ᐋᖅᑭᒃᓱᐃᔨᐅᔪᑦ ᐊᑐᕐᐳᑦ ᕕᕝᕗᐊᕆ 11-ᒥᑦ ᐱᒋᐊᖅᑎᑦᑎᓪᓗᑎᒃ ᓄᓇᕗᑦ 211 ᐃᑲᔪᖅᑕᐅᔪᒪᓂᕐᒧᑦ ᐅᖄᓚᕝᕕᒃᓴᒥᑦ

ᓄᓇᕗᒻᒥᐅᑦ ᐅᖄᓚᔪᓐᓇᕐᓯᔪᑦ ᐅᕗᖓ 2-1-1 ᖃᐅᔨᓇᓱᒡᓗᑎᒃ ᐱᔨᑦᑎᕋᐅᑎᒋᔭᐅᔪᓂᒃ

ᓄᓇᕗ 211 ᐃᑲᔪᖅᑕᐅᔪᒪᒍᑎ ᐊᑦᑕᑕᖅᑎᑦᑎᕗᖅ ᐃᓄᖕᓂ ᐃᓄᓕᕆᓂᒃᑯᑦ ᐃᑲᔪᖅᑕᐅᔾᔪᑎᒃᓴᓄᑦ ᕕᕝᕗᐊᕆ 11-ᒥᑦ ᑲᓇᑕ 211-ᒧᑦ ᐅᓪᓗᕆᔭᐅᓚᐅᕐᑐᖅ 211-ᒧᑦ. (ᐊᔾᔨᓕᐅᕆᔨ ᔨᒻ ᐱᐊᓪ)

By ᔨᒻ ᐱᐊᓪ

For an English version of this story, see Organizers use Feb. 11 to promote Nunavut 211 helpline

ᐋᖅᑭᒃᓱᐃᔨᐅᔪᑦ ᐊᑐᓚᐅᕐᑐᑦ ᑲᓇᑕᒥ 211 ᐅᓪᓗᖓᓂᒃ ᕕᕝᕗᐊᕆ 11-ᐅᑎᓪᓗᒍ — ᐊᐃᑉᐸᖓ ᑕᖅᑭᕐᒥᒃ (2), 11 ᐅᓪᓗᖓᓂᒃ — ᖃᐅᔨᔭᐅᑎᑦᑎᓇᓱᒃᖢᑎᒃ 2-1-1 ᐅᖄᓚᕝᕕᒃᓴᒥᑦ, ᐃᓄᖕᓄᑦ ᐊᑐᖅᑕᐅᔪᓐᓇᕐᓂᐊᖅᖢᓂ ᐊᔾᔨᒌᙱᕈᓘᔭᕐᑐᓂᒃ ᐱᔨᑦᑎᕋᐅᑎᐅᔪᓂᒃ ᖃᐅᔨᓇᓱᒡᓗᓂ.

ᑕᒪᓐᓇ ᓴᖅᑭᑕᐅᓯᒪᓗᐊᙱᖢᓂ ᑭᒃᑯᓕᒫᓄᑦ, ᐅᓇ 211 ᐱᔨᑦᑎᕋᐅᑎᓕᕆᓂᖅ ᐊᑐᐃᓐᓇᐅᓯᒪᔪᖅ ᓄᓇᕗᒥᑦ, ᓄᓇᑦᓯᐊᕐᒥᑦ ᐊᒻᒪ ᔫᑳᓐᒥᑦ ᐅᒃᑑᐱᕆᐅᓚᐅᕐᑐᒥᑦ.

ᑭᓇᑐᐃᓐᓇᖅ ᓄᓇᕗᒥᐅᑕᖅ ᐅᖄᓚᒍᓐᓇᕐᓯᔪᖅ ᐅᕗᖓ 2-1-1 ᖃᐅᔨᓇᓱᒡᓗᑎᒃ ᑐᓴᕈᒪᔭᖏᓐᓂᒃ ᐊᒻᒪᓗ ᐃᓄᓕᕆᔨᒃᑯᑦ ᐱᔨᑦᑎᕋᐅᑎᖏᓐᓂᒃ ᐃᑲᔪᕈᓐᓇᖅᑐᓂᒃ ᑐᓴᕋᓱᒡᓗᑎᒃ ᒪᑯᓇᙵᑦ ᐃᓱᒪᓕᕆᓂᕐᒧᑦ ᒪᐅᖓ ᐃᖅᑲᓇᐃᔮᖅᑖᕋᓱᖕᓂᕐᒧᑦ.

ᐅᓇ 211 ᐱᔨᑦᑎᕋᐅᑎ ᐃᓄᖕᓄᑦ ᐃᑲᔪᖅᑕᐅᔪᓐᓇᖅᑐᓂᒃ ᑐᕌᖅᑎᑦᑎᒍᑎᐅᓂᖓᓄᑦ ᐃᑲᔪᕈᓐᓇᕐᑐᓄᑦ, ᑕᒪᒃᑯᐊ ᐃᓄᐃᑦ ᑭᐅᔨᐅᔪᑦ ᑖᒃᑯᓂᖓ ᑕᐃᔭᐅᕙᒃᑐᑦ “ᐅᖄᓚᐅᑎᒃᑯᑦ ᖃᐅᔨᓇᓱᒃᑎ.”

“ᐊᒃᓱᐊᓗᒃ ᐱᒃᑯᒋᔭᒃᑲ ᖃᐅᔨᒪᓂᖏᓐᓂᒃ ᐊᒻᒪ ᐃᓱᒪᒋᔭᖃᑦᑎᐊᕐᓂᖏᓐᓂᒃ ᐊᒻᒪ ᑭᐅᓯᕙᖕᓂᖏᓐᓂᒃ ᐅᖄᓚᐅᑎᓂᒃ,” ᓰᓚ ᓕᕕ ᐅᑯᓇᙵᑦ ᑲᒪᑦᓯᐊᖅᑐᑦ ᐃᑲᔪᖅᑕᐅᔪᒪᓂᕐᒧᑦ ᐅᖄᓚᕝᕕᒃᒥᑦ ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ.

ᓕᕕ ᐃᑲᔪᓚᐅᕐᓯᒪᔪᖅ ᐱᒋᐊᓕᕐᑎᓪᓗᒍ ᑲᒪᑦᓯᐊᖅᑐᑦ 1989-ᒥᑦ ᐅᓄᕐᓯᕙᓪᓕᐊᓗᐊᓕᕐᓂᖏᓐᓂᒃ ᐃᒻᒥᓃᖃᑦᑕᖅᑐᑦ ᕿᑭᖅᑖᓗᖕᒥᑦ.

ᐊᑯᓂᕈᓗᒃ ᐊᕐᕌᒍᒐᓴᒻᒪᕆᖕᓂᒃ ᐃᑲᔪᖃᑦᑕᖅᖢᓂ ᑲᒪᑦᓯᐊᖅᑐᑦᑯᓐᓂᒃ, ᑖᓐᓇᓗ ᐊᑐᐃᓐᓇᐅᓪᓗᓂ 24-7 ᑕᐃᒪᙵᓕᒫᖅ ᓄᓇᕗᒥᑦ, ᓄᓇᕕᒻᒥᑦ ᐊᒻᒪ ᑲᓇᑕᒥ ᐅᕘᓇ 1-800-265-3333.

ᐅᓇ ᓄᓇᕗᑦ 211 ᐅᖄᓚᑳᒃᓴᖅ ᐊᓯᐊᒍᑦ ᐊᐅᓚᑕᐅᔪᖅ ᐅᑯᓇᙵᐅᙱᑦᑐᖅ ᑲᒪᑦᓯᐊᖅᑐᑦ ᐊᒻᒪᓗ ᐊᔾᔨᒋᙱᑕᖓᓂ ᑐᕌᒐᖃᖅᖢᓂ, ᓲᖃᐃᒻᒪ ᑐᕌᖓᖕᒪᓪᓕ ᐃᓄᖕᓄᑦ ᐃᓄᓕᕆᔨᒃᑯᑦ ᐱᔨᑦᑎᕋᐅᑎᓂᖏᓐᓂᒃ ᖃᐅᔨᔪᒪᕙᒃᑐᓄᑦ.

ᑭᓯᐊᓂᓕ ᓕᕕ ᐅᖃᓚᐅᕐᑐᖅ ᑲᒪᑦᓯᐊᖅᑐᑦ ᐃᑲᔪᓚᐅᕐᓂᖓᓂᒃ ᓄᓇᕗᑦ 211 ᐱᔨᑦᑎᕋᐅᑎᓕᕆᓂᖅ ᐱᒋᐊᓕᕐᓂᖓᓂᒃ ᐊᒻᒪᓗ ᐃᒡᓗᕈᓯᖓᓂᒃ ᐃᓚᖓᓐᓂᒃ ᐃᓂᖃᖅᑎᑦᑎᓪᓗᑎᒃ.

“ᐃᑲᔪᖅᑐᒻᒪᕆᒃᑕᕋ ᐊᒻᒪᓗ ᐃᑲᔪᕈᑎᒻᒪᕆᐅᓪᓗᓂ ᒪᓂᒪᓯᒪᔭᑦᑎᓐᓄᑦ,” ᐅᖃᖅᑐᖅ.

ᓯᕗᓪᓕᕐᐹᖅ 211 ᐱᔨᑦᑎᕋᐅᑎ ᐱᒋᐊᓚᐅᕐᓯᒪᔪᖅ ᑐᕌᓐᑐᒥ 2002-ᒥᑦ ᐊᒻᒪ ᑭᖑᓂᐊᒍᑦ ᓯᐊᕐᒥᕈᓘᔭᕐᖢᓂ ᐊᓯᖏᓐᓄᑦ ᓄᓇᓕᕐᔪᐊᓄᑦ ᐊᒻᒪ ᐳᕌᕕᓐᓯᓄᑦ.

ᑖᓐᓇ ᐊᑐᐃᓐᓇᐅᓕᓚᐅᕐᓯᒪᔪᖅ ᓄᓇᕗᒥᑦ ᐅᒃᑑᐱᕆᐅᓚᐅᕐᓯᒪᔪᒥᒃ, ᐃᑲᔪᖅᑕᐅᓯᒪᓪᓗᓂ ᓄᕙᒡᔪᐊᕐᓇᖅ-19-ᒧᑦ ᐃᑲᔫᑎᒃᓴᓂᒃ ᒐᕙᒪᑐᖃᒃᑯᓐᓂᒃ ᐅᑯᓄᖓ ᔫᓇᐃᑕᑦ ᕗᐃ ᓴᓐᑐᕇᑦ ᑲᓇᑕᒥ (United Way Centraide Canada), ᑲᑐᔾᔨᖃᑎᒌᖑᔪᑦ ᐃᑲᔫᑎᒃᓴᓕᕆᓂᕐᒧᑦ ᐱᓕᕆᐊᖃᖅᑐᓄᑦ.

ᖃᐅᔨᒋᐊᒃᑲᓐᓂᕈᒪᒍᕕᑦ ᐆᒥᖓ ᓄᓇᕗᑦ 211, ᕙᐃᔅᐳᒃᑯᑦ ᓴᖅᑭᔮᒐᖓᓄᑦ ᑕᑯᒋᐊᕐᓗᑎᑦ.

ᒫᓐᓇᓕ ᐅᓇ ᓄᓇᕗᑦ 211 ᖃᓪᓗᓈᑎᑐᑦ ᑭᓯᐊᓂ ᐊᑐᐃᓐᓇᐅᔪᖅ ᑭᓯᐊᓂᓕ ᐃᖅᑲᓇᐃᔭᖅᑎᐅᔪᑦ ᐃᓄᒃᑎᑐᑦ ᑐᑭᓕᐅᕆᑎᑦᑎᔪᓐᓇᖅᑐᓂᒃ ᐱᓕᕆᑎᑦᑎᔪᓐᓇᕐᑐᑦ.

Share This Story

(0) Comments

Join the Conversation

Your email address will not be published. Required fields are marked *

*