ᐊᖑᑦ ᐃᓅᓯᓕᒫᒥ ᐊᓄᓪᓚᒃᓯᕐᓂᐊᖅᐳᖅ ᐋᓐᓂᖅᓯᕆᕐᔪᐊᖅᖢᓂ ᐃᓄᐊᖅᓯᓂᕐᒧᑦ

ᐅᐃᓕᐊᒻ ᐊᐅᑐᑦ ᐸᓯᔭᒃᓴᐅᓂᕋᓚᐅᖅᐳᖅ ᑐᖂᑦᑎᓂᕐᒥ 2020−ᒥ ᐃᓄᐊᖅᓯᓂᐅᔪᒥ ᓕᐊ ᕿᓚᕝᕙᕐᒥ

ᐅᐃᓕᐊᒻ ᐊᐅᑐᑦ ᐸᓯᔭᒃᓴᐅᓂᕆᓚᐅᖅᐳᖅ ᑐᖂᑦᑎᓂᕐᒥ ᐃᓄᐊᖅᓯᓂᐅᔪᒥ ᓕᐊ ᕿᓚᕝᕙᕐᒥ. ᐃᖅᑲᖅᑐᐃᕕᖕᒥ ᒫᔾᔨ 5−ᒥ, ᐃᖅᑲᖅᑐᐃᔨᒥ ᖃᓄᐃᓕᔭᐅᓂᖃᖅᑎᑦᑎᓚᐅᖅᐳᖅ ᐃᓅᓯᓕᒫᖓᓂ ᐊᓄᓪᓚᒃᓯᕐᓂᖓᓂ ᐊᓄᓪᓚᒃᓰᕕᖕᒥ ᐊᓂᓂᕐᒥ ᐊᓄᓪᓚᒃᓯᕆᐊᖃᕐᓂᖓ ᐃᓱᓕᑎᓐᓇᒍ ᐱᔪᓐᓇᕐᓂᖃᕐᓇᓂ ᐊᕐᕌᒍᓄᑦ 9−ᓄᑦ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓ)

By ᑕᐃᕕᑦ ᓛᒃᕼᐄᑦᒧᑦ

For the English version of this story, please see Man gets life sentence for violent killing of woman.

ᑕᑖᖅᑐᒥ ᐃᖃᓗᖕᓂ ᐃᖅᑲᖅᑐᐃᕕᖕᒥ, ᐅᐃᓕᐊᒻ ᐊᐅᑐᑦ ᑐᓂᔭᐅᓚᐅᖅᐳᖅ ᐃᓅᓯᓕᒫᖓᓐᓂ ᐊᓄᓪᓚᒃᓯᕐᓂᐊᕐᓂᕐᒥ ᐋᓐᓂᖅᓯᕆᕐᔪᐊᕐᓂᕐᒥ ᐃᓄᐊᖅᓯᓂᕐᒥ ᓕᐊ ᕿᓚᕝᕙᕐᒥ ᐊᕐᕌᒍᑦ ᑎᓴᒪᑦ ᐊᓂᒍᖅᓯᒪᓕᖅᑐᒥ.

“ᐋᓐᓂᖅᓯᕆᕐᔪᐊᕐᓂᕐᒥ ᐱᕋᔭᖕᓂᐅᔪᑦ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ ᐊᔪᖅᓯᑎᑦᑎᓯᒪᕐᔪᐊᖅᐳᖅ ᓄᓇᕗᒻᒥ,” ᐃᖅᑲᖅᑐᐃᔨ ᑯᕆᔅᑎᐊᓐ ᓚᐃᔭᓐᔅ ᐅᖃᓚᐅᖅᐳᖅ ᒫᔾᔨ 5−ᒥ ᑐᓂᓯᓂᖓᓂ ᐃᖅᑲᖅᑐᐃᔨᒧᑦ ᖃᓄᐃᓕᔭᐅᓂᖓᓂ.

ᐅᖃᓚᐅᖅᐳᖅ ᐱᒻᒪᕆᐅᕗᖅ “ᐃᓄᐃᑦ ᓄᓇᕗᒻᒥ ᖃᐅᔨᒪᕗᑦ ᐃᓄᐊᖅᓯᒍᕕᑦ ᐊᕐᓇᒥ ᓴᕕᖕᒧᑦ, ᐋᖓᔮᕐᔪᐊᕋᓗᐊᖅᑎᓪᓗᑎᑦ, ᐊᓄᓪᓚᒃᓯᕐᓂᐊᖅᑐᑎᑦ ᐊᑯᓂᒻᒪᕆᐊᓗᒃ.”

20−ᐸᓗᖕᓂ ᐃᓄᖕᓂ, ᐃᓚᖃᖅᑐᒥ ᐃᓚᒋᔭᐅᔪᓂ ᕿᓚᕝᕙᕐᒥ, ᐃᖅᑲᖅᑐᐃᕕᖕᒦᓚᐅᖅᐳᑦ. ᐊᒥᓱᑦ ᐊᑐᓚᐅᖅᐳᑦ ᐊᐅᐸᖅᑐᒥ ᐅᕕᓂᕈᓂ ᓇᐃᒡᓕᒋᐊᖅᓯᒪᔪᒥ ᑎᑎᕋᖅᓯᒪᔪᓂ MMIWG, ᑐᑭᖃᖅᑐᒥ ᐊᓯᐅᖅᑲᔪᑦ ᐊᒻᒪ ᐃᓄᐊᖅᑕᐅᓂᑯᐃᑦ ᓄᓇᖃᖅᑳᖅᓯᒪᔪᓂ ᐊᕐᓇᓂ ᐊᒻᒪ ᓂᕕᐊᖅᓵᓂ.

ᐃᖅᑲᖅᑐᐃᔨᒧᑦ ᖃᓄᐃᓕᔭᐅᓂᖃᓚᐅᖅᑎᓪᓗᒍ, ᐃᕿᖦᖢᑎᒃ ᐊᒻᒪ ᐊᒥᓱᑦ ᕿᐊᓚᐅᖅᐳᑦ ᐅᑕᖅᑭᓚᐅᖅᑎᓪᓗᒋᑦ ᐊᕐᕌᒍᓂ ᑎᓴᒪᓂ ᖃᓄᐃᑕᐅᓂᐊᕐᓂᖓᓄᑦ.

ᐊᐅᑐᑦ ᐸᓯᔭᒃᓴᐅᓂᕋᓚᐅᖅᐳᖅ ᑎᓯᐱᕆᒥ ᑐᖂᑦᑎᓂᕐᒥ ᐃᓄᐊᖅᓯᓂᐅᔪᒥ ᕿᓚᕝᕙᕐᒥ, 43.

ᐅᖃᐅᓯᐅᓪᓗᓂ ᑲᑐᔾᔭᐅᓪᓗᓂ ᑐᓂᔭᐅᓂᐅᔪᒥ ᑭᖕᒧᑦ ᑭᒡᒐᖅᑐᐃᔨᒧᑦ ᐊᒻᒪ ᓴᐳᓐᓂᐊᖅᑎᑦ ᒪᓕᒐᕐᓂᐊᖅᑎᒧᑦ, ᐊᐅᑐᑦ ᑎᒍᔭᐅᓚᐅᖅᐳᖅ ᐊᒻᒪ ᐃᖅᑲᖅᑐᒐᒃᓴᙳᖅᑎᑕᐅᓪᓗᓂ ᕕᕗᐊᕆ 6, 2020−ᒥ, ᐃᒻᒥᓂᒃ ᑐᓐᓂᖅᑯᑎᒋᓪᓗᓂ ᑲᓇᑕᒥ ᐸᓖᓯᒃᑯᓐᓄᑦ ᐊᒻᒪ ᐅᖃᐅᑎᓪᓗᓂᒋᑦ ᐸᓖᓯᑦ ᕿᓚᕝᕙᖅ ᑐᖁᖓᓂᖓᓂ. 52−ᓂ ᐅᑭᐅᖃᓚᐅᖅᐳᖅ ᑕᐃᔅᓱᒪᓂ.

ᐸᓖᓰᑦ ᖃᐅᔨᓴᓚᐅᖅᐳᑦ ᐊᒻᒪ ᓇᓂᓯᓚᐅᖅᐳᖅ ᕿᓚᕝᕙᐅᑉ ᑎᒥᖓᓂ ᐊᖏᕐᕋᖓᓂ. ᑲᐱᔭᐅᓚᐅᖅᐳᖅ ᖃᔅᓰᖅᓱᒐᓚᒃᓯᒪᔪᓂ.

ᐊᐅᑐᑦ ᐊᒻᒪ ᕿᓚᕝᕙᖅ ᐊᐃᑉᐸᕇᓚᐅᕋᓗᐊᖅᑎᓪᓗᒋᑦ ᐊᕐᕌᒍᓄᑦ ᐱᖓᓱᓄᑦ ᐊᒻᒪ ᐃᒡᓗᒥᐅᖃᑎᒌᒃᖢᑎᒃ ᑭᓯᐊᓂ ᑐᖁᑎᓪᓗᒍ, ᑐᖁᑎᓪᓗᒍ, ᐊᐅᑐᑦ ᐃᖅᑲᖅᑐᖅᑕᐅᓂᒃᑯᑦ ᐊᑐᕆᐊᖃᖅᑎᑕᐅᓯᒪᓂᕐᓂ ᒪᕐᕉᔪᓄᑦ ᐊᓯᐊᒎᖅᑐᓂ ᐋᓐᓂᖅᓯᕆᓂᐅᔪᓄᑦ ᕿᓚᕝᕙᕐᒥ.

ᑎᓕᔭᐅᓯᒪᓚᐅᕆᕗᖅ ᐃᖅᑲᖅᑐᐃᕕᖕᒥ ᕿᓚᕝᕙᕐᒦᑦᑕᕆᐊᖃᙱᓐᓂᖓᓂ ᐃᒥᐊᓗᖕᒥ ᐃᒥᖅᑎᓪᓗᒍ, ᑭᓯᐊᓂ ᑕᒪᒃᑭᑦ ᐋᖓᔮᓚᐅᖅᐳᑦ ᑕᐃᔅᓱᒪᓂ ᑐᖁᑕᐅᑎᓪᓗᒍ. ᕿᓚᕝᕙᖅ ᑭᖑᓪᓕᖅᐹᒥ ᑐᓴᖅᑕᐅᓚᐅᖅᐳᖅ ᕕᕗᐊᕆ 4, 2020−ᒥ.

ᓚᐃᔭᓐᔅ ᑕᐃᕙᖓ ᐋᓐᓂᖅᓯᖅᑕᐅᕐᔪᐊᖅᖢᓂ ᑐᖁᓂᖓᓂ “ᑲᑭᓚᓈᕐᓂᖓᓂ,” ᐅᖃᖅᖢᓂ “ᐅᓇ ᐱᓕᕆᐊᖑᔪᖅ ᐱᔾᔪᑎᖃᕐᓂᖅᓴᐅᕗᖅ ᒥᔅᑐᕐ ᐊᐅᑐᑦᒥ. ᐱᔾᔪᑎᖃᖅᐳᖅ ᖃᓄᐃᑦᑐᒥᒃ ᓄᓇᕗᖃᕈᒪᓂᑦᑎᓐᓂ.”

ᐃᖅᑲᖅᑐᐃᔨᒧᑦ ᖃᓄᐃᓕᔭᐅᓂᖓᓂ ᓯᕗᓂᐊᓂ, ᐱᖓᓱᓂ ᐱᕋᔭᒃᑕᐅᔪᓄᑦ ᐊᒃᑐᐃᓂᐅᔪᓂ ᑎᑎᕋᖅᓯᒪᔪᓂ ᐅᖃᓕᒫᖅᑕᐅᓚᐅᖅᐳᑦ ᓂᐱᖅᑯᖅᑐᓪᓗᑎᒃ ᐃᓚᒋᔭᐅᔪᓂ ᕿᓚᕝᕙᐅᑉ ᐃᓚᖏᓐᓂ. ᑕᒪᒃᑭᑦ ᐅᖃᓪᓚᓚᐅᖅᐳᑦ ᐃᓱᒪᒧᑦ ᐊᒻᒪ ᑎᒥᒧᑦ ᐊᒃᓱᕈᕐᓇᕐᓂᖓᓂ ᐊᑐᐃᕐᓂᐅᔪᓂ ᐊᓯᐅᔨᓂᖏᓐᓂ ᐊᕐᓇᐅᔪᒥ.

ᐊᐃᓖᓐ ᕿᓚᕝᕙᖅ ᐅᐃᐳᕐ ᐅᖃᓚᐅᖅᐳᖅ ᐊᓯᐅᔨᓚᐅᕐᓂᖓᓂ ᐃᓱᒪᒧᑦ ᐃᑲᔪᖅᓱᐃᔨᖓᓂ ᐊᒻᒪ ᐊᑐᕐᓂᖃᓚᐅᖅᐳᖅ ᖃᔅᓯᒐᓚᖕᓂ ᓄᑮᖅᑎᓐᓂᐅᔪᓂ ᐱᔾᔪᑎᖃᖅᑐᒥ ᐊᒃᓱᕈᕈᑕᐅᔪᓂ ᓄᑲᖓᑕ ᑐᖁᓂᖓᓄᑦ.

ᐋᓐ ᒫᓖᓐ ᕿᓚᕝᕙᖅ ᐅᖃᓚᐅᖅᐳᖅ ᐃᖅᑲᓇᐃᔭᕈᓐᓇᖅᓯᒪᙱᓚᖅ ᐅᓪᓗᓕᒫᖅᓯᐅᒻᒥ ᐃᖅᑲᓇᐃᔮᒥᒃ ᐊᕐᕌᒍᓄᑦ ᐱᖓᓱᓄᑦ, ᐸᓯᒃᖠᓪᓗᓂᐅᒃ ᐊᒃᓱᕈᕐᓇᕐᓂᖓᓂ ᓄᑲᖓᑕ ᑐᖁᓂᖓᓂ.

ᓕᐊ ᕿᓚᕝᕙᖅ, ᐅᕙᓂ ᑕᑯᒃᓴᐅᔪᖅ ᓄᑖᙳᕆᐊᖅᑎᑕᐅᓯᒪᔪᒥ ᐊᔾᔨᖁᑎᒥᒃ, ᐅᓂᒃᑳᕆᔭᐅᕗᖅ ᓄᐊᖓᑕ ᓴᒫᓐᑕ ᔪᕉᒧᑦ “ᖃᐅᔨᒪᑐᓪᓗᓂ ᐊᒻᒪ ᓇᒡᓕᒍᓱᒃᑲᐅᓪᓗᓂ.” (ᐃᖓ ᕿᓚᕝᕙᖅ ᐊᔾᔨᖁᑎᖓ)

ᕿᓚᕝᕙᐅᑉ ᓄᐊᖓ, ᓴᒫᓐᑕ ᔪᕉ, ᐅᓂᒃᑳᕆᒪᐅᖅᐳᖅ ᐃᓱᒪᒧᑦ ᐋᓐᓂᐊᕐᓂᐅᔪᒥ ᐊᑐᓚᐅᖅᑕᒥᓂ, ᐃᓚᒋᐊᖅᓯᓪᓗᓂ ᕿᓚᕝᕙᖅ ᕿᒪᐃᓚᐅᖅᐳᖅ ᒪᕐᕉᖕᓂ ᐃᕐᓂᖏᓐᓂ ᐊᒻᒪ ᖃᔅᓯᒐᓚᖕᓂ ᐃᕐᙳᑕᓂᑦ.

“ᓕᐊ ᖃᐅᔨᒪᑐᓪᓗᓂ ᐊᒻᒪ ᓇᒡᓕᒍᓱᒃᑲᐅᓚᐅᖅᐳᖅ,” ᔪᕉ ᐅᖃᓚᐅᖅᐳᖅ.

ᑲᑐᔾᔭᐅᔪᒥ ᑐᓂᓯᓂᐅᔪᒥ, ᑭᖕᒧᑦ ᑭᒡᒐᖅᑐᐃᔨ ᐊᒻᒪ ᓴᐳᓐᓂᐊᖅᑎᑦ ᒪᓕᒐᕐᓂᐊᖅᑎᑦ ᐊᐱᕆᒪᐅᖅᐳᑦ a ᐃᓅᓯᓕᒫᖓᓐᓂ ᐊᓄᓪᓚᒃᓯᕐᓂᐅᔪᒥ ᐊᐅᑐᑦᒧᑦ, ᖁᑦᑎᓛᖑᔪᒥ ᐃᖅᑲᖅᑐᐃᔨᒧᑦ ᖃᓄᐃᓕᔭᐅᓂᖓᓂ ᐊᑐᐃᓐᓇᐅᔪᒥ ᑲᓇᑕᐅᑉ ᒪᓕᒐᖓᓐᓂ.

ᑭᖕᒧᑦ ᑭᒡᒐᖅᑐᐃᔨᖓ ᒪᐃᒃ ᕼᐃᒧᕐᒥᓐ ᐅᖃᐅᓯᖃᓚᐅᖅᐳᖅ ᒪᕐᕉᖕᓂ ᐱᔾᔪᑕᐅᔪᓂ ᐊᖏᖃᑎᖃᕐᓂᕐᒧᑦ ᑐᖂᑦᑎᓂᕐᒥ ᐸᓯᔭᒃᓴᐅᓂᖓᓂ, ᐊᐅᑐᑦ ᐃᖅᑲᖅᑐᖅᑕᐅᙱᖔᕐᓗᓂ ᐃᓄᐊᕐᓂᕐᒧᑦ ᐸᕐᓇᒃᓯᒪᓇᓂᒧᑦ.

ᐅᖃᓚᐅᖅᐳᖅ ᐱᑕᖃᙱᓗᐊᕐᓂᖓᓂ ᑐᑭᓯᐅᒪᓂᕐᒥ ᐱᔾᔪᑎᖃᖅᑐᒥ ᖃᓄᐃᓚᐅᕐᓂᖓᓂ ᓯᕗᓂᐊᓂ, ᑕᐃᒪᐃᑎᓪᓗᒍ ᐊᒻᒪ ᑐᖂᑦᑎᐊᓂᖕᓂᖓᓂ, ᐃᓚᖃᖅᑐᒥᓪᓗ ᐊᐅᑐᑦ ᐊᑐᖅᑐᒃᓴᐅᓐᓂᖓᓂ ᐋᖓᔮᕐᔪᐊᕐᓂᐅᔪᒥ ᓴᐳᔾᔨᔾᔪᑎᒋᓪᓗᓂᐅᒃ, ᕿᒪᐃᓚᐅᖅᐳᖅ ᓇᓗᓇᐸᓗᒃᑐᒥ ᐊᐅᑐᑦ ᐸᓯᔭᐅᔪᓐᓇᕐᓂᖓᓂ ᐃᖅᑲᖅᑐᖅᑕᐅᓂᐅᔪᒥ.

ᑭᖕᒧᑦ ᑭᒡᒐᖅᑐᐃᔨ ᑭᐅᓗᓚᐅᖅᐳᖅ ᐊᐅᑐᑦ ᐅᑕᖅᑭᓪᓗᐊᖅᐳᖅ ᐊᕐᕌᒍᓂ 10−ᓂ ᐱᔪᓐᓇᖅᓯᓇᔭᕐᓂᖓᓂ ᐊᓄᓪᓚᒃᓰᕕᖕᒥ ᐊᓂᓂᕐᒥ ᐊᓄᓪᓚᒃᓯᕆᐊᖃᕐᓂᖓ ᐃᓱᓕᑎᓐᓇᒍ. ᕼᐃᒧᓪᒥᓐ ᐅᖃᓚᐅᖅᐳᖅ ᐊᐅᑐᑦ ᐸᓯᔭᐅᔾᔪᑎᖓ  ᑐᖂᑦᑎᓂᕐᒥᐅᓂᖓᓄᑦ, “ᐅᑯᐊ ᖃᓄᐃᓕᐅᕐᓂᐅᔪᑦ ᖃᓂᒡᓕᒋᑎᒋᕗᖅ ᐱᔪᓐᓇᕐᓂᖓᓂ ᐃᓄᐊᖅᓯᓂᐅᔪᒧᑦ.”

ᐊᐅᑐᑦ ᓴᐳᓐᓂᐊᖅᑎᖓ, ᓛᓐ ᓂᐅᒪᓐ, ᐱᓇᓱᐊᓚᐅᖅᐳᖅ ᐊᕐᕌᒍᓂ 7−ᓂ ᐊᓄᓪᓚᒃᓰᕕᖕᒥ ᐊᓂᓂᕐᒥ ᐊᓄᓪᓚᒃᓯᕆᐊᖃᕐᓂᖓ ᐃᓱᓕᑎᓐᓇᒍ ᐱᕗᓐᓇᕐᓂᖓᓂ. ᐊᖏᖃᑎᖃᓚᐅᖅᐳᖅ ᐊᐅᑐᑦ “ᐱᕋᔭᓚᐅᕐᓂᖓᓂ ᑲᑉᐱᐊᓇᕐᔪᐊᖅᑐᒥ ᐱᓕᕆᓂᐅᔪᒥ,” ᑕᐃᒪᓐᓇ ᓴᐳᓐᓂᐊᖅᑎᑦ ᐊᖏᖃᑎᖃᓚᐅᖅᐳᑦ ᐃᓅᓯᓕᒫᖓᓐᓂ ᐊᓄᓪᓚᒃᓯᖅᑕᐅᓂᖓᓂ.

ᑭᓯᐊᓂ, ᓂᐅᒪᓐ ᑭᐅᓗᓚᐅᖅᐳᖅ ᐊᓄᓪᓚᒃᓰᕕᖕᒥ ᐊᓂᓂᕐᒥ ᐊᓄᓪᓚᒃᓯᕆᐊᖃᕐᓂᖓ ᐃᓱᓕᑎᓐᓇᒍ ᐱᔪᓐᓇᕐᓂᖓᓂ ᐊᕐᕌᒍᓂ 7−ᓂ ᐱᔾᔪᑎᖃᖅᑐᒥ ᐊᒃᓱᕈᕐᓂᐅᔪᓂ ᐊᐅᑐᑦ ᐱᓕᕆᓚᐅᕐᓕᖓᓕ ᒪᒥᓴᕐᓂᕐᒧᑦ ᐊᓄᓪᓚᒃᓰᕕᖕᒥ.

ᐅᖃᓚᐅᖅᐳᖅ ᐊᐅᑐᑦ ᕿᓂᓚᐅᖅᐳᖅ ᐃᑲᔪᖅᑕᐅᓂᕐᒥ ᐱᓕᕆᐊᖑᔪᓄᑦ ᐊᓄᓪᓚᒃᓰᕕᖕᒥ ᐊᒻᒪ ᐱᓚᐅᖅᐳᖅ ᖃᔅᓯᒐᓚᖕᓂ ᑎᑎᖅᑲᓂ ᐃᑲᔪᖅᓱᐃᓂᕐᒧᑦ ᐃᓄᖕᓂ ᐱᓕᕆᖃᑎᖃᖅᐸᖕᓂᖓᓂ ᐊᓄᓪᓚᒃᓰᕕᖕᒥ.

ᓯᕗᓂᐊᓂ ᓚᐃᔭᓐ ᐃᓱᒪᓕᐊᕆᓂᐊᖅᑕᖓᓂ, ᐊᐅᑐᑦ ᐃᒻᒥᓂᒃ ᐅᖃᓪᓚᓚᐅᖅᐳᖅ. ᐅᖃᓚᐅᖅᐳᖅ ᒪᒥᐊᕐᔪᐊᕐᓂᖓᓂ ᐊᒻᒪ ᐱᓚᐅᖅᐳᖅ ᑕᒪᒃᑭᖅᑐᒥ ᑕᐃᒪᐃᓚᐅᕐᓂᖓᓂ.

“ᖃᐅᑕᒫᑦᑎᐊᖅ, ᐅᒡᒍᐊᖅᐳᖓ ᐊᒻᒪ ᐅᒡᒍᐊᕐᓂᖃᖅᐳᖓ ᖃᓄᐃᓕᐅᓚᐅᕐᓂᓐᓂ,” ᐊᐅᑐᑦ ᐅᖃᓚᐅᖅᐳᖅ, ᓇᓗᓇᐃᖅᓯᓪᓗᓂ ᐋᓐᓂᐊᕐᓂᐅᔪᒥ ᐱᑎᑦᑎᓚᐅᕐᓂᖓᓂ ᕿᓚᕝᕙᐅᑉ ᐃᓚᖏᓐᓄᑦ.

ᖃᓄᐃᑕᐅᓂᐊᕆᐊᒃᓴᖓᓂ ᐃᖅᑲᖅᑐᐃᓂᒃᑯᑦ, ᓚᐃᔭᓐᔅ ᓇᓗᓇᐃᖅᓯᓚᐅᖅᐳᖅ ᕿᓚᕝᕙᐅᑉ ᑐᖁᓂᖓ ᖃᓂᒡᓕᒋᑎᒋᕗᖅ ᐃᓄᐊᖅᓯᓂᐅᔪᒥ ᑐᖂᑦᑎᓂᐅᔪᒥ ᐃᖅᑲᖅᑐᒐᒃᓴᐅᓂᖓᓄᑦ.

ᓚᐃᔭᓐᔅ ᓇᓗᓇᐃᖅᓯᓚᐅᕆᕗᖅ ᐊᐅᑐᑦ ᓵᙵᓂᖃᓚᐅᕐᓂᖓᓂ ᖃᔅᓯᒐᓚᖕᓂ ᐊᒃᓱᕈᕐᓇᖅᑐᓂ ᐱᕈᖅᓴᑎᓪᓗᒍ.

ᐅᖃᓚᐅᖅᐳᖅ ᑕᐃᒫᒃ ᐃᓱᒪᓕᐅᕆᓚᐅᕐᓂᖓᓂ ᐊᐅᑐᑦ ᐊᓄᓪᓚᒃᓯᕆᐊᖃᕐᓂᖓᓂ ᐊᕐᕌᒍᓂ 9−ᓂ ᐱᔪᓐᓇᓚᐅᖅᑳᕋᓂ ᑐᒃᓯᕋᕐᓂᕐᒧᑦ ᐊᓄᓪᓚᒃᓰᕕᖕᒥ ᐊᓂᓂᕐᒥ ᐊᓄᓪᓚᒃᓯᕆᐊᖃᕐᓂᖓ ᐃᓱᓕᑎᓐᓇᒍ. ᑐᓂᔭᐅᙱᒃᑲᓗᐊᕈᓂ ᐊᓄᓪᓚᒃᓯᖅᑎᓪᓗᒍ, ᐊᐅᑐᑦ ᐃᓕᓯᒪᐃᓐᓇᕐᓂᐊᖅᐳᖅ ᐊᓄᓪᓚᒃᓰᕕᖕᒥ ᐊᓂᓂᕐᒥ ᐊᓄᓪᓚᒃᓯᕆᐊᖃᕐᓂᖓ ᐃᓱᓕᑎᓐᓇᒍ ᐊᒥᐊᒃᑯᓕᒫᖓᓐᓂ ᐃᓅᓯᖓᓂ ᐊᓂᑎᑕᐅᓚᐅᖅᑎᓪᓗᒍ.

ᑭᖑᓂᐊᒍᑦ, ᕿᓚᕝᕙᖅ ᐅᐃᐳᕐ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᖃᓱᕚᓪᓕᕐᓂᖓᓂ ᐊᒻᒪ ᓈᒻᒪᒍᓱᓚᐅᖅᐳᖅ ᐃᖅᑲᖅᑐᖅᑕᐅᓂᐅᔪᒥ, ᑭᓯᐊᓂ ᐲᖅᓯᔾᔮᙱᓚᖅ ᐋᓐᓂᐊᕐᓂᐅᔪᒥ ᐊᓯᐅᔨᓚᐅᕐᓂᖓᓂ ᓄᑲᖓᓂ.

“ᒪᒥᓴᕐᓂᕐᔪᐊᖃᕐᓂᐊᓕᖅᐳᒍᑦ ᒫᓐᓇᐅᔪᒥ,” ᕿᓚᕝᕙᖅ ᐅᐃᐳᕐ ᐅᖃᓚᐅᖅᐳᖅ.

Share This Story

(0) Comments

Join the Conversation

Your email address will not be published. Required fields are marked *

*