ᐱᖓᓱᑦ ᐆᒪᐃᓐᓇᖅᐳᑦ ᓇᓄᕐᒥ ᐹᖅᑕᐅᓂᐅᔪᒥ ᑲᖏᖅᓱᐊᓗᔾᔪᐊᖅ ᖃᓂᒋᔭᖓᓂ

For English version, see 3 survive polar bear attack near Kangiqsualijjuaq

70-ᓂᒃ−ᐅᑭᐅᓕᒃ ᐊᖑᒻᒥ ᐃᕐᓂᖓᓗ ᐸᓂᖓᓗ ᐆᒪᐃᓐᓇᓚᐅᖅᐳᑦ ᓇᓄᕐᒥ ᐱᒋᐊᖅᑕᐅᓂᐅᔪᒥ ᑐᐱᖓᓐᓂ ᐱᓇᓱᐊᕈᓯᐅᓚᐅᖅᑐᒥ ᑲᖏᖅᓱᐊᓗᔾᔪᐊᖅ ᖃᓂᒋᔭᖓᓂ, ᓄᓇᓕᐅᑉ ᒪᐃᔭᖓ ᐅᖃᖅᐳᖅ.

ᑲᓂ ᐋᓯᕙᒃ ᐊᒻᒪ ᐸᓂᖓ ᓯᖅᑯᐊ ᐱᐊᕋᓐ, 25, ᑰᔾᔪᐊᑉ ᐋᓐᓂᐊᕕᖓᓄᐊᖅᑕᐅᓚᐅᖅᐳᑦ ᐱᕐᔪᐊᖑᔪᒥ ᑭᓯᐊᓂ ᑐᖁᓐᓇᙱᑦᑐᓂ ᐋᓐᓂᕐᓂᐅᔪᓂ.

ᐋᓯᕙᐅᑉ 35-ᓂᒃ-ᐅᑭᐅᓕᒃ ᐃᕐᓂᖓ ᓃᑲᓪᓚᒃ ᐱᐊᕋᓐ — ᑐᖂᑦᑎᓚᐅᖅᑐᒥ ᓇᓄᒃᒥ — ᐋᓐᓂᕐᓂᖃᓚᐅᙱᓚᖅ, ᐅᖃᓚᐅᖅᐳᖅ ᑲᖏᖅᓱᐊᓗᔾᔪᐊᖅ ᒪᐃᔭᖓ ᒫᒋ ᐃᒧᓪᓗᒃ.

ᑕᐃᒪᐃᓚᐅᖅᐳᖅ 140 ᑭᓛᒥᑐᐸᓗᖕᓂ ᐅᐊᖕᓇᒥ ᑲᓇᖕᓇᕐᒥ ᑲᖏᖅᓱᐊᓗᔾᔪᐊᕐᒥ, ᐹᖅᑕᐅᓂᑯᓂ ᓄᓇᖃᖅᑐᓂ.

3 ᐅᓪᓛᕐᔪᐊᒥ ᔪᓚᐃ 26−ᒥ, ᐃᒧᓪᓗᒃ ᐅᖃᓗᒡᕕᐅᓚᐅᖅᐳᖅ ᐅᖃᖅᑐᒥ ᐱᖓᓱᓂ ᐃᓄᖕᓂ ᐊᐅᓪᓛᖅᑐᓄᑦ ᑭᓪᓕᓂᕐᒧᑦ ᐱᒋᐊᖅᑕᐅᓚᐅᕐᓂᖏᓐᓂ ᓇᓄᕐᒧᑦ.

ᐅᓪᓛᖓᓂ, ᑕᒃᓯᕐᔪᐊᓚᐅᖅᐳᖅ ᓄᓇᓕᖕᓂ, ᑐᑭᖃᖅᑐᒥ ᖁᓕᒥᒎᓕᖕᒥ ᓴᐳᔾᔨᓇᓱᐊᕐᓂᕐᒥ ᐱᔪᓐᓇᔾᔮᙱᓐᓂᖓᓂ.

4 ᐅᓪᓛᕐᔪᐊᒃᑯᑦ, ᐅᒥᐊᒃᑯᑦ ᓴᐳᔾᔨᔨᐅᔪᓂ ᑲᑎᙵᓂᐅᔪᒥ ᐃᖏᕐᕋᓯᑎᑕᐅᓚᐅᖅᐳᑦ ᐊᒻᒪ 6:15 ᐅᓪᓛᒃᑯᑦ, ᑎᑭᓚᐅᖅᐳᑦ ᑕᐃᑯᖓ ᑕᖕᒫᕐᕕᐅᔪᒧᑦ ᐱᓚᐅᖅᖢᑎᒃ ᑕᒪᒃᑭᓂ ᐋᓐᓂᖅᓯᒪᔪᓂ ᐃᓄᖕᓂ.

ᓃᑲᓪᓚᒃ ᐱᐊᕋᓐ ᕿᒪᒃᑕᐅᓚᐅᖅᐳᖅ ᖃᔭᕆᐊᕐᒥ ᐅᑎᖅᑎᑦᑎᓂᐊᕋᒥ. ᑐᖂᑦᑎᓚᐅᖅᐳᖅ ᓇᓄᕐᒥ ᖁᑭᐅᒻᒧᑦ ᐊᑕᐅᓯᕐᒥ ᒦᑕᓪᓗᐊᒥ ᐅᖓᓯᒃᑎᒋᔪᒥ, ᐅᖃᐅᓯᐅᓪᓗᓂ ᕙᐃᔅᐳᒃᑯᑦ ᑎᑎᕋᕐᓂᐅᔪᒥ ᑎᑎᕋᖅᑕᐅᔪᒥ ᖃᓂᒋᔭᐅᔪᒥ ᐃᓚᒋᔭᐅᔪᒥ.

ᑕᐃᑲᓂᓗᒃᑖᖅ ᓴᐳᔾᔭᐅᓇᓱᐊᕐᓂᖓᓂ ᐊᒃᓱᕈᕈᑕᐅᔪᒥ, ᓯᖅᑯᐊ ᐱᐊᕋᓐ ᐅᖃᖃᑎᖃᐃᓐᓇᓚᐅᖅᐳᖅ ᐃᓚᖏᓐᓂ ᓄᓇᓕᖓᓂ ᖃᖓᑦᑕᖅᑎᑕᐅᓯᒪᔪᒥ ᐱᓕᕆᔾᔪᑕᐅᔪᒥ.

ᑲᑎᙵᓂᐅᔪᓂ ᐃᓄᖕᓂ ᐅᖓᓯᓗᐊᙱᑦᑐᒥ ᐱᒋᐊᖅᑕᐅᔪᓄᑦ ᑎᑭᐅᑎᓚᐅᖅᐳᑦ ᓯᕗᓂᐊᓂ ᓴᐳᔾᔨᓂᐅᔪᒥ ᑲᑎᙵᓂᐅᔪᓂ ᑎᑭᓚᐅᖅᑳᕋᑎᒃ.

ᒪᕐᕉᒃ ᐋᓐᓂᖅᓯᒪᔪᑦ ᐅᑎᓚᐅᖅᐳᑦ ᓄᓇᓕᖕᓄᑦ 8:15 ᐅᓪᓛᐸᓗᒃᑯᑦ, ᑕᒪᒃᑭᑦ ᐃᕐᙲᓐᓇᑲᐅᑎᒋ ᐋᓐᓂᐊᕕᓕᐊᕈᑎᒧᑦ ᐊᐅᓪᓚᖅᑎᑕᐅᓚᐅᖅᐳᑦ ᑰᔾᔪᐊᕐᒧᑦ. ᐋᓯᕙᒃ ᐊᐅᓪᓚᖅᑎᑕᐅᓚᐅᖅᐳᖅ ᒪᓐᑐᕆᐋᓪᒧᑦ ᐃᓅᓕᓴᖅᑕᐅᓂᖓᓄᑦ ᐋᓐᓂᕐᓂᖏᓐᓄᑦ.

ᑕᐃᒪᐃᑎᓪᓗᒍ, ᓃᑲᓪᓚᒃ ᐱᐊᕋᓐ ᓱᓕ ᐅᑎᓚᐅᙱᓚᖅ ᓄᓇᓕᖕᓄᑦ.

10:30 ᐅᓪᓛᐸᓗᖕᒥ, ᐃᒧᓪᓗᒃ ᐅᖃᓚᐅᖅᐳᖅ, ᐊᓯᐊᓂ ᑲᑎᙵᓂᐅᔪᒥ ᐊᐅᓪᓚᖅᑎᑕᐅᓚᐅᖅᐳᑦ ᖁᓕᒥᒎᓕᒃᑯᑦ ᐸᖅᓴᐃᓂᕐᒥ ᐊᖑᒻᒥ. ᑭᐅᑲᑕᓚᐅᙱᓚᖅ inReach ᐱᓕᕆᔾᔪᓯᐅᔪᒥ ᐃᒻᒥᓄᑦ ᕿᒪᒃᑕᐅᓚᐅᖅᑐᒥ.

ᑭᓯᐊᓂ 5:30 ᐅᓐᓄᓴᐸᓗᖕᒥ, ᑭᐅᓚᐅᖅᐳᖅ ᐅᖃᓗᖕᓂᐅᔪᓄᑦ, ᐅᖃᖅᖢᓂ 20 ᑭᓛᒥᑐᐸᓗᖕᓂ ᐅᖓᓯᒃᑎᒋᓚᐅᖅᐳᖅ ᓄᓇᓕᖕᓄᑦ.

ᓇᓅᑉ ᑎᒥᖓ ᐅᑎᖅᑎᑕᐅᓚᐅᖅᐳᖅ ᓄᓇᓕᖕᓄᑦ ᖃᐅᔨᓴᖅᑕᐅᓂᐊᖅᖢᓂ ᐱᖦᖤᙱᓴᕐᓂᕐᒧᑦ.

“ᐊᖏᔫᓚᐅᙱᓚᖅ ᓇᓄᖅ,” ᐃᒧᓪᓗᒃ ᐅᖃᓚᐅᖅᐳᖅ, “ᐃᓐᓇᙳᓵᕐᓂᑰᓪᓗᓂ ᓇᓅᓚᐅᖅᐳᖅ.”

“ᐅᐱᐅᖅᑲᕐᔪᐊᖅᐳᖓ ᐃᓄᖕᓂ ᐃᓚᐅᖃᑕᐅᓚᐅᖅᑐᓂ ᓴᐳᔾᔨᓇᓱᐊᕐᓂᐅᔪᒥ ᐊᒃᓱᕈᕐᓂᐅᔪᒥ,” ᐅᖃᓚᐅᖅᐳᖅ. “ᐃᓱᓕᓐᓂᑦᑎᐊᕙᐅᓚᐅᖅᐳᖅ ᐃᑉᐸᒃᓴᖅ ᖃᐅᔨᒪᓪᓗᓂ ᐊᑖᑕᐅᔪᖅ ᐊᒻᒪ ᐸᓂᖓ ᐆᒪᓂᖏᓐᓂ. ᐃᓱᐊᓂ, ᖃᓄᐃᔾᔮᙱᓚᑦ.”

ᐃᕐᓂᖓ ᐅᑎᑕᐃᓐᓇᕋᒥ, ᐃᒧᓪᓗᒃ ᐅᖃᓚᐅᖅᐳᖅ ᓄᓇᓕᐅᔪᑦ “ᖃᓱᔾᔫᒥᓚᐅᖅᐳᑦ.”

“ᐅᙵᕙ ᑲᖏᖅᑐᖓᑕ ᐅᐊᖕᓇᖓᓂ ᓇᓄᕐᒥ ᓄᓇᒋᔭᐅᕗᖅ,” ᐅᖃᓚᐅᖅᐳᖅ. “ᐊᖑᓇᓱᒃᑎᒻᒪᕆᐅᔪᓪᓘᓐᓃᑦ ᑕᐃᒪᐃᑦᑐᒥ ᖃᓄᐃᓕᖓᓂᖃᕈᓐᓇᖅᐳᑦ.

“ᐃᓕᑦᑎᔭᕆᐊᖃᖅᐳᒍᑦ ᐊᒻᒪ ᑕᑯᓗᑕ ᖃᓄᖅ ᓴᓇᒃᑲᓐᓂᕐᓂᕐᒥ ᐅᓄᕐᓂᖅᓴᐅᔪᓂ ᐃᒡᓗᕋᓛᓂ ᑕᐃᑲᓂ ᐃᓂᐅᔪᒥ,” ᐅᖃᓚᐅᖅᐳᖅ. “ᑕᐃᓐᓇ ᐃᓂᐅᔪᖅ ᑕᑖᖅᐳᖅ ᓂᕿᑦᑎᐊᕙᖕᓂ, ᐊᒻᒪ ᐊᒥᓱᓂ ᐃᓄᖕᓂ ᑕᐃᑯᖓ ᐊᖑᓇᓱᒋᐊᓲᖑᕗᑦ.”

ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᐊᔪᕐᓇᖅᑎᑦᑎᓯᒪᕗᖅ ᓇᓚᐅᑦᑖᕆᓂᕐᒥ ᐆᒪᔪᓂ ᑕᐃᑲᓂ ᐊᕕᒃᑐᖅᓯᒪᓂᐅᔪᒥ.

“ᐅᐱᕐᙶᒥ ᐊᐅᒃᓵᓕᓂᖃᕐᔪᐊᓚᐅᖅᐳᒍᑦ ᑕᒪᑐᒪᓂ ᐊᕐᕌᒎᔪᒥ,” ᐃᒧᓪᓗᒃ ᐅᖃᓚᐅᖅᐳᖅ. “ᐆᒪᔪᐃᑦ, ᐃᖃᓗᐃᑦ, ᑭᓱᓕᒫᑦ ᑕᖅᑭᒥ ᕿᓚᒻᒥᐅᓂᖅᓴᐅᕗᑦ.

“ᑕᒪᓐᓇ ᑐᑭᖃᖅᐳᖅ ᓄᑖᓂ ᐊᒃᓱᕈᕐᓇᕐᓂᐅᔪᓂ ᐊᒥᓱᓄᑦ ᐃᓄᖕᓄᑦ ᐅᕙᓂ.”