ᐊᕙᑎᓕᕆᓂᕐᒧᑦ ᐃᓕᓐᓂᐊᖅᑐᓕᕆᓂᖅ ᒐᕙᒪᑐᖃᒃᑯᓐᓂᑦ ᐃᑲᔪᕆᐊᖅᑕᐅᕗᖅ ᓄᓇᕗᒥᑦ

ᓄᓇᕗᒥᑦ ᐊᔪᕈᓐᓃᕐᓴᕐᕕᒃ ᑮᓇᐅᔭᖃᕐᓂᕐᓴᐅᕌᕐᔪᓕᖅᐳᖅ ᐊᐅᓚᔾᔪᑎᖏᓐᓂᒃ ᐊᔪᕈᓐᓃᕐᓴᕈᑎᒃᓴᓂᒃ ᐊᕙᑎᓕᕆᓂᕐᒧ ᐱᓕᕆᔨᒻᒪᕆᐅᓇᔭᖅᑐᓂᒃ ᐃᖅᑲᓇᐃᔭᕐᕕᒃᒥᑦ ᐊᒻᒪ ᓄᓇᓕᖕᓂᑦ.

ᔪᓚᐃ 26-ᒥ, ᑳᑐᕆᓐ ᒪᒃᑭᓇ, ᒐᕙᒪᑐᖃᒃᑯᑦ ᒥᓂᔅᑕᖓ ᐊᕙᑎᓕᕆᓂᕐᒧᑦ ᐊᒻᒪ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ, ᑐᓴᖅᑎᑦᑎᓚᐅᕐᑐᖅ $200,000 ᑐᕌᖓᓂᐊᕐᓂᕋᖅᖢᓂᐅᑦ ‘ᐃᓕᓐᓂᐊᐹ’ ᐊᔪᕈᓐᓃᕐᓴᕐᕕᒃᒥᑦ, ᐊᒻᒪᓗ ᐱᓗᐊᕐᑐᒥ ᐱᓕᕆᐊᖏᓐᓄᑦ ᐃᓅᖁᑎᕗᑦ, ᓯᓚᕗᑦ.

“ᐅᓇ ᐱᓕᕆᐊᒃᓴᖅ ᑕᐅᑐᒍᑎᐅᖕᒥᖕᒪᑦ ᖃᓄᐃᑉᐸᓪᓕᐊᓂᕐᒥᑦ ᐅᑭᐅᕐᑕᖅᑐᓕᒫᒥᑦ, ᑕᐅᑐᒃᖢᒍ, ᐄ, ᓯᓚ ᐊᓯᙳᖅᐸᓪᓕᐊᖕᒪ, ᐊᒻᒪᓗ ᐅᕙᑦᑎᓅᕆᓪᓗᓂ, ᐊᒻᒪᑦᑕᐅᖅ, ᖃᓄᐃᓕᐅᕈᑎᒋᓕᕈᓐᓇᖅᖢᑎᒍᑦ,” ᐅᖃᖅᑐᖅ ᕼᐊᓚᓐ ᕉᔅ, ᐱᓕᕆᕝᕕᒃᒥᑦ ᐊᖓᔪᖅᑳᖅ ᐊᒻᒪ ᐃᓕᓴᐃᔨᐅᓪᓗᓂ.

ᐅᕘᓇ ᐃᖃᓗᐃᑦ ᐊᔪᕈᓐᓃᕐᓴᕕᖓᒍᑦ ᐊᒻᒪᓗ ᖃᕋᓴᐅᔭᒃᑯᑦ ᐃᓕᓐᓂᐊᕈᑎᒃᓴᑎᒍᑦ, ISDC ᐱᓕᕆᑎᑦᑎᔨᐅᕙᒃᐳᑦ ᐃᖅᑲᓇᐃᔮᓄᑦ ᐊᔪᕈᓐᓃᕐᓴᕈᑎᓂᒃ, ᒪᑯᑎᑐᓇᖅ ᐃᖅᑲᓇᐃᔮᖅᑖᕋᓱᒃᖢᓂ ᑎᑎᕋᕈᓐᓇᕐᓂᕐᒥᒃ ᐊᒻᒪ ᖃᕋᓴᐅᔭᓂ ᐱᓕᕆᐊᖃᕈᓐᓇᕐᓂᕐᒥᒃ, ᐊᒻᒪᓗ ᐃᖅᑲᓇᐃᔭᕐᕕᒃᒥᑦ ᐊᔪᕈᓐᓃᕐᓴᕐᓂᕐᒥᒃ, ᒪᑯᓂᖓ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪ ᐱᕐᕈᓗᐊᕿᑦᑕᐃᓕᓂᕐᒧᑦ ᐸᐃᑉᐹᖅᑕᕈᑎᓂᒃ ᐊᒻᒪ ᐃᓱᒪᒃᑯ ᐋᓐᓂᐊᖅᑐᓕᕆᓂᕐᒥᒃ ᐊᒻᒪ ᖃᓄᐃᑦᑕᐃᓕᓂᕐᒧᑦ ᐊᔪᕈᓐᓃᕐᓴᖅᑎᑦᑎᓂᕐᒥᒃ ᐱᓕᕆᐊᖃᖅᑳᖅᐸᒃᑐᓂᒃ.

ᐅᓇ ᐃᓕᓐᓂᐊᕐᕕᐅᔪᖅ ᒪᓂᒻᒪᐃᓯᒪᒐᓗᐊᖅᑎᓪᓗᒍ ᐱᓕᕆᔾᔪᑎᓕᕆᓂᕐᒧᑦ ᐃᓕᓐᓂᐊᕈᑎᒃᓴᓂᒃ ᐊᕙᑎᓕᕆᓂᕐᒧᑦ, ᐅᑯᑎᑐᓇᖅ ᐊᕙᑎᒋᔭᒥᑦ ᖃᐅᔨᓴᖅᐸᓪᓕᓂᖅ ᐅᔭᕋᒃᓯᐅᕐᕕᒃᓂᒃ ᐱᐅᓯᕚᓪᓕᖅᑎᑦᑎᓂᕐᒥᒃ ᐊᒻᒪ ᓱᕈᖅᑎᑦᑎᑦᑕᐃᓕᓂᕐᒥᒃ, ᐃᓄᖁᑎᕗᑦ, ᓯᓚᕗᑦ ᐊᔾᔨᒋᙱᒻᒪᒍ ᐃᓕᓐᓂᐊᒐᒃᓴᓕᕆᓂᐅᔪᖅ ᐅᑯᓄᖓ ᐃᓕᓐᓂᐊᐹᒧᑦ.

ᐱᓕᕆᐊᒃᓴᖅ ᑐᕌᖓᔪᖅ ᓄᓇᕗᒻᒥᐅᓂᒃ ᐃᓕᓐᓂᐊᖅᑎᑦᑎᓂᐅᓗᓂ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ, ᑖᓐᓇᓗ ᑐᕌᖓᓂᕐᓴᐅᓪᓗᓂ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪ ᐃᓕᖁᓯᖏᓐᓂᒃ ᐊᒻᒪᓗ ᐃᑲᔪᖅᑐᐃᒍᑎᐅᓪᓗᓂ ᐊᕙᑎᒋᔭᒥᑦ ᖃᓄᐃᑎᑦᑎᑦᑕᐃᓕᓂᕐᒥᒃ.

ᐃᓱᒪᒋᔭᐅᔪᕐᓗ ᑕᐅᑐᑐᐃᓐᓇᙱᓪᓗᑎᒃ ᖃᓄᖅ ᐃᓄᐃᑦ ᐊᒃᑐᖅᑕᐅᓯᒪᓂᖏᓐᓂᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓂ, ᑭᓯᐊᓂᓕ ᖃᓄᖅ ᑖᒃᑯᐊ ᑖᔅᓱᒥᖓ ᐊᒃᑐᓯᒍᑎᖃᕐᓂᖏᓐᓂᒃ, ᒪᑯᐊ ᐆᒻᒪᖁᑎᓂ ᐊᑐᕈᑎᐅᔪᑦ ᐊᒻᒪ ᐊᓯᐅᑎᑦᑎᑦᑕᐃᓕᓂᖅ ᐃᓱᒪᒋᓪᓗᒋᑦ.

“ᐅᑯᑎᒎᓇᖅ ᓄᓇᕗᑦ ᒐᕙᒪᒃᑯᑦ ᐃᓕᓐᓂᐊᕐᓂᓕᕆᔨᖏᑦᑎᒍᑦ, ᐃᓕᓐᓂᐊᕈᑎᒃᓴᖅᑕᖃᖅᑐᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓅᖓᔪᓂᒃ,” ᕉᔅ ᐅᖃᖅᑐᖅ.

“ᑭᓯᐊᓂᓕ ᑲᒻᐸᓂᒃᑯᑦ, ᐊᔪᕈᓐᓃᖅᓴᖅᑎᑦᑎᕙᒃᐳᒍᑦ ᐊᒻᒪ ᐱᕙᓪᓕᐊᑎᑦᑎᓂᕐᒥᒃ ᐃᓅᓱᒃᑐᓂᒃ ᐊᒻᒪ ᐃᓐᓇᕐᓂᒃ, ᐱᓗᐊᕐᑐᒥᒃ ᐃᓕᓐᓂᐊᕈᓃᕐᓂᑯᓂᒃ, ᐊᒻᒪᓗ ᐱᓕᕆᐊᖃᕈᒪᓪᓗᑕ ᐊᔪᕈᓐᓃᕐᓴᕈᑎᒃᓴᓂᒃ ᐃᓄᖕᓄᑦ ᐊᒃᑐᐃᒍᑎᐅᔪᓂᒃ.”

ᐅᓇᓗ ᓯᓚᐅᑉ ᐊᓯᙳᖅᐸᓪᓕᐊᓂᖓ, ᓲᖃᐃᒻᒪ, ᑖᒃᑯᓄᖓ ᐃᓚᒋᔭᐅᓪᓗᓂ.

ᐃᓄᖁᑎᕗᑦ, ᓯᓚᕗᑦ ᐃᓚᖃᕐᓂᐊᕐᑐᖅ ᐃᖅᑲᓇᐃᔮᒧᑦ ᐸᕐᓇᐅᑎᒃᓴᓂᒃ ᐃᓕᓐᓂᐊᖅᑐᓄᑦ ᐅᑭᐅᓕᖕᓂᒃ 15-ᓗ 30-ᓗ ᐊᑯᓐᓂᖓᓂ.

ᐃᓕᓐᓂᐊᕈᑎᒃᓴᖅ ᒪᓂᒻᒪᐃᓯᒪᔪᖅ ᑕᓪᓕᒪᐅᓕᖓᔪᓂᒃ ᐃᓕᓐᓂᐊᕈᑎᒃᓴᓂᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ ᐊᒻᒪ ᐊᕙᑎᓕᕆᓂᕐᒧᑦ ᖃᓄᐃᓕᐅᕈᑎᒃᓴᓂ, ᑕᐃᒪᓐᓇᓗ ᐃᓕᓐᓂᐊᖅᑐᑦ ᑎᒍᒥᐊᖅᑎᐅᔪᓂ ᐱᓕᕆᖃᑎᖃᕈᓐᓇᓕᕐᓗᑎᒃ ᐱᓕᕆᐊᒃᓴᓂᒃ, ᐃᓚᖃᕐᓗᑎᒃ ᓄᓇᕗᑦ ᒐᕙᒪᒃᑯᖏᓐᓂᒃ ᐊᒻᒪ ᒐᕙᒪᑐᖃᒃᑯᓐᓂᒃ, ᐊᔾᔨᒌᙱᑦᑑᑎᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᒻᒪ ᐃᒡᓗᓕᕆᔨᐅᔪᓂᒃ, ᐊᕙᑎᓕᕆᓂᕐᒧᑦ ᑐᕌᖓᔪᒃᑯᑦ.

ᐅᓇ ᐃᓕᓐᓂᐊᕐᕈᑎᐅᓇᔭᖅᑐᖅ ᖃᓪᓗᓈᑎᑐᑦ ᐊᒻᒪ ᐃᓄᒃᑎᑐᑦ.

“ᐊᔪᙱᑦᑐᐊᓘᓕᕈᓐᓇᖅᑐᑦ,” ᕉᔅ ᐅᖃᐅᓯᖃᖅᖢᓂ ᐃᓚᐅᔪᓂᒃ. “ᐱᓕᕆᔨᒻᒪᕆᐅᒍᓐᓇᖅᑐᑦ ᐃᑲᔪᑐᐃᓐᓇᙱᓪᓗᑎᒃ ᐱᓕᕆᕝᕕᒃᒥᑦ ᐊᓯᙳᖅᐸᓪᓕᐊᓂᕐᒥ ᑭᓯᐊᓂᓕ ᐃᑲᔪᖅᑐᐃᔨᐅᓗᑎᒃ ᓄᓇᓕᖕᓄᑦ.”

ᐃᓕᓐᓂᐊᕈᑎᒃᓴᑦ ᑖᔅᓱᒧᑦ ᐱᓕᕆᐊᒃᓴᒧᑦ ᐱᓕᕆᐊᖑᕙᓪᓕᐊᔪᖅ, ᒪᓕᒡᓗᓂ ᖃᐅᔨᓴᖅᑕᐅᓯᒪᔪᓂᒃ ᐅᑭᐅᕐᑕᖅᑐᓕᒫᒥᑦ ᐊᒻᒪᓗ ᑲᑐᔾᔨᖃᑎᒌᓂᙶᖅᑐᓂᒃ ᐱᓕᕆᖃᑎᖃᖅᑐᓂᒃ ᐃᓕᓐᓂᐊᕐᕕᒃᒥᑦ ᐊᒻᒪᓗ ᐃᓄᐃᑦ ᐊᖓᔪᖅᑳᒐᓚᖏᓐᓂᒃ.

“ᐃᑲᔫᑎᒃᓴᖅ ᐅᑯᓄᖓᐅᓂᐊᖅᑐᖅ ᖃᐅᔨᓴᕐᓂᕐᒧᑦ, ᑎᒍᒥᐊᖅᑎᑦ ᐃᓚᐅᓂᖏᓐᓄᑦ, ᐃᓕᓐᓂᐊᕈᑎᒃᓴᓕᐅᕐᓂᕐᒧᑦ,” ᐅᖃᖅᑐᖅ ᕉᔅ. “ᐊᒻᒪᓗ ᖃᐅᔨᓴᕈᑎᐅᓕᕐᓗᑎᒃ ᐊᔾᔨᒌᙱᑦᑐᓄᑦ ᐃᓅᓱᒃᑐᓄᑦ ᐃᓕᓐᓂᐊᕐᓂᒃᑯᑦ.”

ᐃᓱᒪᒋᔭᓕᒡᓕ ᖃᐅᔨᓴᕐᓂᖅ ᐱᒋᐊᕐᓂᐊᕐᓗᓂ ᓄᕕᐱᕆᒥ, ᐊᒻᒪᓗ ᐃᓅᓱᒃᑐᑦ ᐃᓕᓐᓂᐊᕐᓗᑎᒃ ᓄᓇᖏᓐᓂᒃ, ᐅᕝᕙᓘᓐᓃᑦ ᐊᔪᕈᓐᓃᕐᓴᖅᑎᑕᐅᓂᕐᒧᑦ ᓴᓇᑎᑕᐅᓗᑎᒃ ᐊᕐᕌᒍ ᐱᒋᐊᓕᓵᓕᕐᐸᑦ.

ᒐᕙᒪᑐᖃᒃᑯᑦ ᑮᓇᐅᔭᖏᑦ ᐊᕕᒃᑐᕐᑕᐅᓂᐊᕐᑐᖅ ᐅᕙᙵᑦ ᑲᒪᔨᐅᔪᓂᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐃᑲᔫᑎᓂᒃ, ᑖᒃᑯᐊ ᐃᑲᔪᖅᑐᐃᖃᑦᑕᕐᒪᑕ ᐱᓕᕆᐊᒃᓴᓂᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ ᐱᓕᕆᐊᖃᕋᓱᒃᑐᓂᒃ ᐊᒻᒪᓗ ᐱᓇᓱᐊᖅᑐᓂᒃ ᐊᕙᑎᒋᔭᒥ ᐃᑲᔪᕈᑎᐅᓇᔭᖅᑐᓂᒃ.

ᕉᔅ ᐅᖃᐅᓯᖃᓚᐅᕐᒥᔪᖅ ᐃᓅᓱᒃᑐᑦ ᓄᓇᕗᒥᑦ ᓇᑉᐸᓪᓗᐊᕆᖕᒪᒋᑦ ᐊᒻᒪᓗ ᑖᒃᑯᐊ ᖃᐅᔨᒪᓂᖏᓐᓂᒃ ᑐᓴᐅᒪᓕᖅᑎᑦᑎᓂᐊᖅᖢᑎᒃ ᒪᑯᓂᖓ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ ᐊᒻᒪᓗ ᖃᓄᖅ ᑕᐃᒪᐃᑎᑦᑕᐃᓕᒍᑎᒃᓴᓂᒃ. ᑖᒃᑯᐊᑦᑕᐅᖅ ᐊᒃᑐᖅᑕᐅᓛᖑᓕᓛᕐᒥᖕᒪᑕ ᖃᑯᒍᒃᑲᓐᓂᖅ.

ᒪᒃᑭᓇ ᐅᖃᓚᐅᕐᑐᖅ ᑐᓴᒐᒃᓴᓕᐊᑎᒍᑦ, “ᖁᕕᐊᓱᓗᐊᕐᐳᖓ ᐅᓇ ᐱᓕᕆᐊᒃᓴᖅ ᐃᓕᓐᓂᐊᖅᑎᓅᕐᓂᐊᕐᒪᑦ ᐊᒻᒪ ᐃᓅᓱᒃᑐᓄ. ᑲᓇᑕᓕᒫᒥᑦ, ᐃᓅᓱᒃᑐᑦ ᐱᓇᓱᒻᒪᕆᓕᕐᒪᑕ, ᓯᕗᓕᐅᕐᑎᓂᒃ ᓯᓚᐅᑉ ᐊᓯᙳᖅᐸᓪᓕᐊᓂᖓ ᐱᓕᕆᐊᕆᔭᐅᖁᓪᓗᓂᔾᔪᒃ. ᓯᕗᓂᒃᓴᖓᓂᒃ ᐅᓇᑕᐅᑎᖃᕋᑦᑕ. ᐊᑐᖅᑐᐊᑐᐃᓐᓇᕋᑦᑎᒍᑦ ᓄᓇᕐᔪᐊᖅ ᑖᒃᑯᓇᙵᑦ.”

ᐃᓅᓱᒃᑐᑦ ᑕᒪᑐᒥᖓ ᐱᓕᕆᐊᒃᓴᒧ ᑐᕌᒐᕆᔭᐅᓗᐊᕋᓗᐊᖅᑎᓪᓗᒋᑦ, ᐱᓕᕆᖃᑎᖃᕐᓂᐊᖅᑐᑦ ᑭᒃᑯᑐᐃᓐᓇᕐᓂ ᐃᓕᓐᓂᐊᖅᑎᑦᑎᓂᖅᑕᖃᕆᐊᖃᕐᓂᒃᑯ ᐊᕙᑎᐅᑉ ᒥᒃᓵᓄᑦ ᐊᒻᒪ ᓴᐳᔾᔨᓯᒪᒐᓱᖕᓂᕐᒧᑦ.