ᐊᓯᐅᖅᑲᔪᒥ ᑭᙵᕐᓂ ᐊᖑᑎᐅᔫᑉ ᐃᓚᖏᑦ ᐅᑕᖅᑭᕗᑦ ᐸᖅᓴᕐᓂᐅᔪᓂ ᐊᒃᓱᕈᕈᑕᐅᔪᓂ ᓄᖅᑲᓚᐅᑲᖕᓂᖓᓂ ᒫᓐᓇᐅᔪᒥ

For English version, see ‘It’s been really hard’: Missing Kinngait man’s family waits as search efforts halt for now

ᔫᓯ ᐳᑐᒍᖅ ᐋᑐᕚᒦᓚᐅᖅᐳᖅ ᖃᐅᔨᒐᒥ ᐃᕐᓂᖓ ᐊᖏᕐᕋᓚᐅᙱᓐᓂᖓᓂ ᐅᓐᓄᐊᖑᔪᒥ ᑭᙵᕐᓂ.

ᐃᕐᓂᖓ, 36-ᓂ-ᐅᑭᐅᓕᒃ ᐱᑦᓯᐅᓛᖅ ᐳᑐᒍᖅ, ᑭᖑᓪᓕᖅᐹᒥ ᑕᑯᔭᐅᓚᐅᖅᐳᖅ ᓄᓇᓕᖕᓂ ᓄᕕᐱᕆ 19, 2022−ᒥ.

ᑕᐃᒪᙵᓂ, ᐸᓖᓯᒃᑯᑦ ᐊᒻᒪ ᓄᓇᓕᖕᓂ ᐸᖅᓴᐃᔩᑦ ᕿᓂᖅᓯᒪᕗᑦ, ᓄᓇᒥ ᕿᓂᖅᖢᑎᒃ ᐊᒻᒪ ᐃᒪᕐᒥ ᕼᐋᒻᓚᒃᑯᑦ ᐊᕙᓗᔭᖓᓂ, ᐃᓄᒋᐊᖕᓂᖃᖅᑐᒥ 1,400−ᐸᓗᖕᓂ.

“ᐊᔪᕐᓇᖅᓯᒪᕐᔪᐊᖅᐳᖅ,” ᔫᓯ ᐳᑐᒍᖅ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.

ᐸᖅᓴᐃᓂᖅ ᓄᖅᑲᖅᓯᒪᓚᐅᑲᒃᑲᓗᐊᖅᑎᓪᓗᒍ, ᑲᓇᑕᒥ ᐸᓖᓯᒃᑯᑦ ᐅᖃᓚᐅᖅᐳᖅ ᐱᓇᓱᐊᕈᓯᐅᓚᐅᖅᑐᒥ ᖃᐅᔨᓴᖅᑕᐅᓂᐅᔪᖅ ᒪᑐᐃᖓᐃᓐᓇᕐᓂᐊᖅᐳᖅ.

“ᐅᑕᖅᑭᑐᐃᓐᓇᕐᓂᐊᖅᐳᒍᑦ. ᐊᒻᒪ ᑕᐃᒪᐃᑉᐳᖅ ᒫᓐᓇᐅᔪᒥ,” ᔫᓯ ᐳᑐᒍᖅ ᐅᖃᓚᐅᖅᐳᖅ.

ᑎᓯᐱᕆ 6−ᒥ, ᑲᓇᑕᒥ ᐸᓖᓯᒃᑯᑦ ᐃᒪᐅᑉ ᐊᑖᓂ ᐅᑎᖅᑎᕆᓂᐅᔪᒥ ᑲᑎᙵᓂᐅᔪᑦ ᐃᓚᖃᖅᖢᑎᒃ ᑭᙵᐃᑦ ᐸᖅᓴᐃᔨᐅᔪᓂ ᐃᓂᓕᐊᓚᐅᖅᐳᑦ ᒪᓪᓕᒃ ᕿᑭᖅᑕᖓᑕ ᖃᓂᒋᔭᖓᓂ ᐅᒃᐱᕆᔭᐅᔪᒥ ᐱᑦᓯᐅᓛᖅ ᐳᑐᒍᖅ ᑭᖑᓪᓕᖅᐹᒥ ᑕᑯᔭᐅᓚᐅᕋᓱᒋᔭᐅᓪᓗᓂ.

“ᐸᖅᓴᐃᓂᕐᓂ ᐊᒃᓱᕈᕐᓂᐅᔪᓂ ᐱᓕᕆᐊᖑᓚᐅᖅᐳᑦ ᓇᓂᓯᓚᐅᕐᓇᑎᒃ,” ᑲᓇᑕᒥ ᐸᓖᓯᒃᑯᓐᓄᑦ ᑐᓴᒐᒃᓴᓕᐊᖓᓂ ᐅᖃᓚᐅᖅᐳᖅ ᑕᐃᔅᓱᒪᓂ.

ᔫᓯ ᐳᑐᒍᖅ ᐊᒻᒪ ᒪᕐᕉᒃ ᐸᓂᖏᑦ ᐅᑕᖅᑭᓚᐅᖅᐳᑦ ᐸᓖᓯᒃᑯᑦ ᖃᖓᑕᓲᒃᑯᑦ ᑎᑭᑎᓪᓗᒋᑦ ᓄᓇᓕᖓᓐᓄᑦ ᐊᒻᒪ ᓄᓇᓕᖕᓂ ᑲᑎᙵᓂᐅᔪᓂ ᐊᐅᓪᓚᓚᐅᖅᐳᑦ ᐅᒥᐊᒃᑯᑦ ᐃᕐᓂᖓᓂ ᕿᓂᕐᓂᕐᒧᑦ.

“ᐊᓈᓇᐅᓪᓗᓂ, ᐊᐃᑉᐸᖃᙱᓪᓗᓂ ᐊᓈᓇᐅᓪᓗᓂ, ᐅᕙᓐᓄᑦ ᐊᔪᕐᓇᕐᔪᐊᒪᐅᖅᐳᖅ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐸᖅᓴᐃᔨᐅᔪᑦ ᕿᓃᓐᓇᖅᖢᑎᒃ, ᓇᓂᓯᓚᐅᕐᓇᑎᒃ.

“ᖃᓄᐃᓕᐅᕈᓐᓇᓚᐅᙱᓚᒍᑦ ᐊᒻᒪ ᖃᓄᐃᓕᐅᕈᓐᓇᓚᐅᙱᓚᑦ. ᐊᒥᓱᐊᖅᓱᖅᖢᑎᒃ ᐱᓕᕆᓇᓱᓚᐅᖅᐳᑦ. ᐅᓪᓗᒃᑯᑦ, ᐅᓐᓄᒃᑯᓪᓘᓐᓃᑦ ᑎᓂᙵᑎᓪᓗᒍ.”

ᔫᓯ ᐳᑐᒍᖅ ᐅᖃᓚᐅᖅᐳᖅ ᖃᐅᔨᒪᓪᓚᕆᙱᓚᖅ ᖃᓄᐃᓚᐅᕐᓂᖓᓂ ᐅᓐᓄᖓᓂ ᐊᓯᐅᖅᑲᓕᓚᐅᖅᑎᓪᓗᒍ, ᑭᓯᐊᓂ ᐃᕐᓂᖓ ᓂᕆᐅᒋᔭᐅᓚᐅᖅᐳᖅ ᐊᖏᕐᕋᒥ. ᐅᖃᓚᐅᖅᐳᖅ ᐃᓱᒪᕗᖅ ᐱᓱᒃᑐᕕᓂᐅᓚᐅᕐᓂᖓᓂ ᓵᑦᑐᒃᑯᑦ ᓯᑯᒥ ᐊᒻᒪ ᑲᑕᒃᖢᓂ.

ᒫᓐᓇᓕᓴᐅᔪᒥ ᑕᑕᑎᕆᓚᐅᖅᐳᖅ ᐊᓯᐅᖅᑲᔪᒥ ᐃᓄᖕᒥ ᐅᓂᒃᑳᓕᐊᖑᔪᒥ ᑲᓇᑕᒥ ᐸᓖᓯᒃᑯᓐᓄᑦ ᐊᒻᒪ ᐅᖃᓚᐅᖅᐳᖅ ᐸᖅᓴᐃᓂᖅ ᑲᔪᓯᓂᐊᖅᐳᖅ ᐅᖅᑰᓂᖅᓴᐅᓕᕈᓂ ᑕᖅᑭᓂ, ᓯᑯ ᐊᐅᒃᑎᓪᓗᒍ.

ᐅᓂᒃᑳᕆᕗᖅ ᐃᕐᓂᖓᓂ ᐃᒻᒥᓂᒃ ᑕᑯᖅᑯᔾᔨᙱᖦᖢᓂ, ᑐᙵᓇᖅᖢᓂ ᐊᒻᒪ ᐃᓄᑦᑎᐊᕚᓘᓪᓗᓂ ᖃᐅᔨᒪᔭᐅᑦᑎᐊᓚᐅᖅᑐᒥ ᓄᓇᓕᖕᓂ.

“ᐅᕙᓂ, ᑭᒃᑯᓕᒫᓂ ᖃᐅᔨᒪᔭᐅᓚᐅᖅᐳᖅ,” ᐅᖃᓚᐅᖅᐳᖅ. “ᑭᒃᑯᓕᒫᓂ ᖃᐅᔨᒪᔭᐅᕐᔪᐊᓚᐅᖅᐳᖅ.

“ᐱᔭᕆᑐᓚᐅᖅᓯᒪᙱᑦᑐᖅ. ᐃᓄᖕᓂ ᐸᒡᕕᓵᕆᕙᓚᐅᙱᑦᑐᖅ.”

ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᐱᓇᓱᐊᕈᓯᐅᓚᐅᖅᑐᒥ, ᓄᓇᕗᒻᒥ ᑲᓇᑕᒥ ᐸᓖᓯᒃᑯᑦ ᐅᖃᖅᑎᖓ Sgt. ᐹᓖᓐ ᒥᓛᓐᓯᓐ ᐅᖃᓚᐅᖅᐳᖅ ᑭᙵᕐᓂ ᑲᓇᑕᒥ ᐸᓖᓯᒃᑯᑦ “ᐱᓕᕆᓚᐅᖅᐳᑦ ᑕᒪᒃᑭᐅᒪᒧᒥ ᐸᖅᓴᐃᓂᐅᔪᒥ ᒪᓕᖕᓂᖃᖅᑐᒥ ᓄᓇᓕᖕᓂ ᐊᒻᒪ ᖃᐅᔨᒋᐊᒃᑲᓐᓂᖅᖢᑎᒃ ᑎᑭᑉᐸᓪᓕᐊᔪᓂ ᑐᓴᒐᒃᓴᓂ.”

“ᒫᓐᓇᐅᔪᒥ, ᐊᓯᐅᖅᑲᔪᖅ ᐃᓄᖕᒧᑦ ᖃᐅᔨᓴᖅᑕᐅᓂᖓ ᒪᑐᐃᖓᐃᓐᓇᕐᓂᐊᖅᐳᖅ ᐊᒻᒪ ᐸᓖᓯᒃᑯᑦ ᖃᐅᔨᒋᐊᒃᑲᓐᓃᓐᓇᕐᓂᐊᖅᐳᑦ ᑎᑭᑉᐸᓪᓕᐊᓂᖏᓐᓂ,” ᐅᖃᓚᐅᖅᐳᖅ.

ᑭᓇᑐᐃᓐᓇᖅ ᑐᓴᒐᒃᓴᖃᕈᓂ ᐱᑦᓯᐅᓛᖅ ᐳᑐᒎᑉ ᓇᒦᓂᖓᓂ ᐅᖃᕈᓐᓇᖅᐳᑦ ᑲᙵᕐᓂ ᑲᓇᑕᒥ ᐸᓖᓯᒃᑯᓐᓄᑦ 867-897-1111−ᒧᑦ.