ᐊᕐᓇᖅ ᐸᓯᔭᒃᓴᙳᖅᑎᑕᐅᔪᖅ ᐊᖑᑎ ᑐᓗᖅᑕᐅᔪᖅ ᓄᓇᓯᐅᑎᒧ ᑰᔾᔪᐊᖅᒥ ᐃᓅᔪᓐᓃᖅᑎᓪᓗᒍ

For English version, see Woman charged after man struck by vehicle in Kuujjuaq dies

ᓄᓇᕕᒃᒥ ᐸᓖᓯᒃᑯᑦ ᐅᖃᓚᐅᕐᑐᑦ 32ᓂ ᐅᑭᐅᓕᒃ ᐊᖑᑎ ᐃᓅᔪᓐᓃᓚᐅᕐᓂᕋᖅᖢᑎ ᑐᓗᖅᑕᐅᓚᐅᖅᖢᓂ ᓄᓇᓯᐅᑎᒧᑦ ᑰᔾᔪᐊᖅᒥ ᒪᐃ 12ᖑᑎᓪᓗᒍ 3:00 ᐅᓪᓛᒃᑯᑦ ᒥᒃᓵᓂ.

ᑭᖑᓂᑦᑎᐊᖓᒍ ᑖᓐᓇ ᓄᓇᓯᐅᑎ ᐱᕐᕈᓗᐊᕆᕋᑖᖅᑐᖅ ᑐᓗᓚᐅᕐᒥᔪᖅ ᓄᓇᕕᒃᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᒻᒪ ᐃᓄᓕᕆᔨᒃᑯᑦ ᑎᑎᕋᕐᕕᖓᓄᑦ ᐅᓇ ᐅᖃᓚᐅᕐᑐᖅ ᐊᖓᔪᖅᑳᖅ ᐹᑐᕇᔅ ᐊᐃᐳᓪ ᓄᓇᕕᒃᒥ ᐸᓕᓯᓕᕆᔨᓄᑦ.

ᐊᐃᐳᓪ ᓇᓗᓇᐃᕐᓯᓚᐅᕐᑐᖅ ᐃᓄᒃ ᐃᓅᔪᓐᓃᖅᑐ ᐅᓇᐅᓂᖓᓂ ᔭᐃᑯ ᓴᐸ ᐊᖕᓇᑐᒃ, 32. ᓇᓂᔭᐅᓚᐅᕐᓯᒪᔪᖅ ᕗᐊᑦ ᐊᑐᕆᐊᒥᒃ ᒫᓂ ᑰᔾᔪᐊᖅᒥ ᓄᑕᐅᒋᓐᓂᕐᓴᖓᓂ ᓄᓇᖃᑎᒌᑦ ᓄᓇᖓᓂ.

46ᓂ ᐊᕐᕌᒍᓕᒃ ᐊᕐᓇᖅ ᑎᒍᔭᐅᓚᕐᓯᒪᔪᖅ ᐱᕐᕈᓗᐊᕿᕝᕕᐅᑉ ᖃᓂᒋᔭᖓᓂ.

ᑭᑎ ᓴᐸ ᐊᖕᓇᑐᒃ ᐸᓯᔭᒃᓴᙳᖅᑎᑕᐅᓚᐅᕐᑐᖅ ᐋᖓᔮᖅᖢᓂ ᐊᖅᑯᓐᓂᖓᓂᒃ ᐃᓅᔪᓐᓃᖅᑎᑦᑎᓂᕐᒧᑦ ᐊᒻᒪ ᕿᒪᐃᑐᐃᓐᓇᖅᖢᓂ ᐱᕐᕈᓗᐊᕿᕝᕕᖓᓂᒃ, ᐊᐃᐳᓪ ᐅᖃᓚᐅᕐᑐᖅ. ᒪᐃ 17ᒥ ᐃᖅᑲᖅᑐᐃᕕᒃᒦᓚᐅᕐᑐᑦ ᐊᒻᒪᓗ ᑎᒍᔭᐅᓯᒪᐃᓐᓇᕐᓂᐊᖅᖢᓂ ᐃᖅᑲᖅᑐᖅᑕᐅᒃᑲᓐᓂᓚᐅᙱᓐᓂᖓᓂᒃ ᔪᓚᐃ 7ᒥ.

ᓄᓇᕕᒃᒥ ᐸᓖᓯᒃᑯᑦ ᑖᔅᓱᒥᖓ ᓱᓕ ᖃᐅᔨᓴᖅᑐᑦ ᐱᕐᕈᓗᐊᕿᔾᔪᑎᕕᓂᕐᒥᒃ.