ᐋᑐᕚ $214 ᒥᓕᐊᓐ ᑖᓚᓂ ᐊᑐᕐᓂᐊᕐᑐᑦ ᐆᒧᖓ ᐃᖃᓗᐃᑦ ᐃᒪᖃᐅᑎᖃᕐᕕᐊᓄᑦ

ᒐᕙᒪᑐᖃᒃᑯᑦ ᐃᑲᔫᑎᖓ ᐊᑐᖅᑕᐅᓂᐊᕐᑐᖅ ᓄᑖᒧᑦ ᐃᒪᖃᐅᑎᖃᕐᕕᒃᓴᒧᑦ ᐊᒻᒪ ᐱᐅᓯᕚᓪᓕᖅᑎᑦᑎᓂᕐᒥᒃ ᓄᓇᓕᐸᐅᔭᐃᑦ ᐃᒪᖃᖅᑎᑦᑎᔾᔪᑎᖏᓐᓂᒃ, ᑲᓇᑕᒥ ᐊᖓᔪᖅᑳᖅ ᐅᖃᕐᑐᖅ

ᑲᓇᑕᒥ ᐊᖓᔪᖅᑳᖅ ᔭᔅᑎᓐ ᑐᕉᑑ, ᓴᖅᑭᔮᒐᒃᑯᑦ ᐅᖃᓪᓚᒃᖢᓂ ᐋᑐᕚᒥ, ᑐᓴᖅᑎᑦᑎᓚᐅᕐᑐᖅ $214 ᒥᓕᐊᓐ ᑖᓚᑐᕐᑐᒥᓐ ᐸᕐᓇᐅᑎᒥᒃ ᐱᐅᓯᕚᓪᓕᖅᑎᑦᑎᓂᕐᒧᑦ ᐃᖃᓗᖕᓂ ᐃᒪᖃᐅᑎᖃᕐᕕᖓᓂᒃ ᐄᐳᕈᓪ 1-ᖑᑎᓪᓗᒍ ᑐᓴᒐᒃᓴᓕᐊᕐᑎᓪᓗ ᓴᖅᑭᔮᒐᒃᑯᑦ, ᐅᑯᐊ ᐃᓚᐅᓪᓗᑎᒃ (ᓴᐅᒥᐊᓂ ᑕᓕᕐᐱᐊᓄ) ᐃᖃᓗᐃᑦ ᐊᖓᔪᖅᑳᖓ ᓄᓇᓕᐸᐅᔭᓄᑦ ᐊᐃᒥ ᐃᐊᒍᔅᒪ, ᒪᐃᔭ ᑭᐊᓂ ᐱᐊᓪ ᐊᒻᒪ ᓯᕗᓕᐅᖅᑎ ᐸᐅᓗᓯ ᐊᕿᐊᕈᖅ, ᑖᒃᑯᐊ ᐅᕙᓃᖢᑎᒃ ᐃᖃᓗᐃᑦ ᑎᑎᕋᕐᕕᖓᓂᒃ. (ᐊᔾᔨᓕᐅᕆᔨ ᑕᐃᕕᑦ ᕕᐊᓐ)

By ᓄᓇᑦᓯᐊᕐᒥ ᐱᕙᓪᓕᐊᔪᑦ

For an English version of this story, please see Ottawa to pump $214M into Iqaluit water system.

ᒐᕙᒪᑐᖃᒃᑯᑦ ᐊᑐᕐᓂᐊᕐᑐᑦ $214 ᒥᓕᐊᓐ ᑖᓚᓂ ᓄᑖᒥᒃ ᐃᖃᒪᐅᑎᖃᕐᕕᒃᓴᒧᑦ ᐃᖃᓗᖕᓂ ᐊᒻᒪᓗ ᐱᐅᓯᕚᓪᓕᖅᑎᑦᑎᓂᕐᒥᒃ ᓄᓇᓕᐸᐅᔭᐃᑦ ᐃᒪᖃᖅᑎᑦᑎᔾᔪᑎᖏᓐᓂᒃ, ᑖᓐᓇ ᐊᑐᖅᑕᐅᕐᔪᐊᖃᑦᑕᕐᓯᒪᖕᒪᑦ ᓄᓇᓖᑦ ᐱᕈᖅᐸᓪᓕᐊᓂᖓᓄᑦ.

ᓄᓇᕗᑦ ᓯᕗᓕᐅᕐᑎᖓ ᐸᐅᓗᓯ ᐊᕿᐊᕈᖅ, ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖃ ᐊᓗᑭ ᑰᑦᑎᖅ, ᐃᖃᓗᐃᑦ ᒪᐃᔭᖓ ᑭᐊᓂ ᐱᐊᓪ ᐊᒻᒪᓗ ᓄᓇᓕᐸᐅᔭᓄᑦ ᑲᑎᒪᔩᑦ ᑲᑎᓚᐅᕐᑐᑦ ᓄᓇᓕᐸᐅᔭᐃᑦ ᑎᑎᕋᕐᕕᐊᓂᒃ ᑐᓵᔭᖅᑐᖅᖢᑎᒃ ᑲᓇᑕᒥ ᐊᖓᔪᖅᑳᖅ ᔭᔅᑎᓐ ᑐᕉᑑ ᑐᓴᒐᒃᓴᓕᐅᕐᑎᓪᓗᒍ ᓴᖅᑭᔮᑲᐅᑎᒋᓐᓇᖅᑐᒃᑯᑦ ᐄᐳᕈᓪ 1-ᒥ.

“ᐅᓇ ᐊᓯᙳᕈᑎᑦᑎᐊᕙᐅᓂᐊᕐᑐᖅ ᓄᓇᓕᐸᐅᔭᓄᑦ ᐃᖃᓗᖕᓂ ᐊᒻᒪᓗ ᓄᓇᓕᖕᓂ ᑮᓇᐅᔭᓕᐅᕋᓱᖕᓂᒃᑯᑦ,” ᑐᕌᑑ ᐅᖃᓚᐅᕐᑐᖅ, ᐅᖃᒃᑲᓐᓂᖅᖢᓂ ᐅᓇ ᐃᒪᑦᑎᐊᕙᖃᕆᐊᖃᕐᓂᖅ “ᓯᕗᓪᓕᖅᐹᖑᕙᕆᐊᓕᒃ ᐱᓕᕆᐊᒃᓴᕐᓂᒃ” ᒐᕙᒪᑐᖃᒃᑯᓐᓄᑦ.

ᐋᑐᕚᒥ ᑮᓇᐅᔭᖅᑖᕆᔭᐅᔪᖅ ᐊᑐᕐᑕᐅᓂᐊᖅᑐᖅ ᓄᑖᒥ ᐃᒥᖅᑕᖅᕕᒃᓴᓕᐅᕐᓗᑎᒃ ᐊᒻᒪᓗ ᐃᒪᖃᕐᕕᒃᓴᒥᒃ ᒫᓐᓇ ᐃᒥᕐᑕᕐᕕᐅᑉ ᑕᓯᖅ ᔨᐅᕈᑏᑦ ᓴᓂᑦᑎᐊᖓᓃᓪᓗᓂ ᐊᒻᒪᓗ ᐱᐅᓯᕚᓪᓕᖅᑎᑦᑎᔾᔪᑎᐅᓗᓂ ᐃᒪᖃᖅᑎᑦᑎᔾᔪᑎᖏᓐᓂᒃ.

ᒐᕙᒪᑐᖃᒃᑯᑦ ᑮᓇᐅᔭᓂ ᓄᓇᓕᐸᐅᔭᓄᐊᕐᓯᕙᓪᓕᐊᓂᐊᕐᑐᑦ, ᑖᒃᑯᐊᓗ ᐊᑐᕐᑕᐅᕙᓪᓕᐊᓇᔭᖅᖢᑎᒃ ᐊᕐᕌᒍᓂᒃ ᑎᓴᒪᓂᒃ “ᑖᒃᑯᐊᓗ ᐱᔭᒃᓴᐃᑦ ᐱᐊᓂᖅᑳᑎᒋᔾᔫᒥᓂᐊᖅᖢᑎᒃ,” ᐱᐊᓪ ᐅᖃᓚᐅᕐᑐᖅ ᑐᓴᒐᒃᓴᓕᐅᕐᑎᓪᓗᒋᑦ.

“ᐅᓇ ᐃᑲᔫᑎ ᑐᙵᕕᒋᓕᕐᓂᐊᕐᑕᕗᑦ ᓴᓇᕙᓪᓕᐊᓕᕈᑦᑕ — ᑖᓐᓇᓗ ᐊᕐᕌᒍᒐᓴᒻᒪᕆᐅᓚᐅᕐᑐᓂᒃ ᐱᔪᒪᓯᒪᓚᐅᖅᖢᑎᒍᑦ. ᐱᖁᑎᒋᔭᕗᑦ ᐃᑲᔪᖅᑕᐅᔭᕆᐊᖃᒻᒪᕆᖕᒪᑕ … ᑖᓐᓇᓗ ᐊᒃᓱᐊᓗᒃ ᐃᑲᔪᕈᑎᐅᓂᐊᖅᖢᓂ,” ᐅᖃᕐᑐᖅ.

ᓄᓇᓕᐸᐅᔭᐃᑦ ᓄᑖᒥ ᐃᒪᖃᕈᑎᖃᕆᐊᖃᕐᓯᒪᖕᒪᑦ ᐊᕐᕌᒍᒐᓴᒻᒪᕆᐅᓕᕐᑐᓂᒃ, ᐃᓚᖓᓪᓘᓐᓃᑦ ᑲᑎᒪᔨ ᐅᖃᓚᐅᖅᖢᓂ ᑖᓐᓇ ᑐᓗᖅᑕᕐᕕᒻᒪᕆᐅᓂᕋᖅᖢᓂᐅᒃ ᐱᕙᓪᓕᐊᔪᓕᕆᓂᕐᒥᒃ ᓄᓇᓕᖕᓂ.

ᓄᓇᓕᐸᐅᔭᐃᑦ ᐃᖅᑲᓇᐃᔭᕐᑎᖏᑦ ᑐᒃᓯᕋᐅᓯᐅᓚᐅᕐᓯᒪᖕᒪᑕ ᐃᑲᔫᑎᒃᓴᖅᑖᕋᓱᒃᖢᑎᒃ ᐅᑭᐅᕐᑕᖅᑐᓕᕆᓂᕐᒧᑦ ᒥᓂᔅᑕᒧᑦ ᑖᓂᐅᓪ ᕚᓐᑐᓪ ᑎᑎᕋᕐᕕᐊᓄᑦ ᐅᒃᑑᐱᕆᐅᓚᐅᕐᓯᒪᔪᒥᒃ, ᐱᐊᓪ ᐅᖃᕐᑐᖅ.

ᑖᓐᓇᓕ ᐃᑲᔫᑎᑖᕋᓲᑎ ᐱᓕᕆᐊᕆᔭᐅᑲᐅᖅᑐᓚᐅᕐᓯᒪᔪᖅ, ᐅᓇ ᕚᓐᑐᓪ, ᑲᑎᒪᖃᑕᐅᓚᐅᕐᑐᖅ ᓴᖅᑭᔮᑲᐅᑎᒋᓐᓇᕐᑐᒃᑯᑦ ᐅᖃᓚᐅᕐᑐᖅ ᐱᓕᕆᕝᕕᐅᔪᖅ ᑖᔅᓱᒥᖓ “ᕿᓚᒥᕈᓗᒃ ᐱᓕᕆᐊᕆᔭᐅᑎᑦᑎᔪᓐᓇᓚᐅᕐᓯᒪᖕᒪᑕ.”

“ᐅᓇ ᓯᕗᓪᓕᐅᑎᑕᐅᔭᕆᐊᖃᓪᓚᕆᓚᐅᕐᒪᑦ,” ᕚᓐᑐᓪ ᐅᖃᕐᑐᖅ. “ᑕᐃᒪᓕ ᐃᓱᒪᔪᒍᑦ ᑖᓐᓇ ᐊᑯᓂᐊᓗᒃ ᐋᖅᑭᒃᓯᒪᔾᔪᑎᐅᓇᔭᕐᓂᖓᓂᒃ.”

ᐅᓇ ᑮᓇᐅᔭᖅ ᐅᕙᙶᖅᑐᖅ ᑲᓇᑕᒥ ᐱᕐᕈᓗᐊᕿᔾᔪᑎᓄᑦ ᐋᖅᑭᒋᐊᕈᑎᒃᓴᓄᑦ ᐃᑲᔫᑎᒃᓴᓂᒃ.

ᓄᓇᕗᒧᑦ ᒪᓕᒐᓕᕆᔨᕐᔪᐊᖓ ᓘᕆ ᐃᓪᓚᐅᖅ — ᐃᓚᒋᔭᐅᔪᖅ ᐊᓐᑏᐱᑯᓐᓄᑦ (NDP) — ᐃᓚᒋᔭᐅᓚᐅᕐᑐᖅ ᑐᓴᒐᒃᓴᓕᐅᖅᑐᓂᒃ. ᐅᑯᐊ ᐊᓐᑏᐲᑯᑦ ᐊᒻᒪ ᓕᐳᕈᒃᑯᑦ ᐊᖏᖃᑎᒌᓚᐅᕐᒪᑕ ᒫᔅᓯᒥ ᐅᑯᐊ ᓂᐅ ᑎᑯᒧᕌᑎᒃᑯᑦ ᐃᑲᔪᕐᓂᐊᕐᖢᑎᒃ ᓕᐳᕈᓪ ᒐᕙᒪᒃᑯᓐᓂᑦ 2025 ᑎᑭᒐᓱᖕᓂᖓᓂᒃ.

ᐃᓪᓚᐅᖅ ᒐᕙᒪᑐᖃᒃᑯᓐᓄᑦ ᑮᓇᐅᔭᓂᒃ ᐃᖃᓗᐃᑦ ᐃᒪᖃᖅᑎᑦᑎᓂᕐᒧᑦ ᓈᒻᒪᙱᓕᐅᕈᑎᖏᓐᓄᑦ ᐋᖅᑭᒋᐊᕈᑎᒃᓴᓂᒃ ᑕᐃᒪᙵᑦ ᓂᕈᐊᖅᑕᐅᑎᓪᓗᒍ ᐱᓕᕆᓕᓚᐅᕐᓯᒪᒐᒥ.

ᐅᖃᓪᓚᓚᐅᕐᑐᖅ ᐃᖃᓗᐃᑦ ᐱᓇᓱᖃᑦᑕᐃᓐᓇᕐᓯᒪᓂᖏᓐᓂᒃ ᐅᑭᐊᒃᓵᖅ ᐃᒪᕐᒧᑦ ᑐᐊᕕᕐᓇᖅᑐᓕᕆᑎᓪᓗᒋᑦ. ᐅᒃᑑᐱᕆ 12 ᐊᒻᒪ ᑎᓯᐱᕆ 10 ᐊᑯᓐᓂᖓᓂᒃ, ᐃᓄᐃᑦ ᐃᖃᓗᖕᓂ ᓄᓇᖃᕐᑐᖅ ᐃᒥᑲᑕᖁᔭᐅᓚᐅᕐᓯᒪᙱᒻᒪᑕ ᐃᖃᓗᐃᑦ ᐃᒪᖃᐅᑎᖓᒎᖓᔪᓂᒃ ᐅᕐᓱᐊᓗᖕᒧᑦ ᐱᐅᔪᓐᓃᓚᐅᕐᓯᒪᓂᖓᓄᑦ.

ᔭᓄᐊᕆᒥ ᑖᓐᓇ ᐅᕐᓱᐊᓗᒃᒧᑦ ᐃᖃᓗᐃᑦ ᐃᒪᖓ ᐱᐅᔪᓐᓃᒃᑲᓐᓂᕐᑎᓪᓗᒍ ᐅᓇ ᐃᓪᓚᐅᖅ ᑎᑎᕋᓚᐅᕐᓯᒪᖕᒪᑦ ᒐᕙᒪᑐᖃᒃᑯᑦ ᐱᖁᑎᒃᓴᓄᑦ ᐊᒻᒪ ᓄᓇᓕᖕᓄᑦ ᒥᓂᔅᑕᒧᑦ ᑖᒥᓂᒃ ᓚᐸᓛᖕᒃ $180 ᒥᓕᐊᓐ ᑖᓚᓂᒃ ᐱᔪᒪᓪᓗᓂ.

ᑐᕉᑑ ᑕᐃᒃᑯᓂᖓ “ᐱᓇᓱᒻᒪᕆᓚᐅᕐᑐᓂᒃ” ᐅᒃᑑᐱᕆᒥ ᐃᒪᕐᒧᑦ ᑐᐊᕕᕐᓇᖅᑐᓕᕆᔪᓂᒃ ᐃᖅᑲᐅᒪᔾᔪᑎᖃᓚᐅᕐᑐᑦ ᐃᖃᓗᐃᑦ ᐃᒪᖓ ᐅᕐᓱᐊᓗᒃᒧᑦ ᐱᐅᔪᓐᓃᖅᑎᓪᓗᒍ ᐊᒻᒪᓗ ᖁᔭᒋᓪᓗᓂᒋᑦ ᐃᓄᖏᑦ ᐱᓕᕆᖃᑎᒌᑲᑕᓚᐅᕐᓂᖏᓐᓂᒃ ᐊᒻᒪᓗ ᐊᔪᕈᑎᖃᓗᐊᕐᑐᓄᑦ ᐃᒪᖃᖅᑎᑦᑎᕙᒃᖢᑎᒃ.

“ᐃᓕᔅᓯᓐᓂᒃ ᐃᑲᔪᖃᑦᑕᐅᑎᑦᑎᐊᓚᐅᕋᔅᓯ,” ᑐᕉᑑ ᐅᖃᕐᑐᖅ.

ᒐᕙᒪᑐᖃᒃᑯᑦ ᐃᑲᔪᓚᐅᕐᒥᔪᑦ ᐱᓕᕆᔨᓂᒃ ᓄᓇᓕᖕᓄᑦ ᓈᒻᒪᙱᓕᐅᕈᑎᖃᖅᑎᓪᓗᒋᑦ ᐅᑭᐊᒃᓵᖅ ᐅᑯᓂᖓ ᑲᓇᑕᒥ ᐅᓇᑕᕐᑐᒃᓴᓂ ᑎᑭᑎᑦᑎᓪᓗᑎᒃ ᐃᒪᖃᖅᑎᑦᑎᔭᖅᑐᖅᖢᑎᒃ ᐃᖃᓗᐃᑦ ᑰᖓᓂᒃ ᐊᒻᒪᓗ ᓄᓇᓕᖕᓄᐊᖅᑎᑕᐅᕙᓪᓕᐊᓪᓗᓂ.

ᑐᕉᑑ ᐅᖃᐅᓯᖃᓚᐅᕐᑐᖅ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐊᒃᑐᐃᔾᔪᑎᑦ — ᐃᓚᖃᖅᖢᓂ ᓄᓇᐅᑉ ᐊᑖᓂ ᐊᐅᔪᐃᑦᑐᖅ ᐊᒻᒪᓗ ᑐᐊᐸᐅᑉ ᐱᐅᔪᓐᓃᖅᐸᓪᓕᐊᓂᖓᓂᒃ — ᐊᒃᑐᐃᓂᖃᓗᐊᕐᒪᑕ ᓄᓇᓕᖕᓄᑦ ᓴᓇᔭᐅᓯᒪᔪᓂᒃ.

ᐊᕿᐊᕈᖅ ᑕᒪᑐᒥᖓ ᐊᖏᓚᐅᕐᑐᖅ, ᐅᖃᖅᖢᓂ ᐃᑲᔫᑎ ᐱᐅᓯᕚᓪᓕᖅᑎᑦᑎᔾᔪᑎᐅᓂᐊᕐᓂᖓᓂᒃ ᓯᓚᒧᑦ ᐊᓯᙳᖅᐸᓪᓕᐊᓂᕐᒧᑦ ᐊᒃᑐᖅᑕᐅᓯᒪᔪᓂᒃ ᐊᒻᒪᓗ ᓄᓇᓕᐸᐅᔭᓂᒃ ᐱᕈᖅᐹᓪᓕᕈᑎᐅᓗᓂ.

ᐅᖃᓚᐅᕐᑐᖅ ᖁᔭᓕᓂᕋᖅᖢᓂ ᒐᕙᒪᑐᖃᒃᑯᑦ ᐃᑲᔪᕐᓂᐊᓕᕐᓂᖏᓐᓂᒃ ᐱᐅᓂᕐᓴᓂᒃ ᐱᖁᑎᑖᕈᑎᐅᓂᐊᕐᑐᓂᒃ ᐃᒪᓕᕆᓂᕐᒧᑦ.

“ᐊᑐᐃᓐᓇᖃᕐᓂᖅ ᓴᓗᒪᔪᒥᒃ, ᖃᓄᐃᙱᑦᑎᐊᕐᑐᒥᒃ ᐃᒪᖃᕆᐊᖃᕐᒪᑕ ᓄᓇᖃᕐᑐᑦ ᓇᓂᑐᐃᓐᓇᖅ. ᓄᓇᕗᒻᒥᐅᑦ ᐊᒃᓱᕈᖃᑦᑕᕐᓯᒪᖕᒪᑕ ᑕᒪᑐᒥᖓ ᐱᔪᓐᓇᐅᑎᖓᓂᒃ ᐊᑯᓂᐅᓗᐊᖅᑐᐊᓗᒃ,” ᐊᕿᐊᕈᖅ ᐅᖃᕐᑐᖅ.

Share This Story

(0) Comments

Join the Conversation

Your email address will not be published. Required fields are marked *

*