ᐊᓕᐊᓇᐃᑦ ᖁᕕᐊᓱᖃᑎᒌᒃᑎᑦᑎᕙᓐᓂᖅ ᖃᓂᒡᓕᕙᓪᓕᐊᓕᕐᒪᑦ ᐅᑭᐅᑕᒫᑦ ᑎᑕᖕᓂᒃᑯᑦ ᖁᕕᐊᓱᖃᑎᒌᒃᕕᒃᓴᖓᓄᑦ

ᐊᓕᐊᓇᐃᑦ ᖁᕕᐊᓱᖃᑎᒌᖕᓂᖓᑦ ᖃᓂᒡᓕᕙᓪᓕᐊᓕᕐᒥᔪᑦ ᓯᕗᓪᓕᖅᐹᖓᓂᒃ ᖁᕕᐊᓱᖃᑎᒌᒡᕕᒃᓴᒧᑦ 2019-ᒥᑦ ᓄᖅᑲᖅᑎᑕᐅᓯᒪᓚᐅᖅᓱᑎᒃ ᐃᖃᓗᐃᑦ ᓄᓇᓕᐸᐅᔭᖓᓂ ᑲᑎᒪᔨᐅᔪᓂᑦ ᐃᑲᔪᖅᑐᒐᐅᓯᒪᓕᓚᐅᕋᒥᒃ ᐱᓇᓱᐊᕈᓯᐅᓚᐅᖅᑐᒥ.

ᐃᖃᓗᐃᑦ ᓄᓇᓕᐸᐅᔭᖓᓂ ᓄᕙᒡᔪᐊᕐᓇᖅ-19-ᒥᒃ ᐋᓐᓂᐊᖃᓕᖅᓯᒪᔪᑦ ᐊᒥᓱᕈᖅᓯᒪᓕᕐᒪᑕ, ᐊᒻᒪᓗ ᖁᕕᐊᓱᖃᑎᒌᒃᑎᑦᑎᕙᓐᓂᕐᒧᑦ ᐋᖅᑭᒃᓱᐃᔨᐅᕙᒃᑐᑦ ᐅᖃᓚᐅᖅᓱᑎᒃ ᐸᕐᓇᐅᑎᒋᓯᒪᓕᖅᑕᒥᓐᓂᒃ ᐊᓯᔾᔩᓯᒪᓕᕈᖕᓇᕐᓂᐊᕋᒥᒃ ᐊᐅᔭᒥᖔᖅ ᖁᕕᐊᓱᖃᑎᒌᒃᑎᑦᑎᓇᔭᖅᓱᑎᒃ.

“ᐃᓱᒪᒐᓗᐊᖅᑐᒍᓂᓛ ᓄᖅᑲᖅᑎᑕᐅᒃᑲᓐᓂᕈᒫᕐᓂᐊᖁᓇᒍ,” ᐅᖃᖅᓱᓂ ᐊᓕᐊᓇᐃᑦ ᐊᓪᓚᕕᖕᒥ ᐃᓱᒪᑕᖓᑦ ᐊᓛᓇ ᔮᓐᔅᑕᓐ ᕕᑉᕈᐊᕆ 8-ᒥ ᑲᑎᒪᔩᑦ ᑲᑎᒪᓂᖃᖅᑎᓪᓗᒋᑦ, ᓴᖅᑮᓯᒪᓕᓚᐅᖅᑕᖏᓄᑦ ᖁᕕᐊᓱᖃᑎᒌᒃᑎᑦᑎᓂᕐᒧᑦ ᐸᕐᓇᐅᑎᒋᓯᒪᔭᒥᓐᓂᒃ ᐊᒻᒪᓗ ᐊᒥᓲᖖᒋᑦᑐᓂᒃ ᑐᒃᓯᕋᐅᑎᖃᖅᓯᒪᓪᓗᓂ.

ᑲᑐᔾᔨᖃᑎᒌᖑᔪᑦ 18-ᒋᔭᖓᓂᒃ ᐅᑭᐅᑕᒫᑦ ᖁᕕᐊᓱᖃᑎᒌᒃᑎᑦᑎᕙᓐᓂᕐᒥᓐᓂᒃ ᑲᔪᓯᑎᑦᑎᔪᒪᔪᑦ ᔫᓂ 30-ᒥᑦ ᔪᓚᐃ 3-ᒧᑦ ᑐᐱᐊᓗᖕᒥ ᐃᒃᓯᕙᐅᑕᖃᖅᐸᒃᑐᒥ 150-ᓂᒃ. ᐸᕐᓇᐅᑎᓕᐅᖅᐸᓪᓕᐊᓕᖅᑐᑦ 20-ᓂᒃ ᖃᓄᐃᓕᐅᖅᑎᑦᑎᓂᐊᕐᓂᕐᒥᓐᓄᑦ ᐊᒻᒪᓗ 15-ᓂᒃ ᐱᓕᒻᒪᒃᓴᐃᓂᖃᕐᓂᐊᕐᓂᕐᒧᑦ ᑲᑎᒪᓂᖃᕐᓗᑎᒃ, ᓲᕐᓗ ᕿᓚᐅᔾᔭᕐᑎᐅᓂᕐᒧᑦ ᐱᓕᒻᒪᒃᓴᐃᓂᕐᒥᒃ. 200-ᖑᔪᓂᒃ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑎᖃᕐᓂᐊᖅᐳᑦ ᐊᒻᒪᓗ ᐅᖓᑖᓄᑦ 75 ᑎᑕᒃᑎᖃᕐᓗᑎᒃ, ᔮᓐᔅᑕᓐ ᐅᖃᖅᓱᓂ.

ᖁᕕᐊᓱᒃᑎᑦᑎᓂᖃᕈᓐᓇᖁᓪᓗᒋᑦ, ᔮᓐᔅᑕᓐ ᓄᓇᓕᐸᐅᔭᒃᑯᓐᓂᒃ ᐊᐱᕆᓚᐅᕐᐳᖅ ᐊᒃᑕᑰᕐᕕᓐᓂᒃ ᐊᒻᒪᓗ ᖁᐃᔭᖅᑐᕐᕕᓐᓂᒃ ᐱᑕᖃᖅᑎᑦᓯᖁᓪᓗᒋᑦ, ᓄᓇᓯᐅᑎᒃᑰᕐᕕᓐᓂᒃ ᖁᕕᐊᓱᖃᑎᒌᒃᑎᑦᓯᕝᕕᐊᓂ ᐊᐅᓚᑦᓯᓂᖃᕈᓐᓇᖅᑎᑦᓯᓗᑎᒃ, ᐃᓄᑐᖃᐃᑦ ᖃᒻᒪᖃᖅᑎᑕᐅᖁᓪᓗᒋᑦ ᐊᑐᖅᐸᒐᔭᒐᐃᓐᓂᒃ ᖁᕕᐊᓱᒃᑎᑦᑎᓂᖃᖅᑎᓪᓗᒋᑦ, ᐊᒻᒪᓗ ᐊᑐᖅᑐᐊᖅᑎᑕᐅᔪᒪᓪᓗᑎᒃ ᐱᖁᑎᓂᒃ ᓲᕐᓗ ᓵᓂᒃ, ᐃᒃᓯᕙᐅᑕᓂᒃ ᐊᒻᒪᓗ ᑎᑕᒡᕕᖕᒧᑦ ᒪᔪᕋᐅᑎᓂᒃ.

ᑲᑎᒪᔩᑦ ᑕᒪᕐᒥᐅᓪᓗᑎᒃ ᑐᒃᓯᕋᐅᑎᒋᔭᐅᓯᒪᔪᓂᒃ ᓈᒻᒪᒃᓴᐃᓚᐅᖅᑐᑦ.

ᒫᓐᓇᐅᔪᒥ, ᓄᕙᒡᔪᐊᕐᓇᖅ-19 ᐱᔾᔪᑕᐅᓪᓗᓂ ᑭᒡᓕᖃᓕᖅᑎᑕᐅᓯᒪᒻᒪᑕ ᐃᓱᒪᑕᒻᒪᕆᐅᓪᓗᓂ ᐋᓐᓂᐊᖃᕐᓇᖖᒋᑦᑐᓕᕆᔨᒥᑦ ᓯᓚᒦᓪᓗᑎᒃ ᑲᑎᓐᓂᖃᕈᓐᓇᖅᑎᑕᐅᓪᓗᑎᒃ 50-ᓂᑦ ᐃᓄᓐᓂᑦ ᐊᒻᒪᓗ ᐃᑎᖅᓯᒪᓗᑎᒃ ᑲᑎᓐᓂᖃᕈᓐᓇᖅᑎᑕᐅᓪᓗᑎᒃ 25 ᐳᕐᓴᓐᑎᖓᓂᒃ.

ᑎᑕᒃᑎᑦᑎᓗᑎᒃ ᖁᕕᐊᓱᖃᑎᒌᖕᓂᖓ ᓱᓕ ᑲᔪᓯᑎᑕᐅᔪᖕᓇᕐᑐᖅ ᖃᔅᓯᐅᓂᖏᑦ ᐊᒥᓱᕈᕆᐊᖅᓯᒪᒃᐸᑕ ᐊᒥᓲᔪᖕᓃᕆᐊᖅᐸᑕᓘᓐᓃᑦ, ᔮᓐᔅᑕᓐ ᐅᖃᖅᓱᓂ, ᐅᖃᒃᑲᓐᓂᖅᓱᓂ ᐋᖅᑭᒃᓱᐃᔨᐅᔪᑦ ᐃᓚᖏᓂᒃ ᐊᓯᔾᔩᓯᒪᓕᐊᓂᖕᒪᑕ, ᓲᕐᓗ ᑐᒡᓕᕆᔭᖓᓂᒃ ᓂᐅᕕᕐᕕᒃᑕᖃᕐᓂᐊᖖᒋᓐᓂᖓᑕ ᓇᑲᓱᒃ ᐃᓕᓐᓂᐊᕐᕕᐅᔪᒥᑦ ᐊᒻᒪᓗ ᐃᓚᖏᓂᒃ ᐱᓕᒻᒪᒃᓴᐃᓂᐅᔪᑦ ᐱᓕᕆᐊᖑᔭᕆᐊᖃᕋᔭᖅᑰᕐᓂᖏᑕ ᓯᓚᒦᓪᓗᑎᒃ ᐃᓄᑐᖃᐃᑦ ᖃᕐᒪᖓᑕ ᐃᓗᐊᓃᓐᓂᐊᓚᐅᕋᓗᐊᖅᑎᓪᓗᒋᑦ.

ᐅᖃᖅᓱᓂ ᑲᑐᔾᔨᖃᑎᒌᖑᔪᑦ ᐸᕐᓇᐅᑎᓕᐅᕐᓂᖏᑕ ᑕᑯᓐᓇᕆᐊᖅᓯᒪᔪᑦ ᐊᓯᔾᔨᖅᑎᑕᐅᖃᑦᑕᕐᓂᒃᓴᖏᓐᓄᑦ ᐃᓄᒋᐊᓗᐊᖃᑦᑕᕐᓂᐊᖖᒋᒻᒪᑕ ᑐᐱᐊᓘᑉ ᐃᓗᐊᓃᑦᑐᑦ, ᐊᒻᒪᓗ ᐋᖅᑭᒃᓱᐃᔨᐅᔪᑦ ᐅᐸᒍᑎᓯᒪᔪᓂᒃ ᓴᑉᓗᓯᒪᔭᕆᐊᖃᖅᑎᑦᓯᕙᓐᓂᐊᕐᒪᑕ. ᑎᑕᒃᑎᑦᓯᓂᕐᒥ ᖁᕕᐊᓱᖃᑎᒌᖕᓂᐅᔪᖅ ᐅᐊᒨᖅᑐᑎᒍᑦ ᑕᑯᓐᓇᒐᐅᔪᓐᓇᕐᓂᐊᕐᒥᔪᖅ ᐊᖏᕐᕋᖅᓯᒪᔪᓂᑦ ᑕᑯᓐᓇᖃᑕᐅᔪᒪᔪᖃᖅᐸᑦ.

“ᒪᓕᒐᔭᖅᑕᕗᑦ ᐃᓱᒪᑕᒻᒪᕆᐅᓪᓗᓂ ᐋᓐᓂᐊᖃᕐᓇᖖᒋᑦᑐᓕᕆᔨᒧᑦ ᐅᖃᖅᓯᒪᔭᖏᑦ,” ᔮᓐᔅᑕᓐ ᐅᖃᐅᔾᔨᓚᐅᕐᐳᖅ ᑲᑎᒪᔨᓂᒃ.

ᑲᑎᒪᔨ ᓰᓚ ᕕᓕᐊᕆᑎ ᐊᐱᕆᓚᐅᕐᐳᖅ ᖁᕕᐊᓱᖃᑎᒌᒃᑎᑦᑎᓂᖅ ᓇᓗᓇᐃᖅᓯᓯᒪᖃᑦᑕᕐᓂᐊᕐᒪᖔᑕ ᐋᓐᓂᐊᖃᓕᖅᑕᐃᓕᒪᔾᔪᑎᓂᒃ ᑲᐱᔭᐅᓯᒪᒐᓗᐊᕆᐊᖏᑕ ᑕᑯᔭᖅᑐᒐᐅᓯᒪᔪᓄᑦ.

ᔮᓐᔅᑕ ᐅᖃᓚᐅᕐᐳᖅ ᐊᓕᐊᓇᐃᑦ ᐋᓐᓂᐊᖃᓕᖅᑕᐃᓕᒪᔾᔪᑎᓂᒃ ᑲᐱᔭᐅᓯᒪᒐᓗᐊᕆᐊᖏᑕ ᑎᑕᒃᑎᐅᔪᓄᑦ ᖃᐅᔨᒋᐊᖃᑦᑕᕐᓂᐊᕋᒥᒃ, ᑭᓯᐊᓂᓗ ᐱᓕᕆᐊᖃᖅᑎᖏᑦ ᐃᓱᒪᒃᓴᖅᓯᐅᕈᑎᖃᓚᐅᖖᒋᒻᒪᑕ ᐅᐸᒍᑎᓇᔭᖅᑐᑦ ᐊᓯᖏᓂᑦ, ᐅᖃᒃᑲᓐᓂᖅᓱᓂ ᑕᒪᑐᒥᖓ ᐃᓚᔭᐅᓯᒪᓕᕋᔭᕐᓂᖓ ᖃᓄᐃᒋᔭᐅᓇᔭᖅᑰᖖᒋᒻᒪᑦ.

“ᐃᓱᒪᕗᒍᑦ ᑕᒪᓐᓇ ᖁᕕᐊᓱᖃᑎᒌᒃᑎᑦᓯᓂᐅᔪᖅ ᓄᓇᓕᐸᐅᔭᒧᑦ, ᓄᓇᖅᑲᑎᒌᒃᑐᓄᑦ, ᐊᕕᒃᑐᖅᓯᒪᓂᐅᔪᒧᑦ ᐃᑲᔪᕐᓂᖃᒻᒪᕆᒐᔭᕐᒪᑦ,” ᔮᓐᔅᑕᓐ ᐅᖃᖅᓱᓂ.