ᐊᒻᐸᓯ ᕗᐃᐊᔅᑦ ᒪᓕᒋᐊᖃᕐᓂᖏᑦ ᐱᖁᔭᓂᒃ ᑕᒻᒪᖅᑕᐅᓯᒪᕗᑦ: ᐃᓐᓇᑐᖃᕐᓄᑦ ᐊᐅᓚᑦᑎᔨ

ᑎᑎᕋᖅᑕᐅᔪᕕᓃᑦ ᑕᖅᑭᐅᓚᐅᕐᑐᒥ ᐅᖃᕐᓯᒪᓪᓗᓂ ᐃᓄᐃᑦ ᐃᓐᓇᐃᑦ ᐋᑐᕚᒥ ᑲᒪᒋᔭᐅᕝᕕᒃᒥ ᐃᓕᖅᑯᓯᑎᒍᑦ ᓈᒻᒪᙱᓕᐅᕈᑎᖃᕐᐳᑦ

ᐸᐃᕆᔩᑦ ᑎᒍᒥᐊᖅᑎᒃᑯᑦ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᖓ ᕇᓱᓪ ᕿᑦᓱᐊᓕᒃ-ᑎᓐᔅᓕ (ᓴᐅᒥᐊᓂ) ᐊᒻᒪ ᐋᓐ ᑯᕌᕗᑦ, ᐃᖃᓗᖕᓂ ᓗᐊᐃᔭ ᐱᓕᕆᐊᖃᖅᖢᓂ ᐃᓐᓇᑐᖃᕐᓂᒃ ᑲᒪᒋᔭᖃᕐᓂᕐᒥ, ᐅᖃᓪᓚᓚᐅᕐᓯᒪᖕᒪᑕ ᑕᖅᑭᐅᓚᐅᕐᑐᒥ ᑐᓴᒐᒃᓴᓕᐅᕐᑎᓪᓗᒍ ᑎᑎᖃᓂᒃ ᑐᓂᔭᐅᓯᒪᔪᓂᒃ ᓄᓇᕗᒥᑦ ᒐᕙᒪᒃᑯᓐᓄᑦ ᐊᒻᐸᓯ ᕗᐃᐊᔅᑦ ᐃᓐᓇᒃᑯᕕᒃ ᐋᑐᕚᒥ ᐃᓄᐃᑦ ᐃᓅᓯᕆᕙᒃᑕᖏᓐᓂᒃ. (ᐊᔾᔨᓕᐅᕆᔨ ᑕᐃᕕᑦ ᓛᕼᐄᑦ)

By ᑕᐃᕕᑦ ᓛᕼᐄᑦ

For an English version of this story see Embassy West’s compliance with regulations misses point: elders society exec.

ᐊᒻᐸᓯ ᕗᐃᐊᔅᑦ ᐃᓐᓇᑐᖃᒃᑯᕕᑦ ᐋᑐᕚᒥ ᒪᓕᒃᑐᒃᓴᐅᒐᓗᐊᖅᖢᓂ ᐋᓐᑎᐅᕆᐅᒥ ᐱᖁᔭᓕᕆᓂᒃᑯᑦ ᑭᓯᐊᓂᓕ ᑖᒃᑯᐊ ᑲᒪᒋᔭᖃᙱᑦᑐᑦ ᐃᓱᒫᓘᑎᒋᔭᐅᓂᑯᓂᒃ ᐅᑯᓇᙵᑦ ᐃᖃᓗᖕᓂ ᐃᓐᓇᑐᖃᐃᑦ ᑲᑐᔾᔨᖃᑎᒌᓄᑦ, ᐸᐃᕆᔩᑦ ᑎᒍᒥᐊᖅᑎᒃᑯᑦ, ᐅᖃᓚᐅᕐᑐᖅ ᐊᐅᓚᑦᑎᔨ ᑐᑭᒧᐊᖅᑎᑦᑎᔨ.

ᕇᓱᓪ ᕿᑦᓱᐊᓕᒃ-ᑎᓐᔅᓕᐅᑉ ᑲᑐᔾᔨᖃᑎᒌᖏ ᑎᑎᕋᓚᐅᕐᓯᒪᖕᒪᑕ ᑕᖅᑭᐅᓚᐅᕐᑐᒥ ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓᓄᑦ ᔮᓐ ᒪᐃᓐ, ᐊᒻᒪᓗ ᐊᓯᖏᓐᓂ ᑲᑎᒪᔨᕐᔪᐊᖑᖃᑕᐅᔪᓄᑦ ᓄᓇᕗᒥᑦ.

ᐅᓇ ᑎᑎᖃᖅ ᐅᖃᐅᓯᖃᖃᓯᐅᑎᓚᐅᕐᓯᒪᔪᑦ ᐃᓚᖏᑦ ᐃᖅᑲᓇᐃᔭᖅᑎᒋᔭᐅᔪᑦ ᐊᒻᐸᓯ ᕗᐃᐊᔅᑦᒥ ᐃᓄᐃᑦ ᐊᑎᖏᓐᓂᒃ ᐅᖃᕈᒪᖃᑦᑕᙱᓐᓂᖏᓐᓂᒃ ᓲᖃᐃᒻᒪ “ᐊᔪᕐᓇᓗᐊᕐᒪᑕ,” ᐃᓐᓇᐃᓪᓗ ᓂᕿᓂᒃ ᓇᒡᓯᐅᔾᔪᓯᐊᖏᓐᓂᒃ ᐱᕙᙱᖢᑎᒃ ᐊᒻᒪᓗ ᐃᓱᒪᒃᑯᑦ ᖃᐅᔨᓴᖅᑕᐅᕙᒃᖢᑎᒃ ᑐᓵᔨᖃᑦᑎᐊᖃᑦᑕᙱᖢᑎᒃ.

ᒪᐃᓐ ᑐᓴᕐᑎᑦᑎᓚᐅᕐᑐᖅ ᐱᓇᓱᐊᕈᓯᐅᓚᐅᕐᑐᒥ ᑖᓐᓇ ᑎᑎᕋᖅᑕᐅᓯᒪᔪᖅ ᖃᐅᔨᓴᕈᑎᐅᓕᓚᐅᕐᓯᒪᓂᖓᓂᒃ ᐊᒻᐸᓯ ᕗᐃᐊᔅᑦᒥᒃ ᐅᑯᓇᙵᑦ ᐋᓐᑎᐅᕆᐅᒥ ᐃᓐᓇᑐᖃᕐᓄᑦ ᐱᖁᔭᓕᕆᓂᕐᒧᑦ ᐱᓕᕆᔨᒻᒪᕆᖕᓄᑦ. ᑭᓯᐊᓂᓕ ᖃᐅᔨᓴᕐᑐᑦ ᓇᓂᓯᓚᐅᙱᑦᑐᑦ ᒪᓕᒃᓯᒪᙱᓐᓂᐅᔪᒥᒃ.

ᑭᓯᐊᓂᓕ ᐊᐱᕐᓱᖅᑕᐅᑎᓪᓗᒍ ᐄᐳᕈᓪ 7-ᒥ, ᕿᑦᓱᐊᓕᒃ-ᑎᓐᔅᓕ ᐅᖃᓚᐅᕐᓯᒪᔪᖅ ᑎᑎᖃᖅ ᒪᓕᒃᓯᒪᓂᕐᒨᖓᓚᐅᙱᓐᓂᖓᓂᒃ ᑭᓯᐊᓂᓕ ᐃᓕᖅᑯᓯᒃᑯᑦ ᑐᓗᖅᑕᕈᑎᓂᒃ.

“ᓈᒻᒪᑦᑎᐊᖅᑐᖅ ᐋᓐᑎᐅᕆᐅ ᒪᓕᒐᖏᑦ ᒪᓕᒃᑕᐅᖕᒪᑕ,” ᐅᖃᕐᑐᖅ. “ᑕᒪᐅᓇᑦᑕᐃᓐᓇᕐᓗ ᐅᖃᐅᓯᖃᕐᓯᒪᙱᒻᒪᑕ ᐃᓱᒫᓘᑎᒋᔭᑦᑎᓐᓄᑦ ᑎᑎᕋᐅᓯᕆᓚᐅᕐᑕᑦᑎᓐᓂ.”

ᐃᓄᒃᑎᑐᑦ ᐅᖃᓪᓚᖃᑦᑕᕆᐊᖃᕐᒪᑕ, ᐱᓗᐊᕐᑐᒥ ᐃᓐᓇᑐᖃᐃᑦ ᐅᕙᓃᑦᑐᑦ ᐊᒻᐸᓯ ᕗᐃᐊᔅᑦᒥ, ᐅᖃᕐᒥᔪᖅ. ᐊᓯᖏᑦ ᐃᓱᒫᓘᑎᑦ ᐃᓚᖃᓚᐅᕐᑐᑦ ᐃᓄᒃᑎᑐᑦ ᓈᓚᐅᑎᒃᑯᑦ ᐱᑕᖃᙱᓗᐊᕐᓂᖓᓂᒃ ᐊᒻᒪ ᑐᓴᒐᒃᓴᓂᒃ ᓄᓇᖏᓐᓂᙶᖅᑐᓂᒃ.

ᒪᐃᓐ ᐊᖏᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ ᑲᒪᒋᔭᖃᕐᓂᕋᖅᖢᓂᒋᑦ ᐃᓕᖅᑯᓯᕐᒨᖓᔪᓂᒃ ᐃᓐᓇᑐᖃᕐᓂᒃ ᑲᒪᒋᔭᐅᔪᓂᒃ ᓄᓇᕗᑦ ᓯᓚᑖᓂᒃ ᐊᒻᒪᓗ ᐅᖃᖅᖢᓂ ᓈᒻᒪᒋᔭᐅᙱᑦᑐᕕᓃᑦ ᐃᓱᒫᓗᒋᒻᒪᕆᖕᓂᕋᖅᖢᓂᒋᑦ.

“ᕿᓂᕋᓱᐃᓐᓇᐅᔭᖅᑐᒍᑦ ᐱᐅᓯᕚᓪᓕᕈᑎᒃᓴᓂᒃ,” ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐊᐱᖅᓱᖅᑕᐅᑎᓪᓗᒍ.

ᒪᐃᓐ ᐅᖃᓚᐅᕐᑐᖅ ᓈᓚᐅᑎᒥ ᐊᑐᐃᓐᓇᖃᙱᓐᓂᖏ ᓈᒻᒪᙱᓕᐅᕈᑎᐅᓂᖓᓂ ᐊᒻᒪᓗ ᑕᒪᓐᓇ ᖃᐅᔨᒋᐊᖅᑕᐅᔪᓐᓇᕐᓂᕋᖅᑕᖓ ᐱᓕᕆᕝᕕᐊᓂᒃ.

ᐅᖃᒃᑲᓐᓂᖅᖢᓂ ᓄᓇᕗᒥᑦ ᒐᕙᒪᒃᑯ ᐃᓕᖅᑯᓯᓕᕆᓂᒃᑯᑦ ᖃᓄᐃᓕᐅᕈᑎᒃᓴᓂ ᐊᑐᓕᖅᑎᑦᑎᓇᓱᓚᐅᕐᑐᑦ ᐃᓐᓇᑐᖃᕐᓄ ᐋᑐᕚᒥ ᐅᑯᑎᒎᓇ ᑐᙵᓱᕝᕕᖓᑦ ᐃᓄᐃᑦ, ᐃᓄᖕᓄᑦ ᑐᕌᖓᔪᑦ ᐱᔨᑦᑎᕋᐅᑎᓕᕆᕝᕕᒃ ᑭᓯᐊᓂᓕ ᐆᒧᖓ ᓄᕙᒡᔪᐊᕐᓇᖅ-19-ᒧᑦ ᑕᒪᓐᓇ ᐊᔪᕈᑎᒋᔭᐅᓯᒪᖕᒪᑦ.

ᒫᓐᓇᓕ ᑎᓴᒪᓂ ᐃᓄᒃᑎᑐᑦ ᑐᓵᔨᓂ ᐃᖅᑲᓇᐃᔭᖅᑐᖃᖅᑐᖅ ᐊᒻᐸᓯ ᕗᐃᐊᔅᑦᒥ.

2015-ᖑᑎᓪᓗᒍ, ᓄᓇᕗᒥᑦ ᒐᕙᒪᒃᑯᑦ ᐅᓂᒃᑳᓂ ᓴᖅᑭᑎᑦᑎᓚᐅᕐᓯᒪᔪᑦ ᐊᑯᓂᕈᓗᒃ ᑲᒪᒋᔭᖃᕐᕕᒃᒥ ᓇᓗᓇᐃᕐᓯᓯᒪᓪᓗᓂ ᐅᑕᕿᔪᓂᒃ ᐃᒡᓕᕐᓂ ᓄᓇᕗᒥ 30-ᓂ ᑕᐃᔅᓱᒪᓂ ᐊᒻᒪᓗ 72-ᓂ ᐃᒡᓕᖅᑖᕆᐊᖃᖅᖢᑎᒃ 2037 ᑎᑭᑉᐸᑦ. ᐊᒻᒪᓗ ᖃᓄᐃᓕᐅᖁᔨᓯᒪᓪᓗᑎᒃ ᐋᖅᑭᒃᓱᐃᓗᑎᒃ “ᐋᖅᑭᒃᓱᖅᓯᒪᓂᒃᑯᑦ” ᐱᓕᕆᐊᖃᕐᓗᑎᒃ ᐃᓐᓇᕐᓄᑦ ᓄᓇᕗᒥᑦ.

ᑖᓐᓇᓕ ᖃᓄᐃᓕᐅᕈᑎᐅᖁᔭᐅᔪᖅ ᓱᓕ ᐋᖅᑭᒃᑕᐅᓯᒪᙱᑦᑐᖅ ᐊᒻᒪᓗ ᒪᐃᓐ ᐅᖃᓚᐅᕐᖢᓂ ᑕᒪᓐᓇ ᐱᓕᕆᐊᕆᔭᐅᑎᓐᓂᐊᕐᓂᕋᖅᖢᓂᐅᒃ ᐊᔪᙱᓐᓂᕐᒥᓂᒃ. ᐅᖃᓚᐅᙱᑦᑐᖅ ᖃᓄᖅ ᐊᑯᓂᐅᑎᒋᔪᖅ ᐱᓕᕆᐊᖑᓇᔭᕐᒪᖔᑦ ᑭᓯᐊᓂᓕ ᐊᕐᕌᒍᓕᒫᖅ ᐱᓕᕆᐊᖑᑐᐃᓐᓇᕆᐊᖃᕋᓱᒋᓚᐅᕐᑕᖓ.

ᑕᐃᒪᐃᑎᓪᓗᒋᑦ ᐅᖃᓚᐅᓯᖃᓚᐅᕐᒥᔪᖅ ᐸᕐᓇᒃᑕᐅᓯᒪᓯᒪᔪᖅ ᐊᑯᓂᕈᓗᒃ ᑲᒪᒋᔭᖃᕐᕕᒃᓴᖅ ᑲᖏᖅᖠᓂᕐᒥᒃ ᐃᓄᒋᓂᐊᖅᑕᖏᓐᓂᒃ ᐱᔪᒪᑲᑕᓛᕐᓂᕋᖅᑕᖏ 2024 ᑎᑭᑉᐸᑦ. ᐊᒻᒪᓗ ᑕᐃᒪᐃᑦᑐᓂᒃ ᓴᓇᓂᐊᕈᒪᓪᓗᑎᒃ ᐃᖃᓗᒃᑑᑦᑎᐊᕐᒥ ᐊᒻᒪ ᐃᖃᓗᖕᓂ.

ᑭᓯᐊᓂᓕ ᕿᑦᓱᐊᓕᒃ-ᑎᓐᔅᓕ ᑕᑯᒃᑲᓐᓂᕈᒪᔪᖅ ᑕᒪᒃᑯᓂᖓ. ᐃᓐᓇᑐᖃᕐᓂ ᓄᓇᕗᒥᐅᑕᓂᒃ ᓄᓇᖏᓐᓂ ᐃᓄᓯᖏᓐᓂᒃ ᐃᓱᓕᑦᑎᖃᑦᑕᖁᔨᓪᓗᓂ.

“ᑕᐃᒪᐃᒃᑲᓗᐊᖅᑎᓪᓗᒍ ᐃᓄᐃᑦ ᐊᖏᕐᕋᖃᕐᒪᑕ ᐊᒻᒪ ᐃᓅᔪᓐᓃᖅᐸᒃᖢᑎᒃ ᐅᐸᒃᓯᒪᔪᒪᙱᑕᖏᓐᓂᒃ ᐊᒻᒪ ᑐᖁᕝᕕᒋᔪᒪᙱᑕᖏᓐᓂᒃ,” ᐅᖃᕐᑐᖅ.

Share This Story

(0) Comments

Join the Conversation

Your email address will not be published. Required fields are marked *

*