ᐱᑦᑎᐊᙱᓗᐊᕐᓂᕐᒧᑦ ᐱᕋᔭᒍᑎᐅᔪᑦ ᒪᑯᓄᖓ ᐃᓅᓱᒃᑐᓄᑦ ᐊᕐᓇᓄᑦ, ᓂᕕᐊᕐᓵᓄᓪᓗ ᐱᖓᓱᐃᖅᖢᓂ ᖁᑦᑎᖕᓂᕐᓴᐅᕗᖅ ᐅᑭᐅᕐᑕᖅᑐᕐᒥ

ᒪᑯᐊ ᐃᓅᓱᒃᑐᑦ ᐊᕐᓇᐃᑦ ᐊᒻᒪ ᓂᕕᐊᕐᓵᑦ ᓄᓇᕗᒥᑦ ᐱᑦᑎᐊᖅᑕᐅᙱᕕᒡᔪᐊᖅᐸᒃᑲᓗᐊᖅᑎᓪᓗᒋᑦ 2017-ᖑᓚᐅᕐᑐᒥ, ᖃᓂᒋᔭᖏᓐᓃᑦᑐᑦ ᓴᔅᑳᑦᓱᐊᓐ ᐊᒻᒪ ᒫᓂᑑᐸᐅᑉ ᐅᐊᖕᓇᖓᓃᑦᑐᑦ ᐱᒋᐊᓪᓚᒃᑐᒦᑉᐳᑦ, ᓇᐃᓴᐃᔨᒃᑯᑦ ᑲᓇᑕᒥ ᖃᐅᔨᓚᐅᕐᑐᑦ ᐅᓂᒃᑳᓕᐊᓂᒃ ᓴᕿᑕᐅᓵᕐᓂᑯᓂ ᔪᓚᐃ ᐱᒋᐊᕐᓯᒪᓕᕐᑎᓪᓗᒍ.

ᑖᓐᓇ ᖃᐅᔨᓴᕐᓂᖅ ᐃᓚᒋᔭᐅᔪᖅ ᖃᐅᔨᓴᕈᑎᒻᒪᕆᐅᔪᓂᒃ ᖃᓄᖅ ᖃᐅᔨᔪᓐᓇᕈᑎᓂᒃ ᐱᑦᑎᐊᖅᑕᐅᕙᙱᓐᓂᐅᔪᓂᒃ ᐊᕐᓇᓄᑦ ᐅᑭᐅᓕᖕᓄᑦ 24-ᓂᑦ ᑐᖔᓄᑦ ᑲᓇᑕᐅᑉ ᐅᐊᖕᓇᖓᓂᒃ ᐊᒻᒪ ᖃᐅᔨᓴᕈᑎᒋᓗᒋᑦ ᑕᒪᐅᓇᑦᑕᐃᓐᓇ ᐅᑭᐅᖃᖅᑐᓂᒃ ᑲᓇᑕᐅᑉ ᓂᒋᐊᓃᑦᑐᓂᒃ.

ᐅᓂᒃᑳᖏᓐᓂᒃ, ᓇᐃᓴᐃᔨᒃᑯᑦ ᑲᓇᑕᒥ ᓇᓂᓯᓚᐅᕐᑐᑦ ᑕᒪᐃᓐᓂ ᑕᐅᑐᒃᖢᑎᒃ, ᐃᓅᓱᒃᑐᑦ ᐊᕐᓇᐃᑦ ᑲᓇᑕᐅᑉ ᐅᐊᖕᓇᖓᓃᑦᑐᑦ ᓇᓕᒧᒋᔭᖃᓚᐅᙱᒻᒪᕆᒃᑐᑦ ᐱᑦᑎᐊᖅᑕᐅᕙᙱᓐᓂᒃᑯᑦ ᐃᓅᓱᒃᑐᓂᒃ ᐊᕐᓇᓂᒃ ᑲᓇᑕᐅᑉ ᓂᒋᐊᓃᑦᑐᓂᒃ.

“ᐅᑭᐅᕐᑕᖅᑐᕐᒥ, ᐊᕐᓇᐃ ᓇᓗᓇᐃᖅᑕᐅᓯᒪᔪᓂᒃ ᓇᑉᐸᖏᑦᑕ ᐊᑎᑦᑎᐊᖓᓃᑦᑐᑦ (48 ᐳᓴᓐᑎ) ᐅᓄᖕᓂᖏᑦᑎᒍᑦ ᐅᑭᐅᖃᖅᑐᑦ 24-ᓂ ᑐᖔᓄᓪᓗ, ᑭᓯᐊᓂᓕ ᓲᕐᓗ ᐱᖓᓱᓂᑦ ᒪᕐᕉᒃ (62 ᐳᓴᓐᑎ) ᐱᑦᑎᐊᖅᑕᐅᙱᓯᒪᔪᑦ ᐅᑭᐅᕐᑕᖅᑐᕐᒥ ᐊᕐᓇᐃᑦ,” ᓇᐃᓴᐃᔨᑦ ᑲᓇᑕᒥ ᐅᖃᖅᑐᖅ.

“ᐃᒻᒪᖄᓪᓘᓐᓃᑦ, ᐃᓅᓱᒃᑐᑦ ᐊᕐᓇᐃᑦ ᐊᒻᒪ ᓂᕕᐊᕐᓵᑦ ᐅᑭᐅᕐᑕᖅᑐᕐᒥ ᓴᕿᑎᑕᐅᓯᒪᒻᒪᕆᓚᐅᕐᑐᑦ ᐱᑦᑎᐊᖅᑕᐅᓯᒪᙱᖢᑎᒃ ᓇᓕᒧᒃᓯᐅᑎᑕᐅᓇᓱᒃᑲᓗᐊᕈᑎᒃ ᑕᐅᑐᓕᒫᕐᓗᒋᑦ ᐊᕐᓇᓕᒫᑦ, ᐃᓅᓱᒃᑐᓕᒫᑦ ᑲᓇᑕᒥᐅᑕᑦ, ᐅᕝᕙᓘᓐᓃᑦ ᑕᒪᕐᒥᓕᒫᖅ ᑲᓇᑕᒥᐅᑕᑦ ᐅᑭᐅᕐᑕᖅᑐᕐᒥ.”

ᐅᑯᓄᖓᓕ ᖃᐅᔨᓴᕐᓂᕐᒧᑦ, ᓇᐃᓴᐃᔨᒃᑯᑦ ᑲᓇᑕᒥ ᓇᓗᓇᐃᕐᓯᓯᒪᔪᑦ “ᐅᐊᖕᓇᖅ” ᐅᑯᐊᖑᓂᖏᓐᓂᑦ ᐱᖓᓱᑦ ᑎᐅᕆᑑᕆᐅᔪᑦ, ᐋᓐᑎᐅᕆᐆᑉ ᐅᐊᖕᓇᖓ, ᑯᐸᐃᒃ, ᓂᐅᕙᐅᓐᓛᓐ ᐊᒻᒪ ᓛᐸᑐᐊ, ᐊᒻᒪᓗ ᑎᓴᒪᓂ ᐅᐊᓕᓂᕐᒥᑦ ᐳᕌᕕᓐᓯᐅᔪᓂᒃ.

ᑕᒪᐃᓐᓂ ᑕᐅᑐᒃᖢᓂ, 12,036 ᐃᓅᓱᒃᑐᑦ ᐊᕐᓇᐃᑦ ᓂᕕᐊᕐᓵᓪᓗ ᐅᑭᐅᖃᖅᑐᑦ 24-ᓂᒃ ᑐᖔᓂᓪᓗ ᐅᑭᐅᕐᑕᖅᑐᕐᒥ ᐸᓖᓯᓄᑦ ᐱᑦᑎᐊᖅᑕᐅᙱᓐᓂᕐᒧᑦ ᐅᖃᐅᓯᐅᓯᒪᔪᑦ 2017-ᒥᑦ.

ᑕᐃᒪᓐᓇ ᓴᕿᑎᑦᑎᒍᑎᐅᓕᓚᐅᕐᑐᖅ ᖃᔅᓯᐅᓂᖏᓐᓂᒃ ᐱᑦᑎᐊᖅᑕᐅᙱᓐᓂᕐᒧᑦ ᐱᕋᔭᒍᑎᐅᔪᑦ ᐃᓅᓱᒃᑐᓄᑦ ᐊᕐᓇᓄᑦ ᐊᒻᒪ ᓂᕕᐊᕐᓵᓄᑦ ᐱᖓᓱᐃᐸᓗᒃᖢᓂ ᖁᑦᑎᖕᓂᕐᓴᐅᔪᖅ ᒪᑯᓇᙵᓪᓕ ᐃᓅᓱᒃᑐᓂᒃ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ ᑲᓇᑕᐅᑉ ᓂᒋᐊᓃᑦᑐᓂᒃ ᐊᒻᒪᓗ ᒪᕐᕈᐃᖅᖢᓂ ᐅᓄᕐᓂᕐᓴᐅᓪᓗᓂ ᒪᑯᓇᙵᑦ ᐃᓅᓱᒃᑐᓂᒃ ᐊᖑᑎᓂᒃ ᐊᒻᒪ ᓄᑲᑉᐱᐊᓂᒃ ᐅᑭᐅᕐᑕᖅᑐᕐᒥᑦ, ᓇᐃᓴᐃᔨᑦ ᑲᓇᑕᒥ ᐅᖃᕐᓯᒪᔪᑦ.

ᐱᑦᑎᐊᖃᑦᑕᙱᓐᓂᖅ ᖁᑦᑎᕐᓂᖅᐹᖑᔪᑦ ᓴᔅᑳᑦᓱᐊᓐ ᐅᐊᖕᓇᖓᓂᒃ

ᐅᑭᐅᕐᑕᖅᑐᕐᒥᑦ ᐊᕕᒃᑐᖅᓯᒪᓂᑰᖓᓂᒃᑯᑦ, ᓇᐃᓴᐃᔨᑦ ᑲᓇᑕᒥ ᖃᐅᔨᓚᐅᕐᑐᑦ ᓴᔅᑳᑦᓱᐊᓐ ᐅᐊᖕᓇᖓ, ᐅᖓᕙᓯᒻᒪᕆᒃᖢᓂ, ᖁᑦᑎᖕᓂᖅᐹᒥᑦ ᐸᓖᓯᓄᑦ ᑲᒪᒋᔭᐅᓯᒪᔪᑦ ᐱᑦᑎᐊᖏᖃᑦᑕᕐᓂᖅ ᐊᕐᓇᓄᑦ ᐊᒻᒪ ᓂᕕᐊᕐᓵᓄᑦ 24-ᓂ ᐅᑭᐅᓕᖕᓂ ᑐᖔᓄᑦ 2017-ᖑᑎᓪᓗᒍ: 13,886 100,000-ᓂᒃ.

ᒫᓂᑑᐸᐅᑉ ᐅᐊᖕᓇᖓ ᐊᐃᑉᐸᕆᔭᐅᔪᖅ, ᐃᒪᓐᓇ 9,015 100,000-ᓂᒃ, ᐊᒻᒪ ᓄᓇᑦᓯᐊᖅ ᐱᖓᔪᒋᔭᐅᓪᓗᓂ 8,909 100,000-ᓂᒃ.

ᓄᓇᕗᑦ ᑎᓴᒪᒋᔭᐅᔪᖅ, ᐃᒪᓐᓇ 7,491 100,000-ᓂᒃ.

ᑕᐅᑐᙳᐊᖅᖢᒋ ᓇᓕᒧᒃᓯᐅᑎᓂᒃᑯᑦ, ᐊᒥᓲᓂᖏᑦ ᑲᓇᑕᐅᑉ ᓂᒋᐊᓂ 2017-ᒥ ᐃᒪᐃᓕᖓᓚᐅᕐᑐᖅ 1,235 100,000-ᓂᒃ.

ᐊᒻᒪᓗ, ᐅᓇ ᓇᓗᓇᐃᖅᑕᐅᓯᒪᓪᓚᕆᙱᑦᑐᖅ ᐸᓖᓯᓂᑦ ᐅᓂᒃᑳᓂ ᖃᔅᓯᐅᓂᖏᑦ ᓄᓇᕗᒥᑦ ᐊᕐᓇᐃᑦ ᐊᒻᒪ ᓂᕕᐊᕐᓵᑦ ᐅᑭᐅᓖᑦ 24-ᓂ ᑐᖔᓂᓪᓗ 2017-ᒥ ᐃᒪᓐᓇ ᓴᕿᑎᑦᑎᒍᑎᐅᓚᐅᕐᑐᖅ:

• ᖁᓄᔪᕐᓂᐊᕐᓂᕐᒧᑦ: 144ᐃᓅᓱᒃᑐᑦ ᐊᕐᓇᐃᑦ ᐱᕋᔭᒃᑕᐅᔪᑦ.
• ᑎᒥᒃᑯᑦ ᐊᓂᕐᓱᖅᑕᐅᓂᕐᒧᑦ: 451 ᐃᓅᓱᒃᑐᑦ ᐊᕐᓇᐃᑦ ᐱᕋᔭᒃᑕᐅᔪᑦ.
• ᐱᕋᔭᖕᓂᕐᒧᑦ ᐸᒡᕕᓵᕐᓂᖅ ᐊᒻᒪ ᖁᐊᕐᓵᕆᓂᕐᒧᑦ: 590 ᐃᓅᓱᒃᑐᑦ ᐊᕐᓇᐃᑦ ᐱᕋᔭᒃᑕᐅᔪᑦ.

ᐊᔾᔨᒌᙱᓐᓂᐅᔪᑦ ᑎᒥᒃᑯᑦ ᐋᓐᓂᕐᓱᖅᑕᐅᓂᐅᔪᑦ

ᖃᐅᔨᓴᕈᑎ ᖃᐅᔨᒍᑎᐅᓚᐅᕐᒥᔪᖅ ᐅᑭᐅᕐᑕᖅᑐᖓᓂᒃ ᑲᓇᑕᐅᑉ ᖁᑦᑎᖕᓂᕐᓴᐅᓂᖏᑦ ᐋᓐᓂᖅᓱᐃᓂᐅᔪᑦ ᐃᓅᓱᒃᑐᓂᒃ ᐊᕐᓇᓂᒃ ᐊᔾᔨᒋᙱᒻᒪᕆᒍᑎᐅᒋᕗᖅ ᐅᑭᐅᕐᑕᖅᑐᕐᒥᑦ ᐊᒻᒪ ᓂᒋᐊᓂᒃ ᑲᓇᑕᐅᑉ.

“ᑕᐃᒪᐃᓕᐊᓪᓚᓚᐅᖅᖢᑕ, ᐊᖏᓂᖅᐹᖑᒻᒪᕆᓚᐅᕐᑐᕐᓕ ᓈᒻᒪᙱᓕᐅᕈᑎ ᐅᓇ ᑎᒥᒃᑯᑦ ᐋᓐᓂᕐᓯᕆᓂᐅᔪᖅ, ᑕᐃᒪᓐᓇᓗ ᑎᓴᒪᐃᕐᖢᓂ ᖁᑦᑎᖕᓂᕐᓴᐅᓪᓗᓂ (3.9) ᐃᓅᓱᒃᑐᓄᑦ ᐊᕐᓇᓄᑦ ᓂᕕᐊᓵᓄᓪᓗ ᐅᑭᐅᕐᑕᖅᑐᕐᒥ ᐅᑯᓇᙵᓪᓕ ᓂᒋᕐᒦᑦᑐᓂᒃ (2,283 ᐱᑦᑎᐊᖅᑕᐅᓯᒪᙱᑦᑐ 100,000-ᓂᒃ ᐅᓄᕐᓂᖏᑦᑎᒍᑦ ᐅᕙᙵᓪᓕ 581).”

ᐊᒻᒪᓗ, 45 ᐳᓴᓐᑎ ᐃᓅᓱᒃᑐᑦ ᐊᕐᓇᐃᑦ ᐅᑭᐅᕐᑕᖅᑐᕐᒥᑦ ᑎᒥᖏᑦᑎᒍᑦ ᐋᓐᓂᖅᓱᖅᑕᐅᓯᒪᓂᑯᑦ, ᑕᐅᑐᒃᖢᒋᑦ 32 ᐳᓴᓐᑎᑐᐃᓐᓇᑦ ᑲᓇᑕᐅᑉ ᓂᒋᐊᓂ.

ᑐᖂᑦᑎᓂᖅ ᐱᖓᓱᐃᖅᖢᓂ ᖁᑦᑎᖕᓂᕐᓴᖅ

ᑐᖂᑦᑎᕙᖕᓂᒃᑯᓪᓕ, ᖃᐅᔨᓴᕐᓂᖅ ᖃᐅᔨᒍᑎᐅᓚᐅᕐᑐᖅ ᐊᕐᕌᒍᑦ 2009 ᐊᒻᒪ 2017, 74 ᐃᓅᓱᒃᑐᑦ ᐊᕐᓇᐃᑦ ᐅᑭᐅᕐᑕᖅᑐᕐᒥ ᐃᓄᐊᖅᑕᐅᓯᒪᔪᑦ ᐊᒻᒪᓗ ᑖᒃᑯᓇᙵᑦ, 56 ᓄᓇᖃᖅᑳᖅᖢᑎᒃ.

ᑕᒪᓐᓇᓕ ᐃᓄᐊᖅᑕᐅᔪᑦ ᐃᓅᓱᒃᑐᑦ ᐊᕐᓇᐃᑦ ᐅᑭᐅᕐᑕᖅᑐᕐᒥ 2017-ᒥ ᐱᖓᓱᐃᖅᖢᓂ ᖁᑦᑎᖕᓂᕐᓴᐅᓚᐅᕐᑐᑦ ᑲᓇᑕᓕᒫᖅ ᑕᐅᑐᒃᖢᒍ.

ᑕᒪᐅᓇᑦᑕᐃᓐᓇᖅ, ᐃᓄᐊᕐᓯᓂᖅ ᐃᓅᓱᒃᑐᓂᒃ ᐊᖑᑎᓂᒃ ᐊᒻᒪ ᓄᑲᑉᐱᐊᓂᒃ ᐅᑭᐅᕐᑕᖅᑐᕐᒥᑦ ᖁᑦᑎᖕᓂᕐᓴᐅᓪᓗᓂ.

ᑭᓯᐊᓂᓕ, ᑕᐅᑐᙳᐊᖅᖢᒍ ᐅᑭᐅᕐᑕᖅᑐᖅ ᓂᒋᕐᒥ, ᐅᖓᓯᒌᖕᓂᖓ ᐃᓄᐊᕐᓯᓂ ᓴᓂᒧᑦ ᐱᓛᖑᓚᐅᕐᑐᖅ ᐃᓅᓱᒃᑐᓂ ᐊᕐᓇᓂ ᐊᒻᒪ ᓂᕕᐊᓵᓂᒃ (ᖁᑦᑎᖕᓂᕐᓴᖅ ᐱᖓᓱᐃᕐᓯᒪᓂᕐᒥᑦ ᐅᑭᐅᕐᑕᖅᑐᕐᒥ ᐃᓅᓱᒃᑐᓄᑦ ᐊᕐᓇᓄᑦ ᑕᒪᐃᓐᓂ ᑕᐅᑐᒃᖢᒋᑦ, ᑕᐅᑐᙳᐊᖅᖢᒍ ᒪᕐᕈᐃᖅᖢᓂ ᖁᑦᑎᖕᓂᕐᓴᐅᓂᐅᔪᖅ ᐅᑭᐅᕐᑕᖅᑐᕐᒥ ᐃᓅᓱᒃᑐᓄᑦ ᐊᖑᑎᓄᑦ)” ᓇᐃᓴᐃᔨᑦ ᑲᓇᑕᒥ ᐅᖃᖅᑐᑦ.

ᐱᕋᔭᒃᑕᐅᓂᑯᑦ ᖃᐅᔨᒪᓂᕐᓴᐅᕙᒃᑐᑦ ᐱᕋᔭᒃᑎᒥᖕᓂᒃ

ᒪᑯᐊᓕ ᐱᕋᔭᒃᑎᐅᕙᒃᑐᑦ ᐱᑦᑎᐊᙱᕕᒡᔪᐊᕐᓂᒃᑯᑦ ᐊᕐᓇᓂᒃ ᐅᑭᐅᕐᑕᖅᑐᕐᒥᑦ, ᐊᒥᓲᓂᕐᓴᑦ ᐊᐃᑉᐸᕆᔭᐅᔪᑦ, ᖃᐅᔨᒪᔭᐅᔪᑦ ᐅᕝᕙᓘᓐᓃᑦ ᐃᓚᒋᔭᐅᔪᑦ ᐱᕋᔭᒃᑕᐅᔪᓄᑦ, ᓇᐃᓴᐃᔨᑦ ᑲᓇᑕᒥ ᖃᐅᔨᓯᒪᔪᑦ.

ᐊᒻᒪᓗ 95 ᐳᓴᓐᑎᖏᑦ ᐱᕋᔭᒃᑕᐅᓯᒪᔪᑦ ᖃᐅᔨᒪᓪᓗᑎᒃ ᐱᕋᔭᒃᑎᖏᓐᓂᒃ ᖃᓄᐃᑕᐃᓚᐅᖏᑎᓪᓗᒋᑦ.

“2017-ᒥ, ᐅᖓᑖᓂ ᒪᕐᕉᒃ ᑕᓪᓕᒪᓂᒃ (44 ᐳᓴᓐᑎ) ᐃᓅᓱᒃᑐᑦ ᐊᕐᓇᐃᑦ ᐱᕋᔭᒃᑕᐅᓯᒪᔪᑦ ᐸᓖᓯᑎᒎᖓᓪᓗᓂ ᐅᑭᐅᕐᑕᖅᑐᕐᒥᑦ ᐱᑦᑎᐊᖅᑕᐅᕙᒃᓯᒪᙱᓚᑦ ᐊᐃᑉᐸᖏᓐᓄᑦ.”

“ᐅᖓᑖᓂ ᐊᑕᐅᓯᖅ ᑕᓪᓕᒪᓂᒃ (22 ᐳᓴᓐᑎ) ᐱᕋᔭᒃᑕᐅᓯᒪᔪᑦ ᖃᐅᔨᒪᔭᒥᓄᑦ. ᐊᒻᒪᒃᑲᓐᓂᖅ 20 ᐳᓴᓐᑎᐅᔪᑦ ᐱᑦᑎᐊᖅᑕᐅᓯᒪᙱᑦᑐᑦ ᐃᓚᒋᔭᖏᓐᓄᑦ, ᒪᑯᓇᙵᑦ ᐊᖓᔪᖅᑳᖏᓐᓂᒃ, ᐃᑦᑐᑯᖏᓐᓂᒃ, ᐊᕐᓇᕐᕕᐊᓄᑦ, ᐊᒃᑲᖓᓄᑦ, ᐃᓚᖓᓄᑦ ᐅᕝᕙᓘᓐᓃᑦ ᖃᑕᙳᑎᖓᓄᑦ.”

ᖃᐅᔨᓴᕈᑎᐅᔪᖅ ᓇᓗᓇᐃᕐᓯᓯᒪᖕᒥᔪᖅ ᐃᓅᓱᒃᑑᓂᕐᓴᑦ ᐱᑦᑎᐊᖅᑕᐅᕙᙱᑦᑐᑦ ᒪᑯᓇᙵᑦ ᐱᔭᐅᓂᕐᓴᐅᕙᒃᑐᑦ ᐃᓚᖏᓐᓄᑦ, ᒪᑯᐊᓕ ᐊᖓᔪᒃᖠᐅᓂᕐᓴᑦ ᐱᑦᑎᐊᖅᑕᐅᙱᓐᓂᕐᓴᐅᕙᒃᖢᑎᒃ ᐊᐃᑉᐸᖏᓐᓄᑦ.

“ᖃᐅᔨᓴᕈᑎᐅᔪᖅ ᖃᐅᔨᒍᑎᐅᓂᕐᓴᐅᕙᒃᑐᖅ ᒪᑯᐊ ᐃᓅᓱᒃᑐᑦ ᐱᑦᑎᐊᖅᑕᐅᕙᙱᑦᑐᑦ ᐱᕐᔪᐊᓄᑦ ᐱᕋᔭᐅᑎᓄᑦ, ᓂᕕᐊᕐᓵᑦ 12 ᑐᖔᓂᑦ ᐅᑭᐅᖃᖅᑐᑦ ᐅᑭᐅᕐᑕᖅᑐᕐᒥᑦ ᐱᑦᑎᐊᖅᑕᐅᙱᓐᓂᕐᓴᐅᕙᒃᑐᑦ ᐃᓚᖏᓐᓄᑦ (54 ᐳᓴᓐᑎ), ᒪᑯᐊᓕ ᐃᓅᓱᒃᑐᑦ ᐊᕐᓇᐃᑦ ᐅᑭᐅᖃᖅᑐᑦ 18-ᓂ 24-ᓄ ᐅᑭᐅᕐᑕᖅᑐᕐᒥᑦ ᐊᐃᑉᐸᖏᓐᓄᑦ ᐱᑦᑎᐊᖅᑕᐅᙱᓐᓂᕐᓴᐅᓯᒪᔪᑦ (61 ᐳᓴᓐᑎ)” ᓇᐃᓴᐃᔨᑦ ᑲᓇᑕᒥᑦ ᐅᖃᖅᑐᑦ.

ᐸᓖᓯᒃᑯᑦ ᓇᓗᓇᐃᕐᓯᔪᓐᓇᕐᓂᕐᓴᑦ ᐅᑭᐅᕐᑕᖅᑐᕐᒥᑦ ᐱᑦᑎᐊᙱᖢᐊᖅᐸᒃᑐᓂᒃ

ᐊᔾᔨᒌᙱᔾᔪᑎᐅᔪᕐᓕ ᐊᑕᐅᓯ ᐅᑭᐅᕐᑕᖅᑐᕐᒥᐅᓂᒃ ᐊᒻᒪ ᓂᒋᕐᒦᑦᑐᓂᒃ ᑲᓇᑕᒥ ᐃᓚᓐᓇ ᐅᑭᐅᕐᑕᖅᑐᕐᒥᑦ, ᐸᓖᓯᒃᑯᑦ ᓇᓗᓇᐃᕐᓯᔪᓐᓇᕐᓂᕐᓴᐅᓇᔭᕐᓂᖏᓐᓂᒃ ᐱᑦᑎᐊᖅᐸᙱᑦᑐᑦ ᐃᓅᓱᒃᑐᓂᒃ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ: 81 ᐳᓇᓐᑎᒥ ᖃᓄᐃᓕᐅᕈᑎᓂᒃ ᐅᑭᐅᕐᑕᖅᑐᕐᒥᑦ, ᑭᓯᐊᓂᓕ 68 ᐳᓴᓐᑎᑐᐃᓐᓇᕐᓂᒃ ᑲᓇᑕᐅᑉ ᓂᒋᐊᓃᑦᑐᓂᒃ.

“ᐅᓇ ᐱᔾᔪᑎᖃᕈᓐᓇᑐᐃᓐᓇᕆᐊᓕᒃ ᖃᓄᐃᓕᐅᕈᑎᐅᕙᒃᑐᑦ ᓄᓇᓕᖕᓂ ᒥᑭᓐᓂᕐᓴᓂ ᓄᓇᖃᖅᑐᓪᓗ ᐃᖕᒥᖕᓂᒃ ᖃᐅᔨᒪᖃᑦᑕᐅᑎᓪᓗᑎᒃ, ᑕᐃᒪᓕ ᐊᔪᕐᓇᙱᓐᓂᕐᓴᐅᕗᖅ ᐸᓖᓯᒃᑯᑦ ᐱᕋᔭᒃᑐᒥᒃ ᓇᓗᓇᐃᕐᓯᔭᕆᐊᒃᓴᖅ,” ᓇᐃᓴᐃᔨᑦ ᑲᓇᑕᒥ ᐅᖃᖅᑐᑦ.

ᑕᒪᐅᓇᑦᑕᐃᓐᓇᖅ, ᐊᔾᔨᒌᙱᓐᓂᖅᑕᖃᓗᐊᙱᑦᑐᖅ ᐸᓯᔭᒃᓴᙳᕈᑎᐅᔪᓂᒃ ᒪᑯᓄᖓ ᐃᓅᓱᒃᑐᓄᑦ ᐊᕐᓇᓄᑦ ᐅᑭᐅᕐᑕᖅᑐᕐᒥᑦ (70 ᐳᓇᓐᑎ) ᑕᐅᑐᒃᖢᒍ ᑲᓇᑕᐅᑉ ᓂᒋᐊ (70 ᐳᓇᓐᑎ), ᓇᐃᓴᐃᔨᑦ ᑲᓇᑕᒥ ᖃᐅᔨᓚᐅᕐᑐᑦ.