐅᓯᑲᑦᑕᕐᓂᕐᒥ ᑭᒡᓕᖓᓂ ᑕᒪᑐᒪᓂ ᐊᕐᕌᒎᔪᒥ, ᑲᒻᐸᓂᒥ ᐅᖃᖅᑎᐅᔪᖅ ᐅᖃᓚᐅᖅᐳᖅ ᐊᐃᑉᐹᓂ.

ᕚᓐᑎᐅᓪ ᐃᓱᒪᓕᐊᖓ ᐃᑲᔪᖅᓱᐃᓚᐅᖅᐳᖅ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᐊᑐᖁᓇᔭᖅᑕᖓᓂ, ᐱᓕᕆᐊᖑᓪᓗᓂ ᓯᑎᐱᕆ 22−ᒥ, ᑲᒻᐸᓂᒃᑯᑦ ᐊᖏᒡᓕᒋᐊᖅᑎᑦᑎᔪᓐᓇᕐᓂᖓᓂ ᓴᕕᕋᔭᒃᓴᒥ ᐅᓯᑲᑦᑕᕐᓂᐅᔪᓂ 6 ᒥᓕᐊᓐ ᑕᓐᓄᑦ 4.2 ᒥᓕᐊᓐᓂ ᑕᒪᑐᒪᓂ ᐊᕐᕌᒎᔪᒥ ᓄᓘᔭᕐᓂ ᐅᔭᕋᖕᓂᐊᕐᕕᖓᓂ.

“ᑕᐅᑐᒃᖢᒍ ᖃᖓᐅᓂᖓᓂ ᑭᒡᓕᖃᖅᑎᑕᐅᓂᖓᓂ ᒪᓕᒃᑐᒥ ᐱᓕᕆᐊᖑᔪᒧᑦ ᑐᒃᓯᕋᐅᑎᒥ … ᐊᔭᐅᕆᕗᖓ ᑲᑎᒪᔨᓂ ᑐᓂᓯᓂᕐᒥ ᐃᓚᒋᐊᖅᑕᐅᔪᒥ ᐱᓕᕆᐊᒃᓴᒧᑦ ᐸᐃᑉᐹᖑᔪᒥ ᕿᓚᒻᒥᐅᓛᖑᔪᒥ,” ᕚᓐᑎᐅᓪ ᑎᑎᕋᓚᐅᖅᐳᖅ ᑎᑎᖅᑲᖓᓂ ᐊᐃᑉᐹᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐃᒃᓯᕙᐅᓴᐊᓄᑦ ᒫᔾᔪᕆ ᑕᕕᖅ ᑲᓗᕋᕐᒧᑦ.

ᐹᕙᓐᓛᓐᑯᑦ ᐅᖃᖅᑎᖓ ᐲᑕ ᐋᒃᒥᓐ ᐅᖃᓚᐅᖅᐳᖅ ᕚᓐᑎᐅᓪ ᐃᓱᒪᓕᐊᖓ ᐃᓕᓴᖅᓯᕗᖅ ᑲᒻᐸᓂᐅᑉ ᐱᒻᒪᕆᐅᓂᖓᓂ ᓄᓇᕗᒻᒥ, ᐊᖏᓛᖑᔪᒥ ᓇᖕᒥᓂᖃᖅᑎᐅᔪᓄᑦ−ᐱᓕᕆᕝᕕᒃ ᐃᖅᑲᓇᐃᔭᖅᑎᖁᑎᖃᖅᑐᒥ.

“ᐹᕙᓐᓛᓐ ᐊᖏᖅᓯᒪᕗᑦ ᑲᒪᒋᔭᖃᑦᑎᐊᖅᑐᒥ ᐊᐅᓚᑕᐅᓂᖓᓂ ᐊᒻᒪ ᐅᒃᐱᕈᓱᒃᐳᑦ ᐊᐅᓚᑦᑎᔪᓐᓇᕐᓂᖓᓂ ᐱᓕᕆᓂᐅᔪᒥ ᓴᐳᔾᔨᓯᒪᔪᒥ ᐊᕙᑎᒥ ᑮᓇᐅᔾᔭᒃᓴᓂᕐᒥ ᐱᔪᓐᓇᕐᓂᖓᓂ ᐊᒻᒪ ᓴᓇᓂᕐᒥ ᓴᙱᓂᖅᓴᐅᔪᒥ ᓄᓇᓕᖕᓂ,” ᑎᑎᕋᓚᐅᖅᐳᖅ ᐅᖃᐅᓯᒃᓴᓕᐊᖑᔪᒥ.

ᐊᐅᔭᐅᑎᓪᓗᒍ, ᐹᕙᓐᓛᓐᑯᑦ ᐱᒋᐊᓚᐅᖅᐳᖅ ᐱᓕᕆᓂᐅᔪᒥ ᐊᓂᑦᑎᓂᐊᕐᓂᖏᓐᓂ ᐅᓄᕐᓂᖅᓴᐅᔪᓂ 1,100 ᐃᖅᑲᓇᐃᔭᖅᑎᐅᔪᓂ ᐅᔭᕋᖕᓂᐊᕐᕕᖕᒥ, ᐅᖃᖅᖢᑎᒃ ᐱᓕᕆᔭᒃᓴᖃᙱᓗᐊᕋᔭᕐᓂᖓᓂ ᐃᖅᑲᓇᐃᔭᖅᑎᓐᓇᓱᐊᕐᓂᕐᒧᑦ ᕚᓐᑎᐅᓪ ᑐᕌᖅᑎᑦᑎᙱᒃᑯᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂ ᑐᓂᓯᓂᕐᒥ ᑲᒻᐸᓂᒥ ᐱᔪᓐᓇᐅᒻᒥ ᐅᓯᑲᑦᑕᕐᓂᕐᒧᑦ ᑭᒡᓕᐅᔪᒥ ᐊᖏᒡᓕᒋᐊᖅᑕᐅᓂᐅᔪᒥ.

ᐅᑯᐊ ᐃᓱᓕᑦᑎᓂᐅᔪᑦ ᓯᕗᓪᓕᖅᐹᒥ ᐋᖅᑭᒃᑕᐅᓯᒪᓚᐅᖅᐳᑦ ᐱᒋᐊᓂᐊᕐᓂᖏᓐᓂ ᓯᑎᐱᕆ 25−ᒥ, ᑭᓯᐊᓂ ᐱᐅᔪᒥ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᐊᑐᖁᔭᐅᓇᔭᖅᑐᓂ ᐹᕙᓐᓛᓐᑯᑦ ᐊᔭᒋᐊᒃᑲᓐᓂᓚᐅᖅᐸᖓ ᐅᒃᑐᐱᕆ 20−ᒧᑦ.

ᐊᐃᑉᐹᓂ, ᐋᒃᒥᓐ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᐅᑯᐊ ᐸᕐᓇᐅᑏᑦ ᐊᑐᔾᔮᕈᓐᓃᖅᐳᑦ.

ᐹᕙᓐᓛᓐ ᐅᓯᑲᑦᑕᖃᑦᑕᓚᐅᖅᐳᑦ 6 ᒥᓕᐊᓐ ᑕᓐᓂ ᓴᕕᕋᔭᒃᓴᒥ ᐊᕐᕌᒍᑕᒫᒥ ᑕᐃᒪᙵᓂ 2018−ᒥ. ᑕᐃᓐᓇ ᐱᔪᓐᓇᐅᑎ ᐃᓱᓕᓚᐅᖅᐳᖅ ᑎᓯᐱᕆ 2021−ᒥ, ᐊᒻᒪ ᑕᐃᒪᙵᓂ ᑭᒡᓕᖃᖅᑎᑕᐅᓯᒪᕗᖅ 4.2 ᒥᓕᐊᓐ ᑕᓐᓄᑦ ᐊᕐᕌᒍᑕᒫᒥ.

ᑲᒻᐸᓂ ᐱᓇᓱᐊᓚᐅᖅᐳᑦ ᒪᕐᕉᔪᓂ ᐊᖅᑯᑎᒃᓴᕆᔭᐅᔪᓂ ᒪᐃᒥ ᐱᓕᕆᓇᓱᐊᕐᓂᖏᓐᓂ ᐱᔭᕆᐊᖃᖅᑎᑦᑎᔪᒥ ᕿᒥᕐᕈᔭᐅᓂᖓᓂ ᐊᖏᒡᓕᒋᐊᖅᓯᓂᕐᒥ ᐅᓯᑲᑦᑕᕐᓂᖓᓂ, ᑭᓯᐊᓂ ᕚᓐᑎᐅᓪ ᐊᖏᓚᐅᙱᓚᖅ ᑕᒪᒃᑭᓂ.

ᕚᓐᑎᐅᓪ ᐅᖃᐅᔾᔨᖔᓚᐅᖅᐳᖅ ᑲᒻᐸᓂᒥ ᐅᕘᓈᕐᓂᖏᓐᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᐱᓕᕆᓂᐅᔪᒥ, ᐹᕙᓐᓛᓐ ᐱᓕᕆᓚᐅᖅᐳᑦ, ᐊᒻᒪ ᐅᖃᐅᔾᔨᓪᓗᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂ ᐱᓕᕆᐊᖃᕐᓂᖏᓐᓂ ᑲᒻᐸᓂᒃᑯᑦ ᑐᒃᓯᕋᐅᑎᖓᓐᓂ ᓯᕗᓪᓕᐅᔾᔭᐅᑎᑕᐅᓂᖓᓂ.

ᑎᑎᖅᑲᖓᓂ, ᕚᓐᑎᐅᓪ ᐅᖃᓚᐅᖅᐳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐃᓴᓚᐅᖅᐳᑦ ᕚᓐᑎᐅᓪᒧᑦ ᓯᑎᐱᕆ 26−ᒥ — ᐅᓪᓗᓂ ᑎᓴᒪᓂ ᑭᖑᓂᐊᒍᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑐᓂᓯᓚᐅᖅᐳᑦ ᐊᑐᖁᓇᔭᖅᑕᖏᓐᓂ — ᐅᖃᐅᔾᔨᓂᕐᒥ ᑲᑐᔾᔨᖃᑎᒌᑦ ᐊᒻᒪ ᐹᕙᓐᓛᓐᑯᑦ ᑲᑎᒪᖃᑎᒌᓚᐅᕐᓂᖏᓐᓂ ᐊᒻᒪ ᐊᖏᖃᑎᖃᖅᖢᑎᒃ ᐅᓄᕐᓂᖅᓴᓂ ᐊᖏᖅᑕᐅᓯᒪᓂᐅᔪᓂ.

ᕚᓐᑎᐅᓪ ᐊᐱᕆᓚᐅᖅᐳᖅ ᑲᑎᒪᔨᒃᑯᓐᓂ ᓴᓇᓂᕐᒥ ᐃᓚᒋᐊᕈᑕᐅᔪᒥ ᐱᔨᑦᑎᕋᔭᖅᑐᒥ ᑎᑎᕋᖅᓯᒪᓂᐅᔪᒥ ᐱᓕᕆᐊᖑᔪᒧᑦ ᐊᖏᖅᑕᐅᓯᒪᓂᐅᔪᓂ ᐅᕘᓇ ᓄᓘᔭᕐᓂ ᐅᔭᕋᖕᓂᐊᕐᕕᖓᓂ.

ᐹᕙᓐᓛᓐ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐊᖏᖃᑎᒌᒃᐳᑦ ᐃᖅᑲᓇᐃᔭᖅᑎᑦᑎᓂᕐᒥ ᐱᖓᔪᖓᓐᓂ ᐱᓕᕆᖃᑕᐅᔪᒥ ᓇᓗᓇᐃᖅᓯᔪᒥ ᐊᖏᖅᑕᐅᓯᒪᓂᐅᔪᑦ ᑭᐅᔭᐅᓂᖏᓐᓂ, ᕚᓐᑎᐅᓪ ᐅᖃᓚᐅᖅᐳᖅ.

ᐅᑯᐊ ᐃᓚᖃᖅᐳᖅ ᐊᕙᑎᓕᕆᓂᕐᒥ ᓇᐅᑦᑎᖅᓱᕐᓂᕐᒥ ᑲᑎᙵᓂᐅᔪᑦ ᐱᓕᕆᖃᑎᒌᑦᑎᐊᒃᑲᓐᓂᕐᓂᖏᓐᓂ, ᐃᓕᓴᖅᓯᓂᕐᒥ ᐃᒡᓕᓂᕐᓂ ᐊᖑᓇᓱᒃᑏᑦ ᐊᑐᖅᐸᒃᑕᖏᓐᓂ, ᐊᒻᒪ ᑮᓇᐅᔭᖏᓐᓂ ᖃᐅᔨᓴᖅᑕᐅᓯᒪᔪᓂ ᐳᔪᕐᒧᑦ ᐊᒃᑐᐃᓂᐅᔪᓂ ᐅᓂᒃᑳᓕᐊᓂ, ᕚᓐᑎᐅᓪ ᐅᖃᓚᐅᖅᐳᖅ.

ᑲᒻᐸᓂ ᓱᓕ ᐅᑕᖅᑭᕗᑦ ᐃᓱᒪᓕᐅᕆᓂᐅᔪᒥ ᐱᓂᕆᓂᖅ 2 ᑐᒃᓯᕋᐅᑕᐅᔪᒥ ᐅᓯᑲᑦᓴᕐᓂᕐᒧᑦ 12 ᒥᓕᐊᓐ ᑕᓐᓂ ᓴᕕᕋᔭᒃᓴᒥ ᐊᕐᕌᒍᑕᒫᒥ ᐅᕘᓇ ᑕᓪᓗᕈᑎᐅᑉ ᐃᒪᖓᒍᑦ ᑕᕆᐅᕐᒥ ᐸᐸᑦᑎᓂᐅᔪᒥ ᐃᓂᐅᔪᒥ, ᐃᓚᖃᕋᔭᖅᑐᒥ ᓴᓇᓂᕐᒥ ᖄᒃᑲᓐᓂᐊᒍᑦ ᑐᓚᒃᑕᕐᕕᖕᒥ ᕿᙳᐊᓂ ᑐᓚᒃᑕᕐᕕᖓᓂ ᐊᒻᒪ ᓇᑉᐸᖅᑎᕆᓂᕐᒥ 110-ᑭᓛᒥᑐᒥ ᓄᓇᓯᐅᑎᑯᑖᒥᒃ ᐊᖅᑯᑎᖓᓂ.

ᑕᐃᓐᓇ ᑐᒃᓯᕋᕐᓂᐅᔪᖅ ᐱᓚᐅᖅᐳᖅ ᐱᐅᙱᑦᑐᒥ ᐊᑐᖁᓇᔭᖅᑕᒥ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᑦ ᐊᒻᒪᓗ ᒫᓐᓇᐅᔪᒥ ᕚᓐᑎᐅᓪᒦᑉᐳᖅ, ᐃᓱᒪᓕᐅᕆᓂᐅᔪᒥ ᓂᕆᐅᒋᔭᐅᓪᓗᓂ ᐅᑭᐊᒃᓵᑉ ᓄᙳᐊᓂ.

“ᐅᖃᖃᑎᖃᕐᔪᐊᕐᓂᐅᔪᒥ ᐱᓕᕆᖃᑎᒋᔭᑦᑎᓐᓂ, ᐅᒃᐱᕈᓱᒃᐳᒍᑦ ᓯᕗᒻᒧᐊᕆᔭᕆᐊᖃᕐᓂᑦᑎᓐᓂ ᓴᙱᔪᒥ ᑐᒃᓯᕋᐅᒻᒥ ᑭᐅᔪᒥ ᐃᓄᖕᓂ ᐃᓱᒫᓘᑕᐅᔪᓂ,” ᐋᒃᒥᓐ ᑎᑎᕋᓚᐅᖅᐳᖅ.

Share This Story

(0) Comments