ᐊᖏᒡᓕᒋᐊᕐᓯᒪᔪᖅ ᐃᓐᓇᕐᓂᒃ ᑲᒪᒋᔭᖃᕐᕕᒃ ᓄᓇᕗᒥᑦ ᐊᔪᕈᓐᓃᕐᓴᕈᑎᐅᔭᕆᐊᖃᕐᓂᐊᖅᑐᖅ, ᐱᖁᔭᑦ

ᐅᓇ ᑎᑎᖅᑲᖅ, ᐃᓕᓯᒪᔪᖅ ᑐᓄᐊᓂ ᓄᓇᖁᑎᒋᔭᐅᔪᒥᑦ ᓄᓇᕗᒥᑦ ᒪᓕᒐᓕᕆᕕᒡᔪᐊᖓᑕ ᓄᓇᕗᑦ ᐅᓪᓗᖓᓂᒃ ᖃᓄᐃᓕᐅᕈᓘᔭᖅᑎᓪᓗᒋ ᔪᓚᐃ 9, 2011-ᒥ, ᓴᕿᑎᑦᑎᓯᒪᔪᖅ ᐃᓐᓇᑐᖃᕐᓂ ᐃᓱᒪᒋᔭᖃᑦᑎᐊᕐᓂᕐᒥᒃ. ᑭᓯᐊᓂᓕ, ᓄᓇᕗᑦ ᐸᕐᓇᒃᓯᒪᓕᖅᐸ ᓄᑖᒥᑦ ᐱᐅᔪᒻᒪᕆᐊᓗᖕᒥᑦ ᑲᒪᒋᔭᐅᖏᓐᓇᕆᐊᓖᑦ ᐊᖏᕐᕋᖏᓐᓃ? (ᐊᔾᔨᙳᐊᖁᑎᒋᔭᐅᔪᖅ)

By ᔨᒻ ᐱᐅᓪ

ᓯᕗᓂᑐᖃᖓᓂᒃ 2017 ᓄᓇᕗᒥᑦ ᓂᕈᐊᕐᓇᐅᓂᐊᖅᑑᑉ, ᐋᕿᒃᓱᐃᓂᖅ ᐱᓕᕆᕝᕕᒃᓴᒥ ᐃᓐᓇᑐᖃᕐᓂᒃ ᑲᒪᒋᔭᖃᕐᕕᒃᓴᖅ ᑕᒪᐃᓐᓂ ᐊᕕᒃᑐᖅᓯᒪᐅᕐᓂᒃᑯᑦ ᓯᕗᓪᓕᖅᐹᕆᔭᐅᓚᐅᕐᓯᒪᔪᖅ ᐊᒻᒪᓗ ᑕᒪᐃᓐᓄᐸᓗᒃ ᓄᓇᕗᒻᒥᐅᓄᑦ, ᐃᒻᒪᖄᓪᓘᓐᓃᑦ ᖁᑦᑎᖕᓂᖅᐹᖑᓪᓗᓂ ᐊᓯᖏᓐᓂᒃ ᐱᓕᕆᐊᕆᔭᐅᔪᒪᔪᓂᒃ.

ᑲᒪᓇᙱᓚᖅ, ᑕᐃᒪᐃᓐᓂᖓᓄᑦ, ᖃᓄᐃᓕᐅᕐᓂᐊᕆᐊᒃᓴᖅ ᐸᕐᓂᐅᓯᐅᕐᓂᒃᑯᑦ, ᓴᓇᓕᕐᓂᒃᑯᑦ ᐊᒻᒪ ᐊᐅᓚᑦᑎᓂᕐᒥᑦ ᑕᐃᒪᐃᑦᑐᒥᑦ ᐱᓕᕆᕝᕕᒃᓴᒥ ᐃᓱᒪᒋᔭᐅᓂᕐᓴᐅᓗᐊᕐᒪᑦ ᒫᓐᓇ ᒐᕙᒪᒋᔭᐅᔪᓄᑦ ᓄᓇᕗᒥᑦ ᐊᒻᒪᓗ ᐃᓚᖏᓐᓄᑦ ᒪᓕᒐᓕᕆᔨᓄᑦ, ᓯᕗᓕᐅᕐᑎ ᔫ ᓴᕕᑲᑖᖅ ᑕᐃᒪᓐᓇᐸᓗᒃ ᐅᖃᓚᐅᕐᑐᖅ ᑕᖅᑭᐅᓚᐅᕐᑐᒥᑦ ᑲᑎᒪᖃᑎᖄᓪᓚᓚᐅᖅᖢᓂ ᑲᓇᑕᐅᑉ ᐊᖓᔪᖅᑳᖓᓂᒃ ᔭᔅᑎᓐ ᑐᕉᑑᒥᑦ.

ᐊᓯᖏ ᐅᓄᙱᑦᑐᑦ ᐃᓅᖃᑎᒌᖑᔪᓂᒃ ᓄᓇᕐᔪᐊᕐᒥᑦ ᐃᓐᓇᑐᖃᕐᓂᒃ ᐃᓱᒫᓗᒋᔭᖃᖃᑦᑕᖅᑐᑦ ᑭᓯᐊᓂᓕ ᓄᓇᕗᒻᒥᐅ ᑕᒪᑐᒥᖓ ᐱᒻᒪᕆᐅᒋᔭᖃᓛᖑᔪᑦ.

ᑕᒪᐅᓇᑦᑕᐃᓐᓇᖅ, ᐅᓄᕐᓂᖏᑦ ᐃᓐᓇᑐᖃᐃᑦ ᑲᒪᒋᔭᐅᔭᕆᐊᖃᓕᕐᓯᒪᔪᑦ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᐃᓅᓯᖃᕐᓂᖏᓐᓂᒃ ᐅᓄᕐᓯᕙᓪᓕᐊᖕᒪᑕ. ᒫᓐᓇᓕ ᓄᓇᕗᑦ ᐃᓄᒋᐊᖕᓂᖏᑦᑎᒍᑦ, ᑖᒃᑯᐊ ᐅᓄᙱᓛᖑᓯᒪᓪᓗᑎᒃ ᑕᒪᐃᓐᓂ ᑕᐅᑐᒃᖢᒋᑦ, ᖃᓂᑦᑐᒥᑦ ᐅᓄᕐᓯᕚᓪᓕᒻᒪᕆᓛᕐᑐᑦ.

ᐅᓄᕐᓯᕙᓪᓕᐊᓂᖅ

ᐅᑯᑎᒎᓇᕐᓕ ᓇᐃᓴᐃᔨᑦ ᑲᓇᑕᒥ, ᓄᓇᕗᒥᐅᑕ ᐊᕐᕌᒍᖃᖅᑐᑦ 80 ᐅᖓᑖᓂᓪᓗ ᐃᓱᒪᒋᔭᐅᓚᐅᕐᓯᒪᔪᑦ ᔪᓚᐃ 2014-ᖑᑎᓪᓗᒍ 150 ᑐᙶᓃᓐᓇᓱᒋᔭᐅᓪᓗᑎᒃ. ᑕᒫᓂ ᐊᕐᕌᒍᖃᖅᑐᑦ ᑲᒪᒋᔭᐅᙱᓐᓇᕆᐊᖃᓕᕋᔭᕐᒪᑕ.

ᑭᓯᐊᓂᓕ 2015-ᒥ ᓄᓇᕗᑦ ᒐᕙᒪᒃᑯᑦ ᐅᓂᒃᑳᖏᓐᓂᒃ ᑲᒪᒋᔭᐅᙱᓐᓇᕆᐊᓕᓕᕆᓂᕐᒧᑦ ᐃᓱᒪᒋᔭᐅᔪᖅ ᑖᒃᑯᐊ ᐅᓄᕐᓂᐅᔪᑦ ᐅᓄᕐᓂᖏᑦᑎᑐᑦ ᐅᓄᕐᓯᒋᐊᒃᑲᓐᓂᕐᓂᐊᕋᓱᒋᔭᐅᓪᓗᑎᒃ 2024 ᑎᑭᒃᑯᓂ ᐊᒻᒪ ᐅᓄᕐᓂᖏᑦᑎᑐᑦ ᐅᓄᕐᓯᒃᑲᓐᓂᕐᓗᑎᒃ 2035 ᑎᑭᑉᐸᑦ.

ᐅᓇ ᓇᓗᓇᖂᔨᙱᓚᖅ ᐊᕐᕌᒍᓖᑦ ᑲᒪᒋᔭᐅᔭᕆᐊᖃᓛᓂ ᒫᓐᓇ ᐅᓄᕐᓂᖏᑦ ᑎᓴᒪᐃᕐᓗᓂ ᐅᓄᕐᓯᒋᐊᒃᑲᓐᓂᕋᔭᕐᓂᖏᓐᓂᒃ ᐊᕐᕌᒍᓂ ᐊᕙᑎᑦ ᐃᓗᐊᓂᑦ.

ᐊᒻᒪᓗ, ᐃᓐᓇᑐᖃᐃᑦ ᒪᑯᓂᖓ ᐃᓐᓇᐅᓂᕐᒧᑦ ᐋᓐᓂᕐᓇᖅᑐᓂᒃ ᓈᒻᒪᖏᑦᑐᓂᒃ ᐊᑐᓕᖅᐸᒃᖢᑎᒃ ᒪᑯᑎᑐᓇᖅ ᐳᐃᒍᑦᑎᐊᒻᒪᕆᔭᓐᓂᕐᒥᒃ ᑕᒪᒃᑯᐊᓗ ᑕᐃᒪᐃᓐᓂᕐᓴᐅᕙᓪᓕᐊᓕᖅᖢᑎᒃ. ᐊᒻᒪ ᓄᓇᕗᑦ ᒐᕙᒪᒃᑯᑦ ᑲᒪᒋᔭᖃᕈᓐᓇᕋᓗᐊᖅᑎᓪᓗᒋᑦ ᐃᓚᖏᓐᓂᒃ ᐊᖏᕐᕋᖏᓐᓃᑎᓪᓗᒋᑦ, ᐅᓄᕐᑐᐃᑦ ᑲᓇᑕᐅᑉ ᓂᒋᐊᓂ ᑲᒪᒋᔭᐅᔭᕆᐊᖃᓕᖅᐸᒃᖢᑎᒃ, ᐊᖏᕐᕋᖏᓐᓂᒃ ᐃᓚᖏᓐᓂᒡᓗ ᐅᖓᓯᒃᓴᒻᒪᕆᓕᖅᖢᑎᒃ.

ᑕᒪᓐᓇ ᐅᓄᕐᓯᕙᓪᓕᐊᓂᖅ ᓇᓗᓇᙱᒻᒪᑦ ᐃᒪᓐᓇ, ᐃᓱᒪᒋᓗᒍ ᑎᓯᐱᕆ 2014, ᑕᐃᔅᓱᒪᓂ 7 ᓄᓇᕗᒥᐅᑦ ᓄᓇᕗᑦ ᓯᓚᑖᓂᑦ ᑲᒪᒋᔭᐅᓚᐅᕐᓯᒪᔪᑦ.

ᒫᓐᓇᓕ, ᐊᕐᕌᒍᑦ ᑎᓴᒪᑦ ᐱᐊᓂᒃᑎᓪᓗᒍ, ᐅᓄᕐᓂᖏᑦ ᐃᓐᓇᑐᖃᐃᑦ ᐅᕙᓃᑦᑐᑦ ᐊᒻᐸᓯ ᕗᐃᐊᔅᑦ (Embassy West) ᑲᒪᒋᔭᖃᕐᕕᒃᒥᑦ ᐋᑐᕚᒥ ᐅᓄᕐᓯᕚᓪᓕᕐᓯᒪᔪᑦ ᑎᑭᖢᒍ 28.

ᒪᑯᐃ ᐃᓄᐃᑦ ᑲᒪᒋᔭᐅᙱᓐᓇᕆᐊᖃᓪᓚᕆᒃᑐᑦ, “ᓇᓗᓇᐃᒃᑯᑎᑯᑦ 5”-ᖑᓂᕋᖅᑕᐅᔪᒥᑦ. ᐅᑯᑎᒎᓇᕐᓕ ᓄᓇᕗᑦ ᒐᕙᒪᒃᑯᑦ ᑐᑭᓕᐊᖓᒍᑦ, ᐅᑯᐊ ᐃᓄᐃᑦ “ᓇᓗᓇᙱᓪᓚᕆᒃᑐᒥᑦ ᓘᒃᑖᓄᑦ ᐊᒻᒪ ᐋᓐᓂᐊᓯᐅᕐᑎᓄᑦ ᑲᒪᒋᔭᐅᔭᕆᐊᓖᑦ” ᐊᒻᒪᓗ ᐊᔾᔨᒌᙱᑦᑐᓂᒃ ᖃᕋᓴᖏᓐᓄᑦ ᐳᐃᒍᔭᓕᖅᖢᑎᒃ (dementia) ᐊᒻᒪᓗ ᖃᕋᓴᖓᒍᑦ ᐋᓂᐊᖃᓕᕐᑐᓂᒃ (Alzheimer’s disease).

ᓄᓇᕗᒥᑦ ᑕᐃᒪᐃᑦᑐᓄᑦ ᑲᒪᒋᔭᖃᕐᕕᖃᙱᒻᒪᑕ ᒫᓐᓇ.

ᓄᓇᕗᑦ ᒐᕙᒪᒃᑯᓪᓗ ᐅᓂᒃᑳᖏᓐᓂᒃ ᒪᑯᓂᖓ ᑲᒪᒋᔭᐅᖏᓐᓇᕆᐊᓕᖕᓂᑦ ᐃᓱᒪᒋᔭᖃᖅᑐᑦ ᐅᓇ 2035 ᑎᑭᑉᐸᑦ, ᓄᓇᕗᑦ ᒐᕙᒪᒃᑯᑦ 53-ᓗ 72-ᓗ ᐊᑯᓐᓂᖓᓂᒃ ᐅᓄᒃᑲᓐᓂᖅᑐᓂᒃ ᐃᒡᓕᕐᓂ ᐱᖃᒃᑲᓐᓂᕆᐊᖃᕋᔭᖅᑐᑦ.

“ᐃᓐᓇᑐᖃᕐᓂᒃ ᑲᒪᒋᔭᖃᕐᕕᒃᓴᖃᕆᐊᖃᕐᓂᖅ ᐱᕈᖅᐸᓪᓕᐊᑐᐃᓐᓇᕐᓂᐊᖅᑐᖅ, ᐱᔾᔪᑎᒋᓗᒍ ᐃᓐᓇᕈᖅᐸᓪᓕᐊᔪᑦ ᐅᓄᕐᓂᕐᓴᐃᑦ ᐃᓅᓯᖃᑯᑖᒃᑲᓐᓂᕐᓂᕐᓴᐅᓂᖏᑦ ᐊᒻᒪᓗ ᐃᓱᒪᒋᔭᐅᓪᓗᓂ ᑖᒃᑯᓇᙵᑦ ᐅᓄᕐᓯᕚᓪᓕᕋᔭᕐᓂᖏᑦ ᓄᓇᕗᒻᒥᐅᑦ ᐳᐃᒍᔭᓐᓂᕐᒥᒃ ᐋᓐᓂᐊᖃᕋᔭᕐᓂᖏᑦ ᐊᕐᕌᒍᓂᒃ ᐊᕙᑎᑦ ᐃᓗᐊᒍᑦ,” ᐅᓇ 2015-ᒥᑦ ᐅᓂᒃᑳᓕᐊᕕᓂᖅ ᐅᖃᖅᓯᒪᔪᖅ.

ᑕᒪᐅᓇᑦᑕᐃᓐᓇᕐᓕ, ᓄᓇᕗᒥᑦ ᒫᓐᓇ ᐱᖁᑎᒋᔭᖏᑦ ᑕᒪᑐᒥᖓ ᐱᓕᕆᐊᖃᕈᓐᓇᕋᔭᙱᑦᑐᑦ.

ᐱᖓᓱᑦ ᐃᓐᓇᑐᖃᕐᓂ ᑲᒪᒋᔭᖃᕐᕕᐅᔪᑦ ᑖᒃᑯᐊᓗ ᑲᑎᖢᑎᒃ 28-ᓂᒃ ᐃᒡᓕᖃᖅᖢᑎᒃ—ᐅᕙᓂ ᐃᖃᓗᒃᑑᑦᑎᐊᖅ, ᐃᒡᓗᓕᒃ ᐊᒻᒪ ᐅᖅᓱᖅᑑᖅ—ᐱᓕᕆᐊᖃᖅᑐᑦ “ᓇᓗᓇᐃᒃᑯᑎᒃᑯᑦ 4-ᒥ ᐱᓕᕆᕝᕕᒃᒥᑦ, ᑖᓐᓇᓕ ᑐᑭᓕᒃ “ᐱᓗᐊᙱᑦᑐᓂᒃ ᐋᓐᓂᐊᓯᐅᕐᑎᓄᑦ ᑲᒪᒋᔭᐅᕝᕕᒃ.”

ᐱᑕᖃᕆᓪᓗᓂ ᐱᖓᓱᓂᒃ ᐃᓐᓇᒃᑯᕕᖕᓂᒃ ᐅᕙᓂ ᐊᕐᕕᐊᑦ, ᐃᖃᓗᐃᑦ, ᐊᒻᒪ ᖃᒪᓂᑦᑐᐊᖅ, ᐃᓐᓇᑐᖃᕐᓂᒃ ᑲᒪᖏᔭᐅᓗᐊᕆᐊᖃᙱᑦᑐᓄᑦ. ᑭᓯᐊᓂᓕ ᐅᕙᓂ ᐱᓕᕆᕝᕕᒃᒥᑦ ᖃᒪᓂᑦᑐᐊᕐᒥᑦ, ᐅᓇ ᒫᑕ ᑕᓕᕈᖅ ᐃᓐᓇᒃᑯᕕᑦ ᒪᑐᔭᕆᐊᖃᓕᓚᐅᕐᓯᒪᔪᖅ ᐅᖅᓱᐊᓗᖕᒥᑦ ᑯᕕᔪᖃᕐᓂᕐᒧᑦ.

ᒐᕙᒪᓕᕆᔨᐅᙱᑦᑐᑦ ᐱᓕᕆᖃᑎᒋᔭᐅᔪᑦ

ᐋᕿᒃᓱᐃᓂᐊᕐᓗᓂ ᐊᒻᒪᓗ ᐊᐅᓚᑦᑎᓂᐊᕐᓗᓂ ᐅᓄᕐᑐᓂᒃ ᓄᑖᓂᒃ ᐊᔾᔨᒌᙱᑑᑎᒃᑯᑦ ᑲᒪᒋᔭᐅᓂᓕᒃᑯᑦ ᐃᓂᒋᔭᐅᔭᕆᐊᓕᖕᓂᑦ ᓄᓇᕗᒻᒥ, ᓄᓇᕗᑦ ᒐᕙᒪᖓ ᕿᓂᕐᓂᐊᖅᑐᑦ ᐱᓕᕆᖃᑎᖃᕐᓂᕐᒥᒃ ᓄᓇᕗᑦ ᒐᕙᒪᒃᑯᓐᓄᑦ ᐱᓕᕆᔨᐅᙱᑦᑐᓂᒃ, ᒪᑯᑎᑐᓇᖅ ᐃᒻᒥᒃᑯᑦ ᓇᖕᒥᓂᖅ ᐱᓕᕆᐊᖃᖅᑐᓂᒃ ᐊᒻᒪᓗ ᕼᐋᒻᒪᓚᑯᓐᓂᒃ, ᐅᖃᓚᐅᕐᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔪᐊᔾ ᕼᐃᒃᔅ ᑕᖅᑭᐅᓚᐅᕐᑐᒥ.

ᐱᓕᕆᑎᑦᑎᓂᕐᒧᑦ ᐱᔨᑎᑦᑎᕋᐅᑎᓕᕆᓂᖅ ᐱᓕᕆᑎᑕᐅᑐᐃᓐᓇᖅᑐᓂᒃ ᓈᒻᒪᙱᑐᐃᓐᓇᕆᐊᓕᒃ, ᑭᓯᐊᓂᓕ ᓄᓇᕗᒥᑦ ᓈᒻᒪᓛᖑᓯᒪᔪᖅ ᐊᑭᖏᑦᑎᒍᑦ.

ᑮᓇᐅᔭᓕᕆᓂᒃᑯᑦ ᓴᕿᔮᕐᓂᖅᑕᖃᕆᐊᖃᕐᓂᖅ ᐃᓱᒪᒋᔭᐅᔭᕆᐊᖃᕐᒥᔪᑦ ᒐᕙᒪᒃᑯᓐᓂᒃ ᐱᓕᕆᖃᑎᖃᕋᓱᖕᓂᐊᕈᑎᒃ ᓄᓇᕗᑦ ᒐᕙᒪᒃᑯᓐᓄᑦ ᐱᓕᕆᕝᕕᐅᙱᑦᑐᓂᒃ, ᑭᓯᐊᓂᓕ ᑕᒪᓐᓇ ᐅᖃᐅᓯᐅᔾᔮᖏᑦᑐᖅ ᒫᓐᓇ.

ᖃᓄᐃᑦᑐᓂᒡᓕ ᐊᓯᖏᓐᓂᒃ ᐃᓱᒫᓘᑎᓂᒃ ᓄᓇᕗᑦ ᒐᕙᒪᒃᑯᑦ ᐃᓱᒪᒋᔭᕆᐊᖃᖅᐸ?

ᐊᔪᕈᓐᓃᕐᓴᑎᑦᑎᓂᖅ ᓄᓇᕗᒥᑦ ᓴᓇᔨᓂᒃ

ᐊᑕᐅᓯᕐᓕ, ᓲᖃᐃᒻᒪ, ᐃᖅᑲᓇᐃᔭᖅᑎᓂᒃ ᐊᔪᕈᓐᓃᖅᓴᖅᑎᑦᑎᓂᖅ. ᐅᓇ ᑲᒪᒋᔭᙱᓐᓇᕆᐊᓕᓕᕆᓂᕐᒥᑦ ᐱᓕᕆᕝᕕᐅᔪᑦ ᓄᓇᕗᑦ ᒐᕙᒪᒃᑯᑦ ᐃᓱᒪᒋᔭᖏᓪᓕ ᐃᓐᓇᑯᕕᑐᐃᓐᓇᐅᙱᒻᒪᑕ. ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ ᐱᓕᕆᕝᕕᐅᓂᐊᑐᑦ.

ᑖᒃᑯᐊᓗ ᐃᖅᑲᓇᐃᔭᖅᑎᑖᕈᑎᐅᓂᐊᕐᓗᑎᒃ, ᓄᓇᕗᑦ ᒐᕙᒪᒃᑯ ᐃᖅᑲᓇᐃᔭᖅᑎᑖᕆᐊᖃᖅᑐᑦ ᐃᓱᒪᒋᔭᖃᕈᓐᓇᑦᑎᐊᖅᑐᓂᒃ, ᐅᐸᒍᑎᔪᓐᓇᑦᑎᐊᖅᑐᓂᒃ ᐊᔪᕈᓐᓃᕐᓴᕐᓯᒪᑦᑎᐊᕐᓗᑎᒃ ᓴᓇᔨᓂ, ᑲᒪᔨᓂᒃ ᐊᒻᒪ ᐋᓐᓂᐊᓯᐅᕐᑎᓂᒃ ᑐᑭᓯᐅᒪᔪᓂᒃ ᐃᓄᐃᑦ ᐃᓕᖁᓯᖏᓐᓂᒃ ᐊᒻᒪᓗ ᐃᓄᒃᑎᑐᑦ ᐅᖃᐅᓯᖏᓐᓂᒃ ᐅᖃᕈᓐᓇᕐᓗᓂ. ᐃᖅᑲᓇᐃᔭᖅᑎᑖᕆᐊᖃᕋᔭᖅᑐᑦ ᐅᓄᖅᑐᐊᓗᖕᓂᒃ. ᑕᒪᑐᒧᖓᓕ ᐊᑕᐅᓯᕐᒥ ᐱᓇᓱᐊᒐᖃᖅᑎᓪᓗᒋᑦ ᐃᓐᓇᑐᖃᕐᓂᒃ ᓱᙱᐅᓐᓇᙱᑦᑐᒦᖁᓇᒋᑦ, ᐃᓅᑐᓗᐊᓕᕐᓇᖅᑐᒥᑦ ᖃᓪᓗᓈᓂᑦ, ᑕᐃᒪᐃᑦᑕᕆᐊᖃᕐᓂᐊᖅᑐᑦ.

ᐅᓇ “ᐱᖓᓱᓂᒃ ᖁᓕᕇᒃᑐᓕᒃ” ᐸᕐᓇᐅᑎ ᐊᑐᓗᐊᖅᐸᒃᑐᓄᑦ ᓱᐴᖅᑐᒐᕐᓂᒃ ᐊᒻᒪ ᐋᓐᓂᕐᓯᒪᓗᐊᖅᑐᓂᒃ ᐃᑲᔪᖅᑕᐅᕕᒃ ᓄᓇᕗᒥ ᐅᑯᐊ ᓄᓇᕗᑦ ᒐᕙᒪᒃᑯᑦ ᐱᓕᕆᖃᑎᖃᖅᖢᑎᒃ ᓄᓇᕗᑦ ᑐᙵᕕᒃ ᑎᒥᖓᓂ ᐱᓇᓱᒍᒪᔪᑦ ᐃᓄᖕᓂ ᐃᓅᓯᓕᕆᓂᕐᒧᑦ ᐃᓕᓐᓂᐊᕈᑎᒃᓴᓂᒃ ᐊᒻᒪᓗ ᐃᓄᓕᕆᓂᕐᒧᑦ ᓇᓗᓇᐃᒃᑯᑎᑖᓪᓚᕆᕐᓂᕐᒧᑦ ᐃᓕᓐᓂᐊᕈᑎᐅᕙᓪᓕᐊᓂᐊᕐᑐᓂᒃ.

ᑖᒃᑯᐊ ᐊᐅᓚᑕᐅᓇᔭᖅᑐᑦ ᐊᑕᐅᑦᑎᒃᑰᖃᑎᖃᕐᓗᑎᒃ ᐱᕙᓪᓕᐊᒍᑎᐅᓂᐊᕐᑐᒥᑦ 32-ᓂ ᐃᒡᓕᖃᖅᑐᒥᑦ ᒪᒥᓴᕐᕕᒃᓴᒥᑦ ᐃᖃᓗᖕᓂᑦ ᐊᒻᒪᓗ ᓄᓇᒥ ᒪᒥᓴᕐᕕᒃᓴᓂᒃ ᑕᒪᐃᓐᓂᑦ ᐱᖓᓱᓂ ᐊᕕᒃᑐᕐᓯᒪᔪᓂᑦ ᐃᓄᐃᑦ ᓄᓇᖏᓐᓂᒃ.

ᐊᔪᕈᓐᓃᕐᓯᒪᓪᓚᕆᙱᑦᑐᒍᑦ ᐸᕐᓇᐅᓯᐅᕐᓂᖅ ᑕᐃᒪᐃᑦᑐᐊᓗᖕᓂᒃ, ᑭᓯᐊᓂᓕ ᐃᓱᒪᓇᖅᑐᖅ ᓄᓇᕗᑦ ᒐᕙᒪᒃᑯᑦ ᑕᐅᑐᓪᓗᐊᕐᓂᖏᓐᓂᒃ ᐊᔪᕈᓐᓃᕐᓴᕈᑎᒃᓴᓂᒃ ᐃᓐᓇᑐᖃᕐᓂᒃ ᑲᒪᔨᐅᓂᐊᖅᑐᓂᑦ—ᐊᒻᒪᓗ ᐅᑯᐊ ᓄᓇᕗᑦ ᑐᙵᕕᒃᑯᑦ ᐃᓱᒪᓪᓗᐊᕐᑐᑦ ᑮᓇᐅᔭᓂᒃ ᐱᓇᓱᖕᓂᕐᒥᒃ ᐅᕙᙵᑦ ᒪᑭᒋᐊᕐᕕᒃ ᐊᔪᕈᓐᓃᕐᓴᕐᓂᕐᒧᑦ ᐃᑲᔫᑎᒃᓴᓂᒃ ᑕᒪᒃᑯᓄᖓ ᐊᑭᓕᐅᑎᒃᓴᓄᑦ ᐃᑲᔫᑎᐅᓂᐊᕐᑐᓂᒃ.

ᓴᐳᔾᔨᓯᒪᓂᖅ ᐃᒃᓯᖕᓇᖅᑕᐅᓯᒪᔪᓂᒃ, ᐱᑦᑎᐊᖅᑕᐅᙱᑐᐃᓐᓇᕆᐊᓕᖕᓂᒃ

ᐊᓯᑲᓐᓂᐊᑦᑕᐅᖅ ᐃᓱᒫᓘᑎᒃᓴᖅ ᐅᓇ ᐱᖁᔭᓕᕆᓂᖅ: ᑭᓇ ᐋᕿᒃᓱᐃᓂᐊᕐᐸ ᒪᓕᒐᐅᓂᐊᕐᑐᓂᒃ ᑲᒪᒋᔭᖃᕐᓂᕐᒧᑦ ᓄᑖᓂᒃ ᐃᓐᓇᒃᑯᕕᒃᓴᓂᒃ? ᑭᓇ ᖃᐅᔨᓴᖃᑦᑕᕐᓂᐊᕐᐸ? ᑭᓇ ᐱᖁᔭᓂᒃ ᐊᑐᓕᖅᑎᑦᑎᔨᐅᓂᐊᕐᒪ?

ᐅᓇ ᐱᒻᒪᕆᐅᖕᒪᑦ ᐃᓱᒪᒋᔭᒃᓴᖅ. ᐊᓯᖏᓐᓂᓪᓕ ᑲᓇᑕᒥ ᐃᓂᒋᔭᐅᔪᓂᒃ, ᖃᓄᐃᓕᖓᓂᖏᑦ ᐊᑯᓂᐊᓗᒃ ᑲᒪᒋᔭᖃᕐᕕᐅᔪᑦ ᐃᓐᓇᑐᖃᕐᓂᒃ ᓴᕿᑎᑦᑎᒍᑎᐅᓯᒪᖕᒪᑕ ᓈᒻᒪᙱᓕᐅᕈᑎᕈᓘᔭᕐᓂᒃ ᐊᒻᒪ ᐱᕋᔭᒐᓱᒍᑎᓂᒃ. ᐅᑯᐊ ᓈᒻᒪᙱᓕᐅᕈᑎᐅᔪᑦ ᐃᒪᓐᓇ ᑐᓴᕐᓇᓚᐅᖅᐸᒃᑐᖢᑎᒃ ᐱᑦᑎᐊᖃᑦᑕᙱᓂᐅᔪᓂᒃ ᐃᓐᓇᑐᖃᕐᓂᒃ, ᐃᓚᖃᖅᖢᓂ ᓱᖁᑎᒃᓴᙱᓗᐊᖅᐸᒃᑐᓂᒃ ᐊᒻᒪ ᐃᖅᑲᓇᐃᔭᖅᑎᑦ ᐋᓐᓂᕐᓱᐃᔭᓐᓂᖏᓐᓂᒃ.

ᖃᖓᑦᑎᐊᓵᖑᓚᐅᕐᑐᖅ ᐅᐊᑲᓪᓚᓗᐊᕌᓗᖕᒥ ᑐᓴᕐᓇᖅᑐᖃᓚᐅᕐᑐᖅ, ᐋᓐᑎᐅᕆᐅᒥ ᐋᓐᓂᐊᓯᐅᕐᑎ ᑎᒍᔭᐅᓚᐅᕐᓂᖓᓂᒃ ᑐᖂᑦᑎᓂᖓᓂ 8-ᓂᒃ ᐃᓐᓇᑐᖃᕐᓂᒃ ᐊᒻᒪᓗ ᑐᖁᑎᑦᑎᒋᐊᕐᓯᒪᓂᖓᓂᒃ 6-ᑲᓐᓂᕐᓂᒃ ᑲᒪᒋᔭᐅᕝᕕᖕᒥᑦ ᐊᐅᓚᑕᐅᔪᒥᑦ ᓇᖕᒥᓂᖅ ᐱᓕᕆᐊᖃᖅᑐᓂᒃ ᑕᐅᔭᐅᔪᓂᒃ ᑭᐅᕆᓴᓐᑦ ᑭᐅ (Caressant Care).

ᐊᒻᒪᑦᑕᐅᖅ ᐅᑭᐊᒃᓵᖑᓚᐅᕐᑐᖅ, ᐃᓄᒋᐊᑦ ᒫᓂ 200 ᐃᓚᒌᖑᔪᑦ ᐃᖅᑲᖅᑐᐃᕕᒃᑰᖅᑎᑦᑎᓚᐅᕐᒥᔪᑦ ᐱᖓᓱᓂᒃ ᑯᐊᐳᕇᓴᓂᒃ ᐊᐅᓚᑦᑎᓂᖏᓐᓂᒃ ᐊᑯᓂᐊᓗᒃ ᑲᒪᒋᔭᐅᕝᕕᐅᔪᓂᒃ.

ᑕᐃᒪᓕ ᓄᓇᕗᑦ ᒐᕙᒪᒃᑯᑦ ᑲᒪᑦᑎᐊᕆᐊᖃᖅᐳᑦ ᓴᐳᔾᔨᓯᒪᓂᕐᒥᒃ ᓄᓇᕗᑦ ᐃᓐᓇᑐᖃᖏᓐᓂᒃ ᐋᓐᓂᖅᓱᖅᑕᐅᖁᓇᒋᑦ ᐊᒻᒪ ᐃᒃᓯᖕᓇᖅᑕᐅᓯᒪᖁᓇᒋᑦ ᑲᒪᒋᔭᐅᕝᕕᖕᒦᓐᓂᖏᓐᓂᒃ.

ᑕᒪᓐᓇᓗ ᑐᑭᖃᖅᑐᒃᓴᐅᔪᖅ ᕿᒥᕐᕈᐊᕐᓂᕐᒥᒃ ᐱᖁᔭᐅᔪᓂᒃ ᒫᓐᓇ ᐊᑐᖅᑕᐅᔪᓂᒃ ᐊᒻᒪᓗ, ᐃᒻᒥᒃᑰᖓᓗᓂ ᒪᓕᒐᓕᐅᕐᓗᑎᒃ ᐱᖁᔭᖃᖅᓗᓂ ᐊᑯᓂᐊᓗᒃ ᑲᒪᒋᔭᖃᕐᕕᖕᓂᒃ. ᐅᖃᖅᑲᐅᓪᓗᑕ, ᐱᒻᒪᕆᐅᕗᖅ ᐃᓐᓇᑐᖃᕐᓂᒃ ᐅᐸᒃᓯᒪᕙᙱᑕᖏᓐᓂᒃ, ᓱᖏᐅᓐᓇᙱᓗᐊᖅᑐᓂᒃ ᖃᓪᓗᓈᑦ ᓄᓇᖓᓃᖁᓇᒋᑦ. ᑕᐃᒪᓕ ᐱᒻᒪᕆᐅᕗᖅ ᓴᐳᔾᔭᐅᓯᒪᔭᕆᐊᖃᕐᓂᖏᓐᓂᒃ ᐱᑦᑎᐊᖅᑕᐅᕙᙱᓐᓂᕐᒥᒃ ᐊᒻᒪ ᐃᒃᓯᖕᓇᖅᑕᐅᓯᒪᓂᕐᒥᒃ.

ᐱᓇᓱᒻᒪᕆᖕᓂᐊᕐᓗᑎ ᐋᕿᒃᓯᓂᕐᒧᑦ ᐃᓐᓇᑐᖃᕐᓂᒃ ᑲᒪᒋᔭᖃᕐᕕᒃᓴᒥᑦ, ᓄᓇᕗᑦ ᒐᕙᒪᒃᑯᑦ ᐱᔭᒃᓴᕈᓘᔭᖃᓕᕐᐳᑦ. ᑭᓯᐊᓂᓕ ᑕᒪᓐᓇ ᐱᓕᕆᓂᖅ ᐊᑑᑎᖃᕐᓂᐊᖅᖢᓂ.

Share This Story

(0) Comments