ᐅᕌᒡᓚᓐ ᐅᔭᕋᒃᓯᐅᕐᕕᐅᒃᑲᓐᓂᕐᓂᐊᖅᑐᖅ ᐊᕐᕌᒍᒃᑲᓐᓂᕐᓂ ᐊᕙᑎᓂᒃ: ᐊᖓᔪᖅᑳᑉ ᑐᒡᓕᖓ

For the English version of this story, please see 20 years ‘conservative’ estimate for remaining life of Raglan Mine: VP.

ᓇᖕᒥᓂᖅ ᐱᓕᕆᐊᓖᑦ, ᒪᓕᒐᓕᐅᖅᑎᒐᓚᐃᑦ, ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪ ᐊᓯᖏ ᐅᐸᒍᑎᓚᐅᕐᑐᑦ ᐅᕌᒡᓚᓐ ᐅᔭᕋᒃᓯᐅᖅᕕᒃᒥ ᓄᓇᕕᒃᒥ ᐱᓇᓱᐊᕈᓯᐅᓚᐅᕐᑐᒥ ᒪᑐᐃᖅᑕᐅᑎᓪᓗᒍ ᓄᑖᖅ $300-ᒥᓕᐊᓐ ᐊᒥᐊᓕᑲᐅᑉ ᑮᓇᐅᔭᖏᑦᑎᒍᑦ, ᐊᓄᕆ ᐅᔭᕋᒃᓯᐅᖅᕕᒃ.

ᐅᓇ ᐱᓕᕆᐊᒃᓴᖅ ᐊᕐᕌᒍᓂ ᖁᓕᓂ ᐱᓕᕆᐊᖑᕙᓪᓕᐊᓯᒪᔪᖅ ᐊᒻᒪᓗ ᐅᕌᒡᓚᓐᒥ ᐊᐅᓚᑕᐅᑎᑦᑎᔪᓐᓇᓂᐊᖅᖢᓂ ᐊᕐᕌᒍᒃᑲᓐᓂᕐᓂ ᐊᕙᑎᓂᒃ, ᐅᖃᓚᐅᕐᑐᑦ ᑲᒻᐸᓂᒧᑦ ᐱᓕᕆᔨᒻᒪᕆᒋᔭᐅᔪᑦ.

ᐅᕌᒡᓚᓐ ᐅᔭᕋᒃᓯᐅᖅᕕᒃ, ᓇᖕᒥᓂᕆᔭᐅᔪᖅ ᒐᓚᓐᑯᐊ ᑲᓇᑕᒧᑦ ᐊᒻᒪᓗ ᐅᕙᓃᖢᓂ ᑲᖏᖅᓱᔾᔪᐊᖅ ᐊᒻᒪ ᓴᓪᓗᐃᑦ ᐊᑯᓐᓂᖓᓂᒃ, 40,000 ᑕᓐᔅᓯ ᑭᑭᐊᒃᓴᓂᒃ ᐅᔭᕋᒃᓯᐅᖃᑦᑕᖅᑐᑦ ᐊᕐᕌᒍᒥᑦ. ᒫᓂ 1,400 ᐃᖅᑲᓇᐃᔭᖅᑐᑦ, ᐅᖃᕐᓯᒪᔪᖅ ᒐᓚᓐᑯᐊ ᖃᕋᓴᐅᔭᒃᑯᑦ ᓴᖅᑭᔮᒐᖓ.

ᒪᑐᐃᖅᑕᐅᓚᐅᕐᓯᒪᒐᓗᐊᖅᖢᓂ ᕕᕝᕗᐊᕆ 27-ᒥ, ᐊᓄᕆ ᑭᑭᐊᒃᓴᓂ ᓴᖅᑭᑦᑎᑲᑕᓕᓚᐅᕐᓯᒪᔪᖅ ᔭᓄᐊᕆᒥ. ᒫᓂ 18 ᐳᓴᓐᑎᖏᑦ ᐅᕌᒡᓚᓐ ᐱᖁᑎᖏᑦ — ᐊᖏᓂᓕᒃ 70 ᑭᓛᒥᑕᓂ ᑐᑭᒧᑦ ᐊᒻᒪ ᓴᓂᒧᑦ 10 ᑭᓛᒥᑕᓂ — ᖃᐅᔨᓴᖅᑕᐅᓯᒪᔪᖅ ᓇᐅᒃᑯᑐᐃᓐᓇᖅ, ᐅᖃᓚᐅᕐᑐᖅ ᐅᕌᒡᓚᓐ ᐅᔭᕋᒃᓯᐅᖅᕕᒃᒧᑦ ᐊᖓᔪᖅᑳᑉ ᑐᒡᓕᖓ ᐱᐊᕆ ᐳᕋᑦ ᖃᖓᑕᓲᒃᑯᑦ ᐅᐸᒍᑎᑎᓪᓗᒍ ᖃᓄᐃᓕᐅᕐᓂᐅᔪᒧᑦ..

“ᐃᓱᒪᙳᐊᕈᑦᑕ,” ᐅᖃᕐᑐᖅ, “ᐋᕿᒃᓯᔪᓐᓇᖅᑐᒍ ᐅᓄᕐᓂᕐᓴᓂᒃ ᑕᒪᓐᓇ ᖃᓄᐃᓕᐅᕆᑎᐅᕈᓘᔭᕈᓐᓇᕐᓂᖓᓂ, ᐱᕈᖅᐸᓪᓕᐊᓗᓂ ᐊᒻᒪ ᐊᑯᓂᕈᓗᒃ ᐱᓕᕆᐊᖑᓗᓂ. ᐊᕐᕌᒍᑦ ᐊᕙᑦ ᑕᒪᑐᒧᖓ ᓈᒻᒪᑐᐃᓐᓇᖅᑰᔨᔪᖅ.”

ᐅᕌᒡᓚᓐ ᐅᔭᕋᒃᓯᐅᖅᕕᒃᒧᑦ ᑐᑭᒧᐊᖅᑎᑦᑎᔨ ᐱᓕᕆᐊᒃᓴᓄᑦ, ᖃᓄᐃᓕᐅᕈᑎᒃᓴᓕᕆᔨ ᐊᒻᒪ ᖃᐅᔨᓴᕈᑎᓄᑦ ᔮᓐ-ᕗᕌᓐᓱᐊ ᕗᕋᑦ ᐅᖃᓪᓚᖃᑎᖃᓚᐅᕐᑐ ᒐᓚᓐᑯᐊ ᐊᐅᓚᑦᑎᔨᖏᓐᓄᑦ ᐱᓇᓱᐊᕈᓯᐅᓚᐅᕐᑐᒥᑦ ᐊᓄᕆ ᐅᔭᕋᒃᓯᐅᖅᕕᒃ ᒪᑐᐃᖅᑎᓪᓗᒍ. ᐸᔾᔨᓕᐅᕆᔨ ᓯᑐᕆᒃ ᒑᓚᓐᑦ)

ᐳᕋᑦ ᓄᓇᐅᑉ ᒥᒃᓵᓄᑦ ᐅᖃᓚᐅᕐᑐᖅ, ᑕᒪᓐᓇᓗ ᖁᑦᑎᖕᓂᖅᐹᓃᖃᑕᐅᓪᓗᓂ ᑭᑭᐊᒃᓴᖃᖅᑐᓂᒃ ᓄᓇᕐᔪᐊᕐᒥ, ᑕᒪᓐᓇ ᓄᓇ ᓲᕐᓗ ᐳᑕᐃᑐᖏᓐᓂ ᐲᔭᐃᕝᕕᐅᑦᑎᑐᐃᓐᓇᖅᑐᖅ.

ᑭᑭᐊᒃᓴᓂ ᐅᔭᕋᒃᓯᐅᖅᕕᒃ ᐊᖏᓂᖅᐹᖑᔪᖅ ᐅᕙᓂ ᐃᓐᑐᓃᓯᐊ ᐊᒻᒪ ᓴᐃᓇᒥ, ᐊᒻᒪᓗ “ᐅᓄᕐᑐᑦ ᑭᑭᐊᒃᓴᓂ ᐅᔭᕋᒃᓯᐅᖅᕖᑦ ᐱᖓᖕᓇᕐᒥᐅᓂ ᑮᓇᐅᔭᓕᐅᑲᑕᓗᐊᙱᖢᑎᒃ,” ᐅᖃᕐᑐᖅ.

“ᐱᔾᔪᑎᒋᓪᓗᒍ ᐅᕌᔅᓚᓐ ᐅᔭᕋᐅᔭᖃᑦᑎᐊᕐᓂᖓ, ᑕᐃᒪᓕ ᑕᒪᐅᓇ ᒪᑭᒪᑦᑎᐊᖅᐳᒍᑦ ᐊᒻᒪ ᖃᓄᐃᙱᖢᑕ.”

ᑯᐸᐃᒃᒥ ᓄᓇᒥᙶᖅᑐᓕᕆᓂᕐᒧᑦ ᒥᓂᔅᑕ ᒪᐃᑎ ᐸᓛᓐᓴᑦ ᕙᔩᓇ ᐅᐸᒍᑎᓚᐅᕐᒥᔪᖅ ᒪᑐᐃᕐᓂᕐᒧᑦ ᐊᒻᒪᓗ ᐅᖃᖅᖢᓂ ᐅᔭᕋᐃᔭᐃᑦ ᐱᔭᐅᕙᓪᓕᐊᔪᑦ ᑕᕝᕙᙵᑦ ᐅᔭᕋᒃᓯᐅᖅᕕᒃᒥ ᐃᑲᔪᑐᐃᓐᓇᙱᓚᖅ ᐆᒻᒪᖅᑯᑎᓕᕆᓂᕐᒧᑦ ᑯᐸᐃᒃᒥ ᑭᓯᐊᓂᓕ ᓄᐊᑦ ᐊᒥᐊᓕᑲᓕᒫᒥᑦ.

“ᐅᓇ ᓴᖅᑭᑎᑦᑎᓯᒪᔪᖅ ᐊᔪᕐᓇᙱᓐᓂᖓᓂ ᐱᓕᕆᐊᒃᓴᓂ ᓴᖅᑭᑎᑦᑎᓇᓱᒡᓗᓂ,” ᐅᖃᕐᑐᖅ. “ᑕᐃᒪᐃᑎᓪᓗᒋᓪᓗ ᓄᓇᓕᖕᓂ ᐃᓚᐅᑎᑦᑎᕙᒃᖢᑎᒃ ᐊᒻᒪ ᐱᓕᕆᐊᖃᖅᑐᓂᒡᓗ ᐃᑲᔪᖅᐸᒃᖢᑎᒃ.”

ᑯᐸᐃᒃᒧᑦ ᓄᓇᖃᖅᑳᖅᑐᓕᕆᓂᕐᒧᑦ ᒥᓂᔅᑕ ᐃᐊᓐ ᓚᕗᕋᓂᐅ ᐅᖃᓚᐅᕐᑐᖅ ᐃᒃᐱᒍᓱᑦᑎᐊᕐᓂᕋᖅᖢᓂ ᐱᓕᕆᖃᑎᒌᑦᑎᐊᕐᓂᖏᑦ ᐃᓄᐃᑦ ᐊᒻᒪ ᐅᕌᒡᓚᓐ.

“ᑕᑯᓪᓗᓂ ᐱᓕᕆᖃᑎᒌᖕᓂᖏᑦ, ᐅᖃᐅᔾᔭᐅᔪᓐᓇᕋᓗᐊᖅᖢᑕ ᖃᓄᐃᒻᒪᖔᑕ, ᐅᖃᓕᒫᖃᑦᑕᕋᓗᐊᖅᖢᑕ ᑖᒃᑯᐊ ᒥᒃᓵᓄᑦ, ᑭᓯᐊᓂᓕ ᐅᐸᒍᑎᓯᒪᙱᓪᓗᓂ ᑕᑯᓇᔭᙱᑕᓯ ᖃᓄᐃᓐᓂᖏᓐᓂᒃ. ᐅᓪᓗᒥᓕ ᑕᒪᓐᓇ ᐊᑐᖅᐸᕗᑦ,” ᓚᕗᕋᓂᐅ ᐅᖃᕐᑐᖅ.

ᐃᓄᐃᑦ ᓇᖕᒥᓂᖅ ᐱᓕᕆᐊᖏᑦ ᐃᓚᐅᔪᕕᓃᑦ ᓴᓇᕙᓪᓕᐊᔪᓂᒃ ᐊᓄᕆ ᐅᔭᕋᒃᓯᐅᖅᕕᒃᒥ ᐃᓚᖃᓚᐅᕐᑐᑦ ᐅᑯᓂᖓ ᑮᕗᐃᑦ ᓄᕗᒥᐅᑦ, ᐊᕐᖓᒃ ᐳᕉᒪᒃ, ᓄᓇᕕᒃ ᐃᒡᓗᓕᐅᖅᑎᑦ – ᒨᕈ, ᐅᕋᑦᐹᑦ ᓄᕗᒥᐅᑦ ᐊᒻᒪ ᕈᐃᓗ ᐊᕙᑖ.

ᐅᕌᒡᓚᓐ ᑐᓂᓯᓯᒪᔪᑦ $457 ᒥᓕᐊᓐᑖᓚᓂ ᑯᐸᐃᒃᒥ ᐱᖁᑎᓄᑦ ᐊᒻᒪᓗ $175 ᒥᓕᐊᓐᓂ ᐃᓄᖕᓄᑦ ᐱᓕᕆᐊᓕᖕᓄᑦ, ᐅᖃᕐᓯᒪᓚᐅᕐᑐᖅ ᑐᓴᒐᒃᓴᓕᐊᕆᔭᐅᔪᖅ ᐅᔭᕋᒃᓯᐅᖅᕕᒃᒧᑦ.