ᐋᖅᑭᒃᑕᐅᔪᓄᑦ ᓈᒻᒪᒃᓴᙱᔾᔪᑎᓄᑦ ᐃᖅᑲᖅᑐᐃᕕᒃᑯ ᑕᐃᒪᐃᓐᓂᕋᐃᑐᐃᓐᓇᖅᐳᑦ ᐲᑕ ᑭᙳᐊᑦᓯᐊᒃ ᐃᖅᑲᖅᑐᐃᕕᖕᓄ ᖃᓄᐃᔾᔪᑎᒋᔭᐅᓂᕋᖅᑕᐅᓚᐅᕐᑐᒥ

ᐋᖅᑭᒃᑕᐅᔪᓄᑦ ᓈᒻᒪᒃᓴᙱᔾᔪᑎᓄᑦ ᐃᖅᑲᖅᑐᐃᔨᒃᑯᑦ ᑭᐅᓗᒍᑎᐅᓇᓱᒃᑐᓂᒃ ᓱᖁᑎᒃᓴᙱᑦᑐᑦ ᐅᖃᕐᓯᒪᔪᓂᒃ ‘ᑐᓵᔨᑎᒍᑦ ᓈᒻᒪᙱᓕᐅᕈᑎᓄᑦ’

ᓄᓇᕗᒥᑦ ᐃᖅᑲᖅᑐᐃᔨᒧᑦ ᐋᖅᑭᒃᑕᕕᓂᕐᓄᑦ ᓈᒻᒪᒃᓴᙱᓐᓂᕐᒧᑦ ᐃᖅᑲᖅᑐᐃᕕᒃ
ᐊᑐᕈᓐᓃᖅᑎᑦᑎᓚᐅᕐᑐᑦ ᐲᑕ ᑭᙳᐊᑦᓯᐊᒃ ᓈᒻᒪᒃᓴᙱᔾᔪᑎᖏᓐᓂᒃ 2016-ᒥ
ᐃᓄᐊᕐᓯᓚᐅᕐᓯᒪᓂᖓᓂᒃ ᖃᑕᙳᑎᒥᓂᒃ. (ᐊᔾᔨᙳᐊᖁᑎᒋᔭᐅᔪᖅ)

By ᑖᒪᔅ ᐅᕉᓄ
ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑐᓂᔭᐅᔪᑦ

For an English version of this story, see Appeals court upholds Peter Kingwatsiak murder conviction

ᓄᓇᕗᒥᑦ ᐋᖅᑭᒃᑕᐅᔪᓄᑦ ᓈᒻᒪᒃᓴᙱᔾᔪᑎᓄᑦ ᐃᖅᑲᖅᑐᐃᔨᒃᑯᑦ ᑭᐅᓗᒍᑎᐅᓇᓱᒃᑐᓂᒃ ᓱᖁᑎᒃᓴᙱᑦᑐᑦ ᐅᕙᙵᑦ ᑭᙵᒥᐅᑕᕐᒥᒃ ᐃᓄᐊᖅᓯᓚᐅᕐᓯᒪᔪᕕᓂᕐᒥᓂ ᐅᖃᕐᓯᒪᓪᓗᓂ ᑐᓵᔨᑎᒍᑦ ᐅᖃᐅᓯᐅᓚᐅᕐᓯᒪᔪᑦ 2015-ᒥ ᐃᖅᑲᖅᑐᖅᑕᐅᑎᓪᓗᒍ ᓈᒻᒪᓚᐅᕐᓯᒪᙱᓐᓂᖓᓂᒃ.

“ᑐᑭᒋᑎᑕᐅᔪᑦ ᐊᒻᒪᓗ ᖃᓄᐃᓕᐅᕈᑎᐅᓇᓱᖕᓂᖏᑦ ᓱᖅᑯᐃᓇᐃᓐᓇᐅᔭᖅᑐᑦ,” ᐃᓱᒪᓕᐅᕆᔭᐅᔪᓄᑦ ᑐᓴᒐᒃᓴᓂᒃ ᐅᖃᐅᓯᐅᓚᐅᕐᑐᖅ ᐅᒃᑑᐱᕆ 19-ᖑᑎᓪᓗᒍ ᐅᑯᓇᙵᑦ ᐃᖅᑲᖅᑐᐃᔨᓂᒃ ᑭᐅᕋᓐ ᓴᐃᓄ, ᕗᕋᑐᕆᑲ ᓲᔾ ᐊᒻᒪ ᑲᕕᓐ ᕖᕼᐊᓐ.

“ᐅᖃᐅᓯᒃᑯᑦ ᑐᑭᓕᐊᕆᔭᐅᓯᒪᔪᖅ ᐊᒃᑐᐃᔾᔪᑎᖃᖂᔨᓚᐅᙱᑦᑐᖅ ᑐᑭᓯᖃᑦᑕᐅᑎᓯᒪᓂᖏᑦᑎᒍᑦ ᐅᑯᐊ ᑭᖑᐊᑦᓯᐊᒃ ᐊᒻᒪ ᓗᐊᐃᔭᐃᑦ ᐊᒻᒪᓗ ᐃᖅᑲᖅᑐᐃᔨᒧᓪᓗ ᐃᖅᑲᖅᑐᖅᑕᐅᑎᓪᓗᒍ. ᐅᓇ ᒥᔅᑕ ᑭᖑᐊᑦᓯᐊᒃ ᐃᓱᒫᓘᑎᖃᕐᓂᕋᖅᑎᓪᓗᒍ ᑐᓵᔨᓂᒃ, ᑕᒪᓐᓇ ᐃᖅᑲᖅᑐᐃᕕᖕᓄᑦ ᖃᐅᔨᔭᐅᓇᓱᑦᑎᐊᓚᐅᕐᑐᖅ ᐃᓱᒫᓘᑎᖓ,” ᑕᐃᒪᓐᓇ ᐅᖃᕐᓯᒪᓚᐅᕐᑐᖅ ᒪᒃᐱᒐᓕ 12-ᓂ ᐃᓱᒪᓕᐊᕆᔭᐅᔾᔪᑎᓂᒃ.

ᐃᖅᑲᖅᑐᐃᔨ ᐹᓂ ᑐᓚᒃ ᑭᖑᐊᑦᓯᐊᕐᒥᒃ ᐸᓯᔭᒃᓴᐅᓂᕋᐃᓚᐅᕐᓯᒪᖕᒪᑦ ᐃᓅᐊᕐᓯᓂᕐᒥᒃ 2016-ᒥ ᐃᖅᑲᖅᑐᖅᑕᐅᓪᓗᓂ, ᑖᓐᓇ 22-ᒥ ᖁᑭᐅᑎᒥ ᑐᕌᖅᑎᕐᖢᓂ ᒪᑉᐸᓗᒃ ᐊᓪᓚᐅᑉ ᓂᐊᖁᐊᓄᑦ ᓯᓂᒃᑎᓪᓗᒍ ᑯᑭᖅᓯᓚᐅᕐᓯᒪᖕᒪᑦ.

ᑐᖂᑦᑎᓚᐅᕐᓯᒪᔪᖅ 2010-ᒥ ᑭᙵᓂᒃ ᑭᙳᐊᑦᓯᐊᖅ 18-ᓂ ᐅᑭᐅᖃᓕᓵᖅᑎᓪᓗᒍ.

ᐱᔮᕆᓗᓂ ᑐᖂᑦᑎᓗᓂ ᑎᒍᔭᐅᓯᒪᓐᓇᖅᑐᖅ ᐃᓅᓯᓕᒫᒥᒃ ᐊᒻᒪᓗ ᐊᓂᑎᑕᐅᔪᓐᓇᙲᓐᓇᕐᓗᓂ ᐊᕐᕌᒍᓂᒃ 25-ᓂᒃ.

ᐊᕐᕌᓂ ᐅᓇ ᐃᖃᓗᖕᓂ ᓴᐳᓐᓂᐊᖅᑎ ᓗᐊᐃᔭ ᐋᓕᓴᓐ ᑯᕉ ᐃᖅᑲᖅᑐᐃᔨᒧ ᐋᖅᑭᒃᑕᐅᓂᑯᒥᒃ ᓈᒻᒪᒃᓴᙱᔾᔪᑎᓂᒃ ᓴᕿᑎᑦᑎᓚᐅᕐᓯᒪᖕᒪᑦ ᖃᓄᐃᓕᔭᐅᔾᔪᑎᖓᓄᑦ ᐊᒻᒪ ᑎᒍᔭᐅᓯᒪᔭᕆᐊᖃᕈᑎᐊᓄᑦ.

ᑭᐅᓗᒍᑎᖃᖅᖢᓂ ᐃᓚᒐᒍᑦ ᐅᓇ ᑐᓚᒃ ᐃᓱᒫᓘᑎᒋᔭᐅᔪᓂᒃ ᓴᖅᑭᑕᐅᓂᑯᓂᒃ ᐃᖅᑲᖅᑐᐃᑎᓪᓗᒍ ᒪᑯᓂᖓ ᑐᑭᓕᐅᕈᑎᐅᑎᑕᐅᔪᑦ ᓈᒻᒪᙱᓕᐅᕈᑎᐅᓕᓚᐅᕐᓂᖏᓐᓂᒃ ᒪᓕᒐᓕᕆᓂᕐᒥᒃ.

ᑯᕉ ᐅᓂᒃᑳᓕᐅᓚᐅᕐᒪᑦ ᐅᖃᐅᓯᓕᕆᔨᑎᒍᑦ ᐅᖃᖅᑐᓂᒃ ᑐᓚᒃ ᑕᒻᒪᕐᓯᒪᓚᐅᕐᓂᖓ “ᓈᒻᒪᙱᓕᐅᕈᑎᐅᓕᓚᐅᕐᒪᑦ ᐸᓯᔭᒃᓴᐅᑎᑕᐅᔪᒧᑦ,” ᐃᒪᓐᓇ ᐃᓛᓐᓂ “ᐃᓕᖅᑯᓯᒃᑯᑦ ᐃᓱᒪᙱᓗᐊᕐᓂᕐᒧᑦ” ᐊᒻᒪᓗ ᓇᓗᓇᓚᐅᙱᖢᓂ “ᑐᑭᓯᓯᒫᓂᙱᓐᓂᖓᓂᒃ ᐅᖃᐅᓰᒃ ᒪᕐᕉ ᐊᔾᔨᒌᙱᔾᔪᑎᖏᓐᓂᒃ.”

ᑯᕉ ᐊᐱᕆᓚᐅᕐᑐᖅ ᐋᖅᑭᒃᑕᐅᔪᓄᑦ ᓈᒻᒪᒃᓴᙱᔾᔪᑎᓄᑦ ᐃᖅᑲᖅᑐᐃᔨᓂᒃ ᑖᔅᓱᒥᖓ ᐅᓂᒃᑳᒥ ᐱᔭᐅᖁᔨᓪᓗᓂ ᓄᑖᖑᓗᓂ ᐸᓯᔭᒃᓴᐅᓂᖓᓄᑦ ᐃᖅᑲᖅᑐᖅᑕᐅᑎᓪᓗᒍ ᓴᖅᑭᑕᐅᓚᐅᙱᓐᓂᖓᓂᒃ.

ᑭᓯᐊᓂᓕ ᐃᓱᒪᓕᐅᕆᔾᔪᑎᖓ ᑖᔅᓱᒥᖓ ᓈᒻᒪᒃᓴᙱᔾᔪᑎᒥ ᖁᔭᓈᕐᓯᔪᒪᓂᖓᓄᑦ, ᐅᑯᐊ ᐃᖅᑲᖅᑐᐃᔩᑦ ᐱᓕᕆᐊᖃᕐᓂᑯᑦ ᑎᑎᕋᓚᐅᕐᑐᑦ “ᐱᔭᐅᔪᒪᔪᑦ ᐅᖃᐅᓯᓕᕆᓂᕐᒧᑦ ᐊᔪᕈᓐᓃᕐᓯᒪᓪᓚᕆᒃᑐᒥ ᐆᒥᖓ ᐃᖅᑲᖅᑐᐃᔨᒥ ᓈᒻᒪᒃᓴᙱᔾᔪᑎᖃᕐᓂᕐᒧᑦ ᐱᓂᕐᓴᐅᓗᐊᕐᒪᑦ ᑐᑭᓕᐅᕆᓂᕐᒧᑦ ᐃᓱᒫᓘᑎᒋᔭᐅᔪᓂᒃ” ᐊᒻᒪᓗ ᑕᐃᒪᐃᒻᒪ “ᑕᒪᑐᒥᖓ ᐃᓱᒪᒋᔭᖃᓚᐅᙱᑦᑐᑦ ᓈᒻᒪᙱᓕᐅᕈᑎᐅᓇᓱᒃᑐᓂᒃ.”

ᐅᓂᒃᑳᖑᔪᖅ ᐃᒪᐃᓕᖓᖕᒪᑦ “ᓴᖅᑭᔮᖅᑎᑦᑎᓪᓗᓂ ᐊᔾᔨᒌᙱᔾᔪᑎᐅᔪᓂᒃ ᐅᖃᐅᓯᐅᕙᓪᓕᐊᔪᓂᒃ, ᐅᖃᕈᓯᐅᔪᓂᒃ ᐊᒻᒪᓗ ᐅᖃᐅᓯᕆᔭᐅᔪᓂᒃ ᐃᓚᖏᓐᓂᒃ,” ᐃᓱᒪᓕᐅᕈᑎᐅᔪᑦ ᐅᖃᖅᓯᒪᔪᑦ.

ᑭᓯᐊᓂᓕ ᐅᓇ “ᓴᖅᑭᑎᑦᑎᔾᔪᑎᐅᔪᖅ ᓄᑖᓂᒃ ᐃᓱᒪᓕᐊᕆᔭᐅᔪᕕᓂᕐᒧᑦ ᐅᕝᕙᓘᓐᓃᑦ ᐃᓱᒪᓕᐅᕆᔾᔪᑎᐅᓇᔭᓚᐅᖅᑐᒧ ᐃᖅᑲᖅᑐᖅᑕᐅᑎᓪᓗᒍ” ᐊᒻᒪᓗ ᑕᐃᒪᐃᓐᓂᖓᓄᑦ ᐊᖏᕐᑕᐅᓚᐅᙱᑦᑐᖅ, ᐅᖃᕐᓯᒪᔪᑦ.

ᑐᓚᒃ 2016-ᒥ ᐃᖅᑲᖅᑐᐃᓚᐅᕐᓯᒪᑎᓪᓗᒍ ᐃᓚᖏᑦ ᒪᓕᒐᓕᕆᓂᕐᒥᒃ ᐊᒻᒪ ᐅᖃᐅᓯᕐᓂᒃ ᖃᐅᔨᒪᒻᒪᕆᒃᑐᑦ ᐃᓱᒫᓘᑎᓂ ᓴᖅᑭᑎᑦᑎᓚᐅᕐᒪᑕ ᐆᒥᖓ ᑐᑭᓕᐅᕈᑎᒋᔭᐅᔾᔪᑎᓂᒃ ᑖᔅᓱᒧᖓ ᐱᓕᕆᓂᕐᒧᑦ.

ᓲᕐᓗ ᐃᒪᓐᓇ, ᑐᓚᒃ ᐅᖃᓚᐅᕐᓯᒪᖕᒪᑦ ᑭᖑᐊᑦᓯᐊᖅ ᐊᑐᓚᐅᕐᓂᖓᓂ ᐊᔾᔨᒌᙱᑦᑐᓂᒃ ᐅᖃᐅᓯᕐᓂ ᑐᓵᔨᑎᒍ ᐊᒻᒪᓗ ᑭᐅᑦᑕᐃᓕᒪᔭᖢᓂ ᐊᒻᒪ ᐊᑯᓂᐊᓗᒃ ᓂᓪᓕᙱᑯᑖᒃᐸᒃᖢᓂ ᑭᐅᓂᐊᓵᖅᖢᓂ.

“ᐅᓇ ᐃᓄᒃᑎᑐᑦ ᐅᖃᕈᓐᓇᙱᒃᑯᓂ ᐃᖅᑲᖅᑐᐃᔨ ᑕᐃᒪᓕ ᖃᓄᖅ ᐅᖃᕈᓐᓇᓚᐅᕐᐸᑦ ᑭᖑᐊᑦᓯᐊᒃ ᑐᓵᔨᓂ ᐊᑐᓚᐅᕐᓂᖓᓂᒃ? ᐱᔪᓐᓇᕐᓂᖃᓚᐅᕐᒪᑕ ᖃᓄᖅ ᐱᐅᑎᒋᓂᖓᓃ?” ᓵᓐᑐᕋ ᐃᓅᑎᖅ, ᓄᓇᕗᒥᑦ ᐅᖃᐅᓯᕐᓄᑦ ᑲᒥᓯᓚᐅᓚᐅᕐᓯᒪᔪᖅ, ᐊᒻᒪᓗ ᐊᔪᕈᓐᓃᖅᓴᖅᓯᒪᓪᓗᓂ ᓗᐊᐃᔭᐅᓂᕐᒥᒃ, ᐅᖃᓚᐅᕐᑐᖅ 2016-ᒥ ᐊᐱᖅᓱᖅᑕᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᔫᓂᕘᓯᑎᒥ ᑐᕌᓐᑐᒥ ᒪᓕᒐᓕᕆᓂᕐᒧᑦ ᐃᓕᓴᐃᔨ ᑭᐊᓐᑦ ᐅᕉᑦᔅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᖃᓚᐅᕐᓯᒪᔪᖅ 2016-ᒥ ᐃᖅᑲᖅᑐᐃᕕᒃᒥ ᑐᓵᔨᖃᕐᓂᖅ “ᖃᐅᔨᓴᖅᑕᐅᓯᒪᙱᒻᒪ” ᒪᐅᓇ ᑲᓇᑕᒥ ᒪᓕᒐᓕᕆᓂᕐᒧᑦ ᐱᓕᕆᔾᔪᓯᒃᑯᑦ.

ᐅᖃᓚᐅᕐᒥᔪᖅ ᓄᓇᖃᖅᑳᖅᑐᑦ ᑲᓇᑕᒥ “ᑐᑭᓯᔭᐅᔪᓐᓇᐃᓪᓕᖃᑦᑕᕐᒪᑕ ᒪᓕᒐᓕᕆᔨᒃᑯᓐᓂ.”

“ᐅᓇ ᐱᓕᕆᔾᔪᑎᑎᒍᑦ ᐃᓱᒫᓘᑎᐅᕚ ᐅᕝᕙᓘᓐᓃᑦ ᑕᒪᐅᖓᑐᐃᓐᓇᐅᕙ?” ᐅᕉᑦᔅ ᐊᐱᕆᓚᐅᕐᑐᖅ.

ᑭᖑᐊᑦᓯᐊᒃ ᐊᕐᕌᓂ ᐃᖅᑲᖅᑐᐃᕕᒃᑯᑦ ᐋᕿᒃᑕᐅᔪᕕᓂᕐᓄ ᐃᖅᑲᖅᑐᐃᕕᒃᑰᕈᑎᖃᕋᓱᒃᑎᓪᓗᒍ, ᐊᓗᑭ ᑰᑦᑎᖅ, ᐊᖓᔪᖅᑳᕆᔭᐅᔪᖅ ᓄᓇᕗᑦ ᑐᙵᕕᒃᑯᓐᓄᑦ ᐅᖃᓚᐅᕐᓯᒪᔪᖅ ᓰᐲᓰᑯᓐᓄᑦ ᐊᐱᖅᓱᖅᑕᐅᑎᓪᓗᒍ ᐅᓇ ᐃᓕᖅᑯᓯᖅ ᐊᒻᒪ ᐅᖃᐅᓯᒃᑯᑦ ᑐᓚᒃᑕᕈᑎᐅᔭᑦᑐᑦ ᐃᓄᖕᓄᑦ ᐃᖅᑲᖅᑐᐃᕕᖕᓂ “ᓇᓗᓇᙱᓪᓚᕆᒃᑐᖅ” ᓈᒻᒪᙱᑦᑐᓂᒃ ᐊᑐᖃᑦᑕᕐᓂᖏᓐᓂᒃ ᒪᓕᒐᓕᕆᓂᒃᑯᑦ.

“ᐅᓇ ᐃᓄᖕᓄᑦ ᒪᓕᒐᓕᕆᓂᐅᙱᒻᒪᑦ, ᑕᐃᒪᓕ ᓈᒻᒪᙱᓕᐅᕈᑎᖃᕐᓯᒪᔪᑦ ᒪᓕᒐᓕᕆᓂᕐᒥᒃ ᐊᒻᒪᓗ ᐃᓚᐅᕐᓯᒪᓇᓂ ᐃᓄᐃᑦ ᑐᑭᓯᓯᒪᔭᖏᓐᓂᒃ ᐊᒻᒪ ᐊᑐᖃᑦᑕᖅᑕᖏᓐᓂᒃ,” ᐅᖃᓚᐅᕐᑐᖅ ᓰᐲᓰᑯᓐᓄᑦ ᑎᓯᐱᕆ 2020-ᒥ.

ᑯᕉ ᐱᓇᓱᓚᐅᕐᒥᔪᖅ ᐃᖅᑲᖅᑐᐃᕕᒃᑯᑦ ᐋᖅᑭᒃᑕᐅᔪᒥᒃ ᓈᒻᒪᒃᓴᙱᔾᔪᑎᖃᕐᓂᕐᒥᒃ ᒪᑐᒧᖓ ᑭᖑᐊᑦᓯᐊᒃ ᐋᖅᑭᒃᓱᐃᔪᓐᓇᓚᐅᙱᓐᓂᖓᓂᒃ ᓯᕗᓂᐊᒍᑦ ᖃᓄᖅ ᑐᖁᑎᑦᑎᓂᐊᕐᓂᖓᓂᒃ, ᐱᔾᔪᑎᖃᖃᓯᐅᑎᓚᐅᕐᓯᒪᓂᖓᓂ ᓂᐅᕐᓯᑳᖅᓯᒪᓗᐊᕐᓂᖓᓂ ᒑᓴᓖᓐᒥ ᑕᐃᒪᓐᓇ ᑐᖁᑎᑦᑎᓗᐊᕈᑎᒋᓪᓗᓂᐅᒃ.

ᑭᓯᐊᓂᓕ ᐃᖅᑲᖅᑐᐃᕕᒃᑯᑦ ᐋᖅᑭᒃᑕᐅᔪᓂᒃ ᓈᒻᒪᒃᓴᙱᓐᓂᕐᒧᑦ ᐃᖅᑲᖅᑐᐃᔨ ᑕᐃᒪᐃᙱᓐᓂᕋᓚᐅᕐᑐᖅ.

ᑐᓚ “ᐃᒪᐃᓕᖓᓂᕋᐃᓕᓚᐅᕐᓂᖓ ᐅᓇ ᑐᖂᑦᑎᓂᖅ ᒥᔅᑕ ᐊᑦᓚᒥ ᐸᕐᓇᒃᓯᒪᓚᐅᕐᓂᕋᖅᖢᓂᐅᒃ ᐊᒻᒪ ᑕᐃᒪᐃᑦᑐᒪᓂᕐᒨᖓᓂᕋᖅᖢᓂᐅᒃ ᑕᒪᓐᓇᓗ ᓇᓗᓇᙱᓗᐊᖅᖢᓂ,” ᐃᓱᒪᓕᐅᕈᑎᒋᔭᐅᔪᑦ ᐅᖃᖅᓯᒪᔪᑦ.

Share This Story

(0) Comments

Join the Conversation

Your email address will not be published. Required fields are marked *

*