ᐊᕐᕌᒍᑦ 29 ᐊᓂᒍᖅᑎᓪᓗᒋᑦ ᐃᓄᐃᑦ ᖁᓄᔪᕐᓂᐊᖅᑎᒋᓚᐅᖅᑕᖓᓂᒃ ᐅᐸᒃᓯᕗᑦ ᕗᕌᓐᔅᒥ

ᔪᐊᓇᔅ ᕆᕗᐊ ᐸᓯᔭᒃᓴᐅᑎᑕᐅᔪᖅ ᓱᕈᓯᕐᓂ ᖁᓄᔪᕐᓂᐊᖃᑦᑕᕗᓚᐅᕐᓯᒪᓂᖓᓂᒃ ᐃᒃᓯᕋᕐᔪᐊᖑᓪᓗᓂ
ᓄᓇᕗᒥᑦ 1960-ᒥ 1993-ᒧ

ᓴᐅᒥᐊᓂᒃ: ᓯᑏᕝ ᒪᑉᓴᓛᖅ, ᑖᓂᐊ ᑐᖏᓕᒃ ᐊᒻᒪ ᔭᓯ ᑐᖏᓕᒃ ᐅᖃᓪᓚᒃᑐᑦ ᑐᓴᒐᒃᓴᓕᐅᖅᑎᓄᑦ ᒪᐃᐊᓐ, ᕗᕌᓐᔅᒥ ᓯᑎᐱᕆ 15-ᖑᑎᓪᓗᒍ. (ᐊᔾᔨᓕᐅᕆᔨ ᐃᐊᒪ ᑐᕌᓐᑐᕐ)

By ᐃᐊᒪ ᑐᕌᓐᑐᕐ

For English version, see ‘The memories flooded back’: After 29 years, Inuit face alleged abuser in France

ᓚᐃᐊᓐ — ᑭᖑᓪᓕᖅᐹᒥᒃ ᓯᑏᕝ ᒪᑉᓴᓛᖅ ᔪᐊᕐᓇᒡ ᕆᕗᐊᒥ ᑕᑯᓚᐅᕐᓯᒪᔪᖅ 1993-ᒥ ᐅᐃᓂᐱᒡ ᒥᑦᑕᕐᕕᖓᓂᒃ.

ᑭᖑᓂᐊᒍᓪᓕ ᒪᑉᓴᓛᖅ ᖃᐅᔨᓕᓚᐅᕐᓯᒪᔪᖅ ᑕᐃᔅᓱᒪᓂ ᑖᓐᓇ ᐃᒃᓯᕋᕐᔪᐊᖅ ᑭᖑᓪᓕᖅᐹᒥ ᑲᓇᑕᒦᓚᐅᕐᓯᒪᓂᖓᓂ, ᑖᔅᓱᒪᓗ ᐸᓖᓯᓄᑦ ᐅᖃᐅᓯᕆᓚᐅᕐᓯᒪᓪᓗᓂᐅᒃ ᖁᓄᔪᕐᓂᐊᖅᑕᐅᖃᑦᑕᓚᐅᕐᓯᒪᓂᖓᓂᒃ 13ᓂ ᐅᑭᐅᖃᖅᑎᓪᓗᒍ. ᒪᑉᓴᓛᖅ, ᒫᓐᓇ 65ᖑᓕᕐᑐᖅ, 13ᖑᓚᐅᕐᓯᒪᓪᓗᓂ 1970ᒥ.

ᑕᓪᓕᒪᒃ ᐊᕐᕌᒍᑦ ᐊᓂᒍᖅᑎᓪᓗᒋᑦ ᑭᓯᐊᓂ ᒪᑉᓴᓛᖅ ᐸᓯᔭᒃᓴᐅᑎᑦᑎᓚᐅᕐᓯᒪᔪᖅ — ᐃᓚᖃᖅᖢᓂ ᒪᕐᕈᒃᑲᓐᓃᖕᓂ ᐃᓅᖕᓂ ᐸᓯᔭᒃᓴᐅᑎᑦᑎᖕᒥᔪᓂᒃ — ᑕᐃᒪᓐᓇᓗ ᐃᒻᒪᓕᓴᕐᓂ ᖁᓄᔪᕐᓂᐊᕐᓂᕐᒧᑦ ᐊᒻᒪ ᓈᒻᒪᙱᓗᐊᖅᑐᓂᒃ ᐱᓕᕆᐊᖃᕐᓂᕐᒧᑦ ᐸᓯᔭᒃᓴᙳᖅᑎᑦᑎᓚᐅᕐᓯᒪᔪᖅ ᕆᕗᐊᒥ 1998ᖑᑎᓪᓗᒍ.

ᒪᑉᓴᓛᖅ ᐅᑕᕿᓚᐅᕐᑐᖅ ᐊᕐᕌᒍᓂ ᑎᑭᑲᓴᒃᖢᒍ ᐊᕙᑎᓂᒃ ᑖᓐᓇ ᒪᓕᒐᓕᕆᓂᒃᑯᑦ ᐱᓕᕆᐊᖑᓂᐊᕐᓂᖓᓂᒃ ᑭᓯᐊᓂᓕ ᓄᖅᑲᖅᑎᑕᐅᑐᐃᓐᓇᓚᐅᕐᓯᒪᓪᓗᑎᒃ 2017ᒥ, ᑖᓐᓇ ᕆᕗᐊᓕ ᕗᕌᓐᔅᒦᖢᑎᒃ ᐊᒻᒪᓗ ᑲᓇᑕᒥᐅᓂᒃ ᐊᒃᑐᖅᑕᐅᔪᓐᓇᙱᖢᓂ ᒪᓕᒐᓕᕆᓂᒃᑯᑦ.

ᓯᑎᐱᕆ 14ᒥ, ᐊᕐᕌᒍᑦ 29 ᐊᓂᒍᖅᑎᓪᓗᒋᑦ, ᒪᑉᓴᓛᖅ ᕆᕗᐊᒥ ᑕᑯᒃᑲᓐᓂᓕᓚᐅᕐᓯᒪᔪᖅ. ᒫᓐᓇᓕ ᐅᖃᐅᔾᔨᔭᖅᑐᖅᖢᓂ ᐃᒃᓯᕋᕐᔪᐊᕐᒥ ᐸᓯᔭᒃᓴᙳᖅᑎᑦᑎᓚᐅᕐᓯᒪᓂᖏᓐᓂᒃ ᑖᔅᓱᒥᖓ. ᒪᑉᓴᓛᖅ ᐃᓚᒋᔭᐅᔪᖅ ᓄᓇᕗᒥᙶᖅᑐᓂᒃ ᐱᓇᓱᐊᕈᓯᕐᒥ ᕗᕌᓐᔅᒦᓚᐅᕐᑐᓂᒃ, ᒐᕙᒪᒃᑯᓐᓂᒃ ᐊᒻᒪ ᑐᒃᓯᐊᕐᕕᖕᒥ ᐱᓕᕆᔨᒻᒪᕆᖕᓂ ᕆᕗᐊᒥ ᑲᓇᑕᒧᐊᖅᑎᑦᑎᓇᓱᒃᖢᑎᒃ ᑕᕝᕙᓂ ᕕᕝᕗᐊᕆᒥ ᐸᓯᔭᒃᓴᐅᔾᔪᑎᙳᖅᑎᑕᐅᓚᐅᖅᑐᓄᑦ ᐱᓕᕆᐊᖑᓂᐊᕐᒪᑦ.

“ᐃᖅᑲᐅᒪᓕᓚᐅᖅᑕᒃᑲ ᖃᓄᐃᓕᐅᕈᑎᕕᓃᑦ,” ᒪᑉᓴᓛᖅ ᐅᖃᓚᐅᕐᑐᖅ ᐃᓄᒃᑎᑐᑦ ᑐᓴᒐᒃᓴᓕᐅᖅᑎᓄᑦ ᓯᑎᐱᕆ 15ᒥ, ᑐᓵᔨᖃᖅᖢᓂ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓᓂᒃ ᐊᓗᑭ ᑰᑦᑎᖅᒥ, ᑖᓐᓇᓗ ᓄᓇᕗᒥᙶᖅᑐᓂ ᑲᒪᒋᔭᖃᓚᐅᕐᑐᖅ.

ᕆᕗᐊ ᐃᒃᓯᕋᕐᔪᐊᖑᓚᐅᕐᓯᒪᔪᖅ ᓄᓇᕗᒥᑦ ᐱᒋᐊᖅᖢᓂ 1960-ᒥ ᑎᑭᖢᒍ 1990ᖏᑦ ᐱᒋᐊᕐᓯᒪᓕᕐᓂᖏᓐᓄᑦ. ᐃᓚᒋᔭᐅᔪᖅ ᐃᒃᓯᕋᕐᔪᐊᓄᑦ Oblates, ᑲᑐᓕᒃᑯᓐᓄ ᑖᒃᑯᐊᓗ ᐃᓕᓐᓂᐊᖅᑎᑦᑎᓂᕐᒥᒃ ᐱᓕᕆᐊᖃᖅᖢᑎᒃ ᐊᒻᒪᓗ ᐊᐅᓚᑦᑎᓂᑰᓪᓗᑎᒃ ᑲᓇᑕᒥ ᐃᓕᓐᓂᐊᕆᐊᕐᕕᐅᕙᓚᐅᖅᑐᓂᒃ ᑭᓯᐊᓂᓕ ᑖᓐᓇ ᐃᓕᓐᓂᐊᕆᐊᖅᕕᓕᕆᓂᕐᒧᑦ ᐱᓕᕆᐊᖃᓚᐅᙱᑦᑐᖅ.

ᓯᑏᕝ ᒪᑉᓴᓛᖅ ᐅᖃᓪᓚᒃᑐᖅ ᑐᓴᒐᒃᓴᓕᐅᕐᑎᓄᑦ ᕗᕌᓐᔅᒥ ᒪᓕᒐᓕᕆᔨᒃᑯᑦ ᓵᑦᑎᐊᖓᓂ ᐱᐅᕆᔅᒥ ᓯᑎᐱᕆ 13-ᖑᑎᓪᓗᒍ. (ᐊᔾᔨᓕᐅᕆᔨ ᐃᐊᒪ ᑐᕌᓐᑐᕐ)

ᒪᑉᓴᓛᖅ ᐅᖃᓚᐅᕐᑐᖅ ᕆᕗᐊᒧᑦ ᖁᓄᔪᕐᓂᐊᖅᑕᐅᓚᐅᕐᓯᒪᓂᖓᓂᒃ ᐃᖅᑲᓇᐃᔭᖃᑎᒋᑎᓪᓗᓂᐅᒃ ᑯᐊᐸᒃᑯᑦ ᓂᐅᕕᕐᕕᐊᓂᒃ ᓇᐅᔮᓂᑦ 1970ᖏᓐᓂ.

ᐅᖃᓚᐅᕐᑐᖅ ᓯᕗᓪᓕᕐᒥ ᑕᑯᔪᒪᓗᐊᓚᐅᙱᑦᑐᖅ ᕆᕗᐊᒥ ᑭᓯᐊᓂᓕ ᑕᑯᒍᓂᐅᒃ ᐃᒻᒥᓄ ᐱᒻᒪᕆᐅᓂᐊᕐᓂᖓᓂᒃ. ᓄᑲᖓᑦᑕᐅᖅ ᕆᕗᐊᒧᑦ ᖁᓄᔪᕐᓂᐊᖅᑕᐅᓯᒪᖕᒥᔪᖅ.

“ᐅᐸᒃᓯᒪᑦᑎᐊᒻᒪᕆᒡᓗᒍ ᐅᖃᓪᓚᖃᑎᒋᓗᒍ ᖃᓄᑎᒋ ᐅᕙᓐᓂ ᐋᓐᓂᕐᓯᓯᒪᓂᖓᓂᒃ,” ᒪᑉᓴᓛᖅ ᐅᖃᕐᑐᖅ.

ᒪᑉᓴᓛᖅ ᐃᓚᒋᔭᐅᓚᐅᕐᑐᖅ ᐃᓄᖕᓂ ᐱᐅᕆᔅᓕᐊᖅᑐᓂᒃ ᐊᒻᒪ ᓚᐃᐊᓐᒧᑦ ᐱᓇᓱᐊᕈᓯᐅᓚᐅᕐᑐᒥᑦ ᐱᖃᑎᖃᖅᖢᑎᒃ ᓄᓇᕗᑦ ᑐᙵᕕᒃᑯᓐᓂ ᐅᖃᓪᓚᖃᑎᖃᕆᐊᖅᑐᖅᖢᑎᒃ ᕗᕌᓐᔅᒥᐅᓂᒃ ᐊᒻᒪ ᐃᒃᓯᕋᕐᔪᐊᓂᒃ ᐅᑎᖅᑎᑕᐅᖁᔭᐅᓪᓗᓂ ᕆᕗᐊ, 91, ᑲᓇᑕᒧ ᐸᓯᔭᒃᓴᐅᔾᔪᑎᖏᓐᓂᒃ ᐱᓕᕆᐊᖑᓂᐊᕐᒪᑦ ᐸᓖᓯᑎᒍᑦ ᑕᒪᓐᓇ ᐊᕐᕌᒍ ᐱᒋᐊᓕᓵᕐᓯᒪᑎᓪᓗᒍ.

ᒪᑉᓴᓛᖅ ᐅᖃᓚᐅᕐᑐᖅ ᕆᕗᐊᒥ ᐅᐸᒃᑎᓪᓗᒍ ᐃᒃᓯᕋᕐᔪᐊᑦ ᐱᓕᕆᕝᕕᖓᓂᒃ ᓚᐃᐊᓐᒥ, ᐅᖃᓪᓚᓚᐅᕐᑐᖅ ᐃᓄᒃᑎᑐᑦ, ᐅᖃᐅᓯᖅ ᑖᔅᓱᒪ ᐃᒃᓯᕋᕐᔪᐊᑉ ᐅᖃᐅᓯᕆᕙᒃᑕᖓ ᑐᑭᓯᐊᑦᑎᐊᖅᖢᓂᓗ ᓇᐅᔮᓃᑎᓪᓗᒍ.

ᐅᖃᓚᐅᕐᑐᖅ ᕆᕗᐊᑦ ᖁᓄᔪᕐᓂᐊᓚᐅᕐᓯᒪᙱᓐᓂᕋᖅᖢᓂᐅᒃ ᒪᑉᓴᓛᖅ ᐊᒻᒪ ᓄᑲᖓ.

“ᑭᐅᓪᓗᒍ, ‘ᓴᒡᓗᔪᑎ, ᖃᐅᔨᒪᑦᑎᐊᖅᑐᑎᑦ ᐅᕙᓐᓂ ᖃᓄᐃᓕᐅᓚᐅᕐᓯᒪᖕᒪᖔᑦ ᐊᒻᒪᓗ ᓄᑲᓐᓂ,’” ᐅᖃᕐᑐᖅ.

ᑕᐃᒪᐃᒃᑲᓗᐊᖅᑎᓪᓗᒍ, ᒪᑉᓴᓛᖅ ᐅᖃᓚᐅᕐᑐᖅ ᐅᖃᓪᓚᖃᑎᖃᕈᓐᓇᕐᓂᖓ ᕆᕗᐊᒥ ᐊᕐᕌᒍᒐᓴᑦ ᐊᓂᒍᕋᓗᐊᖅᑎᓪᓗᒍ ᐃᒻᒥᓄ ᒪᒥᑉᐹᓪᓕᕐᓂᖃᕈᑎᖃᓚᐅᕐᑐᖅ.

“ᐋᓐᓂᕐᓯᒪᓂᕋ ᐱᓯᒪᔭᕋ … ᐊᑯᓂᐊᓗᒡᓗ ᐱᓯᒪᓪᓗᒍ ᑕᐃᒪᓕ ᐃᓚᖓᓂᒃ ᐅᕿᒡᓕᕚᓪᓕᕈᑎᒋᓚᐅᕐᑕᕋ,” ᒪᑉᓴᓛᖅ ᐅᖃᕐᑐᖅ.

ᐃᓄᐃᑦ ᕗᕌᓐᔅᒧᙵᐅᓚᐅᕐᑐᑦ ᖃᐅᔨᒪᙱᖢᑎᒃ ᑖᔅᓱᒥᖓ ᐋᓐᓂᖅᓯᔨᕕᓂᖓᓂᒃ ᑖᒃᑯᓂᐊᕋᓗᐊᕐᒪᖔᑕ.

ᓚᐃᐊᓐ ᓄᓇᓯᐅᑎᑯᑖᖃᕐᕕᐊᓄᐊᖅᖢᑎᒃ ᓯᑎᐱᕆ 14ᒥ ᖃᐅᔨᑎᑕᐅᓚᐅᕐᓯᒪᔪᑦ ᐃᒃᓯᕋᕐᔪᐊᓄᑦ ᑖᓐᓇ ᕆᕗᐊ ᑖᒃᑯᓂᖓ ᑕᑯᔪᓐᓇᕐᓂᕋᖅᖢᓂ.

ᐅᖃᓪᓚᖃᑎᒌᓕᓚᐅᕐᑐᑦ ᐃᑲᕐᕋᑦ 24 ᑐᖔᓂ ᑖᒃᑯᐊ ᐅᐸᒃᓯᒪᔪᑦ ᕗᕌᓐᔅᒥ ᐊᐅᓚᑦᑎᔨᓄᑦ ᐊᐱᕆᒃᑲᓐᓂᖅᑎᓪᓗᒋᑦ ᕆᕗᐊᒥ ᑲᓇᑕᒧᐊᖅᑕᐅᑎᑕᐅᖁᔨᓪᓗᑎᒃ. ᐅᓇ ᐊᖏᖅᑕᐅᓚᐅᙱᑦᑐᖅ, ᐅᖃᕐᑐᖅ ᑰᑦᑎᖅ.

ᒪᑉᓴᓛᖅ ᐃᖅᑲᓇᐃᔭᖃᑎᖃᓚᐅᕐᓯᒪᖕᒥᔪᖅ ᒪᕆᐅᓯ ᑐᖏᓕᐅᓚᐅᕐᓯᒪᔪᒥ ᓇᐅᔮᓂ. ᑖᓐᓇᑦᑕᐅᖅ ᐃᓚᒋᔭᐅᓚᐅᕐᓯᒪᔪᖅ ᐸᓯᔭᒃᓴᙳᖅᑎᑦᑎᔪᓂᒃ ᕆᕗᐊᒥ.

ᒪᕆᐅᓯᐅᑉ ᐸᓂᖓ ᑖᓂᐊ ᑐᖏᓕᒃ ᕗᕌᓐᔅᒧᙵᐅᖃᑕᐅᓚᐅᕐᑐᖅ ᐊᑖᑕᒋᓚᐅᖅᑕᒥᓂᒃ ᑭᒡᒐᖅᑐᐃᓪᓗᓂ, ᑖᓐᓇ ᐃᓅᔪᓐᓃᓚᐅᕐᓯᒪᖕᒪᓐ 2012ᒥ ᐊᒻᒪ ᐅᖃᓚᐅᕐᓯᒪᓐᓂᖅᖢᑎᒃ ᐱᑦᑎᐊᙱᑎᕕᓂᕐᒥᓂᒃ ᑕᑯᔪᒪᓂᕋᖅᖢᓂ.

ᐊᑯᑎᒥ ᐊᔾᔨᓕᐅᕐᓯᒪᔪᖅ ᐅᐃᕖᑦ ᐃᒃᓯᕋᕐᔪᐊᑦ ᐱᓕᕆᕝᕕᓪᓚᕆᐊᓂᒃ ᒪᐃᐊᓐ, ᕗᕌᓐᔅᒥ. (ᐊᔾᔨᓕᐅᕆᔨ ᐃᐊᒪ ᑐᕌᓐᑐᕐ)

ᒪᑉᓴᓛᖅ ᐊᒻᒪ ᑐᖏᓕᒃ ᐅᖃᓪᓚᖃᑎᖃᓚᐅᕐᑑᑦ ᐃᓄᑑᔪᐃᓐᓇᐅᓪᓗᑎᒃ ᑖᔅᓱᒥᖓ, ᑐᖏᓕ ᑐᒡᓕᐅᓪᓗᓂ.

“ᐅᖃᐅᑎᓚᐅᕐᑕᕋ ᑮᓇᐅᖕᒪᖔᑦ, ᑭᓇᒥᒡᓗ ᐊᑖᑕᖃᓚᐅᕐᒪᖔᑦ,” ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᐅᖃᓪᓚᖃᑎᖃᓚᐅᖅᑎᓪᓗᒋᑦ.

“ᐅᖃᐅᑎᓚᐅᕐᑕᕋ ᐊᑖᑕᒪ ᐃᓅᓯᖓᓂ ᓱᕋᐃᓂᕋᖅᖢᒍ. ᐊᑖᑕᖃᕈᓐᓃᖅᑎᑦᑎᓯᒪᓂᕋᖅᖢᒍ ᑖᔅᓱᒧᖓ.” ᐅᖃᕐᕕᒋᒐᒥᐅᒃ ᐊᓂᑐᐃᓐᓇᖅᖢᓂ ᐃᒡᓗᕈᓯᕐᒥ ᑐᓴᕈᒪᙱᖢᓂ ᕆᕗᐊ ᑭᐅᔾᔪᑎᖏᓐᓂᒃ.

“ᐅᖃᐅᓯᒃᓴᓐᓂ ᐅᖃᕈᒪᑐᐃᓐᓇᓚᐅᕋᒪ ᐊᒻᒪ ᕿᒪᒡᓗᒍ. ᑐᓴᕈᒪᓚᐅᙱᑦᑎᐊᖅᑐᖓ ᕆᕗᐊ ᐅᖃᖅᑕᖏᓐᓂᒃ ᓲᖃᐃᒻᒪ ᖃᐅᔨᒪᒐᒪ ᓴᒡᓗᒍᑎᑐᐃᓐᓇᐅᓂᐊᕐᓂᖏᓐᓂᒃ. ᑐᓴᕈᒪᓚᐅᙱᓐᓇᒪ ᓴᒡᓗᔾᔪᑎᒋᔭᖏᓐᓂᒃ,” ᐅᖃᕐᑐᖅ ᑐᖏᓕᒃ. ᕿᒪᒃᑲᒥᐅᒃ ᐃᒃᐱᒋᔭᖓ “ᐃᖢᐊᕐᓂᕐᓴᐅᓚᐅᕐᑐᖅ,” ᐅᖃᕐᑐᖅ.

“ᕿᐊᓚᐅᕐᑐᖓ ᐊᒃᓱᕈᑦᑎᐊᖅᖢᖓ ᖃᖓᑲᓪᓛᓗᖕᓂ. ᕿᐊᓚᐅᕐᑐᖓ ᖃᓱᓂᓐᓄᑦ, ᓂᙵᒃᓯᒪᔭᓐᓂ ᐊᓂᑦᑎᓂᕐᒧᑦ,” ᐅᖃᕐᑐᖅ.

“ᐊᓱᐃᓛᒃ ᐊᑐᓚᐅᕐᐸᕋ. ᐊᑖᑕᓐᓄ ᑕᐃᒪᐃᓕᐅᓚᐅᕐᑐᖓ. ᐃᒻᒥᓂ ᑕᑯᔪᒪᓚᐅᕐᓯᒪᔪᖅ ᕆᕗᐊᒥ ᑭᓯᐊᓂᓕ ᐱᕕᖃᕈᓐᓇᙱᑎᓪᓗᒍ ᐃᓅᔪᓐᓃᓚᐅᕐᓯᒪᖕᒪᓐ.”

ᑐᖏᓕᒃ, ᐊᑖᑕᖓᑕ ᐅᓂᒃᑳᖓᓂ ᐅᖃᐅᓯᖃᓚᐅᕐᒥᔪᖅ ᐃᒃᓯᕋᕐᔪᐊᕌᐱᒃ ᕗᕌᓐᓯᔅᒧ ᐃᖃᓗᖕᓄᐊᖅᑎᓪᓗᒍ ᔪᓚᐃᒥ, ᐅᖃᓚᐅᕐᑐᖅ ᕆᕗᐊᒥ ᑕᑯᔭᕆᐊᖃᕐᓂᕋᖅᖢᓂ.

“ᐅᖁᒪᐃᔾᔪᑎᐊᓗᒃ ᓴᒡᕕᖕᓂᑦ ᐱᑕᖃᕈᓐᓃᓚᐅᕐᑐᖅ,” ᐅᖃᕐᑐᖅ.

ᐅᐸᒍᑎᓯᒪᔪᑦ ᑲᓇᑕᒧ ᐅᑎᓚᐅᕐᑐᑦ ᓯᑎᐱᕆ 16ᒥ ᐊᒻᒪᓗ ᕗᕌᓐᔅᒥᐅᑕᒥ ᓗᐊᐃᔭᒥ ᖃᐅᔨᓴᖅᑐᖃᓕᖅᖢᓂ ᐃᒃᓯᕋᕐᔪᐊᓂᒃ ᐸᓯᔭᒃᓴᙳᖅᑎᑦᑎᔪᓐᓇᕐᒪᖔᑦ ᓴᐳᔾᔨᓯᒪᓂᖏᓐᓂᒃ ᐱᕋᔭᐅᓂᕋᖅᑕᐅᔪᒥᒃ.

ᑖᒃᑯᐊᓕ ᐃᒃᓯᕋᕐᔪᐊᑦ ᑐᓴᖅᑎᑦᑎᓚᐅᕐᑐᑦ ᐱᓇᓱᐊᕈᓯᐅᓚᐅᕐᑐᒥ ᑖᔅᓱᒥᖓ ᕆᕗᐊᒥ ᐊᓂᑦᑎᓇᓱᒃᐸᓪᓕᐊᓕᕐᓂᖏᓐᓂᒃ, ᑖᓐᓇᓗ ᑕᖅᑭᓂ ᐱᖓᓱᓂ ᐱᓕᕆᐊᖑᓂᐊᕋᓱᒋᔭᐅᓪᓗᓂ.

Share This Story

(0) Comments