ᐱᓕᕆᐊᖃᐃᓐᓇᖅᓂᖅ ‘ᑖᖅᑐᐊᓗᒃᓂᒃ ᐊᑐᖅᑕᐅᓂᑯᕕᓂᕐᓂᒃ’ ᐃᓕᓐᓂᐊᕆᐊᖅᕕᐅᕙᒃᑐᕕᓂᕐᓂᒃ

ᓇᓂᓯᔪᖃᕐᓂᖓ ᐅᓄᖅᑐᒻᒪᕆᖕᓂ ᐃᓗᕕᖅᑕᐅᓯᒪᔪᓂᒃ ᐊᑕᐅᓯᕐᒥ ᐅᕙᓂ ᐳᕆᑎᔅ ᑲᓚᒻᐱᐊᒥ ᐃᓕᓐᓂᐊᖅᕕᒃᒥ ᓄᓇᕗᒻᒥᐅᓂᒃ ᐃᖅᑲᐃᑎᑦᑎᕗᖅ ᐋᓐᓂᖅᓯᒪᒍᑎᖏᓐᓂᒃ

ᓱᕈᓰᑦ ᐃᓯᒐᐅᔭᖏᑦ ᐃᖃᓗᐃᑦ ᑐᒃᓯᐊᕐᕕᖏᑦᑕ ᓵᑦᑎᐊᖓᓅᖅᑕᐅᑲᑕᒃᑐᑦ, ᐃᓚᒋᔭᐅᓪᓗᓂ ᓴᐃᓐᑦ ᔫᑦ ᐋᖕᓕᑲᓐᑯᑦ ᑐᒃᓯᐊᖅᕕᒃ, ᐃᓱᒪᒋᔭᐅᓪᓗᑎᒃ 215 ᓱᕈᓰᑦ, ᑖᒃᑯᐊ ᑎᒥᖏ ᓇᓂᔭᐅᓚᐅᕐᒪᑕ ᐱᓇᓱᐊᕈᓯᐅᓚᐅᖅᑐᒥ ᐊᖏᔪᒻᒪᕆᐊᓗᖕᒥ ᐃᓗᕕᕐᒥ ᐃᓕᓐᓂᐊᕆᐊᖅᕕᐅᖃᑦᑕᖅᑐᕕᓂᖅᒥᒃ ᑳᒻᓘᑉᔅ, ᐳᕆᑎᔅ ᑲᓚᒻᐱᐊᒥᓐ. ᑲᓇᑕᓕᒫᒦᑦᑕᐅᖅ ᐊᔾᔨᐸᓗᖏᓐᓂᒃ ᐃᖅᑲᐅᒪᔾᔪᑎᖃᑲᑕᓚᐅᖅᑐᑦ ᑖᒃᑯᓂᐊ ᓇᓂᓯᔪᖃᖅᑎᓪᓗᒍ ᐊᒻᒪᓗ ᑕᒪᓐᓇ ᖃᓄᖅ ᑐᑭᖃᕐᓂᖓᓂᒃ ᓇᓂᓯᓂᐅᔪᖅ. (ᐊᔾᔨᓕᐅᕆᔨ ᑕᔅᑎᓐ ᐸᑖᕐ)

By ᒥᓚᓂ ᐅᕆᑦᓵᑦ

For an English version of this story, see Nunavut MLAs reflect on painful legacy of residential schools

ᓄᓇᕗᒥᑦ ᒪᓕᒐᓕᕆᔨᕐᔪᐊᑦ ᒪᓕᒐᓕᕆᕕᒃᒥᑦ ᓂᐱᖃᙱᑲᐃᓐᓇᓚᐅᖅᑐᑦ ᓇᒡᒐᔾᔭᐅᒥ ᐃᓱᒪᒋᓪᓗᒋᑦ 215 ᓱᕈᓰᑦ ᑎᒥᖏᑦ ᓇᓂᔭᐅᓵᓚᐅᖅᑐᑦ ᐃᓗᕕᖅᑕᐅᓯᒪᓪᓗᑎᒃ ᐊᑕᐅᓯᐊᓗᖕᒥᓐ ᐃᓕᓐᓂᐊᕆᐊᖅᕕᕕᓂᑐᖃᐅᑉ ᐃᓂᕕᓂᖓᓂᒃ ᐳᕆᑎᔅ ᑲᓚᒻᐱᐊᒥ ᐱᓇᓱᐊᕈᓯᐅᓵᖅᑐᒥᓐ.

ᐅᖃᖅᑎ ᐹᓪ ᖁᐊᓴ ᑲᑎᒪᓂᖅ ᐱᒋᐊᖅᑎᓕᓚᐅᖅᑕᖓ ᐃᒪᓐᓇ ᐅᖃᓪᓚᒃᖢᓂ.

“ᑭᒡᒐᖅᑐᐃᓪᓗᖓ ᑕᒪᐃᓐᓂᓕᒫᖅ ᒪᓕᒐᓕᕆᕕᒡᔪᐊᖅᒥ ᑲᑎᒪᔨᓂᒃ, ᕿᒃᓵᒍᑎᒋᔪᒪᒐᒃᑭᓐ 215 ᓱᕈᓰᑦ ᐊᖏᕐᕋᙲᓐᓇᖅᑐᕕᓂᑯᓗᐃᑦ,” ᐅᖃᖅᑐᖅ.

“ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᓪᓗᖓ, ᐊᒃᓱᐊᓗᒃ ᑖᒃᑯᐊ ᐃᒃᐱᒍᓲᑎᕙᒃᑲ ᑕᒪᑐᒧᖓ ᐊᒃᑐᖅᑕᐅᒻᒪᕆᒃᑐᑦ.”

“ᑕᒪᑦᑕ ᐅᕙᓃᑦᑐᑎᒍᑦ ᑲᑎᒪᕝᕕᖕᒦᑦᑐᑎᒍᑦ ᐃᓚᖃᖅᑐᒍᑦ ᐊᒻᒪ ᑭᒡᒐᖅᑐᐃᓪᓗᑕ, ᒫᓐᓇᒧᑦ, ᓱᓕ ᐊᒃᓱᕈᕈᑎᖃᒻᒪᕆᒃᑐᓂᒃ ᓄᓇᒋᔭᑦᑕ ᐊᑐᖃᑦᑕᖅᑕᕕᓂᖏᓐᓂᒃ,” ᐅᖃᖅᑐᖅ ᖁᐊᓴ.

“ᐱᔭᒃᓴᖃᕋᑦᑕ ᒪᓕᒐᓕᕆᓂᒃᑯᑦ ᐊᑐᕆᐊᖃᖅᑐᓂᒃ

ᔩᓂ ᕼᐊᑯᖓᒃ ᐃᕼᓗᐊᒃ, ᐃᖃᓗᒃᑑᑦᑎᐊᖅᒧᑦ ᒪᓕᒐᓕᐅᖅᑎ, ᐅᖃᐅᓯᖃᓚᐅᕐᒥᔪᖅ ᐊᑐᖅᑕᕕᓂᕐᒥᓂᒃ.

“ᐃᓕᓐᓂᐊᕆᐊᖅᑎᑕᐅᓚᐅᖅᓯᒪᖕᒥᒐᒪ, ᐅᕙᖓᓗ ᑎᓴᒪᓪᓗ ᖃᑕᙳᑎᒃᑲ ᐱᔭᐅᓚᐅᖅᓯᒪᖕᒪᑕ,” ᐃᕼᐊᓗᐊᒃ ᐅᖃᖅᑐᖅ. “ᑎᓴᒪᓂᒃ ᐅᑭᐅᖃᓚᐅᖅᓯᒪᔪᖓ.”

“ᐊᖓᔪᖅᑳᒃᑲ ᐃᓱᒪᒋᓪᓗᒋᑦ ᑕᓪᓕᒪᓂ ᕿᑐᖓᖃᖅᖢᑎᒃ ᐊᑕᐅᓯᑐᐊᕐᒥ ᐱᓯᒪᑎᑕᐅᓕᓚᐅᖅᓯᒪᖕᒪᑕ ᐊᑯᓂᐅᙱᑦᑐᖅ, ᑕᒪᓐᓇ ᐃᒃᐱᒋᔭᐃᑦ ᐃᒃᐱᒋᕙᕋ.

ᑳᑎ ᑕᐅᑐᙱ, ᒪᓕᒐᓕᐅᖅᑎ ᑲᖏᖅᖠᓂᐅᑉ ᐅᐊᖕᓇᖓᓄᑦ ᐊᒻᒪ ᐃᒡᓗᓕᒑᕐᔪᒃᒧᑦ, ᐅᖃᓚᐅᖅᑐᖅ ᕿᐊᓯᓚᐅᕐᓂᕋᖅᖢᓂ ᑐᓴᕋᒥ ᓱᕈᓰᑦ ᑎᒥᖏᓐᓂᒃ ᓇᓂᓯᔪᓂᒃ.

“ᐅᓇ ᑲᓇᑕᐅᑉ ᐊᑐᖅᑕᕕᓂᐊᓗᐊ ᐊᒻᒪᓗ ᐅᓄᕐᓂᖅᓴᖅᑕᖃᖅᑐᒃᓴᐅᓪᓗᓂ,” ᐅᖃᖅᑐᖅ.

“ᓱᕈᓰᑦ ᐱᔭᐅᑎᓪᓗᒋᑦ ᐅᒡᓚᑲᑕᒃᑐᖃᕈᓐᓃᓚᐅᕐᓯᒪᔪᖅ ᓱᕈᓯᕐᓂᒃ,” ᐅᖃᖅᑐᖅ. “ᓱᕈᓰᑦ ᐃᒡᓚᒪᔭᑲᑕᒍᓐᓃᖅᖢᑎᒃ ᐊᒻᒪ ᖁᕕᐊᓱᕈᓘᔭᖅᑐᖃᕈᓐᓃᖅᖢᓂ.”

“ᐃᓐᓇᑐᖃᕗᑦ ᐊᓯᙳᓚᐅᖅᓯᒪᔪᑦ, ᑭᓱᓕᒫᑦ ᐊᓯᙳᓚᐅᖅᓯᒪᔪᑦ,” ᐅᖃᖅᑐᖅ, ᐊᒻᒪᓗ ᐃᓄᖕᓂ ᐅᖃᓪᓚᖃᑎᖃᕐᓂᖅᓴᐅᖁᔨᓪᓗᓂ ᑕᒪᒃᑯᓂᖓ ᐊᒃᓱᕈᕈᑎᖃᖅᓯᒪᔪᓂᒃ. “ᐅᓇ ᓴᖅᑭᒃᑎᒃᑲᓐᓂᕈᑎᐅᖕᒪᓐ ᖁᕕᐊᓇᙱᑦᑐᕕᓂᐊᓗᖕᓂᒃ.”

13-ᖑᓚᐅᖅᓯᒪᔪᑦ ᓱᕈᓯᕐᓄᑦ ᐅᐸᒡᕕᐅᔪᑦ ᐃᓕᓐᓂᐊᕆᐊᖅᑐᓄᑦ ᓄᓇᕗᒥᑦ ᐊᒻᒪᓗ 193 ᑲᓇᑕᓕᒫᒥᑦ, ᑖᒃᑯᓇᓂᓗ ᑭᖑᓪᓕᖅᐹᖅ ᐊᐅᓚᑕᐅᓚᐅᖅᓯᒪᓪᓗᓂ 1996-ᒥᒃ.

ᐋᑕᒥ ᐋᕆᐊᒃ ᓚᐃᑦᕼᐊᐅᔅ, ᒪᓕᒐᓕᐅᖅᑎ ᐃᖃᓗᐃᑦ-ᒪᓂᕋᔭᒃᒧᑦ ᓯᕗᓕᐅᖅᑎᒥᒃ ᔫ ᓴᕕᑲᑖᕐᒥᒃ ᓇᖏᖃᑕᐅᖁᔨᓪᓗᓂ ᓄᓇᖃᖅᑳᖅᑐᓂᒃ ᐃᓄᖕᓂᒃ ᑲᓇᑕᒦᑦᑐᓂᒃ ᕿᓂᖁᔨᔪᓂᒃ ᑲᓇᑕᓕᒫᒥᒃ ᐃᓗᕕᐅᓇᔭᖅᑐᓂᒃ ᐃᓕᓐᓂᐊᕆᐊᖅᕕᕕᓂᕐᓂᒃ.

“ᐱᓕᕆᖃᑕᐅᔭᕆᐊᖃᕋᑦᑕ ᐃᑲᔪᕈᑎᐅᔪᓐᓇᖅᑐᑎᒍᑦ ᐃᓕᓐᓂᐊᕆᐊᖅᕕᐅᕙᓚᐅᖅᑐᓂᒃ ᐊᓯᖏᓐᓂᒃ ᕿᓂᒃᑲᓐᓂᖁᔨᓂᖅᒥᒃ,” ᐅᖃᖅᑐᖅ.

“ᐅᑯᐊ 215 ᐱᒻᒪᕆᐊᓘᓚᐅᕐᒥᔪᓐ,” ᓚᐃᑦᕼᐊᐅᔅ ᐅᖃᖅᑐᖅ. “ᐃᓅᓯᖏ ᑭᐱᔭᐅᓂᑰᖕᒪᑕ ᑕᒪᓐᓇᓗ ᐃᖅᑲᐅᒪᔭᕆᐊᖃᖅᖢᑎᒍᑦ.”

ᐊᓯᖏᑦ ᒪᓕᒐᓕᐅᖅᑎᐅᔪᑦ ᐅᖃᓪᓚᑲᑕᓚᐅᕐᒥᔪᑦ ᑭᒡᒐᖅᑐᖅᑕᖏᓐᓂᒃ ᐅᖃᓪᓚᒡᕕᐊᖃᑦᑕᕐᓂᖏᓐᓂᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓂᒃ ᐊᒻᒪᓗ ᑕᒪᓐᓇ ᑭᖑᕚᕇᖑᓕᖅᑐᓄᑦ ᓱᓕ ᐃᒃᐱᒋᔭᐅᔾᔪᑎᖃᕐᓂᖓᓂᒃ.

ᐅᓄᖅᑐᐃᑦ ᐊᑐᓚᐅᖅᑐᑦ ᐅᕆᓐᔨᓂᒃ ᑕᖅᓴᖃᖅᑐᓂᒃ ᐊᓐᓄᕌᓂᒃ ᖃᑭᖅᑯᐊᓂᓪᓘᓐᓃ ᐃᓱᒪᒋᓂᕐᒧᑦ ᐅᕆᓐᔾ ᐅᕕᓂᕈᖅ ᐅᓪᓗᖅ – ᓯᑎᐱᕆ 30 – ᑖᓐᓇᓗ ᐃᖅᑲᐅᒪᔾᔪᑎᒋᔭᐅᓪᓗᓂ ᐃᓕᓐᓂᐊᕆᐊᖅᕕᐅᕙᓚᐅᖅᑐᓂᒃ ᑲᓇᑕᒥ.

ᑕᒪᕐᒥᒃ 25 ᐊᐅᓚᖁᑏᑦ ᓇᑉᐸᑐᐃᓐᓇᖓᓄᑦ ᐋᖅᑭᒃᓯᒪᑎᑕᐅᓚᐅᖅᑐᑦ ᒪᓕᒐᓕᕆᕕᒡᔪᐊᑉ ᓵᑦᑎᐊᖓᓂ ᐃᖃᓗᖕᓂ. ᖁᐊᓴ ᐅᖃᓚᐅᖅᑐᖅ ᓯᕗᓪᓕᖅᐹᑦᑎᐊᒥᓐ ᑕᐃᒪᐃᓕᓯᒪᓂᖏᓐᓂᒃ.

ᑭᓇᑐᐃᓐᓇ ᐃᓱᒫᓘᑎᖃᓗᐊᖅᑐᖅ ᖃᖓᑐᐃᓐᓇᒃᑯᑦ ᒪᑐᐃᖓᔪᒧᑦ ᐃᑲᕐᕋᓂᒃ 24-ᓂ ᑕᐃᒪᙵ ᐅᖄᓚᒍᓐᓇᖅᑐᑦ ᐅᕗᖓ ᑲᓇᑕᒥ ᓄᓇᖃᖅᑳᖅᑐᓄᑦ ᐃᓕᓐᓂᐊᕆᐊᖅᕕᕕᓂᖕᓄᑦ ᐃᓱᒫᓘᑎᖃᓗᐊᒧᑦ ᐅᖄᓚᕝᕕᒃᓴᒧᑦ 1-866-925-4419 ᐅᖃᕐᓯᖃᕈᒪᓐᓂᕈᔅᓯ ᐊᒻᒪᓗ ᐃᑲᔪᕈᓐᓇᖅᑐᓂᒃ ᖃᐅᔨᒋᐊᕈᒪᓐᓇᕈᔅᓯ.

ᑲᓇᑕᒥ ᓄᓇᖃᖅᑳᖅᑐᑦ ᐃᓕᓐᓂᐊᕆᐊᖅᑐᕕᓂᖅᓄᑦ ᑲᑐᔾᔨᖃᑎᒌᖑᔪᑦ ᑐᐊᕕᕐᓇᖅᑐᒥ ᐅᖄᓚᕝᕕᒃᓴᐅᔪᑦ ᖃᖓᑐᐃᓐᓇᑦᑎᐊᖅ 24/7 ᐅᖃᓪᓚᒍᒪᔪᓄᑦ: 1-800-721-0066.

Share This Story

(0) Comments

Join the Conversation

Your email address will not be published. Required fields are marked *

*