ᐅᓇ ᐊᑭᓐᓇᕐᒥᐅᑕᖅ ᐃᓚᒋᔭᐅᓚᐅᕐᑐᖅ ᖃᖓᑦᑎᐊᓵᖅ ᐱᕐᕈᓗᐊᕿᑦᑕᐃᓕᓂᕐᒧᑦ ᐅᔾᔨᕈᓱᓕᖅᑎᑦᑎᓇᓱᒃᖢᑎᒃ ᐊᒡᓂᑯ ᐄᑯᓪ ᐅᔭᕋᒃᓯᐅᖅᕕᒃᑯᓐᓂᒃ. ᑳᒻᐸᓂᐅᔪᑦ ᒪᒥᐊᓚᐅᕐᑐᖅ ᐊᒻᒪᓗ ᑖᒃᑯᓂᖓ ᐲᔭᖅᓯᓯᒪᓕᖅᖢᑎᒃ. (ᐊᔾᔨᙳᐊᖅ ᐅᑯᓇᙵᑦ ᐊᒡᓂᑯ ᐃᑯᓪ)
ᐊᒡᓂᑯ ᐄᑯᓪ ᐊᑐᕈᓐᓃᖅᑎᑦᑎᕗᑦ ‘ᖃᓪᓗᓈᑐᑦ ᓯᕗᓪᓕᖅ’ ᐱᕐᕈᓗᐊᕿᑎᑦᑎᑦᑕᐃᓕᓂᕐᒥᒃ ᐅᔾᔨᕈᓱᓕᕆᑎᖓᓂᒃ
ᑎᑎᕋᖅᓯᒪᔪᖅ ᐃᒪᓐᓇ ᐅᖃᖅᓯᒪᔭᕆᐊᖃᓚᐅᕐᑐᖅ ‘ᐱᕐᕈᓗᐊᕿᑦᑕᐃᓕᓂᖅ ᓯᕗᓪᓕᐅᔭᕆᐊᓕᒃ,’ ᐅᔭᕋᒃᓯᐅᖅᕕᒃᑯᑦ ᒪᒥᐊᑦᑐᑦ
For an English version of this story, see Agnico Eagle retracts ‘English is first’ safety campaign after backlash
ᖃᖓᑦᑎᐊᓵᖅ ᓈᒻᒪᒋᔭᐅᑲᑕᙱᐊᓪᓚᓚᐅᖅᖢᑎᒃ ᐊᑭᓐᓇᒥᐅᑕᒥ ᐊᔾᔨᙳᐊᒥ ᐅᖃᖅᓯᒪᓪᓗᓂ “ᖃᓪᓗᓈᑐᑦ ᓯᕗᓪᓕᐅᔪᖅ,” ᐅᑯᐊ ᐊᒡᓂᑯ ᐄᑯᓪ ᐅᔭᕋᒃᓯᐅᕐᕕᒃ ᓕᒥᑎᑦ, ᓄᓇᕗᒥ ᐅᓄᕈᓘᔭᒻᒪᕆᒃᑐᓂᒃ ᐅᔭᕋᒃᓯᐅᖅᕕᓖᑦ ᓄᓇᕗᒥᑦ, ᒪᒥᐊᓕᓚᐅᕐᑐᑦ ᐊᒻᒪ ᓴᖅᑭᔮᕈᓐᓃᖅᑎᑦᑎᓪᓗᑎᒃ ᑖᒃᑯᓂᖓ.
ᑖᒃᑯᐊ ᐊᑭᓐᓇᕐᒥᐅᑕᖅ, ᐃᒪᓐᓇᑦᑕᐅᖅ ᑎᑎᖃᖃᕐᒥᔪᖅ “ᐅᖃᕈᕕᑦ ᐊᑏ” — ᑐᑭᓕᒃ ‘ᐆᑮ’ ᐅᕙᓘᓐᓃᑦ ‘ᐊᑏ’ — “ᑐᓴᖃᑦᑕᕐᒪᑕ ‘ᐊᑏ’ᒥ “ᐊᒻᒪᓗ ᑐᑭᓕᐅᕆᓯᒪᔪᓄᑦ ᐊᓯᐅᑦᑕᐃᓕᒋᑦ,” ᑖᓐᓇᓗ ᐅᓄᕈᓘᔭᖅᑐᓄᑦ ᐅᔾᔨᕆᔭᐅᓗᐊᖅᖢᓂ ᐅᓇ ᐱᐊᑭ ᕼᐋᓐ, ᐃᓄᒃ ᑎᑕᑲᑕᒃᑎ ᐊᒻᒪᓗ ᐃᓄᒃᑎᑐᑦ ᐅᖃᐅᓯᕐᒥ ᐊᓯᐅᑎᑦᑎᑦᑕᐃᓕᔨ, ᐅᖃᓚᐅᕐᑐᖅ ᑖᒃᑯᐊ ᑲᒻᐸᓃᑦ ᐃᖅᑲᓇᐃᔭᖅᑎᖏᓐᓂᒃ ᐃᓄᒃᑎᑐᑦ ᐅᖃᕈᓐᓇᖅᓯᑎᖔᓪᓗᐊᖅᑕᖏ ᓲᖃᐃᒻᒪ ᐃᓄᐃᑦ ᓄᓇᖓᓃᒻᒪᑕ.
ᓛᓂ ᓯᕗᕋᑦ, ᑲᒻᐸᓂᒃᑯᑦᓄᑦ ᖃᐅᔨᒪᔨᒋᔭᐅᔪᖅ ᓄᓇᕗᒥᑦ ᐊᐅᓚᑕᐅᔪᓄᑦ, ᐅᖃᓚᐅᕐᑐᖅ ᐊᐱᖅᓱᖅᑕᐅᓪᓗᓂ “ᐃᒪᓐᓇᐅᓂᐊᓚᐅᕐᑑᒐᓗᐊᕐ ‘ᐱᕐᕈᓗᐊᕿᑦᑕᐃᓕᓂᖅ ᓯᕗᓪᓕᐅᓗᓂ.’”
“ᑕᒪᓐᓇ ᐱᓕᕆᐊᖑᓇᓱᑦᑎᐊᓚᐅᕋᓗᐊᖅᖢᓂ ᐱᔾᔪᑎᖃᕐᑎᐊᕐᓗᓂ, ᑕᐃᒪᓕ ᐱᓕᕆᑦᑎᐊᙱᒻᒪᕆᓚᐅᕋᑦᑕ ᐊᑐᓕᖅᑎᑦᑎᓇᓱᖕᓂᒃᑯᑦ ᐊᒻᒪᓗ ᖃᓄᖅ ᑐᑭᖃᖅᑎᑦᑎᓇᓱᖕᓂᑦᑎᓐᓂᒃ.”
ᐊᑭᓐᓇᕐᒥᐅᑕ ᐃᓚᒋᔭᐅᓚᐅᕐᑐᑦ ᐱᕐᕈᓗᐊᕿᑎᑦᑎᑦᑕᐃᓕᓂᕐᒥᒃ ᐅᔾᔨᕈᓱᓕᖅᑎᑦᑎᓂᕐᒥᒃ ᐊᒻᒪᓗ ᖃᓪᓗᓈᑐᑦ ᐅᖃᐅᓯᐅᓚᐅᕐᓂᖓᓂᒃ ᐱᓕᕆᐊᖃᕐᓂᒃᑯᑦ, ᓯᕗᕋᑦ ᐅᖃᓚᐅᕐᑐᖅ.
ᐱᕐᕈᓗᐊᕿᑎᑦᑎᑦᑕᐃᓕᓂᕐᒧᑦ ᐊᒻᒪᓗ ᑐᑭᓯᖃᑦᑕᐅᑎᙱᓗᐊᔭᓐᓂᕐᒧᑦ, ᐅᖃᓚᐅᕐᑐᖅ ᑕᒪᕐᒥᓕᒫᖅ ᐃᖅᑲᓇᐃᔮᒧᑦ ᑐᓴᐅᒪᔾᔪᑎᐅᔭᕆᐊᖃᖅᑐᑦ ᐊᑕᐅᓯᕐᒥ ᐅᖃᐅᓯᕐᒥ ᐊᑐᖅᑕᐅᓗᓂᐅᔭᕆᐊᖃᕐᓂᖓᓂᒃ.
ᐅᖃᖅᖢᓂ ᐊᓯᖏᑦ ᐊᑭᓐᓇᕐᒥᐅᑕᑦ ᑕᐃᒪᓐᓇᑦᑕᐃᓐᓇ ᐅᖃᐅᓯᖃᕋᓱᒃᑐᑦ ᐅᐃᕖᑐᓪᓗ ᐋᖅᑭᒃᓱᖅᑕᐅᓚᐅᕐᓂᕋᖅᖢᓂᒋᑦ ᑖᒃᑯᐊ ᑲᒻᐸᓂᐅᔪᑦ ᐃᖅᑲᓇᐃᔭᖅᑎᑖᖃᑦᑕᕐᓂᖏᓐᓄᑦ ᑲᓇᑕᒥᙶᖅᑐᓂᒃ.
ᐳᔾᔫᑦ ᑯᓱᒐᖅ, ᑐᑭᒧᐊᖅᑎᑦᑎᔨ ᑲᒻᐸᓂᒧᑦ ᓄᓇᕗᒥᑦ ᐱᓕᕆᐊᓄᑦ, ᐅᖃᓚᐅᕐᑐᖅ 30 ᐳᓴᓐᑎᓪᓗᐊᑦ ᑲᒻᐸᓂᕐᒧᑦ ᐃᖅᑲᓇᐃᔭᖅᑎ ᐃᓅᓂᖏᓐᓂᒃ ᓄᓇᕗᒥᐅᑕᐅᓪᓗᑎᒃ.
ᑯᓱᒐᖅ ᐅᖃᓚᐅᕐᑐᖅ ᖃᐅᔨᒪᓚᐅᙱᓐᓂᕋᖅᖢᓂ ᐃᓄᒃᑎᑐᑐᐃᓐᓇᖅ ᐅᖃᕈᓐᓇᖅᑐᓂᒃ ᐃᖅᑲᓇᐃᔭᖅᑎᖃᕆᐊᒃᓴᖅ, ᑭᓯᐊᓂᓕ ᐅᓄᕐᓂᖅᓴᐃᑦ ᖃᓪᓗᓈᑐᑦ ᐅᖃᕈᓐᓇᖅᑐᑦ ᐃᓄᒃᑐᑦ ᐅᖃᐅᓯᖃᖅᑳᖅᓯᒪᔪᑦ.
“ᑐᑭᓯᔭᐅᓯᒪᑦᑎᐊᕐᒪᑦ ᐃᖅᑲᓇᐃᔭᖅᑎᓄᑦ ᐊᑕᐅᓯᕐᒥᒃ ᐅᖃᐅᓯᕐᒥ ᐊᑐᖃᑦᑕᕐᓂᕐᒥᒃ ᑐᓴᐅᒪᖃᑦᑕᐅᑎᑦᑎᓂᒃᑯᑦ ᖃᓄᐃᖁᓇᒋᑦ ᐃᖅᑲᓇᐃᔭᖅᑎᐅᔪᑦ,” ᐅᖃᖅᑐᖅ.
ᑯᓱᒐᖅ ᐅᖃᓚᐅᕐᑐᖅ ᐃᖅᑲᓇᐃᔭᕐᓇᕈᓃᕌᖓᑦ ᐃᓕᖅᑯᓯᖃᑎᒌᙱᑦᑑᒐᓗᐊᑦ ᐅᖃᓪᓚᖃᑎᒌᕈᓘᔭᓕᖃᕐᑕᕐᒪᑕ, ᓲᕐᓗ, ᐃᓄᐃᑦ ᐃᖅᑲᓇᐃᔭᖅᑎᐅᔪᑦ ᐃᓄᒃᑎᑐᑦ ᐅᖃᐅᓯᕐᓂᒃ ᐊᔪᕈᓐᓃᖅᓴᖅᑎᑦᑎᓇᓱᒃᖢᑎᒃ ᐊᒻᒪ ᓄᓇᕗᑦ ᒥᒃᓵᓄᑦ.
“ᑕᐃᒪᓐᓇ ᐃᖅᑲᓇᐃᔭᕐᕕᖃᑦᑎᐊᕐᓇᕐᓂᕐᓴᐅᖃᑦᑕᕐᒪᑦ ᑭᒃᑯᓕᒫᓄᑦ, ᑕᐃᒪᐃᑎᓪᓗᒋ ᖃᓄᐃᒋᙱᑦᑎᐊᖅᑕᕗᑦ.”
ᐊᒡᓂᑯ ᐄᑯᓪ ᒪᒥᐊᓕᓚᐅᕐᑐᑦ ᓄᓇᕗᒻᒥᐅᓄᑦ ᐃᖅᑲᓇᐃᔭᖅᑎᖏᓐᓄᑦ ᓄᓇᓕᖏᓄᓪᓗ ᐱᓕᕆᕝᕕᒋᖃᑦᑕᕐᑕᖏᓐᓄᑦ ᓯᑎᐱᕆ 29-ᖑᑎᓪᓗᒍ.
“ᐊᒡᓂᑯ ᐄᑯᓪ ᖃᐅᔨᒪᔪᑦ ᓄᓇ ᐊᐅᓚᑦᑎᕝᕕᒋᔭᕗᑦ ᓄᓇᕗᒥᑦ ᓇᖕᒥᓂᕆᔭᐅᓂᖓᓂᒃ ᐊᒻᒪᓗ ᐃᓄᖕᓄᑦ ᐊᖅᑕᐅᖃᑦᑕᐃᓐᓇᐅᔭᕐᓂᖓᓂᒃ ᐊᒻᒪᓗ ᐳᓛᖅᑎᑐᐃᓐᓇᐅᓂᑦᑎᓐᓂᒃ ᓄᓇᖓᓂᒃ,” ᑐᓴᒐᒃᓴᖏᑦ ᐅᖃᖅᓯᒪᓚᐅᕐᑐᑦ.
ᑳᓖᓐ ᐋᕆᐊᒃ, ᓄᓇᕗᑦ ᐅᖃᐅᓯᕐᓄᑦ ᑲᒥᓯᓇ, ᐅᖃᓚᐅᕐᑐᖅ ᓈᒻᒪᒃᓴᙱᑦᑐᓂᒃ ᐅᖃᕐᓯᐅᑲᑕᒃᓯᒪᓕᕐᓂᖓᓂᒃ ᐆᒧᖓ “ᖃᓪᓗᓈᑐᑦ ᓯᕗᓪᓕᖅ” ᐊᑭᓐᓇᒥ ᓴᖅᑭᔮᒃᑐᒃᓴᐅᑉ ᒥᒃᓵᓄᑦ ᐊᒻᒪ ᑐᓴᖅᑎᑕᐅᒃᑲᓐᓂᕐᓂᐊᕋᓱᒋᓪᓗᓂ ᓱᓕ.
ᐋᕆᐊᒃ ᑎᑎᕋᕐᕕᖓ ᖃᐅᔨᓴᖅᑎᑦᑎᓕᓚᐅᕐᑐᑦ ᑕᐃᒪᓐᓇᓗ ᑐᓴᒐᒃᓴᓕᐅᕈᑎᒋᔭᐅᔪᖅ ᒪᓕᒐᕐᓂᒃ ᓱᕋᐅᓯᒪᔭᕆᐊᒃᓴᖓᓂ ᖃᐅᔨᓇᓱᖕᓂᐊᖅᖢᑎᒃ.
ᓲᕐᓗ ᐃᒪᓐᓇ, ᓄᓇᕗᒥᑦ ᐅᖃᐅᓯᕐᓄᑦ ᒪᓕᒐᖅ ᐃᓚᖃᕐᒪᑦ ᐃᓄᐃᑦ ᐅᖃᐅᓯᖏᓐᓂᒃ ᐆᑐᓇᖅ ᐃᓄᒃᑎᑐᑦ ᐅᖃᐅᓯᓪᓚᕆᐅᓕᕐᓗᓂ ᓄᓇᕗᒥᑦ ᐊᒻᒪᓗ ᑲᑐᔾᔨᖃᑎᒌᖑᔪᓂᒃ ᓄᓇᕗᒥᑦ ᐱᓕᕆᐊᖃᖅᑐᓂᒃ ᐃᓄᐃᑦ ᐅᖃᐅᓯᖓᒍᑦ ᐱᔨᑦᑎᕋᐅᑎᖃᖁᔨᓪᓗᑎᒃ.
ᐊᓯᖏᑦ ᒪᓕᒐᐃᑦ, ᐆᑐᓇᖅ ᐃᓄᐃᑦ ᐅᖃᐅᓯᖓᓂᒃ ᓴᐳᔾᔨᓯᒪᓂᕐᒧᑦ ᒪᓕᒐᖅᑎᑐᖅ ᐊᒻᒪ ᐊᑐᕈᑎᖃᕆᐊᖃᕐᒪᑕ, ᐅᖃᖅᑐᖅ.
ᐋᕆᐊᒃ ᐅᖃᓚᐅᕐᑐᖅ ᐊᑭᓐᓇᒥᐅᑕᐅᑉ ᒥᒃᓵᓄᑦ ᖃᐅᔨᓴᖅᑕᐅᕙᓪᓕᐊᓂᖓᓄᑦ, ᑭᓯᐊᓂᓕ ᐅᖃᓚᐅᕐᑐᖅ ᐅᑯᐊ ᐊᒡᓂᑯ ᐄᑯᓪᑯᑦ ᖃᐅᔨᑎᑕᐅᓚᐅᕐᓂᕋᖅᑕᖏᑦ ᖃᐅᔨᓴᕈᑎᒥᒃ.
“ᑕᒪᓐᓇ ᓇᓗᓇᙱᑦᑐᖅ ᐃᓄᐃᑦ ᐅᖃᖃᑦᑕᕈᓐᓇᕐᒪᑕ ᐅᖃᐅᓯᖏᓐᓄᑦ ᐱᔪᓐᓇᐅᑎᖏᑦᑕ ᒥᒃᓵᓄᑦ,” ᐅᖃᖅᑐᖅ.
ᐅᓇ ᑕᐃᒪᐃᔾᔪᑎᖃᓗᐊᖅᑐᖅ ᐅᓇ ᐅᓪᓗᖅ ᓯᑎᐱᕆ 30 ᓱᓕᕆᓂᕐᒧᑦ ᐊᒻᒪ ᐋᖅᑭᒋᐊᒃᑲᓐᓂᕐᓂᕐᒧᑦ ᐅᓪᓗᕆᔭᐅᑎᑕᐅᓕᖅᑎᓪᓗᒍ, ᐋᕆᐊᒃ ᐅᖃᖅᑐᖅ, ᐅᖃᒃᑲᓐᓂᖅᖢᓂ “ᐱᓗᐊᖅᑐᒥᑦ” ᐃᓄᐃᑦ ᐅᖃᐅᓯᖏᓐᓂᒃ ᐃᓕᓐᓂᐊᕆᐊᕐᕕᒃᓂᒃ ᐊᑐᖁᔭᐅᕙᓚᐅᖅᓯᒪᙱᑎᓪᓗᒋᑦ.
“ᐅᖃᐅᓯᑦᑎᓐᓂ ᐱᓯᒪᐃᓐᓇᕋᑦᑕ ᐊᑯᓂᐊᓗᒃ ᒫᓐᓇᒧ ᐊᒻᒪᓗ ᐱᒃᑯᒋᔭᕆᐊᖃᖅᖢᑎᒍᑦ ᐊᓯᐅᑐᐃᓐᓇᙱᒻᒪᑦ,” ᐅᖃᖅᑐᖅ.
(0) Comments