ᐋᓐᑎᐅᕆᐅ ᓄᖅᑲᖅᑎᑦᑎᕚᓪᓕᖅᑎᑦᑎᓯᒪᓂᐊᖅᑐᖅ ᐱᓚᒃᑕᐅᔭᕆᐊᓕᖕᓂᒃ ᐃᓄᖕᓂ ᐊᒃᑐᐃᒍᑎᐅᓗᐊᖁᓇᒍ ᓄᓇᕗᒧᑦ
ᐱᓕᕆᔾᔪᓯᐅᔪᑦ ᐳᕌᕕᓐᓯᐅᑉ ᐋᓐᓂᐊᕕᖏᓐᓂᒃ ᐊᑦᑎᒃᓯᕚᓪᓕᖅᓯᒪᔪᑦ 30 ᐳᓴᓐᑎᒥᑦ ᐃᓄᒋᐊᖕᓂᕆᕙᒃᑕᖓᓂᒃ
ᐋᑐᕚᒥᑦ ᐱᓚᒃᑕᐅᔭᕆᐊᖃᖅᑐᑦ ᐋᖅᑭᒃᑕᐅᓯᒪᔪᑦ ᓄᓇᕗᒻᒥᐅᓄᑦ ᓄᖅᑲᖅᑎᑕᐅᓯᒪᙱᑦᑐᑦ ᐳᕌᕕᓐᓯᐅᔪᖅ ᖃᖓᑦᑎᐊᓵᖅ ᐱᓚᒃᑕᐅᔭᕆᐊᓕᖕᓂᒃ ᓄᖅᑲᖅᑎᑦᑎᔾᔪᒥᖁᔨᓚᐅᖅᑎᓪᓗᒋᑦ. ᐃᖃᓗᐃᑦ ᐋᓐᓂᐊᕕᐊᓗᖓ, ᐅᓇ, ᒫᓐᓇ ᑐᐊᕕᕐᓇᖅᑐᓂᒃ ᐱᓚᑐᐃᓂᖅᒥᒃ ᐃᓕᕆᐊᖃᖅᑐᑦ. (ᐊᔾᔨᙳᐊᖁᑎᒋᔭᐅᔪᖅ)
For an English version of this story, see Ontario plan to ramp down elective surgeries expected to have minimal impact on Nunavut
ᐋᓐᓂᐅᕆᒥᑦ ᓄᖅᑲᖅᑎᑕᐅᕚᓪᓕᖅᑎᑕᐅᓂᖏᑦ ᑐᐊᕕᕐᓇᙱᑦᑐᑦ ᐱᓚᒃᑕᐅᔭᕆᐊᖃᕈᑎᐅᔪᑦ ᐊᒃᑐᐃᒍᑎᖃᖅᑐᖅ ᑲᒪᒋᔭᐅᔭᕆᐊᓕᖕᓂᑦ ᕿᑭᖅᑖᓗᒃᒦᑦᑐᓂᒃ, ᑭᓯᐊᓂᓕ ᓄᓇᕗᒥᑦ ᒐᕙᒪᒃᑯᑦ ᓱᓕ ᑕᐃᒪᐃᙱᓐᓂᕋᐃᔪᑦ.
ᐋᓐᑎᐅᕆᐅᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑦ ᒪᓕᒃᑕᐅᖁᔭᖏᓐᓂᒃ ᑐᓂᓯᓚᐅᖅᒪᑕ ᐱᓇᓱᐊᕈᓯᐅᓚᐅᖅᑐᒥᓐ ᓄᖅᑲᖅᑎᑦᑎᕚᓪᓕᖁᔨᓪᓗᑎᒃ ᐱᓚᒃᑕᐅᔪᒪᑐᐃᓐᓇᖅᑐᓂᒃ ᐊᒻᒪ ᐊᓯᖏᓐᓂᒃ ᑐᐊᕕᕐᓇᙱᑦᑐᓂᒃ ᐱᔨᑦᑎᕋᐅᑎᓂᒃ.
ᐃᓱᒪᒋᔭᐅᖕᒪᑦ ᐅᓇ ᐅᓄᕈᓐᓃᖅᐹᓪᓕᖅᑎᑦᑎᓂᖅ ᐃᑲᔪᕈᑎᐅᔪᒪᓪᓗᓂ ᐋᓐᑎᐅᕆᐅᒥᑦ ᐋᓐᓂᐊᕕᐊᓗᖕᓂ ᐃᓂᖃᖅᑎᑦᑎᔪᓐᓇᕐᓂᖅᒥᒃ ᐅᓄᖅᓯᕙᓪᓕᐊᔪᓂᒃ ᖃᐅᑕᒫᑦ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖅᑖᖅᐸᓪᓕᐊᔪᑦ ᐃᓚᒋᔭᐅᔪᒥᒃ ᐱᖓᔪᒋᔭᖓᓂᒃ ᐱᒋᐊᓪᓚᒃᓯᒪᓂᖓᓄᑦ.
“ᓄᕙᒡᔪᐊᕐᓇᖅ-19-ᒥ ᐋᓐᓂᐊᖃᖅᑐᑦ ᐅᓄᖅᓯᕙᓪᓕᐊᑎᓪᓗᒋᑦ ᓄᓇᓕᑦᑎᓐᓂᒃ, ᐋᑐᕚᑉ ᒥᒃᓵᓃᑦᑐᑦ ᐃᓐᓇᕐᓄᑦ ᐋᓐᓂᐊᕕᐊᓗᐃᑦ ᐱᓕᕆᐊᖃᕋᓱᓯᕗᑦ ᖃᓄᐃᓗᐊᖅᑐᓂᒃ ᐊᒻᒪ ᐃᖅᑲᓇᐃᔭᖅᑎᖃᒃᑲᓐᓂᕐᓂᖅᒧᑦ ᐃᓂᖃᖅᑎᑦᑎᒃᑲᓐᓂᕋᓱᖕᓂᕐᒥᒃ,” ᐅᖃᖅᓯᒪᓚᐅᖅᑐᖅ ᐄᐳᕈᓪ 9-ᒥᑦ ᑐᓴᒐᒃᓴᓕᐊᕆᔭᐅᓯᒪᔪᖅ ᐋᑐᕚᑉ ᒥᒃᓵᓂᑦ ᐋᓐᓂᐊᕕᐊᓗᖕᓄᑦ.
“ᒪᓕᒃᖢᑎᒃ ᑐᑭᒧᐊᕈᑎᒋᔭᐅᔪᓂᒃ ᐋᓐᑎᐅᕆᐅᒥᑦ ᐋᓐᓂᐊᖃᕐᓇᙱᑦᑐᓕᕆᔨᓂᒃ, ᐃᓐᓇᕐᓄᑦ ᐋᓐᓂᐊᕕᐊᓗᐃᑦ ᐋᑐᕚᑉ ᒥᒃᓵᓃᑦᑐᑦ ᐋᖅᑭᒃᓯᓯᒪᓂᐊᓕᕐᒪᑕ ᑐᐊᕕᕐᓇᙱᑦᑐᓂᒃ ᐱᓚᒃᑐᐃᑲᑕᔾᔮᙱᓐᓂᖏᓐᓂᒃ ᐊᒻᒪ ᐱᔨᑦᑎᕋᐅᑎᓂᒃ.”
ᐋᓐᑎᐅᕆᐅᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓇᓗᓇᐃᓚᐅᖅᒪᑕ ᓄᓇᕗᒥᑦ ᒐᕙᒪᒃᑯᓐᓄᑦ ᒪᑯᐊ ᐱᓚᒃᑐᐃᓂᐅᔪᑦ ᐊᒻᒪ ᖃᐅᔨᓴᖅᑕᐅᔾᔪᑎᐅᕙᒃᑐ ᐱᓕᕆᐊᖑᓂᐊᖅᑐᑦ ᐅᓄᕈᓐᓃᖅᐹᓪᓕᖅᑎᑕᐅᓂᖏᓐᓂᒃ 30 ᐳᓴᓐᑎᓪᓗᐊᒥᒃ ᐳᕌᕕᓐᓂᓯᐅᑉ ᐱᓕᕆᐊᒃᓴᕆᕙᒃᑕᖏᓐᓂᒃ.
ᑭᓯᐊᓂᓕ ᒫᓐᓇᐅᔪᖅ, ᓄᓇᕗᒻᒥᐅᓄᑦ ᐱᓚᒃᑕᐅᓂᐅᓂᐊᖅᑐᑦ ᓄᖅᑲᖅᑎᑕᐅᓚᐅᙱᑦᑐᑦ, ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᓚᐅᖅᑐᑦ ᐄᕈᐳᓪ 14-ᒥᑦ.
“ᐅᑯᐊ ᑐᑭᒧᐊᕈᑎᐅᔪᑦ ᐊᒃᑐᐃᒍᑎᖃᖅᑐᑦ ᐱᓚᒃᑕᐅᔪᒪᔪᓄᑦ ᐅᕝᕙᓘᓐᓃᑦ ᐱᓚᒃᑕᐅᔭᕆᐊᖃᕆᔭᐅᔪᓄᑦ. ᑐᐊᕕᕐᓇᖅᑐᒃᑯᑦ ᐱᔨᑦᑎᕋᐅᑏᑦ ᑲᔪᓯᓂᐊᖅᑐᑦ,” ᐅᖃᖅᑐᖅ ᓘᒃᑖᖅ ᕗᕌᓐᓱᐊ ᑎ ᕗᐊᑦ, ᓄᓇᕗᒧᑦ ᐃᖅᑲᓇᐃᔭᖅᑎᓄᑦ ᐊᖓᔪᖅᑳᖅ ᑎᑎᕋᓚᐅᖅᑐᖅ ᖃᕋᓴᐅᔭᒃᑯᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.
“ᐃᖃᓗᖕᓂ ᐱᓚᒃᑐᐃᕕᒃᑕᖃᕐᓂᖓᓄᑦ ᑕᒪᓐᓇ ᐊᒃᑐᐃᓂᖃᓗᐊᔾᔮᙱᑦᑐᖅ ᐱᓚᒃᑕᐅᔭᕆᐊᖃᖅᐸᒃᑐᓄᑦ.”
ᑎ ᕗᐊᑦ ᐅᖃᓚᐅᖅᑐᖅ ᐱᓕᕆᕝᕕᐅᔪᖅ ᖃᐅᔨᑎᑦᑎᓇᔭᕐᓂᖓᓂᒃ ᑲᒪᒋᔭᐅᔭᕆᐊᓕᖕᓂᒃ ᓄᖅᑲᖅᑎᑕᐅᒍᑎᑦ ᐅᕝᕙᓘᓐᓃᑦ ᐊᓯᐊᒍᖔᖅ ᐱᓕᕆᐊᖑᓂᐊᕈᑎᒃ.
ᐋᓐᓂᐊᕕᓕᐊᖅᑐᑦ ᐱᓚᒃᑕᐅᔭᖅᑐᖅᖢᑎᒃ ᐋᑐᕚᒧᑦ ᓱᓕ ᐃᓂᓕᐅᖅᑕᐅᓯᒪᔪᑦ ᐃᖃᓗᖕᓂᑦ ᐱᓕᕆᐊᖑᔪᓐᓇᙱᑦᑐᓄᑦ.
ᕿᑭᖅᑖᓗᒃᒥᐅᑕᑦ ᐋᓐᓂᐊᖅᑐᑦ ᐃᓂᒃᓴᓕᐅᖅᑕᐅᖃᑦᑕᕐᒪᑕ ᐋᑐᕚᒥᑦ ᐋᓐᓂᐊᕕᐊᓗᖕᓄᑦ ᐱᓚᒃᑕᐅᔭᕆᐊᖃᕌᖓᑕ ᒪᑯᓄᖓᓪᓗᐊᑕᖅ ᓰᖅᑯᖏᓐᓄᑦ ᐅᕝᕙᓘᓐᓃᑦ hip replacements-ᓄᑦ, ᐃᓚᑎᓐᓄᑦ ᑳᓐᓱᒧᑦ ᐋᓐᓂᐊᕆᔭᐅᔪᓄᑦ ᐱᓚᒃᑕᐅᓃᑦ, ᐅᕕᓂᙳᐊᓕᖅᑕᐅᓂᖅᒧᑦ, ᐊᓯᐊᓂᒃ ᐃᓕᔅᓯᕝᕕᐅᓂᖅ ᑎᒥᒃᑯᑦ, ᐊᒻᒪᓗ ᑕᖅᑐᓄᑦ ᐊᒻᒪ ᑎᖑᖕᓄᑦ ᐱᓚᒃᑕᐅᔭᕆᐊᖃᖅᑐᓂᒃ.
ᐃᖃᓗᐃᑦ ᕿᑭᖅᑕᓂ ᐋᓐᓂᐊᕕᐊᓗᖓᑦ ᑕᒪᐃᓐᓂᒃ ᐱᓚᒃᑐᐃᓂᖅᒧᑦ ᐱᔨᑦᑎᕋᐅᑎᖃᖅᑐᑦ, ᐃᓚᖃᖅᖢᓂ ᓴᖓᓕᕆᓂᖅᒧᑦ, ᖄᕈᔾᔨᓕᕆᔪᓄᑦ (appendicitis) ᐊᒻᒪᓗ ᐃᕐᕋᕕᒃᑯᑦ ᐱᓚᒃᑕᐅᔭᕆᐊᓕᖕᓂᒃ, ᑭᓯᐊᓂᓕ ᐃᓚᖏᑦ ᐅᓗᕆᐊᓇᓗᐊᖅᑐᒦᑦᑐᑦ ᐋᑐᕚᒧᑦ ᐱᓕᕆᐊᕆᔭᐅᑎᑕᐅᕙᒃᑐᑦ.
ᐋᓐᓂᐊᕕᐊᓗᒃ ᒪᑐᐃᖓᔪᖅ ᑐᐊᕕᕐᓇᖅᑐᓄᑦ ᑭᓯᐊᓂ ᐱᒋᐊᖅᖢᓂ ᐄᐳᕈᓪ 15, ᓄᓇᕗᒥᑦ ᒐᕙᒪᒃᑯᑦ ᑐᓴᖅᑎᑦᑎᓚᐅᖅᑐᑦ, ᑐᓴᖅᑎᑕᐅᓚᐅᖅᑎᓪᓗᒋᑦ ᓯᕗᓪᓕᖅᐹᒥᒃ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᒥᓐ ᐃᖃᓗᖕᓂᑦ.
ᐋᓐᓂᐊᖃᕐᓇᙱᑦᑐᓕᕆᔨᐅᔪᑦ ᓇᓗᓇᐃᓚᐅᙱᑦᑐᑦ ᖃᓄᖅ ᑕᒪᓐᓇ ᐊᒃᑐᐃᓇᔭᕆᐊᒃᓴᖓᓂᒃ ᐋᓐᓂᐊᖅᕕᓕᐊᕆᐊᖃᖅᑐᓄᑦ.
(0) Comments