ᐱᓕᕆᔨᒻᒪᕇᑦ ᐅᖃᖅᑐᑦ ᐊᖏᕐᕋᕆᔭᐅᔪᓂᒃ ᐊᔪᕈᓐᓃᕐᓯᒪᓂᖅ ᐃᑲᔪᕈᑎᓪᓚᕆᐅᓇᔭᕐᓂᖓᓂᒃ ᐊᑯᓂᐅᓂᕐᓴᖅ ᐃᓕᓐᓂᐊᕖᑦ ᐊᑐᖅᑕᐅᖃᑦᑕᕈᓐᓇᕐᓂᖏᓐᓄᑦ

For the English version of this story, see Maintained in the North: Experts say homegrown talent key to school longevity.

ᐅᓇ ᐅᓂᒃᑳᓕᐊᖑᓯᒪᔪᖅ ᐱᖓᔪᒋᔭᐅᔪᖅ ᐱᖓᓲᓕᖓᔪᓂᒃ ᐅᓂᒃᑳᓕᐊᖑᓯᒪᔪᓂᒃ ᓄᓇᕗᒥᑦ ᐃᓕᓐᓂᐊᕐᕖᑦ ᖃᓄᐃᓕᖓᓂᖏᓐᓂᒃ ᐊᒻᒪᓗ ᖃᓄᖅ ᐊᒃᑐᐃᔾᔪᑎᐅᓯᒪᓂᖏᓐᓂᒃ ᐃᓕᓐᓂᐊᖅᑎᑦᑎᓂᕐᒥᒃ ᓄᓇᕗᒥᑦ.

  ᐅᑭᐅᕐᑕᖅᑐᕐᒥ ᐱᓕᕆᔨᒻᒪᕆᐅᔪᑦ ᐊᔪᕈᓐᓃᕐᓯᒪᔪᑦ ᐅᖃᓚᐅᕐᑐᑦ ᐃᓕᓐᓂᐊᕐᕕᖕᓂ ᓴᓇᖃᑦᑕᕐᓂᖅ ᓄᓇᕗᒥᑦ ᐃᓚᖃᕐᓂᐊᖅᑐᖅ ᐊᖏᓂᕐᓴᓂᒃ ᐃᒡᓗᕐᔪᐊᓂᒃ, ᐊᑐᕐᓗᑎᒃ ᐃᒡᓗᒃᓴᓂᒃ ᐊᑐᕈᓐᓇᕐᓂᕐᓴᓂᒃ ᐊᒻᒪ ᐱᓕᕆᔾᔪᓯᐅᓂᐊᖅᑐᓂᒃ ᐊᒻᒪ ᐃᓕᓐᓂᐊᖅᑎᑦᑎᓗᑎᒃ ᓄᓇᕗᒻᒥᐅᓂᒃ ᐃᒡᓗᓕᐅᕐᓂᕐᒧᑦ ᐱᓕᕆᐊᖑᕙᒃᑐᓂᒃ.

“ᐊᒥᓱᒻᒪᕇᑦ ᐃᒡᓗᓕᐅᕈᓰᑦ ᐋᖅᑭᒃᑕᐅᓯᒪᖕᒪᑕ ᖃᓪᓗᓈᓄᑦ ᑲᓇᑕᐅᑉ ᓂᒋᐊᓃᑦᑐᓄᑦ ᐊᒻᒪᓗ ᐅᑭᐅᕐᑕᖅᑐᕐᒥ ᐊᑐᖅᑕᐅᓕᖅᐸᒃᖢᑎᒃ,” ᐅᖃᕐᑐᖅ ᔮᓐ ᐱᐅᓴᓐ, ᓄᓇᕗᑦ ᓯᓚᑦᑐᖅᓴᕐᕕᒃᒥ ᐃᒃᓯᕙᐅᑕᕆᔭᐅᔪᖅ ᐃᒡᓗᓕᐅᕐᓂᕐᒧᑦ ᐱᓕᕆᐊᒃᓴᓂᒃ.

ᑕᒪᓐᓇᓗ ᓇᖅᑭᔮᖅᖢᓂ.

2022ᒥ ᓄᓇᕗᒥᑦ ᐃᓕᓐᓂᐊᕐᕕᒃᓄᑦ ᐃᖅᑲᓇᐃᔭᖅᑎᐅᔪᑦ ᐱᔨᑦᑎᕋᐅᑎᓂᒃ ᑎᑎᕋᓚᐅᓯᒪᔪᑦ ᓴᓇᖁᔨᔾᔪᑎᓂᒃ 3,907ᓂ  ᒪᑯᓇᙵᑦ ᓱᓪᓗᓕᕆᓂᕐᒨᖓᔪᓂᒃ ᒪᐅᖓ ᑮᒃᓯᒪᔾᔪᑏᑦ ᓱᕋᒃᓯᒪᔪᓄᑦ ᐊᒻᒪ ᓴᓗᒻᒪᕐᓴᖅᑕᐅᔭᕆᐊᓕᖕᓂ ᐅᕐᓱᐊᓗᖕᒥ ᑯᕕᔪᕕᓂᕐᓂᒃ.

ᐱᒻᒪᕆᐅᓛᖑᔪᑦ ᓱᕋᒃᓯᒪᔪᓕᕆᓂᕐᒧᑦ ᐃᓕᓐᓂᐊᕐᕕᖕᓂ ᒪᑐᔾᔪᑎᐅᓚᐅᕐᓯᒪᔪᑦ 31ᖏᕐᓱᖅᖢᑎᒃ ᐊᒻᒪᓗ ᐊᓯᐅᔨᔾᔪᑎᐅᓪᓗᓂ 111.5 ᐃᓕᓐᓂᐊᕐᓇᓂᒃ ᐅᓪᓗᕐᓂ ᐊᕐᕌᒎᒃ ᒪᕐᕉᒃ ᐃᓗᐊᓂ.

“ᑕᒪᒃᑯᐊ ᐱᔾᔪᑎᖃᓗᐊᖅᑐᑦ ᖃᓄᐃᑦᑐᓂᒃ ᓴᓇᔭᐅᓯᒪᓂᖏᓐᓄᑦ ᖃᓄᕐᓗ ᓴᓇᔭᐅᕙᓪᓕᐊᓯᒪᓂᖏᓐᓄᑦ, ᑭᓯᐊᓂᓕ ᐱᒻᒪᕆᐅᓛᖑᓯᒪᔪᖅ ᖃᓄᖅ ᐃᒡᓗ ᑲᒪᒋᔭᐅᖃᑦᑕᕐᓯᒪᓂᖓ,” ᐅᖃᕐᑐᖅ ᑭᓕᐅᕋᓐᔅ ᓯᓈᑦ, ᐊᖓᔪᖅᑳᖅ ᐊᒻᒪ ᐊᐅᓚᑦᑎᔨᒻᒪᕆᒃ NCC ᐱᕙᓪᓕᐊᔪᓕᕆᔨᒃᑯᑦ ᓕᒥᑎᑦᑯᓐᓄᑦ.

ᓯᓈᑦ ᐅᖃᓚᐅᕐᑐᖅ ᖃᓄᐃᑦᑐᑐᐃᓐᓇᐅᒐᓗᐊᖅᐸᑕ ᐃᒡᓗᐃᑦ, ᒥᑭᑦᑐᑦ ᓱᕋᒃᓯᒪᔪᑦ ᐅᖃᐅᓯᐅᕙᙱᑦᑐᑦ ᐃᓕᓐᓂᐊᕐᕕᖕᓂ ᐊᖏᓕᕚᓪᓕᕈᓐᓇᕐᒪᑕ ᐊᒻᒪᓗ ᐊᑭᑐᓂᕐᓴᐅᓕᕐᓗᑎ ᓈᒻᒪᙱᓕᐅᕈᑎᐅᓂᒃᑯᑦ.

ᐊᑕᐅᓯᕐᓕ ᑕᒪᑐᒧᖓ ᐋᖅᑭᒍᑎᐅᓇᔭᕐᑐᖅ, ᐅᖃᕐᑐᖅ, ᒪᑯᐊ ᓄᓇᓖᑦ ᑲᒪᒋᔭᐅᑎᑕᐅᓗᑎᒃ ᐃᒡᓗᓂᒃ ᓱᕋᒃᓯᒪᔪᓕᕆᓂᒃᑯᑦ ᒪᐅᓇ ᖃᓄᐃᑎᑦᑎᑦᑕᐃᓕᓂᕐᒧᑦ ᐱᓕᕆᕙᓪᓕᐊᖃᑦᑕᕐᓂᒃᑯᑦ ᐊᒻᒪ ᐱᓕᕆᐊᓄᑦ ᐊᔪᕈᓐᓃᖅᓴᖅᑎᑕᐅᓯᒪᓂᒃᑯᑦ.

“ᐃᒡᓗᓕᐅᕐᑐᐃᑦ ᓄᓇᓕᖕᓂ ᓄᓇᖃᕐᑐᑦ ᐱᐅᓛᖑᓇᔭᕐᑐᑦ ᑲᒪᒋᔭᖃᕐᓂᕐᒥᒃ ᓴᓇᔭᖏᓐᓂᒃ,” ᓯᓈᑦ ᐅᖃᕐᑐᖅ.

“ᐅᖃᓕᒫᑐᐃᓐᓇᔾᔮᙱᒻᒪᑕ ᖃᓄᖅ ᓴᓇᔭᕆᐊᖃᕐᓂᖏᓐᓂᒃ ᐅᖃᓕᒫᒐᕐᓂᒃ ᐅᕝᕙᓘᓐᓃᑦ ᖃᓄᐃᓕᐅᕆᐊᖃᕈᑎᓂᒃ ᐱᓕᕆᐊᕆᔭᕆᐊᖃᖅᑕᖏᓐᓄᑦ. ᑐᑭᓯᓯᒪᔪᑦ ᖃᓄᖅ ᐃᒡᓗ ᓴᓇᔭᐅᓯᒪᖕᒪᖔᑕ.”

ᐊᒻᒪᓗ ᐊᑭᑭᓐᓂᕐᓴᐅᓇᔭᖅᖢᓂ ᓄᓇᓕᖕᓂ ᐊᔪᙱᓐᓂᓖᑦ ᐃᑲᔪᕐᑕᐅᕙᒡᓗᑎᒃ ᐊᒻᒪᓗ ᓄᓇᖏᓐᓂᒃ ᐱᓕᕆᐊᓄᑦ ᐱᔭᒃᓴᓂᒃ ᐱᕈᖅᐸᓪᓕᐊᔾᔪᑎᐅᓗᓂ ᒪᑯᓇᙵᓪᓕ ᐃᒡᓗᓕᐅᕐᑎᓂᒃ ᑎᑭᑎᑦᑎᓂᕐᒥᒃ ᓄᓇᕗᑦ ᓯᓚᑖᓂᙶᖅᑐᓂᒃ, ᓯᓈᑦ ᐅᖃᕐᑐᖅ.

“ᐃᓱᒪᔪᖓᓕ ᓈᒻᒪᙱᓕᐅᕈᑎᐅᓛᖑᔪᖅ ᐃᓕᓐᓂᐊᖅᑎᑦᑎᔭᕆᐊᖃᕐᓂᖅ ᐊᑐᐃᓐᓇᐅᓕᕐᓂᐊᖅᑐᓂᒃ ᓱᕋᒃᓯᒪᔪᓕᕆᓂᕐᒨᖓᔪᓄᑦ,” ᐅᖃᕐᑐᖅ.

ᐊᖏᕐᕋᒥ ᐃᓕᓐᓂᐊᕐᓯᒪᔪᑦ ᐃᒡᓗᓂ ᓱᕋᒃᓯᒪᔪᓕᕆᓂᕐᒥᒃ

ᓄᓇᕗᒻᒥ ᓯᓚᑦᑐᖅᓴᕐᕕᒃᒥ, ᐱᐅᓴᓐ ᐊᒻᒪ ᐋᐳᑦ ᓇᑦᓯᕐ, ᐃᓕᓴᐃᔨᓄᑦ ᐃᓕᓐᓂᐊᖅᑎᑦᑎᔪᓂᒃ ᐃᖅᑲᓇᐃᔮᒃᓴᓄᑦ ᐊᒻᒪ ᐱᓕᕆᔾᔪᑎᓕᕆᓂᕐᒧᑦ, ᐃᓱᒪᔫᒃ ᐊᕐᕌᒍᓂ ᐱᖓᓱᓂ ᐃᒡᓗᓂ ᓱᕋᒃᓯᒪᔪᓕᕆᓂᕐᒧᑦ ᐃᓕᓐᓂᐊᒐᒃᓴᖅ ᐅᕙᓂ ᑲᒪᒋᔭᐅᓪᓚᕆᖕᓂᐊᖅᖢᓂ ᑲᖏᖅᖠᓂᖅ ᓯᓚᑦᑐᖅᓴᕐᕕᒃᒥ ᐃᑲᔪᕈᑎᐅᓂᐊᕐᓗᓂ.

ᐱᒋᐊᖅᑕᐅᓚᐅᕐᓯᒪᑎᓪᓗᒍ ᐊᕐᕌᒍᑦ 11 ᓯᕗᓂᐊᓂ, ᐅᓇ ᐱᓕᕆᐊᒧᑦ ᐃᓕᓐᓂᐊᖅᑎᑦᑎᔾᔪᑎ ᐃᓕᓐᓂᐊᖅᑎᓂᒃ ᓱᕋᒃᓯᒪᔪᓕᕆᓂᕐᒥᒃ ᐱᓕᕆᔾᔪᑎᐅᕙᒃᑐᓂᒃ ᒪᑯᓂᖓ ᐅᖅᑰᓴᐅᑎᓕᕆᓂᕐᒥᒃ, ᐅᐊᔭᓕᕆᓂᕐᒥᒃ, ᕿᔪᓕᕆᓂᕐᒥᒃ, ᓇᑎᓕᕆᓂᕐᒥᒃ ᐊᒻᒪᓗ ᐃᑭᐊᕐᒥᓕᖅᓱᐃᓂᕐᒥᒃ.

ᐅᓇ ᐱᓕᕆᐊᒃᓴᖅ ᐋᖅᑭᒃᑕᐅᓯᒪᔪᖅ ᐃᒡᓗᕐᔪᐊᓂ ᓱᕋᒃᓯᒪᔪᓕᕆᔪᓐᓇᕐᓂᕐᒥᒃ ᐅᑭᐅᕐᑕᖅᑐᕐᒥ, ᐱᐅᓴᓐ ᐅᑲᕐᑐᖅ.

“ᐊᐅᓚᔾᔪᑎᓕᕆᓂᕐᒥᒃ ᐱᓕᕆᔨᐅᔪᑦ ᐊᒻᒪ ᐃᒡᓗᒃᓴᓂᒃ ᑎᑎᕋᐅᔭᒐᖅᑏᑦ ᐱᓕᕆᐊᕆᔭᐅᑦᑎᐊᖅᐸᓪᓕᐊᔪᖅ ᐊᒻᒪᓗ ᐅᔾᔨᕆᔾᔪᑎᐅᓕᖅᖢᓂ ᓯᓚᒧᑦ ᑕᒪᒃᑯᐊᒃ ᐊᒃᑐᖅᑕᐅᖃᑦᑕᓪᓚᕆᖕᓂᖏᓐᓂᒃ,” ᐅᖃᕐᑐᖅ.

ᐊᓂᒍᐃᓂᑯᐃᑦ ᐃᑲᔪᖃᑦᑕᕐᓯᒪᓕᕐᑐᑦ ᐃᒡᓗᓂ ᑲᒪᒋᔭᖃᕆᐊᖃᕐᓂᕐᒥᒃ, ᐃᒡᓗᓂᒃ ᐅᔭᕆᐊᒃᓯᐅᕐᕕᖕᓂ ᐱᓕᕆᐊᓃᑦᑐᓂᒃ, ᐊᒻᒪᓗ ᐃᓛᓐᓂᑦ ᐃᓕᓐᓂᐊᕐᕕᖕᓂ, ᐆᑐᓇᖅ ᓄᓇᕗᒻᒥ ᓯᓚᑦᑐᖅᓴᕐᕕᒃᒥ ᐃᓕᓐᓂᐊᕐᕕᒋᔭᖓᓂᒃ.

ᓇᑦᓯᕐ ᐅᖃᓚᐅᕐᑐᖅ ᐃᓕᓐᓂᐊᕈᑎᒃᓴᐃᑦ ᓄᑖᙳᕆᐊᖅᑕᐅᕙᓪᓕᐊᓂᕋᖅᖢᓂᒋᑦ ᑖᒃᑯᐊ ᐃᓕᓐᓂᐊᖅᑐᑦ ᓄᑖᓂ ᐱᓕᕆᔾᔪᑎᒃᓴᓂ ᐊᑐᕈᓐᓇᖁᓪᓗᒋ ᐊᒻᒪ ᖃᓄᐃᓕᐅᕆᐊᖃᕈᑎᓂ ᐃᒡᓗᓕᐅᕐᓂᒃᑯᑦ ᑕᑯᖃᑦᑕᖅᑕᖏᑦᑎᒍᑦ.

“ᐱᒻᒪᕆᐊᓘᖅᑰᕐᒪᓐ ᐃᓅᖃᑎᕗᑦ ᐃᓕᓐᓂᐊᖅᑎᓪᓗᑎᒍᑦ ᐅᑭᐅᕐᑕᖅᑐᕐᒥ ᐃᒡᓗᓂ ᑲᒪᒋᔭᖃᕐᓂᕐᒧᑐᐃᓐᓇᐅᙱᑦᑐᖅ ᑭᓯᐊᓂᓕ ᐃᓱᒪᓕᐅᕆᕙᓪᓕᐊᖃᑦᑕᕐᓂᒃᑯᑦ ᐱᓕᕆᐊᖑᕙᒃᑐᓂᒃ,” ᓇᑦᓯᕐ ᐅᖃᕐᑐᖅ.

ᔭᔅᑎᓐ ᓚᑭᓕᐅᕐ, ᐃᒡᓗᒃᓴᓂ ᑎᑎᕋᐅᔭᒐᖅᑎ ᐹᑭᓐ ᐃᒡᓗᓂ ᑎᑎᕋᐅᔭᒐᖅᑎᒃᑯᓐᓂ ᑕᒪᑐᒥᖓ ᐊᖏᓚᐅᕐᒥᔪᖅ.

ᑭᓱᖃᒡᒐᕐᓂᐅᑉ ᐅᖓᑖᒎᕐᓯᒪᓂᖅ

ᐋᑐᕚᒥ ᐱᓕᕆᕝᕕᒃ ᐃᒡᓗᒃᓴᓂᒃ ᖃᓄᐃᓕᖓᓂᒃᓴᖏᓐᓂᒃ ᐊᒻᒪ ᑎᑎᕋᐅᔭᒐᖅᑏᑦ ᑲᒻᐸᓂ ᓄᓇᕗᒥᑦ ᐃᓕᓐᓂᐊᕐᕕᒃᓂ ᓴᓇᔭᐅᔪᒃᓴᓕᕆᓯᒪᔪᑦ ᐅᑯᑎᑐᓇᖅ ᑰᒑᕐᔫᑉ ᐊᕐᕕᓕᒡᔪᐊᖅ ᐃᓕᓐᓂᐊᕐᕕᐊᓗᒃ, ᑭᒻᒥᕈᒻᒥ ᐱᑕ ᐱᑦᓯᐅᓛᒃ ᐃᓕᓐᓂᐊᕐᕕᐊᓗᒃ ᐊᒻᒪᓗ ᓇᐅᔮᑦ ᑑᒑᓕᒃ ᐃᓕᓐᓂᐊᕐᕕᐊᓗᒃᒥ.

ᖃᓄᐃᓕᐅᖅᐸᓪᓕᐊᓂᕐᒧᑦ ᐱᒻᒪᕆᐅᓛᖑᔪᖅ ᐅᓇ ᐃᓱᒪᒋᔭᐅᓂᖓ ᖃᓄᖅ ᐃᓕᓐᓂᐊᕐᕕᒃ ᐊᑐᖅᑕᐅᖃᑦᑕᕐᓂᐊᕐᒪᖔᑦ. ᐊᒥᓱᓄᑦ ᓄᓇᓕᖕᓄᑦ ᒥᑭᓐᓂᕐᓴᓄᑦ, ᐃᓕᓐᓂᐊᕐᕖᑦ ᐃᓕᓐᓂᐊᕐᕕᑐᐃᓐᓇᐅᙱᑎᑕᐅᖕᒪᑕ, ᐱᙳᐊᕐᕕᐅᕙᒃᖢᑎᒃ, ᐱᙳᐊᕈᑎᓂᒃ ᐱᙳᐊᕐᕕᐅᓪᓗᑎᒃ ᐊᒻᒪᓗ ᑐᐊᕕᕐᓇᖅᑐᖅᑕᖃᖅᑎᓪᓗᒍ ᐅᖅᑯᐊᕆᔭᐅᓕᖅᐸᒃᖢᑎᒃ.

“ᐃᒡᓕᐅᓕᕌᖓᑦᑕᑦ ᐃᓕᓐᓂᐊᕐᕕᒃᓴᒥᒃ, ᐃᒡᓗᓕᐅᖃᑦᑕᙱᓐᓇᑦᑕ ᒪᓕᒃᖢᑕ ᐅᓄᕐᓂᖏᓐᓂᒃ ᐃᓕᓐᓂᐊᕆᐊᖅᐸᒃᑐᑦ, ᓴᓇᖃᑦᑕᕋᑦᑎᒍᑦ ᐱᓕᕆᕝᕕᐅᔾᔪᑎᒃᓴᖓᒍᑦ,” ᓚᑭᓕᐅᕐ ᐅᖃᕐᑐᖅ.

ᑕᐃᒪᐃᓕᐅᕐᓂᐊᖅᑐᑦ ᑖᒃᑯᐊ ᐱᓕᕆᖃᑎᒌᖕᓂᐊᖅᑐᑦ ᑭᖑᓪᓕᕐᒥ ᐊᖏᔪᒥ ᐱᓕᕆᐊᖃᓕᖅᐸᑕ, ᓄᑖᙳᕆᐊᖅᑎᑦᑎᓂᖅ ᓴᓪᓕᕐᓂᒃ ᓴᒃᑯ ᐃᓕᓐᓂᐊᕐᕕᒃᒥ, ᓴᓇᔭᐅᓚᐅᕐᓯᒪᔪᖅ 1979ᒥ. ᐅᓇ ᐱᓕᕆᓂᖅ ᐃᓚᖃᕐᓂᐊᖅᑐᖅ ᐊᖏᔪᒥᒃ ᐃᓚᒋᐊᖅᑕᐅᓗᓂ, ᓄᑖᒥᒃ ᓄᓇᓕᖕᓄᑦ ᐃᓕᓐᓂᐊᕐᕕᐅᖃᑦᑕᕐᓂᐊᖅᑐᒥᒃ ᐊᒻᒪᓗ ᓄᑖᒥ ᐸᐃᕆᕝᕕᒃᓴᒥᒃ.

ᐊᒥᓲᓂᕐᓴᐃᑦ ᐃᓕᓐᓂᐊᕐᕖᑦ ᓴᓇᔭᐅᓂᑯᑦ 1970ᓗ ᐊᒻᒪ 1990ᓗ ᐊᑯᓐᓂᖓᓂ ᐃᓱᒪᓂᖃᕈᑎᐅᓚᐅᙱᒻᒪᑕ ᐅᓄᕐᓯᕚᓪᓕᓛᖅᑐᓂᒃ ᐊᕐᕌᒍᑦ ᖁᓕᑦ ᐃᓗᐊᓂᒃ ᐊᒻᒪᓗ ᖃᓄᑎᒋ ᑖᒃᑯᐊ ᓄᖑᓴᖅᐸᓪᓕᐊᔾᔪᑎᐅᓂᐊᕐᓂᖏᓐᓂᒃ ᐃᒡᓗᓂᒃ, ᓚᑭᓕᐅᕐ ᐅᖃᕐᑐᖅ.

ᐊᒥᓲᐃᑦ ᓄᑕᐅᙱᓐᓂᕐᓴᑦ ᐃᓕᓐᓂᐊᕐᕖᑦ ᓴᓇᔭᐅᓯᒪᖕᒪᑕ ᕿᔪᖕᓂ, ᑕᒪᒃᑯᐊᓗ ᓄᖑᑉᐸᓪᓕᐊᓴᕋᐃᓐᓂᕐᓴᐅᓪᓗᑎᒃ ᓯᓚ ᓂᒡᓚᓱᖃᑦᑕᕐᓂᖓᓄᑦ ᐊᒻᒪᓗ ᓴᕕᕋᔭᖕᓂ ᐱᑕᖃᓗᐊᑦᑎᐊᖅᐸᙱᖢᑎᒃ.

“ᐃᓱᒪᒋᓗᒍ ᐹᖏᑦ ᖃᔅᓰᖅᑕᐅᓗᑎᒃ ᒪᑐᐃᖅᑕᐅᖃᑦᑕᕐᓂᖏᑦ ᐅᓪᓗᕐᒥ ᐅᓄᕐᑐᒻᒪᕆᐊᓗᖕᓄᑦ ᐃᓕᓐᓂᐊᖅᑎᓄᑦ ᑕᕝᕘᓈᖅᐸᒃᑐᓂᒃ ᐱᓇᓱᐊᕈᓯᐅᑉ ᐃᓗᐊᓂ,” ᓚᑭᓕᐅᕐ ᐅᖃᕐᑐᖅ.

“ᐃᓚᖓᓕ ᖃᓄᖅ ᐋᖅᑭᒃᓯᒪᓂᐊᕐᓂᖏᓐᓂᒃ ᐊᒻᒪᓗ ᐃᓕᓐᓂᐊᕐᕖᑦ ᓴᓇᓗᒋᑦ ᐊᑐᖅᑕᐅᖃᑦᑕᕐᓂᐊᕐᓂᖏᑦᑎᒍᑦ ᐊᒥᓱᓄᑦ ᐊᒻᒪ ᖃᓄᐃᓕᔭᐅᖃᑦᑕᕋᔭᕐᓂᖓᒍᑦ ᐊᑯᓂᕈᓗᒃ ᐊᑐᕐᑕᐅᓂᐊᕐᓗᑎᒃ.”

ᓚᑭᓕᐅᕐ ᐅᖃᓚᐅᕐᑐᖅ ᐹᑭᓐ ᐃᒡᓗᒃᓴᓂ ᑎᑎᕋᐅᔭᖅᑎᑦ ᓄᑖᖅ ᓴᒃᑯ ᐃᓕᓐᓂᐊᕐᕕᒃ ᖃᓄᐃᓕᖓᓂᐊᕐᓂᖓᓂᒃ ᐃᓄᖃᕈᓐᓇᕐᓗᓂ 450ᖏᓐᓂᒃ ᐃᓕᓐᓂᐊᖅᑎᓂᒃ, ᒫᓐᓇ ᐃᓕᓐᓂᐊᖃᑦᑕᖅᑐᑦ ᒪᕐᕈᐃᕐᓗᒍ ᐅᓄᕐᓂᕐᓴᐅᓇᔭᖅᑐᓄᑦ.

ᐃᓕᓐᓂᐊᕐᕕᒃ ᓄᑖᙳᕆᐊᖅᑕᐅᒻᒪᕆᖕᓂᐊᖅᖢᓂ ᐆᑐᓇᖅ ᓴᒃᑯ ᐃᓕᓐᓂᐊᕐᕕᒃᑐᑦ, ᐃᓚᖃᕐᓂᐊᕐᒥᔪᖅ ᐸᕐᓇᐅᑎᓕᐊᕆᔭᐅᔪᓂᒃ.

ᑖᒃᑯᑎᒎᓇᓕ ᐃᒡᓗᓕᐅᖅᑏᑦ ᐊᔾᔨᒌᙱᑦᑑᑎᓂᒃ ᖃᐅᒻᒪᖅᑯᑎᓄᑦ, ᐅᖅᑰᓴᐅᑎᓄᓪᓗ ᐱᖁᑎᐅᓂᐊᖅᑐᓂᒃ, ᑕᐃᒪᓐᓇ ᐃᓚᖓ ᖃᒥᓐᓂᖅᐸᑦ ᐊᓯᐊᓂᒃ ᐊᑐᕈᓐᓇᕋᔭᕐᓂᐊᕐᒪᑕ, ᒪᑯᑎᑐᓇᖅ ᐊᑭᓐᓇᒥ ᐅᖅᑰᓴᐅᑎ, ᑕᒪᒃᑯᐊᑦᑕᐅᖅ ᓈᒻᒪᙱᓕᐅᕈᑎᖃᓕᕐᓗᓂ ᐊᑐᖅᑕᐅᖔᕈᓐᓇᕋᔭᕐᒪᑕ ᐋᖅᑭᒃᓱᖅᑕᐅᓂᖏᓐᓂᒃ ᓈᒻᒪᙱᓕᐅᕈᑎᑦ.

ᐅᕝᕙᓘᓐᓃᑦ, ᐱᐅᓴᓐ ᐅᖃᕐᑐᖅ, ᐃᒡᓗᓕᐅᖅᑏᑦ ᓴᓇᓗᑎᒃ ᐊᒥᓱᓂᒃ ᐃᒪᕐᒧᑦ ᐅᖅᑰᓴᐅᑎᐅᕙᒃᑐᓂᒃ ᐃᓕᓐᓂᐊᕐᕕᒃᒥ ᐊᑕᐅᓯᑐᐊᖑᙱᑦᑐᒥᒃ ᑕᐃᒪᓐᓇ ᖃᒥᑦᑐᖃᖅᐸᑦ ᐊᓯᐊᓂᒃ ᐊᑐᖅᑕᐅᔪᓐᓇᖅᑐᖃᐃᓐᓇᐅᔭᕐᓗᓂ.

“ᐅᓇ ᐃᓱᒪᒋᔭᐅᓚᐅᕐᓯᒪᙱᑦᑎᐊᖅᑐᖅ ᓴᓇᔭᐅᓕᓵᖅᑎᓪᓗᒋᑦ ᐊᕐᕌᒍᑦ 30ᓂ 40ᓄ ᓯᕗᓂᑦᑎᓐᓂᒃ, ᓲᖃᐃᒻᒪ ᑕᐃᔅᓱᒪᓂ ᐅᖅᑰᓴᐅᑎᖃᕐᕕᒃᓴᐃᑦ ᐃᓂᖃᑦᑎᐊᖃᑦᑕᓚᐅᙱᒻᒪᑕ ᐃᓕᓐᓂᐊᕐᕕᖕᓂ,” ᓚᑭᓕᐅᕐ ᐅᖃᕐᑐᖅ.

“ᐊᐅᓪᓚᔾᔪᑎᖏᓐᓄᑦ ᖃᓄᐃᓕᐅᕈᑎᐅᔪᑦ ᐊᔪᕐᓇᙱᔾᔪᑎᐅᓇᓱᒃᑐᑦ.”

ᐱᐅᔪᐃᑦ ᐊᑭᑐᓗᐊᖅᑐᐊᓘᓂᖏᑦ

ᐃᓕᓐᓂᐊᕐᕕᖕᓂ ᓴᓇᓂᖅ ᐊᕐᕌᒍᒐᓴᖕᓂ ᐊᑐᖅᑕᐅᓂᐊᖅᑐᓂᒃ ᐊᑭᑐᓐᓇᖅᑐᕈᓘᖕᒪᑦ.

“ᐅᑭᐅᕐᑕᖅᑐᖅ ᐊᒃᓱᐊᓗᒃ ᓯᓚᖓ ᐊᓯᙳᖃᑦᑕᖅᑐᒥᒃ ᓴᓇᕝᕕᒋᓪᓗᒍ ᐊᒻᒪᓗ ᐱᖁᑎᒃᓴᐃᑦ ᐊᑯᓂᕈᓗᒃ ᐱᖁᑎᒋᔭᐅᔪᒃᓴᐅᑎᓪᓗᒋᑦ,” ᓚᑭᓕᐅᕐ ᐅᖃᕐᑐᖅ.

ᒪᐅᖓ ᑎᑭᑦᑐᓐᓇᕐᒪᑦ “ᑎᓴᒪᐃᕐᓗᓂ ᑕᓪᓕᒪᐃᕐᓗᓂᓘᓐᓃ” ᐊᑭᑐᕐᓇᐅᕙᖕᒪᑕ ᐃᓕᓐᓂᐊᕐᕕᖕᓂ ᓴᓇᓂᐊᕐᓗᓂ ᓄᓇᕗᒥᑦ ᑕᐅᑐᒃᖢᒋᓪᓕ ᓇᓕᒧᖏᓐᓂᒃ ᓴᓇᓂᐊᕐᓗᓂ ᐋᑐᕚᒥ, ᓇᓗᓇᐃᒃᑯᑎᒋᓪᓗᒍ. ᐅᓇ ᓴᒃᑯ ᐃᓕᓐᓂᐊᕐᕕᒃ ᓄᑖᙳᕆᐊᖅᑕᐅᓂᖓ ᐃᓱᒪᒋᔭᐅᔪᖅ ᒫᓂᒃ $65 ᒥᓕᐊᓐ ᑖᓚᓂ ᐊᑭᖃᕐᓂᐊᕋᓱᒋᔭᐅᓪᓗᓂ.

ᐃᓕᓐᓂᐊᕐᓂᓕᕆᔨᒃᑯᑦ ᒥᓂᔅᑕᖓ ᐹᒥᓚ ᒍᕉᔅ ᐅᖃᓚᐅᕐᑐᖅ ᑕᒪᒃᑯᐊ ᐊᑭᑦᑐᕋᐅᑎᐅᔪᑦ ᐱᔭᐅᓵᓕᖃᑦᑕᕐᐸᑕ ᐃᑲᔪᕋᔭᕐᑐᖅ ᐊᑭᓕᕐᓱᕈᑎᐅᔭᕆᐊᓕᖕᓄᑦ.

ᐊᑭᑦᑐᕋᐅᑎᒍᑏᑦ ᒐᕙᒪᒃᑯᓐᓄᑦ ᓴᓇᖁᔾᔨᔾᔪᑎᐅᔪᑦ ᒪᑯᓄᖓ ᓄᑖᙳᕆᐊᕆᐊᓕᖕᓄᑦ ᐅᕝᕙᓘᓐᓃᑦ ᓴᓇᔭᒃᓴᓂᒃ ᐱᓕᕆᐊᖃᖅᐸᒃᑐᑦ ᐊᑭᑦᑐᕋᐅᑎᒍᑎᒋᔪᓐᓇᖅᑕᖏᓐᓂᒃ.

ᕿᓚᒥᐅᓂᕐᓴᒃᑯᑦ ᑐᓂᔭᐅᔾᔪᑎᐅᒃᐸᑕ ᑕᐃᒪᓕ ᐱᓕᕆᐊᖃᖅᐸᒃᑐᑦ ᓇᓂᓯᓇᓱᒍᓐᓇᕐᓂᕐᓴᐅᓇᔭᖅᑐᑦ ᐊᑐᒃᑲᓐᓂᕈᓐᓇᕐᓂᕐᓴᓂᒃ ᐊᒻᒪ ᐊᑭᓕᒐᕐᓂᕐᓂᖅᓴᐅᔪᓂᒃ ᐱᖁᑎᓂᒃ ᓴᓇᔭᒃᓴᓂᒃ ᐊᒻᒪᓗ ᖃᓄᖅ ᐃᒡᓗᓕᐅᕈᓯᐅᕙᖕᓂᕐᒥᒃ ᐅᑭᐅᕐᑕᖅᑐᕐᒥ, ᒍᕉᔅ ᐅᖃᕐᑐᖅ.

ᐃᒡᓗᐃᑦ ᐊᑐᕐᑕᐅᔪᓐᓇᕐᓂᖏᑦ ᐃᓱᖃᔭᒻᒪᑕ. ᑭᓯᐊᓂᓕ ᓈᒻᒪᒃᑐᓂᒃ ᐃᒡᓗᒃᓴᓂᒃ ᐊᒻᒪᓗ ᓱᕋᒃᓯᒪᔪᓕᕆᓂᒃᑯᑦ ᑲᒪᒋᔭᐅᑦᑎᐊᕐᓂᖓᒍᑦ ᑕᐃᒪᓕ ᐃᒡᓗ ᓄᓇᕗᒥᑦ ᐊᑯᓂᐅᑎᒋᓂᖓ ᐊᑐᖅᑕᐅᔪᓐᓇᕐᓂᖓ ᐊᑯᓂᐅᑎᒋᔭᕆᐊᖃᙱᑦᑐᖅ ᖃᓪᓗᓈᓃᑦᑐᑎᑐᑦ, ᓯᓈᑦ ᐅᖃᕐᑐᖅ. ᐱᐅᓴᓐ ᓄᓇᕗᒻᒥ ᓯᓚᑦᑐᖅᓴᕐᕕᒃᒥᐅᑕᖅ ᑕᒪᑐᒥᖓ ᐊᖏᖃᑕᐅᔪᖅ.

“ᐃᓱᒪᔪᖓ ᓯᕗᓂᒃᓴᕗᑦ ᖃᐅᒪᓂᕐᓴᐅᓂᐊᕐᓂᖓᓂᒃ,” ᐅᖃᕐᑐᖅ.