ᐅᖅᑰᓯᕙᓪᓕᐊᒻᒪᕆᒃᑐᒥᑦ ᐅᑭᐅᕐᑕᖅᑐᒥ, ᓄᓇᕗᒥᑦ ᓴᐳᔾᔭᐅᓯᒪᔪᑦ ᓄᓇᐃᑦ ᓴᐳᔾᔨᓯᒪᒍᑎᐅᕗᑦ ᐆᒪᔪᓄᑦ ᐊᒻᒪ ᓄᓇᒥᐅᑕᓄᑦ

 ᖁᕕᐊᓲᑎᖃᕋᑦᑕ ᓄᓇᕗᑦ 20-ᐅᓕᕐᓂᖓᓂᒃ ᕿᒥᕐᕈᐊᖅᖢᑎᒍᑦ ᑖᔅᓱᒪ ᓇᖕᒥᓂᖅ ᒐᕙᒪᓕᕆᔨᖃᖅᑐᑦ ᑎᐅᕆᑑᕆᐅᑉ ᐊᓂᒍᐃᓯᒪᓂᖏᓐᓂ ᐊᒻᒪ ᐱᓇᓱᒋᐊᖃᖅᓯᒪᔭᖏᓐᓂᒃ ᒫᙵᑦ ᑎᑕᐅᓯᕆᓂᕐᒥᒃ ᐊᒻᒪ ᑕᑯᓐᓇᒐᒃᓴᓕᕆᓂᕐᒥᒃ ᒪᐅᖓ ᑮᓇᐅᔭᓕᐅᕋᓱᖕᓂᕐᒧᑦ, ᐃᓄᒃᑐᑦ ᖃᓄᐃᓕᕐᓂᖓᓂᒃ ᐊᒻᒪᓗ ᓯᓚᐅᑉ ᐊᓯᙳᖅᓂᖓᓂᒃ. ᐃᓚᖏᓐᓂᒃ ᓄᓇᕗᒻᒥᐅᑕᑦ ᐅᓂᒃᑲᐅᓯᖏᓐᓂᒃ ᑐᓴᕐᓂᐊᖅᑐᒍ ᖃᓄᖅ ᓄᓇᕗᑦ ᑐᑭᖃᕐᒪᖔᑦ ᑖᒃᑯᓄᖓ ᐊᒻᒪᓗ ᖃᓄᐃᑦᑐᓂ ᐊᓯᙳᕈᑎᒃᓴᓂᒃ ᑕᑯᔪᒪᖕᒪᖔᖏᓐᓂᒃ ᐊᕐᕌᒍ 20 ᐊᒡᒋᖅᑐᓂᒃ. 

ᐊᐅᔪᐃᑦᑐᖅ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᒥᕐᖑᐃᕐᓯᕕᙳᖅᑎᑕᐅᓂᑯ 1976-ᒥ. (ᐊᔾᔨᓕᐅᕆᔨ ᑕᐃᕕᑦ ᑭᓚᐸᒃ)

ᑲᓇᑕᐅᑉ ᐅᑭᐅᕐᑕᖅᑐᖓ ᐊᓯᙳᕐᔪᐊᓕᒑᖕᒪᑦ ᖃᓄᐃᓕᖓᓂᖓᒍᑦ ᐅᓇ ᓄᓇᕐᔪᐊᖅ ᐅᖂᓯᕙᓪᓕᐊᑎᓪᓗᒍ, ᐅᖂᓯᕙᓪᓕᐊᓂᖓ ᒪᕐᕈᐃᖅᖢᓂ ᐱᖓᓱᐃᕐᓂᕐᒧᑦ ᓱᒃᑲᓂᕐᓴᐅᖕᒪᑦ ᓄᓇᕐᔪᐊᑉ ᐊᓯᐊᒍᑦ.

ᐅᑭᐅᕐᑕᖅᑐᖅ ᓇᖕᒥᓂᖅ ᓴᐳᑎᓯᒪᔪᓐᓇᙱᑲᓗᐊᖅᑎᓪᓗᒍ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ, ᑲᓇᑕᒥ ᐱᕙᓪᓕᐊᓯᔪᑦ ᒐᕙᒪᑐᖃᒃᑯᑦ ᓴᐳᔾᔨᓯᒪᓇᓱᒃᖢᑎᒃ ᐅᑭᐅᕐᑕᖅᑑ ᐃᓚᖏᓐᓂᒃ ᒪᑯᐊ ᐆᒪᔪᐃᑦ ᐊᒻᒪ ᓄᓇᒥᐅᑕᑦ ᓴᐳᔾᔭᐅᓯᒪᔪᒪᓪᓗᑎᒃ.

ᐊᒻᒪᓗ ᐋᕿᒃᓯᓂᖅ ᓄᑖᒥ ᐃᒪᕐᒥᐅᑕᓂᒃ ᓴᐳᔾᔨᓯᒪᕝᕕᐅᓂᐊᕐᑐᒥᑦ ᖁᑦᑎᒃᑐᕐᒥᑦ, ᓂᕆᐅᒋᔭᐅᔪᖅ ᐃᓄᐃᑦ ᐊᖑᓇᓱᒍᓯᖏᑦ ᓴᐳᔾᔭᐅᓯᒪᓂᐊᕐᒥᓗᑎᒃ.

ᐊᕐᕌᒍᒐᓵᓗᖕᓂᒃ ᒐᕙᒪᓕᕆᙱᑦᑐᑦ ᑲᑐᔾᔨᖃᑎᒌᑦ ᐊᒻᒪ ᐃᓄᐃᑦ ᐱᓕᕆᖃᑎᒌᖑᔪᑦ ᐊᒃᓱᕉᑎᖃᐃᓐᓇᖅᐳᑦ ᓴᐳᔾᔨᓯᒪᓇᓱᒃᖢᑎᒃ ᑕᕆᐅᖓᓂᒃ ᑕᓪᓗᕈᑎᐅᑉ ᐃᒪᖓᓂᒃ.

“ᑕᒪᓐᓇ ᐊᔾᔨᒌᙱᑦᑑᑎᒻᒪᕆᖕᓂ ᐆᒪᔪᖃᐅᓛᙳᖕᒪᑦ ᐅᑭᐅᕐᑕᖅᑐᓕᒫᒥᑦ,” ᑐᑭᓯᒋᐊᖅᑎᑦᑎᔪᖅ ᒦᒐᓐ ᓚᔅᓕ, ᐊᐅᓚᑦᑎᔨ ᓄᓇᕐᔪᐊᒥᑦ ᐆᒪᔪᓕᕆᔨᕐᔪᐊᒃᑯᓐᓂᑦ ᑲᓇᑕᒥ.

75 ᐳᓴᓐᑎᐅᔪᑦ ᓄᓇᕐᔪᐊᓕᒫᒥ ᑑᒑᓖᑦ ᕿᓚᓗᒐᐃᑦ ᑕᒫᓃᖃᑦᑕᕐᒪᑕ ᑕᕆᐊᖓᓂᒃ. ᓇᓄᐃᑦ ᓇᑦᑎᕋᓱᒃᐸᒃᖢᑎᒃ ᓯᑯᒥ. ᐊᒻᒪᓗ ᑎᖕᒥᐊᑦ ᑕᒪᐅᖓ ᑲᑎᑉᐸᒃᖢᑎᒃ ᐅᓄᒻᒪᕆᐊᓗᒃᖢᑎᒃ.

ᑕᓪᓗᕈᑎᐅᑉ ᐃᒪᖓ ᒫᓃᒻᒥᔪᖅ ᑭᖑᓕᖅᐹᓂᒃ ᓯᑯᑐᖃᖃᕐᕕᒃᓂᑦ, ᑕᒪᓐᓇ ᐊᐅᔭᐅᓕᕐᐸᑦ ᓯᑯᐃᑦ ᐊᑯᓂᐅᓛᖑᓂᐊᕋᓱᒋᔭᐅᔪᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ, ᐃᓂᖃᖅᑎᑦᑎᓪᓗᓂ ᖁᐊᕐᓵᕐᓇᖅᑐᒦᑐᓂᒃ ᐆᒪᔪᓂᒃ.

ᐊᔾᔨᓕᐅᕆᔨ ᐋᓐᑐᕉ ᑕᒑᖅ ᐊᔾᔨᓕᐅᕆᓚᐅᕐᑐᖅ ᐆᒥᖓ ᐊᔾᔨᙳᐊᕐᒥᑦ ᐊᐃᕆᓕ 5-ᒥᑦ ᓯᕿᓂᖅ ᑕᕐᕋᖃᖅᖢᓂ ᐊᐳᑎᒥ ᐊᒻᒪ ᓵᑦᑐᑦ ᐅᔭᕋᐃᑦ ᓯᕐᒥᓕᒃ ᒥᕐᖑᐃᕐᓯᕕᒃᒥᑦ ᐸᐃᓚᑦ ᕿᑭᖅᑕᒥᑦ, ᓄᓇᕗᑦ. (ᐊᔾᔨᓕᐅᕆᔨ ᐋᓐᑐᕉ ᑕᒑᖅ)

2010-ᒥ, ᒐᕙᒪᒃᑯᑦ ᐱᔪᒪᓚᐅᕐᓯᒪᖕᒪᑕ ᓴᐳᔾᔨᓯᒪᔪᒪᓪᓗᑎᒃ 44,500 ᑭᓛᒥᑕᔅᓂ ᑖᔅᓱᒪ ᐃᒪᖓᓂ ᐃᒪᕐᒥᐅᑕᓄᑦ ᓴᐳᔾᔨᕕᐅᓂᐊᕐᓗᓂ. ᑭᓯᐊᓂᓕ ᑖᓐᓇ ᓇᐃᓴᐅᑎ ᓈᒻᒪᒋᔭᐅᓚᐅᕐᓯᒪᙱᒻᒪᑦ ᐊᕙᑎᓕᕆᓂᕐᒧᑦ ᐱᓕᕆᔨᓄᑦ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᑖᒃᑯᐊ ᑕᑯᔪᒪᓚᐅᕐᒪᑕ ᐊᖏᓂᕐᓴᒃᑲᓐᓂᕐᒥᑦ ᐃᓂᒃᓴᒥ ᓴᓂᕐᕙᒃᑕᐅᓯᒪᓂᐊᕐᑐᒥᒃ.

ᐊᕐᕌᒍᓂ 7-ᓂ ᐋᔩᖃᑎᒌᕌᓪᓚᓚᐅᖅᖢᑎᒃ, ᐊᒻᒪᓗ ᐊᑐᕈᓐᓃᖅᑎᑦᑎᓚᐅᕐᑎᓪᓗᒋᑦ 30-ᓂᒃ ᓯᐊᑯᑦ (Shell) ᐅᕐᓱᐊᓗᒃᒥᑦ ᐊᒻᒪ ᒑᓯᒥᑦ ᖃᐅᔨᓴᕈᑎᖏᓐᓂᒃ ᑕᒫᓂ, ᒐᕙᒪᒃᑯᑦ ᑐᓴᖅᑎᑦᑎᓕᓚᐅᕐᑐᑦ ᐊᖏᖃᑎᖃᓚᐅᕐᓂᖏᓐᓂᒃ ᐊᖏᒡᓕᒋᐊᖅᑎᑦᑎᓂᐊᕐᓗᑎᒃ ᑎᑭᓪᓗᒍ 131,000 ᑭᓚᒥᑕᔅᓂᒃ ᐃᓂᒃᓴᒥᒃ. ᐃᓚᐅᓕᕐᓂᖓ ᑕᓪᓗᕈᑎᐅᑉ ᐃᒪᖓ ᐊᖏᒡᓕᒋᐊᖅᑎᑦᑎᓪᓚᕆᖕᓂᐊᖅᑐᖅ ᓴᐳᔾᔭᐅᓯᒪᔪᓂᒃ ᓄᓇᕗᒥᑦ.

ᑕᓪᓗᕈᑎᐅᑉ ᐃᒪᖓ ᐱᒻᒪᕆᐊᓘᖕᒪᑦ ᐅᓄᕐᑐᓄᑦ ᐃᓄᖕᓄᑦ ᐊᖑᓇᓱᖃᑦᑕᖅᑐᓂ ᓇᑦᑎᕐᓂᒃ ᐊᒻᒪ ᕿᓚᓗᒐᕐᓂᒃ ᑕᒫᓂ. ᓄᓇᕗᒥᑦ ᒫᓐᓇ ᓴᐳᔾᔭᐅᓯᒪᔪᑦ ᐊᐅᓚᑕᐅᔪᑦ ᒥᕐᖑᐃᕐᓯᕐᕕᓕᕆᔨᒃᑯᓐᓂᑦ ᑲᓇᑕᒥ ᐃᑲᔪᖅᑕᐅᓪᓗᑎᒃ ᑲᑎᒪᔨᕋᓛᓄᑦ ᑖᒃᑯᐊᓗ

ᓂᐱᒋᔭᐅᓪᓗᑎᒃ ᐃᓄᐃᑦ ᓄᓇᖏᓐᓂᒃ ᒐᕙᒪᑐᖃᒃᑯᓐᓄᑦ.

ᑭᓯᐅᓂᓕ ᐆᒧᖓ ᑕᓪᓗᕈᑎᐅᑉ ᐃᒪᖓᓄᑦ, ᐃᓄᐃᑦ ᓂᕆᐅᒃᑑᒐᓗᐊᑦ ᐊᖏᓂᕐᓴᒥᒃ ᑲᒪᒋᔭᖃᕐᓂᕐᓴᐅᔪᒪᓪᓗᑎᒃ ᐊᐅᓚᑦᑎᓂᒃᑯᑦ ᐃᒪᕐᒥᐅᑕᓂ ᓴᐳᔾᔭᐅᓯᒪᕝᕕᒃᒥᑦ.

“ᐋᔩᖃᑎᖃᖅᑐᒍᑦ ᐱᓇᓱᒃᖢᑕ ᐃᓄᐃᑦ ᐊᐅᓚᑦᑎᓂᕐᓴᐅᓗᑎᒃ ᑕᒪᑐᒥᖓ,” ᐅᖃᖅᑐᖅ ᓵᓐᑐᕋ ᐃᓅᑎᖅ, ᐋᔩᖅᑎᒋᔭᐅᒻᒪᕆᒃᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ. ᑲᑐᔾᔨᖃᑎᒌᖑᔪᑦ ᐱᔪᒪᒐᓗᐊᕐᒪᑕ ᐋᕿᒃᓯᓗᑎ ᐊᐅᓚᑦᑎᖃᑎᒌᒍᑎᐅᓂᐊᖅᑐᓂᒃ ᒥᕐᖑᐃᕐᓯᕐᕕᓕᕆᔨᒃᑯᓐᓂᑦ ᑲᓇᑕᒥ, ᐊᒻᒪᓗ ᓄᓇᖃᖅᑳᕐᓂᕐᒧᑦ ᓇᐅᑦᑎᖅᓱᖅᑎᐅᓗᑎᒃ ᑖᔅᓱᒧᖓ ᐱᓕᕆᐊᒧᑦ.

“ᐃᓱᒪᔪᖓᓕ ᖃᓄᐃᑉᐸᓪᓕᐊᓂᐅᖕᒪᑦ ᖃᓄᖅ ᓴᐳᔾᔨᓯᒪᓂᖅ ᐃᓱᒪᒋᔭᐅᕙᓪᓕᐊᓂᖓ,” ᐅᖃᖅᑐᖅ ᐃᓅᑎᖅ. “ᐱᐅᒋᓂᕐᓴᐅᕙᓪᓕᐊᒐᑦᑎᒍᑦ ᓄᓇᖃᖅᑳᕐᓂᒃᑯᑦ ᐱᓕᕆᓂᐅᔪᖅ ᓴᐳᔾᔨᓯᒪᓂᕐᒧᑦ… ᐱᒻᒪᕆᐅᒋᔭᐅᔪᑦ ᐃᓕᖁᓯᑦᑎᒍᑦ, ᐊᒻᒪᓗ ᐊᖑᓇᓱᖕᓂᕐᒧᑦ ᐃᓕᖁᓯᐅᔪᑦ ᐋᕿᒃᓯᒪᖕᒪᑕ ᓴᐳᔾᔨᓯᒪᒐᓱᖕᓂᕐᒥᒃ ᐃᓱᒪᓂᒃᑯᑦ.”

ᖃᖓᑕᓲᒥᑦ ᖁᑦᑎᓂᕐᐹᖅ ᒥᕐᖑᐃᕐᓯᕕᒃ, ᐊᓚᔅᒥᐅ ᐊᐃᓚᓐᒦᑦᑐᖅ. (ᐊᔾᔨᙳᐊᖅ ᐅᑯᓇᙵᑦ ᒥᕐᙳᐃᕐᓯᕐᕕᓕᕆᔨᒃᑯᑦ ᑲᓇᑕᒥ)

ᐸᖅᑭᔨᐅᔪᑦ ᓄᓇᐃᓐᓇᕐᒥᒃ ᐊᖑᓇᓱᒍᓐᓇᕆᐊᖃᕐᒪᑕ ᐊᒻᒪ ᖃᐅᔨᓴᖅᐸᓪᓕᐊᓗᒍ ᑕᒪᓐᓇ.

ᐊᕐᕌᒍᑦ 20 ᑕᐃᒪᙵᑦ ᓄᓇᕗᑦ ᐱᒋᐊᓚᐅᕐᑎᓪᓗᒍ, 100,000 ᑭᓛᒥᑕᔅ ᐅᖓᑖᓂ ᐋᕿᒃᑕᐅᒪᓕᕐᐳᑦ ᓴᐳᔾᔭᐅᓯᒪᓗᑎᒃ ᓄᓇᕗᒥ ᐃᒪᓐᓇ ᑕᓪᓕᒪᐅᓪᓗᑎᒃ ᒥᕐᖑᐃᕐᓯᕕᙳᖅᖢᑎᒃ.

ᒪᕐᕉᒃ ᑖᒃᑯᓇᙵᑦ ᒥᕐᖑᐃᕐᓯᕕᖕᓂ—ᐊᐅᔪᐃᑦᑐᖅ ᐊᒻᒪ ᖁᑦᑎᓂᕐᐹᖅ—ᐱᑕᖄᓂᓚᐅᕐᓯᒪᔪᑦ ᒥᕐᖑᐃᕐᓯᕕᐅᓪᓗᑎᒃ ᑕᐃᒪᙵᓂ 1976 ᐊᒻᒪ 1988-ᒥ, ᑭᓯᐊᓂᓕ ᐅᓇ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎ ᑎᑎᕋᐅᓯᐅᑦᑎᐊᒻᒪᕆᒍᓐᓇᕐᓯᓗᓂ ᐅᕘᓇ ᑲᓇᑕᐅᑉ ᒥᕐᖑᐃᕐᓯᕐᕕᓄᑦ ᐱᖁᔭᖅᔪᐊᒃᑯᑦ 2001-ᒥ.

ᓯᕐᒥᓕᒃ, ᖃᖅᑲᖃᐅᖅᖢᓂ ᐃᓚᒋᔭᐅᓕᓚᐅᕐᑐᖅ. ᒐᕙᒪᑐᖃᒃᑯᑦ ᑕᐃᒪᙵᑦ ᐋᕿᒃᓯᓯᒪᔪᑦ ᒪᕐᕈᒃᑲᓐᓃᖕᓂᒃ ᒥᕐᖑᐃᕐᓯᕖᖕᓂ ᓄᓇᕗᒥᑦ.

ᑕᓯᐅᔭᕐᔪᐊᑉ ᐅᐊᖕᓇᖓᑦ ᐱᖓᖕᓇᖅᐸᓯᐊᓂ ᓯᒡᔭᖓ ᐃᓂᒋᔭᐅᔪᖅ ᐅᒃᑯᓯᒃᓴᓕᒃ ᒥᕐᖑᐃᕐᓯᕕᒃᒧᑦ, “ᐅᒃᑯᓯᒃᓴᖃᖅᑐᖅ ᐊᒻᒪ ᖁᓪᓕᒃᓴᓕᒃ,” ᐃᓄᐃᑦ ᑕᐃᑲᓂ ᐊᖑᓇᓱᖃᑦᑕᖅᓯᒪᒻᒪᑕ ᑕᐃᒪᙵᑐᖄᓗᒃ, ᑕᐅᙵᖄᕐᓂᑯᕕᓂᕐᓄ ᐊᑐᖅᑕᐅᓚᐅᕐᓯᒪᓂᑰᒋᓪᓗᓂ ᐃᒻᒪᑲᓪᓛᓗᒃ.

ᑕᒪᓐᓇ ᓯᕗᓕᖅᐹᒥ ᐃᓕᓴᕆᔭᐅᓂᖃᓚᐅᕐᓯᒪᔪᖅ 2014-ᒥ, ᐊᖏᓂᓕᖕᒥᑦ 20,000 ᑭᓛᒥᑕᔅᓂ ᓄᓇᐃᓐᓇᕐᒥᒃ ᐊᒻᒪ ᖃᖅᑲᓂᒃ ᓴᐅᔾᔭᐅᔾᔪᑎᐅᓪᓗᓂ.

ᖃᐅᓱᐃᑦᑐᖅ ᒥᕐᖑᐃᕐᓯᕕᒃ ᑭᖑᓂᑦᑎᐊᖓᓂ ᐋᕿᒃᑕᐅᓚᐅᕐᑐᖅ 2015-ᒥ, ᑲᓇᑕᒥ 45-ᒋᔭᐅᓕᖅᖢᓂ ᒥᕐᖑᐃᕐᓯᕕᒃᓂ. ᐃᓚᒋᓪᓗᒍ ᐱᓕᕆᐊᒃᓴᒧᑦ, ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᑐᕌᒐᖃᖃᑦᑕᖅᑐᑦ ᓄᓇᒥᐅᑕᓂᒃ ᐊᒻᒪ ᐆᒪᔪᓂᒃ ᑲᒪᒋᔭᐅᙱᓗᐊᖅᑐᓂᒃ ᒥᕐᖑᐃᕐᓯᕐᕕᓕᕆᓂᒃᑯᑦ ᐋᕿᒃᓱᐃᕙᓪᓕᐊᓕᕌᖓᑕ ᓄᑖᓂᒃ ᓴᐳᔾᔭᐅᓯᒪᓂᐊᕐᑐᓂᒃ.

ᖃᐅᓱᐃᑦᑐᖅ, ᒫᓃᑦᑐᖅ ᐹᑐᔅᑦ ᐊᐃᓚᓐ ᐊᒻᒪ ᒐᕙᓇ ᔭᓄᕈᓪ ᐊᐃᓚᓐᔅ, ᓈᒻᒪᒃᑐᖅ ᑖᔅᓱᒧᖓ. ᑕᒪᓐᓇ ᓄᓇ ᐃᓱᒪᒋᔭᐅᔪᖅ “ᓇᓄᕐᓄᑦ ᓄᓇ” ᐊᒻᒪᓗ ᓯᓚᖓ ᐱᐅᔪᓐᓃᒃᑲᐅᓛᖑᖃᑕᐅᓪᓗᓂ ᐊᒻᒪᓗ ᐸᓂᑦᑎᐊᖅᖢᓂ. ᑭᓯᐊᓂᓕ ᓂᕐᔪᑎᖃᕐᒪᑦ ᑕᑯᓕᒪᓇᙱᑦᑐᓂᒃ ᖃᐅᓱᐃᑦᑐᖅᒥᑦ ᐊᖏᕐᕋᓕᖕᓂᑦ.

Thor Peak ᐊᐅᔪᐃᑦᑐᖅ ᒥᕐᖑᐃᕐᓯᕕᒃᒥᑦ ᐅᐸᒃᑕᐅᕙᒃᐳᖅ ᐊᒥᓱᓄᑦ ᐱᓱᕋᔭᒃᑎᓄᑦ, ᒪᔪᕋᕋᓱᒃᑎᓄᑦ ᐊᒻᒪ ᐊᔾᔨᓕᐅᕆᔨᓄᑦ. (ᐊᔾᔨᙳᐊᖅ ᐅᕙᙵᑦ ᑕᐃᕕᑦ ᕿᓚᐸᒃ)

“ᐃᓚᖓᓪᓕ ᐱᔾᔪᑎᒋᔭᐅᓚᐅᕐᑐᖅ ᒥᕐᖑᐃᕐᓯᕕᙳᖁᔭᐅᓂᖓ ᐃᒪᓐᓇ ᐱᒻᒪᕆᐅᓂᖓᓄᑦ ᐱᐅᕆ ᑐᒃᑐᓄᑦ,” ᐋᓐᑐᕌ ᒪᕼᐋ ᐅᖃᖅᑐᖅ, ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐱᓕᕆᕝᕕᖕᓂ ᑲᒪᔨᐅᕙᒃᑐᖅ ᓄᓇᕗᒥᑦ.

ᐱᐅᕆ ᑐᒃᑐᐃ, ᒥᑭᓐᓂᖅᐹᑦ ᑐᒃᑐᓂᙶᖅᑐᓂᒃ, ᓇᓗᓇᐃᖅᑕᐅᓯᒪᔪᑦ ᖁᐊᕐᓵᕐᓇᖅᑐᒦᓐᓂᖏᓐᓂᒃ ᐅᕘᓇ ᓂᕐᔪᑎᑦ ᖁᐊᕐᓵᕐᓇᖅᑐᒦᑦᑐᓄᑦ ᐱᖁᔭᕐᔪᐊᖅᒥ. ᐊᕐᕋᒎᓕᖅᑐᓂᒃ 30-ᓂᑦ, ᖃᐅᔨᓴᖅᑎᐅᔪᑦ ᐃᓱᒪᒋᔭᖃᖅᑐᑦ ᐱᐅᕆ ᑐᒃᑐᐃᑦ ᐅᓄᕐᓂᖏᑦ ᐅᓄᕈᓐᓃᖅᐹᓪᓕᕐᓯᒪᓂᖏᓐᓂᒃ 72 ᐳᓴᓐᑎᒥᑦ ᐅᑭᐅᕐᑕᖅᑐᕐᒥᑦ.

“ᐅᑭᐅᕐᑕᖅᑐᖅ, ᓄᓇᕐᔪᐊᑎᒍᑦ, ᓴᐳᔾᔭᐅᓯᒪᑦᑎᐊᕐᒪᑦ,” ᐅᖃᖅᑐᖅ ᔭᓇ ᐴᓐ, ᐋᔩᖃᑎᒌᒃᑎᐅᔪᖅ ᒥᕐᖑᐃᕐᓯᕐᕕᓕᕆᔨᒃᑯᓐᓂᑦ ᑲᓇᑕᒥ ᓴᐳᑎᓯᒪᔭᖏᓐᓄᑦ ᖃᓄᐃᓕᐅᕈᑎᑎᒍᑦ ᐊᒻᒪ ᐊᓯᐅᑎᑦᑎᑦᑕᐃᓕᓂᕐᒧᑦ ᐱᓕᕆᕝᕕᖕᒧᑦ.

“ᐅᑭᐅᕐᑕᖅᑐᖅ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐃᓱᒪᒋᔭᐅᒻᒪᕆᒃᑐᖅ ᓲᖃᐃᒻᒪ ᐅᓄᙱᒻᒪᑕ ᐃᓂᒃᓴᐃᑦ ᓂᒋᕐᒥᑦ ᓴᐳᔾᔭᐅᓯᒪᕝᕕᐅᔪᓐᓇᖅᑐᓂᒃ ᐊᒻᒪ ᐊᓯᐅᑎᑦᑎᑦᑕᐃᓕᓂᕐᒧᑦ.”

ᐴᓐ ᐅᖃᒃᑲᓐᓂᓚᐅᕐᑐᖅ ᐊᕐᕌᒍᓂ 20 ᐊᓂᒍᖅᑐᓂᒃ, ᒐᕙᒪᒃᑯᑦ ᐱᕙᓪᓕᐊᓯᒪᖕᒪᑕ ᐱᓕᕆᖃᑎᒌᖕᓂᒃᑯᑦ ᐊᐅᓚᑦᑎᓂᕐᒥᒃ ᓄᓇᕗᒥᑦ. “ᖃᓄᐃᓕᖓᓂᕗᑦ ᐊᓯᐊᒎᖅᑎᖔᓕᕋᑦᑎᒍᑦ, ᓲᕐᓗ … ᐱᓕᕆᖃᑎᖃᕈᒪᓂᕐᒧᑦ ᑎᒍᒥᐊᖅᑎᐅᖃᑕᐅᔪᓂᒃ, ᐱᔪᓐᓇᐅᑎᖃᖅᑐᓂᒃ ᐊᒻᒪᓗ ᓄᓇᖃᖅᑳᖅᑐᓂᒃ.”

ᑕᓪᓗᕈᑎᐅᑉ ᐃᒪᖓ ᒫᓃᒻᒥᔪᖅ ᑭᖑᓕᖅᐹᓂᒃ ᓯᑯᑐᖄᓗᖕᓂᑦ, ᑕᒫᓂ ᐊᐅᔭᒃᑯ ᓯᑯ ᐃᓱᒪᒋᔭᐅᔪᖅ ᐊᑯᓂᐅᓛᖑᓇᔭᕐᓂᖓᓂ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ, ᑕᒪᓐᓇᓗ ᐆᒪᔪᓄᑦ ᖁᐊᕐᓵᕐᓇᖅᑐᒦᓕᖅᑐᓄᑦ ᐃᓂᒋᔭᐅᕙᒃᖢᓂ. (ᐊᔾᔨᓕᐅᕆᔨ ᔭᐃᓐ ᔪᐊᔾ)

ᑕᐃᒪᓕ, ᑭᖑᓪᓖ ᐊᕐᕌᒍᑦ 20 ᖃᓄᐃᓕᖓᓂᐊᕐᐸ ᓄᓇᕗᑦ ᓄᓇᖏᓐᓄᑦ? ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᕐᓯᒪᔪᑦ ᑐᕙᐃᔪᐃᑦᑐᖅ (High Arctic Basin) ᐃᓱᒪᒋᔭᐅᓛᖑᓂᐊᕐᑐᖅ ᓴᐳᔾᔨᓯᒪᓂᒃᑯᑦ ᓯᕗᓂᒃᓴᑦᑎᓐᓂᑦ.

ᒍᓘᕆᐊ ᑎᑭ ᐃᒻᒥᒃᑰᖅᖢᓂ ᑐᓴᒐᒃᓴᓕᐅᕆᕙᒃᑐᖅ ᐳᕆᑎᔅ ᑲᓚᒻᐱᐊᒥ. ᑐᓴᒐᒃᓴᓕᐅᖃᑦᑕᖅᓯᒪᔪᖅ ᐅᑭᐅᕐᑕᖅᑐᕐᒧᑦ ᐅᖃᓕᒫᒐᒃᓴᓂᒃ ᐃᓚᖃᖅᖢᑎᒃ ᐅᑯᓂᖓ Arctic Deeply, Arctic Today, Yale Environment 360, Hakai, Mongabay ᐊᒻᒪ Vice.