ᐋᑐᕚᒥ ᐃᑲᔫᑎᒃᓴᖏᑦ ᐃᓄᐃᑦ ᐊᕐᓇᐃᑦ ᐅᓗᕆᐊᓇᙱᑦᑐᒦᒍᑎᒃᓴᖏᓐᓄᑦ ᐱᔭᐅᔭᕆᐊᖃᒻᒪᕆᖕᒪᑕ: ᐸᐅᒃᑑᑎᑦ
ᐃᓄᐃᑦ ᑲᑐᔾᔨᖃᑎᒌᖓᑦ ᐱᔪᒪᓚᐅᕐᒪᑕ $20 ᒥᓕᐊᓐ ᑖᓚᓂ ᑐᐊᕕᕐᓇᖅᑐᒧᑦ ᐊᕐᓇᓄᑦ ᐅᐸᒡᕕᒃᓴᐅᓇᔭᖅᑐᓂᒃ ᐃᓄᐃᑦ ᓄᓇᖓᓂ
ᑲᓇᑕᒥ ᖃᐅᔨᓇᓱᒃᑐᑦ ᐊᓯᐅᓯᒪᔪᓂᒃ ᐊᒻᒪ ᐃᓄᐊᖅᑕᐅᓂᑯᓂᒃ ᓄᓇᖃᖅᑳᖅᑐᓂᒃ ᐊᕐᓇᓂ ᐊᒻᒪ ᓂᕕᐊᕐᓵᓂ ᑐᙵᓱᒃᑎᑦᑎᔨᐅᓚᐅᕐᑐᑦ ᖃᐅᔨᓇᓱᖕᓂᕐᒥᑦ ᑲᖏᖅᖠᓂᕐᒥ 2018-ᒥᑦ. ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᐅᖃᓚᐅᕐᑐᑦ ᒐᕙᒪᒃᑯᑦ ᖃᓄᐃᓕᐅᕈᑎᒃᓴᓄᑦ ᐸᕐᓇᐅᑎᖏᑦᑎᒍ ᖃᐅᔨᓴᕈᑎᓄᑦ ᑭᐅᔭᐅᔭᕆᐊᖃᒻᒪᕆᖕᒪᑕ. (ᐊᔾᔨᙳᐊᖁᑎᒋᔭᐅᔪᖅ)
For an English version of this story, see Ottawa’s support for Inuit women’s safety is urgently needed: Pauktuutit
ᑲᓇᑕᒥ ᐃᓄᐃᑦ ᐊᕐᓇᐃᑦ ᑲᑐᔾᔨᖃᑎᒌᖓ ᐅᖃᖅᑐᑦ “ᐱᓪᓚᕆᐊᓘᖕᒪᑦ” ᑲᓇᑕᒧᑦ ᖃᓄᐃᓕᐅᕈᑎᒃᓴ ᐃᑲᔫᑎᒃᓴᐅᔪᑦ ᓄᓇᖃᖅᑳᖅᑐᓄᑦ ᐊᕐᓇᓄ ᐅᓗᕆᐊᓇᖅᑐᒦᑦᑐᓄᑦ ᑕᒪᑐᒪᓂ ᐊᕐᕌᒍᒥ ᐱᓕᕆᐊᖑᔭᕆᐊᖃᕐᓂᖓᓂᒃ.
ᐸᕐᓇᐅᑎ ᐃᓚᖃᕆᐊᖃᕐᒥᔪᖅ ᑐᐊᕕᕐᓇᖅᑐᒧᑦ ᐊᕐᓇᓄᑦ ᐅᐸᒡᕕᒃᓴᓂᒃ ᐃᓄᐃᑦ ᓄᓇᖓᓂ, ᐅᖃᖅᑐᖅ ᐸᐅᒃᑑᑎᒃᑯᑦ ᐊᖓᔪᖅᑳᖓ ᕇᐱᑲ ᑲᓪᓗᒃ.
ᑲᓪᓗᒃ ᐅᖃᓚᐅᕐᑐᖅ ᓈᒻᒪᒃᓴᓗᐊᓚᐅᙱᓐᓂᕋᖅᖢᓂ ᖃᐅᔨᒐᒥ ᐱᓇᓱᐊᕈᓯᐅᓚᐅᕐᑐᒥ ᒐᕙᒪᑐᖃᒃᑯᑦ ᐅᖓᕙᕆᐊᖅᑎᑦᑎᓚᐅᕐᓂᖏᓐᓂᒃ ᓴᖅᑭᑎᑦᑎᓂᐊᕐᓂᖏᓐᓂᒃ ᐸᕐᓇᐅᑎᓂᒃ ᑖᓐᓇᓗ ᐋᖅᑭᒃᓱᖅᑕᐅᕙᓪᓕᐊᓪᓗᓂ ᖃᐅᔨᔭᐅᓯᒪᔪᓂ ᑲᓇᑕᒥ ᖃᐅᔨᓇᓱᒃᑐᓂ ᐊᓯᐅᓯᒪᔪᓂᒃ ᐊᒻᒪ ᐃᓄᐊᕐᓇᐅᓯᒪᔪᓂᒃ ᓄᓇᖃᖅᑳᖅᑐᑦ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ.
ᖃᐅᔨᓴᕐᓂᕐᒧᑦ ᑭᖑᓪᓕᖅᐹᑦ ᐅᓂᒃᑳᑦ ᓴᖅᑭᑕᐅᓚᐅᕐᓯᒪᔪᑦ ᐊᕐᕌᓂ ᔫᓂ 3-ᖑᑎᓪᓗᒍ, ᐅᖃᕐᓯᒪᓪᓗᑎᒃ ᑲᓇᑕᒥ ᐋᓐᓂᕐᓱᐃᕆᖃᑦᑕᓗᐊᕐᓂᖅ ᓄᓇᖃᖅᑳᖅᑐᑦ ᐊᕐᓇᖏᓐᓂᒃ ᐃᒪᐃᓕᕈᑎᐅᔭᓐᓂᖓ ᓲᕐᓗ ᐅᓄᕐᑐᓂᒃ ᐃᓅᔪᓐᓃᖅᑎᑦᑎᒍᑎᐅᔭᖢᓂ, ᐱᒋᐊᕈᑎᖃᕐᓯᒪᓪᓗᑎᒃ ᐱᔮᕆᓪᓗᑎᒃ, ᑲᔪᓰᓐᓇᖅᖢᑎᒡᓗ ᑭᒃᑯᑐᐃᓐᓇᕐᓄ ᐊᒻᒪ ᓄᓇᖃᖅᑳᖅᑐᓄᑦ ᓈᒻᒪᙱᓕᐅᕈᑎᐅᖃᑦᑕᖅᑐᓂᒃ ᐱᔪᓐᓇᐅᑎᖏᑦᑎᒍᑦ.
ᒐᕙᒪᒃᑯᑦ-ᓄᓇᖃᖅᑳᖅᑐᓄᓪᓗ ᒥᓂᔅᑕ ᑭᐅᕈᓕᓐ ᐸᓇᑦ ᐅᖃᓚᐅᕐᓯᒪᓂᑯ ᑭᐅᔾᔪᑎᐅᔪᑦ ᐱᐊᓂᒃᑕᐅᓯᒪᖁᓪᓗᓂᒋ ᐊᕐᕌᒍᖓᓂᒃ ᐅᓂᒃᑳᑦ ᓴᖅᑭᑕᐅᓚᐅᕐᓯᒪᓂᖓᒍᑦ, ᑭᓯᐊᓂᓕ ᒪᐃ 27-ᒥ ᐅᖃᓕᓚᐅᕐᑐᖅ ᐅᓇ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ ᓱᒃᑲᐃᒡᓕᕚᓪᓕᕈᑎᐅᓂᖓᓂᒃ ᐱᓕᕆᓂᐅᔪᓂᒃ.
“ᑕᒪᓐᓇ ᓂᕆᐅᒋᓚᐅᙱᑕᕗᑦ, ᑭᓯᐊᓂᓕ ᑲᒪᒋᓗᐊᙱᖢᑎᒍ,” ᑲᓪᓗᒃ ᐅᖃᓚᐅᕐᑐᖅ ᑐᓴᕋᒥ ᑐᓴᒐᒃᓴᓂᒃ.
“ᐅᖃᓪᓚᖃᑎᖃᓚᐅᕋᒪ ᒥᓂᔅᑕ ᐸᓇᑦᒥ (ᒪᐃ 28-ᒥ) ᐊᒻᒪ ᐅᖃᐅᑎᓪᓗᒍ ᑖᔅᓱᒧᖓ ᐱᓕᕆᐊᖃᕐᓂᑦᑎᓐᓂᒃ. ᐃᓚᒋᔭᐅᔪᓕᒫᓄᑦ ᐋᓐᓂᕐᓇᖅᑐᓂᒃ ᐊᑐᕐᓯᒪᓂᑯᓂ ᐊᒻᒪ ᐋᓐᓂᕐᓇᖅᑐᓂᒃ ᐃᖅᑲᐅᒪᔭᓕᖕᓂ.”
ᑲᓪᓗᒃ ᐅᖃᓚᐅᕐᑐᖅ ᑭᖑᓪᓕᕐᒥ ᐸᓇᑦᒥ ᐅᖃᓪᓚᖃᑎᖃᓕᕈᓂ ᐱᓇᓱᐊᒻᒪᕆᖁᓗᓂᐅᒃ ᐅᑯᐊ ᐅᓂᒃᑳᓕᐊᖑᔪᑦ ᐱᐊᓂᒃᑕᐅᓂᐊᕐᓗᑎᒃ 2020 ᐊᓂᒍᓚᐅᙱᓐᓂᖓᓂ.
ᑲᓪᓗᒧᓪᓕ, ᑭᖑᕙᕆᐊᖅᑕᐅᓂᖓ ᖁᕕᐊᒋᙱᓗᐊᕈᑎᒋᓂᕋᖅᖢᓂᐅᒃ ᐅᓗᕆᐊᓱᖕᓂᕋᖅᖢᓂ ᐃᓄᐃᑦ ᐊᕐᓇᐃᑦ ᐊᖏᕐᕋᖏᓐᓃᖏᓐᓇᕆᐊᖃᖅᑐᑦ ᐊᐃᑉᐸᖃᖅᑐᑦ ᐃᓚᖃᖅᑐᓪᓘᓐᓃ ᐋᓐᓂᕐᓯᕆᔭᑦᑐᓂᒃ.
“ᓄᕙᒡᔪᐊᕐᓇᖅ-19 ᐱᔾᔪᑎᐅᔭᕆᐊᖃᙱᑦᑐᖅ [ᑭᖑᕙᕆᐊᖅᑕᐅᓂᖓᓂ ᐸᕐᓇᐅᑎ], ᓲᖃᐃᒻᒪ ᖃᐅᔨᒪᒐᑦᑕ ᐊᕐᓇᐃᑦ ᖁᐊᕐᓵᕐᓇᖅᑐᒦᓐᓂᖏᓐᓂᒃ ᐋᓐᓂᕐᓯᕆᔭᐅᓂᕐᒧᑦ ᒫᓐᓇ,” ᐅᖃᖅᑐᖅ. “ᐃᓱᒪᔪᖓᓕ ᖃᓄᐃᓕᐅᕈᑎᒃᓴᓄᑦ ᐸᕐᓇᐅᑎ ᑕᒪᑐᒪᓂ ᐊᕐᕌᒍᒥ ᐊᑐᕆᐊᖃᓕᕐᓂᖓᓂᒃ—ᐃᓚᒋᔭᐅᔪᑦ ᐅᑕᖅᑭᓯᒪᖕᒪᑕ.”
ᐸᕐᓇᐅᑎᑕᖃᕋᓗᐊᕐᐸᑦ ᐸᕐᓇᐅᑎᑕᖃᙱᑉᐸᓪᓘᓐᓃᑦ, ᐸᐅᒃᑑᑎᒃᑯᑦ ᒐᕙᒪᑐᖃᒃᑯᓐᓂ ᒫᓐᓇᑲᐅᑎᒋ ᐃᑲᔫᑎᒃᓴᖅᑖᕈᒪᔪᑦ ᐊᕐᓇᓄᑦ ᐅᐸᒡᕕᒃᓴᓄᑦ ᐃᓄᐃᑦ ᓄᓇᓕᖏᓐᓂᒃ. ᑲᑐᔾᔨᖃᑎᒌᖑᔪᑦ ᐱᔪᒪᓚᐅᕐᒪᑕ $20 ᒥᓕᐊᓐ ᑖᓚᓂᒃ ᓴᓇᔪᒪᓪᓗᑎᒃ ᑕᓪᓕᒪᓂᒃ ᐅᐸᒡᕕᒃᓴᓂᒃ ᑐᐊᕕᕐᓇᖅᑐᒧᑦ ᐊᒻᒪᓗ ᐃᒡᓗᒋᔭᐅᔪᒃᓴᓄᑦ, ᐊᒻᒪᓗ ᑲᓪᓗᒃ ᐅᖃᒃᑲᓐᓂᖅᖢᓂ “ᐱᔭᐅᔭᕆᐊᖃᒻᒪᕆᒃᑐᑦ.”
ᐊᕐᓇᓄᑦ ᐅᐸᒡᕕᒃᓴᑦ ᑲᓪᓘ ᓄᓇᖓᓂ ᖃᒪᓂᑦᑐᐊᕐᒥ ᒪᑐᔭᐅᓚᐅᕐᓯᒪᖕᒪᑦ ᓄᑕᐅᙱᓐᓂᖓᓄᑦ, ᐊᒻᒪᓗ ᑕᕝᕙᓂ ᐱᔨᑦᑎᕋᐅᑎᑕᖃᕈᓐᓃᕐᖢᓂ.
14-ᖑᑐᐃᓐᓇᕐᒪᑕ ᐅᐸᒡᕕᒃᓴᐅᔪᓐᓇᖅᑐᑦ 51-ᓂ ᓄᓇᓕᖕᓂ ᐃᓄᐃᑦ ᓄᓇᖓᓂ, ᐅᖃᖅᑐᖅ, ᐊᒻᒪᓗ ᑎᓴᒪᑐᐃᓐᓇᑦ ᓄᓇᕗᒦᖢᑎ.
ᐸᐅᒃᑑᑎᑦ ᓂᕆᐅᓚᐅᕐᓯᒪᔪᑦ, ᒪᐃ 29-ᒥᑦ, ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᓕᕆᔩᑦ ᑲᓇᑕᒥ ᑐᓴᖅᑎᑎᓪᓗᒍ $80 ᒥᓕᐊᓐ ᑖᓚᐃ ᐅᖓᑖᓂ ᐃᑲᔫᑎᑕᖃᕐᓂᐊᕐᓂᖓᓂᒃ ᓄᓇᖃᖅᑳᖅᑐᑦ ᓄᓇᓕᖏᓐᓄᑦ, ᐅᖃᖅᖢᓂ ᒪᕐᕉᒃ ᐅᕗᖓᐅᓂᕋᖅᖢᓂᒋᑦ ᑎᐅᕆᑑᕆᓄᑦ. ᑭᓯᐊᓂᓕ ᒐᕙᒪᒃᑯᑦ ᐅᖃᓚᐅᙱᑦᑐᑦ ᓱᓕ ᓇᓕᐊᓐᓂ ᑎᐅᕆᑑᕆᓂ ᓄᓇᓕᖕᓂᓪᓘᓐᓃᑦ ᑖᒃᑯᐊ ᐅᐸᒡᕕᒃᓴᐃᑦ ᓴᓇᔭᐅᓂᐊᕐᓂᖏᓐᓂᒃ
ᑲᓪᓗᒃ ᐅᖃᓚᐅᕐᑐᖅ ᐸᐅᒃᑑᑎᒃᑯᑦ ᓴᐱᓕᕐᓯᒪᓗᐊᒃᑲᓐᓂᓕᕐᓂᕋᖅᖢᓂᒋᑦ.
“[ᐅᓇ] ᐱᕕᐅᓂᐊᓚᐅᕋᓗᐊᕐᒪᑦ ᐱᓕᕆᐊᖃᕐᓂᕐᒥᑦ ᒪᑯᓂᖓ ᐊᑐᐊᒐᕐᓂᒃ ᐊᒻᒪ ᐱᓕᕆᐊᒃᓴᓂᒃ ᐊᑯᑦᑐᔫᑎᐅᓗᐊᖅᑐᓂᒃ ᒪᑯᓄᖓ ᑐᕌᖓᔪᓂᒃ ᐃᓄᐃᑦ ᐊᕐᓇᖏᓐᓄᑦ ᐊᒻᒪ ᕿᑐᕐᖓᖏᓐᓄᑦ,” ᐅᖃᖅᑐᖅ.
(0) Comments