ᐊᑯᓂᐊᓗᒃ ᐅᑕᕿᔭᕆᐊᖃᕐᓂᖅ ᐃᕐᖢᒃᑯᑦ ᕿᙳᒻᒥᒐᖅᑕᐅᔭᕆᐊᖃᕐᓂᖅ ᒥᑦᑎᒪᑕᓕᒃᒥ: ᒪᓕᒐᓕᐅᖅᑎ

For English version, see Pond Inlet residents at risk for colorectal cancer wait over a year for colonoscopies: MLA

ᒥᑦᑎᒪᑕᓕᒃᒥᐅᑕᑦ ᐅᓗᕆᐊᓇᖅᑐᒦᑐᐃᓐᓇᕆᐊᖃᕆᔭᐅᔪᑦ ᐃᕐᖢᖏᑦᑎᒍᑦ ᑲᒡᒍᑎᖃᕆᐊᒃᓴᖅ ᐅᑕᖅᑭᑯᑖᒋᐊᖃᕐᑐᑦ ᖃᐅᔨᓴᖅᑕᐅᓚᐅᖅᑎᓪᓗᒋᑦ, ᐅᖃᓚᐅᕐᑐᖅ ᑐᓄᓂᖅᒧᑦ ᒪᓕᒐᓕᐅᖅᑎ ᑭᐅᕋᓐ ᓄᑕᕋᖅ, ᑖᔅᓱᒥᖓ ᐅᖃᐅᓯᖃᓕᕆᐊᓚᐅᖅᖢᓂ ᒪᓕᒐᓕᕆᕝᕕᒃᒥ ᒪᐃ 31ᖑᑎᓪᓗᒍ.

ᐋᓐᓂᐊᖃᕐᓇᙱᑦᑐᓕᕆᔨᐅᔪᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᒃ ᒥᑦᑎᒪᑕᓕᒃᒧᐊᓚᐅᕐᒪᑕ, ᐅᖅᓱᖅᑑᖅᒧᑦ ᐊᒻᒪ ᐊᕐᕕᐊᓄᑦ ᒫᔅᓯᐅᑎᓪᓗᒍ ᑕᒪᓐᓇ ᐱᓕᕆᐊᖑᓪᓗᓂ ᖃᐅᔨᓴᕐᓂᖅ ᐃᓄᖕᓂ ᐃᕐᖢᖏᑦᑎᒍᑦ ᑲᒡᒍᑎᖃᕐᒪᖔᑕ.

“ᐃᓚᖏᑦ ᑲᒪᒋᔭᐅᔪᑦ ᑐᓴᖅᑎᑕᐅᓚᐅᕐᑐᑦ ᐅᓗᕆᐊᓇᖅᑐᒦᑐᐃᓐᓇᕆᐊᖃᕐᓂᖏᓐᓂᒃ ᐊᒻᒪᓗ ᐃᕐᓗᖏᑦᑎᒍᑦ ᑭᙳᒻᒥᒐᖅᑕᐅᔭᕆᐊᖃᕋᔭᖅᖢᑎᒃ, ᑭᓯᐊᓂᓕ ᑕᒪᓐᓇ ᐱᓕᕆᐊᕆᔭᐅᓇᔭᕐᑐᖅ ᑭᓯᐊᓂ ᐊᕐᕌᒍ ᓇᑉᐸᕐᓗ ᐊᓂᒍᖅᐸᑕ,” ᓄᑕᕋᖅ ᐅᖃᕐᑐᖅ.

ᐊᐱᕆᓚᐅᕐᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓᓄᑦ ᔮᓐ ᒪᐃᓐᒧᑦ ᖃᓄᐃᒻᒪ ᖃᐅᔨᓴᖅᑕᐅᔾᔪᑎᑦ ᑭᖑᕙᕐᓯᒪᓗᐊᕐᒪᖔᑕ. ᒪᐃᓐ ᐅᖃᓚᐅᕐᑐᖅ ᑲᓇᑕᓕᒫᒥᑦ ᑭᖑᕙᕐᓯᒪᔪᐃᓐᓇᐸᓘᓂᖏᓐᓂᒃ ᑕᒪᓐᓇ ᐱᓕᕆᐊᖑᑲᑕᓚᐅᙱᓐᓂᖓᓄᑦ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ ᐱᔾᔪᑎᒋᔭᐅᓪᓗᓂ.

ᐅᖃᓚᐅᕐᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᖃᐅᔨᓇᓱᓚᐅᕐᓂᕋᖅᖢᓂᒋᑦ ᐳᕌᕕᓐᓯᓄᑦ ᐱᓕᕆᐊᖃᕈᓐᓇᕐᒪᖔᑕ ᐃᕐᖢᒃᑯᑦ ᖃᐅᔨᓴᖅᑕᐅᓂᕐᒥᒃ, ᑭᓯᐊᓂᓕ ᑖᒃᑯᐊᑦᑕᐅᖅ ᑭᖑᕙᓯᒃᑐᓄᑦ ᐱᓕᕆᐊᖃᕈᓘᔭᕐᒥᖕᒪᑕ.

“ᖃᐅᔨᓇᓱᒃᑐᒍ ᑕᒪᓐᓇ ᖃᓄᖅ ᕿᓚᒻᒥᐅᓂᕐᓴᐅᔪᓐᓇᕆᐊᒃᓴᖓᓂᒃ,” ᒪᐃᓐ ᐅᖃᕐᑐᖅ.

ᓄᑕᕋᖅ ᐊᐱᕆᓚᐅᕐᑐᖅ ᖃᓄᐃᑦᑐᓂᒃ ᐃᑲᔪᕈᑎᑕᖃᕐᒪᖔᑦ ᐅᑕᖅᑭᔪᓄᑦ ᐃᕐᖢᖏᑦᑎᒍᑦ ᖃᐅᔨᓴᖅᑕᐅᓂᐊᕐᓂᖏᓐᓂᒃ.

“ᐃᓱᒪᕈᓘᔭᕐᓇᕐᒪᓐ ᐅᖃᐅᔾᔭᐅᓪᓗᓂ ᐅᓗᕆᐊᓇᖅᑐᒦᓐᓇᔭᕆᐊᒃᓴᒥ ᐊᒻᒪᓗ ᖃᐅᔨᓴᖅᑕᐅᔭᕆᐊᖃᖅᖢᑎᒃ ᑭᓯᐊᓂᓕ ᐊᑯᓂᒻᒪᕆᐊᓗᒃ ᐅᑕᖅᑭᔭᕆᐊᖃᖅᖢᑎᒃ,” ᐅᖃᕐᑐᖅ.

ᒪᐃᓐ ᐅᖃᐅᓯᖃᐅᓚᐅᕐᑐᖅ ᐊᔾᔨᒌᙱᑦᑑᑎᓂᒃ ᐃᓱᒪᔪᑦ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᑭᒃᑯᑐᐃᓐᓇᕐᓄᑦ ᓄᓇᕗᒥᑦ ᐊᒻᒪᓗ ᐅᓂᒃᓯᒪᓂᒃᑯᑦ ᑲᒪᒋᔭᐅᔪᓐᓇᕐᓂᕐᒥᒃ ᐅᕝᕙᓘᓐᓃᑦ ᐃᓅᓯᓕᕆᔭᐅᓂᕐᒥᒃ.

ᐅᖃᓚᐅᕐᑐᖅ ᐃᕐᖢᒃᑯᑦ ᑲᒡᒍᑎᖃᕐᓂᖅ ᑐᒡᓕᕆᔭᐅᓂᖓᓂᒃ ᑲᒡᒍᑎᒋᔭᐅᕙᒃᑐᓂᒃ ᓄᓇᕗᒥᑦ, ᐅᖃᐅᓯᖃᖅᖢᓂ 19 ᐳᓴᓐᑎᒋᔭᐅᔪᑦ ᑲᒡᒍᑎᖃᖅᑐᓂᒃ ᓄᓇᕗᒥᑦ 1999ᒥ 2011ᒧ.

ᓄᓇᑦᓯᐊᕐᒥ ᐱᕙᓪᓕᐊᔪᑦ ᐊᐱᕆᓚᐅᕐᑐᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐳᓴᓐᑎᒋᔭᐅᔪᓂᒃ ᓄᓇᕗᒻᒥᐅᓂᒃ ᖃᐅᔨᓴᖅᑕᐅᓚᐅᕐᑐᓂᒃ ᐊᒻᒪ ᐅᓗᕆᐊᓇᖅᑐᒦᓐᓇᓱᒋᔭᐅᔪᓂᒃ ᐃᕐᖢᒃᑯᑦ ᑲᒡᒍᑎᖃᕐᓂᕐᒧᑦ ᐊᒻᒪᓗ ᓇᓗᓇᐃᕐᓯᖁᔨᓪᓗᑎᒃ ᐅᑕᕿᓂᐅᔭᕆᐊᓕᖕᒥ ᑲᒪᒋᔭᐅᓂᒃᓴᒥᒃ.

ᑭᒡᒐᖅᑐᐃᔨᒋᔭᐅᔪᑦ ᑭᐅᓚᐅᙱᒻᒪᑕ ᐅᓇ ᑎᑎᕋᐅᓯᐅᓕᖅᑎᓪᓗᒍ.