ᐊᓗᑭ ᑰᑦᑎᖅ ᐅᖃᐅᓯᐅᕗᖅ ᓇᓗᓇᐃᖅᑕᐅᓯᒪᓪᓚᕆᙱᑦᑐᓂᒃ ᓵᓚᒃᓴᕐᓂᖓᓂᒃ ᓄᓇᕗᑦ ᑐᙵᕕᒃᑯᓐᓄᑦ ᐊᖓᔪᖅᑳᒃᓴᒥᑦ ᓂᕈᐊᕐᓇᒥ, ᐃᒪᓐᓇ 69 ᐳᓴᓐᑎᖏᑦ ᓂᕈᐊᖅᖢᑎᒃ ᑖᔅᓱᒥᖓ. (ᐊᔾᔨᙳᐊᖅ ᐅᕙᙵᑦ ᐊᓗᑭ ᑰᑦᑎᖅ)
ᐊᓗᑭ ᑰᑦᑎᖅ ᓂᕈᐊᖅᑕᐅᒃᑲᓐᓂᕐᐳᖅ ᐊᖓᔪᖅᑲᙳᖅᖢᓂ ᓄᓇᕗᑦ ᑐᙵᕕᒃᑯᓐᓄᑦ
ᓄᓇᕗᑦ ᑐᙵᕕᒃᑯᑦ ᑐᓴᖅᑎᑦᑎᕗᑦ ᓂᕈᐊᕆᐊᖅᑐᕐᑐᑦ 17.5 ᐳᓴᓐᑎᐅᓚᐅᕐᓂᖏᓐᓂᒃ ᓂᕈᐊᕈᓐᓇᕐᑐᓂᒃ
For an English version of this story, see Aluki Kotierk re-elected president of NTI
ᐊᓗᑭ ᑰᑦᑎᖅ ᐱᓕᕆᐊᖃᒃᑲᓐᓂᕐᓂᐊᓕᕐᑐᖅ ᐊᖓᔪᖅᑳᖑᓗᓂ ᓄᓇᕗᑦ ᑐᙵᕕᒃᑯᓐᓄᑦ ᓂᕈᐊᕐᑕᐅᒪᐅᕐᑎᓪᓗᒋ ᐅᓄᕐᓂᕐᓴᓄᑦ 2/3 ᓂᕈᐊᖅᑐᓂ ᑲᑐᔾᔨᖃᑎᒌᑦ ᐊᖓᔪᖅᑳᒧᑦ ᓂᕈᐊᕐᓂᖃᖅᑎᓪᓗᒋᑦ ᓇᒡᒐᔾᔭᒥ.
ᓵᓚᖃᓚᐅᕐᑐᖅ ᓂᕈᐊᖅᑕᐅᓇᓱᖕᒥᔪᒥᑦ ᐋᓐᑐᕉ ᓇᑲᓱᒃᒥ ᑖᒃᑯᐊᑐᐊᒃ ᓂᕈᐊᒐᒃᓴᐅᑎᓪᓗᒋᒃ.
ᑰᑦᑎᖅ 69 ᐳᓴᓐᑎᒥ ᓂᕈᐊᖅᑐᓂᒃ ᓂᕈᐊᖅᑕᐅᓚᐅᕐᑐᖅ ᐅᓇᓕ ᑕᐅᑐᙳᐊᖅᖢᒍ ᓇᑲᓱᒃ ᓂᕈᐊᖅᑕᐅᓪᓗᓂ 31 ᐳᓴᓐᑎᖏᓐᓄᑦ, ᓄᓇᕗᑦ ᑐᙵᕕᒃᑯᑦ ᑐᓴᒐᒃᓴᓕᐅᕐᓂᖓᒍᑦ ᑐᓴᖅᑎᑦᑎᓚᐅᕐᑐᑦ ᐊᒻᒪᓗ ᑲᑐᔾᔨᖃᑎᒌᖑᔪᑦ ᖃᕋᓴᐅᔭᒃᑯᑦ ᓴᖅᑭᔮᖅᑎᑕᖏᓐᓂᒃ ᓂᕈᐊᖅᑐᓂᒃ ᓇᐃᓴᐃᕙᓪᓕᐊᑎᓪᓗᒋᑦ.
ᑲᑐᔾᔨᖃᑎᒌ ᐃᓄᖕᓂ ᑭᒡᒐᖅᑐᐃᔨᐅᔪᑦ ᓄᓇᕗᒥ ᑐᓴᖅᑎᑦᑎᓚᐅᕐᑐᑦ ᓇᓗᓇᐃᖅᑕᐅᓯᒪᓪᓚᕆᙱᑦᑐᓂᒃ ᓂᕈᐊᖅᑐᕕᓃᑦ ᖃᓂᐃᓕᓂᖏᓐᓂᒃ ᐅᓪᓛᒃᑯᑦ ᐊᐃᑉᐹᓂᑦ.
ᓂᕈᐊᕆᐊᕐᑐᖅᑐᑦ ᐅᐸᓚᐅᕐᑐᑦ 17.5 ᐳᓴᓐᑎᐅᓚᐅᕐᑐᑦ ᓂᕈᐊᕈᓐᓇᕐᑐᓂᒃ, ᑐᓴᒐᒃᓴᓕᐊᕆᔭᐅᔪᖅ ᐅᖃᕐᓯᒪᓚᐅᕐᑐᖅ.
ᓄᓇᕗᑦ ᑐᙵᕕᒃᑯᑦ ᐋᖅᑭᒃᓯᓯᒪᓚᐅᕐᓯᒪᖕᒪᑕ ᓂᕈᐊᕐᓇᐅᓂᐊᕐᓗᓂ ᑎᓯᐱᕆ 14, ᑭᓯᐊᓂᓕ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᒧᑦ ᑲᑐᔾᔨᖃᑎᒌᑦ ᐅᖓᕙᕆᐊᖅᑎᑦᑎᓕᓚᐅᕐᓯᒪᔪᑦ ᕕᕝᕗᐊᕆ 8-ᒧᑦ.
ᑰᑦᑎᖅ ᓯᕗᓂᐊᒍᑦ ᐅᖃᓚᐅᕐᓯᒪᔪᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓂᕈᐊᖅᑕᐅᒃᑲᓐᓂᕈᓂ ᓯᕗᓪᓕᐅᑎᑦᑎᓇᔭᕐᓂᖓᓂᒃ ᐃᓄᖕᓄᑦ ᐱᔭᐅᔭᕆᐊᖃᓪᓚᕆᒃᑐᓂᒃ ᓲᕐᓗ ᒪᑯᓂᖓ ᐃᒡᓗᓕᕆᓂᖅ, ᐃᖅᑲᓇᐃᔮᒃᓴᓕᕆᓂᖅ, ᐃᓕᓐᓂᐊᕐᑐᓕᕆᓂᖅ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᓂᖅ.
ᐊᕐᕌᒍᓂ ᑎᓴᒪᓂᒃ ᐊᖓᔪᖅᑳᖑᓂᐊᕐᑐᖅ.
(0) Comments