ᐅᕋᑦ ᕕᔅ ᓴᓇᐅᒐᓕᕆᕝᕕᒃ ᑲᑎᑎᑦᑎᔾᔪᖃᕋᓱᖕᒪᑦ ᓂᐱᐅᓱᖅᓱᐃᓂᕐᒥᒃ ᐊᒻᒪ ᓴᓇᙳᐊᖃᑦᑕᕐᓂᕐᒥᒃ ᐃᖃᓗᒃᑑᑦᑎᐊᓂᒃ

ᓴᓇᐅᒐᓕᕆᕝᕕᒃ ᒪᑐᐃᓚᐅᕐᑐᖅ ᐅᕙᓂ ᓄᓇᓕᖕᓂ ᐃᖃᓗᓕᕆᕝᕕᕕᓂᕐᒥᒃ

ᐅᕋᑦ ᕕᔅ ᓴᓇᐅᒐᓕᕆᕝᕕᒃ ᐃᖃᓗᒃᑑᑦᑎᐊᓂᒃ ᓯᑎᐱᕆ 7-ᒥ. ᓄᓕᐊᔪᒃᖑᐊᖅ ᓴᓇᙳᐊᒐᖅ, ᐅᐊᓕᓂᕐᒥᐅᑦ ᑕᕆᐅᕐᒥᐅᑕᖁᑎᖓ, ᓴᖅᑭᔮᖅᑐᖅ ᑎᕆᖅᑯᐊᓂ. (ᐊᔾᔨᙳᐊᖅ ᐅᑯᓇᙵᑦ ᐅᕋᑦ ᕕᔅ ᓴᓇᐅᒐᓕᕆᕝᕕᒃ)

By ᑕᐃᕕᑦ ᓛᕼᐄᑦ

For an English version of this story, see Red Fish Art Studio aims to meld welding and art in Cambridge Bay

ᒪᖁᑲᑕᓗᐊᖅᑎᓪᓗᒍ ᖁᕕᐊᓲᑎᖃᕆᐊᒃᓴᖅ ᓯᓚᒥ, 100 ᖃᓂᒋᔮᖓᓃᑦᑐᑦ ᐃᓄᐃᑦ ᐃᖃᓗᒃᑑᑦᑎᐊᓂ ᑲᑎᓚᐅᕐᑐᑦ ᑕᕝᕙᓂ ᐃᒡᓗᒥ ᓯᑎᐱᕆ 7-ᐅᑎᓪᓗᒍ ᐊᓯᙳᖅᑎᑕᐅᓯᒪᔪᒥ ᑕᑯᔭᖅᑐᖅᖢᑎᒃ.

ᐃᖃᓗᓕᕆᕝᕕᐅᓚᐅᕐᓯᒪᔪᖅ 1950-ᖏᓐᓂᒃ ᒫᓐᓇ ᐅᕋᑦ ᕕᔅ ᓴᓇᐅᒐᓕᕆᕝᕕᐅᓕᕐᑐᖅ. ᐅᓇ ᐃᓄᖕᓄᑦ ᑭᓱᓕᐊᒐᒃᓴᓂᒃ ᐃᓱᒪᐅᔭᕐᓇᖅᑐᖅ, ᐆᑐᓇ 8 ᕖᑦ ᐊᖏᑎᒋᔪᖅ ᓴᓇᐅᒐᖅ ᓄᓕᐊᔪᑦ, ᐃᓄᐃᑦ ᐅᓂᒃᑳᖅᑐᐊᖓ ᑕᕆᐅᕐᒥᐅᑕᖅ.

“ᑕᑯᕙᒃᖢᓂ ᐃᓄᐃᑦ ᑮᓇᖏᓐᓂᒃ ᐊᒻᒪ ᑐᓴᖅᖢᓂ ᐃᒪᐃᓕᔪᓂᒃ ᐆᐆ ᐊᒻᒪ ᐋᓚᔪᓂᒃ ᒪᑐᐃᖅᑎᓪᓗᒍ ᐊᒻᒪᓗ ᑐᓴᑲᑕᒃᖢᓂ ᓱᓕ ᑖᔅᓱᒥᖓ ᑕᐃᒪᓕ ᖃᐅᔨᒪᓇᖅᓯᕗᖅ ᑖᓐᓇ ᐊᓂᒍᐃᑦᑎᐊᓚᐅᕐᓂᖓᓂᒃ,” ᐅᖃᓚᐅᕐᑐᖅ ᒫᓚ ᓕᒧᓯᓐ, ᐊᖓᔪᖅᑳᖅ ᐊᐅᓚᑦᑎᔨ ᐃᖃᓗᒃᑑᑦᑎᐊᓂᒃ ᕼᐋᒻᒪᓚᒃᑯᓐᓂᒃ, ᑖᒃᑯᐊ ᓇᒥᓂᖃᕐᒪᑕ ᓴᓇᐅᒐᓕᕆᕝᕕᒃᒥᑦ.

ᐊᕐᕌᒍᓂ ᑎᓴᒪᓂᒃ ᑕᒪᑐᒥᖓ ᐋᖅᑭᒃᓱᐃᓪᓗᑎᒃ ᒪᑐᐃᕐᓂᐊᕐᓂᖓᓄᑦ. ᐅᓇ ᐃᓅᓱᒃᑐᓂᒃ ᐃᓐᓇᕐᓂᓪᓗ ᐃᓕᓐᓂᐊᕈᑎᒋᔭᐅᔪᒪᔪᖅ ᓴᓇᐅᒐᓕᐅᕐᓂᕐᒥᒃ ᓂᐱᐅᓯᖅᓱᖅᓯᒪᔪᓂᒃ ᐊᒻᒪ ᓴᓇᙳᐊᑲᑕᖕᓂᕐᒥᒃ.

ᐊᑎᕆᔭᐅᔪᖅ ᓴᓇᐅᒐᓕᕆᕝᕕᖕᒧᑦ ᐊᒃᑐᐊᓂᖃᖅᑐᖅ ᓴᓇᔭᐅᓚᐅᕐᓂᖓᓂ. ᐃᖃᓗᐃᑦ (arctic char), ᐃᑲᓗᐃᑦ ᐃᓚᒋᔭᐅᓚᐅᕐᑐᑦ ᐃᖃᓗᓕᕆᕝᕕᐅᑎᓪᓗᒍ ᐱᓕᕆᐊᖑᕙᓚᐅᕐᑐᓂᒃ, ᐊᐅᐸᖃᑦᑕᕐᒪᑕ ᒪᓐᓂᓕᐅᓕᕌᖓᑕ. ᒫᓐᓇᓕ ᐅᓇ ᐅᕋᑦ ᕕᔅ ᓴᓇᐅᒐᓕᕆᕝᕕᒃ ᓴᖅᑭᑎᑦᑎᕙᓪᓕᐊᔾᔪᑎᐅᔪᒃ ᐃᓱᒪᒋᔭᐅᔪᓄᑦ, ᓕᒧᓯᓐ ᐅᖃᖅᑐᖅ.

ᑕᒪᒃᑯᐊ ᖃᓄᐃᓕᐅᕈᑎᒃᓴᐃᑦ ᐊᓯᖏᑦᑎᒍᑦ ᐃᑲᔪᕈᑎᐅᖃᑦᑕᕐᓂᐊᖅᑐᑦ.

“ᖃᐅᔨᒪᒐᑦᑕ ᐃᓄᐃᑦ ᐃᓚᐅᓕᕌᖓᒥᒃ ᓴᓇᐅᒐᓕᕆᓂᕐᒥᒃ ᑲᑎᕈᓘᔭᕈᑎᐅᓕᔭᒻᒪ ᐊᑕᐅᓯᕐᒥ ᐱᓕᕆᐊᖃᖅᐸᒃᑐᓂᒃ.” ᓕᒧᓯᓐ ᐅᖃᖅᑐᖅ.

ᑖᓐᓇ ᓴᓇᐅᒐᓕᕆᕝᕕᒃ ᐱᓇᓱᐊᖅᑕᖏᓐᓂᒃ ᑎᑭᐅᑎᑦᑎᑕᐅᓇᓱᒃᖢᓂ, ᐱᓕᕆᐊᒃᓴᓂᒃ ᐅᑭᐊᒃᓵᖅ ᐸᕐᓇᒃᓯᓯᒫᓂᒃᑐᑦ ᐃᓐᓇᐅᓂᕐᓴᓄᑦ, ᐃᓅᓱᒃᑐᓄᑦ ᐊᒻᒪ ᐃᓐᓇᕐᓄᑦ, ᐅᖃᓚᐅᕐᑐᖅ ᓯᐊᓇ ᐳᓪ, ᓴᓇᐅᒐᓕᕆᕝᕕᖕᒧᑦ ᐊᐅᓚᑦᑎᔨ.

ᐃᓅᓱᒃᑐᓄᑦ ᖃᓄᐃᓕᐅᕈᑎᒃᓴ ᐃᓚᖃᕐᓂᐊᖅᑐᑦ ᑎᑎᕋᐅᔭᒐᖃᑦᑕᕐᓂᕐᒥᒃ ᐊᒻᒪ ᐊᓐᓄᕌᓂᒃ ᑕᖅᓯᒃᓱᐃᕙᖕᓂᕐᒥᒃ. ᐃᓐᓇᐅᓂᕐᓴᓄᓪᓕ ᐱᓕᕆᐊᒃᓴᐃᑦ ᐃᓚᖃᕐᓂᐊᖅᑐᑦ ᑎᑎᕋᐅᔭᒐᕐᓂᒃ ᐊᒥᐊᕆᕙᖕᓂᕐᒥᒃ, ᐊᒻᒪᓗ ᓇᑉᐸᖅᑕᓕᐅᕈᓐᓇᕐᓂᕐᒥᒃ ᐊᒻᒪᓗ ᒥᕐᓱᖃᑦᑕᕐᓂᕐᒥᒃ. ᐃᓐᓇᐃᑦ ᐱᓕᕆᑎᑕᐅᓇᔭᖅᑐᑦ ᓂᐱᐅᓯᖅᓱᐃᕆᓂᕐᒥᒃ ᓴᕕᕋᔭᖕᓂᒃ ᐊᒻᒪ ᑕᓕᕐᒥᐅᑕᓂᒃ ᓴᓇᑲᑕᖕᓂᕐᒥᒃ ᑕᒪᒃᑯᐊᓗ ᐊᓯᖏᓐᓂᒃ ᐃᓚᖃᖅᖢᑎᒃ.

ᓕᒧᓯ ᐅᖃᐅᓯᖃᓚᐅᕐᑐᖅ ᐃᓗᐊᓂᒃ ᑖᔅᓱᒪ ᓲᕐᓗ “ᒫᔾᔨᒃ.” ᐃᒡᓘᖁᓛ ᖁᑦᑎᖕᓂᖃᖅᖢᓂ 12 ᕖᑦ ᖃᓂᒋᔭᖓᓄᑦ ᐊᒻᒪᓗ ᖁᖅᓱᖅᖢᑎᒃ ᐊᐅᐸᖅᖢᑎᒡᓗ ᐊᑭᓐᓇᖏᑦ. ᑐᓄᐊᓂᓕ ᐊᑭᓐᓇᖓᓂᒃ, ᐴᓪ ᐊᒥᐊᕆᓚᐅᕐᑐᖅ ᐃᖃᓗᙳᐊᕌᓗᖕᒥᒃ.

ᐃᒡᓘ ᓇᑉᐸᖓ ᐃᓕᓐᓂᐊᖅᑎᑦᑎᔾᔪᑎᐅᓪᓗᓂ ᓴᕕᕋᔭᖕᓂ ᓂᐱᐅᓯᖅᓱᐃᓂᕐᒧᑦ ᓴᓈᒃᓴᓄᑦ ᐊᒻᒪ ᓴᓇᐅᒐᓕᐅᕐᓂᕐᒧᑦ. ᓇᑉᐸᖓᓕ ᐊᓯᖔᖏᓐᓄᑦ ᓴᓇᐅᒐᓕᕆᔭᐅᕙᒃᑐᓄᑦ ᐱᓕᕆᕝᕕᐅᓪᓗᓂ ᓲᕐᓗ ᐊᒥᐊᕆᓂᕐᒧᑦ.

ᓂᐱᐅᓯᖅᓱᐃᓂᕐᒧᑦ ᖃᓄᐃᓕᐅᕈᑎᐅᔪᑦ ᓴᓇᐅᒐᓕᕆᕝᕕᒃᒥᑦ ᐊᔾᔨᐅᙱᑦᑐᒥ ᐱᓕᕆᓂᖃᖅᑐᖅ. ᓴᓇᐅᒐᓕᐅᖅᑎᓪᓗᒋᑦ ᐅᒥᖕᒪᙳᐊᓂᒃ ᐊᒻᒪ ᐊᒪᕈᙳᐊᓂᒃ, ᓄᓇᖃᖅᑐᑦ ᓂᐱᐅᓯᖅᓱᐃᔩᑦ ᓵᓚᒃᓴᓚᐅᖅᓯᒪᒃᒪᑕ $100,000 ᐅᑭᐅᕐᑕᖅᑐᕐᒥ ᖃᓄᐃᓕᐅᕈᑎᓄᑦ ᓵᓚᒃᓴᐅᓯᐊᕐᒥᒃ (Arctic Inspiration Prize) 2019-ᖑᑎᓪᓗᒍ, ᓴᖅᑭᑎᑦᑎᓯᒪᓪᓗᓂ ᖃᓄᖅ ᐱᓕᕆᐊᖑᔪᖅ ᐊᑐᖅᑕᐅᔪᓐᓇᕐᒪᖔᑦ ᓴᓇᐅᒐᓕᐊᖑᑐᐃᓐᓇᕐᓂᒃᑯᑦ.

ᐱᓕᕆᐊᖃᖅᐸᓪᓕᐊᓕᓚᐅᕐᓯᒪᔪᑦ 2017-ᒥᑦ ᐅᕋᑦ ᕕᔅ ᓴᓇᐅᒐᓕᕆᕝᕕᒃᒥᒃ. ᓂᐅᕕᐊᕆᔭᐅᕌᓪᓚᓚᐅᖅᖢᓂ ᐃᖃᓗᓕᕆᕝᕕᕕᓂᖅ $1.00-ᒧᑦ ᓄᓇᕗᑦ ᐱᕙᓪᓕᐊᔪᓕᕆᔨᒃᑯᑦ ᑯᐊᐳᕇᓴᓐᑯᓐᓂᒃ, ᓕᒧᓯᓐ ᐊᒻᒪ ᕼᐋᒻᒪᓚᒃᑯᑦ ᐱᓕᕆᐊᖃᓕᓚᐅᕐᓯᒪᔪᑦ ᓄᑖᙳᕆᐊᖅᑎᑕᐅᓕᖅᖢᓂ. ᑖᓐᓇ ᐃᒡᓗ ᐅᖅᑯᐊᓘᓚᐅᕐᑐᖅ, ᑖᕈᔪᕈᓗᒃᖢᓂ ᐊᒻᒪ ᖃᐅᓯᖅᖢᓂ, ᑭᓯᐊᓂᓕ ᑮᓇᐅᔭᖅᑖᓚᐅᖅᑎᓪᓗᒋᑦ ᐃᑲᔪᑐᐃᔨᓂᒃ ᐊᔾᔨᒌᙱᑦᑐᓂᒃ ᑖᓐᓇ ᐋᖅᑭᒃᓱᕈᓐᓇᓕᓚᐅᕐᓯᒪᔭᖓ.

ᓕᒧᓯᓐ ᐅᖃᓚᐅᕐᑐᖅ ᓯᕗᓪᓕᖅᐹᖅ ᓴᓇᐅᒐᓕᐅᕐᕕᒃᒥ ᖃᓄᐃᓕᐅᕈᑎᒃᓴᓂᒃ ᐃᓱᒪᒃᓴᖅᓯᐅᓂᐊᕐᑐᑦ ᐊᓯᒃᑲᓐᓂᖏᓐᓂᒃ ᐱᓕᕆᐊᒃᓴᖅᑕᖃᕆᐊᖃᕐᒪᖔᓪᓗ. ᒫᓐᓇᓕ, ᐴᓪ ᐃᖅᑲᓇᐃᔭᖅᑎᑐᐊᖑᔪᖅ ᐊᒻᒪᓗ ᑖᓐᓇ ᐃᑲᔪᖅᑎᐅᔪᓐᓇᖅᑐᓂᒃ ᐃᓕᓐᓂᐊᖅᑎᐅᔪᓐᓇᖅᑐᓂᒡᓗ ᕿᓂᕐᓂᐊᖅᖢᑎᒃ.

ᐊᕐᕌᒍ ᑎᓴᒪᓂᒃ ᐱᓕᕆᐊᖃᓪᓚᓚᐅᖅᖢᑎᒃ, ᐅᓇ ᒪᑐᐃᖓᓕᕐᑐᖅ ᐊᒻᒪᓗ ᐱᓕᕆᐊᒃᓴᓂ ᒪᓂᒻᒪᐃᓕᕐᓂᐊᖅᖢᑎᒃ ᐊᒻᒪᓗ ᐃᓱᒪᒋᔭᐅᑐᐃᓐᓇᓚᐅᕐᑐᖅ ᐱᒻᒪᕆᙳᕐᓗᓂ.

“ᐅᓇ ᐅᖓᓯᒃᑐᐊᓘᖂᔨᓚᐅᕐᑐᖅ ᐃᓱᒪᒋᑐᐃᓐᓇᖅᖢᒍ,” ᓕᒧᓯᓐ ᐅᖃᖅᑐᖅ.

Share This Story

(0) Comments

Join the Conversation

Your email address will not be published. Required fields are marked *

*