ᐋᓐᓂᐊᖃᖅᑕᐃᓕᑎᑦᑎᓂᖅ ᐊᖏᓛᒥᑦ ᐃᑲᔫᑎᑖᕐᐳᖅ ᓄᓇᕗᑦ 2020/21-ᒧᑦ ᐊᐅᓚᔾᔪᑎᒃᓴᖏᓐᓂᒃ

“ᑐᕌᒐᕆᔭᐅᓗᐊᕐᑐᕐᓕ ᐊᐅᓚᔾᔪᑎᒃᓴᓕᕆᓂᐅᔪᖅ ᐅᑯᓄᖓ ᐃᓚᒌᓄᑦ ᐊᒻᒪ ᓄᓇᓕᖕᓄᑦ, ᑲᒪᒋᔭᖃᕐᓂᕐᒥᒃ ᓱᕈᓯᕐᓂᒃ ᐊᖏᕐᕋᕆᙱᑕᖏᓪᓕᒃ, ᐃᓂᒋᔭᐅᔪᓐᓇᖅᑐᒃᓴᓄᑦ ᐊᒻᒪᓗ ᐃᓚᒌᑦ ᐱᑦᑎᐊᖃᑦᑕᙱᓗᐊᕐᓂᖏᓐᓄᑦ, ᐊᒻᒪᓗ ᐊᔾᔨᒌᙱᑦᑐᓄᑦ ᖃᓄᐃᓕᐅᕈᑎᐅᓂᐊᖅᑐᓄᑦ ᕿᒥᕐᕈᐊᖅᑕᑦᑎᓐᓄᑦ,” ᐅᖃᖅᑐᖅ ᑮᓇᐅᔭᓕᕆᓂᕐᒧᑦ ᒥᓂᔅᑕ ᔪᐊᔾ ᕼᐃᒃᔅ ᐊᐅᓚᔾᔪᑎᒃᓴᓕᕆᓂᖅ ᒪᑐᔭᐅᑎᓪᓗᒍ ᑖᒃᑯᐊ ᓴᖅᑭᑕᐅᓚᐅᖅᑎᓐᓇᒋᑦ ᑎᑎᖃᑦ.

ᓄᓇᕗᑦ ᒐᕙᒪᒃᑯᑦ ᓂᕆᐅᒃᑐᑦ ᐊᑐᕐᓂᐊᕋᓱᒋᓪᓗᑎᒃ $2.35 ᐱᓕᐊᓐ ᑖᓚᓂ ᐊᕐᕌᒍᒥ ᐊᑐᕐᓂᐊᖅᑐᒥᓐ. ᑕᕝᕙᙵᓐ, ᐋᖅᑭᒃᓯᓯᒪᔪᑦ $37.9 ᒥᓕᐊᓐ ᑖᓚᓂ ᓄᑖᓂᒃ ᐃᑲᔫᑎᒃᓴᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ.

ᐊᖏᓂᖅᐹᖓᔪᕐᓕ ᐊᑕᐅᓯᖅ ᐃᑲᔫᑎᑖᕐᓂᒃᑯᑦ ᐅᓇ $17.6 ᒥᓕᐊᓐ ᑖᓚᓂ ᐊᖏᒡᓕᕚᓪᓕᕈᑎᖃᕐᓂᐅᔪᖅ ᐆᒧᖓ ᐋᓐᓂᐊᕐᕕᓕᐊᕐᓂᕐᒧᑦ ᐃᖏᕐᕋᔾᔪᑎᓕᕆᓂᖅ ᑖᓐᓇ ᐊᖏᒡᓗᓕᕚᓪᓕᖅᖢᓂ ᐊᐅᓪᓚᕆᐊᖃᕈᑎᓄᑦ

$90 ᒥᓕᐊᓐ ᑖᓚᓂ ᒪᐅᖓ $107.6 ᒥᓕᐊᓐ ᑖᓚᓄᑦ.

ᐱᓕᕆᔨᒻᒪᕆᐅᔪᑦ ᒪᑐᔭᐅᓂᖓᓂᒃ ᐅᖃᓚᐅᕐᑐᑦ ᐋᓐᓂᐊᕐᕕᓕᐊᕐᓂᕐᒧᑦ ᐃᖏᕐᕋᔾᔪᑎᓕᕆᓂᖅ ᐊᖏᒡᓕᕙᓪᓕᐊᕙᖕᓂᖓᓂᒃ 10 ᐳᓴᓐᑎᒥᒃ ᐊᕐᕌᒍᒥ, ᐊᑐᖅᑕᐅᕙᖕᓂᖓᒍᑦ. ᐊᕐᕌᓂ ᐋᓐᓂᐊᕐᕕᓕᐊᕐᓂᕐᒧᑦ ᐃᖏᕐᕋᔾᔪᑎᓕᕆᓂᕐᒧᑦ ᐊᐅᓚᑦᑎᔾᔪᑎᒃᓴᖅ ᒫᓃᓚᐅᕐᑐᖅ $90 ᒥᓕᐊᓐᑖᓚᓂᒃ, ᑭᓯᐊᓂᓕ ᐊᑐᓚᐅᕐᓯᒪᔪᒃ $100 ᒥᓕᐊᓐ ᑖᓚᐃᑦ ᐅᖓᑎᑦᑎᐊᖓᓂ.

“ᐅᓇ $17.6 ᒥᓕᐊᓐ ᑖᓚ ᑐᕌᖓᓗᐊᕐᑐᖅ ᐊᑐᖅᑕᐅᓂᕐᓴᐅᔭᕆᐊᖃᕐᓂᖓᓄᑦ,” ᐅᖃᖅᑐᖅ ᔭᕗᕆ ᓴᐅᓐ, ᑮᓇᐅᔭᓕᕆᓂᕐᒧᑦ ᐃᑲᔪᖅᑎ. “ᑐᕌᖓᑎᑕᐅᙱᒻᒪᑦ ᐊᓯᙳᖅᑎᑕᐅᔪᓄᑦ ᐱᓕᕆᐊᒃᓴᓄᑦ ᐊᑲᐅᓂᕐᓴᐅᔪᓐᓇᖅᑐᓂᒃ ᓈᒻᒪᖕᓂᕐᓴᐅᔪᓐᓇᖅᑐᓂᒡᓗ.”

ᑕᒪᓐᓇ ᐱᔭᐅᔭᕆᐊᖃᕐᐸᓪᓕᐊᖕᒪᓐ ᐅᓄᕐᓯᕙᓪᓕᐊᓂᖏᓐᓄᑦ, ᑭᓯᐊᓂᑦᑕᐅᖅ ᐊᓯᖏᓐᓅᕆᓪᓗᓂ: ᓄᓇᕗᒻᒥᐅᑕᑦ ᐃᓅᓯᖃᑯᑖᖕᓂᕐᓴᐅᓕᕐᒪᑕ ᐊᒻᒪᓗ ᖃᓄᐃᒍᑎᐅᓂᕐᒧᑦ ᖃᐅᔨᓴᕈᑎᐅᔪᑦ ᐱᐅᓯᕚᓪᓕᕐᓯᒪᓕᕐᖢᑎᒃ, ᑕᐃᒪᐃᓐᓂᖓᓄᓪᓗ ᐋᓐᓂᐊᕐᑐᖅ ᑲᒪᒋᔭᐅᓂᕐᓴᐅᔭᕆᐊᖃᖅᑐᑦ, ᐅᑯᑎᒎᓇᕐᓕ ᐱᓕᕆᔨᒻᒪᕆᐅᔪᑦ ᒪᑐᔭᐅᑎᓪᓗᒍ.

ᑖᒃᑯᐊᑦᑕᐃᓐᓇᖅ ᐱᓕᕆᔩᑦ ᐅᖃᓚᐅᕐᒥᔪᑦ ᐋᖅᑭᒃᓯᒪᑎᑦᑎᓂᖏᑦ ᐃᒪᓐᓇᐅᖃᑦᑕᕐᒪ ᒪᑯᓇᙵᑦ ᐊᑭᓕᐅᑎᒃᓴᓂᒃ ᐊᒻᒪ ᓄᓇᕗᒻᒥᐅᓂᒃ ᐊᐅᓪᓚᖅᑎᑦᑎᔪᓐᓇᕐᓂᖏᓐᓂᒃ ᑲᒪᒋᔭᐅᔭᕆᐊᖃᕐᓂᕐᒧᑦ, ᐅᓇ ᑕᐅᑐᒃᖢᒍ ᐱᔨᑦᑎᕋᐅᑎᖃᖅᐸᓪᓕᐊᓗᑎᒃ ᓄᓇᓕᖕᓃᖏᓐᓇᕈᓐᓇᕐᓂᕐᓴᐅᓂᐊᕐᒪᑕ ᑲᒪᒋᔭᐅᓗᑎᒃ.

ᐅᓄᕐᓯᕚᓪᓕᖅᑎᑦᑎᒐᓱᖕᓂᕐᒧᑦ ᐱᓕᕆᔾᔪᑎᒃᓴᓂᒃ ᓄᓇᕗᒥᑦ, $630,000 ᓴᓂᕐᕙᒃᑕᐅᔪᑦ ᐋᓐᓂᐊᓯᐅᖅᑎᑖᕈᑎᒃᓴᒃᑲᓐᓂᕐᒧᑦ, ᐊᔾᔨᓕᐅᕆᔨᒃᓴᒥ ᖃᕋᓴᐅᔭᓄᑦ (ultrasonographer), ᓴᓗᒻᒪᕐᓴᕐᕕᓕᕆᔨᒥᒃ ᐊᒻᒪᓗ “ᐋᓐᓂᐊᕕᖕᒥᓐ ᓱᕋᒃᓯᒪᔪᓕᕆᓂᕐᒧᑦ” ᐃᖃᓗᖕᓂᑦ.

$854,000 ᐃᓚᒋᐊᕈᑎᐅᖕᒥᔪᑦ ᐃᖅᑲᓇᐃᔭᖅᑎᑖᕈᑎᓄᑦ ᓄᑖᓂᒃ ᐳᕙᒡᓗᒃᑐᓕᕆᓂᕐᒧᑦ ᐱᓕᕆᔨᒃᓴᓂᒃ. ᐱᖓᓱᓂᒃ ᐋᓐᓂᐊᓯᐅᕐᑎᓂᒃ ᐃᖅᑲᓇᐃᔭᖅᑎᑖᕐᓂᐊᕐᑐᑦ ᖃᐅᓱᐃᑦᑐᒥ, ᖃᒪᓂᑦᑐᐊᕐᒥ ᐊᒻᒪ ᐃᒡᓗᓕᒑᕐᔪᖕᒥᓐ ᐊᒻᒪᓗ ᐱᖓᓱᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᑲᔪᖅᑐᒃᓴᓂᒃ ᐅᕙᓂ ᐃᒃᐱᐊᕐᔪᒃ, ᓴᓂᑭᓗᐊᖅ ᐊᒻᒪ ᑎᑭᕋᕐᔪᐊᕐᒥᓐ.

ᒪᐅᓇᒃᑲᓐᓂᖅ ᓄᓇᕗᑦ ᓯᓚᑖᓂ ᐱᔨᑦᑎᕋᐅᑎᑎᒍᑦ, $5.1 ᒥᓕᐊᓐ ᑖᓚᐃ ᐋᖅᑭᒃᑕᐅᓚᐅᕐᒥᔪᑦ ᐃᓱᒪᔪᓕᕆᓂᕐᒧᑦ ᓄᓇᕗᑦ ᓯᓚᑖᓂ ᒪᒥᓴᕐᕕᒃᓴᓄᑦ. ᐱᓕᕆᔨᒻᒪᕆᐅᔪᑦ ᐊᐅᓚᔾᔪᑎᒃᓴᓕᕆᓂᕐᒥ ᒪᑐᓯᓂᕐᒥ ᐅᖃᓚᐅᕐᑐᑦ ᑮᓇᐅᔭᐃᑦ ᐊᑐᖅᑕᐅᖃᑦᑕᕐᓂᖏᓐᓂᒃ ᐋᓐᓂᐊᖅᑐᓂᒃ ᐱᔨᑦᑎᕋᕈᓐᓇᖅᑐᓄᙵᐅᑎᑕᐅᕙᒃᖢᑎᒃ ᐋᓐᓂᐊᖅᑕᖏᓐᓄᑦ, ᐊᒻᒪᓗ ᑖᒃᑯᐊ ᓄᓇᕗᑦ ᓯᓚᑖᓃᖢᑎᒃ.

ᕼᐃᒃᔅ ᐅᖃᓚᐅᕐᑐᖅ ᖃᓄᖅ ᐋᓐᓂᐊᖃᖅᑕᐃᓕᓂᕐᒥ ᐱᓕᕆᐊᖃᑦᑎᐊᕐᓂᖅ ᓄᓇᕗᒥᑦ ᐊᒃᓱᕈᕐᓇᐃᓐᓇᐅᔭᕐᓂᖓᓂᒃ ᑕᐃᒪᙵᑦ.

“25-ᓂ ᓄᓇᓕᒃᑕᖃᖅᑎᓪᓗᒍ ᐊᒻᒪᓗ ᐊᖏᓂᖃᖅᖢᓂ ᓄᓇ 2 ᒥᓕᐊ ᑭᑉᐹᕆᒃᑎᓯᒪᓂᒃᑯᑦ ᑭᓛᒥᑕᓂ—ᑕᒪᓐᓇ ᑐᓴᕐᓯᒫᓂᒃᑕᓯ,” ᕼᐃᒃᔅ ᐅᖃᖅᑐᖅ. “ᐋᓐᓂᐊᖃᕐᑕᐃᓕᑎᑦᑎᓕᕆᓂᖅ ᐊᖏᔪᐊᓗᖕᒥ ᓄᓇᒃᑯ ᐱᓕᕆᓂᕐᔪᐊᖑᖕᒪᓐ. ᐱᓕᕆᔪᓐᓇᕐᓂᑦᑕ ᐅᖓᑖᓅᖓᖕᒪᓐ.”

ᐃᒡᓗᓕᕆᓂᕐᑕᐅᖅ ᐱᓕᕆᐊᖑᐃᓐᓇᐅᔭᕆᐊᖃᕐᒥᔪᖅ ᓄᓇᕗᑦ ᒐᕙᒪᒃᑯᓐᓄᑦ. ᐊᕐᕌᒍᒥ ᐊᒡᒋᖅᑐᒥᓐ, $6.4 ᒥᓕᐊᓐ ᑖᓚᐃᑦ ᐋᖅᑭᒃᑕᐅᓯᒪᔪᑦ ᐊᐅᓚᑦᑎᔾᔪᑎᓄᑦ ᐊᒻᒪ ᓱᕋᒃᓯᒪᔪᓕᕆᓂᕐᒧᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐃᒡᓗᒋᔭᐅᔪᓄᑦ ᐊᒻᒪ ᐃᒡᓗᓕᕆᔨᒃᑯᓐᓄᑦ, ᒪᑯᓄᖓ ᓄᑖᙳᕆᐊᖅᑎᑦᑎᓂᕐᒧᑦ ᐊᒻᒪ ᐅᕐᓱᐊᓗᖕᓄᑦ ᐊᑭᓕᐅᑎᒃᓴᓄᑦ.

ᑖᒃᑯᐊ ᓄᑖᓄᑦ ᐃᒡᓗᒃᓴᓄᑦ ᐊᑐᖅᑕᐅᔾᔮᙱᑦᑐᑦ.

ᒪᐅᓇᓕ ᓄᑖᓂᒃ ᐱᔨᑦᑎᕋᐅᑎᐅᓂᐊᖅᑐᓂᒃ ᓄᓇᕗᒻᒥᐅᓄᑦ ᐃᑲᔫᑎᑎᒍᑦ ᑕᕝᕙᙵᑦ ᐊᐅᓚᔾᔪᑎᒃᓴᓂᒃ, $2.6 ᒥᓕᐊᓐ ᑖᓚᐃᑦ ᓴᓂᕐᕙᒃᑕᐅᓯᒪᔪᑦ ᐸᕐᓇᐅᓯᐅᓂᐊᕐᓂᕐᒧᑦ ᐊᒻᒪ ᓴᓇᓂᐊᕐᓗᑎᒃ ᑎᓴᒪᓂᒃ ᓄᑖᓂᒃ ᐅᐸᒡᕕᒃᓴᐅᔪᓐᓇᖅᑐᒃᓴᓂᒃ ᐅᖅᓱᖅᑑᕐᒥᓐ, ᒥᑦᑎᒪᑕᓕᖕᒥᓐ, ᖃᒪᓂᑦᑐᐊᕐᒥᓐ ᐊᒻᒪ ᐸᖕᓂᕐᑑᒥᓐ.

ᐅᕙᙶᕋᔭᕐᑐᖅ $8.4 ᒥᓕᐊᓐ ᑖᓚᓂᒃ ᐅᓄᕐᓯᕚᓪᓕᕈᑎᓂᒃ ᐃᓚᒌᒃᑐᓕᕆᓂᕐᒥ ᐱᔨᑦᑎᕋᐅᑎᓕᕆᓂᕐᒧ ᒪᑯᓄᖓ ᐊᖏᕐᕋᖃᙱᑦᑐᓄᑦ ᐅᐸᒃᕕᒃᓴᓄᑦ ᐊᒻᒪ ᐃᓚᒌᓄᑦ ᐱᑦᑎᐊᖃᑦᑕᐅᑎᙱᓗᐊᖅᐸᒃᑐᓄᑦ ᐊᒻᒪ ᐃᓅᓱᒃᑐᓄᓪᓗ ᓈᒻᒪᙱᓕᐅᕈᑎᐅᕙᓗᐊᖅᑐᓂᒃ ᐱᓕᕆᐊᒃᓴᓄᑦ.

ᐃᓚᒋᔭᐅᓗᓂ, $2.1 ᒥᓕᐊᓐ ᑖᓚᐃ ᑐᕌᖓᓂᐊᕐᑐᑦ ᑎᓴᒪᓄᑦ ᓄᑖᓂᒃ ᐃᖅᑲᓇᐃᔭᖅᑎᒃᓴᓄᑦ ᐸᕐᓇᒃᑎᐅᓇᔭᖅᑐᓂᒃ ᐅᐸᒃᕕᒃᓴᓕᐅᕐᓂᕐᒥᒃ ᖁᒡᓗᖅᑑᒥ ᐊᒻᒪ ᑲᖏᖅᖠᓂᕐᒥ, ᒪᐅᖓᓗ ᐅᐸᒡᕕᐅᕙᒃᑐᒧᑦ ᐃᖃᓗᖕᓂᑦ ᐊᒻᒪᓗ ᐊᖏᕐᕋᖃᙱᑦᑐᓕᕆᓂᕐᒥ ᐱᔨᑦᑎᕋᐅᑎᓕᕆᓂᕐᒧᑦ.

6-ᓂ ᐸᓖᓯᑲᓐᓂᕐᓂᒃ ᐃᖅᑲᓇᐃᔭᓕᖅᑎᑦᑎᓂᐊᕐᒥᔪᑦ ᑕᒪᑐᒪᓂ ᐅᑭᐅᕐᒥ ᐊᒻᒪᓗ 6-ᑲᓐᓂᕐᓂ ᑭᖑᓂᐊᒍᑦ ᑕᒪᑐᒧᖓᓗ ᐋᖅᑭᒃᓯᓯᒪᓪᓗᑎᒃ $1.5 ᒥᓕᐊᓐ ᑖᓚᓂᒃ.

ᑕᕝᕙᙵᑦᑕᐅᖅ ᑮᓇᐅᔭᓂ ᐊᑐᕐᓂᐊᕐᒥᔪᑦ ᐃᖅᑲᓇᐃᔭᖅᑎᑖᕐᓗᑎᒃ ᑎᓴᒪᓂᒃ ᐃᓄᒃᑐᑦ ᐅᖃᕈᓐᓇᖅᑐᓂᒃ ᐸᓖᓯᑯᓐᓂ ᑭᐅᔨᐅᓇᔭᖅᑐᓂᒃ ᑕᐃᒪᓐᓇᓗ ᐅᖄᓚᐅᑎᓕᕆᔨᖃᕋᔭᖅᑐᑦ ᐊᑐᐃᓐᓇᕐᒥ ᐃᓄᒃᑐᑦ ᐅᖃᕈᓐᓇᖅᑐᒥ ᐃᑲᕐᕋᑦ 24-ᓂ ᐅᓪᓗᕐᒥ, ᐅᓪᓗᓂ 7-ᓂ ᐱᓇᓱᐊᕈᑎᓯᕐᒥᓐ ᑕᒪᓐᓇᓗ ᓯᕗᓪᓕᖅᐹᖑᓇᔭᖅᖢᓂ ᓄᓇᕗᑦ ᐱᒋᐊᓚᐅᕐᓯᒪᓂᖓᓂᒃ.

“ᐃᑲᔫᑎᒃᓴᖅᑖᖅᑎᑦᑎᒃᑲᓐᓂᕐᓂᖅ ᓴᖅᑭᑎᑦᑎᒍᑎᐅᒃᑲᓐᓂᕐᑐᖅ ᑕᒪᓐᓇ ᐱᒻᒪᕆᐊᓘᓂᖓᓂᒃ,” ᕼᐃᒃᔅ ᐅᖃᓚᐅᕐᑐᖅ ᐊᑐᖅᑐᒃᓴᓕᕆᓂᖅ ᓄᖅᑲᖅᑎᑕᐅᑎᓪᓗᒍ.

ᐅᖄᓚᐅᑎᓂ ᑭᐅᔨᐅᔪᑦ ᐃᖃᓗᖕᓃᓐᓇᔭᕐᑐᑦ, ᓄᓇᕗᓕᒫᒥᑦ ᐱᔨᑦᑎᕋᕐᓗᑎᒃ. ᐱᒋᐊᕐᓂᐊᕐᓂᖏᑦ ᒪᓕᖕᓂᐊᕐᑐᖅ ᐃᖅᑲᓇᐃᔮᖅᑖᕋᓱᒃᑐᓂᒃ ᐱᓕᕆᐊᖃᓚᐅᕐᑎᓪᓗᒋᑦ.

ᐃᓚᒌᖑᔪᑦ ᓱᕈᓯᕆᙱᑕᖏᓐᓂᒃ ᑲᒪᔨᐅᕙᒃᑐᑦ ᑖᓇᐅᔭᖅ ᑮᓇᐅᔭᖅᑖᕆᕙᒃᑕᖏᑦ ᐅᓄᒃᓯᕚᓪᓕᑕᐃᓐᓂᕐᓂᐊᕐᑐᖅ ᑕᐃᒪᙵ 2004-ᖑᓚᐅᕐᑎᓪᓗᒍ. ᖃᓄᖅ ᑮᓇᐅᔭᖅᑖᖃᑦᑕᕋᔭᕐᓂᖏᓐᓄᑦ ᐋᖅᑭᒃᓱᐃᓚᐅᕐᑐᑦ ᐊᑐᓂᑦ ᓄᓇᓖᑦ ᑎᓴᒪᐅᓕᖓᔪᓂᒃ ᐊᕕᒃᑐᖅᑕᐅᓯᒪᓪᓗᑎᒃ:

• ᐊᕕᒃᓯᒪᓂᖅ 1 ᐅᓄᕐᓯᕚᓪᓕᕐᓂᐊᖅᑐᖅ $43-ᓂᒃ $58-ᓄᑦ ᓱᕈᓯᕐᒧᑦ ᐅᓪᓗᕐᒥᑦ.
• ᐊᕕᒃᓯᒪᓂᖅ 2 ᐅᓄᕐᓯᕚᓪᓕᕐᓂᐊᖅᑐᖅ $45-ᓂᒃ $60-ᓄᑦ ᓱᕈᓯᕐᒧᑦ ᐅᓪᓗᕐᒥᑦ.
• ᐊᕕᒃᓯᒪᓂᖅ 3 ᐅᓄᕐᓯᕚᓪᓕᕐᓂᐊᖅᑐᖅ $47-ᓂᒃ $62-ᓄᑦ ᓱᕈᓯᕐᒧᑦ ᐅᓪᓗᕐᒥᑦ.
• ᐊᒻᒪ ᐊᕕᒃᓯᒪᓂᖅ 4 ᐅᓄᕐᓯᕚᓪᓕᕐᓂᐊᖅᑐᖅ $50-ᓂᒃ $65-ᓄᑦ ᓱᕈᓯᕐᒧᑦ ᐅᓪᓗᕐᒥᑦ.

ᐋᖅᑭᒃᓱᐃᓚᐅᕐᒥᔪᑦ ᓇᓕᐊᒃ ᓄᓇᓕᒃ ᐊᕕᒃᓯᒪᓂᒃᑰᖓᓂᐊᕐᓂᖓᓂᒃ ᓇᓕᐊᓐᓂᒃ. ᐅᓇ ᐊᓯᙳᕈᑎ ᐱᒋᐊᕈᑎᐅᓂᐊᕐᑐᖅ ᐄᐳᕈ 1-ᒥᑦ ᑕᒪᑐᒪᓂ ᐊᕐᕌᒍᒥᓐ, ᐊᒻᒪᓗ ᑕᐃᑲᓂ ᑐᓴᖅᑎᑕᐅᓂᐊᖅᖢᑎᒃ ᓄᓇᓖᑦ ᓇᓕᐊᓐᓃᑦᑕᕆᐊᒃᓴᖏᓐᓂᒃ ᐊᕕᒃᓯᒪᓂᒃᑯ, ᐅᓇ ᐅᖃᕐᓯᒪᔪᖅ ᓴᐅᓐ.

ᐊᓯᖏᑦ ᐃᑲᔫᑎᒃᓴᓕᕆᓂᒃᑯᑦ ᓴᖅᑭᑕᐅᓚᐅᕐᒥᔪᑦ ᐅᑯᓂᖓ ᐃᓚᖃᓚᐅᕐᑐᑦ:

• $1.9 ᒥᓕᐊᓐ ᑖᓚᐃᑦ ᐱᐅᓯᕚᓪᓕᖅᑎᑦᑎᓂᕐᒧᑦ ᐃᑲᔫᓰᐊᒃᓴᑦ ᓄᓇᕗᒥᑦ ᐃᓕᓐᓂᐊᖅᑐᓄᑦ (FANS).
• $1.5 ᒥᓕᐊᓐ ᑖᓚᐃᑦ ᐱᐅᓯᕚᓪᓕᖅᑎᑦᑎᓂᕐᒧᑦ ᒥᑦᑕᕐᕕᖕᓂᒃ ᐊᐅᓚᑦᑎᒍᑎᓂᒃ.
• $900,000 ᓄᑖᓂᒃ ᐃᖅᑲᓇᐃᔭᖅᑎᑖᕐᓂᕐᒧ ᐳᕙᒃᓗᒃᑐᓕᕆᓂᕐᒥ ᓄᓇᓕᖕᓂ ᐱᓕᕆᕙᓪᓕᐊᑎᑦᑎᔪᒪᓂᕐᒧᑦ.
• ᐊᒻᒪ $300,000 ᐋᖅᑭᒃᓱᐃᓂᕐᒧᑦ ᐅᔭᕋᒃᓯᐅᕐᕕᓕᕆᓂᕐᒥ ᐃᓕᓐᓂᐊᕈᑎᒃᓴᓄᑦ.

ᓄᓇᕗᒥ ᐃᓱᒪᒋᔭᐅᔪᖅ ᐅᓇ $2.35 ᐱᓕᐊᓐ ᑖᓚᐃᑦ ᑮᓇᐅᔭᓕᐊᕆᔭᐅᓂᐊᕐᓂᖏᓐᓄᑦ, ᐅᓄᓛᖑᓇᔭᖅᑐᖅ—$1.837 ᐱᓕᐊᓐ ᑖᓚᐃᑦ—ᒐᕙᒪᑐᖃᒃᑯᓐᓂᒃ, ᑖᓐᓇᓗ 4.3 ᐳᓴᓐᑎᒥ ᐅᓄᕐᓂᕐᓴᐅᓪᓗᓂ ᐊᕐᕌᓂᐅᓚᐅᕐᑐᒥᓐ. ᑭᓯᐊᓂᓕ ᑖᓐᓇ ᓈᒻᒪᙱᓗᐊᕐᒪᓐ, ᕼᐃᒃᔅ ᐅᖃᖅᑐᖅ.

“ᑐᓴᕐᓂᕐᓇᕆᔭᖓᓕ ᐊᔪᕈᓐᓃᖅᐸᓪᓕᕋᑦᑕ ᒐᕙᒪᑐᖃᒃᑯᑦ ᑮᓇᐅᔭᖏᓐᓂᒃ ᐱᓇᓱᒋᐊᒃᓴᖅ,” ᕼᐃᒃᔅ ᐅᖃᖅᑐᖅ ᐊᑐᖅᑐᒃᓴᓕᕆᑎᓪᓗᒍ ᒪᓕᒐᓕᕆᕕᒡᔪᐊᒥᓐ. “ᐱᑖᒃᑲᓐᓂᕆᐊᖃᕋᑦᑕ—ᑕᒪᓐᓇᓗ ᐅᖃᐅᓯᕆᓂᐊᖅᖢᑎᒍᑦ ᑲᓇᑕᐅᑉ ᒐᕙᒪᖓᓄᑦ ᓯᕗᒧᒃᐸᓪᓕᐊᑎᓪᓗᑕ.”

ᕼᐃᒃᔅ ᐅᖃᓚᐅᕐᒥᔪᖅ ᓄᓇᕗᑦ ᒐᕙᒪᒃᑯ ᐊᔪᕈᓐᓃᕐᐹᓪᓕᕐᓂᖏᓐᓂᒃ ᖃᓄᖅ ᑮᓇᐅᔭᓂᒃ ᐊᑐᕈᓐᓇᑦᑎᐊᕆᐊᒃᓴᖅ ᒐᕙᒪᑐᖃᒃᑯᓐᓂ ᐱᔭᖏᓐᓂᒃ ᐊᒻᒪᓗ ᐊᓯᖏᓐᓂᒃ ᑮᓇᐅᔭᓕᐅᕈᑎᐅᔪᓐᓇᖅᑐᓂᒃ ᒪᑯᑎᑐᓇᖅ ᐊᑎᓕᐅᖅᑎᑦᑎᕙᖕᓂᕐᒥᓐ ᐱᓕᕆᔨᒃᑲᓐᓂᖅᑎᒍᑦ ᐊᖏᕈᑎᑎᒍᑦ.

ᐅᓇ ᐊᐅᓚᑦᑎᔾᔪᑎ ᐃᓱᒪᒋᔭᖃᕈᑎᐅᔪᖅ ᒫᓂ $2.33 ᐱᓕᐊᓐ ᑖᓚᐃᑦ ᐊᑐᖅᑕᐅᓇᔭᕐᓂᖏᓐᓂᒃ ᐊᐅᓚᑦᑎᔾᔪᑎᓄᑦ ᐊᒡᒋᖅᑐᒧᑦ ᐊᕐᕌᒍᒧᑦ, $50 ᒥᓕᐊᓐ ᑖᓚᓂᒃ ᓇᐅᑦᑎᐅᒃᑯᒫᖃᖅᖢᑎᒃ. ᐃᓱᒪᒋᓗᒍ ᓇᐅᑦᑎᐅᒃᑯᒫᖑᓂᐊᖅᑐ ᐊᑐᖅᑕᐅᕌᓂᖕᓂᖓᓂᒃ, ᓄᓇᕗᑦ ᒐᕙᒪᒃᑯᑦ ᐃᓱᒪᔪᑦ ᐊᐅᓚᑦᑎᓂᕐᒧᑦ ᐊᑭᓕᒃᓴᖃᕐᓂᐊᕆᐊᒃᓴᖏᓐᓂᒃ ᒫᓂᐸᓗᒃ $30 ᒥᓕᐊᓐ ᑖᓚᓂ.

ᕼᐃᒃᔅ ᐅᖃᓚᐅᕐᑐᖅ ᓈᒻᒪᓗᐊᑦᑎᐊᙱᓐᓂᖓᓂᒃ ᐸᕐᓇᐅᓯᐅᕋᓱᖕᓂᖅ ᑮᓇᐅᔭᓂᒃ ᐊᑐᖅᑐᒃᓴᓂᒃ ᒐᕙᒪᒃᑯᓐᓂ ᐱᔭᐅᓂᐊᖅᑐᓂᒃ ᐅᓄᕐᓂᕐᓴᓂᒃ, ᑭᓯᐊᓂᓕ ᑕᒪᓐᓇ ᐱᕕᖃᕈᑎᐅᓂᐊᖅᑐᖅ ᓄᓇᕗᑦ ᒐᕙᒪᒃᑯ ᐱᔭᐅᔭᕆᐊᖃᖅᑐᑦ ᐱᕈᖅᐸᓪᓕᐊᓂᖏᓐᓄᑦ ᐱᐅᓂᕐᓴᓂ ᐱᓕᕆᐊᒃᓴᖃᕐᓂᕐᒧᑦ ᐊᒻᒪ ᐱᔨᑦᑎᕋᐅᑎᓄᑦ.

“ᐃᓱᒫᓘᑎᖃᓗᐊᕐᑐᒍᑦ ᐃᓚᒌᓂᒃ, ᑐᕌᒐᖃᓗᐊᖅᖢᑕ ᓄᓇᓕᖕᓂᒃ,” ᕼᐃᒃᔅ ᐅᖃᓚᐅᕐᑐᖅ ᐊᑐᖅᑐᒃᓴᓕᕆᓂᖅ ᒪᑐᔭᐅᑎᓪᓗᒍ. “ᖃᐅᔨᒪᒐᑦᑕ ᐃᖃᓗᐃᑦ ᓄᓇᕗᒥᑦ ᓇᓗᓇᐃᒃᑯᑎᓪᓚᕆᐅᓂᖓᓂᒃ; ᐅᖃᖃᑦᑕᕋᒪ ᐱᓕᕆᐊᒃᓴᕋᓕ ᒥᓂᔅᑕᐅᓪᓗᖓ ᐃᖅᑲᓇᐃᔭᖅᑎᐅᔪᑦ ᑮᓇᐅᔭᖅᑖᖅᑎᓪᓗᒋ ᐱᓕᕆᐊᖏᓐᓂᒃ ᐱᓕᕆᔪᓐᓇᕐᓂᐊᕐᒪᑕ.”

ᕼᐃᒃᔅ ᐅᖃᒃᑲᓐᓂᓚᐅᕐᑐ ᐃᓛᓐᓂᒃᑯ ᐱᓕᕆᑦᑎᐊᕐᓂᕐᓴᐅᕙᖕᓂᖓᓂᒃ ᐊᓯᖏᓐᓂᒡᓕ.

ᓄᓇᑦᓯᐊᕐᒥ ᐱᕙᓪᓕᐊᔪᑦ ᓴᖅᑭᑕᐅᓂᐊᕐᓂᖓ ᐃᓱᓕᑎᑦᓗᒍ, ᐅᓇ ᐊᐅᓚᔾᔪᑎᒃᓴᖅ ᓱᓕ ᐊᖏᖅᑕᐅᔭᕆᐊᖃᕐᓯᒪᓚᐅᕐᑐᖅ ᒪᓕᒐᓕᕆᔨᕐᔪᐊᓄᑦ.