ᐊᑯᓕᕕᒃᒥᐅᑕᖅ ᐃᓅᓱᒃᑐᖅ ᐃᒡᓗᕋᓛᓕᐅᕐᑐᖅ ᓄᓇᖃᖅᑐᓂᒃ ᐊᑐᖅᑕᐅᖃᑦᑕᕐᓂᐊᖅᑐᒥ ᐊᐅᓪᓚᖅᓯᒪᓂᒃᑯᑦ ᐱᓕᕆᐊᖃᖅᑐᓄᑦ

ᐃᒡᓗᓕᐅᕐᓂᖅ ᐊᔪᕈᓐᓃᖅᓴᖅᑎᑦᑎᔾᔪᑎᐅᔪᖅ ᐃᓅᓱᒃᑐᓂᒃ ᕿᔪᓕᕆᔨᐅᓂᕐᒥᒃ, ᐃᒻᒥᖕᓂᒡᓗ ᐅᒃᐱᕆᔪᓐᓇᕐᓯᓂᕐᒥᒃ

ᐃᓅᓱᒃᑐᖅ ᐊᑯᓕᕕᒃᒥ ᐱᓇᓱᐊᕈᓯᕐᓂ ᐱᖓᓱᓂ ᐃᒡᓗᕋᓛᓕᐅᓚᐅᕐᑐᖅ ᓄᓇᓖᑦ ᓯᓚᑖᓂ ᐃᓚᒋᔭᐅᓪᓗᓂ ᐃᑳᖅᑐᐃᑦ ᐱᓕᕆᐊᒧᑦ, ᑖᓐᓇᓕ ᐃᓕᓐᓂᐊᖅᑎᑦᑎᔾᔪᑎᐅᔪᖅ ᕿᔪᓕᕆᔨᐅᔪᓐᓇᕐᓂᕐᒥᒃ ᐊᒻᒪ ᐃᒻᒥᖕᓂ ᐅᒃᐱᕆᔪᓐᓇᕐᓯᓂᕐᒥᒃ. (ᐊᔾᔨᙳᐊᖅ ᐅᕙᙵᑦ ᔭᓯᑲ ᒋᒨᓐ-ᕙᓚᓅ)

By ᔨᐊᕝ ᐱᐊᓯᐄ

For English version, see Akulivik youth build cabin for community, land activities

ᓄᑖᖅ ᐃᒡᓗᕋᓛᒃᓴᖅ ᐊᑐᖅᑕᐅᔪᓐᓇᖅᓯᔪᖅ ᐊᑯᓕᕕᐅᑉ ᖃᓂᒋᔭᖓᓂ, ᖁᔭᓐᓇᒦᑦ ᐃᓅᓱᒃᑐᓂᒃ ᓄᓇᖃᖅᑐᓂᒃ.

ᑖᒃᑯᐊ ᐱᓕᕆᖃᑎᒌᓚᐅᕐᑐᑦ, ᐊᕐᕌᒍᖃᖅᖢᑎᒃ 15-ᓂ 20-ᓄ, ᐃᓚᐅᓚᐅᕐᒪᑕ ᐃᑳᖅᑐᐃᑦ ᐱᓕᕆᐊᒥᒃ, ᑖᓐᓇᓕ ᑐᕌᒐᖃᓗᐊᖅᑐᖅ ᕿᔪᓕᕆᔪᓐᓇᖅᓯᑎᑦᑎᓂᕐᒥᒃ ᐊᒻᒪᓗ ᐃᓚᖃᖅᖢᓂ ᐃᓕᖅᑯᓯᒃᑯᑦ ᐱᓕᕆᐊᖑᕙᒃᑐᓂᒃ ᐊᐅᓪᓚᖅᓯᒪᓪᓗᓂ.

ᐅᓇ ᐋᖅᑭᒃᑕᐅᓯᒪᔪᖅ ᐅᑯᓇᙵ Jeunes Karibus, ᓄᓇᕕᒻᒥ ᐃᓅᓱᒃᑐᓂᒃ ᐱᕙᓪᓕᐊᔪᓕᕆᔨᓂᒃ. 8 ᐃᓅᓱᒃᑐᑦ ᐱᓕᕆᐊᖃᓚᐅᕐᑐᑦ ᔫᓂ 6-ᒥ 24-ᒧ.

“ᐅᓇ ᐱᓕᕆᐊᒃᓴᖅ ᐊᓂᒍᑦᑎᐊᒻᒪᕆᓚᐅᕐᑐᖅ ᑕᒪᑐᒪᓂ ᐊᕐᕌᒍᒥ,” ᐅᖃᕐᑐᖅ ᕼᐃᐅᑯ ᑎᕗᕇᓐ, ᐊᐅᓚᑦᑎᔨᒋᔭᐅᔪᖅ

Jeunes Karibus-ᑯᓐᓂ, ᐊᐱᖅᓱᖅᑕᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

“ᐱᓇᓱᐊᕈᓯᕐᓂ ᐱᖓᓱᓂ ᑖᒃᑯᐊ ᐅᐸᒍᑎᖃᑦᑕᐃᓐᓇᓚᐅᖅᑐᑦ ᐅᓪᓛᑕᒫᓐ ᐱᓕᕆᔭᖅᑐᖅᖢᑎᒃ ᐊᒻᒪᓗ ᐱᓕᕆᐊᖃᑦᑎᐊᒻᒪᕆᓚᐅᖅᑐᑦ ᐃᒡᓗᕋᓛᒥᒃ.”

ᐃᒡᓗᕋᓛᖅ, ᒫᓐᓇ ᐊᑐᐃᓐᓇᐅᓕᕐᑐᖅ ᓄᓇᖃᖅᑐᓄᑦ, ᐊᐃᑉᐸᕆᔭᐅᔪᖅ ᓴᓇᔭᐅᓯᒪᔪᓂᒃ ᐃᑳᖅᑐᐃᑦ ᐱᓕᕆᐊᑎᒍᑦ. 2021-ᖑᑎᓪᓗᒍ, ᐃᓅᓱᒃᑐᑦ ᐃᒡᓗᕋᓛᓕᐅᓚᐅᕐᓯᒪᔪᑦ ᑰᔾᔪᐊᖅᒥᓐ.

ᐅᓇ ᐱᓕᕆᐊᒃᓴᖅ ᑐᕌᖓᓗᐊᖅᑐᖅ ᐃᓅᓱᒃᑐᓄᑦ ᓄᓇᕕᒻᒥ ᐃᓕᓐᓂᐊᕈᒪᑦᑎᐊᙱᑦᑐᓄᑦ, ᑎᕗᕇᓐ ᐅᖃᓚᐅᕐᑐᖅ. ᑖᒃᑯᓇᓂ ᐱᓇᓱᐊᕈᓯᕐᓂ ᐱᖓᓱᓂᒃ ᐃᓕᓐᓂᐊᖅᖢᑎᒃ ᑖᒃᑯᐊ ᕿᔪᓕᕆᔨᐅᓂᕐᒧᑦ ᓇᓗᓇᐃᒃᑯᑎᑖᓚᐅᕐᑐᑦ ᐊᒻᒪᓗ ᐊᔪᕈᓐᓃᖅᐹᓪᓕᕐᓂᕐᒥᒃ ᐊᑐᖅᖢᑎᕐᒃ ᕿᔪᓕᕆᔨᒃᑯᑦ ᓴᓇᕐᕈᑎᖏᓐᓂᒃ.

“ᐃᓱᒪᔪᖓᓕ ᑖᔅᓱᒥᖓ ᐃᓚᐅᔪᑦ ᐃᖕᒥᓂᒃ ᐅᒃᐱᕆᔪᓐᓇᕐᓯᓂᖏᓐᓂᒃ,” ᐅᖃᕐᑐᖅ. “ᐃᓕᖕᓂ ᐅᒃᐱᕆᔪᓐᓇᕐᓗᑎ ᐊᒻᒪ ᐊᔪᙱᓐᓂᖃᕐᓗᑎᑦ ᑕᐃᒪᓕ ᐊᓯᙳᖅᑎᑦᑎᔪᓐᓇᖅᑐᑎᑦ ᐃᓅᓰᑦ ᖃᓄᐃᓕᖓᓂᖓᓂᒃ.”

ᐋᓕ ᕿᓄᐊᔪᐊᒃ, ᐃᓅᓱᒃᑐᖅ ᐃᓚᐅᓚᐅᕐᑐᖅ ᐊᑯᓕᕕᒃᒥᓐ ᐃᒡᓗᕋᓛᓕᐅᖅᑐᓂᒃ, ᐅᖃᐅᓯᖃᕈᓐᓇᓚᐅᖅᑐᖅ ᐱᓕᕆᖃᑕᐅᓯᒪᓂᕐᒥᓂᒃ ᐃᓕᓐᓂᐊᖅᑎᓪᓗᒋᑦ.

ᑎᑎᕋᖅᑕᐅᓂᑯᓂᒃ ᕙᐃᔅᐳᒃ ᑎᑎᕋᕐᕕᖓᓂᒃ, ᕿᓄᐊᔪᐊᒃ ᐅᖃᓚᐅᕐᑐᖅ “ᖁᕕᐊᓇᑦᑎᐊᒻᒪᕆᓚᐅᕐᑐᖅ ᐃᓚᐅᓪᓗᓂ.”

ᕿᓄᐊᔪᐊᒃ ᐅᖃᓚᐅᕐᑐᖅ ᐊᔪᕈᓐᓃᓚᐅᕐᓂᖓᓂᒃ ᓴᓇᕐᕈᑎᓂᒃ ᐊᑐᖃᑦᑕᕐᓂᕐᒥᒃ ᐊᒻᒪᓗ ᐊᔪᕈᓐᓃᖅᑕᖏᓐᓄᑦ ᐊᓯᖏᓐᓂ ᐃᒡᓗᓕᐅᕐᓂᕐᒥᒃ ᐱᓕᕆᐊᖃᕐᓂᐊᕈᒪᓪᓗᓂ ᓄᓇᖓᓂ.

ᐃᑳᖅᑐᐃᑦ ᐱᓕᕆᐊᒃᓴᖅ ᐃᑲᔫᑎᖃᕐᓂᒃᑰᖓᔪᖅ ᓄᓇᕕᒃᒥ ᐅᑯᓇᙵᑦ ᑲᑎᕕᒃ ᐃᓕᓴᕐᓂᓕᕆᓂᖅᑯᓐᓂᒃ; ᑲᑎᕕᒃᒥ ᓄᓇᓕᓕᒫᑦ ᒐᕙᒪᖓᓂᒃ ᐅᕘᓇ ᐃᓱᒪ ᐱᓕᕆᐊᒃᓴᑎᒍᑦ ᐃᓅᓱᒃᑐᓂᒃ ᐃᓕᓐᓂᐊᒃᑲᓐᓂᕈᑎᓕᕆᔨᓂᒃ ᐊᒻᒪᓗ ᓴᓇᔩᑦ ᐱᓕᕆᐊᑎᒍᑦ ᐊᒻᒪᓗ ᐃᑲᔫᑎᖃᖅᑎᑦᑎᕙᒃᖢᑎᒃ ᐊᑐᒃᑲᓐᓂᕈᓐᓇᖅᑐᓕᕆᓂᕐᒥᒃ; ᐊᒻᒪᓗ ᒪᑭᕕᒃᑯᓐᓂᒃ.

ᐃᓅᓱᒃᑐᑦ ᐃᓚᐅᔪᑦ ᐊᑭᓕᖅᑕᐅᓚᐅᕐᑐᑦ ᐱᓕᕆᐊᖓᓐᓄᑦ.

ᐃᒡᓗᕋᓛᓕᐅᕐᓂᖅ ᐊᕐᕌᒍ ᐊᑐᖅᑕᐅᒃᑲᓐᓂᓛᖅᑐᖅ, ᑎᕗᕇᓐ ᐅᖃᕐᑐᖅ, ᐅᕙᓃᓐᓂᐊᕋᓱᒋᓪᓗᓂᐅᒃ ᐊᐅᐸᓗᒃᒥ. ᐱᖁᑎᒃᓴᐃᑦ ᐊᑐᖅᑕᐅᓂᐊᖅᑐᑦ ᐊᕐᕌᒍ ᐃᒡᓗᓕᐅᕐᑎᓪᓗᒋᑦ ᐊᐅᔭᐅᔪᖅ ᑎᑭᑎᑕᐅᓂᐊᖅᑐᑦ ᐅᒥᐊᕐᔪᐊᖃᕐᓇᕐᓂᖓᓂᒃ ᐊᒻᒪᓗ ᐊᑐᐃᓐᓇᐅᓕᕐᓯᒪᓗᑎᒃ ᓴᓇᔪᓐᓇᓛᕐᒃᒪᑕ ᐊᐅᔭᐅᓛᕐᑐᖅ.

“ᑐᕌᒐᕆᓂᕐᓴᐅᓂᐊᖅᑕᕗᓪᓕ ᓄᓇᓖᑦ ᐃᓄᑭᓐᓂᕐᓴᐃᑦ … ᓲᖃᐃᒻᒪ ᑖᒃᑯᓇᓂ ᑭᓱᓕᕆᓐᓇᙱᓐᓂᕐᓴᐅᕙᖕᒪᑦ ᐊᐅᔭᒃᑯᑦ,” ᐅᖃᕐᑐᖅ. “ᐊᐅᐸᓗᒃ ᓈᒻᒪᑦᑎᐊᖅᑦᑐᖅ ᐊᕐᕌᒍ ᐱᓕᕆᐊᕆᓂᐊᕐᓗᒍ.”

Share This Story

(0) Comments

Join the Conversation

Your email address will not be published. Required fields are marked *

*