ᐊᖑᑦ ᐊᑭᓕᕆᐊᖃᖅᑎᑕᐅᓚᐅᖅᐳᖅ ᒪᓕᒐᕐᒥ ᓱᕋᐃᓂᕐᒧᑦ ᐊᐅᓪᓚᖅᑎᑦᑎᓂᖓᓂ ᓇᓄᕋᕐᒥ ᐋᖅᑭᒃᓯᒪᔪᒥ, ᓇᓄᕋᐃᑦ

For English version, see Man fined $60,000 for illegal export of Nunavut polar bear mount, hides to China

ᒪᕐᕉᖕᓂ ᓇᓄᕋᕐᓂ ᐊᒻᒪ ᐊᑕᐅᓯᖅ ᐋᖅᑭᒃᑕᐅᓯᒪᔪᒥ ᓇᓄᕋᕐᒥ ᓄᓇᕗᒻᒥᙶᖅᑐᒥ ᕿᑎᐊᓃᑉᐳᑦ ᐃᖅᑲᖅᑐᐃᕕᖕᒥ ᐱᓕᕆᐊᖑᓂᖓᓂ ᐅᕙᙶᖅᑐᒥ ᑲᓇᑕᒥ ᓴᐃᓇᒧᑦ ᐊᒻᒪ ᐊᑕᐅᓯᕐᒥ ᐋᓐᑎᐊᕆᐅᒥᐅᑕᒥ ᕿᑐᒻᒪᒃᓴᐃᔨᒥ ᓵᙵᓂᖓᓂ ᐊᖏᔪᐊᓗᖕᒥ ᐊᑭᓕᕆᐊᖃᖅᑎᑕᐅᓂᐅᔪᒥ.

ᕿᑐᒻᒪᒃᓴᐃᔨᒥ ᓯᐅᕈᓪ ᑎᓲᓲ ᐊᑭᓕᕆᐊᖃᖅᑎᑕᐅᓚᐅᖅᐳᖅ $60,000−ᓂ ᐋᓐᑎᐊᕆᐅᒥ ᐃᖅᑲᖅᑐᐃᕕᖓᓂ ᐋᓱᕚ, ᐋᓐᑎᐊᕆᐅᒥ ᓯᑎᐱᕆ 12−ᒥ ᐸᓯᔭᒃᓴᐅᓂᕋᐃᓪᓗᓂ ᒪᕐᕉᔪᓄᑦ ᓱᕋᐃᓂᖓᓂ ᒐᕙᒪᑐᖃᒃᑯᑦ ᒪᓕᒐᖓᓐᓂ ᑐᕌᖓᔪᒥ ᓴᐳᔾᔨᓯᒪᓂᕐᒥ ᐆᒪᔪᓄᑦ ᐊᒻᒪ ᐱᕈᖅᓯᐊᖑᔪᓂᑦ.

ᐃᖅᑲᖅᑐᐃᓂᐅᔪᖅ ᐱᔭᕇᖅᓯᓚᐅᖅᐳᑦ ᖃᐅᔨᓴᖅᑕᐅᓂᐅᔪᒥ ᐱᒋᐊᓚᐅᖅᑐᒥ 2018−ᒥ ᐆᒪᔪᓕᕆᔨᐅᔪᓂ ᐊᕙᑎᓕᕆᓂᕐᒧᑦ ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᑲᓇᑕᒥ ᓇᓂᓯᓚᐅᖅᑎᓪᓗᒋᑦ ᒪᓕᑦᑎᐊᙱᓐᓂᐅᔪᓂ ᑐᓴᒐᒃᓴᓂ ᐊᐅᓪᓚᖅᑎᑦᑎᓂᐅᔪᒥ ᐱᔪᓐᓇᐅᑎᓂ ᐊᑐᖅᑕᐅᔪᒥ ᐅᓯᔭᐅᓂᖓᓂ ᓇᓄᕋᕐᒥ ᐋᖅᑭᒃᓯᒪᔪᒥ ᐊᒻᒪ ᒪᕐᕉᖕᓂ ᓇᓄᕋᕐᓂ ᓴᐃᓇᒧᑦ, ᐅᖃᐅᓯᐅᓪᓗᓂ ᑐᓴᒐᒃᓴᓕᐊᖑᔪᓂ ᓴᖅᑭᑎᑕᐅᔪᓂ ᐱᓕᕆᕝᕕᐅᔪᒥ.

“ᐱᖓᓱᓂ ᓇᓄᕐᓂ ᒪᓕᒐᑎᒍᑦ ᐊᖑᓇᓱᒃᑕᐅᑦᑎᐊᓚᐅᖅᐳᑦ ᓄᓇᕗᒻᒥ. ᓄᓇᕗᒻᒥ ᐊᖑᓇᓱᖕᓂᕐᒧᑦ ᒪᓕᒐᐅᔪᓂ ᓱᕋᒃᑕᐅᔪᖃᓚᐅᙱᓚᖅ,” ᐅᖃᓚᐅᖅᐳᖅ ᐊᕙᑎᓕᕆᓂᕐᒧᑦ ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᑲᓇᑕᒥ ᐅᖃᖅᑎᐅᔪᖅ ᓯᓰᓕᐊ ᐹᓴᓐᔅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.

“ᐱᖓᓱᑦ ᓇᓄᕋᐃᑦ ᒪᓕᒐᑎᒍᑦ ᒪᓕᒃᑐᒥ ᐊᐅᓪᓚᖅᑎᑕᐅᓚᐅᖅᐳᑦ ᓄᓇᕗᒻᒥ ᐋᓐᑎᐊᕆᐅᒧᑦ.”

ᐅᖃᓚᐅᖅᐳᖅ ᐊᑲᐅᙱᓕᐅᕈᑕᐅᔪᑦ ᐊᔾᔨᒌᙱᓐᓂᐅᔪᓂ ᓇᓂᔭᐅᔪᓂ ᐱᔪᓐᓇᐅᑎᐅᔪᓂ ᑎᓲᓲ ᐊᑐᓚᐅᖅᑕᖏᓐᓂ ᐊᐅᓪᓚᖅᑎᑦᑎᓂᕐᒧᑦ ᓇᓄᕋᕐᒥ ᐋᖅᑭᒃᓯᒪᔪᒥ ᐊᒻᒪ ᒪᕐᕉᖕᓂ ᓇᓄᕋᕐᓂ ᓴᐃᓇᒧᑦ.

ᕿᑐᒻᒪᒃᓴᐃᔨᒥ “ᓴᒡᓗᓚᐅᖅᐳᖅ ᐊᒻᒪ ᐸᕐᓇᒡᔪᐊᖅᓯᒪᓪᓗᓂ” ᑐᓂᓯᓂᕐᒥ “ᓱᓕᙱᑦᑐᓂ ᑐᕌᕐᓂᖃᑦᑎᐊᙱᑦᑐᓂ ᑐᓴᒐᒃᓴᓂ” ᐱᓂᕐᒧᑦ ᐊᐅᓪᓚᖅᑎᑦᑎᓂᐅᔪᒥ ᐱᔪᓐᓇᐅᑎᒥᒃ, ᑐᓴᒐᒃᓴᓕᐊᖑᔪᒥ ᐊᕙᑎᓕᕆᓂᕐᒧᑦ ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᑲᓇᑕᒥ ᐅᖃᖅᓯᒪᓚᐅᖅᐳᖅ.

ᓴᐃᓇᒥ ᐊᒻᒪ ᐊᓯᓕᒫᖏᓐᓂ ᓄᓇᕐᔪᐊᒥ, ᓇᓄᕋᐃᑦ ᐊᒻᒪ ᐋᖅᑭᑦᓯᒪᔪᓂ ᐊᑐᖅᑕᐅᒐᔪᒃᐳᑦ ᑕᑯᒃᓴᐅᑎᑕᐅᓂᖏᓐᓄᑦ.

“ᐊᖏᒡᓕᒋᐊᖅᑐᒥ ᓄᓇᕐᔪᐊᒥ ᖃᐅᔨᓴᖅᑕᐅᓂᐅᔪᒥ ᓇᓄᕐᓂ ᑕᐅᖅᓰᓂᐅᔪᓂ ᓄᓇᕐᔪᐊᓕᒫᒥ ᖄᖏᖅᓯᒪᔪᓂ ᐊᕐᕌᒍᓄᑦ ᖁᓕᓄᑦ,” ᐹᓴᓐᔅ ᐅᖃᓚᐅᖅᐳᖅ.

ᓇᓄᕋᐃᑦ ᐅᕝᕙᓘᓐᓃᑦ ᑎᒥᖓᓐᓂ ᒪᓕᒐᑎᒍᑦ ᒪᓕᒃᑐᓂ ᐊᐅᓪᓚᖅᑎᑕᐅᔪᓂ ᑲᓇᑕᒥ ᐊᕐᕌᒍᑕᒫᒥ 1 ᐳᓴᓐᑎᐸᓗᖕᒥ ᑲᑎᓪᓗᒍ ᑲᓇᑕᒥ ᓇᓄᖕᓄᑦ ᐅᓄᕐᓂᐅᔪᓂ, ᐅᖃᓚᐅᖅᐳᖅ, “ᐊᒻᒪᓗ ᐅᓄᕐᓂᐅᔪᑦ ᐊᐅᓚᖅᑎᑕᐅᔪᑦ ᑲᑕᒃᐸᓪᓕᐊᖏᓐᓇᖅᓯᒪᕗᑦ ᑕᐃᒪᙵᓂ 2013−ᒥ.”

ᐅᓄᕐᓂᖅᓴᐅᔪᓂ 16,000−ᓂ ᓇᓄᖅᑕᖃᖅᐳᖅ ᑲᓇᑕᒥ, ᒪᕐᕉᖕᓂ−ᐱᖓᓱᓪᓗᐊᓂ ᓄᓇᕐᒧᐊᑉ ᐅᓄᕐᓂᕆᔭᖏᓐᓂ, ᐅᖃᐅᓯᐅᓪᓗᓂ 2018−ᒥ ᐊᕙᑎᓕᕆᓂᕐᒧᑦ ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᑲᓇᑕᒥ ᐅᓂᒃᑳᓕᐊᒥ. ᐱᖓᓱᓪᓗᐊᓂ−ᑎᓴᒪᓂ ᑲᓇᑕᐅᑉ ᓇᓐᓄᖕᓂᐅᔪᓂ ᐱᓕᕆᐊᖑᕙᒃᐳᑦ ᓄᓇᕗᒻᒥ.

2020−ᒥ, 109−ᓂ ᐱᔪᓐᓇᐅᑎᓂ ᑐᓂᔭᐅᓯᒪᓚᐅᖅᐳᑦ ᓇᓄᕋᕐᒥ ᐋᖅᑭᒃᓯᒪᔪᓄᑦ ᐅᕝᕙᓘᓐᓃᑦ ᓇᓄᕋᕐᓂ ᐊᐅᓪᓚᖅᑎᑕᐅᓂᐊᖅᑐᓄᑦ ᑲᓇᑕᒥ ᐊᒻᒪ 2021−ᒥ 169−ᓂ ᐱᔪᓐᓇᐅᑎᓂ ᑐᓂᔭᐅᔪᖃᓚᐅᖅᐳᑦ, ᒐᕙᒪᑐᖃᒃᑯᑦ ᐅᖃᐅᓯᖃᓚᐅᖅᐳᑦ 2021−ᒥ.

$60,000 ᑎᓲᓲ ᐊᑭᓕᕆᐊᖃᖅᑎᑕᐅᓂᖓᓂ ᑐᕌᖅᑎᑕᐅᓂᐊᖅᐳᖅ ᒐᕙᒪᑐᖃᒃᑯᑦ ᐊᕙᑎᒧᑦ ᓱᔪᐃᓂᐅᔪᒧᑦ ᑮᓇᐅᔭᖃᖅᑎᑕᐅᓂᖓᓂ, ᐅᖃᐅᓯᐅᓪᓗᓂ ᐊᕙᑎᓕᕆᓂᕐᒧᑦ ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᑲᓇᑕᒥ ᑐᓴᒐᒃᓴᓕᐊᖑᔪᒥ.

ᐃᖅᑲᖅᑐᐃᕕᒃ ᑎᓕᐅᕆᓚᐅᕆᕗᑦ ᓴᒃᑯᐃᑦᑎᓂᖓᓂ ᐊᑕᐅᓯᕐᒥ ᑕᒪᒃᑭᐅᒪᔪᒥ ᓇᓄᕋᕐᒥ ᐋᖅᑭᒃᓯᒪᔪᒥ ᐊᒻᒪ ᒪᕐᕉᖕᓂ ᓇᓄᕋᕐᓂ ᐅᕝᕙᓘᓐᓃᑦ ᓇᑎᕋᕐᓂᑦ.