ᐅᖃᕈᓐᓇᙱᑦᑐᒍᑦ ᖃᓄᑎᒋ ᓇᔾᔨᐊᕆᔭᐅᔪᓄᑦ ᐃᒥᐊᓗᖕᒥ ᐊᑐᓗᐊᕐᓂᒧᑦ ᐋᓐᓂᐊᕆᔭᐅᔪᑦ (FASD) ᐱᑕᖃᕐᓯᒪᖕᒪᖔᑦ, ᓄᓇᕗᑦ ᒐᕙᒪᒃᑯᑦ ᐅᖃᖅᑐᑦ

ᓄᓇᕗᑦ ᒐᕙᒪᒃᑯᑦ ᓱᓕ ᓇᐃᓴᐅᑎᑎᒍᑦ ᓇᓗᓇᐃᕐᓯᔪᓐᓇᙱᑦᑐᑦ ᐱᑕᖃᐃᓐᓇᕐᓂᖓᓂᒃ

ᐅᖃᕈᓐᓇᙱᑦᑐᒍᑦ ᖃᓄᑎᒋ ᓇᔾᔨᐊᕆᔭᐅᔪᓄᑦ ᐃᒥᐊᓗᖕᒥ ᐊᑐᓗᐊᕐᓂᒧᑦ ᐋᓐᓂᐊᕆᔭᐅᔪᖅ (FASD) ᓄᓇᕗᑦ ᐃᓄᖏᓐᓂᒃ, ᐅᖃᓪᓚᒃᑎᒋᔭᐅᔪᖅ ᓄᓇᕗᑦ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᖏᓐᓄᑦ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐱᓇᓱᐊᕈᓯᐅᓚᐅᕐᑐᒥᒃ.

“ᒫᓐᓇᐅᔪᕐᓕ, ᐱᑕᖃᕐᓂᖓ ᓇᓗᓇᖏᒻᒪ ᐅᓇ ᓇᔾᔨᐊᕆᔭᐅᔪᓄᑦ ᐃᒥᐊᓗᖕᒥ ᐊᑐᓗᐊᕐᓂᒧᑦ ᐋᓐᓂᐊᕆᔭᐅᔪᖅ (FASD) ᒪᓕᒃᖢᑎᒃ ᐋᓐᓂᐊᕐᕕᓕᐊᖅᓂᕐᒧᑦ ᑲᒪᒋᔭᐅᓯᒪᓂᒃᑯᑦ, ᐊᒻᒪᓗ ᐃᓄᒋᐊᖕᓂᖅᑎᒍᑦ ᖃᔅᓯᐅᓇᔭᕐᓂᖏᑦ ᓇᓗᓇᖅᖢᓂ,” ᓄᓇᕗᑦ ᒐᕙᒪᒃᑯᑦ ᐅᖃᖅᑐᖅ.

ᑕᒪᓐᓇᓕ ᐱᔾᔪᑎᖃᕐᑐᖅ ᓄᓇᕗᒥᑦ ᐋᓐᓂᐊᕆᔭᐅᕙᒃᑐᓂᒃ ᖃᐅᔨᓴᖅᐸᓪᓕᐊᓂᕐᒧᑦ ᓄᓇᕗᑦ ᒐᕙᒪᒃᑯᑦ ᐃᒪᐃᓕᐅᕐᐸᒃᑐᑦ “ᐋᕿᒃᓯᒪᓪᓗᑎᒃ ᑲᑎᕐᓱᒐᕐᓂᒃ ᑐᓂᓯᔪᓐᓇᕐᓗᑎᒃ ᖃᓄᐃᑦᑐᑦ ᐋᓐᓂᐊᕆᔭᐅᔪᑦ ᖃᐅᔨᓴᖅᑕᐅᕙᓪᓕᐊᔪᓂᒃ, ᑭᓯᐊᓂᓕ FASD-ᒧ ᖃᐅᔨᓴᕐᓂᖅᑕᖃᙱᒻᒪᑦ,” ᐅᖃᖅᓯᒪᓚᐅᕐᑐᑦ ᖃᕋᓴᐅᔭᒃᑯᑦ ᑭᐅᔾᔪᑎᐅᔪᑦ, ᐋᕿᒃᓱᖅᑕᐅᓯᒪᓪᓗᑎᒃ ᕗᐃᐊᓐᑎ ᕼᓗᓇᓐᒧᑦ, ᑐᓴᐅᒪᔾᔪᑎᓕᕆᔨ ᓄᓇᕗᑦ ᒐᕙᒪᒃᑯᓐᓄᑦ, ᑭᐅᔾᔪᑎᖏᑦᑎᒍᑦ ᐊᐱᕆᔭᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ.

ᐊᒻᒪᓗ, ᓄᓇᕗᑦ ᒐᕙᒪᒃᑯᑦ ᐅᖃᖅᖢᑎᒃ ᑕᐃᒪᓐᓇ ᐱᓕᕆᓂᐅᔪᖅ ᐊᔪᕐᓇᕈᔪᖕᓂᕋᖅᖢᒍ ᐊᒻᒪ ᐊᑭᑐᓂᕋᖅᖢᒍ.

“ᐋᓐᓂᐊᕆᔭᐅᕙᒃᑐᓂᒃ ᖃᐅᔨᓴᖅᐸᓪᓕᐊᓂᖅ ᓇᔾᔨᐊᕆᔭᐅᔪᓄᑦ ᐃᒥᐊᓗᖕᒥ ᐊᑐᓗᐊᕐᓂᒧᑦ ᐋᓐᓂᐊᕆᔭᐅᔪᖅ (FASD) ᓴᕿᑉᐸᓪᓕᐊᓕᕐᒥᔪᖅ ᐱᓕᕆᐊᖑᔭᕆᐊᓕᖕᓂ, ᐃᑲᔪᕈᑎᒃᓴᖃᕆᐊᖃᒻᒪᕆᒃᖢᓂ ᐋᓐᓂᐊᕕᒃᒥᑦ ᐅᕝᕙᓘᓐᓃᑦ ᐋᓐᓂᐊᕕᐅᑉ ᓯᓚᑖᒍ ᐃᓱᒪᒋᔭᐅᓂᒃᑯᑦ ᐊᒻᒪᓗ ᐃᓱᒪᒋᔭᐅᓯᒪᓂᒃᑯᑦ ᐊᖏᖃᑎᒌᒍᑎᐅᔪᖅ ᑲᒪᒋᔭᐅᔭᕆᐊᖃᕐᓯᒪᓂᖓᓂᒃ,” ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᖅᑐᑦ.

ᑭᓯᐊᓂᓕ ᑕᒪᐅᓇᑦᑕᐃᓐᓇᖅ, ᓄᓇᕗᑦ ᒐᕙᒪᒃᑯᑦ ᐅᖃᕐᓯᒪᔪᑦ ᐱᔪᓐᓇᕈᑎᖃᓕᖕᓂᖏᓐᓂᒃ ᖃᐅᔨᓴᕐᓂᒃᑯᑦ ᐋᓐᓂᐊᓕᖕᓂᒃ FASD-ᒥ, ᐅᑯᑎᒎᓇᖅ ᐱᖓᓱᓂᒃ ᐱᓕᕆᖃᑎᒌᓂᒃ ᐱᒋᐊᖅᑎᑕᐅᓵᓚᐅᕐᑐᓂᒃ ᕿᑭᖅᑕᓂ ᐋᓐᓂᐊᕕᐊᓗᒃᒥᓐ.

ᐅᓇ ᐅᖃᐅᓯ “FASD,” ᓇᐃᓈᕐᓯᒪᔪᖅ ᐆᒧᖓ ᓇᔾᔨᐊᕆᔭᐅᔪᓄᑦ ᐃᒥᐊᓗᖕᒥ ᐊᑐᓗᐊᕐᓂᒧᑦ ᐋᓐᓂᐊᕆᔭᐅᔪᖅ, ᐅᖃᐅᓯᖃᕈᑎᐅᔪᖅ ᐊᔾᔨᔭᒌᙱᑦᑑᑎᕈᓘᔭᕐᓄᑦ ᖃᓄᐃᒍᑎᓄᑦ, ᐃᓅᓯᓕᒫᒥᑦ ᐃᓱᒪᒃᑯᑦ ᐊᒻᒪ ᑎᒥᒃᑯᑦ ᐃᓕᖅᑯᓯᖅᓱᙱᔾᔪᑎᓂᒃ ᐊᑐᖅᑕᐅᕙᒃᑐᓂᒃ ᓇᔾᔨᐊᕆᔭᐅᔪᓄᑦ ᐃᒥᐊᓗᖕᒥ ᐊᑐᓗᐊᕐᓂᓂᑯᓂᒃ ᐃᒡᓕᐊᕐᒦᑎᓪᓗᒋᑦ.

ᐅᓇᓕ ᖃᐅᔨᒪᔭᐅᓂᖅᐹᖅ ᐱᔾᔪᑎᐅᓂᖓᓂᒃ ᐱᕙᓪᓕᐊᓂᒃᑯᑦ ᐊᔪᕈᑎᖃᕐᓂᕐᒧᑦ ᑲᓇᑕᒥᓐ. ᐅᑯᑎᒎᓇᕐᓕᒃ CanFASD ᖃᐅᔨᓴᖅᐸᓪᓕᐊᓂᒃᑯᑦ, ᒫᓂ 4 ᐳᓴᓐᑎᖏᑦ ᑲᓇᑕᓕᒫᒥᑦ ᐃᓄᖏᓐᓂᒃ, ᒫᓃᑦᑐᑦ 1.4 ᒥᓕᐊᓐ ᐃᓄᐃᑦ, ᐊᓐᓂᐊᖃᑐᐃᓐᓇᕆᐊᖃᖅᑐᑦ FASD-ᒥᒃ ᐊᒃᑐᐊᓂᓕᖕᒥᑦ, ᑕᒪᓐᓇᓗ ᒐᕙᒪᐅᔪᓄᑦ ᐊᑭᓕᐅᑎᐅᓕᔭᖢᓂ ᒫᓂ $4 ᐱᓕᐊᓐᓂᒃ.

ᖃᐅᔨᒪᓕᕐᓯᒪᒻᒪᕆᒃᑐᑦ ᐅᖃᕐᓯᒪᔪᑦ ᐋᓐᓂᐊᖃᕐᓯᒪᔪᑦ ᐆᒪᙵᑦ FASD-ᒥᑦ ᐃᓅᓯᖓᒍ ᖃᓄᐃᙱᑦᑐᓐᓇᖅᑐᑦ ᖃᐅᔨᔭᐅᓵᓕᒍᑎᒃ ᐊᒻᒪᓗ ᐃᑲᔪᖅᑕᐅᓕᕈᑎᒃ.

ᑭᓯᐊᓂᓕ ᐱᑕᖃᖅᐸᖕᓂᖓ ᓄᓇᕗᒥᑦ—ᐊᓯᖏᑦᑎᑐᑦ ᐊᒥᓱᓂᒃ ᓄᓇᓕᕋᓛᖑᔪᓂᒃ ᐊᒻᒪ ᓄᓇᓕᖕᔪᐊᓂᒃ ᑲᓇᑕᒥ—ᖃᐅᔨᓴᕈᑎᐅᓚᐅᕐᓯᒪᙱᒻᒪᑦ.

ᑕᒪᓐᓇᓗ ᐊᔪᕐᓇᕈᑎᐅᓪᓗᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᐃᓕᓐᓂᐊᕐᓂᓕᕆᓂᕐᒧᑦ ᓯᕗᓕᐅᕐᑎᓄᑦ ᖃᓄᖅ ᓇᓗᓇᐃᕐᓯᒪᓇᔭᕆᐊᒃᓴᖏᓐᓂᒃ ᒐᕙᒪᒃᑯᑦ ᑮᓇᐅᔭᓂᒃ ᐊᑐᕋᔭᕐᓂᖏᓐᓂᒃ ᐃᓄᖕᓂ ᐋᓐᓂᐊᖃᖅᑐᓂᒃ FASD-ᒥᒃ, ᐃᓕᓐᓂᐊᖅᑎᐅᒐᓗᐊᕈᑎᒃ ᐅᕝᕙᓘᓐᓃᑦ ᐱᓕᕆᐊᖃᕐᓂᒃᑯᑦ ᐊᔪᕈᑎᖃᕈᑎᒃ ᐃᓐᓇᐃᑦ ᐃᖅᑲᓇᐃᔮᖃᕆᐊᒃᓴᖅ ᐊᒻᒪ ᐊᔪᕈᓐᓃᕐᓴᕋᓱᒋᐊᒃᓴᕐᓗ.

“ᐄᓚᒃ, ᖃᐅᔨᒪᙱᑦᑐᒍᑦ ᒫᓐᓇ ᖃᓄᖅ ᐱᑕᖃᕐᓂᖓ FASD ᐅᑭᐅᕐᑕᖅᑐᕐᒥᑦ ᓄᓇᓕᖕᓂᑦ ᐃᓄᑭᑦᑐᓂᒡᓘᓐᓃᑦ ᓄᓇᓕᖕᓂᒃ,” ᓘᒃᑖᖅ ᓯᕕᐊᑦᓛᓇ ᐹᐳᕙ ᐅᕙᙵᑦ ᐊᑐᓗᐊᕐᓂᕐᒧᑦ ᐊᒻᒪ ᐃᓱᒪᒧᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓂᑦ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐊᐱᖅᓱᖅᑕᐅᑎᓪᓗᒍ ᑕᒪᓐᓇ ᑕᕿᖅ ᐱᒋᐊᓕᓵᕐᓯᒪᑎᓪᓗᒍ.

ᖃᐅᔨᓴᕈᑎᑦ ᓴᕿᑕᐅᓚᐅᕐᑐᑦ ᑕᖅᑭᐅᓚᐅᕐᑐᒥ ᐱᓕᕆᖃᑎᒌᖕᓂᑦ ᐹᐳᕙ ᐱᓕᕆᖃᑎᖏᓐᓂᒃ ᖃᐅᔨᒍᑎᐅᓚᐅᕐᑐᖅ ᐱᑕᖃᕐᓂᖓ FASD ᒪᑯᓇᓂ ᓴᕿᔮᕐᓂᕐᓴᐅᓂᖓᓂᒃ ᖃᐅᔨᒪᙱᓐᓂᕐᓴᓄᑦ, ᒪᑯᑎᑐᓇᖅ ᐃᑲᔪᖅᑕᐅᕕᒃᒦᑦᑐᓂᒃ, ᓱᕈᓯᕐᓂᒃ ᑲᒪᒋᔭᐅᓕᕐᓯᒪᔪᓂᒃ ᐃᓚᒋᙱᑕᖏᓐᓄᑦ ᐊᒻᒪ ᐊᓯᖏᓐᓄᑦ ᓄᓇᖃᖅᑳᖅᑐᓂᒃ.

ᖃᐅᔨᒪᒋᐊᕐᓗᒋᑦ ᖃᓄᐃᓕᖓᓂᕐᒧᑦ ᖃᓄᐃᓐᓂᕋᐃᕙᒃᑐᑦ

ᐃᓚᖏᑦ ᖃᐅᔨᓴᕐᑎᐅᕙᒃᑐᑦ ᐃᓱᒫᓘᑎᖃᕐᑐᑦ ᖃᐅᔨᓴᕐᓂᖅᑕᖃᙱᒃᑯᓂᑦ ᒪᑯᐊ ᓄᓇᖃᖅᑳᖅᑐᑦ ᖃᓄᐃᓕᖓᓂᕐᒧᑦ ᖃᓄᐃᓐᓂᕋᖅᑕᐅᕙᒐᔭᕆᐊᒃᓴᖏᓐᓂᒃ.

“ᐱᑕᖃᐃᓐᓇᕐᓂᕐᒧᑦ ᖃᐅᔨᓴᕐᓂᐅᔪᖅ ᓄᓇᖃᖅᑳᖅᑐᑦ ᓄᓇᓕᖏᓐᓂᒃ ᓴᕿᑎᑦᑎᒍᑎᐅᔪᖅ ᐊᔾᔨᒋᙱᓐᓂᐅᔪᓂᒃ ᓲᖃᐃᒻᒪ ᖃᐅᔨᓴᑲᑕᐃᓐᓇᕐᓯᒪᓂᒃᑯᑦ, ᐃᓱᒪᒋᔭᐅᕌᓂᒃᓯᒪᓂᕐᒧᑦ ᐊᒻᒪᓗ ᐃᓅᖃᑎᒌᖕᓂᕐᒨᖓᑎᑕᐅᓂᕐᒧᓪᓗ,” ᐅᖃᕐᓯᒪᔪᖅ ᐅᓂᒃᑳᓕᐊᕕᓃᑦ ᐅᑯᐊ CanFASD-ᑯᑦ ᖃᕋᓴᐅᔭᒃᑯᑦ ᓴᕿᔮᒐᓕᐊᖏᓐᓂᒃ ᔪᓚᐃ 2018-ᖑᑎᓪᓗᒍ.

“ᐱᑕᖃᕆᐊᖃᒻᒪᕆᖕᒪᑦ ᖃᐅᔨᓴᕈᑎᒃᑲᓐᓂᕐᓂᒃ ᑕᒪᑐᒧᖔᖓᔪᓂᒃ ᑕᒪᒃᑯᐊ ᖃᐅᔨᔭᐅᑎᑦᐊᖁᓪᓗᒋᑦ ᑲᒪᒋᔭᐅᓕᕆᐊᖃᕐᓂᕐᓴᐃᑦ,” ᑎᑎᕋᐅᓯᐅᓂᑯᑦ ᐅᖃᕐᓯᒪᔪᑦ.

ᑭᓯᐊᓂᓕ ᖃᐅᔨᔭᐅᑳᐅᕐᑐᙱᒃᑯᓂ ᐊᒻᒪ ᐃᑲᔪᖅᑕᐅᑲᐅᖅᑐᙱᒃᑯᑎ, ᑕᒪᒃᑯᐊ FASD-ᖃᖅᑐ ᐊᒃᓱᕈᕐᓂᕐᓴᐅᕙᒃᐳᑦ ᐃᓕᓐᓂᐊᕐᕕᒃᒥᑦ, ᐊᒻᒪᓗ ᐃᑲᔪᖅᑕᐅᕕᒃᒧᐊᖅᑕᐅᕙᓕᖅᖢᑎᒃ ᐅᕝᕙᓘᓐᓃᑦ ᐃᖅᑲᓇᐃᔭᖃᑦᑕᕐᓂᒃᑯᑦ ᐃᓚᐅᑎᑕᐅᕙᒍᓐᓃᖅᐸᒃᖢᑎᒃ.

ᓄᓇᕗᑦ ᒐᕙᒪᒃᑯ ᐱᓇᓱᒃᐸᒃᑐᑦ ᑐᓴᕈᑎᒃᓴᓂᒃ ᒪᑯᓇᙵᑦ ᓇᔾᔨᔪᓂᒃ ᐊᓈᓇᒋᔭᐅᔪᓂᒃ ᐃᒥᐊᓗᖃᑦᑕᕆᐊᒃᓴᖏᓐᓂᒃ ᓇᔾᔨᓂᖏᓐᓂᒃ, ᑭᓯᐊᓂᓕ ᓄᓇᕗᑦ ᒐᕙᒪᒃᑯᑦ ᑕᒪᓐᓇ ᐃᑲᔪᕈᑎᒋᓕᖃᑦᑕᙱᒻᒪᒍ ᖃᓄᖅ ᓴᕿᔮᖏᓐᓇᕐᓂᖓᓂᒃ FASD-ᒥᒃ.

“ᐊᓈᓇᒋᔭᐅᓂᖅ ᐊᒻᒪ ᐊᖓᔪᖄᓄᑦ ᑲᒪᒋᔭᐅᓂᖅ ᓯᕗᓪᓕᐅᑎᑕᐅᓯᒪᒻᒪᕆᖕᒪᑦ ᐋᓐᓂᐊᖃᕐᓇᙱᑦᑐᓕᕆᔨᓄᑦ,” ᐅᖃᕐᓯᒪᔪᑦ ᑖᒃᑯᓇᙵᑦ ᖃᕋᓴᐅᔭᒃᑯᑦ ᑎᑎᕋᕐᑕᐅᓯᒪᔪᑦ.

ᐅᓇ ᐊᑭᓐᓇᕐᒥᐅᑕᖅ ᐊᔾᔨᙳᐊᖅ ᓄᓇᕗᑦ ᒐᕙᒪᒃᑯᑦ ᐋᕿᓵᕐᓂᑯᖓ ᐅᔾᔨᕈᓱᓕᖅᐹᓪᓕᕈᑎᐅᓇᓱᒃᖢᓂ ᓇᔾᔨᐊᕆᔭᐅᔪᑦ ᐃᒥᐊᓗᖕᒥ ᐊᑐᓗᐊᕐᓂᒧᑦ ᐋᓐᓂᐊᕆᔭᐅᔪᓂᒃ (FASD).

ᒫᑦᓯᐅᓚᐅᕐᑐᒥᒃ, ᐃᓕᓐᓂᐊᕐᓂᓕᕆᓂᕐᒧᑦ ᒥᓂᔅᑕ ᑕᐃᕕᑦ ᔪᐊᓇᓯ ᐅᖃᓚᐅᕐᑐᖅ ᐃᒪᓐᓇ, ᖃᐅᔨᒪᒐᓗᐊᖅᖢᓂ ᐋᓐᓂᐊᕕᒃᑎᒍᑦ ᖃᐅᔨᔭᐅᓯᒫᓂᖏᑦᑐᑦ FASD-ᒥ ᐋᓐᓂᐊᖃᖅᑐᑦ ᓄᓇᕗᑦ ᐃᓕᓐᓂᐊᖅᑎᓂᒃ, ᐱᓕᕆᕝᕕᖓ ᒫᓐᓇ ᑖᒃᑯᓂᖓ ᑎᒃᑯᐊᕐᓯᔪᓐᓇᙱᓐᓂᕋᖅᖢᓂᒋᑦ ᒫᓐᓇᐅᔪᖅ.

ᐋᑕᒻ ᓚᐃᑦᓯᑑᓐ, ᒪᓕᒐᓕᐅᕐᑎ ᐃᖃᓗᐃᑦ-ᒪᓂᕋᔭᒃᒧᑦ, ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐃᒪᓐᓇ “ᑕᒪᑐᒥᖓ ᑲᒪᑲᐃᓐᓇᕐᓂᕋᖅᖢᓂ” ᑭᐅᔾᔪᑎᐅᔪᒥᒃ ᐊᒻᒪᓗ ᑖᒃᑯᐊ ᐱᓕᕆᕝᕕᐅᔪᑦ ᐱᓕᕆᓂᕐᓴᐅᔭᕆᐊᖃᕆᓪᓗᓂᒋ ᑭᒃᑯᑦ ᐃᑲᔪᖅᑕᐅᔭᕆᐊᖃᕐᓂᖏᓐᓂᒃ FASD-ᒧᑦ.

“ᖃᐅᔨᔭᐅᓵᓕᓂᖓ ᑕᒪᓐᓇ ᐱᒻᒪᕆᐅᔪᖅ ᑕᒪᒃᑯᓄᖓ FASD-ᖃᖅᑐᓄᑦ, ᐃᑲᔪᕆᐊᖃᕋᑦᑎᒍᑦ ᑕᒪᑐᒥᖓ ᐱᖃᕋᓗᐊᖅᑎᓪᓗᒋ ᖃᓄᐃᓕᐅᕈᓐᓇᖁᓪᓗᒋ ᑭᖑᕙᓗᐊᙱᓐᓂᖓᓂᒃ,” ᓚᐃᑦᓯᑑᓐ ᐅᖃᓚᐅᕐᑐᖅ ᑕᒪᓐᓇ ᑕᖅᑭᖅ ᐱᒋᐊᓕᓵᕐᓯᒪᑎᓪᓗᒍ.

ᑕᒪᓐᓇ ᓈᒻᒪᙱᓕᐅᕈᑎᐅᓂᖓ ᓴᕿᑎᑕᐅᓯᒪᒐᓗᐊᖅᑎᓪᓗᒍ, ᓄᓇᕗᑦ ᒐᕙᒪᒃᑯᑦ ᑕᒪᑐᒥᖓ FASD-ᒥ ᐃᒃᓯᖕᓇᐃᓯᒪᙱᑦᑐᑦ.

ᓱᕈᓯᓕᕆᕝᕕᒃ ᕿᑭᖅᑕᓂ ᐋᓐᓂᐊᕕᐊᓗᒃᒥᑦ ᒫᓐᓇ FASD-ᒥᒃ ᖃᐅᔨᓴᖃᑦᑕᓕᕐᑐᑦ

ᓲᕐᓗ ᐃᒪᓐᓇ, ᐱᖓᓱᑦ ᐱᓕᕆᔨᐅᔪᑎ ᕿᑭᖅᑕᓂ ᐋᓐᓂᐊᕐᕕᐊᓗᒃᒥ ᐃᖃᓗᖕᓂ ᖃᐅᔨᓴᕈᑎᐅᓚᐅᕐᓂᖓ ᐊᓂᒍᕐᓯᒪᓕᕐᑐᖅ ᐊᒻᒪᓗ ᐋᕿᒃᑕᐅᓯᒪᓕᖅᖢᓂ FASD-ᒥ ᐱᓕᕆᐊᖃᕈᓐᓇᕐᓂᕐᒧᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯ ᑎᑎᕋᓚᐅᕐᑐᑦ ᖃᕋᓴᐅᔭᒃᑯᑦ.

ᐅᑯᐊ ᐱᓕᕆᖃᑎᒌᒃᑐᑦ ᐅᑯᐊᖑᔪᑦ ᓘᒃᑖᖅ ᖃᓄᐃᓕᐅᕈᓯᕐᒥᒃ, ᐃᒃᐱᒋᔭᐅᕙᖕᓂᕐᒥ ᐊᒻᒪ ᑕᓕᖏᓪᓗ ᖃᕋᓴᖓᓄᑦ ᒪᓕᒍᓐᓇᕐᓂᖓᓂᒃ ᐱᓕᕆᐊᓕᒃ, ᓱᕈᓯᓕᕆᔨ ᐊᒻᒪᓗ ᐅᖃᓪᓚᒍᓐᓇᕐᑐᓕᕆᔨ.

ᓱᕈᓰ ᖁᐊᕐᓵᕐᓇᖅᑐᑦ FASD-ᒥ ᐋᓐᓂᐊᖃᕆᐊᒃᓴᖏᓐᓂᒃ ᖃᐅᔨᓴᖅᑕᐅᕙᒃᐳᑦ ᐱᓕᕆᔨᒃ ᐃᓕᓐᓂᐊᑦᑎᐊᕐᓯᒪᔪᓂᒃ ᐋᓐᓂᐊᖃᕐᓇᙱᑦᑐᓕᕆᔨᓂᒃ,” ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᓚᐅᕐᑐᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

“ᑖᒃᑯᐊ ᐱᓕᕆᖃᑎᒌᖑᔪᑦ ᑲᑎᑎᑦᑎᓕᖃᑦᑕᖅᑐᑦ ᐊᔾᔨᒌᙱᑦᑑᑎᓂᒃ ᖃᓄᐃᓕᐅᕈᓯᕐᓂᒃ ᖃᐅᔨᔭᖏᓐᓂᒃ (ᐸᖅᑭᔨᒋᔭᐅᔪᖅ ᐊᖏᕈᓂ) ᖃᓄᖅ ᐃᑲᔪᕈᓐᓇᕆᐊᒃᓴᖏᓐᓂᒃ ᐊᒻᒪ ᐸᕐᓇᐅᓯᐅᕐᓂᕐᒥᒃ ᖃᓄᐃᓕᐅᕈᑎᒃᓴᓂᒃ ᓱᕈᓯᕐᓄᑦ ᐃᒥᐊᓗᖕᒧᑦ ᐊᒃᑐᖅᑕᐅᓯᒪᓂᑯᓂᒃ ᓇᔾᔨᐊᕆᔭᐅᑎᓪᓗᒋᑦ.”

ᒫᓐᓇᓕ, ᑖᒃᑯᐊ ᐊᒥᓲᙱᑦᑐ ᐱᓕᕆᖃᑎᒌᒃᑐᑦ ᕿᑭᖅᑖᓗᖕᒥᑦ ᐱᓕᕆᓂᐊᖅᑐᑦ, ᓄᓇᕗᑦ ᒐᕙᒪᒃᑯᑦ ᐅᖃᖅᑐᑦ.

ᑕᒪᓐᓇᓕ ᐃᓚᐃᓐᓇᑯᓗᐊᓂᒃ ᐱᓕᕆᓂᐅᖂᔨᕗᖅ ᐃᖅᑲᖅᑐᐃᔨ ᐅᕌᐳᑉ ᑭᐅᐹᑐᕆᒃ ᓄᓇᕗᒥᑦ ᐃᖅᑲᖅᑐᐃᕕᒃᒥ ᓈᒻᒪᒃᓴᙱᓚᐅᖅᑎᓪᓗᒍ, 2013-ᒥ ᓄᓇᕗᑦ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᖏᑦ ᓈᒻᒪᒋᙱᓐᓂᕋᖅᖢᓂᒋ ᖃᐅᔨᔪᓐᓇᙱᓐᓂᖏᓐᓂᒃ FASD-ᖃᖅᑐᓂᒃ.

ᐅᓇ ᐊᒃᑐᐊᓂᖃᓚᐅᕐᑐᖅ ᐃᖅᑲᖅᑐᖅᑕᐅᓂᑯᒥᑦ ᓄᓇᕗᒥᐅᑕᒥᑦ FASD-ᖃᕐᓂᕐᒥᒃ ᐋᓐᓂᐊᖃᕐᓂᖓᓂᒃ ᖃᐅᔨᔭᐅᓯᒪᙱᑦᑐᒥᒃ.

ᑭᐅᐹᑐᕆᒃ ᖃᐅᔨᒪᖁᔨᓚᐅᕐᑐᖅ ᓄᓇᕗᒥᑦ ᐃᖅᑲᖅᑐᕕᒃᑯᑦ ᐊᑭᓕᖅᓱᖅᑎᓄᑦᑎᑐᐃᓐᓇᕆᐊᖃᕐᓂᖏᓐᓂᒃ ᓄᓇᕗᑦ ᒐᕙᒪᒃᑯᓐᓂᒃ ᐋᓐᓂᐊᕕᒃᑯᑦ ᖃᐅᔨᓴᕈᑎᐅᔪᓐᓇᕐᓂᐊᖅᑐᓂᒃ ᓯᕗᓂᒃᓴᑦᑎᓐᓂᒃ.

“ᓄᓇᕗᑦ ᐱᖃᙱᓗᐊᖅᐸᑦ ᐋᓐᓂᐊᕆᔭᐅᔪᒥᑦ ᖃᐅᔨᒍᑎᐅᔪᓐᓇᖅᑐᓂᒃ, ᐃᖅᑲᖅᑐᐃᕕᒃᑯᑦ ᐱᔪᓐᓇᕐᓂᖃᖅᑐᑦ ᓄᓇᕗᑦ ᓯᓚᑖᓂᒃ ᖃᐅᔨᓴᖅᑕᐅᔪᓐᓇᑎᑦᑎᓗᓂ ᑕᐃᒪᐃᑦᑕᕆᐊᖃᕈᑎᒃ. ᐃᖅᑲᖅᑐᐃᕕᒃᑯᑦ ᑲᔪᓯᑎᑦᑎᑲᐅᑎᒋᔪᓐᓇᖅᑐᑦ ᑕᐃᒪᐃᑦᑕᕆᐊᖃᕈᑎᒃ ᑎᒍᔭᐅᓂᐊᕆᐊᒃᓴᖓᓅᖓᒍᓂ,” ᑭᐅᐹᑐᓗᕆᒃ.

ᐋᑐᕆ ᒪᒃᕚᓕᓐ, ᐊᐅᓚᑦᑎᔨ ᑐᑭᒧᐊᖅᑎᑦᑎᔨ ᐅᑯᓄᖓ CanFASD-ᑯᓐᓄᑦ, ᑲᓇᑕᓕᒫᒥᑦ ᖃᐅᔨᓴᕐᓂᕐᒧᑦ ᑐᓴᐅᒪᑎᑦᑎᔾᔪᑎ, ᐅᖃᓚᐅᕐᑐᖅ ᓄᓇᕗ ᑕᒪᑐᒧᖓ ᐃᓚᐅᖃᑕᐅᓯᒪᓕᕐᓂᖏᓐᓂᒃ ᐊᕐᕌᒍᒐᓴᐅᓕᕐᑐᓂᒃ, ᒪᐅᓇ ᑲᓇᑕ-ᓄᓇᑦᓯᐊᖅ FASD ᐱᓕᕆᖃᑎᒌᖕᓂᒃᑯᑦ, ᖃᐅᔨᒪᖃᑎᒌᒍᑎᒋᔭᐅᔪᖅ ᐅᑯᐊᖑᓪᓗᑎᒃ ᐱᖓᓱᑦ ᑎᐅᕆᑑᕆᐅᔪᑦ ᐊᒻᒪ ᑎᓴᒪᑦ ᐅᐊᓕᓂᕐᒥᑦ ᐳᕌᕕᓐᓯᐅᔪᓂᒃ.

“ᑖᒃᑯᐊ ᓯᕗᓕᐅᕐᑎᐅᓯᒪᓕᕐᑐᑦ ᑲᓇᑕᒥ ᐋᕿᒃᓱᐃᓂᕐᒥᒃ ᓴᕿᔮᖅᓯᒪᓂᒃᑯᑦ ᐃᑲᒍᔫᑎᒃᓴᓂᒃ ᓯᕗᓂᑲᓪᓚᖓᓂᒃ ᐱᓕᕆᔪᖃᓚᐅᖅᑎᓐᓇᒍᑦ ᕿᑎᕐᒥᐅᓂᒃ ᑲᓇᑕᒥᑦ ᐊᒻᒪ ᑲᓇᑕᐅᑉ ᑲᓇᖕᓇᖓᓂᒃ,” ᒪᒃᕚᓕᓐ ᐅᖃᖅᑐᖅ.

ᓄᓇᕗᑦ ᒐᕙᒪᒃᑯᑦ ᑐᕌᒐᖃᓕᕐᐳᑦ ᐊᑐᓕᖅᑎᑦᑕᐃᓕᓂᕐᒥᒃ

ᐊᑕᐅᓯᖅ FASD-ᒧᑦ ᐱᓕᕆᓂᐅᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᓴᕿᑎᑦᑎᓯᒪᕗᖅ ᐊᑐᓕᖅᑎᑦᑕᐃᓕᓂᕐᒥᒃ ᐱᓕᕆᐊᖃᕐᓂᕐᒥᒃ.

“ᓄᓇᕗᑦ ᒐᕙᒪᒃᑯᑦ ᐱᓇᓱᐊᖃᑦᑕᖅᑐᑦ ᑐᓴᐅᒪᑎᑦᑎᓇᓱᖕᓂᕐᒥᑦ FASD ᒥᒃᓵᓂᒃ ᐊᒻᒪᓗ ᑕᒪᑐᒧᖓ ᖃᓄᐃᓕᖓᒍᑎᐅᔪᓂᒃ ᐃᓅᖃᑎᑦᑎᓂᒃ ᓄᓇᒋᔭᑦᑎᓐᓂᒃ, ᑕᒪᐅᓇᑦᑕᐃᓐᓇᕐᓗ ᐅᓄᕈᓐᓃᖅᑎᑦᑎᕚᓪᓕᕋᓱᒃᖢᑕ ᓇᔾᔨᔪᓂᒃ ᐃᒥᐊᓗᖃᑦᑕᖅᑐᓂᒃ,” ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᖅᑐᖅ.

ᑕᐃᒪᐃᓐᓂᖓᓄᑦ, ᓄᓇᕗᑦ ᒐᕙᒪᒃᑯ ᐅᖃᓚᐅᕐᑐᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᖃᖓᑦᑎᐊᓵᖅ ᓴᕿᑦᑎᓚᐅᕐᓂᖏᓐᓂᒃ ᐅᑯᓂᖓ:

• ᓄᑖᙳᕆᐊᖅᑎᓯᒪᔪᖅ ᐊᑭᓐᓇᒥᑦ ᐊᔾᔨᙳᐊᖅ ᐅᔾᔨᕈᓱᓕᕈᑎᒃᓴᖅ FASD-ᒥ
• ᐅᖃᓕᒫᒐᒃᓴᓂ ᑐᓂᐅᖃᖅᑕᐅᔪᒃᓴᓂᒃ ᐃᒥᐊᓗᖃᑦᑕᙱᓐᓂᕐᒥᒃ ᓇᔾᔨᓗᓂ ᐃᓇᐅᓗᐊᙱᑦᑐᓄᑦ, ᓇᔾᔨᔪᓄᑦ ᐊᒻᒪ ᐃᑲᔪᖅᑎᖏᓐᓄᑦ
• ᑐᓂᐅᖃᐃᓪᓗᑎᒃ ᐋᓐᓂᐊᖃᖅᑕᐃᓕᓂᕐᒥᒃ ᐱᓕᕆᔨᓄᑦ ᐃᑲᔪᕈᑎᒃᓴᓂᒃ ᖃᓄᖅ ᐅᖃᓪᓚᖃᑎᖃᕈᓐᓇᕐᓂᕐᒥᒃ ᐃᑲᔪᖃᑦᑕᖅᑕᖏᓐᓂᒃ

ᐊᒻᒪᓗ ᓄᓇᕗᑦ ᒐᕙᒪᒃᑯ ᐅᖃᕐᓯᒪᖕᒥᔪᑦ ᐊᓯᖏᑦ FASD-ᓕᕐᓄᑦ ᖃᓄᐃᓕᐅᕈᑎᒃᓴᑦ ᐅᑯᓂᖓ ᐃᓚᖃᕐᓂᖏᓐᓂᒃ:

• ᓄᓇᓕᖕᓂ ᐋᓐᓂᐊᖃᕐᓇᙱᑦᑐᓕᕆᔨᐅᔪᑦ ᑐᓴᐅᒪᑎᑦᑎᔨᐅᓪᓗᐊᖅᑐᑦ ᐅᓄᕈᓐᓃᖅᑎᑦᑎᕚᓪᓕᒐᓱᖕᓂᕐᒥᒃ FASD-ᒥᒃ ᐊᒻᒪᓗ ᓄᓇᓕᖕᓂᑦ ᖃᓄᐃᓕᐅᖅᑎᑦᑎᕙᒡᓗᑎᒃ FASD-ᒥᑦ ᐅᔾᔨᕈᓱᖕᓇᒥᑦ ᑕᕿᒥᑦ ᓯᑎᐱᕆᑕᒫᓐ.
• ᐃᓕᓐᓂᐊᕈᑎᒃᓴᐅᓇᔭᖅᑐᑦ ᑕᕐᕆᔭᒐᕐᓂᒃ ᐃᓚᖃᕐᓗᑎᒃ ᒥᒃᓕᕚᓪᓕᖅᑎᑦᑎᒐᓱᖕᓂᕐᒥᒃ ᐃᒥᐊᓗᒃ ᐋᓂᕈᑎᐅᓕᕈᑎᖏᓐᓂᒃ ᓴᕿᑕᐅᓚᐅᕐᑐᖅ ᐃᓕᓴᖅᓯᕕᒃ ᑲᑐᔾᔨᖃᑎᒌᓄᑦ. ᒪᕐᕉᒃ ᑕᕝᕙᙵᑦ ᐅᖃᐅᓯᖃᖅᑐᑦ ᐃᒥᐊᓗᒃᒥᑦ ᐊᑐᖃᑦᑕᕐᓂᖅ ᐊᒻᒪ ᓇᔾᔨᓂᕐᒥᒃ.
• ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᒻᒪᕆᐅᔪᑦ ᐃᓚᐅᓚᐅᕐᑐᑦ FASD-ᒥᑦ ᐃᑲᔪᖅᑐᐃᓂᕐᒥᒃ ᐱᓕᕆᓂᕐᒥᒃ, ᐱᓕᕆᐊᒃᓴᖅ ᑐᑭᒧᐊᖅᑕᐅᓂᑯ ᓴᒃᑳᑦᓱᐊᓐᒥ ᐊᑐᓗᐊᖅᑎᑦᑎᑦᑕᐃᓕᓂᕐᒥᒃ ᐱᓕᕆᔨᓂᒃ ᐊᒻᒪ ᐃᑲᔫᑎᖃᖅᑎᑕᐅᓪᓗᑎᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᒃ ᑲᓇᑕᒥᑦ, ᑖᒃᑯᐊᓗ ᐊᔪᕈᓐᓃᕐᓴᖅᑎᑦᑎᔨᐅᕙᒃᑐᑦ ᓄᓇᓕᖕᓂ FASD-ᒥᑦ ᐱᓕᕆᐊᖃᖅᑐᓂᒃ.
• ᑕᒪᐃᓐᓂ ᐋᓐᓂᐊᖃᖅᑕᐃᓕᓂᕐᒥᒃ ᐱᓕᕆᔨᐅᔪᑦ ᐃᒥᐊᓗᖕᒥ ᖃᐅᔨᓴᖅᑕᐅᖃᑦᑕᕆᐊᖃᖅᑐᑦ ᓇᔾᔨᓂᖏᓐᓂᒃ.
• ᐃᓱᒪᓕᕆᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᒻᒪ ᐊᑐᓗᐊᕐᓂᕐᒧᑦ ᑲᒪᒋᔭᐅᔾᔪᑏᑦ ᐊᑐᐃᓐᓇᐅᔪᑦ ᐃᑲᔪᖅᑕᐅᔪᒪᔪᓄᑦ.

ᑕᒪᒃᑯᐊᓕ ᒐᕙᒪᐅᔪᑦ ᐱᓕᕆᐊᕆᒃᑲᓐᓂᕆᐊᖃᖅᑕᖏᑦ ᐊᒻᒪᓗ ᐃᓚᖃᕐᓗᑎᒃ ᐅᑯᓂᖓ:

• ᐋᕿᒃᓱᐃᓂᖅ ᑭᒃᑯᓕᒫᓂᒃ ᐅᔾᔨᕈᓱᓕᕈᑎᒃᓴᓂᒃ.
• ᓘᒃᑖᖑᔪᑦ, ᐋᓐᓂᐊᓯᐅᕐᑏᑦ ᐊᒻᒪ ᐃᓅᓯᓕᕆᔩ ᑐᓴᖅᑎᑦᑎᖃᑦᑕᐃᓐᓇᕐᐸᒡᓗᑎᒃ FASD ᒥᒃᓵᓄᑦ ᓇᔾᔨᔪᓂᒃ ᐅᖃᓪᓚᖃᑎᖃᓕᕌᖓᑕ.
• ᓇᓗᓇᐃᕐᓯᓗᑎᒃ ᐊᕐᓇᓂᒃ ᐃᑲᔪᖅᑕᐅᒃᑲᓐᓂᕆᐊᓕᖕᓂᒃ ᐊᒻᒪ ᐊᑐᓗᐊᕐᓂᕐᒧᑦ ᐃᑲᔪᖅᑕᐅᔭᕆᐊᓕᖕᓂᒃ, ᒪᑯᓂᖓᓗ ᐊᕐᓇᓂᒃ FASD-ᒥᑦ

ᐊᒻᒪᓗ, ᒪᒃᕚᓕ ᐱᓕᕆᖃᑎᒋᔭᖏ ᖃᕋᓴᐅᔭᒃᑯᑦ ᐊᔪᕈᓐᓃᕐᓴᕈᑎᖃᕐᓗᑎᒃ ᑭᒃᑯᑐᐃᓐᓇᕐᓄᑦ, ᐃᓚᖃᕐᓗᒍ ᐊᑭᖃᙱᑦᑐᒥᒃ ᖃᐅᔨᒍᑎᒃᓴᒥᑦ ᑕᐃᔭᐅᔪᖅ “ᑐᙵᕕᒋᑦ FASD” (“Foundations in FASD”)

ᐅᓇ FASD Hub Australia ᐊᒻᒪ ᐃᓕᓐᓂᐊᕈᑎᒃᓴᖃᕐᒥᔪᑦ ᐅᖃᓕᒫᒐᒃᓴᓂᒃ ᐊᒻᒪ ᖃᕋᓴᐅᔭᒃᑯᑦ ᐃᑲᔫᑎᒃᓴᓂᒃ.