ᐋᑐᕚᒥ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐃᓄᒃᑎᑐᑦ ᐃᓕᓐᓂᐊᒐᒃᓴᒥᒃ ᐱᒋᐊᖅᑎᑦᑎᓂᐊᕐᑐᑦ

ᐋᑐᕚ-ᑳᐊᑕᓐ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐱᓕᕆᐊᖃᕋᓱᒃᑐᑦ ᐃᓄᒃᑎᑐᑦ ᐃᓕᓐᓂᐊᕈᑎᐅᓛᕐᓗᓂ ᐊᕐᕌᒍ

ᓵᓇᓐ ᓯᒥᑦ, ᐊᖓᔪᖅᑳᖅ ᐃᓕᓐᓂᐊᖅᑎᑦᑎᔾᔪᑎᒃᓴᓄᑦ ᐋᑐᕚ-ᑳᐊᑕᓐ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ, ᐅᖃᓚᐅᕐᑐᖅ ᖁᕕᐊᓱᒻᒪᕆᖕᓂᕋᖅᖢᓂ ᐃᓕᓐᓂᐊᖅᑎᐅᔪᑦ ᐃᓕᓐᓂᐊᕈᓐᓇᕐᓂᐊᕐᓂᖏᓐᓂᒃ ᐃᓄᒃᑎᑐᑦ ᐃᓕᓐᓂᐊᕐᕕᖕᓂ. (ᐊᔾᔨᓕᐅᕆᔨ ᒪᑕᓕᓐ ᕼᐊᐅᕕᑦ)

By ᒫᑕᓕᓐ ᕼᐊᐅᕕᑦ

For an English version of this story, see Ottawa school board to boost Inuktitut language learning

ᐋᑐᕚᒥ ᐃᓕᓐᓂᐊᕐᑎᐅᔪᑦ ᐃᓕᓐᓂᐊᒃᑲᓐᓂᕈᒪᔪᑦ ᐅᖃᐅᓯᒃᑲᓐᓂᕐᒥ ᐃᓕᓐᓂᐊᕐᕕᐊᓗᖕᒥ ᐃᓄᒃᑎᑐᑦ ᐊᔪᕈᓐᓃᓴᕈᓐᓇᓛᖅᑐᑦ

ᓯᑎᐱᕆ 29-ᒥ, ᐋᓐᑎᐅᕆᐅᒥᒃ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᒥᓂᔅᑕᐃᑦ ᑐᓴᖅᑎᑦᑎᓚᐅᕐᓯᒪᔪᑦ $23.96 ᒥᓕᐊᓐᑖᓚᓂᒃ ᐅᑯᓇᙵᑦ ᓯᕗᓪᓕᐅᑎᑕᐅᔭᕆᐊᓕᖕᓄᑦ ᐊᒻᒪ ᐱᓕᕆᖃᑎᒌᓄᑦ ᐃᑲᔫᑎᒃᓴᓂᒃ ᓄᓇᖃᖅᑳᖅᑐᓕᕆᓂᕐᒧᑦ ᐊᑐᖅᑕᐅᓛᖕᓂᖓᓂᒃ ᐊᒻᒪᓗ ᐳᕌᕕᓐᓯᒥ ᐃᓕᓐᓂᐊᕈᑎᓕᕆᓂᕐᒧᑦ.

ᐃᑲᔫᑎᒃᓴᖅ ᐃᑲᔪᕈᑎᐅᓂᐊᕐᑐᖅ ᐃᓄᒃᑎᑐᑦ ᐱᒋᐊᖅᑎᑕᐅᔪᒪᓂᖓᓄᑦ ᐅᖃᐅᓯᕐᓂ ᐃᓕᓐᓂᐊᕈᑎᓕᕆᓂᒃᑯᑦ ᐅᕙᓂ ᐋᑐᕚ-ᑳᐊᑕᓐ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ, ᐅᖃᓚᐅᕐᑐᖅ ᓵᓇᓐ ᓯᒥᑦ, ᐊᖓᔪᖅᑳᖅ ᐃᓕᓐᓂᐊᖅᑕᐅᔪᒃᓴᓄᑦ ᑲᑎᒪᔨᓄᑦ ᑖᔅᓱᒪᓗ ᐱᔭᒃᓴᖏᑦ ᐃᓚᖃᖃᑕᐅᓪᓗᑎᒃ ᓄᓇᖃᖅᑳᖅᑐᓂᒃ ᐃᓕᓐᓂᐊᖅᑎᑦᑎᓂᕐᒧᑦ.

“ᐅᓇ ᑐᓴᒐᒃᓴᖅ ᐱᒻᒪᕆᐊᓗᒃ ᓲᖃᐃᒻᒪ ᐃᓕᓐᓂᐊᕐᓂᕐᒧᑦ ᓇᓗᓇᐃᒃᑯᑎᖃᖅᑎᑦᑎᖕᒪᑦ ᐃᓄᒃᑎᑐᑦ ᐅᖃᐅᓯᕐᒥ ᑕᐃᒪᓐᓇ ᐃᓕᓐᓂᐊᖅᑐᑦ ᓇᓗᓇᐃᒃᑯᑎᑖᕈᓐᓇᕋᔭᕐᒪᑕ ᐃᓕᓐᓂᐊᖅᐸᓪᓕᐊᓂᒃᑯᑦ,” ᓯᒥᑦ ᐅᖃᖅᑐᖅ. ᐅᖃᓚᐅᕐᒥᔪᖅ ᐅᑯᐊ ᐃᓕᓐᓂᐊᕈᑎᒃᓴ ᒪᑐᐃᖓᓇᔭᕐᓂᖓᓂᒃ ᑭᒃᑯᑐᐃᓐᓇᕐᓄᑦ ᐃᓕᓐᓂᐊᖅᑐᓄᑦ ᐊᓯᐊᓂᒃ ᐅᖃᐅᓯᕐᒥ ᐃᓕᓐᓂᐊᕈᒪᔪᓄᑦ ᐃᓕᓐᓂᐊᕐᕕᐊᓗᒃᒥ.

“ᐃᒻᒪᖄᑦ ᐅᐱᖔᒧᖃᐃᑦ ᑕᐃᒪᓐᓇ ᐃᓕᓐᓂᐊᕐᓇᖅᓯᒃᐸᑦ ᐃᓕᓐᓂᐊᕈᑎᐅᔪᓐᓇᓛᕐᒪᑦ ᐊᕐᕌᒍᒧᑦ,” ᐅᖃᖅᑐᖅ.

ᐃᓕᓐᓂᐊᒐᒃᓴᐃᑦ ᐊᓯᖏᓐᓄᑦ ᐅᖃᐅᓯᕐᓄᑦ ᒪᓂᒪᔭᐅᖃᑦᑕᖅᑐᑦ ᑲᑎᒪᔨᒃᑯᑦ ᐃᓕᓐᓂᐊᒃᑲᓐᓂᕈᑎᓕᕆᓂᖏᑦᑎᒍᑦ ᐅᕘᓇ ᓄᓇᖃᖅᑳᖅᑐᑦ ᐊᒻᒪ ᓄᓇᕐᔪᐊᕐᒥᐅᑦ ᐅᖃᐅᓯᖏᓐᓂᒃ. ᑭᓯᐊᓂᓕ, ᑕᒪᑐᒪᓂ ᐊᕐᕌᒍᒥ ᐊᑕᐅᓯᕐᒥ ᓄᓇᖃᖅᑳᖅᑐᑦ ᐅᖃᐅᓯᖓᓂ ᐃᓕᓐᓂᐊᖅᑎᑦᑎᔾᔪᑎᖃᕐᒪᑕ ᑯᕇᒥᒃ, ᐅᖃᖅᑐᖅ ᓯᒥᑦ, ᐅᓇ ᐃᓄᒃᑎᑐᑦ ᐃᓕᓐᓂᐊᖅᑎᑦᑎᔾᔪᑎ ᑲᑕᑐᐃᓐᓇᓚᐅᕐᓯᒪᑎᓪᓗᒍ ᑖᓐᓇ ᐃᓕᓐᓂᐊᖅᑎᑦᑎᔨᐅᔪᖅ ᐃᓕᓴᐃᔪᓐᓇᐃᓪᓕᑎᓪᓗᒍ.

“ᐅᓇ ᐃᓕᓴᐃᔨᓂᒃ ᑮᓇᐅᔭᖃᖅᑎᑦᑎᓗᓂᐅᔭᕆᐊᖃᕐᒪᑦ ᐊᒻᒪ ᐃᓕᓐᓂᐊᖅᑎᑦᑎᔨᒃᓴᓂᒃ ᑖᒃᑯᓂᖓ ᐃᓕᓐᓂᐊᒐᒃᓴᓂᒃ,” ᓯᒥᑦ ᐅᖃᖅᑐᖅ. “ᖃᖓᒃᑲᓐᓂᕐᓕ ᐃᒪᓐᓇ ᐱᓇᓱᖃᑦᑕᓚᐅᕐᓯᒪᒐᑦᑕ ᓄᓇᖃᖅᑳᖅᑐᑦ ᐅᖃᐅᓯᖓᓂ ᐅᖃᕈᓐᓇᖅᑐᒥ ᕿᓂᖅᐸᒃᖢᑕ ᓄᓇᓕᖕᓂᒃ, ᑕᐃᒪᓕ ᑕᒪᑐᒥᖓ ᐱᓇᓱᖕᓂᖅᓴᐅᓕᖅᑐᒍᑦ ᐊᒻᒪᓗ ᖃᓄᖅ ᐃᓕᓐᓂᐊᖅᑎᑦᑎᔾᔪᑎᓂᒃ ᐱᓕᕆᐊᖃᕋᔭᕐᒪᖔᑦ ᖃᕋᓴᐅᔭᑎᒍᑦ ᐊᔪᕐᓇᙱᑦᑕᕌᖓᑦ,” ᐅᖃᓚᐅᕐᑐᖅ, ᐅᖃᖅᖢᓂ ᐋᓐᓂᐊᕕᒡᔪᐊᕐᓇᖅ ᐅᓄᖅᑐᓂᒃ ᐱᓕᕆᔾᔪᑎᐅᔪᓐᓇᖅᓯᖕᒪᑦ ᐃᓕᓴᐃᔨᐅᕙᒃᑐᓄᑦ.

ᓯᒥᑦ ᐅᖃᓚᐅᕐᑐᖅ ᖃᓄᐃᓕᐅᕈᑎᐅᓇᓱᒃᑐᑦ ᐅᖃᐅᓯᕐᓂ ᐊᔪᕈᓐᓃᕐᓴᕈᑎᓕᕆᓂᒃᑯ ᐃᓕᓐᓂᐊᖅᑎᓄ ᐃᓚᒋᔭᐅᓂᖓᓂᒃ ᐃᓕᓐᓂᐊᖅᑐᓕᕆᓂᒃᑯᑦ ᑐᑭᓯᕚᓪᓕᕐᓯᒪᓇᓱᖕᓂᕐᒥᒃ “ᓄᓇᖃᖅᑳᖅᑐᑦ ᐃᓕᖅᑯᓯᖏᓐᓂᒃ ᐊᒻᒪ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ,” ᐅᖃᖅᑐᖅ. “ᐅᓄᓂᕐᓴᐃᑦ ᐃᓄᐃᑦ ᐱᓕᕆᐊᖃᕐᓂᕐᓴᐅᓕᖅᑎᓪᓗᒍ ᐅᑯᑎᒎᓇᖅ ᓱᓕᓂᖅᒧᑦ ᐊᒻᒪ ᐱᒋᐊᒃᑲᓐᓂᕈᒪᓂᖅᒧ ᑲᒥᓴᓐᑯᓐᓄᑦ ᖃᓄᐃᓕᐅᕈᑎᐅᖁᔭᐅᔪᓂᒃ… ᐃᓱᒪᔪᖓᓕ ᑕᒪᓐᓇ ᐱᓕᕆᓂᖅ ᐊᑐᖅᑕᐅᒃᑲᓐᓂᕐᓂᐊᕈᒪᓂᖓᓂᒃ.”

“ᕿᓂᕋᓱᒃᑲᑦᑕ ᐊᖏᒡᓕᒋᐊᖅᑎᑦᑎᔾᔪᑎᐅᔪᓐᓇᖅᑐᓂᒃ ᐊᒻᒪᓗ ᐃᓕᓐᓂᐊᖅᑎᐅᔪᑦ ᓄᓇᖃᖅᑳᖅᑐᓂᒃ ᐅᖃᐅᓯᓕᕆᔨᓂ ᐅᖃᓪᓚᖃᑎᖃᕐᓂᕐᓴᐅᕙᒡᓗᑎᒃ,” ᓯᒥᑦ ᐅᖃᒃᑲᓐᓂᖅᑐᖅ. “ᐋᑐᕚᒥ ᐅᓄᕈᓘᔭᕐᒪᑕ ᐃᓄᐃᑦ ᑕᒫᓃᑦᑐᑦ ᐊᔾᔨᒌᙱᑦᑐᓂᒃ ᐱᔾᔪᑎᖃᐅᖅᖢᑎᒃ ᐊᒻᒪᓗ ᐃᓕᓐᓂᐊᕐᕕᑦᑎᓐᓄᐊᖅᐸᒃᖢᑎᒃ, ᑕᐃᒪᓕ ᑕᒪᓐᓇ ᐱᓕᕆᐊᕆᔪᓐᓇᕋᔭᕋᑦᑎᒍᑦ.”

ᐃᓕᓐᓂᐊᖅᑐᓕᕆᔨᒃᑯᑦ ᑐᓴᖅᑎᑦᑎᓚᐅᕐᒥᔪᑦ ᓄᓇᖃᖅᑳᖅᑐᓂᒃ ᐃᓕᓐᓂᐊᕈᑎᒃᓴᓂᒃ ᐃᓚᓕᐅᔾᔨᓂᐊᕐᓂᕋᖅᖢᓂ ᐃᓕᓐᓂᐊᕈᑎᒋᔭᐅᔪᒧᑦ ᐃᓄᐃᑦ ᖃᓄᐃᓕᐅᖅᐸᓪᓕᔾᔪᑎᖏᓐᓂᒃ ᐅᑯᓇᓕ ᒍᕇᑦ 1-ᒥ ᒍᕇᑦ 3-ᒧᑦ ᐱᒋᐊᕐᓗᑎᒃ ᓯᑎᐱᕆ 2023-ᒥ, ᒪᑯᓂᖓ ᐃᓚᖃᕐᓂᐊᖅᖢᑎᒃ ᓄᓇᖃᖅᑳᖅᑐᑦ ᖃᓄᐃᓕᐅᕈᓯᒋᕙᒃᑕᕕᓂᖏᓐᓂᒃ ᐊᒻᒪᓗ ᒫᓐᓇ

ᖃᓄᐃᓕᐅᕈᓯᐅᕙᒃᑐᓂᒃ ᐊᒻᒪᓗ ᐃᓕᓐᓂᐊᕆᐊᕐᕕᓕᐊᕐᕕᕕᓂᕐᓄᑦ ᐃᓕᓐᓂᐊᕈᑎᐅᓂᑯᓂᒃ.

ᒫᓐᓇᓕ ᓄᓇᖃᖅᑳᖅᑐᓅᖓᔪᑦ ᐃᓕᓐᓂᐊᕈᑎᒋᔭᐅᖃᑦᑕᕐᒪᑕ ᒍᕇᑦ 4-ᒥᑦ 8-ᒧᑦ ᐊᒻᒪ ᒍᕇᑦ 10-ᒥᑦ, ᐊᒻᒪᓗ ᐃᓕᓐᓂᐊᕆᐊᕐᕕᐅᖃᑦᑕᓚᐅᕐᓯᒪᔪᓂᒃ ᐅᑯᓇᓂ ᒍᕇᑦ 8 ᐊᒻᒪ 10-ᒥᑦ, ᑖᓐᓇᓗ ᐱᒋᐊᖅᑕᐅᓚᐅᕐᓯᒪᓪᓗᓂ 2018-ᖑᑎᓪᓗᒍ.

Share This Story

(0) Comments

Join the Conversation

Your email address will not be published. Required fields are marked *

*