ᐱᕐᕈᓗᐊᕿᑦᑕᐃᓕᓂᕐᒨᖓᔪᑦ ᐸᓯᔭᒃᓴᖑᕈᑎᐅᔪᑦ ᓴᐱᓇ ᐅᔭᕋᒃᓯᐅᖅᕕᒃᒥ ᑐᖁᓂᑯᒧᑦ

For English version, see Safety-related charges laid in Sabina mine death

ᑎᓴᒪᑦ ᑲᒻᐸᓃᑦ ᐅᓄᒻᒪᕆᒃᑐᓄ ᐸᓯᔭᒃᓴᙳᖅᑎᑕᐅᕗᑦ ᐊᒃᑐᐊᔪᓂᒃ ᐃᓅᔪᓐᓃᓚᐅᖅᑐᒥ ᐃᖅᑲᓇᐃᔭᖅᑎᒥ ᓴᐱᓇ ᒎᓗᒥ ᐊᒻᒪ ᓯᐊᕗᒥ ᐅᔭᕋᒃᓯᐅᖅᕕᐅᑉ ᐸᒃ ᕆᕗᒥ ᐅᔭᕋᒃᓯᐅᖅᕕᒋᔭᖓᓂ ᐊᕐᕌᓂᐅᓚᐅᕐᓯᒪᔪᖅ ᔭᓄᐊᕆ 2022-ᒥ.

ᓴᐱᓇ ᒎᓗᒥ ᐊᒻᒪ ᓯᐊᕗᒥ ᑯᐊᐳᕇᓴᓐ, ᒫᑐᕆᒃᔅ ᐄᕕᐄᓴᓐ ᓴᓘᓴᓐᔅ ᐃᖕᒃ., ᒫᑐᕆᒃᔅ ᕿᑎᕐᒥᐅᑦ ᓕᒥᑎᑦ, ᐊᒻᒪ ᒑᓚᓐ ᕆᔅᑐᕇᓴᓐᔅ ᐃᖕᒃ. “ᐸᓯᔭᒃᓴᖑᖅᑎᑕᐅᓚᐅᕐᒪᑕ ᐅᓄᕐᑐᓂ ᓱᕋᐃᓯᓂᕐᒧᑦ” ᓄᓇᕗᒥᑦ ᐱᕐᕈᓗᐊᕿᑦᑕᐃᓕᓂᕐᒧᑦ ᒪᓕᒐᖅᒦᑦᑐᓂᒃ ᐊᒻᒪᓗ ᐅᔭᕋᒃᓯᐅᖅᕕᒃᒥᑦ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪ ᐱᕐᕈᓗᐊᕿᑦᑕᐃᓕᓂᕐᒧᑦ ᒪᓕᒐᖅᒥᒃ, ᐅᑯᐊ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ ᑐᓴᖅᑎᑦᑎᓚᐅᕐᑐᑦ ᐱᓇᓱᐊᕈᓯᐅᓚᐅᕐᑐᒥ.

ᐅᑯᐊ ᐸᓯᔭᒃᓴᙳᕈᑎᐅᔪᑦ ᐅᕙᙶᖅᓯᒪᔪᑦ ᔭᓄᐊᕆ 17, 2022-ᒥ. ᑐᓴᒐᒃᓴᑎᒍᑦ ᐊᕐᕌᒍ ᐊᓂᒍᕐᓯᒪᓕᖅᑎᓪᓗᒍ ᐃᖅᑲᓇᐃᔭᖅᑎᒋᔭᐅᔪᖅ ᐅᑯᐊ ᐱᕐᕈᓗᐊᕿᑦᑕᐃᓕᓂᕐᒧᑦ ᑲᒥᓴᓐᑯᑦ ᓇᓗᓇᐃᕐᓯᓚᐅᕐᑐᑦ ᑕᕝᕙᓂ ᐅᓪᓗᓂ ᐃᖅᑲᓇᐃᔭᓚᐅᕐᓯᒪᓂᖏᓐᓂᒃ ᓯᑯᒃᑯᑦ ᐊᖅᑯᑎᓂᒃ ᑭᙵᐅᑉ ᖃᓂᒋᔭᖓᓂᒃ.

ᓴᓇᑎᓪᓗᒋᑦ ᓯᖁ ᓱᕋᒃᖢᓂ ᑖᒃᑯᐊ ᓄᓇᓯᐅᑎ ᐊᒻᒪ ᐊᖑᑎ ᐊᖅᑯᑦᑐᖅ ᐃᒫᖅᖢᑎᒃ. ᑖᓐᓇᓕ ᐃᖅᑲᓇᐃᔭᖅᑎ ᐃᓅᔪᓐᓃᓚᐅᕐᓯᒪᔪᖅ.

ᐃᖅᑲᓇᐃᔭᖅᑎᐅᑉ ᐊᑎᖓ ᐅᖃᐅᓯᐅᓚᐅᙱᒻᒪᑦ.

ᐸᓯᔭᒃᓴᙳᕈᑎᐅᔪᑦ ᐅᖃᕐᓯᒪᓚᐅᕐᓯᒪᔪᑦ ᐊᑐᓕᖅᑎᑦᑎᓯᒪᙱᓐᓂᖏᓐᓂᒃ ᐃᖅᑲᓇᐃᔭᖅᕕᒃᒥ ᐊᑐᕆᐊᓕᖕᓂ, ᖃᐅᔨᓇᓱᓚᐅᙱᓐᓂᖏᓐᓂᒃ ᐋᓐᓂᐊᖃᖅᑕᐃᓕᓂᒃᑯᑦ ᐊᒻᒪ ᐱᕐᕈᓗᐊᕿᑦᑕᐃᓕᓂᒃᑯᑦ ᑲᒪᒋᔭᒃᓴᖏᓐᓂᒃ ᐊᒻᒪᓗ ᑐᓴᐅᒪᑎᑦᑎᙱᓐᓂᖏᓐᓂᒃ ᐱᕐᕈᓗᐊᕿᑦᑕᐃᓕᓂᕐᒧᑦ ᖃᐅᔨᓴᕆᐊᖃᕐᓂᕐᒥᒃ ᐊᒻᒪᓗ ᐊᓯᖏᓐᓂᒃ ᓈᒻᒪᙱᓕᐅᕈᑎᐅᔪᓐᓇᖅᑐᓂᒃ, ᐅᑯᐊ ᑲᒥᓴᓐᑯᑦ ᐅᖃᓚᐅᕐᑐᑦ.

ᐅᑯᐊ ᑲᒥᓴᓐᑯ ᐊᓯᖏᓐᓂᒃ ᑐᓴᖅᑎᑦᑎᒃᑲᓐᓂᓚᐅᙱᑦᑐᑦ.

ᓯᕗᓪᓕᖅᐹᒥᒃ ᐃᖅᑲᖅᑐᖅᑕᐅᕝᕕᒃᓴᖓ ᐋᖅᑭᒃᑕᐅᓯᒪᔪᖅ ᒫᔅᓯ 6-ᒧᑦ ᐃᖃᓗᖕᓂ.