ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒥᓂᔅᑕ ᐅᓗᕆᐊᖅᓵᕆᓕᖅᑐᖅ ᑕᒪᒃᑯᐊ ᐋᓐᓂᐊᖅᕕᓕᐊᕐᓂᕐᒧᑦ ᐊᑐᖅᑕᐅᕙᓪᓕᐊᔪᓄᑦ ᐊᑭᓕᐅᑎᒃᓴᑦ ᐋᑐᕚᒧᑦ ᑐᕌᖓᑎᑦᑐᒪᓕᖅᖢᓂᒋᑦ

ᖁᐊᓴ ᑯᓱᒐᖅ ᐅᖃᓚᐅᕐᑐᖅ ᒐᕙᒪᑐᖃᒃᑯᑦ ᐅᖃᓪᓚᖃᑎᖃᕈᒪᙱᓐᓂᕋᖅᖢᓂᒋᑦ ᐆᒥᖓ ᓇᐅᑦᑎᐅᒃᑯᒫᖃᖏᑦᑐᓄᑦ ᐋᓐᓂᐊᕐᕕᒃᒥᑦ ᐃᑲᔪᖅᑕᐅᔾᔪᑎᓕᕆᓂᕐᒥᒃ

ᓄᓇᕗᒥ ᒫᓐᓇ ᓇᐅᑦᑎᐅᒃᑯᒫᖃᖏᑦᑐᓄᑦ ᐋᓐᓂᐊᕐᕕᒃᒥᑦ ᐃᑲᔪᖅᑕᐅᔾᔪᑎᓕᕆᓂᕐᒧᑦ ᐱᓕᕆᐊᒃᓴᓄᑦ ᐊᖏᕈᑎ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᓱᓕᓐᓂᐊᓕᕐᒪᓐ ᐄᐳᕈᓪ 1-ᒥᑦ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᐅᖃᓚᐅᕐᑐᖅ ᑐᒃᓯᕋᐅᑎᒋᔭᐅᔪᑦ ᓄᑖᒥ ᐊᖏᕈᑎᒃᓴᒧᑦ ᓱᓕ ᓂᓪᓕᕈᑎᐅᓚᐅᙱᒻᒪᑕ. (ᐊᔾᔨᙳᐊᖁᑎᒋᔭᐅᔪᖅ)

By ᑕᔅᑎᓐ ᐸᑖᕐ

For an English version of this story, see Nunavut health minister threatens to forward medical travel bills to Ottawa over lack of negotiations

ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᐅᓗᕆᐊᖅᓵᕆᓕᖅᑐᖅ ᐋᓐᓂᐊᖅᕕᓕᐊᕐᓂᕐᒧᑦ ᐊᑐᖅᑕᐅᕙᓪᓕᐊᔪᓄᑦ ᐊᑭᓕᐅᑎᒃᓴᑦ ᐊᑐᖅᑕᐅᕙᓪᓕᐊᔪᓄᑦ ᓄᓇᕗᒥᐅᑕᓄᑦ ᐃᓄᖕᓄᑦ ᐅᑯᓄᖓ ᒐᕙᒪᑐᖃᒃᑯᓐᓄᑦ ᑐᓂᔪᒪᓪᓗᓂᒋᑦ ᓄᑖᒥᑦ ᓇᐅᑦᑎᐅᒃᑯᒫᖃᖏᑦᑐᓄᑦ ᐋᓐᓂᐊᕐᕕᒃᒥᑦ ᐃᑲᔪᖅᑕᐅᔾᔪᑎᓕᕆᓂᕐᒧᑦ ᐱᓕᕆᐊᒥ ᐊᖏᕈᑎᑕᖃᙲᓐᓇᖅᐸᑦ ᐄᐳᕈ 1 ᑎᑭᑉᐸᑦ.

ᑖᓐᓇᓕ ᒫᓐᓇ ᐊᖏᕈᑎᐅᔪᖅ, ᐊᖏᖃᑎᒌᒍᑎᐅᓚᐅᕐᓯᒪᔪᖅ ᒐᕙᒪᑐᖃᒃᑯᓐᓂ ᐊᕐᕌᓂ, ᐃᓱᓕᓐᓂᐊᓕᕐᒪᑦ.

ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒥᓂᔅᑕ ᖁᐊᓴ ᑯᓱᒐᖅ ᐅᖃᖅᑐᖅ ᑐᒃᓯᕋᕈᑎᖏᑦ ᐅᖃᓪᓚᖃᑎᖃᕈᒪᓂᕐᒥᒃ ᒐᕙᒪᑐᖃᒃᑯᓐᓂ ᓱᓕ “ᓂᐱᖃᙱᔾᔪᑎᐅᕗ.”

“ᑲᓇᑕᐅᑉ ᑕᒪᑐᒥᖓ ᓱᖅᑯᑎᒃᓴᙱᓐᓂᖓ ᓴᖅᑭᑎᑦᑎᓯᒪᕗᖅ ᐃᓱᒪᒋᔭᖃᙱᓐᓂᖏᓐᓂᒃ ᓄᓇᕗᑦ ᐃᓄᖏᓐᓂᒃ ᐊᒻᒪᓗ ᐅᓗᕆᐊᓇᕐᓂᖓᓂᒃ ᐊᑯᓂᐊᓗᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓄᓇᕗᒥᑦ,” ᐅᖃᖅᑐᖅ ᑯᓱᒐᒃ ᒪᓕᒐᓕᕆᕕᒡᔪᐊᒥᑦ ᒫᔅᓯ 16-ᖑᑎᓪᓗᒍ.

“ᒐᕙᒪᑐᖃᒃᑯᑦ ᐊᓕᖅᓯᑦᑎᐊᒃᑲᓐᓂᕆᐊᖃᓕᕐᒪᑕ ᐊᒻᒪᓗ ᐊᑭᓕᕐᓱᐃᕙᓪᓕᐊᓕᕐᓗᑎᒃ ᑲᒪᒋᔭᖏᓐᓄᑦ.”

ᐅᓇ ᓇᐅᑦᑎᐅᒃᑯᒫᖃᖏᑦᑐᓄᑦ ᐋᓐᓂᐊᕐᕕᒃᒥᑦ ᐃᑲᔪᖅᑕᐅᔾᔪᑎᓕᕆᓂᕐᒧᑦ ᐱᓕᕆᐊᒃᓴ, ᐊᐅᓚᑕᐅᔪᖅ ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᓕᕆᔨᓄᑦ ᑲᓇᑕᒥ, ᓄᓇᖃᖅᑳᖅᑐᓂᒃ ᐃᓚᐅᓪᓗᑎᒃ ᓄᓇᕗᒥᑦ ᐃᓄᐃᑦ, ᓇᐅᑦᑎᐅᒃᑯᒫᖃᖅᑎᑦᑎᓪᓗᑎᒃ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᐅᑯᑎᒎᓇᖅ ᓇᐅᑦᑎᐅᒃᑯᒫᖃᙱᑦᑐᓂᒃ ᐃᓄᓕᕆᔨᒃᑯᑎᒍᑦ, ᐃᒻᒥᒃᑰᖅᑐᓂᒃ ᓇᐅᑦᑎᐅᒃᑯᒫᓕᕆᔨᓂᒃ ᐅᕝᕙᓘᓐᓃᑦ ᐳᕌᕕᓐᓯᑎᒍᑦ ᑎᐅᕆᑑᑎᒍᓪᓗ ᐊᓐᓂᐊᖃᕐᓇᙱᑦᑐᓕᕆᓂᕐᒧᑦ ᓇᐅᑦᑎᐅᒃᑯᒫᖃᙱᑦᑐᓄᑦ.

ᓇᐅᑦᑎᐅᒃᑯᒫᖃᖏᑦᑐᓄᑦ ᐋᓐᓂᐊᕐᕕᒃᒥᑦ ᐃᑲᔪᖅᑕᐅᔾᔪᑎᓕᕆᓂᕐᒧᑦ ᐱᓕᕆᐊᒃᓴᒃᑯᑦ ᐃᑲᔫᓯᐊᖅᑖᕈᑎᖃᕐᑐᑦ ᒪᑯᓄᖓ ᐃᓅᓕᓴᐅᑎᑖᕆᔭᐅᔭᕆᐊᓕᖕᓄᑦ, ᑭᒍᑎᓕᕆᔭᐅᓂᕐᒧᑦ, ᐃᔨᓕᕆᔭᐅᓂᕐᒧᑦ ᐊᒻᒪᓗ ᐋᓐᓂᐊᕐᓂᕐᒧᑦ ᐊᐅᓪᓚᕈᑎᓄᑦ.

ᐅᑭᐊᒃᓵᖑᓚᐅᕐᑐᕐᓕ ᒐᕙᒪᑐᖃᒃᑯᑦ ᐊᖏᒡᓕᒋᐊᖅᑎᑦᑎᓚᐅᕐᓯᒪᔪᑦ ᐊᑭᓕᐅᑎᒋᕙᒃᑕᖏᓐᓂᒃ ᐋᓐᓂᐊᕐᓂᕐᒧᑦ ᐊᐅᓚᕈᑎᓄᑦ ᐊᒻᒪ ᑐᐊᕕᕐᓇᖅᑐᓂᒃ ᐋᓐᓂᐊᖅᑐᓂᒃ ᖃᖓᑕᑎᑦᑎᕙᖕᓂᕐᒧᑦ ᓄᓇᕗᒥᐅᑕᓂᒃ ᐅᕘᓇ ᓇᐅᑦᑎᐅᒃᑯᒫᖃᖏᑦᑐᓄᑦ ᐋᓐᓂᐊᕐᕕᒃᒥᑦ ᐃᑲᔪᖅᑕᐅᔾᔪᑎᓕᕆᓂᕐᒧᑦ ᐱᓕᕆᐊᒃᓴᑎᒍᑦ ᓄᓇᕗᒥᑦ ᒫᙵᑦ $125-ᓂᒃ ᐊᑕᐅᓯᕐᒧᑦ ᖃᖓᑕᓂᕐᒧᑦ ᒪᐅᖓ $715-ᓄᑦ ᐊᑕᐅᓯᕐᒧᑦ ᖃᖓᑕᓂᕐᒧᑦ.

ᐅᓇ ᐊᖏᒡᓕᒋᐊᖅᑎᑦᑎᓂᖅ ᐱᒋᐊᕐᕈᑎᖃᖅᑎᑕᐅᓚᐅᕐᓯᒪᔪᖅ ᐄᐳᕈᓪ 1, 2020-ᒥᑦ ᒫᔅᓯ 31 ᑎᑭᓪᓗᒍ, ᓄᑖᒥ ᐊᖏᕈᑎᒥ ᐊᑐᖅᑐᖃᓕᕈᓂ.

“ᓂᕆᐅᓚᐅᕋᑦᑕ ᐊᒻᒪ ᓂᕆᐅᒃᖢᑕ ᐅᑯᐊ ᒐᕙᒪᑐᖃᒃᑯᑦ 100 ᐳᓴᓐᑎᖓᓂᒃ ᐊᑭᓖᖃᑦᑕᓕᕐᓗᑎᒃ ᐋᓐᓂᐊᕐᓂᖅᒧᑦ ᖃᖓᑕᒍᑎᓂᒃ ᐃᓄᖕᓄᑦ ᖃᖓᓕᒫᒃᑯᑦ,” ᐅᖃᖅᑐᖅ ᑯᓱᒐᖅ.

ᐅᓇ ᓂᕆᐅᒋᔭᐅᓂᐅᔪᖅ ᓴᖅᑭᔮᖅᑎᑕᐅᓯᒪᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ 2021/22-ᒧᑦ ᐊᐅᓚᑦᑎᔾᔪᑎᒃᓴᖏᑦᑎᒍᑦ, ᑕᒪᓐᓇᓗ ᐋᖅᑭᒃᑕᐅᓯᒪᓪᓗᓂ ᒫᓂ $20 ᒥᓕᐊᓐᑖᓚᓂ ᐊᐅᓚᑦᑎᔾᔪᑎᒃᓴᖅᑖᕋᔭᕆᐊᒃᓴᒥᖏᓐᓂᒃ ᐃᑲᔫᑎᒃᓴᓂᒃ.

ᐊᑯᓂᐊᓗᒃ ᐱᓕᕆᐊᖑᖃᑦᑕᕐᓯᒪᔪᖅ ᐅᓇ ᓇᐅᑦᑎᐅᒃᑯᒫᖃᖏᑦᑐᓄᑦ ᐋᓐᓂᐊᕐᕕᒃᒥᑦ ᐃᑲᔪᖅᑕᐅᔾᔪᑎᓕᕆᓂᕐᒧᑦ ᐱᓕᕆᐊᒃᓴ ᐊᑐᖃᑦᑕᕐᓂᖏᓐᓂᒃ ᐃᓄᒋᐊᓂᒃᑰᖓᓪᓗᓂ ᐃᑲᔫᑎᒃᓴᓕᕆᓂᒃᑯᑦ ᐊᒻᒪᓗ ᐃᓱᒪᕙᙱᖢᑎᒃ ᐊᑭᑐᑎᒋᓂᖓᓂ ᖃᖓᑦᑕᐅᑎᐅᔪᑦ ᐊᒻᒪᓗ ᐋᓐᓂᐊᕐᓂᕐᒧᑦ ᑲᒪᒋᔭᐅᓂᖅ ᓄᓇᕗᒥᑦ. ᑕᐃᒪᐃᓐᓂᖓᓄᑦ ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᑕᒪᒃᑯᓂᖓ ᐊᑭᓕᕐᓱᐃᔭᕆᐊᖃᓕᖃᑦᑕᖅᑐᑦ ᖄᖏᐅᑎᒍᑎᐅᔪᓂᒃ.

ᐊᐱᕆᔭᐅᒐᒥ ᐊᐱᕐᓱᕐᓇᐅᑎᓪᓗᒍ ᖃᓄᖅ ᐊᐅᓚᑦᑎᔾᔪᑎᒃᓴᖅ ᐊᒃᑐᖅᑕᐅᓇᔭᕐᓂᖓᓂᒃ ᑕᒪᒃᑯᐊ ᓈᒻᒪᙱᓕᐅᕈᑎᐅᔪᑦ ᐋᖅᑭᒃᑕᐅᓚᐅᙱᑉᐸᑕ ᐅᓇ ᑎᑭᓪᓗᓂ ᒫᔅᓯ 31, ᑯᓱᒐᖅ ᐅᖃᓗᐊᕈᓐᓇᓚᐅᙱᑦᑐᖅ.

“ᒫᓐᓇ ᐅᖃᕈᓐᓇᙱᑲᓚᐅᖅᑐᖓ ᖃᓄᑎᒋ ᑕᒪᓐᓇ ᐊᒃᑐᐃᓂᖃᕐᓂᐊᕆᐊᒃᓴᖓᓂᒃ,” ᐅᖃᖅᑐᖅ, ᑭᓯᐊᓂᓕ ᐅᖃᒃᑲᓐᓂᖅᖢᓂ ᐅᓪᓛᒃᑲᓐᓂᐅᕋᑖᖅᑐᖅ ᑎᑎᕋᖅᑲᐅᓂᕋᖅᖢᓂ ᒐᕙᒪᑐᖃᒃᑯᓐᓂ ᐱᓕᕆᖃᑎᒋᔭᖓᓄᑦ ᑕᒪᑐᒥᖓ.

ᑯᓱᒐᖅ ᓇᓗᓇᐃᕐᓯᒃᑲᓐᓂᓚᐅᕐᑐᖅ ᐱᓕᕆᕝᕕᖓ ᐱᓕᕆᐊᖃᕋᓱᒃᑎᓪᓗᒋᑦ ᐊᒻᒪᑦᑕᐅᖅ ᑮᓇᐅᔭᓕᕆᔨᒃᑯᑦ ᐊᒻᒪᓗ ᓯᕗᓕᐅᖅᑎᐅᑉ ᑎᑎᕋᕐᕕᖓ ᐱᓇᓱᒃᓯᒪᖕᒥᔪᑦ.

ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᓕᕆᔨᒃᑯᑦ ᑲᓇᑕᒥ ᑭᐅᓚᐅᙱᑦᑐᑦ ᐊᐱᖅᑯᑎᒋᔭᐅᔪᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ, ᒪᑐᒧᖓ ᐋᔩᖃᑎᒌᖕᓂᖅ ᖃᓄᐃᓕᖓᓕᕐᒪᖔᑦ ᐅᕝᕙᓘᓐᓃᑦ ᑭᖑᓪᓕᖅᐹᒥ ᐱᓕᕆᕝᕕᐅᔪᖅ ᓄᓇᕗᒥᑦ ᒐᕙᒪᒃᑯᓐᓂᑦ ᐅᖃᖃᑎᖃᕐᓯᒪᖕᒪᖔᑦ.

ᑭᓯᐊᓂᓕ ᑖᒃᑯᓄᖓ ᐱᓕᕆᕝᕕᐅᔪᓄᑦ ᐅᖃᕐᑎᒋᔭᐅᔪᖅ ᐅᖃᑐᐃᓐᓇᓚᐅᕐᑐᖅ ᑲᔪᓯᓂᖏᓐᓂᒃ “ᐱᓕᕆᖃᑎᒌᖕᓂᕐᒥᒃ” ᓄᓇᕗᑦ ᒐᕙᒪᒃᑯᓐᓂᑦ ᒪᑐᒥᖓ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓯᕗᓪᓕᐅᑎᑕᐅᔪᓂᒃ.

Share This Story

(0) Comments

Join the Conversation

Your email address will not be published. Required fields are marked *

*