ᐊᕐᓇᖅ ᐸᓯᔭᒃᓴᙳᖅᑎᑕᐅᔪᖅ ᑎᒡᓕᖕᓂᕐᒧᑦ ᐃᖃᓗᐃᑦ ᐊᓐᓂᑭᑦᑐᖅᑎᑦ ᑲᑐᔾᔨᖃᑎᒌᓂ

For an English version of this story, please see: Woman charged in theft from Iqaluit hockey association.

ᐊᑕᐅᓯᖅ ᐃᓄᒃ ᐸᓯᔭᒃᓴᙳᖅᑎᑕᐅᓚᐅᕐᑐᖅ ᑎᒡᓕᖕᓂᕐᒥ ᑮᓇᐅᔭᓂ ᐅᑯᓇᙵᑦ ᐃᖃᓗᐃᑦ ᐊᓐᓂᑭᑦᑐᖅᑎᑦ ᑲᑐᔾᔨᖃᑎᒌᓂ ᐊᕐᕌᓂ ᐅᖓᓪᓕᕐᒥᐅᓚᐅᕐᑐᖅ.

ᐸᓖᓯᒃᑯᑦ ᐸᓯᔭᒃᓴᙳᖅᑎᑦᑎᓚᐅᕐᑐᑦ ᑭᐅᕋᓐ ᑕᓐᕕ, 38, ᐃᖃᓗᖕᓂ ᓄᓇᓕᒃ ᑎᒡᓕᖕᓂᖓᓄᑦ $5,000 ᐅᖓᑖᓂ ᐊᐃᕆᓕ 2-ᒥ ᖃᐅᔨᓇᓱᓚᐅᖅᑎᓪᓗᒋᑦ, ᐸᓖᓯᒃᑯᓐᓄᑦ ᐅᖃᕐᑎ ᑰᐳᕈᓪ ᔪᐊᔾ ᕼᐃᐊᓐᕆ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᔪᓚᐃᑦ 16-ᒥ.

ᐅᓇ ᐊᑕᐅᓯᖅ ᐸᓯᔭᒃᓴᐅᔾᔪᑎ ᐊᒃᑐᐊᓂᓕ ᐅᕙᓂ ᕕᕝᕗᐊᕆ 19, 2022 ᐊᒻᒪ ᒪᐃ 31, 2022 ᐊᑯᓐᓂᖓᓂ, ᐸᓖᓯᑦ ᑕᐃᒪᓐᓇ ᐸᓯᔭᒃᓴᙳᖅᑎᑦᑎᓚᐅᕐᓯᒪᔪᑦ ᐅᕗᖓ ᓄᓇᕗᒥᑦ ᐃᖅᑲᖅᑐᐃᕕᒃᒥ ᒪᓕᒐᓕᕆᓂᕐᒧᑦ ᐸᓯᔭᒃᓴᙳᖅᑎᑕᐅᑎᓪᓗᒍ.

ᐃᖅᑲᖅᑐᐃᕕᒃᒥ ᑎᑎᖃᑦ ᓇᓗᓇᐃᖅᓯᓯᒪᔪᑦ ᑕᓐᕕ ᐸᓯᔭᒃᓴᐅᖃᓯᐅᔾᔭᐅᓂᖓᓂ ᐱᖓᓱᓂ ᐊᓯᐊᒎᖓᔪᓂᒃ: ᐱᕋᔭᒃᓯᒧᓂᖅ $5,000 ᑐᖔᓃᑦᑐᓂᒃ, ᐊᑎᓕᐅᕐᓂᕐᒧᑦ ᐊᑎᕆᔭᐅᔪᒥ ᐊᒻᒪᓗ ᓴᒡᓗᓂᕐᒥ ᑭᓇᐅᓂᕋᐃᓯᒪᓂᕐᒧᑦ. ᐅᑯᐊ ᐸᓯᔭᒃᓴᐅᔾᔪᑎᖏᑦ ᐱᒋᐊᕐᓯᒪᔪᑦ ᐊᓯᐊᓂᖔᖅ ᖃᓄᐃᓕᐅᕈᑎᐅᓂᑯᒥ ᓄᕕᐱᕆ 21, 2023-ᒥ.

ᐅᑯᐊ ᐃᖅᑲᖅᑐᐃᕕᒃᒥ ᑎᑎᖃᑦ ᑎᑎᕋᕐᓯᒪᓚᐅᕐᑐᑦ ᓱᓕ ᑕᒪᑐᒧᖓ ᑭᐅᓚᐅᙱᓐᓂᖓᓂ ᐸᓯᔭᒃᓴᐅᔾᔪᑎᖏᓐᓂ. ᓄᓇᑦᓯᐊᕐᒥ ᐱᕙᓪᓕᐊᔪᑦ ᐅᖃᓪᓚᖃᑎᖃᕋᓱᒃᓯᒪᔫᖓᓗᐊᖅ ᑕᓐᕕᒥ ᓗᐊᐃᔭᖓᓂᓪᓗ ᑭᓯᐊᓂᓕ ᑭᐅᔭᐅᓯᒪᙱᑦᑐᑦ.

ᑕᓐᕕ ᐃᖅᑲᖅᑐᐃᕕᒃᒧᐊᕐᓂᐊᓚᐅᕐᓯᒪᔪᖅ ᒪᐃ 30-ᒥ. ᐃᖅᑲᖅᑐᐃᕕᒃᒧᐊᒃᑲᓐᓂᓛᖅᖢᓂ ᐋᒐᓯ 12-ᒥ.

ᕕᕝᕗᐊᕆ 8, 2021-ᒥ, ᑎᑎᕋᖅᑕᐅᑲᑕᒃᑐᑦ ᐅᑯᓇᙵᑦ ᐃᖃᓗᐃᑦ ᐊᓐᓂᑭᑦᑐᖅᑎᑦ ᑲᑐᔾᔨᖃᑎᒌᑦ ᕙᐃᔅᐳᒃᑯᑦ ᒪᐱᒐᖓᒍ ᐅᖃᐅᓯᖃᕐᓯᒪᓚᐅᕐᑐᖅ ᑖᓐᓇ ᐃᒃᓯᕙᐅᑕᐅᓂᖓᓂᒃ ᑲᑐᔾᔨᖃᑎᒌᓄᑦ ᑮᓇᐅᔭᓂ ᐱᕈᖅᓴᐃᓇᓱᒃᑐᓄᑦ.

ᐅᓇ ᐸᓯᔭᒃᓴᐅᔾᔪᑎ ᐱᒋᐊᕕᖃᓚᐅᕐᑐᖅ ᖃᐅᔨᓴᕐᑎᓪᓗᒋᑦ ᓯᕗᓪᓕᖅᐹᒥ ᑎᒡᓕᒃᑐᖃᓚᐅᕐᓂᖓᓂ ᐅᖃᖅᑐᖃᖅᑎᓪᓗᒍ ᐅᕘᓇ ᓰᐲᓰᒃᑯᑦ ᑐᓴᒐᒃᓴᖏᑦᑎᒍᑦ ᓄᕕᐱᕆ 2023-ᒥ.

ᓄᕕᐱᕆ 27, 2023-ᒥ, ᑑᒪ ᓇᑦᓯᖅ, ᑕᐃᔅᓱᒪᓂ ᐊᖓᔪᖅᑳᕆᔭᐅᓚᐅᕐᑐᖅ ᐃᖃᓗᐃᑦ ᐊᓐᓂᑭᑦᑐᖅᑎᑦ ᑲᑐᔾᔨᖃᑎᒌᓄᑦ, ᑎᑎᕋᓚᐅᕐᓯᒪᔪᖅ ᕙᐃᔅᐳᒃᑯᑦ ᐅᑯᐊ ᑲᑐᔾᔨᖃᑎᒌᑦ ᑲᑎᒪᔨᖏᑦ ᑐᓴᖅᑎᑕᐅᓕᓚᐅᕐᓯᒪᔪᑦ ᐸᓖᓯᒃᑯ ᖃᐅᔨᓴᕐᓂᖏᓐᓂᒃ ᑎᒡᓕᒃᑕᐅᔪᕕᓂᕐᓂ ᑮᓇᐅᔭᓂ ᐱᒋᐊᕐᓯᒪᓪᓗᓂ ᒫᔅᓯ 2023.

ᓇᑦᓯᖅ ᐅᖃᓚᐅᕐᓯᒪᔪᖅ ᑖᒃᑯᐊ ᑲᑎᒪᔩ ᐸᓖᓯᓂ ᐃᑲᔪᖅᑐᐃᓚᐅᕐᓂᕋᖅᖢᓂᒋᑦ, ᐊᒻᒪᓗ ᓇᓕᐊᒃ ᑲᑎᒪᔨ ᑖᔅᓱᒥᖓ ᐱᓕᕆᐊᖃᓚᐅᕋᓂ ᖃᓄᐃᓕᐅᕈᑎᐅᓂᕋᖅᑕᐅᔪᒥᒃ.

ᕙᐃᔅᐳᒃᑯᑦ ᑎᑎᕋᕈᓐᓇᐅᑎᐊᒍᑦ ᐅᖃᖃᑎᒋᔭᐅᔪᓐᓇᓕᖅᑎᓪᓗᒍ ᔪᓚᐃ 17-ᒥ, ᓇᑦᓯᖅ ᐅᖃᓚᐅᕐᑐᖅ ᒫᓐᓇᒧᑦ ᑐᓴᖅᑎᑕᐅᓯᒪᙱᓐᓂᕋᖅᖢᓂ ᑖᔅᓱᒪ ᒥᒃᓵᓄᑦ, ᐅᖃᒃᑲᓐᓂᖅᖢᓂ ᐃᖃᓗᖕᓂ ᓅᓚᐅᕐᓯᒪᓂᖓᓂ ᐅᐱᕐᖔᖑᓚᐅᕐᑐᖅ.

ᖃᕋᓴᐅᔭᒃᑯᑦ ᑎᑎᕋᖅᓯᒪᔪᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ, ᐅᓇ ᐊᖓᔪᖅᑳᕆᔭᐅᑲᐃᓐᓴᖅᑐᖅ ᓵᒃ ᒨᓯ, ᑲᑐᔾᔨᖃᑎᒌᑦ ᑲᑎᒪᔨᖏᓐᓄ ᐅᖃᖅᑎᒋᔭᐅᓪᓗᓂ, ᐅᖃᓚᐅᕐᑐᖅ: “ᐃᖃᓗᐃᑦ ᐊᓐᓂᑭᑦᑐᖅᑎᑦ ᑲᑐᔾᔨᖃᑎᒌᖏᑦ ᑕᒪᑐᒧᖓ ᐅᖃᓪᓚᖁᔭᐅᔾᔮᙱᒻᒪᑕ ᑕᒪᓐᓇ ᐃᖅᑲᖅᑐᐃᕕᒃᑯ ᐱᓕᕆᐊᖑᓂᖓᓂᒃ.”