ᐊᓖᓴ ᐊᕋᒍᑕᒃ, ᐊᐅᓚᑦᑎᔨ ᑐᑭᒧᐊᖅᑎᑦᑎᔨ ᐅᕙᓂ ᐃᓱᐊᕐᓯᕕᒃᒥ, ᓵᓚᒃᓴᕐᓂᑯ 2020-ᒥ ᐃᓄᐃᑦ ᐃᓅᓱᒃᑐᑦ ᐱᔪᒥᒍᓱᒃᑎᑦᑎᓂᕐᒧᑦ ᐃᓕᓴᕐᓯᒍᑎᒥᑦ ᓵᓚᒃᓴᐅᓯᐊᕐᒥᓐ (2020 Inuit Youth Indspire Award). (ᐊᔾᔨᙳᐊᖅ ᐅᑯᓇᙵᑦ ᐃᓱᐊᕐᓯᕕᒃ)

ᐊᓖᓴ ᐊᕋᒍᑕᒃ ᐱᓕᕆᐊᖓᓄᑦ ᐃᓕᓴᕆᔭᐅᔾᔪᑖᖅᐳᖅ 2020 ᐃᓐᑎᓯᐸᐃᕈ ᐃᓄᐃᑦ ᐃᓅᓱᒃᑐᑦ ᐃᓕᓴᕆᔭᐅᔾᔪᑎᒥ

“ᐱᓇᓱᒻᒪᕆᒃᐸᒡᓗᓯ, ᐱᒋᐊᖅᑎᑦᑎᕙᒡᓗᓯ, ᐱᓇᓱᑐᐃᓐᓇᕐᐸᒡᓗᓯ ᐊᒻᒪ ᑕᒻᒪᕈᔅᓯ ᖃᐅᔨᕝᕕᒋᕙᒡᓗᒋ,” ᐊᕋᒍᑕᐃᓐᓇᖅ ᐅᖃᖃᑦᑕᖅᑐᖅ ᐃᓅᓱᒃᑐᓄᑦ

By ᐃᓚᐃᓐ ᐊᓐᓱᒥ

For an English version of this story, see Alicia Aragutak named 2020 Indspire Inuit youth laureate

ᐊᓖᓴ ᐊᕋᒍᑕᒃ 2020 Indspire ᐃᓄᐃᑦ ᐃᓅᓱᒃᑐᓄᑦ ᐃᓕᓴᕆᔾᔪᑎᒥ, ᐊᒻᒪᓗ ᓯᕗᓪᓕᖅᐹᖑᓪᓗᓂ ᐃᓅᓪᓗᓂ ᓄᓇᕕᒃᒥᑦ ᐃᓕᓴᕆᔭᐅᔾᔪᑎᑖᖅᖢᓂ.

ᐅᓇ 26-ᓂ ᐊᕐᕌᒍᓕᒃ ᐅᒥᐅᔭᕐᒥᐅᑕᕕᓂᖅ ᐅᖃᓚᐅᕐᑐᖅ ᖁᐊᕐᓵᕐᓂᕋᖅᖢᓂ ᐅᖄᓚᕝᕕᐅᒐᒥ ᓵᓚᒃᓴᕐᓂᖓᓂᒃ.

ᐅᖃᓕᒫᖅᖢᓂ ᐃᑲᔪᖅᑐᐃᔪᕕᓂᕐᓂᒃ ᑎᑎᕋᖅᑕᐅᔪᓂ ᓵᓚᒃᓴᓚᐅᕐᓂᖓᓄᑦ, ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᖁᔭᓕᓯᒪᒻᒪᕆᖕᓂᖓᓂᒃ.

“ᐃᓅᖃᑎᖃᕋᒪ ᐱᐅᔪᐊᓗᖕᓂ ᐊᒻᒪᓗ ᑕᒪᓐᓇ ᐃᒃᐱᖕᓇᓗᐊᕐᓯᒪᓪᓗᓂ, ᒫᙵᑦ ᓂᕈᐊᒐᒃᓴᐅᓕᕐᓂᕐᒥ ᐊᒻᒪᓗ ᑭᐊᓕ ᕗᕇᓲᑉ ᑕᒪᑐᒧᖓ ᓂᕈᐊᒐᒃᓴᐅᖁᔨᒻᒪᕆᓚᐅᕐᓯᒪᖕᒪᑦ,” ᐊᕋᒍᑕᒃ ᐅᖃᖅᑐᖅ.

“ᐊᓯᖏᑦᑕᐅᖅ ᐅᑯᑎᑐᓇᖅ ᒫᑕᓕ (ᐅᑲᓕᒃ), ᑲᑎᖃᑎᒌᓚᐅᕐᒪᑕ ᐃᖕᒥᖕᓂᑐᐊᖅ, ᐊᐱᕆᔭᐅᓪᓗᖓ ᐃᖅᑲᓇᐃᔮᕆᓯᒪᔭᓐᓂᒃ, ᑕᐃᒪᓕ ᐃᖕᒥᖕᓂᒃ ᐱᓇᓱᓚᐅᕐᓯᒪᔪᑦ ᓂᕈᐊᒐᒃᓴᐅᑎᑕᐅᖁᔭᐅᓪᓗᖓ.”

ᑲᑎᕐᓱᐃᓚᐅᕐᓯᒪᔪᑦ ᐃᑲᔪᖅᑕᐅᔾᔪᑎᒃᓴᓂᒃ ᐅᑯᓇᙵᑦ ᑲᑎᕕᒃ ᓄᓇᓕᓕᒫᑦ ᒐᕙᒪᖓᓂᒃ, ᓄᓇᕕᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᒻᒪ ᐃᓄᓕᕆᔨᒃᑯᓐᓂᑦ, ᐊᒻᒪᓗ ᐅᑯᓇᙵ ᖄᕐᔪᐃᑦ ᐃᓅᓱᒃᑐᑦ ᑲᑎᒪᔨᖏᓐᓂᒃ.

ᐊᕋᒍᑕᒃ ᐃᖅᑲᓇᐃᔭᕐᓯᒪᔪᖅ ᑐᑭᒧᐊᖅᑎᑦᑎᔨᐅᓪᓗᓂ ᑐᕐᓱᔪᖅ ᒥᕐᖑᐃᕐᓯᕕᒃᒥᑦ ᓄᓇᓕᓕᒫᑦ ᒐᕙᒪᒃᑯᓐᓄᑦ, ᐊᒻᒪᓗ ᐃᓅᓱᒃᑐᓄᑦ ᑭᒡᒐᖅᑐᐃᔨᐅᓪᓗᓂ ᖃᓄᐃᓕᕐᐱᑖ? ᐋᓐᓂᐊᖃᖅᑕᐃᓕᓂᕐᒧᑦ ᖃᐅᔨᓴᕈᑎᓄᑦ ᐊᒻᒪᓗ ᐱᒋᐊᖅᑎᑦᑎᔨᐅᓂᑰᓪᓗᓂ ᐊᒻᒪ ᓯᕗᓪᓕᖅᐸᐅᓪᓗᓂ ᐊᖓᔪᖅᑳᕆᔭᐅᓪᓗᓂ ᐅᑯᓄᖓ ᖄᕐᔪᐃᑦ.

ᐅᖃᓚᐅᕐᑐᖅ ᐊᓯᐊᓃᑦᑐᒪᙱᓐᓂᖓᓂ ᒫᓐᓇ ᐱᓕᕆᐊᖓᑕ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᐅᓂᕐᒥᒃ ᐃᓱᐊᕐᓯᕕᒃᒥᑦ ᒪᒥᓴᕐᕕᒃ ᑰᔾᔪᐊᖅᒥ.

“ᐱᐅᒋᑦᑎᐊᒻᒪᕆᒃᑲᒃᑯ ᐋᖅᑭᒃᓯᒪᓂᐅᔪᖅ ᐅᐸᒃᓯᒪᔭᕋ ᓲᖃᐃᒻᒪ ᓴᖅᑭᔮᕈᓐᓇᕋᒪ ᐃᓄᖕᓄᑦ ᐃᑲᔪᖅᑕᐅᔪᒪᔪᓄᑦ ᒪᒥᓴᕐᓂᒃᑯᑦ,” ᐅᖃᖅᑐᖅ.

“ᐃᓱᐊᕐᓯᕕᒃ ᐱᓕᕆᕝᕕᑦᑎᐊᕚᓘᖕᒪᑦ, ᒪᒥᓴᕐᕕᐅᓪᓗᓂ. ᑕᒪᓐᓇ ᐅᒃᐱᕆᒻᒪᕆᒃᑲᒃᑯ ᐊᑐᖅᑕᐅᔭᕆᐊᖃᕐᓂᖓᓂ ᑕᒫᓂ ᐱᐅᓂᕐᓴᒥᒃ, ᖃᓄᐃᓐᓇᙱᓐᓂᕐᓴᒥᒃ ᓄᓇᖃᓕᕐᓗᑎᒃ ᐊᒻᒪᓗ ᐱᓕᕆᐊᖃᕈᓐᓇᕐᓯᓗᑕ ᓈᒻᒪᙱᓕᐅᕈᑎᕕᓂᑦᑎᓐᓂᒃ. ᐅᐸᒡᕕᐅᖕᒪᑦ ᐊᑐᕐᓂᑯᕗᑦ ᐱᓪᓚᕆᓚᐅᕐᓂᖏᓐᓂᒃ ᐊᒻᒪᓗ ᖃᓄᐃᙱᑦᑐᕐᓇᓕᕐᓂᕐᒥᒃ ᐊᒻᒪ ᐃᓱᒪᒋᔭᖃᑦᑎᐊᕐᓂᕐᒥᓐ ᑎᒥᑦᑎᓐᓂᒃ ᐊᒻᒪ ᑭᓇᐅᓂᑦᑎᓐᓂᒃ. ᐅᐊᑲᓪᓛᓘᖕᒪᑦ.”

ᑕᐃᒪᓐᓇ ᐱᓕᕆᐊᖃᕐᓯᒪᒐᓗᐊᖅᖢᓂ, ᐊᕋᒍᑕᒃ ᐃᓕᓴᕆᔭᐅᔾᔪᑎᒧ ᐃᒃᐱᒍᓱᒻᒪᕆᓚᐅᕐᐳᖅ. ᐊᒻᒪᓗ ᐃᓕᓴᕆᔭᐅᖁᔨᓪᓗᓂ ᓂᕈᐊᒐᒃᓴᓕᐅᕐᓂᑯ ᐊᒻᒪ ᓯᕗᓂᐊᓂ ᐃᖅᑲᓇᐃᔮᖃᖅᑐᕕᓂᕐᒥᓐ.

ᐊᕐᕌᓂ ᕗᕇᓱ ᓵᓚᒃᓴᐅᓯᐊᓚᐅᕐᓯᒪᔪᖅ ᐃᓅᓱᒃᑐᓄᑦ ᐃᓕᓴᕆᔭᐅᔾᔪᑎᒥ. ᐃᓅᔪᓐᓃᓚᐅᕐᑐᖅ ᑎᓯᐱᕆᒥ ᐃᒻᒥᓃᖅᖢᓂ.

“ᑕᐃᓐᓇᐅᓚᐅᙱᑉᐸᑦ, ᑖᓐᓇ ᐃᓕᓴᕆᔭᐅᔾᔪᑎ ᐱᓇᔭᙱᑕᕋ ᑕᐃᒪᓗ ᐅᖃᕈᒪᓪᓗᖓ. ᑭᐊᓕ ᐆᒧᖓ ᖁᔭᒋᒻᒪᕆᒃᐸᕋ,” ᐅᖃᖅᑐᖅ ᐊᕋᒍᑕᒃ.

“ᐃᓱᒪᒋᒍᑎᒋᔪᓐᓇᕋᒃᑯ ᖃᓄᐃᑉᐸᓪᓕᐊᓂᐅᔪᖅ ᑕᒫᓂ ᐊᒻᒪᓗ ᑐᓴᖅᑎᑦᑎᔪᒪᓪᓗᖓ ᖃᓄᐃᓕᐅᕈᑎᐅᔪᓂᒃ ᒪᐅᓇ ᐱᑦᑎᐊᖃᑦᑕᙱᓗᐊᕐᓂᒃᑯ ᓄᓇᑦᑎᓐᓂᒃ ᐊᒻᒪᓗ ᖃᓄᑎᒋ ᑕᒪᓐᓇ ᐊᒃᑐᐃᓯᒪᓂᖓᓂᒃ ᐃᓅᓱᒃᑐᖁᑎᑦᑎᓐᓄᑦ. ᓈᒻᒪᙱᓛᒃᑯᑦ ᐃᓱᒪᒋᓪᓗᒍ ᑕᐃᒪᓐᓇ ᑭᐊᓕ ᐅᓂᒃᑳᓚᐅᕐᑐᖅ.”

ᐱᑦᑎᐊᖃᑦᑕᙱᓐᓂᐊᓗᒃ ᑭᓲᙱᑎᑦᑎᓇᓱᖕᓂᒃᑯᑦ ᓄᖅᑲᕆᐊᖃᓕᕐᑐᖅ ᐊᕋᒍᑕᒃ ᐅᖃᓚᐅᕐᑐᖅ.

“ᐃᓅᓪᓗᑎ ᐱᒋᐊᕆᐊᖃᓕᕋᑦᑕ ᐃᑲᔪᖃᑦᑕᐅᑎᓕᓗᑕ,” ᐅᖃᖅᑐᖅ ᐊᕋᒍᑕᒃ. “ᓄᖅᑲᖅᑎᒋᐊᖃᓕᕋᑦᑎᒍᑦ ᐱᑦᑎᐊᖃᑦᑕᙱᓗᐊᕐᓂᖅ. ᐱᓕᕆᖃᑎᒌᒋᐊᖃᕋᑦᑕ. ᐃᓄᒋᐊᓗᐊᙱᒻᒪᑦ, ᐊᒥᓲᙱᖢᑕᓗ, ᑕᐃᒪᓕ ᐱᕈᖅᐸᓪᓕᐊᒍᓐᓇᖅᑐᒍᑦ ᐃᑲᔪᖃᑦᑕᐅᑎᓗᑕ, ᑕᐃᒪᓐᓇ ᑭᓯᐊᓂ.”

ᐊᕋᒍᑕ ᐃᓕᓴᕆᔭᐅᔾᔪᑎᒥᓂᒃ ᑐᓂᔭᐅᒍᓂ ᐅᕙᓂ Indspire ᓂᕆᕕᒡᔪᐊᕐᓇᒥ ᐋᑐᕚᒥ ᒫᑦᓯ 6-ᒥᑦ, ᑐᓴᖅᑎᑦᑎᔾᔪᑎᖃᕐᓂᐊᖅᑐᖅ ᐃᓅᓱᒃᑐᑦ ᐱᔪᓐᓇᑦᑎᐊᕐᓂᖏᓐᓂᒃ ᐱᔪᓐᓇᐅᑎᖃᖅᑎᑕᐅᒍᑎᒃ ᐊᒻᒪ ᐃᑲᔪᖅᑐᖅᑕᐅᑦᑎᐊᕈᑎᒃ.

ᐃᓅᓱᒃᑐᑦ ᐅᓄᓛᙳᖕᒪᑕ ᐃᓄᐃᑦ ᓄᓇᖓᓂ, ᐊᕋᒍᑕᒃ ᐅᖃᖅᑐᖅ, ᑕᐃᒪᓕ ᐃᓱᒪᒋᔭᐅᑦᑎᐊᕆᐊᖃᖅᑐᑦ.

“ᐱᓕᕆᐊᖃᙱᒃᑯᑦᑕ ᐊᒻᒪ ᖃᓄᐃᓕᐅᙱᒃᑯᑦᑕ ᐃᓅᓱᒃᑐᑦᑎᓐᓄ, ᓈᒻᒪᙱᓗᐊᕋᔭᖅᑐᖅ ᐅᓄᕐᓂᖅᐹᖑᓂᖏᓐᓄᑦ,” ᐅᖃᖅᑐᖅ. “ᐱᔪᓐᓇᕐᓂᖃᑦᑎᐊᕐᒪᑕ ᐱᓕᕆᐊᖃᓕᕈᑎᐅᔪᓂᒃ, ᐅᒃᐱᕆᓗᒋᑦ ᐊᒻᒪ ᐱᕕᖃᖅᑎᓐᓂᕐᓴᐅᓗᒋᑦ. ᐃᓱᒪᓕᐅᕆᓇᓱᒃᑎᓪᓗᑕ ᐃᓚᐅᑎᑉᐸᒡᓗᒋᑦ.”

ᑕᐃᒪᙵᓂᒃ ᐱᓕᕆᐊᖃᖃᑦᑕᓕᕋᒥ ᐃᓅᓱᒃᑐᓂ, ᐊᕋᒍᑕ ᐅᖃᓚᐅᕐᑐᖅ ᐱᔪᒪᓂᖃᑦᑎᐊᕐᓂᖏᓐᓂᒃ ᐃᓚᒋᔭᐅᓗᑎᒃ ᓄᓇᕕᒃ ᓯᕗᓂᒃᓴᖓᓄᑦ ᐱᓕᕆᐊᖑᕙᓪᓕᐊᓂᖓᓂᒃ.

“ᐃᓚᐅᔪᒪᓂᖅᑕᖃᑦᑎᐊᕐᒪ, ᐃᓚᒋᔭᐅᔪᒪᓪᓗᑎᒃ ᐃᓕᓐᓂᐊᕈᒪᓪᓗᑎᒃ ᐊᒻᒪ ᐅᖃᓪᓚᒍᒪᓪᓗᑎᒃ ᑭᓇᐅᓂᖏᓐᓂᒃ ᐃᓅᓪᓗᑎᒃ,” ᐅᖃᖅᑐᖅ ᐊᕋᒐᑕᒃ.

ᐅᖃᕈᒪᓚᐅᕐᑐᖅ ᐃᓅᓱᒃᑐᓄᑦ ᖃᓄᖅ ᐃᒪᐃᑦᑐᓐᓇᕆᖃᕐᓂᕐᒥᑦ: “ᐃᑯᒻᒥᕐᓗᒍ ᖃᐅᔨᔪᒪᓂᖅ.”

ᐅᖃᖅᖢᓂ ᕿᒥᕐᕈᐊᖁᔨᓪᓗᓂ ᐊᕙᓗᖏᓐᓂᒃ ᐊᒻᒪ ᑭᓱᓂ ᐱᑕᖃᕆᐊᒃᓴᖓᓂᒃ ᐊᒻᒪ ᑭᓱᑕᖃᙱᓗᐊᕐᓂᖓᓂᒃ. “ᐊᑐᓂ ᓄᓇᓖᑦ ᐊᔾᔨᒌᙱᑦᑑᑎᐅᖕᒪᑕ ᑖᒃᑯᐊᓗ ᐊᑯᑦᑐᓂᖃᐅᖅᖢᑎᒃ,” ᐅᖃᖅᑐᖅ ᐊᕋᒍᑕᒃ. ᐊᒻᒪᓗ ᑕᒪᒃᑯᐊ ᑭᓱᖃᙱᓐᓂᐅᔪᑦ ᑕᑕᑎᕆᓇᓱᓕᕐᓗᒋᑦ.

“ᐃᓕᖕᓂ ᐅᒃᐱᕆᓗᑎ,” ᐅᖃᖅᑐᖅ. “ᐱᓕᕆᐊᖃᕈᕕᓐ ᖃᓄᕐᓘᓃᑦ, ᐱᐅᓪᓚᕆᐊᓗᒍᓐᓇᙱᑦᑐᖅ ᑭᓯᐊᓂ ᐱᓇᓱᖕᓃᑦ ᐱᒻᒪᕆᐅᕗᖅ, ᐱᒋᐊᖅᑎᑦᑎᕙᒡᓗᓯ, ᐱᓕᕆᒋᐊᖅᐸᒡᓗᓯ ᐊᒻᒪ ᑕᒻᒪᖅᑕᔅᓯᓐᓄ ᐃᓕᑦᑎᕙᒡᓗᓯ.”

ᓄᓇᓕᖕᓄᑦ ᐊᒻᒪ ᓯᕗᓕᐅᕐᑎᐅᔪᓄᑦ ᐱᓕᕆᐊᖃᖅᑐᓂᒃ ᐃᓅᓱᒃᑐᓂᒃ, ᐅᖃᖅᑐᖅ: “ᑕᓯᐅᓚᐅᕐᓯᐅᒃ, ᑐᙵᓱᒃᑎᑉᐸᒡᓗᓯᐅᒃ ᐊᒻᒪ ᐅᖃᓪᓚᖃᑎᒋᕙᒡᓗᒋᑦ. ᓂᕆᐅᙱᓪᓗᓯ ᓄᓇᕐᔪᐊᖅ ᑖᒃᑯᓂᖓ ᐃᑲᔪᖅᑐᐃᓂᐊᕐᓂᖓᓂᒃ, ᐅᓐᓃᑦ ᑕᒻᒪᓚᐅᕐᐸᒡᓗᑎᒃ.

“ᐊᔪᕈᓐᓃᕐᓴᖅᑎᓪᓗᒋᑦ ᐊᒻᒪ ᐱᖃᑎᒋᓗᒋ ᐱᓇᓱᐊᖅᐸᓪᓕᐊᔭᖏᑦᑎᒍᑦ ᓯᕗᓕᐅᕐᑎᐅᔪᓐᓇᕐᓂᕐᒥᒃ. ᐱᓕᕆᐊᕆᔭᑦ ᐃᓕᓐᓂᐊᕈᑎᐅᓇᔭᖅᑐᖅ ᐊᒻᒪ ᓯᕗᓂᒃᓴᑲᓪᓚᖕᒧ ᑎᑭᐅᑎᔪᓐᓇᖅᖢᓂ.”

Share This Story

(1) Comment:

  1. Posted by Phil Lange on

    *Link to English version is broken. Thanks!

Join the Conversation

Your email address will not be published. Required fields are marked *

*